ആൻഡ്രു കൊടു​ങ്കാ​റ​റി​നു നശിപ്പി​ക്കാൻ കഴിയാഞ്ഞ വസ്‌തു​ക്കൾ

കൊടു​ങ്കാ​റ​റു​കൾ ഉണ്ട്‌, അതേസ​മയം ചിലതു കൂടുതൽ നാശകാ​രി​ക​ളായ കൊടുങ്കാററുകൾa ആണ്‌. ചിലതു കനത്ത മഴ കൊണ്ടു​വ​രു​ന്ന​തും മരങ്ങൾ പിഴു​തെ​റി​യു​ന്ന​തു​മായ ശക്തിയുള്ള കാററു​ക​ളാ​യി പരിഗ​ണി​ക്ക​പ്പെ​ടു​ന്നവ മാത്ര​മാണ്‌. അതേസ​മയം ദക്ഷിണ ഫ്‌ളോ​റി​ഡാ​യി​ലും (ആഗസ്‌ററ്‌ 24, 1992) ലൂസി​യാ​ന​യി​ലും (ആഗസ്‌ററ്‌ 26, 1992) ആൻഡ്രു കൊടു​ങ്കാ​റ​റും ഹവായി​യി​ലെ കയൂയിൽ (സെപ്‌റ​റം​ബർ 12, 1992) ഇനിക്കി കൊടു​ങ്കാ​റ​റും ഗ്വാമിൽ (ആഗസ്‌ററ്‌ 28, 1992) ഓമർ ചുഴലി​ക്കാ​റ​റും ഉണ്ടായി​രു​ന്നു.

ഇവ കോടി​ക്ക​ണ​ക്കി​നു ഡോള​റി​ന്റെ വിനാ​ശങ്ങൾ വരുത്തി​ക്കൂ​ട്ടി. ഡസൻക്ക​ണ​ക്കി​നു ജനങ്ങൾ ഫ്‌ളോ​റി​ഡ​യിൽ മരണമ​ടഞ്ഞു. ആയിര​ക്ക​ണ​ക്കി​നു കുടും​ബങ്ങൾ ഭവനര​ഹി​ത​രാ​യി. ഇൻഷ്വ​റൻസ്‌ പ്രതി​നി​ധി​കൾ നശിപ്പി​ക്ക​പ്പെട്ട വീടു​ക​ളു​ടെ ഉടമസ്ഥരെ അന്വേ​ഷി​ച്ചും ചെക്കുകൾ എഴുതി​ക്കൊ​ണ്ടും ബദ്ധപ്പെ​ട്ടു​ന​ട​ന്നി​രു​ന്നു.

യഹോ​വ​യു​ടെ സാക്ഷി​ക​ളു​ടെ ഫോർട്ട്‌ ലോഡർഡെ​യിൽ ദുരി​താ​ശ്വാ​സ കമ്മിറ​റി​യിൽനി​ന്നുള്ള ഒരു റിപ്പോർട്ടിൽ ആ പ്രദേ​ശ​ത്തു​ണ്ടാ​യി​രുന്ന യഹോ​വ​യു​ടെ സാക്ഷി​ക​ളു​ടെ 1,033 ഭവനങ്ങ​ളിൽ 518 എണ്ണം നന്നാക്കാൻ കഴിഞ്ഞി​രു​ന്നു​വെന്നു പറയു​ക​യു​ണ്ടാ​യി. ആ നിരക്കു മൊത്ത​ത്തിൽ ബാധക​മാ​ക്കി​യാൽ, ആൻഡ്രു വീശിയ പാതയി​ലു​ണ്ടാ​യി​രുന്ന വീടു​ക​ളു​ടെ 50 ശതമാ​ന​മെ​ങ്കി​ലും നശിച്ചി​രു​ന്നു​വെന്ന്‌ അത്‌ അർത്ഥമാ​ക്കും. കൊടു​ങ്കാ​റ​റി​നു​ശേ​ഷ​വും അധിവാ​സ​യോ​ഗ്യ​മായ വീടു​ണ്ടാ​യി​രി​ക്കാൻ ഭാഗ്യ​മു​ണ്ടാ​യി​രു​ന്നവർ അവരുടെ ഫർണീ​ച്ച​റു​ക​ളും തുണി​ക​ളും ഉണക്കു​ന്ന​തി​നും തകർന്ന മേൽക്കൂ​ര​യി​ലൂ​ടെ​യുള്ള ജലപ്ര​വാ​ഹ​ത്തിൽ വീണടിഞ്ഞ സീലിം​ഗിൽനിന്ന്‌ ഉണ്ടായ വെളുത്ത ചെളി​നീ​ക്കി വൃത്തി​യാ​ക്കു​ന്ന​തി​നും പരി​ശ്ര​മി​ക്കു​ക​യാ​യി​രു​ന്നു. തങ്ങളുടെ വീടു​ക​ളു​ടെ നഷ്ടശി​ഷ്ട​ങ്ങ​ളി​ലേക്കു നോക്കു​ന്നതു അനേകർക്കു വിഷമ​മാ​യി​രു​ന്നു. ഒരുപക്ഷേ ഏററവു​മ​ധി​കം കഷ്ടപ്പെ​ട്ടവർ ഉറപ്പു​കു​റഞ്ഞ, സഞ്ചരി​ക്കുന്ന വീടു​ക​ളി​ലോ ട്രെയി​ല​റു​ക​ളി​ലോ താമസി​ച്ചവർ ആയിരു​ന്നു.

ആൻഡ്രു കൊടു​ങ്കാ​ററ്‌ ആരെയും ഒഴിവാ​ക്കി​യി​ല്ല

ലിനാർഡും റെററി കിഫാ​റും അത്തര​മൊ​രു ദമ്പതികൾ ആയിരു​ന്നു. ഫ്‌ളോ​റിഡ നഗരത്തിൽ അവരുടെ സഞ്ചരി​ക്കുന്ന ഭവനം കിടന്നി​രുന്ന സ്ഥലം വീണ്ടും സന്ദർശി​ക്കാൻ പോയ​പ്പോൾ ആ പ്രദേ​ശത്തു പ്രവേ​ശി​ക്കു​ന്ന​തിന്‌ ഒരു സൈനിക പരി​ശോ​ധ​നാ​സ്ഥ​ലത്ത്‌ അവർ തങ്ങളെ​ത്തന്നെ തിരി​ച്ച​റി​യി​ക്കേ​ണ്ട​തു​ണ്ടാ​യി​രു​ന്നു. ഉഗ്രസ്‌ഫോ​ടന ശക്തിയുള്ള നൂറു​ക​ണ​ക്കി​നു ബോം​ബു​കൾ—നിലത്തു കുഴികൾ ഒന്നും ഉണ്ടാക്കാ​തെ—പതിച്ച​തു​പോ​ലെ കാണപ്പെട്ട ഒരു സഞ്ചരി​ക്കുന്ന ഭവന പാർക്കിംഗ്‌ സ്ഥലമാണ്‌ അവർ കണ്ടത്‌. വൃക്ഷങ്ങൾ പിഴു​തെ​റി​യ​പ്പെട്ടു. മുമ്പു വീടിന്റെ ഭിത്തി​ക​ളും മേൽക്കൂ​ര​ക​ളു​മാ​യി​രു​ന്ന​തും ഒടിഞ്ഞു​നു​റു​ങ്ങി​യ​തു​മായ അലുമി​നി​യം ഷീററു​കൾ വൃക്ഷങ്ങളെ പൊതി​ഞ്ഞും ചില തരത്തി​ലുള്ള വികൃ​ത​മായ ആഘോഷ അലങ്കാ​ര​ങ്ങൾപോ​ലെ കൊമ്പു​ക​ളിൽനി​ന്നു തൂങ്ങി​യും കിടന്നി​രു​ന്നു. വൈദ്യു​ത കമ്പികൾ എല്ലായി​ട​ത്തും വീണു​കി​ട​ന്നി​രു​ന്നു, മരം കൊണ്ടുള്ള കഴു​ക്കോ​ലു​കൾ തീപ്പെ​ട്ടി​ക്ക​മ്പു​കൾ പോലെ അറുത്തി​ട്ടി​രു​ന്നു. കാറുകൾ കീഴ്‌മേൽ മറിക്ക​യും തകർക്കു​ക​യും ചെയ്‌തി​രു​ന്നു.

ബോബ്‌ വാൻ ഡിക്കിന്റെ വീടു വാസ​യോ​ഗ്യ​മ​ല്ലെന്നു പ്രസ്‌താ​വി​ക്ക​പ്പെട്ടു, അദ്ദേഹം തന്റെ ഭവനത്തി​ലെ കാഴ്‌ചയെ ഇങ്ങനെ വർണ്ണിച്ചു: “തകർക്കാ​വു​ന്ന​തി​നെ തകർത്തു​കൊ​ണ്ടും വളയ്‌ക്കാ​വു​ന്ന​തി​നെ വളച്ചു​കൊ​ണ്ടും, ഭയപ്പെ​ടു​ത്താ​വുന്ന ഞങ്ങളെ ഭയപ്പെ​ടു​ത്തി​ക്കൊ​ണ്ടും ഉഗ്രശ​ബ്ദ​ത്തോ​ടെ സീലിംഗ്‌ വീണു​ടഞ്ഞു.”

