„Сеење на семето за Царството“ при обиколките со списанија

¹ Песна 133 во Пејте му фалби на Јехова носи наслов „Сеење на семето за Царството“. Таа се темели на Исусовата илустрација во која делото на правење ученици е споредено со сеење семе (Мат. 13:4—8, 19—23). Текстот на песната гласи: „А колку ќе паднат на плодното тло/Ќе зависи многу од вас“. Како можеме да ја зголемиме делотворноста на нашата служба? Еден начин е со воспоставување и одржување обиколка со списанија.

² Преку обиколката со списанија можат да се постигнат неколку цели. 1) Редовните посети на секои две седмици ти овозможуваат да изградиш пријателски однос со заинтересираниот. 2) Редовно му доставуваш на тоа лице животоважни информации кои се содржани во Стражарска кула и Разбудете се! 3) Преку вашите разговори можеш да му помогнеш на лицето да развие копнеж за библиската вистина, што може да води до библиска студија (1. Петр. 2:2).

³ Како да се започне обиколка со списанија: Секогаш кога некој ќе покаже интерес за списанијата, објасни дека во секое издание се појавуваат извонредни статии и дека ќе ти биде мило да ги доставуваш секои две седмици. Откако ќе си заминеш, запиши го името и адресата на лицето, датумот на посетата, датумите на врачените изданија, статијата што е истакната, како и темите кои особено го интересирале лицето.

⁴ Можеш да започнеш обиколка само со неколку луѓе. Потоа работи на тоа да ја зголемиш додавајќи други кај кои оставаш списанија. Како што расте твојата обиколка, можеш да ја организираш територијално за полесно да ја обработуваш. Внимателно запишувај кои изданија си ги оставил на секоја посета и кога. Додавај забелешки за вашите разговори и за тоа како да продолжиш да го развиваш интересот за вистината кога следниот пат ќе го посетиш лицето.

⁵ Вклучи деловни луѓе и луѓе од разни професии: Искуството покажало дека дуќанџиите и други луѓе од разни професии веројатно редовно ќе ги земаат нашите списанија. Во својата обиколка со списанија еден старешина го имал градоначалникот на неговиот град. Еден објавител започнал студија со 80-годишниот сопственик на една градежна компанија за набавка откако му носел списанија десет години по ред!

⁶ Една пионерка влегла во некоја продавница и запознала една двојка која не ја примила многу срдечно. Меѓутоа, бидејќи ги прифатиле списанијата, одлучила да ја стави двојката во својата обиколка со списанија. Со текот на времето, сестрата сакала да престане да ги посетува бидејќи биле многу нељубезни и никогаш не зборувале, па дури и кога ги прашувала за нивното гледиште. Но, сестрата се молела за тоа и на крајот ѝ ја оставила на двојката книгата Живеј засекогаш. Откако ја прочитала, сопругата извикнала: „Конечно ја пронајдов вистината!“ Била започната библиска студија и подоцна двојката се крстила. Истрајноста на пионерката навистина донела добар плод.

⁷ Правење повторни посети: Кога ќе добиеш ново списание, прочитај ја секоја статија. Побарај ги мислите кои ќе бидат привлечни за секого од твојата обиколка. Потоа, кога ќе се вратиш, можеш да речеш: „Додека ја читав оваа статија, помислив на Вас и на тоа дека би можела да Ве интересира“. Објавителите од сите возрасти можат да се радуваат на обиколка со списанија. Дури и едно мало дете може да рече: „Мило ми е што Ве гледам повторно. Вашите најнови примероци на Стражарска кула и Разбудете се! пристигнаа. Мислам дека ќе Ви се допадне оваа статија со наслов . . .“

⁸ Поттикни исчекување за идните статии со тоа што ќе свртиш внимание на рамката со наслов „Во нашето следно издание“. Кога статиите се појавуваат во серии, истакни го тоа и охрабри го читателот да не пропушти ниту еден дел. Не заборавај дека секогаш кога ќе врачиш списанија на некое лице кое е на твојата обиколка со списанија, можеш да забележиш повторна посета. А пред сѐ, запомни дека наша цел е да ги развиеме тие посети во домашни библиски студии.

⁹ Редовно посетувај ги луѓето од твојата обиколка: Можеш да ја обработиш твојата обиколка со списанија во секое време што ти одговара — наутро во текот на седмицата, доцна попладне, рано навечер или во текот на викендот откако ќе поминеш некое време во делото од куќа до куќа. Ако не можеш да ја спроведеш твојата обиколка затоа што си болен или, пак, си на годишен одмор, замоли некој друг објавител од твоето семејство или собрание да ги врачи списанијата наместо тебе. На тој начин, оние кои се на твојата обиколка нема да пропуштат да ги добијат списанијата на време.

¹⁰ Еден начин да се сее семето на Царството е редовно да им ги носиш Стражарска кула и Разбудете се! на сите оние кои се на твојата обиколка со списанија. Додека ги поучуваш за вистината од Писмото, тие може да ја сфатат смислата на речта на Царството и на крајот заедно со тебе да ги донесуваат плодовите на Царството (Мат. 13:8, 23).