എല്ലാ വർഗങ്ങ​ളും സമാധാ​ന​ത്തിൽ ഒത്തു വസിക്കു​മ്പോൾ

“മുഴു ഭൂതല​ത്തി​ലും വസിക്കാൻ [ദൈവം] ഒരു മനുഷ്യ​നിൽനി​ന്നു മനുഷ്യ​രു​ടെ എല്ലാ ജനതക​ളെ​യും ഉളവാക്കി.” (പ്രവൃ​ത്തി​കൾ 17:26, NW) മനുഷ്യ​കു​ടും​ബ​ത്തി​ന്റെ ഉത്ഭവത്തെ സംബന്ധിച്ച ബൈബി​ളി​ന്റെ ലളിത​മായ പ്രസ്‌താ​വ​ന​യാ​ണത്‌.

മനുഷ്യർ എവിടെ ജീവി​ച്ചാ​ലും ഏതെല്ലാം ശാരീ​രിക സവി​ശേ​ഷ​തകൾ അവർക്കു​ണ്ടാ​യി​രു​ന്നാ​ലും മുഴു മനുഷ്യ​വർഗ​വും പൊതു​വായ ഒരു കുടും​ബ​ത്തിൽനി​ന്നാ​ണു വന്നത്‌ എന്ന്‌ അത്‌ അർഥമാ​ക്കു​ന്നു. ദൃശ്യ​മായ വ്യത്യാ​സങ്ങൾ എന്തെല്ലാ​മു​ണ്ടെ​ങ്കിൽപ്പോ​ലും കഴിവു​ക​ളു​ടെ​യും ബുദ്ധി​ശ​ക്തി​യു​ടെ​യും കാര്യ​ത്തിൽ “മനുഷ്യ​രു​ടെ എല്ലാ ജനതകൾ”ക്കും ഒരേ ശേഷി തന്നെയാ​ണു​ള്ള​തെ​ന്നും അത്‌ അർഥമാ​ക്കു​ന്നു. അതേ, ഏതു വർഗത്തി​ലോ ദേശത്തി​ലോ പെട്ടവ​രാ​യാ​ലും മനുഷ്യ​രെ​ല്ലാം ദൈവ​ദൃ​ഷ്ടി​യിൽ തുല്യ​രാണ്‌.—പ്രവൃ​ത്തി​കൾ 10:34, 35.

ബൈബിൾ വീക്ഷണം ശരിയാ​ണെ​ങ്കിൽ വർഗീയ വ്യത്യാ​സ​ങ്ങ​ളിൽ വേരൂ​ന്നി​യി​ട്ടുള്ള എല്ലാ മുൻവി​ധി​ക​ളും അനീതി​ക​ളും നിർമാർജനം ചെയ്യ​പ്പെ​ടാ​മെന്ന പ്രത്യാ​ശ​യുണ്ട്‌. കൂടാതെ, മനുഷ്യ​കു​ടും​ബ​ത്തി​ന്റെ ഉത്ഭവം സംബന്ധി​ച്ചു ബൈബിൾ പറയു​ന്നതു കൃത്യ​മാ​ണെ​ങ്കിൽ, അപ്പോൾ ന്യായ​യു​ക്ത​മാ​യി മനുഷ്യ​ജാ​തി​ക്കു സമാധാ​ന​ത്തിൽ ഒത്തുജീ​വി​ക്കാൻ എങ്ങനെ കഴിയു​മെന്നു കാണി​ക്കുന്ന വിവരങ്ങൾ നമു​ക്കേ​കാൻ അതേ പുസ്‌ത​ക​ത്തി​നു കഴിയും.

ആകട്ടെ, വസ്‌തു​തകൾ എന്തു പ്രകട​മാ​ക്കു​ന്നു? മനു​ഷ്യോ​ത്ഭ​വത്തെ സംബന്ധിച്ച ബൈബിൾ രേഖയെ ശാസ്‌ത്രം സ്ഥിരീ​ക​രി​ച്ചി​ട്ടു​ണ്ടോ?