വ്യക്തി​പ​ര​മാ​യ വസ്‌തു​ക്കൾ, കളിപ്പാ​ട്ടങ്ങൾ, വസ്‌ത്രങ്ങൾ, ഫോ​ട്ടോ​കൾ, പുസ്‌ത​കങ്ങൾ എന്നിവ മുൻ ജീവി​ത​രീ​തി​യു​ടെ ദുഃഖ​സ്‌മ​ര​ണ​ക​ളെ​ന്നോ​ണം ചുററും കിടന്നു. ഒററപ്പെട്ട ഒരു കറുത്ത പൂച്ച തകർന്ന അവശി​ഷ്‌ട​ങ്ങൾക്കി​ട​യി​ലൂ​ടെ ലക്ഷ്യമി​ല്ലാ​തെ ചുററി​ക്ക​റങ്ങി. അതു കീഫർ ദമ്പതി​കളെ ജിജ്ഞാ​സ​യോ​ടെ തുറി​ച്ചു​നോ​ക്കി​ക്കൊ​ണ്ടി​രു​ന്നു. ചെറിയ പല്ലികൾ മുൻപ്‌ ആരു​ടെ​യോ മൂല്യ​വ​ത്തായ സ്വത്തു​ക്ക​ളാ​യി​രു​ന്ന​വ​യു​ടെ മുകളി​ലൂ​ടെ പാഞ്ഞു. പൊട്ടിയ ശീതി​ക​രി​ണി​യിൽനി​ന്നു ചീഞ്ഞഴു​കിയ ഭക്ഷണത്തി​ന്റെ ദുർഗന്ധം വായു​വിൽ വ്യാപി​ച്ചു. എല്ലാദി​ശ​യി​ലും ഉഗ്രനാ​ശ​ത്തി​ന്റെ ഒരു കാഴ്‌ച ആയിരു​ന്നു—എല്ലാം മണിക്കൂ​റിൽ 260 കിലോ​മീ​റ​റ​റിൽ കൂടുതൽ വേഗത്തിൽ വീശിയ കാററി​നാൽ, ശക്തി​യേ​റിയ കാററി​നാൽ ഉണ്ടായതു തന്നെ.

ഈ വീടു​ക​ളു​ടെ ഉടമകൾക്കും അന്തേവാ​സി​കൾക്കും അതു ഹൃദയ​ഭേ​ദ​ക​മാ​യി​രു​ന്നു. ഒരു കുടും​ബത്തെ അനേകം വർഷങ്ങൾ വളർത്തി​യ​തി​നും ജീവിതം വിശി​ഷ്ട​മായ സ്വന്തം വീടു​ക​ളിൽ പങ്കു​വെ​ച്ച​തി​നു​ശേഷം എല്ലാം തകർക്ക​പ്പെ​ട്ടും ഛിന്നഭി​ന്ന​മാ​യും കിടക്കു​ന്നതു കാണാൻ കീഫർ ദമ്പതികൾ തിരി​ച്ചു​വന്നു. അവർ മുമ്പു നടത്തിയ ഒരു സന്ദർശ​ന​ത്തിൽ അവരുടെ ചില സാധനങ്ങൾ നാശാ​വ​ശി​ഷ്ട​ങ്ങൾക്കി​ട​യിൽനി​ന്നു വീണ്ടെ​ടു​ത്തി​രു​ന്നു. എന്നാൽ വീടിന്റെ അവശി​ഷ്ട​ങ്ങൾക്കി​ട​യിൽ പരതി​ന​ട​ന്നത്‌ അവർക്കു വളരെ ആഘാത​മേൽപ്പി​ക്കു​ന്ന​താ​യി​രു​ന്നു. എന്നിരു​ന്നാ​ലും തങ്ങൾ അപ്പോ​ഴും ജീവച്ചി​രു​ന്ന​തി​നെ​യും ദൈവത്തെ സേവി​ക്കാൻ സാധി​ച്ച​തി​നെ​യും അവർ വിലമ​തി​ച്ചു.

ആൻഡ്രു കൊടു​ങ്കാ​ററ്‌ ഒന്നി​നെ​യും ഒഴിവാ​ക്കി​യില്ല. കടക​മ്പോ​ളങ്ങൾ, ഫാക്ടറി​കൾ, പാണ്ടി​ക​ശാ​ലകൾ—എല്ലാം പ്രകൃ​തി​യു​ടെ കടന്നാ​ക്ര​മ​ണ​ത്തി​നു ഇരയാ​യി​ത്തീർന്നു. ദുർബ​ല​രായ മനുഷ്യ​രു​ടെ കെട്ടി​ട​നിർമ്മാണ നിയമങ്ങൾ നാശത്തെ തടഞ്ഞില്ല.

മനുഷ്യ​പ്ര​കൃ​ത​ത്തി​ലെ ഏററവും നല്ലതും ഏററവും മോശ​വും

വ്യത്യസ്‌ത ദുരി​താ​ശ്വാ​സ ഏജൻസി​കൾ സംഘടി​പ്പി​ക്ക​പ്പെ​ട്ട​തോ​ടെ രാജ്യ​ത്തെ​ല്ലാ​യി​ട​ത്തു​നി​ന്നും ഫ്‌ളോ​റി​ഡാ​യി​ലേക്കു സഹായം പ്രവഹി​ക്കാൻ തുടങ്ങി. ന്യൂ​യോർക്ക്‌, ബ്രൂക്ക്‌ളി​നി​ലെ യഹോ​വ​യു​ടെ സാക്ഷി​ക​ളു​ടെ ഭരണസം​ഘം ഉടനെ പ്രതി​ക​രി​ക്കു​ക​യും ഫോർട്ട്‌ ലോഡർഡെ​യി​ലെ സമ്മേള​ന​ഹാ​ളിൽ ക്രേന്ദീ​ക​രി​ച്ചു പ്രവർത്തി​ക്കു​ന്ന​തിന്‌ ഒരു ദുരി​താ​ശ്വാ​സ കമ്മിറ​റി​യെ നിയമി​ക്കു​ക​യും ചെയ്‌തു. തുണി​ക​ളും ഭക്ഷണവും അത്യാ​വശ്യ സാധന​ങ്ങ​ളും വാങ്ങു​ന്ന​തിന്‌ ഗണ്യമായ ഒരു തുകയും അവർ നീക്കി​വെച്ചു. അതിന്റെ ഫലമായി, സാഹച​ര്യ​ത്തോട്‌ ആദ്യം പ്രതി​ക​രി​ച്ച​വ​രിൽ സാക്ഷികൾ ഉൾപ്പെട്ടു, അവർ സന്നദ്ധ​സേ​വ​കരെ വിളി​ക്കാൻ തുടങ്ങി. വാസ്‌ത​വ​ത്തിൽ അനേകർ വിളി​ക്കാ​തെ​യും വന്നു.

സാക്ഷി​ക​ളാ​യ പ്രവർത്തകർ കാലി​ഫോർണിയ, ഉത്തര കരോ​ലിന, ഒറീഗൺ, വാഷിം​ങ്‌ടൺ സ്‌റേ​റ​ററ്‌, പെൻസിൽവേ​നിയ, മിസ്സോ​റി എന്നിവി​ട​ങ്ങ​ളിൽനി​ന്നും മററ​നേകം സ്ഥലങ്ങളിൽനി​ന്നും വന്നു​ചേർന്നു. സാധാ​ര​ണ​മാ​യി രാജ്യ​ഹാ​ളു​കൾ പണിയുന്ന 18 പേരട​ങ്ങുന്ന ഒരു സംഘത്തെ മേൽക്കൂ​രകൾ നന്നാക്കു​ന്ന​തി​നു​വേണ്ടി ഒരു വിർജീ​നി​യ​പ്രാ​ദേ​ശിക നിർമ്മാ​ണ​ക്ക​മ്മി​ററി അയച്ചു. അവിടെ എത്തി​ച്ചേ​രു​ന്ന​തിന്‌ അവർ 18 മണിക്കൂർ കാറോ​ടി​ച്ചു. ദുരി​ത​മ​നു​ഭ​വി​ക്കുന്ന തങ്ങളുടെ സഹസാ​ക്ഷി​ക​ളു​ടെ അടുക്കൽ എത്താൻ ദുരി​താ​ശ്വാ​സ പ്രവർത്തകർ അവധി​സ​മയം വിനി​യോ​ഗി​ച്ചു​കൊ​ണ്ടോ ജോലി​യിൽനിന്ന്‌ അവധി​യെ​ടു​ത്തു​കൊ​ണ്ടോ രാജ്യ​ത്തി​ലൂ​ടെ നൂറു​ക​ണ​ക്കിന്‌ ആയിര​ക്ക​ണ​ക്കി​നു​പോ​ലും കിലോ​മീ​റ​റ​റു​കൾ വണ്ടി​യോ​ടി​ച്ചു.

