യുവജ​നങ്ങൾ ചോദി​ക്കു​ന്നു. . .

ഞാൻ കുരു​ക്കി​ല​ക​പ്പെ​ട്ടി​രി​ക്കു​ന്നു! എനി​ക്കെ​ങ്ങനെ ചൂതാട്ടം നിർത്താൻ കഴിയും?

“എനിക്കു പതിമൂ​ന്നു വയസ്സാ​യ​പ്പോൾ സ്ലോട്ട്‌ യന്ത്രങ്ങ​ളിൽ ഞാൻ ചൂതു​ക​ളി​ച്ചു തുടങ്ങി” എന്നു ഡേവിഡ്‌ സമ്മതി​ച്ചു​പ​റ​യു​ന്നു. “സ്ലോട്ട്‌ യന്ത്രങ്ങ​ളിൽ ചൂതു കളിക്കാ​തെ ഒരു വിനോദ വീഥി കടന്നു​പോ​കാൻ എനിക്കു കഴിയാത്ത ഘട്ടത്തോ​ളം ഞാൻ എത്തി.” മുമ്പു ചൂതു​ക​ളി​ക്കാ​ര​നാ​യി​രുന്ന തോമസ്‌ എന്നു പേരുള്ള മറെറാ​രാൾ ഇപ്രകാ​രം സമ്മതി​ക്കു​ന്നു: “എന്റെ ശീലം നിലനിർത്താൻ സ്‌നേ​ഹി​ത​രിൽനി​ന്നും കുടും​ബ​ത്തിൽനി​ന്നും സഹജോ​ലി​ക്കാ​രിൽനി​ന്നും ഞാൻ മോഷ്ടി​ക്കു​ക​പോ​ലും ചെയ്‌തു. എന്തിനു​വേ​ണ്ടി​യും ഞാൻ ചൂതാട്ടം നടത്തി.”

ഡേവി​ഡും തോമ​സും ക്രിസ്‌ത്യാ​നി​ക​ളാ​യി വളർത്ത​പ്പെ​ട്ട​വ​രാ​യി​രു​ന്നു. രണ്ടു​പേ​രും ചൂതാ​ട്ട​ത്തി​ന്റെ കെണി​യിൽ കുരുങ്ങി—മാരക​മായ ഒരു പ്രേരക ശക്തിയാൽ കുരു​ക്കി​ലാ​ക്ക​പ്പെട്ടു. യുവജ​ന​ങ്ങളെ ചൂതാ​ട്ട​ത്തി​ലേക്കു വശീക​രി​ക്കുന്ന വഞ്ചകമായ മനശ്ശാ​സ്‌ത്ര പ്രയോ​ഗ​ങ്ങൾക്കു യുവജ​ന​ങ്ങ​ളു​ടെ ഞെട്ടി​ക്കുന്ന സംഖ്യ ഇരയാ​യി​ത്തീർന്നി​ട്ടു​ണ്ടെന്നു ഗവേഷകർ പറയുന്നു. ടൈം മാഗസിൻ ഇപ്രകാ​രം പറയുന്നു: “അമേരി​ക്ക​യിൽ കണക്കനു​സ​രിച്ച്‌ 80 ലക്ഷം നിർബ​ന്ധിത ചൂതാ​ട്ട​ക്കാ​രു​ള്ള​തിൽ കണിശ​മാ​യും 10 ലക്ഷം പേർ കൗമാ​ര​പ്രാ​യ​ക്കാ​രാ​ണെന്നു ചൂതാ​ട്ട​ത്തെ​ക്കു​റി​ച്ചു ഗവേഷണം നടത്തു​ന്നവർ പറയുന്നു.” ഐക്യ​നാ​ടു​ക​ളി​ലെ മൊത്തം കൗമാ​ര​പ്രാ​യ​ക്കാ​രിൽ 4 മുതൽ 6 വരെ ശതമാനം പേർ ചൂതാ​ട്ട​രോ​ഗി​ക​ളാ​ണെന്നു ചിലർ കരുതു​ന്നു.

