കുറ്റകൃ​ത്യ​ത്തിന്‌ അറുതി വരുത്താൻ പാടു​പെ​ടു​ന്നു

“വിരസത യുവജന കുറ്റകൃ​ത്യ​ങ്ങ​ളു​ടെ സുപ്ര​ധാന കാരണ​മെന്നു ചെറു​പ്പ​ക്കാർ അവകാ​ശ​പ്പെ​ടു​ന്നു,” ഒരു പ്രശസ്‌ത ബ്രിട്ടീഷ്‌ വർത്തമാ​ന​പ​ത്ര​ത്തി​ന്റെ തലക്കെട്ട്‌ പ്രഖ്യാ​പി​ച്ചു. “വർധി​ച്ചു​വ​രുന്ന കുറ്റകൃ​ത്യ​ങ്ങൾക്കുള്ള കാരണം കുടും​ബ​ക​ലഹം,” മറ്റൊ​രെണ്ണം പറഞ്ഞു. മൂന്നാ​മ​തൊ​രെണ്ണം ഇങ്ങനെ പ്രസ്‌താ​വി​ച്ചു: “ആസക്തികൾ, ‘ആയിര​ക്ക​ണ​ക്കി​നു കുറ്റകൃ​ത്യ​ങ്ങൾക്കുള്ള പ്രചോ​ദനം.’” മാനി​ല​യിൽ അരങ്ങേ​റി​യി​ട്ടുള്ള അക്രമാ​സ​ക്ത​മായ എല്ലാ കുറ്റകൃ​ത്യ​ങ്ങ​ളു​ടെ​യും 75 ശതമാനം നടത്തി​യതു മയക്കു​മ​രുന്ന്‌ ഉപയോ​ഗി​ക്കു​ന്ന​വ​രാ​യി​രു​ന്നു​വെന്ന്‌ ഫിലി​പ്പൈൻ പനോരമ എന്ന മാഗസിൻ കണക്കാക്കി.

കുറ്റകൃ​ത്യ​സം​ബ​ന്ധ​മായ പെരു​മാ​റ്റ​ത്തി​നു പ്രചോ​ദ​ക​മാ​യി​രി​ക്കുന്ന മറ്റു ഘടകങ്ങ​ളും ഉണ്ടായി​രി​ക്കാം. “സമ്പന്നത​യു​ടെ ഒപ്പത്തി​നൊ​പ്പം നില​കൊ​ള്ളുന്ന ദാരി​ദ്ര്യ”മാണ്‌ നൈജീ​രി​യ​യി​ലെ പൊലീസ്‌ ഇൻസ്‌പെക്ടർ ജനറൽ പരാമർശിച്ച ഒരു ഘടകം. തരപ്പടി​ക്കാ​രു​ടെ സമ്മർദം, മങ്ങിയ തൊഴിൽ പ്രതീ​ക്ഷകൾ, ശക്തമായ നിയമ പ്രതി​ബ​ന്ധ​ങ്ങ​ളു​ടെ അഭാവം, കുടും​ബ​മൂ​ല്യ​ങ്ങ​ളു​ടെ പൊതു​വേ​യുള്ള തകർച്ച, അധികൃ​ത​രോ​ടും നിയമ​ത്തോ​ടു​മുള്ള ബഹുമാ​ന​ത്തി​ന്റെ അഭാവം, ചലച്ചി​ത്ര​ങ്ങ​ളി​ലും വീഡി​യോ​ക​ളി​ലു​മുള്ള അമിത​മായ അക്രമം എന്നിവ​യും കാരണ​ങ്ങ​ളാ​യി പരാമർശി​ക്ക​പ്പ​ട്ടി​രി​ക്കു​ന്നു.