ദക്ഷിണ കരോ​ലി​ന​യി​ലെ ചാൾസ്‌ടൺ പ്രദേ​ശ​ത്തു​നി​ന്നു വന്ന സംഘം വിലപ്പെട്ട സഹായം നൽകി. മുമ്പ്‌ ആയിര​ത്തി​ത്തൊ​ള്ളാ​യി​രത്തി എൺപ​ത്തൊൻപ​തിൽ അവർക്കു ഹൂഗോ കൊടു​ങ്കാ​റ​റി​ന്റെ കാര്യ​ത്തിൽ അനുഭ​വ​പ​രി​ച​യ​മു​ണ്ടാ​യി​രു​ന്നു. എന്താണു പ്രതീ​ക്ഷി​ക്കേ​ണ്ടത്‌ എന്ന്‌ അവർ അറിഞ്ഞി​രു​ന്നു, പെട്ടെ​ന്നു​തന്നെ വൈദ്യു​ത ജനറേ​ററർ, കെട്ടി​ട​നിർമ്മാണ സാധനങ്ങൾ എന്നിവ ഉൾപ്പെ​ടുന്ന ദുരി​താ​ശ്വാ​സ സാമ​ഗ്രി​കൾ സംഘടി​പ്പി​ക്കു​ക​യും ചെയ്‌തു. രണ്ടാഴ്‌ച​യ്‌ക്കു​ള്ളിൽ സ്വമേ​ധ​യാ​സേ​വ​ക​രു​ടെ സംഘം ഏതാണ്‌ 800 വീടു​ക​ളി​ലെ വെള്ളം വററി​ക്കു​ക​യും പലതി​ന്റെ​യും മേൽക്കൂ​രകൾ നന്നാക്കു​ക​യും ചെയ്‌തി​രു​ന്നു.

സാക്ഷി​ക​ള​ല്ലാ​യി​രുന്ന അനേകം വിവാ​ഹി​തർക്കും അയൽക്കാർക്കും സാക്ഷി​ക​ളായ കേടു​പോ​ക്കൽ സംഘങ്ങ​ളു​ടെ സഹായ​ത്തിൽനി​ന്നു പ്രയോ​ജനം ലഭിച്ചു. പശ്ചിമ ഹോം​സ്‌റെ​റ​ഡിൽനി​ന്നുള്ള റോൺ ക്ലാർക്ക്‌ ഇങ്ങനെ റിപ്പോർട്ടു​ചെ​യ്‌തു: “ഇതെല്ലാം അവിശ്വാ​സി​ക​ളായ ഇണകളിൽ യഥാർത്ഥ​ത്തിൽ മതിപ്പു​ള​വാ​ക്കി​യി​രു​ന്നു. സാക്ഷികൾ അവർക്കു​വേണ്ടി ചെയ്‌തി​രു​ന്ന​തിൽ വികാ​രാ​ധീ​ന​രാ​യി അവർ കരഞ്ഞു.” ഒരു സാക്ഷി​യു​ടെ അവിശ്വാ​സി​യായ ഭർത്താ​വി​നെ​ക്കു​റിച്ച്‌ അദ്ദേഹം കൂട്ടി​ച്ചേർത്തു: “സാക്ഷികൾ ഇപ്പോൾ അദ്ദേഹ​ത്തി​നു​വേണ്ടി മേൽക്കൂര ശരിയാ​ക്കി​ക്കൊ​ണ്ടി​രി​ക്കു​ന്നു—അദ്ദേഹം ആഹ്ലാദ​ചി​ത്ത​നാണ്‌.”

ഓരോ രാത്രി​യി​ലും താൻ പരി​ശോ​ധി​ച്ചു​കൊ​ണ്ടി​രുന്ന സാക്ഷി​ക​ള​ല്ലാ​യി​രുന്ന അയൽക്കാ​രെ​ക്കു​റി​ച്ചു മറെറാ​രു സാക്ഷി ഇപ്രകാ​രം പറഞ്ഞു. അവർ സുഖമാ​യി​രി​ക്കു​ന്നു​വെന്ന്‌ അവർ പറഞ്ഞു. അഞ്ചാമത്തെ ദിവസം ഭാര്യ നിയ​ന്ത്ര​ണം​വി​ട്ടു കരഞ്ഞു. “ഞങ്ങൾക്കു കുട്ടി​ക്കു​വേണ്ടി ഉടുതു​ണി​കൾ ഒന്നും ഇല്ല. കുട്ടി​ക്കുള്ള ഭക്ഷണം ഞങ്ങൾക്കില്ല. ഞങ്ങൾക്ക്‌ ആവശ്യ​ത്തി​നുള്ള ഭക്ഷണവും വെള്ളവും ഇല്ല.” ഭർത്താ​വി​നു 20 ലിററർ പെ​ട്രോൾ വേണമാ​യി​രു​ന്നു, എന്നാൽ അത്‌ എങ്ങുനി​ന്നും ലഭിച്ചില്ല. ആ ദിവസം​തന്നെ അവർക്കാ​വ​ശ്യ​മു​ണ്ടാ​യി​രുന്ന എല്ലാം രാജ്യ​ഹാൾ ദുരി​താ​ശ്വാ​സ ഡിപ്പോ​യിൽനിന്ന്‌ ആ സാക്ഷി കൊണ്ടു​വന്നു കൊടു​ത്തു. കൃതജ്ഞ​ത​കൊ​ണ്ടു ഭാര്യ കരഞ്ഞു. ഭർത്താവു ദുരി​താ​ശ്വാ​സ​വേ​ല​യ്‌ക്ക്‌ ഒരു സംഭാവന കൊടു​ത്തു.

ദുരന്ത​മേ​ഖ​ല​യിൽ പുനർനിർമ്മി​ക്ക​പ്പെട്ട വ്യത്യസ്‌ത രാജ്യ​ഹാ​ളു​ക​ളിൽ ഒരുമി​ച്ചു പ്രവർത്തിച്ച സഭാമൂ​പ്പൻമാ​രും ശുശ്രൂ​ഷാ​ദാ​സൻമാ​രും ദുരി​താ​ശ്വാ​സം സംഘടി​പ്പി​ക്കു​ന്ന​തിൽ ഒരു ജീവൽപ്ര​ധാ​ന​മായ പങ്കുവ​ഹി​ച്ചു. എല്ലാ സാക്ഷി​ക​ളെ​യും കണ്ടെത്തു​ന്ന​തി​നും അവരുടെ ആവശ്യങ്ങൾ നിശ്ചയ​പ്പെ​ടു​ത്തു​ന്ന​തി​നും അവർ അക്ഷീണം പ്രവർത്തി​ച്ചു. ഇതിനു വിപരീ​ത​മാ​യി, മറെറാ​രു പ്രദേ​ശത്തെ ദുരി​താ​ശ്വാ​സ ശ്രമങ്ങളെ സംബന്ധിച്ച്‌ ഒരു വ്യോ​മ​സേനാ മേധാവി ഇങ്ങനെ പറഞ്ഞതാ​യി ഉദ്ധരിച്ചു: “എല്ലാ അധികാ​രി​ക​ളും നിർദ്ദേ​ശങ്ങൾ കൊടു​ക്കു​ന്നവർ മാത്രം ആയിരി​ക്കാൻ ആഗ്രഹി​ക്കു​ന്നു, എന്നാൽ ആരും ജോലി ആത്മാർത്ഥ​മാ​യി കൃത്യം നിർവ്വ​ഹി​ക്കു​ന്ന​തി​നും യഥാർത്ഥ​ത്തിൽ അഹിത​ക​ര​മായ ജോലി ചെയ്യു​ന്ന​തി​നും ആഗ്രഹി​ക്കു​ന്നില്ല.”

ദുരന്ത​ങ്ങൾക്ക്‌ ആളുക​ളി​ലെ ഏററവും നല്ലതും ഏററവും മോശ​വു​മായ ഗുണങ്ങൾ വ്യക്തമാ​ക്കാൻ കഴിയും. ഏററം​മോ​ശ​മാ​യ​തി​ന്റെ ഒരു ദൃഷ്ടാന്തം കവർച്ച​ചെ​യ്യ​ലാ​യി​രു​ന്നു. പ്രാ​ദേ​ശിക രാജ്യ​ഹാ​ളി​ലെ ദുരി​താ​ശ്വാ​സ കേന്ദ്ര​ത്തി​ന്റെ ഉപയോ​ഗ​ത്തി​നു​വേണ്ടി കുറഞ്ഞ​പക്ഷം തങ്ങളുടെ ശീതി​ക​ര​ണി​യും അലക്കു​യ​ന്ത്ര​വും സൂക്ഷി​ക്കാ​മെന്നു സാക്ഷി​ക​ളു​ടെ ഒരു കുടും​ബം തീരു​മാ​നി​ച്ചു. ഒരു വണ്ടി വിളി​ക്കു​ന്ന​തി​നു​വേണ്ടി അവർ ഹാളി​ലേക്കു പോയി. അവർ തിരി​ച്ചെ​ത്തു​ന്ന​തി​നു മുമ്പേ കവർച്ച​ക്കാർ അതു രണ്ടും മോഷ്ടി​ച്ചി​രു​ന്നു!

“ഞങ്ങൾ ശൂന്യ​മാ​ക്ക​പ്പെട്ട തെരു​വു​ക​ളി​ലൂ​ടെ സഞ്ചരി​ച്ച​പ്പോൾ കവർച്ച​ക്കാ​രോ​ടു മാറി​ക്കൊ​ള്ളാൻ ആവശ്യ​പ്പെ​ടുന്ന മുന്നറി​യി​പ്പിൻ സൂചന​ക​ളോ​ടു​കൂ​ടിയ വീടുകൾ ഞങ്ങൾ കണ്ടു” എന്ന്‌ ഒരു ദൃക്‌സാ​ക്ഷി റിപ്പോർട്ടു​ചെ​യ്‌തു. ചില സൂചനകൾ ‘കവർച്ച​ക്കാർ മരിക്കണം’, ‘കവർച്ച​ക്കാ​രെ വെടി​വെ​ക്കണം’ എന്നായി​രു​ന്നു. മറെറാ​രെണ്ണം ‘രണ്ടു കവർച്ച​ക്കാ​രെ വെടി​വെച്ചു. ഒരുവൻ മരിച്ചു’ എന്നായി​രു​ന്നു. സംഭര​ണ​ശാ​ല​ക​ളും കടകളും കൊള്ള​യ​ടി​ക്ക​പ്പെ​ട്ടി​രു​ന്നു.” എൺപത്തി​ര​ണ്ടാ​മതു എയർബോൺ ഡിവി​ഷ​നി​ലെ ഒരു ഉദ്യോ​ഗസ്ഥൻ പറഞ്ഞത​നു​സ​രി​ച്ചു കുറഞ്ഞ​പക്ഷം ഒരു കവർച്ച​ക്കാ​രൻ പിടി​ക്ക​പ്പെ​ടു​ക​യും ജനങ്ങളാൽ കൊല്ല​പ്പെ​ടു​ക​യും ചെയ്‌തു.

