ദാമ്പത്യ​ത്തി​ന്റെ ആദ്യവർഷം എങ്ങനെ വിജയ​പ്ര​ദ​മാ​ക്കാം?

നിങ്ങൾ അടുത്തി​ടെ വിവാ​ഹി​ത​രാ​യ​വ​രാ​ണോ? ഇതു​പോ​ലുള്ള പ്രശ്‌നങ്ങൾ നിങ്ങളു​ടെ ജീവി​ത​ത്തി​ലും ഉണ്ടാകു​ന്നു​ണ്ടോ? വിവാ​ഹ​ത്തി​നു​മുമ്പ്‌ പരസ്‌പരം കാണു​ക​യും സംസാ​രി​ക്കു​ക​യു​മൊ​ക്കെ ചെയ്‌ത​പ്പോൾ കാണാ​തി​രുന്ന കുറ്റങ്ങ​ളും കുറവു​ക​ളും ഇപ്പോൾ നിങ്ങൾ ഇണയിൽ കണ്ടുതു​ട​ങ്ങി​യോ? ‘വിവാഹം കഴിക്കു​ന്ന​വർക്ക്‌ ജീവി​ത​ത്തിൽ പ്രയാ​സ​ങ്ങ​ളു​ണ്ടാ​കും’ എന്നു ബൈബിൾ പറയുന്നു. എന്നാൽ ആ പ്രശ്‌ന​ങ്ങ​ളു​ടെ കാഠി​ന്യം കുറയ്‌ക്കാൻ നിങ്ങൾക്ക്‌ എന്തു ചെയ്യാൻ കഴിയും?—1 കൊരി​ന്ത്യർ 7:28, പരിശുദ്ധ ബൈബിൾ, ഈസി-റ്റു-റീഡ്‌ വേർഷൻ.

വിവാ​ഹ​ജീ​വി​ത​ത്തി​ലേക്കു പ്രവേ​ശി​ക്കുന്ന ഉടനെ നിങ്ങൾ നല്ലൊരു ഭാര്യ​യോ ഭർത്താ​വോ ആയിത്തീ​രു​മെന്നു പ്രതീ​ക്ഷി​ക്ക​രുത്‌. ആളുക​ളോട്‌ ഇടപെ​ടേ​ണ്ടത്‌ എങ്ങനെ​യാ​ണെ​ന്നും മറ്റുമുള്ള കാര്യങ്ങൾ വളരെ മുമ്പു​തന്നെ നിങ്ങൾ പഠിച്ചി​ട്ടു​ണ്ടാ​കും. വിവാഹം കഴിക്കാൻ പോകുന്ന വ്യക്തിയെ കാണു​ക​യും സംസാ​രി​ക്കു​ക​യു​മൊ​ക്കെ ചെയ്‌ത​പ്പോൾ നിങ്ങളു​ടെ ആ കഴിവു​കൾ ഒന്നുകൂ​ടെ മെച്ച​പ്പെ​ട്ടി​രി​ക്കും. എന്നാൽ ദാമ്പത്യ​ത്തി​ലേക്കു കടക്കു​ന്ന​തോ​ടെ ആ കഴിവു​ക​ളു​ടെ മാറ്റു​ര​യ്‌ക്കുന്ന സാഹച​ര്യ​ങ്ങൾ ഉടലെ​ടു​ക്കു​ക​യാ​യി. ഇതിൽ വിജയി​ക്ക​ണ​മെ​ങ്കിൽ നിങ്ങൾ പുതിയ ചില കഴിവു​ക​ളും ആർജി​ച്ചെ​ടു​ക്കേ​ണ്ട​തു​ണ്ടാ​കാം. എന്നാൽ ഇതിനി​ടെ നിങ്ങൾക്ക്‌ പിഴവു​കൾ പറ്റു​മെ​ന്നു​ള്ളത്‌ ഒരു വസ്‌തു​ത​യാണ്‌. എന്നുവ​രി​കി​ലും, ദാമ്പത്യ​വി​ജ​യ​ത്തി​നു സഹായി​ക്കുന്ന വൈദ​ഗ്‌ധ്യ​ങ്ങൾ ആർജി​ച്ചെ​ടു​ക്കാൻ നിങ്ങൾക്കാ​കും. എങ്ങനെ?

