Кога да правиме повторни посети?
1. Што е вклучено во правењето ученици?
1 Правењето ученици вклучува повторно да ги посетуваме оние што покажуваат дека сакаат да учат за Јеховиното Царство (Мат. 28:19, 20). Најдобро време за повторна посета е она што ни одговара и нам и на заинтересираното лице. Зошто треба да направиме повторна посета набрзо по првиот разговор?
2, 3. Зошто треба да ги посетиме заинтересираните колку што е можно побрзо?
2 Зошто треба набрзо да ги посетиме? Проповедањето на „добрата вест за царството“ е при крај, а близу е и крајот на овој свет (Мат. 24:14; 1. Пет. 4:7). Затоа, додека за заинтересираните лица сѐ уште трае „денот на спасението“, мораме да бидеме послушни на советот да ја ‚проповедаме Божјата реч со чувство на итност‘. Тоа подразбира да ги посетуваме колку што е можно побрзо за да го негуваме интересот што го покажале (2. Кор. 6:1, 2; 2. Тим. 4:2).
3 Сатана едвај чека да го уништи секое семе на Царството што ќе го посееме во срцата на заинтересираните (Мар. 4:14, 15). Членовите на семејството, колегите и други честопати ги исмеваат оние што се интересираат за вистината. Затоа, ако ги посетиме набрзо по првата средба, ќе можеме да го продолжиме разговорот пред другите да го задушат нивниот интерес.
4. Како можеме уште при првата средба да поставиме темел за повторна посета?
4 Договори се кога да ги посетиш: Најдобро е уште при првата средба да договориш конкретно време кога да дојдеш повторно. Постави прашање што ќе го одговориш на следната посета. Многу е важно да си го запишеш сето тоа. Ако ти дозволува распоредот, би можел да предложиш да дојдеш следниот ден или кратко потоа. Ако првата средба била за време на викендот, а заинтересираниот работи во текот на седмицата, можеби ќе се согласи да го посетиш следниот викенд. Кога ќе договорите конкретно време, дај сѐ од себе за да си го одржиш зборот (Мат. 5:37).
5. Зошто е корисно да не одложуваме со повторните посети за успешно да ја извршиме задачата од Исус да правиме ученици?
5 Имаме добри причини да ги посетиме заинтересираните колку што е можно побрзо. Затоа, договори конкретен термин и посети ги набрзо, бидејќи „преостана малку време“ (1. Кор. 7:29). Колку побрзо ќе ги посетиме оние што се интересираат за добрата вест, толку подобри резултати ќе имаме во службата.