അനേകർ അറസ്‌ററ്‌ ചെയ്യ​പ്പെട്ടു. ഏതു ദുരന്ത​ത്തി​ലും അക്രമി​കൾ കഴുകൻമാ​രെ​പ്പോ​ലെ റാഞ്ചി​യെ​ടു​ക്കാൻ ഒരുങ്ങി​യി​രി​ക്കു​ക​യാണ്‌ എന്നു തോന്നു​ന്നു. കുററ​വാ​ളി​ക​ള​ല്ലാത്ത സാധാ​ര​ണ​ക്കാർപോ​ലും കവർച്ച​യിൽ പങ്കെടു​ക്കാൻ പ്രചോ​ദി​പ്പി​ക്ക​പ്പെ​ടു​ന്നു. പണം മുടക്കാ​തെ ലഭിക്കുന്ന ഒന്നിനു​വേ​ണ്ടി​യുള്ള പ്രലോ​ഭ​ന​ത്തിൽ മതവും നീതി​ശാ​സ്‌ത്ര​വും ധാർമ്മി​ക​നി​ഷ്‌ഠ​ക​ളും അപ്രത്യ​ക്ഷ​മാ​കു​ന്ന​താ​യി തോന്നു​ന്നു.

തുടക്ക​ത്തിൽ ചില പടയാ​ളി​ക​ളു​ടെ വെടി​യുണ്ട നിറയ്‌ക്കാത്ത തോക്കു​കൾപോ​ലും ആയുധ​ധാ​രി​ക​ളായ കവർച്ച​ക്കാർ അപഹരി​ച്ചു​വെന്ന്‌ ഉണരുക!യോടു പറഞ്ഞു. ചില പടയാ​ളി​കൾ രാജ്യ​ഹാൾ ദുരി​താ​ശ്വാ​സ​കേ​ന്ദ്രത്തെ മരുഭൂ​മി​യി​ലെ മരുപ്പ​ച്ച​യാ​യി വീക്ഷി​ക്കു​ന്നു​വെന്നു പറയു​ന്ന​താ​യി കേട്ടു, “എന്തു​കൊ​ണ്ടെ​ന്നാൽ,” അവർ പറഞ്ഞ​പ്ര​കാ​രം, “നിങ്ങൾ സാക്ഷികൾ തോക്കു​കൾ കൊണ്ടു​ന​ട​ക്കു​ന്നില്ല.”

“വെറുതെ നിരു​ത്സാ​ഹി​ത​രാ​യി ഇരിക്ക​രുത്‌”

പ്രകൃതി വിപത്തു​കൾ സംബദ്ധിച്ച തങ്ങളുടെ അനുഭ​വ​ങ്ങ​ളിൽനി​ന്നു യഹോ​വ​യു​ടെ സാക്ഷികൾ എന്തു പഠിച്ചി​രി​ക്കു​ന്നു? സാധ്യ​മാ​കു​ന്നത്ര വേഗത്തിൽ ആത്മീയ പ്രവർത്ത​നങ്ങൾ പുനരാ​രം​ഭി​ക്കുക. തിങ്കളാ​ഴ്‌ചത്തെ കൊടു​ങ്കാ​റ​റി​നു​ശേഷം തുടർന്നു​വന്ന ബുധനാഴ്‌ച മീററിം​ഗി​നു​വേണ്ടി ഒരു ഡബിൾരാ​ജ്യ​ഹാൾ സജ്ജമാ​യി​രു​ന്നു​വെന്നു ഹോം​സ്‌റ​റ​ഡി​ലെ ഒരു മേൽവി​ചാ​രകൻ, എഡ്‌ റുംസെ, ഉണരുക!യോടു പറഞ്ഞു. മേൽക്കൂ​ര​യു​ടെ കുറെ​ഭാ​ഗം പോയി​രു​ന്നു, മച്ച്‌ തകർന്ന്‌ വെള്ളം ഉള്ളിൽ പ്രവേ​ശി​ച്ചി​രു​ന്നു. രാജ്യ​ഹാ​ളു​കൾ മീററിം​ഗു​കൾക്കു​വേ​ണ്ടി​യും ശൂന്യ​മാ​ക്ക​പ്പെട്ട തങ്ങളുടെ പ്രദേ​ശത്തു ദുരി​താ​ശ്വാ​സ വേല നിയ​ന്ത്രി​ക്കാൻ നിർദ്ദേ​ശങ്ങൾ കൊടു​ക്കുന്ന സ്ഥലമായി ഉപയോ​ഗി​ക്കു​ന്ന​തി​നു​വേ​ണ്ടി​യും നന്നാക്കി​യെ​ടു​ക്കാൻ സ്വമേ​ധ​യാ​സേ​വകർ പെട്ടെന്നു പ്രവർത്തി​ച്ചു. ദുരി​ത​മ​നു​ഭ​വി​ക്കു​ന്ന​വർക്കും ദുരി​താ​ശ്വാ​സ​പ്ര​വർത്ത​കർക്കും ഭക്ഷണം പ്രദാനം ചെയ്യാൻ കഴിയ​ത്ത​ക്ക​വണ്ണം അടുക്ക​ളകൾ സ്ഥാപിച്ചു.

പ്രിൻസ്‌ടെൻ സ്‌പാ​നിഷ്‌ സഭയിലെ ഒരു മൂപ്പൻ, ഫെർമിൻ പാസ്‌ട്രനാ, 80 സാക്ഷി​ക​ളുള്ള തന്റെ സഭയിലെ 7 കുടും​ബ​ങ്ങൾക്ക്‌ അവരുടെ വീടു പൂർണ്ണ​മാ​യും നഷ്ടപ്പെ​ട്ടു​വെന്നു റിപ്പോർട്ടു​ചെ​യ്‌തു. അദ്ദേഹം തന്റെ സഹസാ​ക്ഷി​കൾക്ക്‌ എന്തു പരിഹാ​ര​മാ​ണു നിർദ്ദേ​ശി​ച്ചി​രു​ന്നത്‌? “ദുഃഖി​ക്കേണ്ട ആവശ്യ​മു​ണ്ടെ​ങ്കിൽ ദുഃഖി​ക്കുക. എന്നാൽ വെറുതെ നിരു​ത്സാ​ഹി​ത​രാ​യി ഇരിക്ക​രുത്‌. മററു​ള്ള​വരെ സഹായി​ക്കു​ന്ന​തിൽ പ്രവർത്ത​ന​നി​ര​ത​രാ​കു​ക​യും സാധ്യ​മാ​കുന്ന അളവിൽ ശുശ്രൂ​ഷ​യ്‌ക്കു പോകു​ക​യും ചെയ്യുക. നമ്മുടെ ക്രിസ്‌തീയ യോഗങ്ങൾ മുടക്ക​രുത്‌. പരിഹ​രി​ക്കാ​വു​ന്നതു പരിഹ​രി​ക്കുക, എന്നാൽ പരിഹാ​ര​മി​ല്ലാ​ത്ത​തി​നെ​ക്കു​റി​ച്ചു വിഷമി​ക്ക​രുത്‌.” തത്‌ഫ​ല​മാ​യി, സാക്ഷികൾ പെട്ടെ​ന്നു​തന്നെ വീടു​തോ​റും പ്രസം​ഗി​ക്കു​ക​യും ദുരി​താ​ശ്വാ​സ പെട്ടികൾ കൊണ്ടു​പോ​കു​ക​യും ചെയ്‌തി​രു​ന്നു. ആൻഡ്രു അവരുടെ തീക്ഷ്‌ണത കെടു​ത്തി​ക്ക​ള​ഞ്ഞില്ല.

‘അടുത്ത തവണ ഞങ്ങൾ ഒഴിഞ്ഞു​പോ​കും!’

കററ്‌ലർ റിജിൽ നിന്നുള്ള ഒരു 37 വയസ്സു​കാ​രി സ്‌ത്രീ, ഷാരൺ കാസ്‌ട്രോ അവരുടെ കഥ ഉണരുക!യോടു പറഞ്ഞു: “ഒഴിഞ്ഞു​പോ​കേണ്ട എന്ന്‌ എന്റെ പിതാവു തീരു​മാ​നി​ച്ചു. കഴിഞ്ഞ തവണത്തെ കൊടു​ങ്കാ​ററ്‌ ഫ്‌ളോ​റി​ഡാ തീരത്തു വീശാതെ മാറി​പ്പോ​യ​തി​നാൽ ആൻഡ്രു​വും അങ്ങനെ​തന്നെ ചെയ്യു​മെ​ന്നു​വെന്ന്‌ അദ്ദേഹ​ത്തി​നു തോന്നി. അദ്ദേഹം ജനലുകൾ പലക​വെച്ച്‌ അടയ്‌ക്കാൻപോ​ലും തയ്യാറാ​യി​രു​ന്നില്ല. ഭാഗ്യ​വ​ശാൽ എന്റെ സഹോ​ദരൻ അവിടെ വരിക​യും പ്ലൈവു​ഡ്‌വെച്ചു ജനൽ മറയ്‌ക്കു​ന്ന​തി​നു നിർബ​ന്ധി​ക്കു​ക​യും ചെയ്‌തു. സംശയ​ലേ​ശ​മെ​ന്യേ അദ്ദേഹ​ത്തി​ന്റെ പ്രവർത്തനം ഞങ്ങളുടെ ജീവൻ രക്ഷിച്ചു. ഞങ്ങളുടെ ജനലുകൾ ഛിന്നഭി​ന്ന​മാ​യി പോകു​ക​യും ഞങ്ങൾ കഷണം​ക​ഷ​ണ​മാ​യി മുറി​ഞ്ഞു​പോ​കു​ക​യും ചെയ്‌തേനെ.