കുറ്റകൃ​ത്യ​ങ്ങ​ളിൽ ഏർപ്പെ​ടു​ന്ന​തു​കൊ​ണ്ടു പ്രയോ​ജ​ന​മു​ണ്ടെന്നു പലരും വിശ്വ​സി​ക്കു​ന്ന​താ​ണു മറ്റൊരു ഘടകം. കുറേ കാലമാ​യി, “റിപ്പോർട്ടു ചെയ്യ​പ്പെ​ടുന്ന മോഷ​ണ​ങ്ങ​ളു​ടെ​യും അവയ്‌ക്കു ശിക്ഷി​ക്ക​പ്പെ​ടുന്ന വ്യക്തി​ക​ളു​ടെ​യും എണ്ണം വിപരീ​ത​ദി​ശ​യി​ലാ”ണെന്ന്‌ ഇറ്റലി​യി​ലെ ബൊ​ലോഗ്ന സർവക​ലാ​ശാ​ല​യി​ലെ ഒരു സാമൂ​ഹി​ക​ശാ​സ്‌ത്രജ്ഞൻ പറഞ്ഞു. “റിപ്പോർട്ടു ചെയ്യ​പ്പെ​ടുന്ന മോഷ​ണ​ങ്ങ​ളോ​ടുള്ള താരത​മ്യ​ത്തിൽ മോഷ​ണ​ക്കു​റ്റം ചുമത്ത​പ്പെ​ട്ട​വ​രു​ടെ എണ്ണം 50-ൽ നിന്ന്‌ 0.7 ശതമാ​ന​മാ​യി കുത്തനെ താണ”തായി അദ്ദേഹം അഭി​പ്രാ​യ​പ്പെട്ടു.

ദുഃഖ​ക​ര​മാ​ണെ​ങ്കി​ലും ദ ന്യൂ എൻ​സൈ​ക്ലോ​പീ​ഡിയ ബ്രിട്ടാ​നി​ക്കാ​യു​ടെ ഈ വാക്കുകൾ സത്യമാണ്‌: “വർധി​ച്ചു​വ​രുന്ന കുറ്റകൃ​ത്യം ആധുനിക വ്യവസാ​യ​വ​ത്‌കൃത സമുദാ​യ​ങ്ങ​ളു​ടെ​യെ​ല്ലാം ഒരു സവി​ശേ​ഷ​ത​യാ​യി കാണ​പ്പെ​ടു​ന്നു. നിയമ​ങ്ങ​ളി​ലെ​യോ ശിക്ഷാ​ക്ര​മ​ശാ​സ്‌ത്ര​ത്തി​ലെ​യോ വികസ​ന​ങ്ങ​ളൊ​ന്നും ഈ പ്രശ്‌ന​ത്തി​ന്മേൽ കാര്യ​മായ പ്രഭാവം ചെലു​ത്തി​യ​താ​യി കാണ​പ്പെ​ടു​ന്നില്ല. . . . സാമ്പത്തിക വളർച്ച​യ്‌ക്കും വ്യക്തിഗത വിജയ​ത്തി​നും മുന്തിയ വിലകൽപ്പി​ക്കുന്ന ആധുനിക നഗരവ​ത്‌കൃത സമൂഹ​ത്തിൽ കുറ്റകൃ​ത്യ​ങ്ങ​ളു​ടെ നിരക്കു വർധി​ച്ചു​കൊ​ണ്ടി​രി​ക്കു​ക​യി​ല്ലെന്നു കരുതാൻ കാരണ​മൊ​ന്നു​മില്ല.”

ഈ വീക്ഷണ​ഗതി തീരെ നിഷേ​ധാ​ത്മ​ക​മാ​ണോ?

