Книга што треба да се прочита
„Библијата не треба да се сфати сериозно.“ Така ѝ рекол некој универзитетски професор на една искрена млада жена.
„Дали некогаш сте ја прочитале Библијата?“ прашала таа.
Непријатно изненаден, професорот морал да признае дека не ја прочитал.
„Тогаш, како можете да изразите толку силно уверување за некоја книга што никогаш не сте ја прочитале?“
Таа имала право. Тој одлучил да ја прочита Библијата и после тоа да создаде мислење за неа.
БИБЛИЈАТА, составена од 66 списи, е опишана како „веројатно највлијателната збирка книги во човечката историја“.1 Навистина, таа влијаела врз некои од најголемите светски уметности, литература и музика. Извршила значително влијание врз правната наука. Била величана поради својот литературен стил и длабоко почитувана од многу високо образовани лица. Нејзиното влијание врз животите на луѓето од сите општествени слоеви било особено длабоко. Во многу од нејзините читатели вдахнала значителен степен на лојалност. Некои дури и ризикувале да бидат убиени само за да ја читаат.
Во исто време, постои скептицизам во врска со Библијата. Има луѓе со категорични мислења за неа иако никогаш не ја прочитале лично. Можеби ја признаваат нејзината литературна или историска вредност, но се прашуваат: Како може една книга напишана пред илјадници години да има некакво значење во овој современ свет? Живееме во „ера на информации“. Најновите информации за тековните настани и за технологијата ни се на малиот прст. „Стручни“ совети за речиси сите предизвици на современиот живот се лесно достапни. Може ли Библијата навистина да содржи информации кои се практични денес?
Оваа брошура настојува да одговори на таквите прашања. Не е наменета за да Ви наметне некакви религиозни гледишта или верувања, туку има намера да покаже дека оваа историски влијателна книга, Библијата, е достојна да ја разгледате. Еден извештај објавен во 1994 година забележал дека некои педагози силно веруваат дека Библијата е толку цврсто всадена во западната култура што „секој човек, верник или неверник, кој не е запознаен со библиските учења и извештаи, ќе биде културно неписмен“.2
Откако ќе го прочитате она што е изнесено овде, можеби ќе се согласите дека — без оглед дали човек е религиозен или не — Библијата, во најмала рака, е книга што треба да се прочита.
[Рамка/слика на страница 3]
„Мојата просветленост ја должам, сосема едноставно, на читањето на една книга. — Книга? Да, а тоа е една стара едноставна книга, скромна како самата природа и исто толку природна . . . И името на таа книга е сосема едноставно — книга — Библија“ (Хајнрих Хајне, германски писател од XIX век).3