ഏതെങ്കി​ലും ഒരു മേഖല​യിൽ വൈദ​ഗ്‌ധ്യം നേടാ​നുള്ള ഏറ്റവും നല്ല മാർഗം ആ വിഷയ​ത്തിൽ അറിവുള്ള ഒരാളു​ടെ ഉപദേശം ആരാഞ്ഞ്‌ അതിൻപ്ര​കാ​രം പ്രവർത്തി​ക്കു​ന്ന​താണ്‌. വിവാ​ഹ​ജീ​വി​ത​ത്തി​ന്റെ കാര്യ​ത്തിൽ ഉപദേശം തരാൻ ഏറ്റവും യോഗ്യൻ യഹോ​വ​യാം​ദൈ​വ​മാണ്‌. കാരണം, വിവാഹം കഴിക്കാ​നുള്ള ആഗ്രഹ​ത്തോ​ടെ നമ്മെ സൃഷ്ടി​ച്ചത്‌ അവനാണ്‌. (ഉല്‌പത്തി 2:22-24) ദാമ്പത്യ​ത്തി​ന്റെ ആദ്യവർഷ​ത്തി​ലെ വെല്ലു​വി​ളി​കളെ തരണം ചെയ്യാ​നും സന്തോ​ഷ​ക​ര​മായ ഒരു ജീവിതം നയിക്കാൻ ആവശ്യ​മായ വൈദ​ഗ്‌ധ്യ​ങ്ങൾ വളർത്തി​യെ​ടു​ക്കാ​നും ദൈവ​വ​ച​ന​മായ ബൈബി​ളിന്‌ നിങ്ങളെ സഹായി​ക്കാ​നാ​കും.

1. ഇണയോട്‌ അഭി​പ്രാ​യം ചോദി​ക്കാൻ പഠിക്കുക

വെല്ലു​വി​ളി​കൾ:

ജപ്പാൻകാ​ര​നായ കേജിയുടെa കാര്യ​മെ​ടു​ക്കാം. പലപ്പോ​ഴും തീരു​മാ​നങ്ങൾ എടുക്കു​മ്പോൾ ഭാര്യ​യു​മാ​യി ആലോ​ചി​ക്കാൻ അദ്ദേഹം വിട്ടു​പോ​കും. “ആരെങ്കി​ലും എന്തെങ്കി​ലും പരിപാ​ടി​കൾക്കു ക്ഷണിച്ചാൽ ഭാര്യ​യോ​ടു ചോദി​ക്കാ​തെ ഞാൻ വാക്കു​കൊ​ടു​ക്കും. പക്ഷേ അവൾക്ക്‌ എന്തെങ്കി​ലും അസൗക​ര്യ​മു​ണ്ടെന്ന്‌ പിന്നീ​ടാ​യി​രി​ക്കും ഞാൻ മനസ്സി​ലാ​ക്കുക,” അദ്ദേഹം പറയുന്നു. ഓസ്‌​ട്രേ​ലി​യ​ക്കാ​ര​നായ അലൻ പറയു​ന്നത്‌ ഇങ്ങനെ: “കാര്യങ്ങൾ ഭാര്യ​യോ​ടു സംസാ​രി​ച്ചു തീരു​മാ​നി​ക്കു​ന്നത്‌ പുരു​ഷ​ന്മാർക്കു ചേർന്നതല്ല എന്നായി​രു​ന്നു എന്റെ ധാരണ.” വളർന്നു​വന്ന സാഹച​ര്യ​മാണ്‌ ഇങ്ങനെ ചിന്തി​ക്കാൻ അദ്ദേഹത്തെ പ്രേരി​പ്പി​ച്ചത്‌. ബ്രിട്ട​നിൽ താമസി​ക്കുന്ന ഡയനയ്‌ക്കും തന്റെ കുടുംബ പശ്ചാത്ത​ല​ത്തി​ന്റെ ചില സ്വാധീ​നങ്ങൾ ഉണ്ടായി​രു​ന്നു. അവൾ പറയുന്നു: “ഞാൻ എപ്പോ​ഴും ഉപദേ​ശങ്ങൾ തേടി​യി​രു​ന്നത്‌ എന്റെ വീട്ടു​കാ​രോ​ടാ​യി​രു​ന്നു. തീരു​മാ​ന​ങ്ങ​ളെ​ടു​ക്കേ​ണ്ടി​വ​രു​മ്പോൾ ഭർത്താ​വി​നോ​ടല്ല ഞാൻ ആദ്യം ചോദി​ക്കുക, വീട്ടു​കാ​രോ​ടാണ്‌.”