സ്ഥിതി​വി​ശേഷം അത്രയ്‌ക്കു മോശ​മാ​ണോ? കുറ്റകൃ​ത്യ​ങ്ങൾ കുറഞ്ഞ​താ​യി ചില സ്ഥലങ്ങൾ റിപ്പോർട്ടു ചെയ്യു​ന്നി​ല്ലേ? ശരിയാണ്‌, ചിലത്‌ അങ്ങനെ ചെയ്യു​ന്നുണ്ട്‌. പക്ഷേ സ്ഥിതി​വി​വ​ര​ക്ക​ണ​ക്കു​കൾ തെറ്റി​ദ്ധ​രി​പ്പി​ക്കു​ന്ന​വ​യാ​യേ​ക്കാം. ഉദാഹ​ര​ണ​ത്തിന്‌, ഫിലി​പ്പീൻസിൽ തോക്കു നിരോ​ധനം ഏർപ്പെ​ടു​ത്തി​യ​ശേഷം കുറ്റകൃ​ത്യ​ങ്ങ​ളിൽ 20 ശതമാനം കുറവു​ണ്ടാ​യ​താ​യി റിപ്പോർട്ടു ചെയ്യ​പ്പെട്ടു. എന്നാൽ, കാർ മോഷ്ടാ​ക്ക​ളും ബാങ്ക്‌ കവർച്ച​ക്കാ​രും കാർ മോഷ്ടി​ക്കു​ന്ന​തും ബാങ്ക്‌ കൊള്ള​യ​ടി​ക്കു​ന്ന​തും നിറുത്തി “തട്ടി​ക്കൊ​ണ്ടു​പോ​കൽ ആരംഭി​ച്ചി”രിക്കു​ന്ന​താ​യി ഒരു ഉദ്യോ​ഗസ്ഥൻ വിശ്വ​സി​ക്കു​ന്നു​വെന്ന്‌ ഏഷ്യാ​വീക്ക്‌ വിവരി​ച്ചു. ബാങ്ക്‌ കവർച്ച​ക​ളു​ടെ​യും കാർ മോഷ​ണ​ങ്ങ​ളു​ടെ​യും കുറവ്‌ മൊത്ത​ത്തി​ലുള്ള കുറ്റകൃ​ത്യ​ങ്ങ​ളിൽ കുറവു കാണിച്ചു. എന്നാൽ, ആളപഹ​ര​ണങ്ങൾ നാലു മടങ്ങു വർധി​ച്ചതു കണക്കാ​ക്കി​യ​പ്പോൾ ഈ കുറവിന്‌ അതിന്റെ പ്രാധാ​ന്യം നഷ്ടപ്പെട്ടു!

ഹംഗറി​യെ സംബന്ധി​ച്ചു റിപ്പോർട്ടു ചെയ്യവേ, എച്ച്‌വി​ജി മാഗസിൻ ഇങ്ങനെ എഴുതി: “1993-ന്റെ ആദ്യപ​കു​തി​യു​മാ​യി താരത​മ്യം ചെയ്യു​മ്പോൾ, കുറ്റകൃ​ത്യ​ങ്ങ​ളു​ടെ എണ്ണം 6.2 ശതമാനം കുറഞ്ഞി​രി​ക്കു​ന്നു. ഭരണസം​ബ​ന്ധ​മായ മാറ്റങ്ങൾ മൂലമാ​ണു മുഖ്യ​മാ​യും . . . ഈ കുറവ്‌ സംഭവി​ക്കു​ന്നത്‌ എന്നു പറയാൻ പൊലീസ്‌ മറന്നു​പോ​യി.” മോഷണം, തട്ടിപ്പ്‌ അല്ലെങ്കിൽ റൗഡി​ത്തരം എന്നിവ​യോ​ടു ബന്ധപ്പെട്ട കേസുകൾ മുമ്പു രജിസ്റ്റർ ചെയ്‌തി​രുന്ന പണപര​മായ പരിധി 250 ശതമാ​ന​മാ​യി ഉയർത്തി. അതു​കൊണ്ട്‌ ഈ പരിധി​ക്കു താഴെ വിലവ​രുന്ന വസ്‌തു​വ​ക​ക​ളോ​ടു ബന്ധപ്പെട്ട കുറ്റകൃ​ത്യ​ങ്ങൾ മേലാൽ രജിസ്റ്റർ ചെയ്യ​പ്പെ​ടു​ന്നില്ല. രാജ്യത്തെ കുറ്റകൃ​ത്യ​ങ്ങ​ളു​ടെ നാലിൽ മൂന്നു ഭാഗവും വസ്‌തു​വ​കകൾ ഉൾപ്പെ​ടുന്ന കുറ്റകൃ​ത്യ​ങ്ങൾ ആയതു​കൊണ്ട്‌ സംഭവി​ച്ചി​രി​ക്കുന്ന കുറവു തികച്ചും യഥാർഥ​മാ​ണെന്നു പറയാൻ വയ്യാ.