ഈ ദുശ്ശീ​ല​ത്തി​ന്റെ പല വ്യത്യസ്‌ത രൂപങ്ങൾ യുവാക്കൾ പിൻപ​റ​റു​ന്നു. മൈനി​ച്ചി ഡെയ്‌ലി ന്യൂസ്‌ പറയു​ന്ന​ത​നു​സ​രി​ച്ചു ജപ്പാനിൽ പന്തയം വയ്‌ക്കു​ന്ന​തിൽനി​ന്നു ചെറു​പ്പ​ക്കാ​രെ തടയുന്ന കർശന നിയമങ്ങൾ ഉണ്ടായി​രു​ന്നി​ട്ടും യുവജ​നങ്ങൾ “ചൂതു​ക​ളി​ക്കാർ എന്ന നിലയിൽ ഓട്ടപ്പ​ന്ത​യ​സ്ഥ​ല​ത്തും അവി​ടെ​നി​ന്നു മാറി പന്തയം വയ്‌ക്കുന്ന സ്ഥലങ്ങളി​ലും, അസ്വസ്ഥ​മാ​ക്കും​വി​ധം വളർന്നു വരുന്ന ഒരു പ്രവണ​ത​യിൽ, തങ്ങളുടെ വർധി​ച്ചു​വ​രുന്ന സാന്നി​ദ്ധ്യം നിമിത്തം ശ്രദ്ധി​ക്ക​പ്പെ​ടു​ന്ന​വ​രാ​യി​ത്തീർന്നി​രി​ക്കു​ന്നു.” കൂടാതെ ഭാഗ്യ​ക്കു​റി എടുക്കു​ന്ന​തും സ്‌പോർട്‌സ്‌ മത്സരങ്ങ​ളെ​ക്കു​റി​ച്ചു പന്തയം വയ്‌ക്കു​ന്ന​തും ചീട്ടു കളിക്കു​ന്ന​തും യുവജ​നങ്ങൾ പന്തയം വയ്‌ക്കാ​നുള്ള ത്വരയ്‌ക്കു കീഴ്‌പ്പെ​ടു​ന്ന​തി​നുള്ള ജനരഞ്‌ജ​ക​ങ്ങ​ളായ മാർഗ​ങ്ങ​ളാണ്‌.

ചൂതു​കളി ആസക്‌തി—പരിണ​ത​ഫ​ല​ങ്ങൾ

ഗാം​ബേ​ഴ്‌ള്‌സ്‌ അനോ​നി​മസ്‌ എന്ന ഒരു സ്ഥാപന​ത്തി​ലെ ഗോർഡൻ മൂഡി പറയുന്നു: “തുടക്ക​ത്തിൽ [ചൂതാട്ടം] ഒരു വലിയ കണ്ടുപി​ടി​ത്തം നടത്തു​ന്ന​തു​പോ​ലെ​യോ പ്രേമി​ക്കു​ന്ന​തു​പോ​ലെ​യോ ഉള്ള വിസ്‌മ​യ​ക​ര​മായ ഒരു പുതിയ അനുഭ​വ​മാണ്‌. . . . ഭാഗ്യം പരീക്ഷി​ക്കു​ന്നത്‌ ആനന്ദക​ര​വും വശീക​രി​ക്കു​ന്ന​തു​മാണ്‌.” (ക്വിററ്‌ കമ്പൽസിവ്‌ ഗാംബ്ലിംഗ്‌) അതേ, വിജയ​ത്തി​ന്റെ തിരത്ത​ള്ള​ലും അതോ​ടൊ​പ്പ​മുള്ള അഡ്രി​നാ​ലി​ന്റെ അന്തഃ​സ്രാ​വ​വും അനുഭ​വി​ക്കു​ന്നത്‌ അനേക​മാ​ളു​കൾക്കും ഉത്സാഹം ജനിപ്പി​ക്കു​ന്ന​താണ്‌. എന്നാൽ എല്ലായ്‌പോ​ഴും വിജയി​ക്കാൻ നിങ്ങൾക്കാ​വില്ല. ഒടുവിൽ ചൂതാ​ട്ട​ക്കാ​ര​നാ​ണു നഷ്ടം. ഋണബാധ്യതയും സാമ്പത്തിക നഷ്ടവും അയാളു​ടെ പ്രശ്‌ന​ങ്ങ​ളു​ടെ തുടക്കം മാത്ര​മാണ്‌.

