‚Темелно да сведочиме‘ — проповедајќи во станбени згради
1. Што вклучува ‚темелното сведочење за добрата вест‘?
1 По примерот на апостол Павле, и ние сакаме ‚темелно да сведочиме за добрата вест‘ (Дела 20:24). Затоа настојуваме да им ја пренесеме пораката за Царството на колку што е можно повеќе луѓе на нашето подрачје. Тоа значи дека треба да им сведочиме и на оние што живеат во станбени згради. Но, понекогаш не е лесно да се влезе во зградите. Сепак, бидејќи во нив живеат многу луѓе, таму имаме прилика да зборуваме за добрата вест со повеќе лица.
2. Зошто е важно да бидеме внимателни и проникливи кога сведочиме во згради?
2 Бидејќи криминалот и насилството се секојдневие, сѐ повеќе станбени згради се заклучени и имаат чувар или, пак, се опремени со камери за надзор (2. Тим. 3:1, 2). Куќниот совет на зградата можеби ќе одлучи да не им се дозволува влез на непоканети лица. Чуварот или претседателот на куќниот совет можеби ќе инсистира да си заминеме оттаму, особено ако некој од станарите се пожали на нас. Од овие причини, важно е да бидеме внимателни и проникливи.
3. Кога е најдобро да сведочиме во зградите, и зошто?
3 Кога да сведочиме: Како и на другите подрачја, најдобро е да проповедаме кога станарите обично се дома. Ако доаѓаме кога повеќето станари се отсутни, може да бидеме сомнителни. Најчесто, многу објавители ги наоѓаат луѓето дома во раните вечерни часови, како и во сабота и во недела попладне. Ако сведочиме во зградите премногу рано, особено за викенд, некој станар може да се пожали на куќниот совет.
4, 5. Како би можеле да влеземе во некои згради со заклучен влез?
4 Како да влеземе внатре: Објавителите не треба да контактираат со претседателот или со некој друг член на куќниот совет пред да одат во служба. Ако заклучената зграда има домофон, можеме да го користиме за да најдеме некој што ќе сака да зборуваме со него. Во некои згради, откако ќе разговараме со лицето што нѐ пуштило да влеземе, можеби ќе можеме да им сведочиме и на другите станари одејќи од врата до врата. Но, во други случаи, би било мудро да излеземе од зградата и повторно преку домофон да контактираме со следниот станар. Треба добро да процениме со колку станари ќе контактираме на овој начин при едно доаѓање.
5 Некои станари можеби повеќе сакаат да им кажеме преку домофон зошто ги посетуваме. Во тој случај, учтиво претстави се. Користи го името на станарот ако е запишано во именикот покрај домофонот. Накратко кажи зошто си дојден. Некои имале успех кога прочитале некој увод директно од брошурката Како да се започнат и продолжат библиски дискусии.
6. Што треба да правиме кога сведочиме во згради што имаат чувар?
6 Ако зградата има чувар кој не ни дозволува да сведочиме внатре, можеме да се обидеме да му сведочиме нему. Многу чувари сакаат да ја читаат нашата литература. Можеби дури и ќе успееме да ја проучуваме Библијата со него во портирницата на зградата. Ако чуварот ни дозволи да одиме кај некој станар што покажал интерес, обично е најдобро да не одиме и на други врати во зградата.
7. Што треба да имаме на ум во врска со нашата чанта за служба?
7 Нашиот изглед и однесување: Ако носиме големи чанти ќе бидеме многу упадливи. Затоа, можеби е подобро да користиме помала чанта или, пак, воопшто да не носиме. Некои објавители ги ставаат публикациите во папка и ја носат својата Библија в рака или в џеб.
8. Како треба да се организира една група што сведочи во зграда?
8 Најдобро е да не се собираме во големи групи, особено во влезовите или на паркиралиштата, бидејќи со тоа ќе свртиме непотребно внимание. Треба особено да бидеме претпазливи кога проповедаме во згради што се наоѓаат на опасни подрачја (Изр. 22:3). На пример, два до три пара објавители би можеле да сведочат на ист кат доволно блиску едни до други за да можат да се слушнат. Би можеле да се менуваат на секоја врата — додека едните сведочат, другите да чекаат.
9. Како можеме да покажеме учтивост, и зошто ова е важно?
9 Кога ќе влезеш во некоја зграда, избриши си ги чевлите и убаво затвори ја вратата. Ако се однесуваме учтиво, станарите ќе имаат помалку причини да се жалат на нас. Откако ќе влезеш, немој непотребно да се задржуваш во влезот, туку оди директно до лифтот или на катот каде што треба да сведочиш. Така нема да им бидеме сомнителни на оние што ќе нѐ видат во зградата.
10. Како ќе ја избегнеме непотребната врева во ходниците?