“വെളു​പ്പിന്‌ ഏതാണ്ട്‌ 4:30-നു വൈദ്യു​ത​പ്ര​വാ​ഹം നിലച്ചു​പോ​യി. വെളി​യി​ലെ ശബ്ദങ്ങൾ ഭയപ്പെ​ടു​ത്തു​ന്ന​താ​യി​രു​ന്നു. അതൊരു വലിയ തീവണ്ടി​യു​ടെ ശബ്ദം​പോ​ലെ​യാ​യി​രു​ന്നു. വൃക്ഷങ്ങ​ളും കെട്ടി​ട​ങ്ങ​ളും ഒടിയു​ന്ന​തി​ന്റെ​യും തകരു​ന്ന​തി​ന്റെ​യും ശബ്ദമു​ണ്ടാ​യി​രു​ന്നു. ഞെട്ടി​ക്കുന്ന ഒരു കിറു​കി​റാ ശബ്ദം മേൽക്കൂ​ര​യി​ലുള്ള നീളമുള്ള ആണികൾ അയഞ്ഞു​കൊ​ണ്ടി​രി​ക്കു​ന്ന​തി​ന്റെ ഒച്ച ആയിരു​ന്നു​വെന്നു ഞങ്ങൾ പിന്നീടു കണ്ടെത്തി. തട്ടിൻപു​റം പറന്നു​പോ​യി, മേൽക്കൂ​ര​യു​ടെ മൂന്നി​ലൊ​രു ഭാഗം പോയി. ഒടുവിൽ ഞങ്ങൾ, എന്റെ രോഗി​യായ അമ്മയും 90 വയസ്സുള്ള വല്ല്യമ്മ​യും ഉൾപ്പെടെ 12 പേർ, ജനലുകൾ ഒന്നും ഇല്ലായി​രുന്ന നടുവി​ലത്തെ മുറി​യിൽ അഭയം പ്രാപി​ക്കേണ്ടി വന്നു. ഞങ്ങൾ തീർച്ച​യാ​യും അവി​ടെ​ക്കി​ടന്നു മരിക്കാൻ പോകു​ക​യാ​ണെന്നു ഞങ്ങൾക്ക്‌ ഉറപ്പു​തോ​ന്നി.”

ആ അനുഭ​വ​ത്തിൽനിന്ന്‌ ഈ സ്‌ത്രീ എന്തു പാഠമാ​ണു പഠിച്ചത്‌? “അടുത്ത തവണ അവർ ഞങ്ങളോ​ടു ഒഴിഞ്ഞു​പോ​കാൻ പറയു​മ്പോൾ—ഒന്നും ചോദി​ക്കാ​തെ—ഞങ്ങൾ ഒഴിഞ്ഞു​പോ​കും. ഞങ്ങൾ മുന്നറി​യി​പ്പു​കൾക്കു ശ്രദ്ധ കൊടു​ക്കും. ഞാൻ പങ്കു​വെ​ക്കാ​നും അല്‌പം​കൊണ്ട്‌ ഉപജീ​വനം കഴിക്കാ​നും പഠിച്ചു. കൂടാതെ, കരയു​ന്ന​തും ദുഃഖി​ക്കു​ന്ന​തും പിന്നെ യാഥാർത്ഥ്യ​ത്തെ അഭിമു​ഖീ​ക​രി​ക്കു​ന്ന​തും ഉചിത​മാ​ണെന്ന്‌ എനിക്ക​റി​യാം.”

പത്രങ്ങ​ളു​ടെ പ്രതി​ക​ര​ണ​ങ്ങൾ

യഹോ​വ​യു​ടെ സാക്ഷികൾ എത്ര നന്നായി സംഘടി​ത​രാ​യി​രു​ന്നു​വെന്നു മാധ്യ​മ​ങ്ങൾപോ​ലും കുറി​ക്കൊ​ണ്ടു. ദ സാവന്ന ഇവനിംങ്‌ പ്രസ്‌ “യഹോ​വ​യു​ടെ സാക്ഷി​കൾക്കു ദക്ഷിണ ഫ്‌ളോ​റി​ഡാ​യിൽ സ്വാഗ​ത​മു​ണ്ടെന്ന്‌ അവർ കണ്ടെത്തു​ന്നു” എന്ന തലക്കെട്ടു വഹിച്ചു. “സാക്ഷികൾ അവർക്കും മററു​ള്ള​വർക്കും വേണ്ടി കരുതു​ന്നു” എന്ന്‌ മിയാമി ഹെറൾഡ്‌ പ്രസ്‌താ​വി​ച്ചു. “ഈ ആഴ്‌ച​യിൽ ഹോം​സ്‌റെ​റ​ഡി​ലുള്ള ആരും യഹോ​വ​യു​ടെ സാക്ഷി​കൾക്കു​നേരെ അവരുടെ കതകുകൾ—അടയ്‌ക്കാ​നുള്ള കതകോ​ടു കൂടിയ ഒരു വീട്‌ അവർക്ക്‌ ഇപ്പോ​ഴും ഉണ്ടെങ്കിൽ—അടയ്‌ക്കു​ന്നില്ല. ഏതാണ്ട്‌ 3,000-ത്തോളം സ്വമേ​ധ​യാ​സേവക സാക്ഷികൾ രാജ്യ​ത്തെ​മ്പാ​ടും​നി​ന്നു ദുരന്ത​പ്ര​ദേ​ശത്ത്‌ ഒരുമി​ച്ചു​കൂ​ടി​യി​രി​ക്കു​ന്നു, ആദ്യം അവരുടെ ആളുക​ളെ​യും പിന്നെ മററു​ള്ള​വ​രെ​യും സഹായി​ക്കു​ന്ന​തി​നു തന്നെ. . . . സാക്ഷി​ക​ളു​ടെ കൃത്യ​ത​യി​ലും ശിക്ഷണ​ത്തി​ലും കാര്യ​ക്ഷ​മ​ത​യി​ലും ഏതു സൈനിക സ്ഥാപന​വും അസൂയ​പ്പെ​ടും” എന്ന്‌ അതു പ്രസ്‌താ​വി​ച്ചു.

സാക്ഷികൾ അവരുടെ സമ്മേള​ന​ങ്ങ​ളി​ലും കൺ​വെൻ​ഷ​നു​ക​ളി​ലും വലിയ കൂട്ടങ്ങൾക്കു ഭക്ഷണം കൊടു​ക്കുന്ന പ്രവർത്ത​നങ്ങൾ സംഘടി​പ്പി​ക്കു​ന്ന​തിൽ പരിചി​ത​രാണ്‌. കൂടാതെ, രാജ്യ​ഹാ​ളു​ക​ളും വലിയ സമ്മേള​ന​ഹാ​ളു​ക​ളും നിർമ്മി​ക്കു​ന്ന​തിന്‌ അവർ ലോക​വ്യാ​പ​ക​മാ​യി നൂറു​ക​ണ​ക്കി​നു പ്രാ​ദേ​ശി​ക​നിർമ്മാണ കമ്മിറ​റി​കൾ സംഘടി​പ്പി​ച്ചി​ട്ടുണ്ട്‌. അങ്ങനെ, പെട്ടെ​ന്നുള്ള ഒരു അറിയി​പ്പിൽ പ്രതി​ക​രി​ക്കാൻ തയ്യാറുള്ള ആൾക്കാരെ അവർ പരിശീ​ലി​പ്പി​ച്ചി​ട്ടുണ്ട്‌.

എന്നിരു​ന്നാ​ലും, മറെറാ​രു വസ്‌തുത അവരുടെ മനോ​ഭാ​വ​മാണ്‌. അതേ റിപ്പോർട്ട്‌ തുടർന്നു: “അവിടെ ഉദ്യോ​ഗ​സ്ഥ​മേ​ധാ​വി​ത്വം ഇല്ല. അഹംഭാ​വി​ക​ളു​ടെ പോരാ​ട്ടം ഇല്ല. പകരം, ജോലി​ക്കാർ എത്ര മുൻകോ​പി​ക​ളോ, വഴങ്ങാ​ത്ത​വ​രോ ക്ഷീണി​ത​രോ ആയാലും വളരെ സന്തോ​ഷ​മു​ള്ള​വ​രും സഹകര​ണ​മ​നോ​ഭാ​വ​മു​ള്ള​വ​രും ആയി കാണ​പ്പെ​ടു​ന്നു.” അത്‌ എങ്ങനെ​യാ​ണു വിശദീ​ക​രി​ക്ക​പ്പെ​ട്ടത്‌? ഒരു സാക്ഷി ഉത്തരം നല്‌കി: “മററു​ള്ള​വ​രോ​ടു സ്‌നേഹം പ്രകട​മാ​ക്കാൻ നമ്മെ പ്രേരി​പ്പി​ക്കുന്ന, ദൈവ​വു​മാ​യുള്ള ഒരു ബന്ധത്തിൽനി​ന്നാണ്‌ ഇതു വരുന്ന​താണ്‌.” ആൻഡ്രു​വിന്‌ എടുത്തു​ക​ള​യാൻ കഴിയാഞ്ഞ മറെറാ​ന്നാ​യി​രു​ന്നത്‌, സാക്ഷി​ക​ളു​ടെ ക്രിസ്‌തീയ സ്‌നേഹം.—യോഹ​ന്നാൻ 13:34, 35.

