Ги користиш ли сите можности да учиш од Јехова?

1. Како гледа Јехова на поучувањето?

¹ Јехова, нашиот „Најголем Учител“, сака да бидеме поучени (Иса. 30:20). Тој почнал да поучува кога го создал својот првороден Син (Јован 8:28). По побуната на Адам, Јехова не престанал да поучува, туку со љубов обезбедил упатства за несовршените луѓе (Иса. 48:17, 18; 2. Тим. 3:14, 15).

2. Какво образовно дело се одвива денес?

² Денес Јехова го води најголемото образовно дело во човечката историја. Како што прорекол Исаија, милиони луѓе од целиот свет се слеваат кон симболичната ‚гора на Јеховиниот дом‘ (Иса. 2:2). Зошто одат натаму? За да бидат поучени за Божјите патишта, т.е. за да бидат поучени од Јехова! (Иса. 2:3). Во текот на 2010 службена година, Јеховините сведоци поминаа над 1,6 милијарди часови сведочејќи и поучувајќи ги луѓето за библиската вистина. Освен тоа, секоја седмица духовни поуки добиваат преку 105.000 собранија низ целиот свет, а верниот и разборит роб печати поучни христијански публикации на повеќе од 500 јазици.

3. Како тебе лично ти помогнале поуките што ги дава Јехова?

³ Извлечи целосна корист: Колку многу ни помогнала ваквата поука! На пример, сме дознале дека Бог има име и дека се грижи за нас (Пс. 83:18; 1. Пет. 5:6, 7). Сме нашле одговор на некои од најважните прашања во животот: Зошто луѓето страдаат и умираат? Како ќе бидеме вистински среќни? Која е смислата на животот? Јехова ни дава и морални начела кои ни помагаат ‚да бидеме успешни на својот пат‘ (Ис. Нав. 1:8).

4. Какво образование им стои на располагање на Божјите слуги, и зошто треба да ги користиме сите можности да учиме од Јехова?

⁴ Денес Јехова обезбедува и посебно образование преку кое им помага на многу свои слуги да му служат во уште поголема мера. На страници 4-6 се наведени можностите што им се достапни на некои. Дури и ако околностите не ни дозволуваат да добиеме таква обука, дали во целост го користиме образованието од Јехова кое го имаме на располагање? Младите обично се под притисок од наставниците и од другите да се запишат на високообразовните школи. Дали ние ги поттикнуваме да си поставуваат духовни цели и да сакаат да го добијат најдоброто образование — образованието што го нуди Јехова? Ако ги користиме сите можности да учиме од Јехова, ќе бидеме посреќни уште сега, а во иднина ќе се радуваме и на вечен живот (Пс. 119:105; Јован 17:3).

Образование што го обезбедува Јеховината организација

Часови за описменување

• Цел: Луѓето да научат да читаат и да пишуваат за да можат да ја проучуваат Библијата и да ги поучуваат другите за вистината.

• Колку трае: Според потребите.

• Каде се одржува: Во локалната Сала на Царството.

• Кој може да се запише: Сите објавители и заинтересирани лица.

• Како да се пријавиш: Собраниските старешини организираат часови за описменување според локалните потреби и ги поттикнуваат да доаѓаат сите што можат да имаат корист од тоа.

Теократска школа за служба

• Цел: Да ги обучи објавителите делотворно да ја проповедаат добрата вест и да поучуваат.

• Колку трае: Континуирано.

• Каде се одржува: Во локалната Сала на Царството.

• Кој може да се запише: Сите објавители. Може да се запишат и други што се активни во собранието, кои се согласуваат со библиските учења и кои живеат во склад со христијанските начела.

• Како да се пријавиш: Зборувај со надгледникот на Теократската школа за служба.

Курсеви за јазик

• Цел: Да се поучат објавителите да ја проповедаат добрата вест на друг јазик.

• Колку трае: Четири до пет месеци. Часовите обично се одржуваат во сабота наутро и траат од еден до два часа.