ആസക്തി​യു​ള​വാ​ക്കുന്ന ഒരു പദാർഥ​ത്തെ​പ്പോ​ലെ ആസക്തമായ നേര​മ്പോ​ക്കി​നു പറഞ്ഞറി​യി​ക്കാ​നാ​വാത്ത ആത്മീയ​വും വൈകാ​രി​ക​വും ധാർമി​ക​വും ആയ നഷ്ടം വരുത്താൻ കഴിയും. “ഒടുവിൽ നിങ്ങളെ ഒരു അടിമ​യാ​ക്കുന്ന . . . വക്രത” എന്നു ഗോർഡൻ മൂഡി വിളി​ക്കു​ന്നതു നിങ്ങളിൽ വളർത്തി​യെ​ടു​ക്കാൻ അതിനു കഴിയും. അപ്പോ​സ്‌ത​ല​നായ പൗലോ​സി​ന്റെ വാക്കുകൾ നമ്മെ ഇവ്വണ്ണം ഓർമി​പ്പി​ക്കു​ന്നു: “നിങ്ങൾ ദാസൻമാ​രാ​യി അനുസ​രി​പ്പാൻ നിങ്ങ​ളെ​ത്തന്നേ സമർപ്പി​ക്ക​യും നിങ്ങൾ അനുസ​രി​ച്ചു​പോ​രു​ക​യും ചെയ്യു​ന്ന​വന്നു ദാസൻമാർ [“അടിമകൾ,” NW] ആകുന്നു എന്നു അറിയു​ന്നി​ല്ല​യോ?” (റോമർ 6:16) ജെ. ബി. ഫിലി​പ്‌സ്‌ ഈ വാക്യം ഇങ്ങനെ ഭാഷാ​ന്തരം ചെയ്യുന്നു: “നിങ്ങൾ അനുസ​രി​ക്കാൻ തിര​ഞ്ഞെ​ടു​ക്കുന്ന ശക്തിയു​ടെ സ്വത്താണ്‌ നിങ്ങൾ.” നിങ്ങൾക്കു നിയ​ന്ത്രി​ക്കാൻ കഴിയാത്ത ഒരു ശീലത്തി​ന്റെ ഊരാ​ക്കു​ടു​ക്കിൽ ആയിരി​ക്കു​ന്ന​തി​നെ​ക്കു​റി​ച്ചു ചിന്തി​ക്കുക!

തന്റെ ശീലം നിലനിർത്താൻ ഒരു യുവാവു മിക്ക​പ്പോ​ഴും ഭോഷ്‌കി​ലേ​ക്കും വക്രത​യി​ലേ​ക്കും മോഷ​ണ​ത്തി​ലേ​ക്കും തിരി​യു​ന്ന​തു​കൊണ്ട്‌ അയാളു​ടെ കുടും​ബ​ബ​ന്ധങ്ങൾ തകരു​മെ​ന്നു​ള്ള​തും ഉറപ്പാണ്‌. ഇപ്പോ​ഴത്തെ യുവജ​നങ്ങൾ (Young People Now) എന്ന ബ്രിട്ടീഷ്‌ മാസിക ഇങ്ങനെ പറയുന്നു: “നിങ്ങൾ സ്‌നേ​ഹി​ക്കു​ക​യും നിങ്ങളെ സ്‌നേ​ഹി​ക്കു​ക​യും ചെയ്യുന്ന ആളുകൾക്കു നിങ്ങൾ ഒരു മോഷ്ടാ​വും ഒരു നുണയ​നും ഒരു ഭാരവും ആയിത്തീർന്നി​രി​ക്കു​ന്നു എന്നു മനസ്സി​ലാ​ക്കു​മ്പോൾ നിങ്ങളു​ടെ ആത്മാഭി​മാ​നം കുറയു​ന്നു.” നിർബ​ന്ധിത ചൂതാ​ട്ട​ക്കാർ “തീവ്ര​മായ വിഷാ​ദ​ത്തി​നും ഉത്‌കണ്‌ഠ നിമി​ത്ത​മുള്ള ക്രമ​ക്കേ​ടു​കൾക്കും, ദഹന സംബന്ധ​മായ പ്രശ്‌നങ്ങൾ, ഉറക്കമി​ല്ലായ്‌മ, തലവേദന, കൂടിയ രക്തസമ്മർദം, ആസ്‌തമ, പുറം​വേദന, നെഞ്ചു​വേദന” തുടങ്ങിയ ഒരു കൂട്ടം ശാരീ​രിക വിഷമ​ത​കൾക്കും ചായ്‌വു​ള്ള​വ​രാണ്‌ എന്നു ദ ഹാർവാഡ്‌ മെൻറൽ ഹെൽത്ത്‌ ലെററർ റിപ്പോർട്ടു ചെയ്യു​ന്നത്‌ ആശ്ചര്യ​ക​രമല്ല.