പരിഹാ​രം:

ദമ്പതി​കളെ യഹോവ വീക്ഷി​ക്കു​ന്നത്‌ “ഏകശരീ​ര​മാ​യി”ട്ടാണ്‌ എന്ന കാര്യം എപ്പോ​ഴും ഓർക്കുക. (മത്തായി 19:3-6) അവന്റെ ദൃഷ്ടി​യിൽ മറ്റെല്ലാ മാനു​ഷ​ബ​ന്ധ​ങ്ങ​ളെ​ക്കാ​ളും പ്രാധാ​ന്യം ഭാര്യാ​ഭർത്തൃ​ബ​ന്ധ​ത്തി​നാണ്‌. നല്ല ആശയവി​നി​മയം ഉണ്ടെങ്കി​ലേ ഈ ബന്ധം ദൃഢമാ​ക്കി​നി​റു​ത്താ​നാ​കൂ.

ഉല്‌പത്തി 18:17-33-ൽ രേഖ​പ്പെ​ടു​ത്തി​യി​രി​ക്കുന്ന, യഹോ​വ​യാം​ദൈ​വ​വും അബ്രാ​ഹാ​മും തമ്മിലുള്ള സംഭാ​ഷ​ണ​ത്തിൽനിന്ന്‌ ഭാര്യാ​ഭർത്താ​ക്ക​ന്മാർക്ക്‌ പല കാര്യ​ങ്ങ​ളും പഠിക്കാ​നുണ്ട്‌. (ദയവായി ബൈബിൾ തുറന്ന്‌ ആ ഭാഗം വായി​ക്കുക.) മൂന്നു​വി​ധ​ങ്ങ​ളിൽ ദൈവം അബ്രാ​ഹാ​മി​നെ ആദരി​ച്ച​താ​യി നാം അവിടെ കാണുന്നു. (1) താൻ ചെയ്യാൻ പോകു​ന്നത്‌ എന്താ​ണെന്ന്‌ യഹോവ അബ്രാ​ഹാ​മി​നോ​ടു വിവരി​ച്ചു. (2) അബ്രാ​ഹാം തന്റെ അഭി​പ്രാ​യങ്ങൾ പറഞ്ഞ​പ്പോൾ യഹോവ ശ്രദ്ധി​ച്ചു​കേട്ടു. (3) അബ്രാ​ഹാ​മി​ന്റെ ആശങ്കകൾ കണക്കി​ലെ​ടുത്ത്‌ തന്റെ തീരു​മാ​ന​ത്തിൽ മാറ്റം വരുത്താൻ അവൻ തയ്യാറാ​യി. ഇണയോ​ടൊത്ത്‌ കാര്യങ്ങൾ ചർച്ച​ചെ​യ്യു​മ്പോൾ നിങ്ങൾക്ക്‌ യഹോ​വ​യു​ടെ ഈ മാതൃക എങ്ങനെ അനുക​രി​ക്കാം?