ശാസ്‌ത്രീയ തെളിവ്‌

നരവം​ശ​ശാ​സ്‌ത്ര​ജ്ഞ​രായ ആർ. ബെനഡി​ക്‌ററ്‌, ജി. വെൽറ​റ്‌ഫിഷ്‌ എന്നിവർ രചിച്ച മനുഷ്യ​വർഗ​ത്തി​ലെ വംശങ്ങൾ (The Races of Mankind) എന്ന ഗ്രന്ഥം ഇപ്രകാ​രം പറയുന്നു: “മുഴു മനുഷ്യ​വർഗ​ത്തി​ന്റെ​യും പിതാ​വും മാതാ​വു​മായ ആദാമി​നെ​യും ഹവ്വാ​യെ​യും സംബന്ധി​ച്ചുള്ള ബൈബിൾ കഥ ഇന്നു ശാസ്‌ത്രം തെളി​യി​ച്ചി​രി​ക്കുന്ന അതേ സത്യം നൂററാ​ണ്ടു​കൾക്കു മുമ്പേ പറഞ്ഞു: അതായത്‌, ഭൂമി​യി​ലെ സകല ജനങ്ങളും ഒരേ കുടും​ബ​ത്തിൽപ്പെ​ട്ട​വ​രാ​ണെ​ന്നും അവർക്ക്‌ ഒരു പൊതു ഉത്ഭവമാ​ണു​ള്ള​തെ​ന്നും.” കൂടാതെ, “മനുഷ്യർക്കു പൊതു​വായ ഒരു ഉത്ഭവമി​ല്ലെ​ങ്കിൽ മനുഷ്യ​ശ​രീ​ര​ത്തി​ന്റെ സങ്കീർണ​മായ ഘടന ‘തികച്ചും ആകസ്‌മി​ക​മാ​യി’ . . . എല്ലാ മനുഷ്യ​രി​ലും ഒരു​പോ​ലെ​യാ​യി ഭവിക്കുക സാധ്യമല്ല” എന്നും ഈ എഴുത്തു​കാർ ചൂണ്ടി​ക്കാ​ണി​ക്കു​ന്നു.

കൊളം​ബി​യ യൂണി​വേ​ഴ്‌സി​റ​റി​യി​ലെ ജന്തുശാ​സ്‌ത്ര പ്രൊ​ഫ​സ​റായ എൽ. കെ. ഡണ്ണിന്റെ വർഗവും ജീവശാ​സ്‌ത്ര​വും (Race and Biology) എന്ന ലഘുലേഖ ഇപ്രകാ​രം പറയുന്നു: “എല്ലാ അടിസ്ഥാന ശാരീ​രിക സ്വഭാ​വ​സ​വി​ശേ​ഷ​ത​ക​ളി​ലും ഒരേ​പോ​ലി​രി​ക്കു​ന്ന​തു​കൊ​ണ്ടു സ്‌പഷ്ട​മാ​യും സകല മനുഷ്യ​രും ഒരു ജാതി​യിൽപ്പെ​ട്ട​വ​രാണ്‌. എല്ലാ വിഭാ​ഗ​ങ്ങ​ളി​ലും​പെട്ട അംഗങ്ങൾക്കു മിശ്ര​വി​വാ​ഹം നടത്താ​വു​ന്ന​താണ്‌, വാസ്‌ത​വ​ത്തിൽ അങ്ങനെ നടത്തു​ക​യും ചെയ്യുന്നു.” പിന്നീട്‌ അതു തുടർന്നു വിശദീ​ക​രി​ക്കു​ന്നു: “എന്നാൽ ഓരോ മനുഷ്യ​നും അനന്യൻ ആണ്‌, ചെറിയ വിധങ്ങ​ളിൽ മറെറല്ലാ മനുഷ്യ​രിൽനി​ന്നും വ്യത്യ​സ്‌തൻ തന്നെ. ഭാഗി​ക​മാ​യി ആളുകൾ ജീവി​ക്കുന്ന വ്യത്യസ്‌ത സാഹച​ര്യ​ങ്ങ​ളും ഭാഗി​ക​മാ​യി അവർ അവകാ​ശ​പ്പെ​ടു​ത്തി​യി​രി​ക്കുന്ന ജീനു​ക​ളി​ലെ വ്യത്യാ​സ​ങ്ങ​ളു​മാണ്‌ ഇതിനു ഹേതു.”