10 Во многу станбени згради, вревата се пренесува низ ходниците. Затоа, зборувај доволно гласно за станарот да може убаво да те слушне, но не прегласно. Кога разговараш со другите објавители, биди тивок, но зборувај смирено, и немој да шепотиш за да не бидете сомнителни. За да не ги вознемируваат непотребно станарите, некои објавители наизменично сведочат прво на едниот крај од ходникот, па потоа на другиот додека не го поминат целиот кат, наместо да тропаат на секоја врата по ред. Освен тоа, ако тропаме на вратите гласно и упорно, може да ги исплашиме оние што се внатре.
11. Кои предлози би можеле да ти помогнат кога тропнуваш или ѕвониш на врата со шпионка?
11 Ако вратата има шпионка, односно окце, застани така, што оној кој гледа низ неа ќе може да те види и тебе и твојот партнер. Гледај директно кон шпионката на вратата, а кога ќе забележиш дека некој гледа низ неа, срдечно поздрави го и почни со презентацијата. Ако станарот праша: „Кој е?“, можеби ќе биде најдобро да го кажеш своето име и името на партнерот. Тогаш можеби ќе биде поспремен да ја отвори вратата. Но, дури и да не ти отвори, сепак би можел да ја кажеш презентацијата пред вратата.
12. Како ќе избегнеме проблеми кога оставаме публикации кај оние што не се дома?
12 Ако нема никој дома: Лицата што се одговорни за одржување на зградите најчесто се жалат поради тоа што мораат да ги собираат публикациите од ходниците или од дворот на зградата. Публикациите што се оставени на врата можат лесно да паднат на подот и да бидат изгазени од станарите. Затоа, ако нема никој дома, треба да им ги оставиме на место каде што нема да ги видат оние што поминуваат.
13. Што треба да правиме ако некој станар се налути?
13 Ако станарот се налути: Доколку некој станар се налути и се закани дека ќе го викне чуварот, најдобро е да си заминеме од тој кат и да дојдеме другпат. Во други случаи, би било мудро сосема да излеземе од зградата за да избегнеме расправии со чуварот. Дури и ако станарот не ни забрани да го посетуваме повеќе, би било подобро да го запишеме бројот на станот со забелешка да не се посетува и да ја оставиме со картичката на подрачјето. Одвреме-навреме, треба да се појде на овие адреси за да се провери дали се променил ставот на тие станари.
14, 15. Што треба да сториме ако некое лице одговорно за зградата ни каже да си заминеме?
14 Ако ти речат да си заминеш: Доколку чуварот, некој што е задолжен за одржувањето на зградата или друго лице што е одговорно за неа ти каже да си заминеш, мудро е веднаш да го послушаш. Секогаш кога е можно, сакаме да избегнеме расправии поради кои некој би можел да нѐ тужи или да ни викне полиција. Во повеќето случаи, лицата што се одговорни за зградата немаат предрасуди кон Јеховините сведоци туку само си ја вршат својата должност.
15 Понекогаш, кога некој од нив ќе ти каже да си заминеш, можеби ќе можеш љубезно и тактично да му објасниш зошто си дојден (1. Пет. 3:15). Тој е одговорен за мирот и безбедноста на станарите, и ние го почитуваме тоа. Можеби ќе ти дозволи да останеш во зградата. Но, ако не ти дозволи, тогаш оди си без да се расправаш со него. Ако допуштаат околностите, би можел да побараш дозвола редовно да оставаш публикации на портирницата или во поштенските сандачиња (Кол. 4:6). За таквите случаи треба редовно да го информираме надгледникот за служба.
16. Што треба да правиме ако сѐ уште постојат проблеми кога сведочиме во зградите?
16 Откако ќе помине разумно долго време, објавителите можат претпазливо да се обидат повторно да сведочат во зградата. Но, ако сѐ уште има проблеми, не треба да се обидуваат на своја рака да најдат решение туку старешините треба да побараат помош од Бетелот во врска со тоа. Ако објавителите не можат да сведочат во зградите, со станарите треба да се контактира на други начини како, на пример, преку телефон или преку писма. Некои објавители сведочат пред или во близина на зградата наутро и навечер, кога луѓето обично одат на работа или се враќаат дома.
17. Зошто е важно да сведочиме во станбени згради?
17 Наскоро ќе дојде крајот на овој злобен свет. Ќе се спасат само оние што го повикуваат името на Јехова. „Но како ќе го повикаат оној во кого не поверувале? А како ќе поверуваат во оној за кого не чуле?“ (Рим. 10:13, 14). Многумина кои „исправно гледаат на вечниот живот“ живеат во станбени згради (Дела 13:48). Ако сме внимателни и проникливи, можеме и ним да им ја пренесеме добрата вест.