യുവജ​നങ്ങൾ ചോദി​ക്കു​ന്നു...

പുകവലി യഥാർത്ഥ​ത്തിൽ അത്ര ചീത്തയാ​ണോ?

പുകവലി കുട്ടി​യാ​യി​രി​ക്കു​മ്പോൾ മുതൽ ഓറനെ മോഹി​പ്പി​ച്ചി​രു​ന്നു. അവന്റെ അമ്മായി സിഗറ​ററു വലിക്കു​മ്പോ​ഴൊ​ക്കെ തീപ്പെ​ട്ടി​ക്കൊ​ള്ളി കെടു​ത്തി​ക്ക​ള​യാൻ അവനോട്‌ ആവശ്യ​പ്പെ​ടു​മാ​യി​രു​ന്നു. 16-ാമത്തെ വയസ്സിൽ പുകവലി പരീക്ഷി​ച്ചു​നോ​ക്കാൻ അവൻ തീരു​മാ​നി​ച്ചു. അവൻ ഒരു പാർട്ടി​ക്കു പോയ​പ്പോൾ ഒരു പെൺകു​ട്ടി​യോട്‌ ഒരു സിഗറ​ററ്‌ ആവശ്യ​പ്പെട്ടു—എന്നാൽ അത്‌ വലിച്ചു​തീർക്കു​ന്ന​തി​നു​മുമ്പ്‌ അവന്‌ അസ്വാ​സ്ഥ്യ​മു​ണ്ടാ​യി.

അവന്റെ പുരു​ഷ​ത്വ​ത്തിന്‌ ക്ഷതമേ​ററു, സ്വകാ​ര്യ​മാ​യി പുകവലി ശീലി​ക്കാൻ അവൻ തീരു​മാ​നി​ക്കു​ക​യും ചെയ്‌തു. ഒരു വൈകു​ന്നേരം കട്ടിയായ ഒരു ഭക്ഷണം കഴിഞ്ഞ്‌ സങ്കോ​ച​ത്തോ​ടെ അവൻ ഒരു സിഗറ​ററ്‌ കത്തിച്ചു വലിച്ചു. എന്തൊരു അത്ഭുതം! ഇപ്രാ​വ​ശ്യം തലകറ​ക്ക​മോ ഓക്കാ​ന​മോ ഇല്ല. സ്വയം മതിപ്പു​തോ​ന്നി അവൻ വീണ്ടും വീണ്ടും വലിച്ചു. ഒരു സിഗറ​ററ്‌ തീരു​മ്പോൾ അവന്‌ മറെറാ​രു സിഗറ​ററ്‌ വേണ​മെ​ന്നാ​യി. അതിനു​ശേഷം വീണ്ടും മറെറാന്ന്‌. അടുത്ത ആറു വർഷ​ത്തേക്ക്‌ ഓറൻ ഇടവി​ടാ​തെ പുകവ​ലി​ക്കുന്ന ഒരു ആളായി​രി​ക്കും.

പുകവലി—കാററ്‌ മാറി വീശി​യി​രി​ക്കു​ന്നു​വോ?

ഇന്നുള്ള അനേകം ചെറു​പ്പ​ക്കാർ ഓറന്റെ നടപടി​കളെ പുച്ഛി​ച്ചേ​ക്കാം. ഐക്യ​നാ​ടു​ക​ളിൽ നടത്തിയ ഒരു സർവ്വെ​യ​നു​സ​രിച്ച്‌, ഒരു ദിവസം ഒന്നോ അധിക​മോ പാക്കററ്‌ സിഗറ​ററ്‌ വലിക്കു​ന്നത്‌ ഒരുവന്‌ “വലിയ അപകടം” വരുത്തു​ന്നു​വെന്ന്‌ വോട്ടു​ചെയ്‌ത 66 ശതമാനം ചെറു​പ്പ​ക്കാർ വിശ്വ​സി​ക്കു​ന്നു. വലിയ വെറുപ്പു പ്രകട​മാ​ക്കിയ ചിലർ പുകവ​ലി​ക്കാർ തന്നെയാ​യി​രു​ന്നു എന്നത്‌ വിരോ​ധാ​ഭാ​സ​മാണ്‌. “അത്‌ മ്ലേച്ഛമായ ഒരു ശീലമാണ്‌” എന്ന്‌ 16 വയസ്സുള്ള ഒരു പുകവ​ലി​ക്കാ​രൻ പറയുന്നു. ഒരു പഠനത്തിൽ, പുകവ​ലി​ക്കാ​രായ 85 ശതമാ​ന​ത്തോ​ളം ചെറു​പ്പ​ക്കാർ അത്‌ അപകട​ക​ര​മാ​ണെന്നു കരുതു​ന്ന​താ​യി സമ്മതിച്ചു. പകുതി​യോ​ളം പേർ തങ്ങൾ നിർത്താൻ ഉദ്ദേശി​ക്കു​ന്ന​താ​യി പറഞ്ഞു—അതായത്‌ “അഞ്ചു വർഷത്തി​നകം.”