കുറ്റകൃ​ത്യ​ങ്ങ​ളു​ടെ കൃത്യ​മായ എണ്ണം തിട്ട​പ്പെ​ടു​ത്തുക ബുദ്ധി​മു​ട്ടാ​ണെ​ന്നതു സമ്മതി​ക്കു​ന്നു. പല കുറ്റകൃ​ത്യ​ങ്ങ​ളും—ചില പ്രത്യേക വിഭാ​ഗ​ങ്ങ​ളിൽ 90 ശതമാ​നം​വരെ—റിപ്പോർട്ടു ചെയ്യ​പ്പെ​ടാ​തെ പോകു​ന്നു എന്നതാണ്‌ ഒരു കാരണം. എന്നാൽ, കുറ്റകൃ​ത്യ​ങ്ങൾ കുറഞ്ഞി​ട്ടു​ണ്ടോ വർധി​ച്ചി​ട്ടു​ണ്ടോ എന്നതു സംബന്ധി​ച്ചുള്ള വാദം പ്രസക്തമല്ല. കുറ്റകൃ​ത്യ​ങ്ങൾ നിർമാർജനം ചെയ്‌തു​കാ​ണാ​നാണ്‌ ആളുകൾ വാഞ്‌ഛി​ക്കു​ന്നത്‌, അല്ലാതെ കുറഞ്ഞു കാണാനല്ല.

ഗവൺമെൻറു​കൾ ശ്രമി​ക്കു​ന്നു

ഏറെ വികസി​ത​മായ രാജ്യങ്ങൾ, തങ്ങളുടെ വാർഷിക ബജറ്റിന്റെ ശരാശരി 2 മുതൽ 3 വരെ ശതമാനം, കുറ്റകൃ​ത്യ നിയ​ന്ത്ര​ണ​ത്തി​നാ​യി ചെലവാ​ക്കു​ന്ന​താ​യും അതേസ​മയം, വികസ്വര രാജ്യങ്ങൾ അതിലും കൂടുതൽ, അതായത്‌ ശരാശരി 9 മുതൽ 14 വരെ ശതമാനം ചെലവാ​ക്കു​ന്ന​താ​യും 1990-ലെ ഐക്യ​രാ​ഷ്‌ട്ര​ങ്ങ​ളു​ടെ സർവേ വെളി​പ്പെ​ടു​ത്തി. ചിലയി​ട​ങ്ങ​ളിൽ പൊലീസ്‌ സേനയു​ടെ വലുപ്പം കൂട്ടു​ന്ന​തി​നും അവയ്‌ക്കു മെച്ചമായ സജ്ജീക​ര​ണങ്ങൾ പ്രദാനം ചെയ്യു​ന്ന​തി​നു​മാ​ണു പ്രഥമ സ്ഥാനം. പക്ഷേ, ഫലങ്ങൾ സമ്മി​ശ്ര​മാണ്‌. ഹംഗറി​ക്കാ​രായ ചില പൗരന്മാർ പരാതി​പ്പെ​ടു​ന്നു: “കുറ്റവാ​ളി​കളെ പിടി​കൂ​ടാൻ ഒരിക്ക​ലും വേണ്ടത്ര പൊലീ​സു​കാ​രില്ല, എന്നാൽ ട്രാഫിക്‌ നിയമങ്ങൾ ലംഘി​ക്കു​ന്ന​വരെ പിടി​കൂ​ടാൻ എപ്പോ​ഴും ആവശ്യ​ത്തിന്‌ ഉണ്ടുതാ​നും.”