ശാസ്‌ത്രീ​യ തെളിവ്‌ അവിതർക്കി​ത​മാണ്‌. ജീവശാ​സ്‌ത്ര​പ​ര​മാ​യി പറഞ്ഞാൽ, ഉയർന്ന വർഗ​മെ​ന്നോ താഴ്‌ന്ന വർഗ​മെ​ന്നോ, ശുദ്ധ വർഗ​മെ​ന്നോ അശുദ്ധ വർഗ​മെ​ന്നോ ഒന്നുമില്ല. ഒരുവന്റെ തൊലി​യു​ടെ നിറം, മുടി​യു​ടെ നിറം, അല്ലെങ്കിൽ കണ്ണുക​ളു​ടെ നിറം—വർഗപ​ര​മാ​യി പ്രാധാ​ന്യ​മു​ള്ള​തെന്നു ചിലർ കരുതുന്ന കാര്യങ്ങൾ—എന്നിങ്ങ​നെ​യുള്ള സ്വഭാ​വ​സ​വി​ശേ​ഷ​തകൾ ഒരാളു​ടെ ബുദ്ധി​യു​ടെ​യോ കഴിവു​ക​ളു​ടെ​യോ സൂചി​കയല്ല. മറിച്ച്‌, അവ ജനിതക പാരമ്പ​ര്യ​ത്തി​ന്റെ ഫലങ്ങളാണ്‌.

പാരമ്പ​ര്യ​വും മനുഷ്യ​ജീ​വി​ത​വും (Heredity and Human Life) എന്ന ഗ്രന്ഥത്തിൽ ഹാംപ്‌ടൺ എൽ. കാർസൺ എഴുതു​ന്ന​തു​പോ​ലെ തീർച്ച​യാ​യും വർഗീയ വ്യത്യാ​സങ്ങൾ വളരെ കുറവാണ്‌: “മനുഷ്യ​രു​ടെ ഓരോ കൂട്ടവും പുറമെ വ്യത്യാ​സ​മു​ള്ള​വ​രാ​യി കാണ​പ്പെ​ടു​ന്നു, എന്നാൽ ഈ വ്യത്യാ​സ​ങ്ങൾക്കു കീഴിൽ അടിസ്ഥാ​ന​പ​ര​മായ സാമ്യം ഉണ്ട്‌ എന്നതാണു നാം നേരി​ടുന്ന വിരോ​ധാ​ഭാ​സം.”

എല്ലാ മനുഷ്യ​രും ഒരൊററ കുടും​ബ​മാ​ണെ​ങ്കിൽ, അപ്പോൾ എന്തു​കൊ​ണ്ടാ​ണു ഭയങ്കര വർഗീയ പ്രശ്‌നങ്ങൾ നിലവി​ലു​ള്ളത്‌?