അപ്പോൾ പ്രത്യ​ക്ഷ​ത്തിൽ, നിരാ​ക​ര​ണ​ത്തി​ന്റെ ഒരു തരംഗം ദീർഘ​കാ​ലം നിലനി​ന്നി​രുന്ന പുകവ​ലി​യു​ടെ പ്രചാ​രത്തെ തുടച്ചു​നീ​ക്കു​മെന്ന്‌ ഇപ്പോൾ ഭീഷണി​മു​ഴ​ക്കു​ന്നു. റെഡ്യൂ​സിങ്‌ ദ ഹെൽത്ത്‌ കൊൺസെ​ക്വെൻസസ്‌ ഓഫ്‌ സ്‌മോ​ക്കിങ്‌—റെറ്വൻറി​ഫൈവ്‌ ഇയേഴ്‌സ്‌ ഓഫ്‌ പ്രോ​ഗ്രസ്‌ എന്ന തലക്കെ​ട്ടിൽ യു. എസ്‌. സർജൻ ജനറലി​ന്റെ 1989-ലെ റിപ്പോർട്ട്‌ ഇപ്രകാ​രം പറയുന്നു: “പുകവലി 1940-കളിലും 1950-കളിലും ഒരു മോടി​യാ​യി​രു​ന്നു. ഇപ്പോൾ വർദ്ധി​ച്ച​തോ​തിൽ അത്‌ ഉപേക്ഷി​ക്ക​പ്പെ​ടു​ന്നു. സിനി​മാ​താ​ര​ങ്ങ​ളും സ്‌പോർട്‌സ്‌ താരങ്ങ​ളും മററു പ്രശസ്‌ത​രും സിഗറ​ററ്‌ പരസ്യ​ങ്ങ​ളിൽ പ്രത്യ​ക്ഷ​പ്പെ​ട്ടി​രു​ന്നു. ഇന്ന്‌ നടൻമാ​രും കായി​ക​താ​ര​ങ്ങ​ളും പൗര​പ്ര​മു​ഖ​രും രാഷ്‌ട്രീയ സ്ഥാനാർത്ഥി​ക​ളും വിരള​മാ​യേ പുകവ​ലി​ക്കു​ന്ന​താ​യി കാണ​പ്പെ​ടു​ന്നു​ള്ളു. ബഹുജ​ന​ങ്ങ​ളിൽ വളരെ​പ്പേർ പുകവലി വിട്ടു​ക​ള​യു​ന്നു.”

ഐക്യ​നാ​ടു​ക​ളി​ലെ പ്രായ​പൂർത്തി​യാ​യ​വ​രിൽ 40 ശതമാനം 1965-ൽ പുകവ​ലി​ച്ചി​രു​ന്നു. ഇരുപതു വർഷങ്ങൾക്കു​ശേഷം 29 ശതമാനം മാത്രമേ പുകവ​ലി​ച്ചി​രു​ന്നു​ള്ളു. സർജൻ ജനറലി​ന്റെ റിപ്പോർട്ട്‌ തുടരു​ന്നു: “എന്നെങ്കി​ലും പുകവ​ലി​ച്ചി​രു​ന്ന​വ​രായ ജീവി​ച്ചി​രി​ക്കുന്ന എല്ലാ മുതിർന്ന​വ​രി​ലും പകുതി​യോ​ളം പേർ അതു​പേ​ക്ഷി​ച്ചി​രി​ക്കു​ന്നു.” 1976-ൽ മുതിർന്ന ഹൈസ്‌ക്കൂൾ വിദ്യാർത്ഥി​ക​ളിൽ ഏകദേശം 29 ശതമാനം ദിവസേന പുകവ​ലി​ച്ചി​രു​ന്നു. ഒരു ദശാബ്ദ​ത്തി​നു ശേഷം 19 ശതമാ​നമേ പുകവ​ലി​ച്ചി​രു​ന്നു​ള്ളു.