കൂടുതൽ കർക്കശ​മായ കുറ്റകൃ​ത്യ നിയമങ്ങൾ നിർമി​ക്കേ​ണ്ട​തി​ന്റെ ആവശ്യം സമീപ​കാ​ലത്തു പല ഗവൺമെൻറു​ക​ളും കണ്ടെത്തി. ഉദാഹ​ര​ണ​ത്തിന്‌, “ലാറ്റിൻ അമേരി​ക്ക​യി​ലു​ട​നീ​ളം ആളപഹ​രണം വർധി​ച്ചി​രി​ക്കു”ന്നതു​കൊണ്ട്‌, അവിടത്തെ ഗവൺമെൻറു​കൾ, “ദൃഢവും അതേസ​മയം വ്യർഥ​വു​മായ” നിയമങ്ങൾ പുറ​പ്പെ​ടു​വി​ച്ചു​കൊ​ണ്ടു പ്രതി​ക​രി​ച്ചി​രി​ക്കു​ന്നു എന്ന്‌ ടൈം മാഗസിൻ പറയുന്നു. “. . . നിയമങ്ങൾ ഉണ്ടാക്കു​ന്നത്‌ അത്ര ബുദ്ധി​മു​ട്ടുള്ള കാര്യമല്ല, അവ നടപ്പി​ലാ​ക്കു​ന്ന​താ​ണു കൂടുതൽ ബുദ്ധി​മുട്ട്‌” എന്ന്‌ അതു സമ്മതി​ക്കു​ന്നു.

1992-ൽ ബ്രിട്ട​നിൽ 1,00,000-ത്തിലേറെ അയൽപക്ക നിരീക്ഷണ പദ്ധതികൾ ഉണ്ടായി​രു​ന്ന​താ​യി കണക്കാ​ക്ക​പ്പെ​ടു​ന്നു. കുറഞ്ഞത്‌ 40 ലക്ഷം ഭവനങ്ങൾ ഇതിൽ ഉൾപ്പെ​ട്ടി​രു​ന്നു. 1980-കളുടെ മധ്യത്തിൽ ഇത്തരത്തി​ലുള്ള പരിപാ​ടി​കൾ ഓസ്‌​ട്രേ​ലി​യ​യിൽ നടപ്പി​ലാ​ക്കി​യി​രു​ന്നു. “പൊതു​സു​ര​ക്ഷി​ത​ത്വ​ത്തെ​ക്കു​റി​ച്ചുള്ള പൗരന്മാ​രു​ടെ അവബോ​ധം വർധി​പ്പി​ക്കുക, കുറ്റകൃ​ത്യ​ങ്ങ​ളും അയൽപ​ക്കത്തെ സംശയാ​സ്‌പ​ദ​മായ സംഭവ​ങ്ങ​ളും റിപ്പോർട്ടു ചെയ്യു​ന്ന​തിൽ തദ്ദേശ​വാ​സി​ക​ളു​ടെ മനോ​ഭാ​വ​ങ്ങ​ളും പെരു​മാ​റ്റ​ങ്ങ​ളും മെച്ച​പ്പെ​ടു​ത്തുക, വസ്‌തു​വ​കകൾ തിരി​ച്ച​റി​യാൻ പാകത്തിൽ അടയാ​ള​മി​ടു​ക​യും സുരക്ഷാ സംവി​ധാ​നങ്ങൾ ഏർപ്പെ​ടു​ത്തു​ക​യും ചെയ്യു​ക​വഴി കുറ്റകൃ​ത്യ​ങ്ങൾക്ക്‌ ഇരയാ​വു​ന്നതു കുറയ്‌ക്കുക” എന്നിങ്ങ​നെ​യുള്ള കാര്യ​ങ്ങ​ളി​ലൂ​ടെ കുറ്റകൃ​ത്യ​ങ്ങൾ കുറച്ചു​കൊ​ണ്ടു​വ​രിക എന്നതാണ്‌ അവയുടെ ലക്ഷ്യ​മെന്ന്‌ ഓസ്‌​ട്രേ​ലി​യ​യി​ലെ ശിക്ഷാ​ക്ര​മ​സ്ഥാ​പനം പറയുന്നു.