എന്നിരു​ന്നാ​ലും, എല്ലാറ​റി​ലും വച്ച്‌ ഏററവും നാശോൻമു​ഖ​മായ പരിണ​ത​ഫലം ഒരുവന്റെ ആത്മീയ​ത​യ്‌ക്കു വരുത്തുന്ന അപകട​മാണ്‌. അത്യാ​ഗ്ര​ഹ​ത്തെ​യും പണസ്‌നേ​ഹ​ത്തെ​യും ബൈബിൾ കുററം വിധി​ക്കു​ന്നു. (1 കൊരി​ന്ത്യർ 5:10, 11; 1 തിമൊ​ഥെ​യൊസ്‌ 6:10) മറേറ​തൊ​രു ആസക്തി​യേ​യും​പോ​ലെ നിർബ​ന്ധിത പന്തയവും “ജഡത്തി​ലെ​യും ആത്മാവി​ലെ​യും കൻമഷം [“മാലി​ന്യം,” NW]” തന്നെയാണ്‌. (2 കൊരി​ന്ത്യർ 7:1) നിങ്ങൾ എത്രയ​ധി​കം പന്തയം വയ്‌ക്കു​ന്നു​വോ അത്രയ​ധി​കം നിങ്ങൾ സ്വന്തം മനസ്സാ​ക്ഷി​യെ​യും ദൈവ​വു​മാ​യുള്ള ബന്ധത്തെ​യും അപകട​പ്പെ​ടു​ത്തു​ക​യാണ്‌.—1 തിമൊ​ഥെ​യൊസ്‌ 4:2 താരത​മ്യം ചെയ്യുക.

ഉപേക്ഷി​ക്കാ​നുള്ള ആഗ്രഹം

ഈ ശീലത്തി​ന്റെ നീരാ​ളി​പ്പി​ടു​ത്തത്തെ നിങ്ങൾക്കെ​ങ്ങനെ തകർക്കാൻ കഴിയും? ആദ്യമേ, ഈ ശീലം ഉപേക്ഷി​ക്കാൻ നിങ്ങൾ യഥാർഥ​മാ​യി ആഗ്രഹി​ക്കണം. “ആസക്തൻ മാററം വരുത്താൻ യഥാർഥ​ത്തിൽ ആഗ്രഹി​ക്കാ​ത്ത​പക്ഷം യാതൊ​രു ആസക്തി​യെ​യും ഒരിക്ക​ലും തരണം ചെയ്യാൻ സാധ്യമല്ല” എന്ന്‌ ആസാക്ഷി​കൾ (Addictions) എന്ന തന്റെ ഗ്രന്ഥത്തിൽ ലിസ്‌ ഹോജ്‌കിൻസൺ പറയുന്നു. ഇതു “ദോഷത്തെ വെറു”ക്കാൻ, ചൂതാ​ട്ടത്തെ ദ്വേഷി​ക്കാൻ പഠിക്കു​ന്ന​തി​നെ അർഥമാ​ക്കു​ന്നു. (സങ്കീർത്തനം 97:10) എങ്ങനെ? അതിന്റെ സുഖാ​നു​ഭൂ​തി​ക​ളെ​ക്കു​റി​ച്ചു ചിന്തി​ച്ചു​കൊ​ണ്ടല്ല, പിന്നെ​യോ അതിന്റെ പരിണ​ത​ഫ​ല​ങ്ങ​ളെ​ക്കു​റി​ച്ചു ചിന്തി​ച്ചു​കൊ​ണ്ടു​തന്നെ. “പാപത്തി​ന്റെ താത്‌കാ​ലിക ആസ്വാ​ദനം”—ഏതെങ്കി​ലും മത്സരം ജയിക്കു​ന്ന​തി​ലെ ആഹ്ലാദ​ത്തി​മർപ്പ്‌—നിത്യ​ജീ​വനെ നഷ്ടപ്പെ​ടു​ത്തു​ന്ന​തി​നു​തക്ക മൂല്യ​മു​ള്ള​താ​ണോ? (എബ്രായർ 11:25, NW) ഈ വിധങ്ങ​ളിൽ ചിന്തി​ക്കു​ന്നത്‌ ഈ ശീലം ഉപേക്ഷി​ക്കാ​നുള്ള ഒരു ദൃഢതീ​രു​മാ​നം വികസി​പ്പി​ച്ചെ​ടു​ക്കാൻ നിങ്ങളെ സഹായി​ച്ചേ​ക്കാം.