അതു​കൊണ്ട്‌ പുകവലി എന്ന വിഷയ​ത്തെ​പ്പ​ററി കൂടു​ത​ലാ​യി ഒന്നും പറയേ​ണ്ട​തില്ല എന്നു തോന്നി​യേ​ക്കാം. എന്നാൽ ഊർജ്ജ​സ്വ​ല​മായ പുകവ​ലി​വി​രുദ്ധ പ്രചര​ണ​വും ഭിഷഗ്വ​രൻമാ​രിൽനി​ന്നുള്ള കർശന​മു​ന്ന​റി​യി​പ്പു​ക​ളും ഉണ്ടായി​രു​ന്നി​ട്ടും പുകയി​ല​യു​ടെ മൊത്ത​മായ ആഗോള ഉപയോ​ഗം ഗണ്യമാ​യി വർദ്ധി​ച്ചി​രി​ക്കു​ന്നു! ഐക്യ​നാ​ടു​ക​ളിൽ ഏകദേശം 5 കോടി മുതിർന്നവർ തുടർന്ന്‌ പുകവ​ലി​ച്ചു​കൊ​ണ്ടി​രി​ക്കു​ന്നു. ഓറനു സംഭവി​ച്ചത്‌ മററ​നേകം ചെറു​പ്പ​ക്കാർക്കും സംഭവി​ച്ചു​കൊ​ണ്ടി​രി​ക്കു​ന്നു. ഐക്യ​നാ​ടു​ക​ളിൽമാ​ത്രം ഓരോ ദിവസ​വും ഏകദേശം 3,000 കൗമാ​ര​പ്രാ​യ​ക്കാർ ആദ്യമാ​യി സിഗറ​റ​റി​നു തീ കൊളു​ത്തു​ന്നു. അത്‌ ഒരു വർഷം​കൊണ്ട്‌ പുതിയ പുകവ​ലി​ക്കാ​രു​ടെ സംഖ്യ പത്തു ലക്ഷത്തി​ലെ​ത്തി​ക്കു​ന്നു​വെ​ന്നത്‌ ഞെട്ടി​പ്പി​ക്കു​ന്ന​താണ്‌. പുതിയ നിക്കോ​ട്ടിൻ ആസക്തരിൽ ഭൂരി​പ​ക്ഷ​വും കൗമാ​ര​പ്രാ​യ​ത്തി​ലുള്ള പെൺകു​ട്ടി​ക​ളാ​ണെ​ന്നു​ള്ളത്‌ അമ്പരപ്പു​ള​വാ​ക്കു​ന്നു.

പുകവ​ലി​വി​രുദ്ധ പ്രചാ​ര​ണങ്ങൾ—പുതിയ സംഗതി​യല്ല!

ജനം അപകട​ങ്ങ​ളേ​ക്കു​റിച്ച്‌ അറിവി​ല്ലാ​ത്ത​വ​രാ​യ​തു​കൊ​ണ്ടല്ല. എന്തിന്‌, പുകവലി ഒഴിവാ​ക്കേ​ണ്ട​തി​ന്റെ ശാസ്‌ത്രീ​യ​കാ​ര​ണങ്ങൾ ഗവേഷകർ കണ്ടെത്തു​ന്ന​തിന്‌ ദീർഘ​നാൾമു​മ്പേ അതു നിന്ദ്യ​വും അനഭി​ല​ഷ​ണീ​യ​വു​മായ ശീലമാ​ണെന്ന്‌ സാമാ​ന്യ​ബോ​ധം ജനത്തെ ഉപദേ​ശി​ച്ചി​രി​ക്കു​ന്നു. 90-ൽ താഴെ വർഷങ്ങൾക്കു മുമ്പ്‌ സിഗറ​ററ്‌ ഐക്യ​നാ​ടു​ക​ളു​ടെ അനേക​ഭാ​ഗ​ങ്ങ​ളിൽ നിയമ​വി​രു​ദ്ധ​മാ​യി​രു​ന്നു. ചില പ്രദേ​ശ​ങ്ങ​ളിൽ അതു കൈവശം വെക്കു​ന്ന​തു​പോ​ലും അറസ്‌റ​റി​നു കാരണ​മാ​കു​മാ​യി​രു​ന്നു. അതിനും മുമ്പ്‌ പുകവ​ലി​ക്കെ​തി​രെ കൂടുതൽ കർശന നടപടി​കൾ കൈ​ക്കൊ​ണ്ടി​രു​ന്നു.