സാക്ഷികൾ വൃക്ഷങ്ങ​ളിൽനി​ന്നു പഠിച്ചത്‌ ഒരു രസകര​മായ താരത​മ്യം ആണെന്നു തോന്നു​ന്നു. ഒരു ദൃക്‌സാ​ക്ഷി അത്‌ ഇപ്രകാ​രം അവതരി​പ്പി​ച്ചു: “ഞാൻ ചുററി​ക്ക​റങ്ങി സഞ്ചരി​ച്ച​പ്പോൾ നൂറു​ക​ണ​ക്കി​നു വലിയ വൃക്ഷങ്ങൾ കടപു​ഴകി നിലത്തു മറിഞ്ഞു വീണു​കി​ട​ക്കു​ന്നതു കണേണ്ടി​വന്നു. അത്‌ എന്തു​കൊ​ണ്ടാ​യി​രു​ന്നു? അവയുടെ വലിപ്പം നിമിത്തം അവ ശക്തിയായ കാററി​നെ ചെറുത്തു നിൽക്കാൻ ശ്രമിച്ചു, അവയ്‌ക്ക്‌ പടർന്നു​പ​ന്ത​ലി​ച്ച​തും എന്നാൽ ആഴത്തിൽ ഇറങ്ങാ​ത്ത​തു​മായ ഒരു വേരു​പ​ട​ല​മാ​ണു​ണ്ടാ​യി​രു​ന്നത്‌. മറിച്ച്‌, വണ്ണംകു​റഞ്ഞ പനവൃ​ക്ഷ​ങ്ങ​ളിൽ മിക്കതും വീഴാ​തെ​നി​ന്നു. അവ കാററു​കൊ​ണ്ടു വളഞ്ഞു, ചിലതിന്‌ അഗ്രഭാ​ഗം നഷ്ടപ്പെട്ടു, എന്നാൽ അധിക​വും നിലത്തു വേരു​റ​പ്പി​ച്ചു​നി​ന്നു.”

ആ സാക്ഷി​കൾക്കു ദൈവ​വ​ച​ന​ത്തി​ലെ വിശ്വാ​സ​ത്തി​ന്റെ ആഴത്തി​ലുള്ള വേരുകൾ ഉണ്ടായി​രു​ന്നു, അവർ പ്രതി​ക​ര​ണ​ങ്ങ​ളിൽ വഴക്കമു​ള്ളവർ ആയിരു​ന്നു. സ്വത്തു​ക്ക​ളും വീടു​ക​ളും അവർക്ക്‌ സർവ്വസ്വ​വു​മാ​യി​രു​ന്നില്ല. വിപത്തിൻ മദ്ധ്യേ​യും കുറഞ്ഞ​പക്ഷം അവർക്ക്‌ ജീവി​ച്ചി​രി​ക്കു​ന്ന​തി​നും യഹോ​വയെ സേവി​ക്കു​ന്ന​തിൽ തുടരു​ന്ന​തി​നും കഴിഞ്ഞു. ആൻഡ്രു അവരിൽനിന്ന്‌ എടുക്കാ​തി​രുന്ന ഒന്നായി​രു​ന്നു ജീവൻ.

അത്‌ എങ്ങനെ ചെയ്യുന്നു?

ആൻഹൊ​യി​സർ ബുഷ്‌ കമ്പനി ഒരു വണ്ടി നിറയെ കുടി​വെള്ളം സംഭാവന ചെയ്‌തു. ആ പ്രദേ​ശത്ത്‌ എത്തിയ​പ്പോൾ വെള്ളം എവിടെ ഏല്‌പ്പി​ക്കണം എന്നു ഡ്രൈവർ അധികാ​രി​ക​ളോ​ടു ചോദി​ച്ചു. സംഘടി​ത​മായ എന്തെങ്കി​ലും ഉണ്ടെങ്കിൽ അതു സാക്ഷി​കൾക്കു മാത്ര​മാണ്‌ എന്ന്‌ അദ്ദേഹ​ത്തോട്‌ അവർ പറഞ്ഞു. വാസ്‌ത​വ​ത്തിൽ, ആൻഡ്രു ആഞ്ഞടി​ച്ച​തി​നു​ശേഷം ഒരാഴ്‌ച​ക്കു​ള്ളിൽ ഏതാണ്ട്‌ 70 ട്രക്ക്‌-ട്രെയി​ല​റിൽ വിതര​ണ​സാ​മാ​നങ്ങൾ യഹോ​വ​യു​ടെ സാക്ഷി​ക​ളു​ടെ ഫോർട്ട്‌ ലോഡർഡെ​യി​ലി​ലെ സമ്മേള​ന​ഹാ​ളിൽ എത്തി​ച്ചേർന്നി​രു​ന്നു.

അവിടു​ത്തെ ഒരു സ്വമേ​ധ​യാ​സേ​വകൻ റിപ്പോർട്ടു ചെയ്യുന്നു: “ഞങ്ങൾക്ക്‌ ഒരു വണ്ടി നിറയെ കുടി​വെള്ളം ലഭിച്ചു. ഞങ്ങൾ പെട്ടെ​ന്നു​തന്നെ രാജ്യ​ഹാ​ളു​ക​ളി​ലെ വിതരണ കേന്ദ്ര​ങ്ങ​ളി​ലേക്ക്‌ അയയ്‌ക്കുന്ന മററു ഭക്ഷണപ​ദാർത്ഥ​ങ്ങ​ളോ​ടൊ​പ്പം ഇതും ഉൾപ്പെ​ടു​ത്തി. അത്‌ ആ പ്രദേ​ശത്ത്‌ ആവശ്യ​മു​ണ്ടാ​യി​രുന്ന സഹോ​ദ​ര​ങ്ങൾക്കും അയൽക്കാർക്കും പങ്കു​വെച്ചു.” വാഷിം​ങ്‌ടൺ സ്‌റേ​റ​റ​റി​ലെ ഒരു കടലാസു കമ്പനി 2,50,000 കടലാസു പാത്രങ്ങൾ സംഭാവന ചെയ്‌തു.

‘അവർ മാത്ര​മാ​ണു ശരിയായ രീതി​യിൽ സംഘടി​പ്പി​ക്ക​പ്പെ​ട്ടി​രി​ക്കു​ന്നത്‌’ എന്നു പറഞ്ഞു​കൊ​ണ്ടു നഗര അധികാ​രി​കൾ തുടക്ക​ത്തിൽ സാക്ഷി​ക​ള​ല്ലാത്ത സ്വമേ​ധ​യാ​സേ​വ​കരെ രാജ്യ​ഹാ​ളി​ലേക്ക്‌ അയച്ചു​കൊ​ണ്ടി​രു​ന്നു. ഒടുവിൽ സൈനി​കർ വരുക​യും ഭക്ഷണ-ജല ദുരി​താ​ശ്വാ​സ​കേ​ന്ദ്ര​ങ്ങ​ളും നഗരകൂ​ടാ​ര​ങ്ങ​ളും സ്ഥാപിച്ചു തുടങ്ങു​ക​യും ചെയ്‌തു.

ദുരി​താ​ശ്വാ​സ​ക്ക​മ്മി​ററി ഫോർട്ട്‌ ലോഡർഡെ​യി​നി​ലെ സമ്മേള​ന​ഹാ​ളിൽ സ്ഥാപിച്ച സാക്ഷി​ക​ളു​ടെ ആദ്യ വിതര​ണ​കേ​ന്ദ്രം ഹോം​സ്‌റെ​റ​ഡി​നു ചുററു​മുള്ള പ്രധാന ദുരന്ത​മേ​ഖ​ല​യിൽനിന്ന്‌ ഏതാണ്ട്‌ 60 കിലോ​മീ​ററർ വടക്കാ​യി​രു​ന്നു. ജോലി ഭാരം കുറയ്‌ക്കു​ന്ന​തി​നു​വേണ്ടി ഒരു പ്രാഥ​മിക വിതരണ സ്ഥലം ദുരന്ത​മേ​ഖ​ല​യ്‌ക്ക്‌ ഏതാണ്ട്‌ 400 കിലോ​മീ​ററർ വടക്കു​പ​ടി​ഞ്ഞാ​റുള്ള ഒർലാൻഡോ​യ്‌ക്കു സമീപം പ്ലാൻറ്‌ സിററി സമ്മേള​ന​ഹാ​ളിൽ സ്ഥാപിച്ചു. മിക്ക ദുരി​താ​ശ്വാ​സ സാധന​ങ്ങ​ളും വേർതി​രി​ക്കു​ന്ന​തി​നും പായ്‌ക്കു​ചെ​യ്യു​ന്ന​തി​നും​വേണ്ടി അവിടെ എത്തിച്ചി​രു​ന്നു. കമ്മിററി അവർക്കു​വേ​ണ്ടതു പ്ലാൻറ്‌ സിററി​യിൽനി​ന്നു ദൈനം​ദിന അടിസ്ഥാ​ന​ത്തിൽ ഓർഡർ ചെയ്‌തി​രു​ന്നു, അഞ്ചു മണിക്കൂർ യാത്ര​ചെ​യ്‌തു ഫോർട്ട്‌ ലോഡർഡെ​യി​നിൽ എത്തുന്ന​തി​നു വലിയ ട്രക്ക്‌ ട്രെയി​ല​റു​കൾ ഉപയോ​ഗി​ച്ചി​രു​ന്നു.