2. നയപൂർവം ഇടപെ​ടാൻ പഠിക്കുക

വെല്ലു​വി​ളി:

അഭി​പ്രാ​യങ്ങൾ തുറന്ന​ടിച്ച്‌ പറയുന്ന സ്വഭാ​വ​മാ​യി​രി​ക്കാം നിങ്ങളു​ടേത്‌. വളർന്നു​വന്ന സാഹച​ര്യ​വും സാംസ്‌കാ​രിക പശ്ചാത്ത​ല​വു​മൊ​ക്കെ ആയിരി​ക്കാം അതിനു കാരണം. യൂറോ​പ്പിൽനി​ന്നുള്ള ലിയാം പറയുന്നു: “എല്ലാം വെട്ടി​ത്തു​റന്നു പറയുന്ന ഒരു രീതി​യാണ്‌ ഞങ്ങളുടെ നാട്ടി​ലേത്‌. ഞാൻ അങ്ങനെ സംസാ​രി​ക്കു​മ്പോൾ ഭാര്യ വല്ലാതെ അസ്വസ്ഥ​യാ​കും. കുറച്ചു​കൂ​ടി മയത്തിൽ സംസാ​രി​ക്കാൻ ഞാൻ പഠി​ക്കേ​ണ്ടി​യി​രു​ന്നു.”

പരിഹാ​രം:

നിങ്ങളു​ടെ സംസാ​ര​രീ​തി ഇണയ്‌ക്ക്‌ ഇഷ്ടമാ​കും എന്നു വിചാ​രി​ക്ക​രുത്‌. (ഫിലി​പ്പി​യർ 2:3, 4) ക്രിസ്‌തീയ ശുശ്രൂ​ഷ​ക​നാ​യി​രുന്ന തിമൊ​ഥെ​യൊ​സിന്‌ അപ്പൊ​സ്‌ത​ല​നായ പൗലോസ്‌ നൽകിയ ബുദ്ധി​യു​പ​ദേശം നവദമ്പ​തി​കൾക്കും പ്രയോ​ജനം ചെയ്യും. അവൻ ഇങ്ങനെ എഴുതി: ‘കർത്താ​വി​ന്റെ ദാസൻ കലഹി​ക്കു​ന്നവൻ ആയിരി​ക്ക​രുത്‌; പിന്നെ​യോ എല്ലാവ​രോ​ടും ശാന്തത​യോ​ടെ ഇടപെ​ടു​ന്ന​വ​നാ​യി​രി​ക്കണം.’ (2 തിമൊ​ഥെ​യൊസ്‌ 2:24) ഈ വാക്യ​ത്തിൽ, “ശാന്തത” എന്നു വിവർത്തനം ചെയ്‌തി​രി​ക്കുന്ന മൂല ഗ്രീക്ക്‌ പദത്തെ “നയമുള്ള” എന്നും പരിഭാഷ ചെയ്യാം. നയം പ്രകട​മാ​ക്കുന്ന ഒരാൾക്ക്‌ സാഹച​ര്യം മനസ്സി​ലാ​ക്കി, പ്രകോ​പ​ന​മു​ണ്ടാ​ക്കാ​തെ തന്മയത്വ​ത്തോ​ടെ അതു കൈകാ​ര്യം ചെയ്യാ​നാ​കും.

3. നിങ്ങളു​ടെ പുതിയ റോൾ നന്നായി നിർവ​ഹി​ക്കാൻ പഠിക്കുക

വെല്ലു​വി​ളി:

ശിരഃ​സ്ഥാ​നം പ്രയോ​ഗി​ക്കു​ന്ന​തിൽ ഭർത്താ​വിന്‌ ആദ്യ​മൊ​ക്കെ പാളി​ച്ചകൾ പറ്റി​യേ​ക്കാം. അല്ലെങ്കിൽ ഭാര്യക്ക്‌ അഭി​പ്രാ​യങ്ങൾ നയത്തോ​ടെ അവതരി​പ്പി​ക്കാൻ കഴിയാ​തെ പോ​യെ​ന്നു​വ​രാം. ഇറ്റലി​ക്കാ​ര​നായ അന്റോ​ണി​യോ പറയുന്നു: “വീട്ടു​കാ​ര്യ​ങ്ങൾ തീരു​മാ​നി​ക്കു​മ്പോൾ അച്ഛൻ അമ്മയോട്‌ അഭി​പ്രാ​യം ചോദി​ക്കു​ന്നത്‌ എന്റെ ഓർമ​യി​ലില്ല. അത്‌ കണ്ടുവ​ളർന്ന ഞാൻ ആദ്യ​മൊ​ക്കെ ഒരു ഏകാധി​പ​തി​യെ​പ്പോ​ലെ​യാണ്‌ ഭാര്യ​യോട്‌ പെരു​മാ​റി​യി​രു​ന്നത്‌.” കാനഡ​യിൽനി​ന്നുള്ള ഡെബി പറയുന്നു: “വൃത്തി​യും വെടി​പ്പും പോ​രെ​ന്നു​പ​റഞ്ഞ്‌ ഞാൻ എപ്പോ​ഴും ഭർത്താ​വി​നെ കുറ്റ​പ്പെ​ടു​ത്തു​മാ​യി​രു​ന്നു. പക്ഷേ എന്റെ അധികാ​ര​പ്ര​യോ​ഗം അദ്ദേഹത്തെ ഒന്നി​നൊന്ന്‌ ശുണ്‌ഠി​പി​ടി​പ്പി​ക്കു​ക​യാ​ണു​ണ്ടാ​യത്‌.”

ഭർത്താവ്‌ ശ്രദ്ധി​ക്കേ​ണ്ടത്‌:

ഭാര്യ​മാർ ഭർത്താ​ക്ക​ന്മാർക്ക്‌ കീഴ്‌പെ​ട്ടി​രി​ക്ക​ണ​മെന്ന്‌ ബൈബിൾ അനുശാ​സി​ക്കു​ന്നു. എന്നാൽ ചില ഭർത്താ​ക്ക​ന്മാർ ആ കീഴ്‌പെ​ട​ലി​നെ, മക്കൾ മാതാ​പി​താ​ക്ക​ളോ​ടു കാണി​ക്കേ​ണ്ട​തരം അനുസ​ര​ണ​മാ​യി തെറ്റി​ദ്ധ​രി​ക്കു​ന്നു. (കൊ​ലോ​സ്യർ 3:20; 1 പത്രോസ്‌ 3:1) എന്നാൽ ആ വീക്ഷണം ശരിയാ​ണോ? വിവാ​ഹ​ശേഷം ഭർത്താവ്‌ “ഭാര്യ​യോ​ടു പറ്റി​ച്ചേ​രും; അവർ ഇരുവ​രും ഏകശരീ​ര​മാ​യി​ത്തീ​രും” എന്ന്‌ ബൈബിൾ പറയുന്നു. (മത്തായി 19:5) എന്നാൽ മാതാ​പി​താ​ക്ക​ളും മക്കളും തമ്മിലുള്ള ബന്ധത്തെ​ക്കു​റിച്ച്‌ ബൈബിൾ അങ്ങനെ പറയു​ന്നില്ല. ഒരു ഭാര്യ അവളുടെ ഭർത്താ​വി​ന്റെ തുണ അല്ലെങ്കിൽ പൂരകം ആണെന്നാണ്‌ യഹോവ പറഞ്ഞി​രി​ക്കു​ന്നത്‌. (ഉല്‌പത്തി 2:18) ഒരു കുട്ടി പക്ഷേ മാതാ​വി​ന്റെ​യോ പിതാ​വി​ന്റെ​യോ പൂരക​മോ തുണയോ ആണെന്ന്‌ ദൈവം ഒരിട​ത്തും പറഞ്ഞി​ട്ടില്ല. ആ സ്ഥിതിക്ക്‌, ഒരു ഭർത്താവ്‌ തന്റെ സഹധർമി​ണി​യെ ഒരു കുട്ടി​യെ​പ്പോ​ലെ കണക്കാ​ക്കു​ന്നെ​ങ്കി​ലോ? അദ്ദേഹം വിവാ​ഹ​ക്ര​മീ​ക​ര​ണത്തെ ആദരി​ക്കു​ന്നു​വെന്ന്‌ പറയാ​നാ​കു​മോ?