സ്‌മി​ത്‌സോ​ണി​യൻ മാസിക 17-ാം നൂററാ​ണ്ടിൽ എടുത്തി​രുന്ന ചില പുകവലി വിരു​ദ്ധ​ന​ട​പ​ടി​കളെ വിശദീ​ക​രി​ക്കു​ന്നു: “ചൈന​യിൽ 1638-ൽ പുറ​പ്പെ​ടു​വിച്ച ഒരു രാജശാ​സന പുകയി​ല​യു​ടെ . . . ഉപയോ​ഗം ശിരച്‌ഛേ​ദ​ശിക്ഷ കൈവ​രു​ത്താ​വുന്ന ഒരു കുററ​മാ​ക്കി​ത്തീർത്തു. റഷ്യയിൽ പുകവ​ലി​ക്കാ​രെ ചമ്മട്ടി​കൊണ്ട്‌ അടിച്ചി​രു​ന്നു; കുററ​കൃ​ത്യം ആവർത്തി​ച്ച​വ​രു​ടെ നാസാ​ര​ന്ധ്രങ്ങൾ നെടുകെ പിളർന്നി​രു​ന്നു. നിരന്തരം നിയമം ലംഘി​ച്ച​വരെ സൈബീ​രി​യാ​യി​ലേക്ക്‌ നാടു​ക​ട​ത്തി​യി​രു​ന്നു. പേർഷ്യ​യിൽ ഇങ്ങനെ​യു​ള്ള​വരെ പീഡി​പ്പി​ക്കു​ക​യോ മരത്തിൽ തറക്കു​ക​യോ ശിരച്‌ഛേ​ദം​ചെ​യ്യു​ക​യോ ചെയ്‌തി​രു​ന്നു.”

ഇത്തരം അനുശാ​സ​നങ്ങൾ അമിത​വും ക്രൂര​വും ആയിരു​ന്നു​വെന്ന്‌ സമ്മതി​ക്കു​ന്നു. എന്നാൽ തങ്ങളു​ടേ​തായ വിധത്തിൽ പുകവ​ലി​ക്കാർ സ്വന്തശ​രീ​ര​ങ്ങ​ളോട്‌ ക്രൂര​ത​കാ​ട്ടു​ന്നു.

പുകവലി—അതു നിങ്ങളു​ടെ ശരീര​ത്തിന്‌ എന്തു​ചെ​യ്യു​ന്നു

പുകയി​ലക്ക്‌ ദ്രോ​ഹ​പ്ര​തീ​തി നൽകുന്ന ഘടകം നിക്കോ​ട്ടി​നാണ്‌. എന്നിരു​ന്നാ​ലും, ദ വേൾഡ്‌ ബുക്ക്‌ എൻ​സൈ​ക്ലോ​പ്പീ​ഡിയ പറയുന്നു: “ഒരു അൽപം നിക്കോ​ട്ടിൻ—ഏകദേശം 60 മില്ലീ​ഗ്രാം—ഒന്നിച്ചു​ക​ഴി​ച്ചാൽ പ്രായ​പൂർത്തി​യായ ഒരാൾ ഉടൻ മരിക്കും. ഒരു സാധാരണ സിഗറ​റ​റിൽ ഏകദേശം ഒരു മില്ലീ​ഗ്രാം നിക്കോ​ട്ടിൻ ഉൾക്കൊ​ള്ളു​ന്നു.”