പ്രശ്‌നം എന്തു​കൊണ്ട്‌

വർഗീ​യ​വാ​ദം നിലനിൽക്കു​ന്ന​തി​ന്റെ അടിസ്ഥാന കാരണം ആദ്യ മാനുഷ മാതാ​പി​താ​ക്കൾ തങ്ങളുടെ സന്തതി​കൾക്ക്‌ ഇട്ടു​കൊ​ടുത്ത മോശ​മായ തുടക്ക​മാണ്‌. ആദാമും ഹവ്വായും മനഃപൂർവം ദൈവ​ത്തി​നെ​തി​രെ മത്സരി​ക്കു​ക​യും അങ്ങനെ അപൂർണ​രും കുറവു​ള്ള​വ​രും ആയിത്തീ​രു​ക​യും ചെയ്‌തു. തത്‌ഫ​ല​മാ​യി, ആദാമി​ന്റെ അപൂർണത—തിൻമ​യി​ലേ​ക്കുള്ള ചായ്‌വ്‌—അവന്റെ പിൻഗാ​മി​ക​ളി​ലേക്കു പകര​പ്പെട്ടു. (റോമർ 5:12) അതു​കൊ​ണ്ടു ജനനം മുതൽ എല്ലാ മനുഷ്യ​രും സ്വാർഥ​ത​ക്കും അഹങ്കാ​ര​ത്തി​നും വശംവ​ദ​രാണ്‌, ഈ ചായ്‌വ്‌ വർഗീയ പോരാ​ട്ട​ത്തി​ലേ​ക്കും പ്രക്ഷു​ബ്ധ​ത​യി​ലേ​ക്കും നയിച്ചി​രി​ക്കു​ന്നു.

വർഗീയത നിലനിൽക്കു​ന്ന​തി​നു മറെറാ​രു കാരണ​മുണ്ട്‌. ആദാമും ഹവ്വായും ദൈവ​ത്തി​ന്റെ ഭരണത്തിൽനിന്ന്‌ അകന്നു​മാ​റി​യ​പ്പോൾ, സാത്താൻ അല്ലെങ്കിൽ പിശാച്‌ എന്നു ബൈബിൾ വിളി​ക്കുന്ന ഒരു ദുഷ്ടാത്മ ജീവി​യു​ടെ ഭരണത്തിൻ കീഴിൽ അവർ വന്നു. “ഭൂതലത്തെ മുഴുവൻ തെററി​ച്ചു​ക​ള​യുന്ന” ഈ ദുഷ്ടാത്മ ജീവി​യു​ടെ സ്വാധീ​ന​ത്തിൻ കീഴിൽ വർഗത്തി​ന്റെ പേരിൽ ആളുകളെ വഞ്ചിക്കാൻ മനഃപൂർവ ശ്രമങ്ങൾ നടന്നി​ട്ടുണ്ട്‌. (വെളി​പ്പാ​ടു 12:9; 2 കൊരി​ന്ത്യർ 4:4) സ്വവർഗ​ശ്രേ​ഷ്‌ഠ​വാ​ദത്തെ—ഒരുവന്റെ സ്വന്തം വർഗം ശ്രേഷ്‌ഠ​മാ​ണെന്ന ആശയത്തെ—ആളിക്ക​ത്തുന്ന അഗ്നിയാ​യി ഊതി​ക്ക​ത്തി​ച്ചി​രി​ക്കു​ന്നു, അറിഞ്ഞോ അറിയാ​തെ​യോ ദശലക്ഷങ്ങൾ ശക്തമായി സ്വാധീ​നി​ക്ക​പ്പെ​ട്ടി​രി​ക്കു​ന്നു, പരിണ​ത​ഫ​ലങ്ങൾ വിനാ​ശ​ക​ര​മാ​യി​രു​ന്നു.

സത്യസ​ന്ധ​മാ​യി പറഞ്ഞാൽ, വർഗീയ പ്രശ്‌ന​ങ്ങൾക്കു കാരണ​മാ​യി​രി​ക്കുന്ന സകല വ്യാജ പഠിപ്പി​ക്ക​ലു​ക​ളും സാത്താന്റെ നിയ​ന്ത്ര​ണ​ത്തിൻ കീഴി​ലുള്ള സ്വാർഥ​രും അപൂർണ​രും ആയ മനുഷ്യർ എങ്ങും വ്യാപി​പ്പി​ച്ചി​രി​ക്കു​ന്നു.

