Христијанската служба — нашето главно дело

¹ Сите ние имаме различни видови работа што мораме да ја вршиме. Грижата за домашните е божествено барање (1. Тим. 5:8). Меѓутоа, работата што е вклучена во тоа божествено барање не треба да го засени делото на проповедање на Царството и правење ученици (Мат. 24:14; 28:19, 20).

² Исус ни дал пример што треба да го следиме така што ќе ‚го бараме најнапред царството‘ (Мат. 6:33; 1. Петр. 2:21). Иако материјално имал малку, тој целосно бил зафатен со тоа да ја врши волјата на својот Татко (Лука 4:43; 9:58; Јован 4:34). Се трошел себеси давајќи сведоштво во секоја прилика (Лука 23:43; 1. Тим. 6:13). Ги поттикнал своите ученици да имаат ист таков силен интерес во делото на жетвата (Мат. 9:37, 38).

³ Да го имитираме Исус денес: Можеме да го имитираме примерот на Исус така што ќе се стремиме да водиме едноставен живот што се сосредоточува на христијанската служба. Ако ги имаме неопходните работи за живот, да обрнеме внимание на библискиот совет да престанеме да стекнуваме сѐ повеќе и повеќе од работите на овој свет (Мат. 6:19, 20; 1. Тим. 6:8). Колку е само подобро да се трудиме да го зголемиме својот удел во делото на проповедање! Ако се соочуваме со тешки околности, и ние да се напрегаме како Исус, не дозволувајќи животните грижи да го засенат нашето главно дело на објавување на добрата вест за Царството (Лука 8:14; 9:59—62).

⁴ Дури и оние што имаат многу одговорности му даваат предност на делото на проповедање. Еден брат што има големо семејство, одговорна работа и служи како старешина во христијанското собрание, вели: „Службата ја гледам како моја кариера“. Една сестра пионерка вели: „Пионерската служба е повредна од најуспешната световна кариера“.

⁵ Да го следиме примерот на Исус, сеедно какви се нашите околности. Како? Така што ќе ја направиме христијанската служба нашето главно дело.