നിക്കോ​ട്ടിൻ ശക്തമായ ആസക്തി​യു​ള​വാ​ക്കു​ന്ന​തു​മാണ്‌. യു. എസ്‌. സർജൻ ജനറലി​ന്റെ ഒരു റിപ്പോർട്ട്‌ ഇങ്ങനെ ഉപസം​ഹ​രി​ക്കു​ന്നു: “മിക്ക പുകവ​ലി​ക്കാ​രും കൗമാ​ര​പ്രാ​യ​ത്തിൽ പുകവലി തുടങ്ങു​ക​യും അനന്തരം ആസക്തരാ​യി​ത്തീ​രു​ക​യും ചെയ്യുന്നു. ഇന്ന്‌ പുകവ​ലി​ക്കാ​രിൽ 80 ശതമാ​ന​വും പറയു​ന്നത്‌ അവർ അത്‌ ഉപേക്ഷി​ക്കാ​നാ​ഗ്ര​ഹി​ക്കു​ന്നു​വെ​ന്നാണ്‌. പുകവ​ലി​ക്കാ​രിൽ മൂന്നിൽ രണ്ടു പേർ ഉപേക്ഷി​ക്കാൻ ഗൗരവ​മായ ഒരു ശ്രമ​മെ​ങ്കി​ലും നടത്തി​യി​ട്ടുണ്ട്‌.” പുകയി​ല​ക്കു​വേ​ണ്ടി​യുള്ള നിരന്ത​ര​മായ അത്യാർത്തി, അസ്വസ്ഥത, വിക്ഷോ​ഭം, ഉൽക്കണ്‌ഠ, തലവേദന, മന്ദത, ആമാശ​യ​ത്ത​ക​രാറ്‌, ശ്രദ്ധ കേന്ദ്രീ​ക​രി​ക്കാ​നുള്ള അപ്രാ​പ്‌തി എന്നിങ്ങ​നെ​യുള്ള വേദനാ​ജ​ന​ക​മായ പിൻമാ​റ​റ​ല​ക്ഷ​ണങ്ങൾ പലപ്പോ​ഴും ഇത്തരം ശ്രമങ്ങളെ പരാജ​യ​പ്പെ​ടു​ത്തു​ന്നു.

സിഗറ​റ​റു​കൾ ഒരുവനെ നിക്കോ​ട്ടിൻകൊണ്ട്‌ മലിനീ​ക​രി​ക്കു​ന്ന​തി​ല​ധി​കം ചെയ്യുന്നു; കത്തിച്ച ഒരു സിഗറ​ററ്‌ 4,000-ത്തോളം വ്യത്യസ്‌ത രാസസം​യു​ക്തങ്ങൾ വിസർജ്ജി​ക്കുന്ന ഒരു യാഥാർത്ഥ വിഷനിർമ്മാ​ണ​ശാ​ല​യാണ്‌. ഇവയിൽ 43 എണ്ണം കാൻസ​റി​നി​ട​യാ​ക്കു​ന്നു​വെന്ന്‌ തിരി​ച്ച​റി​ഞ്ഞി​ട്ടുണ്ട്‌. അവയിൽ ചിലത്‌ പശയുള്ള ടാർ പോലെ ശ്വാസ​കോ​ശ​ങ്ങ​ളി​ലും ശ്വാസ​ക്കു​ഴ​ലു​ക​ളി​ലും പററി​പ്പി​ടി​ക്കു​ന്നു. ഇത്‌ പിന്നീട്‌ ശ്വാസ​കോ​ശാർബു​ദ​ത്തി​നു കാരണ​മാ​കാം. കൂടാതെ പുകവലി “മൂത്രാ​ശ​യ​ത്തി​ലെ​യും പാൻക്രി​യാ​സി​ലെ​യും വൃക്കയി​ലെ​യും കാൻസ​റിന്‌ സഹായ​ഘ​ട​ക​വും ആമാശ​യ​കാൻസ​റി​നോട്‌ ബന്ധപ്പെ​ട്ടി​രി​ക്കു​ന്ന​തും ആണെന്ന്‌” കരുത​പ്പെ​ടു​ന്നു.—റെഡ്യൂ​സിങ്‌ ദ ഹെൽത്ത്‌ കൊൺസെ​ക്വെൻസസ്‌ ഓഫ്‌ സ്‌മോ​ക്കിങ്‌.