അതു​കൊ​ണ്ടു മാനവ​ജാ​തി ഒന്നായി​ത്തീ​ര​ണ​മെ​ങ്കിൽ, നാം വാസ്‌ത​വ​ത്തിൽ ഒരൊററ മാനു​ഷ​കു​ടും​ബ​മാ​ണെ​ന്നും “മുഴു നിവസിത ഭൂമി​യി​ലും വസിക്കാൻ ഒരു മനുഷ്യ​നിൽനി​ന്നു മനുഷ്യ​രു​ടെ സകല ജനത”കളെയും ദൈവം ഉളവാ​ക്കി​യെ​ന്നും ഉള്ള ബോധ്യം നമു​ക്കെ​ല്ലാം ഉണ്ടായി​രി​ക്കണം. (പ്രവൃ​ത്തി​കൾ 17:26, NW) കൂടാതെ, സകല വർഗങ്ങ​ളും സമാധാ​ന​ത്തിൽ ഒത്തു ജീവി​ക്കു​ന്ന​തി​നു മാനുഷ കാര്യാ​ദി​ക​ളി​ലുള്ള സാത്താന്റെ സ്വാധീ​നം നീങ്ങി​പ്പോ​കേ​ണ്ട​തുണ്ട്‌. ഈ കാര്യ​ങ്ങ​ളെ​ല്ലാം എന്നെങ്കി​ലും സംഭവി​ക്കു​മോ? അവ സംഭവി​ക്കു​മെന്നു വിശ്വ​സി​ക്കാൻ എന്തെങ്കി​ലും അടിസ്ഥാ​ന​മു​ണ്ടോ?

വർഗീയ മുൻവി​ധി അവസാ​നി​പ്പി​ക്കൽ

യേശു തന്റെ അനുഗാ​മി​കളെ സ്‌നേ​ഹി​ച്ച​തു​പോ​ലെ​തന്നെ അവരും “അന്യോ​ന്യം സ്‌നേ​ഹി​ക്കാൻ” അവർക്കു കല്‌പന നൽകി​യ​പ്പോൾ വർഗീയ മുൻവി​ധി എങ്ങനെ നീക്കം ചെയ്യാൻ കഴിയു​മെന്ന്‌ അവിടുന്ന്‌ പ്രകട​മാ​ക്കി. (യോഹ​ന്നാൻ 13:34, 35) ഈ സ്‌നേഹം ഒരു പ്രത്യേക വർഗത്തി​ലോ വർഗങ്ങ​ളി​ലോ പെട്ട ആളുക​ളോ​ടു മാത്രം ഉണ്ടായി​രി​ക്കേ​ണ്ട​താ​യി​രു​ന്നില്ല. തീർച്ച​യാ​യു​മല്ല! “സഹോ​ദ​രൻമാ​രു​ടെ മുഴു കൂട്ട​ത്തോ​ടും സ്‌നേഹം ഉണ്ടായി​രി​പ്പിൻ” എന്നു യേശു​വി​ന്റെ ശിഷ്യൻമാ​രിൽ ഒരുവൻ പ്രോ​ത്സാ​ഹി​പ്പി​ച്ചു.—1 പത്രൊസ്‌ 2:17, NW.

