Минијатурните палати во Истанбул

● Во многу делови од светот може да се видат дрвени куќички за птици. Тие се совршено место каде што птиците можат да се нахранат, да се згреат, да си направат гнездо, да ги подигаат младенчињата и да се заштитат од грабливците и од природните сили. Во Истанбул, куќичките за птици изгледаат како вистински градби. Некои се слични на големи куќи, други на џамии, а трети на дворци.a Ги викаат гулабарници, птичји палати, па дури и дворци за врапчиња.

Најстарите куќички потекнуваат уште од 15 век и ја отсликуваат отоманската архитектура. Тие се прилично едноставни, но од 18 век наваму куќичките почнале да добиваат изглед на величествени, луксузни живеалишта. Во некои од нив имало садови за храна и вода, ходници, па дури и тераси од каде што птиците, така да се каже, можеле да уживаат во глетката. Најчесто се поставувале во заветрина на онаа страна од куќите што сонцето ја греело најдолго во текот на денот — и, се разбира, подалеку од дофатот на мачките, кучињата и луѓето. Понекогаш, целта на ваквите куќички не била само за да им послужат на птиците туку и за да го разубават објектот. Денес, куќички за птици, и големи и мали, можат да се видат на ѕидовите од некои џамии, како и на некои градски фонтани, библиотеки, мостови и приватни куќи.

За жал, многу од тие минијатурни палати пропаднале поради постојаните удари на природните сили, а други намерно ги уништуваат луѓе кои не се свесни за нивната вредност. Затоа ги има сѐ помалку. Сепак, ако појдеш во Истанбул и ако си љубител на стара архитектура, обиди се да ги најдеш овие префинети, мали градби вгнездени под некоја стреа. Сега, откако знаеш за што служат, твојата посета на Истанбул ќе биде збогатена со уште една убава глетка.

[Фуснота]