ക്രിസ്‌തീ​യ സഭയോട്‌ യേശു ഇടപെ​ട്ട​തു​പോ​ലെ നിങ്ങൾ ഭാര്യ​യോട്‌ ഇടപെ​ടാൻ ദൈവ​വ​ചനം ആവശ്യ​പ്പെ​ടു​ന്നു. പിൻവ​രുന്ന കാര്യങ്ങൾ ശ്രദ്ധി​ച്ചാൽ നിങ്ങൾക്ക്‌ കീഴ്‌പെ​ട്ടി​രി​ക്കാൻ ഭാര്യക്ക്‌ എളുപ്പ​മാ​യി​രി​ക്കും: (1) നിങ്ങൾ പറയു​ന്ന​തെ​ന്തും മറുവാ​ക്കൊ​ന്നും കൂടാതെ ഉടനെ​തന്നെ ഭാര്യ അനുസ​രി​ച്ചു​കൊ​ള്ളണം എന്നു ശഠിക്ക​രുത്‌. (2) ഭാര്യയെ സ്വന്തശ​രീ​ര​ത്തെ​പ്പോ​ലെ സ്‌നേ​ഹി​ക്കുക, പ്രശ്‌ന​ങ്ങ​ളു​ള്ള​പ്പോൾപ്പോ​ലും.—എഫെസ്യർ 5:25-29.

ഭാര്യ ശ്രദ്ധി​ക്കേ​ണ്ടത്‌:

നിങ്ങളു​ടെ ഭർത്താവ്‌ നിങ്ങളു​ടെ ശിരസ്സാ​ണെ​ന്നും അദ്ദേഹ​ത്തിന്‌ ആ സ്ഥാനം നൽകി​യി​രി​ക്കു​ന്നത്‌ ദൈവ​മാ​ണെ​ന്നും ഓർക്കുക. (1 കൊരി​ന്ത്യർ 11:3) ഭർത്താ​വി​നെ ആദരി​ക്കു​മ്പോൾ നിങ്ങൾ ദൈവത്തെ ആദരി​ക്കു​ക​യാണ്‌. എന്നാൽ ഭർത്താ​വി​ന്റെ ശിരഃ​സ്ഥാ​ന​ത്തോ​ടു മറുത​ലി​ക്കു​ന്നെ​ങ്കി​ലോ? അത്‌ അദ്ദേഹ​ത്തോ​ടു മാത്ര​മുള്ള അനാദ​ര​വാ​യി​രി​ക്കില്ല, ദൈവ​ത്തോ​ടും ദൈവ​നി​യ​മ​ത്തോ​ടു​മുള്ള അനാദ​ര​വാ​യി​രി​ക്കും.—കൊ​ലോ​സ്യർ 3:18.