എന്നിരു​ന്നാ​ലും, ഗവേഷ​ക​യായ ലിസ്‌ ഹോജ്‌കിൻസൺ ഇപ്രകാ​രം കുറി​ക്കൊ​ള്ളു​ന്നു: “ഏതു തരത്തി​ലുള്ള ആസക്തി​ക​ളും അവ നീക്കം ചെയ്യു​ന്നത്‌ ഒരു അവയവം ഛേദി​ച്ചു​ക​ള​യു​ന്ന​തു​പോ​ലെ തോന്നു​മാറ്‌ അത്രയ​ധി​കം വേരു​റ​ച്ച​താ​യി​ത്തീർന്നേ​ക്കാം.” എന്നാൽ യേശു ഇങ്ങനെ പറഞ്ഞു: “വലങ്കണ്ണു നിനക്കു ഇടർച്ച​വ​രു​ത്തു​ന്നു എങ്കിൽ അതിനെ ചൂന്നെ​ടു​ത്തു എറിഞ്ഞു​കളക; നിന്റെ ശരീരം മുഴുവൻ നരകത്തിൽ വീഴു​ന്ന​തി​നെ​ക്കാൾ നിന്റെ അവയവ​ങ്ങ​ളിൽ ഒന്നു നശിക്കു​ന്നതു നിനക്കു പ്രയോ​ജ​ന​മ​ത്രേ.” (മത്തായി 5:29) ദൈവ​വു​മാ​യുള്ള നിങ്ങളു​ടെ ബന്ധത്തെ അപകട​പ്പെ​ടു​ത്തുന്ന എന്തി​നെ​യും നിങ്ങളു​ടെ ജീവി​ത​ത്തിൽനി​ന്നു ഛേദി​ച്ചു​ക​ള​യണം!

ഇത്‌ ആത്മനി​യ​ന്ത്രണം നട്ടുവ​ളർത്തു​ന്ന​തി​നെ അർഥമാ​ക്കു​ന്നു. തന്നെ ജയിച്ച​ട​ക്കാൻ അനുവ​ദി​ക്കാൻ കഴിയു​മാ​യി​രുന്ന തികട്ടി​വ​രുന്ന മോഹങ്ങൾ അപ്പോ​സ്‌ത​ല​നായ പൗലോ​സിന്‌ ഉണ്ടായി​രു​ന്നു, എന്നാൽ തന്റെ മോഹ​ങ്ങൾക്ക്‌ ഒരു അടിമ​യാ​യി​രി​ക്കാൻ അദ്ദേഹം വിസമ്മ​തി​ച്ചു. അദ്ദേഹം ഇപ്രകാ​രം പറഞ്ഞു: “ഞാൻ എന്റെ ശരീരത്തെ ദണ്ഡിപ്പിച്ച്‌ അതിനെ ഒരു അടിമ​യെ​പ്പോ​ലെ നടത്തുന്നു.” (1 കൊരി​ന്ത്യർ 9:27, NW) നിങ്ങളു​ടെ മോഹങ്ങൾ നിങ്ങളെ നിയ​ന്ത്രി​ക്കാൻ അനുവ​ദി​ക്കാ​തെ നിങ്ങ​ളോ​ടു​തന്നെ കർക്കശ​നാ​യി​രി​ക്കാൻ നിങ്ങളും പഠിക്കണം.

പ്രശ്‌ന​ത്തി​ന്റെ മൂലകാ​രണം കണ്ടെത്തൽ

എന്നിരു​ന്നാ​ലും, ഈ പോരാ​ട്ട​ത്തിൽ വിജയി​ക്കു​ന്ന​തിന്‌ ഇച്ഛാശ​ക്തി​യെ​ക്കാൾ കൂടുതൽ ആവശ്യ​മാണ്‌. ആസാക്ഷി​കൾ മിക്ക​പ്പോ​ഴും കൂടുതൽ ആഴത്തി​ലുള്ള പ്രശ്‌ന​ങ്ങളെ പ്രതി​ഫ​ലി​പ്പി​ക്കു​ന്നു. ഡിക്ക്‌ എന്നു പേരുള്ള ഒരു നിർബ​ന്ധിത ചൂതാ​ട്ട​ക്കാ​രൻ പറയുന്നു: “എന്റെ ബാല്യ​കാ​ലം വളരെ അസാധാ​ര​ണ​മാ​യി​രു​ന്നു. എന്റെ കുടും​ബ​ത്തിൽ ഒരു തരത്തി​ലു​മുള്ള സ്‌നേഹം ഉണ്ടായി​രു​ന്നില്ല. . . . ഞാൻ എപ്പോ​ഴും തരംതാ​ഴ്‌ത്ത​പ്പെട്ടു. എന്നെക്കു​റി​ച്ചു​തന്നെ എനിക്കു വളരെ താഴ്‌ന്ന അഭി​പ്രാ​യ​മാണ്‌ ഉണ്ടായി​രു​ന്നത്‌.” അത്തരം സംഘർഷ​ത്തി​ന്റെ ഫലമായി സന്തോഷം കണ്ടെത്താ​നുള്ള അയാളു​ടെ മാർഗം ചൂതാ​ട്ട​മാ​യി​രു​ന്നു.