എങ്ങനെ​യാണ്‌ ഈ ക്രിസ്‌തീയ സ്‌നേഹം പ്രകട​മാ​ക്കു​ന്നത്‌? “അന്യോ​ന്യം ബഹുമാ​നി​ക്കു​ന്ന​തിൽ മുന്നിട്ടു നിൽപ്പിൻ” എന്നു പ്രോ​ത്സാ​ഹി​പ്പി​ക്കു​മ്പോൾ ബൈബിൾ അതു വിശദീ​ക​രി​ക്കു​ന്നു. (റോമർ 12:10) ഇതു ചെയ്യു​മ്പോൾ അത്‌ എന്തർഥ​മാ​ക്കു​ന്നു എന്നതി​നെ​ക്കു​റി​ച്ചു ചിന്തി​ക്കുക! ഓരോ​രു​ത്ത​രും മററു​ള്ള​വരെ വർഗമോ ദേശമോ ഗണ്യമാ​ക്കാ​തെ യഥാർഥ​മായ അന്തസ്സോ​ടും ആദര​വോ​ടും കൂടെ, അവരെ തുച്ഛീ​ക​രി​ക്കാ​തെ, യഥാർഥ​ത്തിൽ ‘അവരെ ശ്രേഷ്‌ഠ​രാ​യി വീക്ഷി​ച്ചു​കൊണ്ട്‌’ പെരു​മാ​റു​ന്നു. (ഫിലി​പ്പി​യർ 2:3) യഥാർഥ ക്രിസ്‌തീയ സ്‌നേ​ഹ​ത്തി​ന്റെ അത്തര​മൊ​രു ആത്മാവ്‌ ഉള്ളപ്പോൾ വർഗീയ മുൻവി​ധി എന്ന പ്രശ്‌നം പരിഹ​രി​ക്ക​പ്പെ​ടു​ന്നു.

വർഗീയ മുൻവി​ധി പഠിച്ചി​ട്ടു​ള്ള​വർക്കു തങ്ങളിൽനിന്ന്‌ അത്തരം സാത്താന്യ നിശ്വസ്‌ത ആശയഗ​തി​കൾ നീക്കം ചെയ്യു​ന്ന​തി​നു സാധാ​ര​ണ​യിൽക്ക​വിഞ്ഞ ശ്രമം ആവശ്യ​മാണ്‌. എന്നാൽ അതു സാധ്യ​മാണ്‌! ഒന്നാം നൂററാ​ണ്ടിൽ ക്രിസ്‌തീയ സഭയി​ലേക്കു വരുത്ത​പ്പെട്ട എല്ലാവ​രും അതുല്യ​മായ ഐക്യം ആസ്വദി​ച്ചു. അതു സംബന്ധിച്ച്‌ അപ്പോ​സ്‌ത​ല​നായ പൗലോസ്‌ എഴുതി: “യെഹൂ​ദ​നും യവനനും എന്നില്ല; ദാസനും സ്വത​ന്ത്ര​നും എന്നില്ല, ആണും പെണ്ണും എന്നുമില്ല; നിങ്ങൾ എല്ലാവ​രും ക്രിസ്‌തു​യേ​ശു​വിൽ ഒന്നത്രേ.” (ഗലാത്യർ 3:28) തീർച്ച​യാ​യും ക്രിസ്‌തു​വി​ന്റെ യഥാർഥ അനുഗാ​മി​കൾ യഥാർഥ സാഹോ​ദ​ര്യം ആസ്വദി​ക്കാ​നി​ട​യാ​യി​ത്തീർന്നു.