പ്രശ്‌ന​ങ്ങൾ ചർച്ച​ചെ​യ്യു​മ്പോൾ അവയ്‌ക്ക്‌ പരിഹാ​രം കണ്ടെത്താ​നാണ്‌ ശ്രമി​ക്കേ​ണ്ടത്‌; അല്ലാതെ ഭർത്താ​വി​നെ കുറ്റ​പ്പെ​ടു​ത്താ​നല്ല. ഇക്കാര്യ​ത്തിൽ നല്ലൊരു മാതൃ​ക​യാണ്‌ എസ്ഥേർ രാജ്ഞി. ഭർത്താ​വായ അഹശ്വ​രേശ്‌ രാജാവ്‌ പുറ​പ്പെ​ടു​വിച്ച ഒരു അനുശാ​സ​ന​ത്തിൽ തിരുത്തൽ വരുത്ത​ണ​മെന്ന്‌ ആവശ്യ​പ്പെ​ടേ​ണ്ടി​വ​ന്ന​പ്പോൾ അവൾ എന്തു​ചെ​യ്‌തു​വെന്നു നോക്കുക. അദ്ദേഹത്തെ കുറ്റ​പ്പെ​ടു​ത്തി സംസാ​രി​ക്കാ​തെ വളരെ നയത്തോ​ടെ അവൾ കാര്യം അവതരി​പ്പി​ച്ചു. രാജാവ്‌ അവളുടെ നിർദേശം അംഗീ​ക​രി​ക്കു​ക​യും തെറ്റു തിരു​ത്തു​ക​യും ചെയ്‌തു. (എസ്ഥേർ 7:1-4; 8:3-8) പിൻവ​രുന്ന കാര്യങ്ങൾ ശ്രദ്ധി​ച്ചാൽ നിങ്ങളെ ഉള്ളുതു​റന്ന്‌ സ്‌നേ​ഹി​ക്കാൻ ഭർത്താ​വിന്‌ കഴിയും: (1) കുടും​ബ​ത്തി​ന്റെ ശിരസ്സ്‌ എന്നനി​ല​യി​ലുള്ള തന്റെ പുതിയ റോൾ ഭംഗി​യാ​യി നിർവ​ഹി​ക്കേ​ണ്ടത്‌ എങ്ങനെ​യെന്നു പഠിക്കാൻ അദ്ദേഹ​ത്തിന്‌ സമയം അനുവ​ദി​ച്ചു​കൊ​ടു​ക്കുക. (2) തെറ്റുകൾ വരുത്തു​മ്പോൾപ്പോ​ലും അദ്ദേഹ​ത്തോട്‌ ആദര​വോ​ടെ ഇടപെ​ടുക.—എഫെസ്യർ 5:33.

യാഥാർഥ്യ​ബോ​ധ​ത്തോ​ടെ പെരുമാറുക

ദാമ്പത്യ​ജീ​വി​തം സന്തോ​ഷ​ക​ര​മാ​യി മുന്നോ​ട്ടു കൊണ്ടു​പോ​കാൻ പഠിക്കു​ന്നത്‌ സൈക്കിൾ ചവിട്ടാൻ പഠിക്കു​ന്ന​തു​പോ​ലെ​യാണ്‌. ആദ്യ​മൊ​ക്കെ വീണെ​ന്നു​വ​രാം. എന്നാൽ ക്രമേണ നിങ്ങൾ അത്‌ പഠി​ച്ചെ​ടു​ക്കും. അതു​പോ​ലെ, വിവാ​ഹ​ജീ​വി​ത​ത്തി​ന്റെ ആദ്യനാ​ളു​ക​ളിൽ ചില വീഴ്‌ച​ക​ളും പിഴവു​ക​ളു​മൊ​ക്കെ ഉണ്ടാകും, അതു പ്രതീ​ക്ഷി​ക്കു​ക​യും വേണം.

നർമ​ബോ​ധം ഉള്ളവരാ​യി​രി​ക്കുക. ഇണയുടെ ആശങ്കകൾ ഗൗരവ​മാ​യെ​ടു​ക്കു​മ്പോൾത്തന്നെ സ്വന്തം അബദ്ധങ്ങ​ളും അമളി​ക​ളും ചിരി​ച്ചു​ത​ള്ളാ​നും പഠിക്കണം. വിവാ​ഹ​ത്തി​ന്റെ ആദ്യവർഷ​ത്തിൽ ഇണയെ സന്തോ​ഷി​പ്പി​ക്കാൻ അവസരങ്ങൾ തേടുക. (ആവർത്ത​ന​പു​സ്‌തകം 24:5) ഏറ്റവും പ്രധാ​ന​മാ​യി, വിവാ​ഹ​ജീ​വി​ത​ത്തിൽ നിങ്ങളെ വഴിന​യി​ക്കാൻ ദൈവ​വ​ച​നത്തെ അനുവ​ദി​ക്കുക. അങ്ങനെ​യാ​കു​മ്പോൾ ഓരോ വർഷവും നിങ്ങളു​ടെ ദാമ്പത്യം ഒന്നി​നൊന്ന്‌ ദൃഢമാ​യി​ത്തീ​രും. (w10-E 08/01)