മാനസി​കാ​രോ​ഗ്യ രംഗത്തു പ്രവർത്തി​ക്കുന്ന പലരും വിവിധ ആസക്തി​കളെ ശിശു​ദു​രു​പ​യോ​ഗ​വും അവഗണ​ന​യും നിമി​ത്ത​മു​ണ്ടാ​കുന്ന വൈകാ​രി​കാ​ഘാ​ത​ത്തോ​ടു ബന്ധപ്പെ​ടു​ത്തു​ന്നു. വാസ്‌തവം എന്തുത​ന്നെ​യാ​യി​രു​ന്നാ​ലും നിങ്ങളു​ടെ പ്രശ്‌ന​ത്തി​ന്റെ മൂലകാ​രണം കണ്ടെത്തു​ന്നത്‌ അതിനെ തരണം ചെയ്യാൻ നിങ്ങളെ സഹായി​ച്ചേ​ക്കാം. സങ്കീർത്ത​ന​ക്കാ​രൻ ഇപ്രകാ​രം പ്രാർഥി​ച്ചു: “ദൈവമേ, എന്നെ ശോധന ചെയ്‌തു എന്റെ ഹൃദയത്തെ അറി​യേ​ണമേ; എന്നെ പരീക്ഷി​ച്ചു എന്റെ നിനവു​കളെ അറി​യേ​ണമേ. വ്യസന​ത്തി​ന്നുള്ള മാർഗ്ഗം എന്നിൽ ഉണ്ടോ എന്നു നോക്കി, ശാശ്വ​ത​മാർഗ്ഗ​ത്തിൽ എന്നെ നടത്തേ​ണമേ.” (സങ്കീർത്തനം 139:23, 24) അസ്വസ്ഥ​ത​യു​ള​വാ​ക്കുന്ന നിങ്ങളു​ടെ ചിന്തകൾ പക്വത​യുള്ള ഒരു ക്രിസ്‌ത്യാ​നി​യു​മാ​യി, ഒരുപക്ഷേ ഒരു സഭാമൂ​പ്പ​നു​മാ​യി, ചർച്ച ചെയ്യു​ന്നത്‌ നിങ്ങൾ ചൂതു​ക​ളി​ക്കു​ന്നത്‌ എന്തു​കൊ​ണ്ടെ​ന്നും നിങ്ങളു​ടെ ചിന്താ​പ​ര​വും പെരു​മാ​ററ സംബന്ധ​വും ആയ രീതി​കൾക്കു മാററം വരുത്താൻ എന്തു ചെയ്യണ​മെ​ന്നും മനസ്സി​ലാ​ക്കാൻ നിങ്ങളെ വളരെ​യ​ധി​കം സഹായി​ച്ചേ​ക്കാം.a

“ഏറെ മെച്ചമായ ഒന്ന്‌”

ക്വിററ്‌ കമ്പൽസിവ്‌ ഗാംബ്ലിംഗ്‌ എന്ന പുസ്‌തകം പറയു​ന്ന​ത​നു​സ​രിച്ച്‌, ഈ ശീലം ഉപേക്ഷി​ക്കൽ “ഈ പ്രശ്‌ന​ത്തി​നെ​തി​രെ​യുള്ള പോരാ​ട്ട​ത്തി​ലെ ആദ്യ [പടി] മാത്ര​മാണ്‌.” നിങ്ങളു​ടെ ജീവി​ത​രീ​തി​യി​ലും സാരമായ മാററങ്ങൾ വരു​ത്തേ​ണ്ട​താ​യി വരും. ഒരു തിരി​ച്ചു​പോ​ക്കു തടയാൻ നിങ്ങൾ മുൻ ചൂതു​കളി കൂട്ടാ​ളി​കളെ ഒഴിവാ​ക്കു​ക​യും ചീട്ടു​കളി സ്ഥലങ്ങളും (casinos), പന്തയശാ​ല​ക​ളും (pool halls) പോലുള്ള ചൂതു​കളി സ്ഥലങ്ങളിൽനി​ന്നു അകന്നു നിൽക്കു​ക​യും വേണം. (സദൃശ​വാ​ക്യ​ങ്ങൾ 13:20) നിങ്ങളെ സ്വയം ഒററ​പ്പെ​ടു​ത്ത​ണ​മെന്നല്ല ഇതിന്റെ അർഥം. (സദൃശ​വാ​ക്യ​ങ്ങൾ 18:1) ക്രിസ്‌തീയ സഭക്കു​ള്ളിൽ ആരോ​ഗ്യാ​വ​ഹ​വും ബലദാ​യ​ക​വും ആയ സൗഹൃ​ദ​ബ​ന്ധങ്ങൾ വളർത്തി​യെ​ടു​ക്കാൻ ശ്രമി​ക്കുക. ഫലോ​ത്‌പാ​ദ​ക​മായ വേലയി​ലും ആത്മീയ പ്രവർത്ത​ന​ങ്ങ​ളി​ലും ആരോ​ഗ്യാ​വ​ഹ​മായ വിനോ​ദ​ത്തി​ലും നിങ്ങ​ളെ​ത്തന്നെ തിരക്കു​ള്ള​വ​രാ​ക്കി നിർത്തുക.

