Помагај му на партнерот додека сте во служба
1. Како можеме да се угледаме на Павле додека сме во служба со други објавители?
1 За апостол Павле, времето што го минувал со соверниците било можност за заемно охрабрување (Рим. 1:12). Кога си во служба со друг објавител, дали го користиш тоа време за да го охрабриш и да му помогнеш? Наместо само да молчиш, би можел ли да му кажеш што тебе ти помага делотворно да ја вршиш службата на проповедање?
2. Како да му помогнеш на партнерот да стекне самодоверба, и зошто е важно да го правиш тоа?
2 Помогни му да стекне самодоверба: Некои објавители имаат мала самодоверба во службата и тоа се гледа по изразот на нивното лице или по нивниот глас. Можеш да му ја зголемиш самодовербата на твојот партнер со тоа што искрено ќе го пофалиш. Што друго можеш да направиш за да стекне самодоверба? Еден патувачки надгледник на својот партнер отворено му кажува какви стравови има и дека често го моли Јехова да му помогне да се избори со нив. Освен тоа, размисли што тебе лично ти помага да имаш поголема самодоверба. На пример, еден брат вели: „Многу ми помага ако го започнам разговорот со насмевка. Но, понекогаш треба да се молам за да можам да го направам тој едноставен гест“. Ако има нешто што и тебе ти помага да имаш поголема самодоверба во службата на проповедање, зошто не му го кажеш тоа на твојот партнер?
3. Како да му помогнеме на партнерот да стане повешт во службата?
3 Помогни му да стане повешт: Дали си увидел дека со некое едноставно прашање или со некој краток вовед, можеби за некој локален настан, лесно се започнува разговор? Дали си сменил нешто во некоја предложена презентација и си видел дека дава добри резултати во службата? Кажи му го тоа на партнерот (Изр. 27:17). Додека одиш на некоја повторна посета, можеш да му спомнеш што планираш да му кажеш на станарот и како ќе го направиш тоа. Откако сте биле на некоја библиска студија, можеш да му објасниш на објавителот зошто си одбрал одредена мисла, стих или начин на поучување.
4. Зошто треба да им помагаме на нашите соверници додека сме во служба?
4 На првите христијани не им било важно само да им помагаат на луѓето да ја дознаат вистината туку и да се охрабруваат и зајакнуваат еден со друг (Дела 11:23; 15:32). Апостол Павле го поучил и го поттикнал младиот Тимотеј да им го каже на другите она што го научил (2. Тим. 2:2). Тоа што ќе соработуваме со нашите соверници додека сме во служба, ќе им помогне да бидат уште порадосни и поделотворни. А така ќе го радуваме и нашиот небесен Татко (Евр. 13:15, 16).