„Јехова е моја утеха“

ОВИЕ зборови се превод на официјалното кралско гесло на крал Карл IX од Шведска. На латински јазик тоа гласи: „ Iehovah solatium meum“. Овој крал бил еден од лозата на неколку генерации владетели на Шведска, од 1560 до 1697, што го истакнале Божјето име со хебрејски или латински букви на монети, на медали или во личните гесла. Карл IX го вовел и Кралскиот ред на Јехова. На денот на неговото крунисување во 1607, Карл носел ѓердан наречен Јеховин синџир.

Што ги навело овие монарси на такви обичаи? Изучувачите веруваат дека врз нив влијаело калвинистичкото движење што во тоа време се јавило во Европа, како и нивната почит кон Библијата. Како на доброобразовани владетели од времето на ренесансата, очигледно им била позната латинската верзија на Божјето лично име, Јехова. Несомнено некои сфатиле дека тоа име се појавувало илјадници пати во оригиналниот хебрејски библиски текст.

Добро е документирано дека во различни делови од Европа во текот на 16 и 17 век, името Јехова често се појавувало на монетите и медалите, како и на јавните згради и цркви. Очигледно било општо прифатено и почитувано она што го изјавил Бог лично, а кое е запишано во Излез 3:15 (NW): „Јехова . . . е моето име довека“.

[Слики на страница 21]

СИНЏИР И ЗНАЧКА НА КРАЛСКИОТ РЕД НА ЈЕХОВА, 1606, направен од злато, емајл, проѕирен кварц и гранат

КРАЛОТ ЕРИК XIV 1560—1568

КРАЛОТ КАРЛ IX 1599—1611 (брат на Ерик XIV)

КРАЛОТ ГУСТАВ II АДОЛФ 1611—1632 (син на Карл IX)

КРАЛИЦАТА КРИСТИНА 1644—1654 (ќерка на Густав II Адолф)

[Извори на слики]

Синџир: Livrustkammaren, Stockholm Sverige; монети: Kungl. Myntkabinettet, Sveriges Ekonomiska Museum