പൊലീസ്‌ സ്റ്റേഷനു​കളെ വാണിജ്യ സ്ഥലങ്ങളു​മാ​യി ബന്ധപ്പെ​ടു​ത്താൻ ചിലയി​ട​ങ്ങ​ളിൽ ക്ലോസ്‌ഡ്‌ സർക്യൂട്ട്‌ ടെലി​വി​ഷ​നു​കൾ ഉപയോ​ഗി​ക്കു​ന്നു. പൊലീ​സും ബാങ്കു​ക​ളും കടകളും ഒരു കുറ്റകൃ​ത്യ പ്രതി​രോധ മാർഗം എന്ന നിലയി​ലോ നിയമ​ലം​ഘ​കരെ തിരി​ച്ച​റി​യാ​നുള്ള ഉപകര​ണ​മെന്ന നിലയി​ലോ വീഡി​യോ കാമറകൾ ഉപയോ​ഗി​ക്കു​ന്നു.

നൈജീ​രി​യ​യിൽ മോഷ്ടാ​ക്ക​ളെ​യും കാറുകൾ തട്ടി​ക്കൊ​ണ്ടു​പോ​കു​ന്ന​വ​രെ​യും പിടി​കൂ​ടാൻ പൊലീ​സു​കാർക്കു ഹൈ​വേ​ക​ളിൽ ചെക്ക്‌ പോസ്റ്റു​ക​ളുണ്ട്‌. തട്ടിപ്പു​കളെ എതിരി​ടാൻ തക്കവിധം വാണിജ്യ അഴിമ​തി​കളെ നിരീ​ക്ഷി​ക്കാൻ ഗവൺമെൻറ്‌ ഒരു പ്രത്യേക ദൗത്യ സംഘത്തെ നിയമി​ച്ചി​ട്ടുണ്ട്‌. സാമു​ദാ​യിക നേതാ​ക്ക​ന്മാർ കൂടി​ച്ചേർന്ന പൊലീസ്‌-കമ്മ്യൂ​ണി​റ്റി റിലേ​ഷൻസ്‌ കമ്മിറ്റി​കൾ കുറ്റകൃ​ത്യ​ങ്ങ​ളെ​യും ചോദ്യം ചെയ്യത്തക്ക സ്വഭാ​വ​മുള്ള ആളുക​ളെ​യും കുറിച്ചു പൊലീ​സിന്‌ അറിവു നൽകുന്നു.

ഫിലി​പ്പീൻസ്‌ സന്ദർശി​ക്കു​ന്നവർ, പൊതു​വേ വീടു​ക​ളിൽ ആളുക​ളു​ള്ള​താ​യും പലർക്കും കാവൽനാ​യ്‌ക്കൾ ഉള്ളതാ​യും നിരീ​ക്ഷി​ക്കു​ന്നു. ബിസി​ന​സു​കാർ തങ്ങളുടെ ബിസി​നസ്‌ കാത്തു​സൂ​ക്ഷി​ക്കാൻ സ്വകാര്യ സെക്യൂ​രി​റ്റി ഗാർഡു​കളെ നിയമി​ക്കു​ന്നു. കാറു​കൾക്കു​വേ​ണ്ടി​യുള്ള മോഷണ നിവാരണ വസ്‌തു​ക്ക​ളും നന്നായി വിറ്റഴി​ക്ക​പ്പെ​ടു​ന്നു. ചെലവു വഹിക്കാൻ കഴിയു​ന്നവർ കനത്ത സുരക്ഷാ​ന​ട​പ​ടി​ക​ളുള്ള വികസി​ത​പ്ര​ദേ​ശ​ങ്ങ​ളി​ലേ​ക്കോ ഫ്‌ളാ​റ്റു​ക​ളി​ലേ​ക്കോ വലിയു​ന്നു.