എന്നിരു​ന്നാ​ലും, “ഏറെ മെച്ചപ്പെട്ട ഒന്ന്‌ ഉണ്ടെന്ന്‌—ആസക്‌തി​യെ തൃപ്‌തി​പ്പെ​ടു​ത്താ​നുള്ള ഉദ്യമ​ത്തെ​ക്കാൾ ജീവി​ത​ത്തിന്‌ അധികം പ്രദാനം ചെയ്യാ​നു​ണ്ടെന്ന്‌—മനസ്സി​ലാ​ക്കു​മ്പോൾ” മാത്രമേ ആസക്‌ത​നായ വ്യക്തി തന്റെ പോരാ​ട്ട​ത്തിൽ വിജയി​ക്കു​ക​യു​ള്ളു എന്നു ഹോജ്‌കിൻസൺ നമ്മെ അനുസ്‌മ​രി​പ്പി​ക്കു​ന്നു. കൊള്ളാം, ബൈബിൾ വെച്ചു​നീ​ട്ടുന്ന പ്രത്യാ​ശ​യെ​ക്കാൾ ഏറെ മെച്ച​പ്പെ​ട്ട​താ​യി എന്തുണ്ടാ​യി​രി​ക്കാൻ കഴിയും?

റോഡി എന്നു പേരുള്ള ഒരു മനുഷ്യൻ ഇതു സത്യ​മെന്നു കണ്ടെത്തി. ഒരു കൗമാ​ര​പ്രാ​യ​ക്കാ​ര​നാ​യി​രു​ന്ന​പ്പോൾ തുടങ്ങി 25 വർഷമാ​യി താൻ “തികച്ചും ആസക്‌ത​നാ​യി​ക്ക​ഴിഞ്ഞ ഒരു ചൂതാ​ട്ട​ക്കാ​രൻ” ആയിരു​ന്ന​താ​യി അയാൾ വിവരി​ക്കു​ന്നു. റോഡി മിക്കവാ​റും എല്ലാത്തരം ചൂതാ​ട്ട​വും പരീക്ഷ​ണ​വി​ധേ​യ​മാ​ക്കി—കുതി​ര​പ്പ​ന്തയം, പട്ടി​യോട്ട മത്സരം, ഫുട്ട്‌ബോൾ കളിക​ളെ​ക്കു​റി​ച്ചു പന്തയം വയ്‌ക്കൽ, കാസി​നോ ചൂതാട്ടം തുടങ്ങി​യ​വ​യെ​ല്ലാം. എന്നാൽ പിന്നീട്‌ അയാൾ യഹോ​വ​യു​ടെ സാക്ഷി​ക​ളിൽനി​ന്നു പഠിച്ച ദൈവ​വ​ച​ന​ത്തി​ലെ സത്യങ്ങൾ ബാധക​മാ​ക്കാൻ തുടങ്ങി. “മൂന്നു മാസം​കൊ​ണ്ടു ശ്രദ്ധേ​യ​മായ ഒരു സമൂല മാററ​മു​ണ്ടാ​യി,” റോഡി പറയുന്നു. അയാൾ ചൂതു​കളി ഉപേക്ഷി​ച്ചു, ഇന്നദ്ദേഹം ക്രിസ്‌തീയ സഭയിലെ ഒരു മൂപ്പനാ​യി സേവന​മ​നു​ഷ്‌ഠി​ക്കു​ന്നു.