ഒരു പുകവ​ലി​ക്കാ​രന്‌ കാൻസർ വികസി​ത​മാ​കാൻ അനേകം വർഷങ്ങൾ എടു​ത്തേ​ക്കാം. എന്നാൽ ഒററ സിഗറ​റ​റു​പോ​ലും ഗുരു​ത​ര​മായ ഹാനി വരുത്തും. നിക്കോ​ട്ടിൻ നിങ്ങളു​ടെ ഹൃദയ​മി​ടിപ്പ്‌ ത്വരി​ത​പ്പെ​ടു​ത്തു​ന്ന​തി​നാൽ പ്രാണ​വാ​യു​വി​നാ​യുള്ള ശരീര​ത്തി​ന്റെ ആവശ്യം വർദ്ധി​ക്കു​ന്നു. സിഗറ​ററ്‌ പുകയിൽ കാർബൺ മോ​ണോ​ക്‌​സൈ​ഡും—വാഹനങ്ങൾ പുറത്തു​വി​ടുന്ന അതേ വിഷവാ​തകം— ഉൾക്കൊ​ള്ളു​ന്നു​വെ​ന്നത്‌ അശുഭ​കരം തന്നെ. ഈ വിഷവ​സ്‌തു രക്തക്കു​ഴ​ലു​ക​ളി​ലെ​ത്തു​ക​യും ഹൃദയ​ത്തി​ലേ​ക്കും മററു മർമ്മ​പ്ര​ധാന അവയവ​ങ്ങ​ളി​ലേ​ക്കു​മുള്ള ഓക്‌സി​ജൻ പ്രവാ​ഹത്തെ തടസ്സ​പ്പെ​ടു​ത്തു​ക​യും ചെയ്യുന്നു. അതിലും ദോഷ​ക​ര​മാ​യി, നിക്കോ​ട്ടിൻ രക്തധമ​നി​കളെ സങ്കോ​ചി​പ്പി​ക്കു​ക​യും അങ്ങനെ ഓക്‌സി​ജന്റെ പ്രവാഹം വീണ്ടും മന്ദീഭ​വി​പ്പി​ക്കു​ക​യും ചെയ്യുന്നു. അങ്ങനെ പുകവ​ലി​ക്കാർക്ക്‌ അപകട​ക​ര​മാം​വി​ധം ഉയർന്ന ഒരു ഹൃദ്‌രോഗ നിരക്കുണ്ട്‌.

ആമാശയ വ്രണങ്ങൾ, ഗർഭമ​ലസൽ, വൈക​ല്ല്യ​മുള്ള കുഞ്ഞുങ്ങൾ, ആഘാതം—ഇവ പുകവ​ലി​ക്കാർ അഭിമു​ഖീ​ക​രി​ക്കുന്ന മററ​നേകം അപകട​ങ്ങ​ളിൽ ചിലതു​മാ​ത്ര​മാണ്‌. ലോക​വ്യാ​പ​ക​മാ​യി ഓരോ വർഷവും പുകവ​ലി​യോ​ടു ബന്ധപ്പെട്ട 25 ലക്ഷം മരണങ്ങൾ സംഭവി​ക്കു​ന്നു. ഇവയിൽ 4,00,000-ത്തിലധി​കം മരണങ്ങൾ ഐക്യ​നാ​ടു​ക​ളിൽ മാത്രം ഉണ്ടാകു​ന്നു. യു. എസ്‌. സർജൻ ജനറൽ ഇപ്രകാ​രം പ്രസ്‌താ​വി​ക്കു​ന്നു: “ഐക്യ​നാ​ടു​ക​ളി​ലെ ഓരോ ആറുമ​ര​ണ​ങ്ങ​ളി​ലും ഒന്നില​ധി​ക​ത്തി​ന്റെ ഉത്തരവാ​ദി​ത്വം പുകവ​ലി​ക്കാണ്‌. നമ്മുടെ സമൂഹ​ത്തി​ലെ തടഞ്ഞു​നിർത്താ​വുന്ന ഏററവും പ്രധാ​ന​പ്പെട്ട ഒററ മരണ​ഹേതു പുകവ​ലി​യാണ്‌.” ഇപ്പോൾ 20 വയസ്സിൽ താഴെ​യുള്ള 20 കോടി ആളുകളെ ഒടുവിൽ പുകവലി കൊല​ചെ​യ്യു​മെന്ന്‌ ചില ആരോഗ്യ അധികാ​രി​കൾ ഭയപ്പെ​ടു​ന്നു.