• Каде се одржува: Обично во најблиската Сала на Царството.

• Кој може да се запише: Објавители кои се на добар глас и кои сакаат да проповедаат на друг јазик.

• Како да се пријавиш: Овие курсеви ги организира подружницата според потребите.

Изградба на Сали на Царството

• Цел: Да се градат и да се реновираат Сали на Царството. Ова не е школа, но преку оваа програма, доброволците добиваат обука за разни вештини со кои ќе помогнат при градежните проекти.

• Колку трае: Зависно од околностите на доброволецот.

• Каде се одржува: Каде и да било во земјата. Некои доброволци може да бидат повикани да помагаат во акции за помош во места што се погодени од некоја катастрофа.

• Услови: Браќата и сестрите мора да бидат крстени и одобрени од старешинството. Може да бидат стручни за таа работа, но и не мора.

• Како да се пријавиш: Пополни Молба за доброволец во програмата за изградба на Сали на Царството (A-25), која можеш да ја добиеш од старешините во твоето собрание.

Школа за пионери

• Цел: Да им помогне на пионерите ‚потполно да ја извршат својата служба‘ (2. Тим. 4:5).

• Колку трае: Две седмици.

• Каде се одржува: За тоа одлучува подружницата; обично во најблиската Сала на Царството.

• Услови: Оние што биле општи пионери најмалку една година.

• Како да се запишеш: Пионерите што ги исполнуваат условите автоматски се запишани во оваа школа и добиваат известување за тоа од својот покраински надгледник.

Школа за бетелски слуги

• Цел: Оваа школа има цел да им помогне на новите бетелски слуги да успеат на своите бетелски задачи.

• Колку трае: Шеснаесет седмици по еден час седмично.

• Каде се одржува: Во Бетел.

• Услови: Мора да бидат постојани членови на бетелското семејство или привремени доброволци во Бетел на подолго време (година или подолго).

• Како да се запишеш: Новите членови на бетелското семејство автоматски се запишани во оваа школа.

Школа за именувани браќа

• Цел: Старешините и слугите-помошници да добијат обука за тоа како да го надгледуваат собранието и како да се грижат за своите организациски одговорности (Дела 20:28). Оваа школа се одржува на неколку години според одлука на Водечкото тело.

• Колку трае: Во последниве неколку години трае еден и пол ден за старешините и еден ден за слугите-помошници.

• Каде се одржува: Обично во најблиската Сала на Царството или во Конгресна сала.

• Услови: Мора да се старешини или слуги-помошници.

• Како да се запишеш: Старешините и слугите-помошници добиваат покана од покраинскиот надгледник.

Школа за собраниски старешиниa

• Цел: Да им помогне на старешините да се грижат за своите одговорности во собранието.

• Колку трае: Пет дена.

• Каде се одржува: За тоа одлучува подружницата; обично во најблиската Сала на Царството или во Конгресна сала.

• Услови: Мора да се старешини.

• Како да се запишеш: Старешините добиваат покана од подружницата.

Школа за патувачки надгледници и нивните сопругиb

• Цел: Да ги обучи покраинските и обласните надгледници поефикасно да им служат на собранијата и „марливо [да] говорат и поучуваат за Божјата реч“ и да се грижат за оние што им се доверени (1. Тим. 5:17; 1. Пет. 5:2, 3).

• Колку трае: Два месеца.

• Каде се одржува: За тоа одлучува подружницата.

• Услови: Мора да се покраински или обласни надгледници.

• Како да се запишеш: Патувачките надгледници и нивните сопруги добиваат покана од подружницата.

Библиска школа за неженети браќаc

• Цел: Да ги подготви неженетите старешини и слуги-помошници за дополнителни одговорности. Повеќето од оние што ќе ја завршат оваа школа ќе добијат задача да служат во места во нивната земја каде што има поголема потреба. Некои може да добијат задача да служат во друга земја, доколку ја известат подружницата дека се спремни на тоа.

