„Новиот милениум — што Ви носи иднината?“
1 Ова прашање е во мислите на луѓето низ целата Земјина топка. Иако човештвото постигнало многу во текот на изминатите векови, луѓето се разочарани затоа што сѐ уште постојат основните проблеми што ги измачуваат луѓето со милениуми (Јов 14:1; Псал. 90:10). Каде може човештвото на најде спас?
2 Во текот на октомври и ноември, ќе имаме посебна прилика да им дадеме на нашите ближни одговор на ова прашање. Како? Со тоа што ќе ја дистрибуираме Веста за царството бр. 36. Таа носи наслов „Новиот милениум — што Ви носи иднината?“ Во текот на првата половина од октомври, ќе ги нудиме списанијата Стражарска кула и Разбудете се! Потоа, почнувајќи од понеделник, 16 октомври, па сѐ до петок, 17 ноември, ќе учествуваме во интензивната дистрибуција на Вест за царството бр. 36. Додека трае оваа кампања, ќе се сосредоточиме на врачувањето на Вест за царството бр. 36 во текот на седмицата. На викендите ќе ја презентираме заедно со тековните списанија.
3 Ќе имаш ли целосно учество? Старешините, слугите помошници и пионерите ќе предводат во оваа кампања бидејќи тие се во првите редови на делото. Многу објавители направиле измени во своите околности за да бидат помошни пионери во текот на едниот или двата месеца додека трае дистрибуцијата. Други, пак, планираат да поминат во службата повеќе време отколку обично.
4 Водителите на Собраниската студија на книга можат да бидат од помош во охрабрувањето на сите од групата да имаат целосно учество во дистрибуирањето на Вест за царството бр. 36. Можеби има некои објавители кои станале неактивни во проповедничкото дело. Старешините треба да ги посетат и да видат што може да се направи за да им се помогне. Можеби ќе можат да се направат подготовки во текот на овие месеци некој искусен објавител да појде во службата на теренот со секој што е неактивен. Едноставната презентација на Вест за царството бр. 36 можеби ќе биде токму она што е потребно за овие објавители повторно да станат активни.
5 Ова ќе биде и добра прилика за библиските студенти кои се при крај со книгата Спознание и кои се квалификуваат за некрстени објавители да почнат да учествуваат во службата. Дури и младите можат да учествуваат во ова возбудливо дело.
6 Сѐ што е потребно е едноставна презентација. Би можел да речеш:
◼ „Доброволно одвојувам време за да помогнам во дистрибуирањето на оваа многу важна порака до секое семејство во [именувај го градот или земјата]. Ова е примерок за Вас. Ве молам, прочитајте го“. Можеби ќе биде добро да не носиш чанта за сведочење кога ја дистрибуираш Вест за царството бр. 36.
7 Добро испланирани состаноци за служба на теренот: Старешините мора да се погрижат подготовките за сведочење да бидат погодни и практични. Особено надгледникот за служба треба да се погрижи да има доволно подрачја за служба од куќа до куќа и деловни подрачја за да може секој целосно да учествува во ова дело. Секаде каде што е можно, треба да се организираат состаноци за служба секој работен ден, на викендите и во вечерните часови. Можат да се направат подготовки да се одржуваат состаноци доцна попладне во корист на учениците, оние што работат во смени и другите.
8 Што да се прави кога некој не е дома: Наша цел е да разговараме со колку што е можно повеќе станари. Ако нема никој дома кога ќе појдеш прв пат, забележи ја адресата и појди во друго време од денот. Ако не успееш да стапиш во контакт со овие станари до последната седмица од кампањата, би можел да им оставиш еден примерок од Вест за царството бр. 36 на некое место кое не им паѓа во очи на минувачите. Локалните старешини можат да му дадат упатство на собранието да се остави примерок од Вест за царството бр. 36 ако нема никој дома првиот пат кога се работи во селата и во местата каде што има повеќе подрачја отколку што можат да се обработат додека трае кампањата.
9 Да се зафатиме со работа! Собранијата треба да настојуваат да го обработат своето подрачје пред да заврши кампањата на 17 ноември. Ако вашето подрачје е прилично големо, некои објавители би можеле да работат сами онаму каде што е практично и безбедно. Оваа подготовка ќе олесни да достигнеме колку што е можно повеќе достојни луѓе. Погрижи се да водиш добри белешки за секој интерес што ќе го пронајдеш.
10 Старешините треба однапред да проценат колку додатни списанија ќе му требаат на собранието и да ги нарачаат. Нема потреба да се нарачува Вест за царството бр. 36 бидејќи на секое собрание му е испратена пратка. Секој специјален, општ и помошен пионер ќе добие по 250 примероци за да ги дистрибуира, додека на секој собраниски објавител ќе му бидат доделени по 50 примероци. Затоа, дали си подготвен и желен да се зафатиш со оваа специјална активност? Колку само сме привилегирани што можеме да им кажеме на нашите ближни што ветил Бог за блиската иднина!