എന്നാൽ പുകവ​ലി​ക്കാർ തങ്ങളെ​ത്തന്നെ മാത്രമല്ല ദ്രോ​ഹി​ക്കു​ന്നത്‌. തങ്ങളുടെ വിഷപ്പുക ശ്വസി​ക്കാൻ മററു​ള്ള​വ​രെ​യും നിർബ്ബ​ന്ധി​ത​രാ​ക്കു​ന്ന​തി​നാൽ അവർ പുകവ​ലി​ക്കാ​ത്ത​വ​രെ​ക്കൂ​ടി ശ്വാസ​കോശ കാൻസ​റി​നും മററ്‌ ശ്വസന​സം​ബ​ന്ധ​മായ രോഗ​ങ്ങൾക്കും വിധേ​യ​രാ​ക്കു​ന്നു.

നിങ്ങളു​ടെ സ്വന്തം തീരു​മാ​നം ചെയ്യൽ

അപ്പോൾ പുകയി​ല​യു​ടെ അപകട​ങ്ങ​ളെ​ക്കു​റിച്ച്‌ ജനങ്ങൾക്കു മുന്നറി​യി​പ്പു കൊടു​ക്കു​ന്ന​തി​നോ അതിന്റെ ഉപയോ​ഗം നിയ​ന്ത്രി​ക്കു​ന്ന​തി​നോ അനേകം രാജ്യങ്ങൾ നടപടി​യെ​ടു​ക്കു​ന്ന​തിൽ ഒട്ടും അതിശ​യി​ക്കാ​നില്ല. എന്നുവ​രി​കി​ലും, അപകടങ്ങൾ എടുത്തു​കാ​ണി​ക്കു​ന്നത്‌ അനേകം ചെറു​പ്പ​ക്കാ​രി​ലും ഫലം ചെയ്യു​ന്നി​ല്ലെന്നു തോന്നു​ന്നു. “ഞാൻ ഒരു സിഗറ​ററു കത്തിക്കു​മ്പോൾ എനിക്ക്‌ മുക്തി​തോ​ന്നു​ന്നു,” എന്ന്‌ 15 വയസ്സു​കാ​രി​യായ ഹോളി പറയുന്നു. “കാൻസർ വരുന്ന​തി​നെ​ക്കു​റി​ച്ചൊ​ന്നും ഞാൻ ഒരിക്ക​ലും ചിന്തി​ക്കു​ന്നില്ല.”

ജ്ഞാനപൂർവ്വ​മാ​യ ഒരു പഴമൊ​ഴി മുന്നറി​യി​പ്പു നൽകുന്നു: “വിവേ​ക​മു​ള്ളവൻ അനർത്ഥം കണ്ട്‌ ഒളിച്ചു​കൊ​ള്ളു​ന്നു; അൽപബു​ദ്ധി​ക​ളോ നേരെ ചെന്ന്‌ ചേത​പ്പെ​ടു​ന്നു.” (സദൃശ​വാ​ക്യ​ങ്ങൾ 27:12) പുകയി​ല​യാ​സ​ക്തി​യു​ടെ ശിക്ഷ അനുഭ​വി​ക്കാൻ നിങ്ങൾ യഥാർത്ഥ​ത്തിൽ ആഗ്രഹി​ക്കു​ന്നു​വോ, അതായത്‌, കാൻസ​റും ഹൃദ്‌രോ​ഗ​വും ശ്വസ​നേ​ന്ദ്രി​യ​ത്ത​ക​രാ​റു​ക​ളും തന്നെ? നിക്കോ​ട്ടിൻ അനുഭൂ​തി വായ്‌നാ​റ​റ​വും കടുത്ത ചുമയും മഞ്ഞപ്പല്ലും സഹിക്കാൻ തക്ക മൂല്ല്യ​മു​ള്ള​താ​ണോ?