ലണ്ടൻ വർത്തമാ​ന​പ​ത്ര​മായ ദി ഇൻഡി​പ്പെൻഡൻറ്‌ ഇങ്ങനെ അഭി​പ്രാ​യ​പ്പെട്ടു: “നിയമ വ്യവസ്ഥ​യി​ലുള്ള വിശ്വാ​സം ക്ഷയിച്ചു​വ​രവേ, പൗരന്മാർ തങ്ങളുടെ സമുദാ​യ​ങ്ങൾക്കുള്ള പ്രതി​രോധ മാർഗങ്ങൾ കൂടു​ത​ലാ​യി സ്വയം സംഘടി​പ്പി​ക്കു​ന്നു.” കൂടുതൽ കൂടുതൽ ആളുകൾ ആയുധ​മേ​ന്തു​ന്നു. ഉദാഹ​ര​ണ​ത്തിന്‌, ഐക്യ​നാ​ടു​ക​ളിൽ, 50 ശതമാനം വീടു​ക​ളി​ലും സ്വന്തമാ​യി കുറഞ്ഞത്‌ ഒരു തോ​ക്കെ​ങ്കി​ലു​മുണ്ട്‌.

കുറ്റകൃ​ത്യ​ങ്ങ​ളെ എതിരി​ടാൻ ഗവൺമെൻറു​കൾ നിരന്ത​ര​മാ​യി പുതിയ മാർഗങ്ങൾ വികസി​പ്പി​ച്ചു​കൊ​ണ്ടി​രി​ക്കു​ന്നു. പക്ഷേ, യുഎൻ ഉറവി​ടങ്ങൾ പറയു​ന്ന​ത​നു​സ​രിച്ച്‌, “നിയമ​പാ​ല​ക​രു​ടെ പരിശീ​ല​ന​ത്തി​നു കിടപി​ടി​ക്കാൻ” കഴിയാ​ത്ത​വി​ധം വിദഗ്‌ധ​രായ വളരെ​യ​ധി​കം ആളുകൾ “കുറ്റകൃ​ത്യ​ങ്ങൾ നടത്തു​ന്ന​തിന്‌ അസാധാ​ര​ണ​മായ മാർഗങ്ങൾ” കണ്ടെത്തു​ന്ന​താ​യി ഉക്രെ​യി​നി​ലെ ആഭ്യന്ത​ര​കാ​ര്യ പഠന​കേ​ന്ദ്ര​ത്തി​ലെ വി. ഫ്‌സ്‌യ​വൊ​ലൊ​ഡൊഫ്‌ ചൂണ്ടി​ക്കാ​ട്ടി. സൂത്ര​ക്കാ​രായ കുറ്റവാ​ളി​കൾ വൻതു​കകൾ തിരികെ ബിസി​ന​സു​ക​ളി​ലേ​ക്കും സാമൂ​ഹിക പ്രവർത്ത​ന​ങ്ങ​ളി​ലേ​ക്കും ഇറക്കി​ക്കൊ​ണ്ടു സമൂഹ​ത്തിൽ ഇഴുകി​ച്ചേ​രു​ന്നു. മാത്രമല്ല, അവർ “സമൂഹ​ത്തിൽ തങ്ങൾക്കു​തന്നെ വലിയ സ്ഥാനങ്ങൾ നേടി​യെ​ടു​ക്കു​ന്നു.”