എന്നാൽ ചിലർ പ്രതി​ഷേ​ധി​ച്ചേ​ക്കാം: ‘ഇത്‌ ഇന്നു സംഭവി​ക്കില്ല.’ എന്നാൽ അത്‌ ഇപ്പോൾത്തന്നെ യഹോ​വ​യു​ടെ സാക്ഷി​ക​ളു​ടെ ഇടയിൽ—നാല്‌പ​ത്തഞ്ചു ലക്ഷത്തി​ല​ധി​കം ആളുകൾ വരുന്ന ഒരു സ്ഥാപന​ത്തിൽ—സംഭവി​ച്ചി​രി​ക്കു​ന്നു! ഈ ഭക്തികെട്ട വ്യവസ്ഥി​തി​യിൽനി​ന്നു പഠിച്ച മുൻവി​ധി​യിൽനിന്ന്‌ എല്ലാ സാക്ഷി​ക​ളും പൂർണ​മാ​യും വിമു​ക്ത​രാ​യി​ട്ടില്ല എന്നു സമ്മതി​ക്കാ​വു​ന്ന​താണ്‌. ഒരു കറുത്ത അമേരി​ക്ക​ക്കാ​രി വെള്ളക്കാ​രായ സഹ സാക്ഷി​ക​ളെ​ക്കു​റി​ച്ചു വാസ്‌ത​വി​ക​മാ​യി ഇങ്ങനെ പറഞ്ഞു: “അവരിൽ ചിലരു​ടെ ഇടയിൽ വർഗീയ ശ്രേഷ്‌ഠ​താ​മ​നോ​ഭാ​വ​ത്തി​ന്റെ അവശി​ഷ്ടങ്ങൾ ഉള്ളതായി എന്റെ ശ്രദ്ധയിൽപ്പെ​ട്ടി​ട്ടുണ്ട്‌. മറെറാ​രു വർഗത്തിൽപ്പെട്ട ആളുക​ളു​മാ​യി അടുത്തു സഹവസി​ക്കു​മ്പോൾ അവരിൽ ചിലർക്കു തെല്ല്‌ അസ്വസ്ഥത അനുഭ​വ​പ്പെ​ടു​ന്ന​താ​യി ചില​പ്പോൾ ഞാൻ കണ്ടിട്ടുണ്ട്‌.”

എന്നാൽ ഈ വ്യക്തി ഇപ്രകാ​രം സമ്മതിച്ചു: “ഭൂമി​യി​ലെ മറേറ​തൊ​രു ജനതയ്‌ക്കും കിടപി​ടി​ക്കാ​നാ​കാത്ത അളവോ​ളം യഹോ​വ​യു​ടെ സാക്ഷികൾ തങ്ങളിൽനി​ന്നു വർഗീയ മുൻവി​ധി​കൾ നീക്കം ചെയ്‌തി​രി​ക്കു​ന്നു. വർഗവ്യ​ത്യാ​സ​മെ​ന്യേ അന്യോ​ന്യം സ്‌നേ​ഹി​ക്കാൻ അവർ തീർച്ച​യാ​യും കഠിന​ശ്രമം നടത്തുന്നു . . . വെള്ളക്കാ​രായ സാക്ഷി​ക​ളു​ടെ സ്‌നേഹം അനുഭ​വി​ച്ച​പ്പോൾ ചില​പ്പോൾ അടക്കാ​നാ​വാത്ത കണ്ണുനീ​രി​ന്റെ ഘട്ടത്തോ​ളം എന്റെ ഹൃദയ​ത്തിന്‌ ഊഷ്‌മളത തോന്നി​യി​ട്ടുണ്ട്‌.”

വർഗീയ ശ്രേഷ്‌ഠത സംബന്ധിച്ച സാത്താന്യ ആശയങ്ങ​ളാൽ സ്വാധീ​നി​ക്ക​പ്പെട്ട മററു ദശലക്ഷ​ക്ക​ണ​ക്കി​നാ​ളു​കൾ ഉള്ളപ്പോൾ കുറച്ചു​പേർ—ഇവർ ദശലക്ഷ​ക്ക​ണ​ക്കിന്‌ ഉണ്ടെങ്കിൽപ്പോ​ലും—ആസ്വദി​ക്കുന്ന വർഗീയ ഐക്യം​കൊണ്ട്‌ വാസ്‌ത​വ​ത്തിൽ എന്തു കാര്യം? ഇല്ല, അതു വർഗീയ പ്രശ്‌നത്തെ പരിഹ​രി​ക്കു​ന്നില്ല എന്നു ഞങ്ങൾ സമ്മതി​ക്കു​ന്നു. അങ്ങനെ ചെയ്യുക മാനു​ഷ​ശ്ര​മ​ങ്ങൾക്ക്‌ അതീത​മാണ്‌. നമ്മുടെ സ്രഷ്ടാ​വായ യഹോ​വ​യാം ദൈവ​ത്തി​നു മാത്രമേ അതു ചെയ്യാൻ കഴിയൂ.