നേരേ​മ​റിച്ച്‌, പുകവലി ഒഴിവാ​ക്കാൻ അതിലും പ്രധാ​ന​മായ ഒരു കാരണ​മുണ്ട്‌: ദൈവ​ത്തോ​ടുള്ള സൗഹൃദം നിലനിർത്താ​നുള്ള നിങ്ങളു​ടെ ആഗ്രഹം തന്നെ. നിങ്ങൾ ആർക്കെ​ങ്കി​ലും നൽകിയ വില​യേ​റിയ ഒരു സമ്മാനം അയാൾ വലി​ച്ചെ​റി​യു​ന്നതു കണ്ടാൽ നിങ്ങൾക്ക്‌ മനഃ​പ്ര​യാ​സം തോന്നു​ക​യി​ല്ലേ? കൊള്ളാം, ദൈവം നമുക്ക്‌ “ജീവനും ശ്വാസ​വും” തരുന്നു. (പ്രവൃ​ത്തി​കൾ 17:25) നിങ്ങൾ ആ സമ്മാനം ദുരു​പ​യോ​ഗ​പ്പെ​ടു​ത്തു​മ്പോൾ അവന്‌ എന്തു തോന്നു​ന്നു​വെന്ന്‌ ഭാവന​യിൽ കാണുക! അപ്പോ​സ്‌ത​ല​നായ പൗലോസ്‌ ഇങ്ങനെ എഴുതി: “അതു​കൊണ്ട്‌ പ്രിയ​മു​ള്ള​വരേ, (ദൈവ​വു​മാ​യുള്ള ഒരു അംഗീ​കാ​ര​ബ​ന്ധ​ത്തി​ന്റെ) ഈ വാഗ്‌ദ​ത്തങ്ങൾ നമുക്കു​ള്ള​തു​കൊണ്ട്‌ നാം ജഡത്തി​ലെ​യും ആത്മാവി​ലെ​യും സകല കൻമഷ​വും നീക്കി നമ്മെത്തന്നെ വെടി​പ്പാ​ക്കി ദൈവ​ഭ​യ​ത്തിൽ വിശു​ദ്ധി​യെ തികച്ചു​കൊൾക.” (2 കൊരി​ന്ത്യർ 7:1) പുകവലി ജഡത്തെ മലിന​മാ​ക്കു​ന്ന​തി​നേ​ക്കാൾ, മാരക​മായ രാസവ​സ്‌തു​ക്കൾകൊണ്ട്‌ ഒരുവന്റെ ശരീരത്തെ മലിന​മാ​ക്കു​ന്ന​തി​നേ​ക്കാൾ അധികം ചെയ്യുന്നു; അത്‌ ഒരുവന്റെ ആത്മാവി​നെ അഥവാ മുന്തിയ മാനസി​ക​ശ​ക്തി​യെ​യും മലിന​മാ​ക്കു​ന്നു. പുകവലി ദുഷി​ച്ച​തും സ്വാർത്ഥ​വും ഭക്തിവി​രു​ദ്ധ​വും ആണ്‌.

ഇങ്ങനെ​യൊ​ക്കെ​യാ​യാ​ലും, അനേകം ചെറു​പ്പ​ക്കാർ ഇപ്പോ​ഴും പുകവ​ലി​ക്കാൻ വശീക​രി​ക്ക​പ്പെ​ടു​ന്നു. അത്‌ എന്തു​കൊ​ണ്ടാണ്‌, ഒരു യുവാ​വിന്‌ അത്തരം സമ്മർദ്ദ​ങ്ങളെ എങ്ങനെ ചെറു​ത്തു​നിൽക്കാൻ കഴിയും എന്നുള്ളത്‌ ഒരു ഭാവി ലേഖന​ത്തി​ന്റെ വിഷയ​മാ​യി​രി​ക്കും. (g91 8/8)

[16-ാം പേജിലെ ചിത്രം]

കുരുക്കിലകപ്പെടാൻ നിങ്ങ​ളെ​ത്തന്നെ അനുവ​ദി​ക്കു​ന്ന​തി​നു​മുമ്പ്‌ പരിണ​ത​ഫ​ലങ്ങൾ ആലോ​ചി​ക്കു​ക