തുടർന്ന്‌ ഈ വിതര​ണ​കേ​ന്ദ്രം ദുരന്ത​മേ​ഖ​ല​യു​ടെ മദ്ധ്യഭാ​ഗത്ത്‌ റിപ്പയ​റിംഗ്‌ നടത്തി​ക്ക​ഴി​ഞ്ഞി​രുന്ന മൂന്നു രാജ്യ​ഹാ​ളിൽ ഭക്ഷണവും, സാധന​ങ്ങ​ളും വെള്ളവും ജനറേ​റ​റ​റു​ക​ളും മററ്‌ അത്യാ​വശ്യ സാധന​ങ്ങ​ളും എത്തിച്ചു. അവിടെ, സമർത്ഥ​രായ സാക്ഷികൾ ശ്രദ്ധ ആവശ്യ​മാ​യി​രുന്ന നൂറു​ക​ണ​ക്കി​നു വീടുകൾ സന്ദർശി​ക്കു​ന്ന​തിന്‌ നിർമ്മാണ, വൃത്തി​യാ​ക്കൽ സംഘങ്ങളെ സംഘടി​പ്പി​ച്ചു. രാജ്യ​ഹാൾ മൈതാ​നത്ത്‌ അടുക്ക​ള​ക​ളും ഭക്ഷണവി​തരണ ലൈനു​ക​ളും തുറന്നു, ഏതൊ​രാൾക്കും സഹായ​ത്തി​നു​വേണ്ടി വരാൻ സ്വാഗ​ത​മു​ണ്ടാ​യി​രു​ന്നു. ചില സൈനി​കർപോ​ലും അവിടെ ഭക്ഷണം ആസ്വദി​ച്ചു, പിന്നീട്‌ അവർ സംഭാ​വ​ന​പ്പെ​ട്ടി​ക​ളിൽ സംഭാവന ഇടുന്ന​താ​യും കണ്ടു.

പുരു​ഷൻമാർ വീടുകൾ കേടു​പോ​ക്കു​ന്ന​തിൽ ശ്രദ്ധ​വെ​ച്ച​പ്പോൾ ചില സ്‌ത്രീ​കൾ ആഹാരം തയ്യാറാ​ക്കു​ക​യാ​യി​രു​ന്നു. മററു​ള്ളവർ പ്രകൃതി വിപത്തി​നെ​ക്കു​റി​ച്ചുള്ള ബൈബി​ളി​ന്റെ വിശദീ​ക​രണം പങ്കു​വെ​ക്കു​ന്ന​തി​നു​വേ​ണ്ടി​യും ആവശ്യ​മു​ള്ള​വർക്കു ദുരി​ത്വ​ശ്വാ​സ വസ്‌തു​ക്ക​ള​ട​ങ്ങിയ പെട്ടികൾ കൊടു​ക്കു​ന്ന​തി​നു​വേ​ണ്ടി​യും തങ്ങൾക്കു കണ്ടെത്താൻ കഴിഞ്ഞ ആരെയും സന്ദർശി​ക്കാൻ പോയി. ഇവരി​ലൊ​രാൾ തെരേസാ പിരഡാ ആയിരു​ന്നു. അവരുടെ വീടിനു കേടു​സം​ഭ​വി​ച്ചി​രു​ന്നു, അവരുടെ കാറിന്റെ കതകുകൾ തകർക്ക​പ്പെ​ട്ടി​രു​ന്നു—എന്നിട്ടും അവരുടെ കാർ അയൽക്കാർക്കു​വേണ്ടി തയാറാ​ക്കിയ ദുരി​താ​ശ്വാ​സ പെട്ടി​കൾകൊ​ണ്ടു നിറച്ചു. അവരുടെ ഭർത്താവ്‌, ലൊ​സോ​രോ രാജ്യ​ഹാ​ളു​ക​ളി​ലൊ​ന്നിൽ തിര​ക്കോ​ടെ പ്രവർത്തി​ക്കു​ക​യാ​യി​രു​ന്നു.—സഭാ​പ്ര​സം​ഗി 9:11; ലൂക്കൊസ്‌ 21:11, 25.

ഭവനര​ഹി​ത​രാ​യ​വ​രിൽ അനേകർക്ക്‌ ആൻഡ്രു ബാധി​ക്കാ​തി​രുന്ന സാക്ഷി​ക​ളു​ടെ വീടു​ക​ളിൽ താമസ​സൗ​ക​ര്യ​ങ്ങൾ കണ്ടെത്തി. മററു​ചി​ലർ വാടക​യ്‌ക്കെ​ടു​ത്ത​തോ ആ ഉദ്ദേശ്യ​ത്തിൽ സംഭാ​വ​ന​ചെ​യ്യ​പ്പെ​ട്ട​തോ ആയ ട്രെയി​ല​റു​ക​ളിൽ താമസി​ച്ചു. ചിലർ സൈനി​കർ സ്ഥാപിച്ച നഗരകൂ​ടാ​ര​ങ്ങ​ളി​ലേക്കു മാറി. മററു​ള്ളവർ തങ്ങളുടെ വീടു നഷ്ടപ്പെ​ട്ട​താ​യി പരിഗ​ണി​ച്ചു​കൊ​ണ്ടു രാജ്യ​ത്തി​ന്റെ മററു ഭാഗങ്ങ​ളി​ലെ സുഹൃ​ത്തു​ക്ക​ളോ​ടും ബന്ധുക്ക​ളോ​ടും കൂടെ പാർക്കാൻ പോയി. അവർക്കു വീടു​ക​ളോ ജോലി​യോ ഉണ്ടായി​രു​ന്നില്ല. വൈദ്യു​തി​യോ വെള്ളമോ വേണ്ടത്ര മാലി​ന്യ​നിർമ്മാർജ്ജന മാർഗ്ഗ​ങ്ങ​ളോ ഉണ്ടായി​രു​ന്നില്ല—തന്നിമി​ത്തം അവർക്കുള്ള ഏററവും നല്ല പരിഹാ​ര​മാർഗ്ഗം അവർ തെര​ഞ്ഞെ​ടു​ത്തു.

അവരെ​ല്ലാ​വ​രും പഠിച്ച ഒരു പാഠം സ്‌പാ​നിഷ്‌ സംസാ​രി​ക്കുന്ന ഒരു സാക്ഷി നന്നായി അവതരി​പ്പി​ച്ചു: “ഞങ്ങളുടെ ജീവി​ത​ല​ക്ഷ്യ​ങ്ങ​ളെ​ക്കു​റി​ച്ചു പഠിച്ച പാഠത്തി​നു ഞങ്ങൾ വളരെ നന്ദിയു​ള്ള​വ​രാണ്‌. നിങ്ങൾക്കു ഭവനം കെട്ടി​പ്പെ​ടു​ക്കു​ന്ന​തി​നും ഭൗതി​ക​വ​സ്‌തു​ക്കൾ സ്വരൂ​പി​ക്കു​ന്ന​തി​നും 15 അല്ലെങ്കിൽ 20 വർഷങ്ങൾ ജോലി​ചെ​യ്യാൻ കഴിയു​മെന്നു നിങ്ങൾക്ക​റി​യാം, എന്നാൽ ഒരു മണിക്കൂ​റു​കൊണ്ട്‌ അവയെ​ല്ലാം കൈവി​ട്ടു​പോ​യേ​ക്കാം. ഇതു നമ്മുടെ ആത്മീയ ലക്ഷ്യങ്ങൾ തിരി​ച്ച​റി​യു​ന്ന​തിന്‌, ജീവിതം ലളിത​മാ​ക്കു​ന്ന​തി​നും യഹോ​വയെ സേവി​ക്കു​ന്ന​തി​നെ​ക്കു​റി​ച്ചു യഥാർത്ഥ​ത്തിൽ ചിന്തി​ക്കു​ന്ന​തി​നും നമ്മെ സഹായി​ക്കു​ന്നു.”

ഇത്‌ ഏറെയും അപ്പോ​സ്‌ത​ല​നായ പൗലോസ്‌ പ്രസ്‌താ​വി​ച്ച​തു​പോ​ലെ​യാണ്‌: “എങ്കിലും എനിക്കു ലാഭമാ​യി​രു​ന്നതു ഒക്കെയും ഞാൻ ക്രിസ്‌തു നിമിത്തം ചേതം എന്നു എണ്ണിയി​രി​ക്കു​ന്നു. അത്രയു​മല്ല, എന്റെ കർത്താ​വായ ക്രിസ്‌തു​യേ​ശു​വി​നെ​ക്കു​റി​ച്ചുള്ള പരിജ്ഞാ​ന​ത്തി​ന്റെ ശ്രേഷ്‌ഠ​ത​നി​മി​ത്തം ഞാൻ ഇപ്പോ​ഴും എല്ലാം ചേതം എന്നു എണ്ണുന്നു. ഞാൻ ക്രിസ്‌തു​വി​നെ നേടേ​ണ്ട​തി​നു . . . അവന്റെ നിമിത്തം എല്ലാം ഉപേക്ഷി​ച്ചു ചവറു എന്നു എണ്ണുന്നു.”—ഫിലി​പ്പി​യർ 3:7-11.