• Колку трае: Два месеца.

• Каде се одржува: За тоа одлучува подружницата; обично во некоја Конгресна сала или Сала на Царството.

• Услови: Неженети браќа на возраст од 23 до 62 години и со добро здравје кои сакаат да им служат на браќата и да проповедаат за Царството секаде каде што има потреба (Мар. 10:29, 30). Мора да служат најмалку две години на задачата што ќе ја добијат.

• Како да се пријавиш: Ако оваа школа се одржува на подрачјето на твојата подружница, на покраинскиот собир се одржува состанок за заинтересираните. На тој состанок ќе бидат дадени и дополнителни информации.

Библиска школа за брачни паровиd

• Цел: Брачните парови да добијат посебна обука со што Јехова и неговата организација ќе можат да ги користат во поголема мера. Повеќето од оние што ќе ја завршат оваа школа ќе добијат задача да служат во места во нивната земја каде што има поголема потреба. Некои може да добијат задача да служат во друга земја, доколку ја известат подружницата дека се спремни на тоа.

• Колку трае: Два месеца.

• Каде се одржува: Моментално, првите неколку класови добиваат обука во образовниот центар Патерсон (Њујорк, САД). Потоа, оваа школа ќе се одржува на локации за кои ќе одлучи подружницата, обично во некоја Конгресна сала или Сала на Царството.

• Услови: Брачни парови на возраст од 25 до 50 години и со добро здравје на кои околностите им дозволуваат да служат таму каде што има потреба и кои се со став: „Еве ме мене, испрати ме мене!“ (Иса. 6:8). Освен тоа, мора да се во брак најмалку две години и да се во полновремена служба најмалку две години континуирано.

• Како да се пријавиш: Ако оваа школа се одржува на подрачјето на твојата подружница, на посебниот собир има состанок за заинтересираните. На тој состанок се даваат и дополнителни информации.

Мисионерска школа Гилеад

• Цел: Да обучи пионери и други полновремени слуги за мисионерска служба.

• Колку трае: Пет месеци.

• Каде се одржува: Во образовниот центар Патерсон (Њујорк, САД).

• Услови: Брачни парови што се крстени најмалку три години и кои се на возраст од 21 до 38 години кога првпат поднесуваат молба. Мора да знаат англиски јазик, да се во брак најмалку две години и да се во полновремена служба најмалку две години континуирано. Мора да имаат добро здравје. Доколку ги исполнуваат условите, за оваа школа можат да се пријават и пионери што служат во странска земја (вклучувајќи ги и оние што имаат мисионерски статус); патувачки надгледници; членови на бетелското семејство и оние што претходно ја завршиле Школата за организациско оспособување, Библиската школа за неженети браќа и Библиската школа за брачни парови.

• Како да се пријавиш: Во избрани подружници, на обласниот конгрес се одржува состанок за заинтересираните. На тој состанок ќе бидат дадени и дополнителни информации. Доколку во твојата земја на конгресите нема ваков состанок, а ти би сакал да се пријавиш, можеш да побараш дополнителни информации од твојата подружница.

Школа за членови на одборите на подружниците и нивните сопруги

• Цел: Да им помогне на оние што служат во одборите на подружниците подобро да ги надгледуваат бетелските домови под нивна надлежност, да се грижат за работите поврзани со проповедањето а кои ги засегаат собранијата и да ги надгледуваат покраините и областите на своето подрачје, како и преведувањето, печатењето и доставувањето на литературата, а да надгледуваат и разни одделенија (Лука 12:48б).

• Колку трае: Два месеца.

• Каде се одржува: Во образовниот центар Патерсон (Њујорк, САД).

• Услови: Членови на одбор на подружница или на одбор на земја или, пак, браќа што ќе бидат доделени да служат во тоа својство.

• Како да се запишеш: Браќата од ваквите одбори и нивните сопруги добиваат покана од Водечкото тело.

[Фусноти]