ഒരുപക്ഷേ, ബൈബി​ളു​പ​ദേ​ശങ്ങൾ സംബന്ധി​ച്ചു കുറെ അറിവു നിങ്ങൾക്ക്‌ ഇപ്പോൾത്തന്നെ ഉണ്ടായി​രി​ക്കാം. തുടക്ക​ത്തിൽ പരാമർശിച്ച ഡേവി​ഡി​നെ​യും തോമ​സി​നെ​യും പോലെ ബൈബിൾ സത്യങ്ങൾ നിങ്ങളു​ടെ സ്വന്തമാ​ക്കാൻ നിങ്ങൾ ഇന്നുവരെ പരാജ​യ​പ്പെ​ട്ടി​രി​ക്കാം. അങ്ങനെ​യെ​ങ്കിൽ ബൈബിൾ ഗൗരവ​മാ​യി പഠിച്ചു​കൊ​ണ്ടു ‘നൻമയും പ്രസാ​ദ​വും പൂർണ്ണ​ത​യു​മുള്ള ദൈവ​ഹി​തം’ എന്തു​കൊ​ണ്ടു തിരി​ച്ച​റി​ഞ്ഞു​കൂ​ടാ? (റോമർ 12:2) ഡേവി​ഡും തോമ​സും തങ്ങൾ പഠിച്ചതു ബാധക​മാ​ക്കാൻ തുടങ്ങു​ക​യും യഥാർഥ​മായ വിശ്വാ​സ​വും ബോധ്യ​വും വികസി​പ്പി​ച്ചെ​ടു​ക്കു​ക​യും ചെയ്‌ത​പ്പോൾ നിർബ​ന്ധിത ചൂതാ​ട്ടത്തെ തരണം ചെയ്യാൻ അവർക്കു കഴിഞ്ഞു. നിങ്ങൾക്കും അതിനു കഴിയും!

ബൈബി​ളി​ന്റെ പഠനത്തി​നു നിങ്ങ​ളെ​ത്തന്നെ സ്വയം അർപ്പി​ക്കു​ന്നതു ഭാവി സംബന്ധിച്ച ബൈബി​ളി​ന്റെ പ്രത്യാ​ശയെ—ചൂതാ​ട്ട​ത്തെ​ക്കാൾ ഏറെ മെച്ചമായ ഒന്ന്‌—നിങ്ങൾക്കു കൂടുതൽ യഥാർഥ​മാ​ക്കി​ത്തീർക്കും. അതേസ​മയം ദൈവ​വു​മാ​യി വ്യക്തി​പ​ര​മായ ഒരു ബന്ധം വികസി​പ്പി​ച്ചെ​ടു​ക്കാൻ അതു നിങ്ങളെ സഹായി​ക്കും. അപ്രകാ​രം അവിടുന്ന്‌ നിങ്ങളു​ടെ വികാ​ര​ങ്ങളെ മനസ്സി​ലാ​ക്കു​ന്നു എന്ന വിശ്വാ​സ​ത്തോ​ടെ സഹായ​ത്തി​നാ​യി “ഇടവി​ടാ​തെ പ്രാർത്ഥി”ക്കാൻ നിങ്ങൾക്കു സ്വാത​ന്ത്ര്യം തോന്നും. (1 തെസ്സ​ലൊ​നീ​ക്യർ 5:17; സങ്കീർത്തനം 103:14) നിർബ​ന്ധിത ചൂതാ​ട്ട​ത്തി​നെ​തി​രെ​യുള്ള പോരാ​ട്ട​ത്തിൽ വിജയി​ക്കു​ന്ന​തി​നാ​വ​ശ്യ​മായ ശക്തി പ്രദാനം ചെയ്‌തു​കൊണ്ട്‌ അവിടുന്ന്‌ നിങ്ങളു​ടെ ഉത്സാഹ​പൂർവ​ക​മായ ശ്രമങ്ങളെ അനു​ഗ്ര​ഹി​ക്കും.—ഗലാത്യർ 6:9; ഫിലി​പ്പി​യർ 4:13. (g93 8/8)

[അടിക്കു​റി​പ്പു​കൾ]

[17-ാം പേജിലെ ചിത്രം]

തങ്ങളുടെ ചൂതു​കളി ശീലം നിലനിർത്താൻ ചൂതാ​ട്ട​ക്കാർ മിക്ക​പ്പോ​ഴും ഭോഷ്‌കി​ലേ​ക്കും മോഷ​ണ​ത്തി​ലേ​ക്കും തിരി​യു​ന്നു