ഇനി വളരെ പെട്ടെ​ന്നു​തന്നെ യഹോവ തന്റെ പുത്ര​നായ യേശു​ക്രി​സ്‌തു​വി​ന്റെ കൈക​ളി​ലെ തന്റെ രാജ്യം മുഖാ​ന്തരം സകല അനീതി​യെ​യും വർഗീ​യ​വും മററു​ത​ര​ത്തി​ലു​ള്ള​തും ആയ വിവേ​ച​ന​വും വിദ്വേ​ഷ​വും സ്വാർഥ​പൂർവം പ്രോ​ത്സാ​ഹി​പ്പി​ക്കുന്ന എല്ലാവ​രെ​യും ഭൂമി​യിൽനി​ന്നു നീക്കം ചെയ്യും. (ദാനീ​യേൽ 2:44; മത്തായി 6:9, 10) തുടർന്നു ക്രിസ്‌തു​വി​ന്റെ ഭരണത്തിൻ കീഴിലെ പൂർണ​ത​യുള്ള ഒരു വിദ്യാ​ഭ്യാ​സ പരിപാ​ടി മുഖാ​ന്തരം എല്ലാ വർഗങ്ങ​ളും യഥാർഥ​മാ​യി ഒന്നിക്കും. ആ വിദ്യാ​ഭ്യാ​സം പുരോ​ഗ​മി​ക്കവേ വർഗീയ വിവേ​ച​ന​ത്തി​ന്റെ യാതൊ​രു ലാഞ്ചന പോലു​മി​ല്ലാ​തെ അവർ പൂർണ​മായ ഐക്യ​ത്തിൽ വസിക്കും. ദൈവ​ത്തി​ന്റെ വാഗ്‌ദത്തം ഒടുവിൽ നിവൃ​ത്തി​യേ​റും: “പൂർവ കാര്യങ്ങൾ പൊയ്‌പ്പോ​യി​രി​ക്കു​ന്നു. . . . നോക്കൂ! ഞാൻ സകലവും പുതു​താ​ക്കു​ന്നു.”—വെളി​പ്പാട്‌ 21:4, 5, NW.

എല്ലാ വർഗങ്ങ​ളും സമാധാ​ന​ത്തിൽ ഒത്തൊ​രു​മി​ച്ചു ജീവി​ക്കുന്ന, യഥാർഥ സാഹോ​ദ​ര്യം നിലനിൽക്കുന്ന ഒരു കാലത്തി​നു​വേണ്ടി കാംക്ഷി​ക്കുന്ന ഒരു വ്യക്തി​യാ​ണോ നിങ്ങൾ? അങ്ങനെ​യെ​ങ്കിൽ, യഹോ​വ​യു​ടെ സാക്ഷികൾ ബൈബിൾ പഠിക്കാൻ ക്രമമാ​യി കൂടി​വ​രുന്ന നിങ്ങളു​ടെ അടുത്തുള്ള ഒരു രാജ്യ​ഹാ​ളിൽ വരാൻ ഞങ്ങൾ നിങ്ങളെ സ്വാഗതം ചെയ്യുന്നു. യഥാർഥ ക്രിസ്‌തീയ സ്‌നേഹം എല്ലാ വർഗത്തി​ലും​പെട്ട ആളുക​ളോട്‌ അവർ പ്രകട​മാ​ക്കു​ന്നി​ല്ലേ​യെന്നു നിങ്ങൾത്തന്നെ കാണുക. (g93 8/22)

[10-ാം പേജിലെ ചിത്രം]

പെട്ടെന്നുതന്നെ എല്ലായി​ട​ത്തു​മുള്ള സകല വർഗങ്ങ​ളും സമാധാ​ന​ത്തിൽ ഒത്തൊ​രു​മി​ച്ചു വസിക്കും