വിശ്വാ​സം നശിക്കു​ന്നു

ഗവൺമെൻറു​കൾതന്നെ പ്രശ്‌ന​ത്തി​ന്റെ ഭാഗമാ​ണെന്ന വിശ്വാ​സ​ത്തിൽ എത്തി​ച്ചേ​രു​ക​പോ​ലും ചെയ്യുന്ന ആളുക​ളു​ടെ എണ്ണം ചില രാജ്യ​ങ്ങ​ളിൽ വർധി​ച്ചു​വ​രു​ന്നു. ഒരു കുറ്റകൃ​ത്യ​വി​രുദ്ധ സംഘത്തി​ന്റെ തലവൻ ഇപ്രകാ​രം പറഞ്ഞത്‌ ഏഷ്യാ​വീക്ക്‌ ഉദ്ധരിച്ചു: “സംശയാ​സ്‌പ​ദ​മായ രീതി​യിൽ ഞങ്ങൾ അറസ്റ്റ്‌ ചെയ്യു​ന്ന​വ​രിൽ ഏതാണ്ട്‌ 90 ശതമാ​ന​വും പൊലീ​സു​കാ​രോ പട്ടാള​ക്കാ​രോ ആണ്‌.” സത്യമാ​ണെ​ങ്കി​ലും അല്ലെങ്കി​ലും ഇത്തരം റിപ്പോർട്ടു​കൾ, ഒരു നിയമ​സ​ഭാം​ഗം ഇങ്ങനെ പറയു​ന്ന​തി​ലേക്കു നയിച്ചു: “നിയമം ഉയർത്തി​പ്പി​ടി​ക്കാ​മെന്നു പ്രതിജ്ഞ ചെയ്‌ത​വർതന്നെ നിയമ​ലം​ഘി​ക​ളാ​ണെ​ങ്കിൽ, നമ്മുടെ സമൂഹം കുഴപ്പ​ത്തി​ലാ​യി​രി​ക്കു​ന്നു.”

ഉയർന്ന ഉദ്യോ​ഗ​സ്ഥ​ന്മാർ ഉൾപ്പെ​ടുന്ന അഴിമതി ആരോ​പ​ണങ്ങൾ ലോക​ത്തി​ന്റെ വിവിധ ഭാഗങ്ങ​ളിൽ ഗവൺമെൻറു​കളെ പിടി​ച്ചു​ല​ച്ചി​ട്ടുണ്ട്‌. ഇത്‌ പൗരന്മാ​രു​ടെ വിശ്വാ​സത്തെ കൂടുതൽ ദുർബ​ല​മാ​ക്കു​ന്നു. കുറ്റകൃ​ത്യ​ങ്ങൾക്കു കടിഞ്ഞാ​ണി​ടാ​നുള്ള ഗവൺമെൻറു​ക​ളു​ടെ കഴിവിൽ വിശ്വാ​സം നഷ്ടപ്പെ​ട്ടി​രി​ക്കു​ന്ന​തി​നു​പു​റമേ, അപ്രകാ​രം ചെയ്യാ​നുള്ള അവരുടെ ദൃഢനി​ശ്ച​യത്തെ ആളുകൾ ഇപ്പോൾ ചോദ്യം ചെയ്യുന്നു. ഒരു വിദ്യാ​ഭ്യാ​സ​പ്ര​വർത്തകൻ ഇങ്ങനെ ചോദി​ച്ചു: “ഈ അധികാ​രി​കൾതന്നെ കഴുത്തറ്റം ചെളി​യി​ലാ​ണ്ടി​രി​ക്കെ, അവർ കുറ്റകൃ​ത്യ​ങ്ങളെ എതിരി​ടു​ന്ന​തെ​ങ്ങ​നെ​യാണ്‌?”

ഗവൺമെൻറു​കൾ വരുന്നു, പോകു​ന്നു. പക്ഷേ, കുറ്റകൃ​ത്യം നിലനിൽക്കു​ന്നു. എങ്കിലും, കുറ്റകൃ​ത്യം മേലാൽ കാണു​ക​യി​ല്ലാത്ത ഒരു സമയം താമസി​യാ​തെ വരാൻ പോകു​ന്നു!

[7-ാം പേജിലെ ചിത്രങ്ങൾ]

കുറ്റകൃത്യ പ്രതി​രോധ മാർഗങ്ങൾ: ക്ലോസ്‌ഡ്‌ സർക്യൂട്ട്‌ ടിവി കാമറ​യും മോണി​റ്റ​റും; സ്റ്റീൽ ഷട്ടറും; കാവൽക്കാ​ര​നും ഒപ്പം പരിശീ​ലനം നൽകിയ നായും

[8-ാം പേജിലെ ചിത്രം]

കുറ്റകൃത്യങ്ങൾ ആളുകളെ സ്വന്തം വാതി​ലു​കൾക്കു പിന്നിലെ തടവു​കാ​രാ​ക്കു​ന്നു