നമ്മുടെ ഇപ്പോ​ഴത്തെ ലോക​ത്തിൽ പ്രകൃ​തി​വി​പ​ത്തു​കൾ ജീവി​ത​ത്തി​ന്റെ ഒരു ഭാഗമാണ്‌. നമ്മൾ അധികാ​രി​ക​ളിൽനി​ന്നുള്ള മുന്നറി​യി​പ്പു​കൾ ശ്രദ്ധി​ക്കു​ന്നു​വെ​ങ്കിൽ നാം കുറഞ്ഞ​പക്ഷം നമ്മുടെ ജീവൻ രക്ഷി​ച്ചേ​ക്കാം. ഒരുപക്ഷേ വീടു​ക​ളും സ്വത്തു​ക്ക​ളും നഷ്ടപ്പെ​ട്ടേ​ക്കാം, എന്നാൽ “സർവ്വാ​ശ്വാ​സ​വും നല്‌കുന്ന ദൈവ”വുമാ​യുള്ള ഒരു ക്രിസ്‌ത്യാ​നി​യു​ടെ ബന്ധം ദൃഢമാ​ക്ക​പ്പെ​ടണം. ഒരു ദുരന്ത​ത്തിൽ ചിലർ മരി​ച്ചേ​ക്കാ​മെ​ങ്കി​ലും, പുനഃ​സ്ഥി​തീ​ക​രി​ക്ക​പ്പെട്ട ഭൂമി​യി​ലെ—പ്രകൃ​തി​വി​പ​ത്തു​ക​ളാ​ലുള്ള ദുരി​ത​വും മരണവും മേലാൽ കാണു​ക​യി​ല്ലാത്ത ഒരു ഭൂമി​യി​ലെ—ദൈവ​ത്തി​ന്റെ പുതി​യ​ലോ​ക​ത്തിൽ അവർക്കൊ​രു പുനരു​ത്ഥാ​നം യേശു വാഗ്‌ദാ​നം ചെയ്‌തു.—2 കൊരി​ന്ത്യർ 1:3, 4; യെശയ്യാ​വു 11:9; യോഹ​ന്നാൻ 5:28, 29; വെളി​പ്പാ​ടു 21:3, 4. (g93 1⁄8)

[അടിക്കു​റി​പ്പു​കൾ]

[20-ാം പേജിലെ ചതുരം]

അത്യന്തം അശ്ചര്യ​പ്പെ​ട്ടു

ദുരി​താ​ശ്വാ​സ​ത്തിൽ സഹായി​ക്കു​ന്ന​തി​നു​വേണ്ടി വെള്ളക്കാ​രായ 11 സാക്ഷി​ക​ളു​ടെ ഒരു സംഘം ഫ്‌ളോ​റി​ഡാ​യി​ലെ ററാമ്പാ​യിൽനി​ന്നു യാത്ര​ചെ​യ്‌തു വന്നു. അവർ സാധന​സാ​മ​ഗ്രി​കൾ സമ്പാദി​ക്കു​ക​യും കറുത്ത​വർഗ്ഗ​ക്കാ​ര​നായ ഒരു സഹോ​ദ​രന്റെ മേൽക്കൂര നന്നാക്കാൻ തുടങ്ങു​ക​യും ചെയ്‌തു. സാക്ഷി​യ​ല്ലാ​യി​രുന്ന ഒരു അനന്തരവൻ വന്നപ്പോൾ അദ്ദേഹ​ത്തി​നു തന്റെ കണ്ണുകളെ വിശ്വ​സി​ക്കാൻ കഴിഞ്ഞില്ല—വെള്ളക്കാ​രായ സാക്ഷി​ക​ളു​ടെ ഒരു സംഘം അദ്ദേഹ​ത്തി​നു മുമ്പെ അവിടെ എത്തി​ച്ചേ​രു​ക​യും അമ്മാവന്റെ വീടു നന്നാക്കു​ക​യും ചെയ്യു​ന്നതു കണ്ടതിൽ അദ്ദേഹം അത്യന്തം ആശ്ചര്യ​പ്പെട്ടു. അദ്ദേഹ​ത്തി​നു വളരെ മതിപ്പു​ള​വാ​ക​യാൽ നിർമ്മാ​ണ​പ്ര​വർത്ത​ന​ത്തിൽ അദ്ദേഹം സഹായി​ക്കു​ക​പോ​ലും ചെയ്‌തു.

അടുത്ത പ്രാവ​ശ്യം സാക്ഷികൾ അദ്ദേഹ​ത്തി​ന്റെ വീടി​ന​ടു​ത്തു​കൂ​ടി വരു​മ്പോൾ ഒരു ബൈബിൾ അദ്ധ്യയ​ന​ത്തിന്‌ ആവശ്യ​പ്പെ​ടു​മെന്ന്‌ അദ്ദേഹം പറഞ്ഞു. ററാമ്പാ സംഘവു​മാ​യി സംസാ​രി​ച്ച​പ്പോൾ അദ്ദേഹം അവരുടെ പ്രദേ​ശ​ത്തു​നി​ന്നു​ള്ള​വ​നാ​ണെന്നു വ്യക്തമാ​യി. ഉടനെ​തന്നെ ആ സംഘത്തിൽനി​ന്നുള്ള ഒരു മൂപ്പൻ തുടർന്നു​വന്ന ആഴ്‌ച​യിൽ ഒരു ബൈബി​ള​ദ്ധ്യ​യ​ന​ത്തി​നുള്ള ക്രമീ​ക​രണം ചെയ്‌തു! ഒരു സാക്ഷി പ്രസ്‌താ​വി​ച്ച​തു​പോ​ലെ, സാക്ഷ്യം കൊടു​ക്കു​ന്ന​തി​നു നിങ്ങൾ കതകിൽ മുട്ടേണ്ട ആവശ്യ​മില്ല എന്ന്‌ ഇതു തെളി​യി​ക്കു​ന്നു—നിങ്ങൾക്കു മേൽക്കൂ​ര​യിൽ മുട്ടാൻ സാധി​ക്കും!

[15-ാം പേജിലെ ചിത്രങ്ങൾ]

ആൻഡ്രു കൊടു​ങ്കാ​ററ്‌ ഒന്നും ഒഴിവാ​ക്കി​യില്ല, കെട്ടി​ട​ങ്ങൾക്കു ചെറു​ത്തു​നി​ല്‌ക്കാൻ കഴിഞ്ഞില്ല

കീഫറിന്റെ സഞ്ചരി​ക്കുന്ന വീട്‌—അതിന്റെ അവശേ​ഷി​ക്കുന്ന ഭാഗങ്ങ​ളും

[16-ാം പേജിലെ ചിത്രങ്ങൾ]

റിബേക്കാ പെരേ​സും പുത്രി​മാ​രും മററ്‌ 11 പേരും ഈ ചെറിയ സ്ഥലത്ത്‌ അതിജീ​വി​ച്ചു

കവർച്ച തടയു​ന്ന​തി​നു സൈന്യം കടന്നു​വന്നു (മുകളിൽ വലത്ത്‌); കവർച്ച​ചെ​യ്യ​പ്പെട്ട കടകൾ (വലത്ത്‌)

കൊടുങ്കാററ്‌ മേൽക്കൂ​ര​കളെ ഇളക്കി​ക്ക​ളഞ്ഞു, വാഹനങ്ങൾ ചുഴററി എറിയ​പ്പെ​ട്ടു

[17-ാം പേജിലെ ചിത്രങ്ങൾ]

രാജ്യഹാളുകളിൽ ദുരി​താ​ശ്വാ​സം സംഘടി​പ്പി​ക്ക​പ്പെട്ടു

സഞ്ചരിക്കുന്ന വീടുകൾ വൃക്ഷങ്ങളെ പൊതി​ഞ്ഞി​രു​ന്നു; ഒരു കുട്ടി​യു​ടെ കളിപ്പാ​ട്ടങ്ങൾ മെത്തയിൽ ഉപേക്ഷി​ക്ക​പ്പെട്ടു കിടക്കു​ന്നു; നഷ്ടശി​ഷ്ട​ങ്ങ​ളു​ടെ കൂട്ടത്തിൽ ബൈബിൾ സാഹി​ത്യം; തെരേസാ പിരഡ​യെ​പ്പോ​ലുള്ള സാക്ഷികൾ അവരുടെ അയൽക്കാർക്കു വിതര​ണ​സാ​മാ​നങ്ങൾ എത്തിച്ചു​ക്കൊ​ടു​ത്തു

സംഭാവനചെയ്യപ്പെട്ട നിർമ്മാ​ണ​സാ​മ​ഗ്രി​കൾ. തുണി​ത്ത​രങ്ങൾ വേർതി​രി​ക്കു​ന്നു

[18-ാം പേജിലെ ചിത്രങ്ങൾ]

ഐക്യനാടുകളിൽ എല്ലായി​ട​ത്തു​നി​ന്നു​മുള്ള സ്വമേ​ധ​യാ​സേ​വകർ ദുരി​താ​ശ്വാ​സ പ്രവർത്ത​ന​ത്തിൽ സഹായി​ച്ചു