ലോകത്തെ വീക്ഷിക്കൽ

നാണയ​പ്പെ​രു​പ്പം പത്തുലക്ഷം ശതമാനം

രാജ്യത്തെ ഫെഡറൽ സ്ഥിതി​വി​വ​ര​ക്ക​ണക്ക്‌ ബ്യൂറോ പറയു​ന്ന​ത​നു​സ​രിച്ച്‌, 1993 ഡിസം​ബ​റിൽ യൂഗോ​സ്ലാ​വിയ ഫെഡറൽ റിപ്പബ്ലി​ക്കി​ലെ നാണയ​പ്പെ​രു​പ്പ​നി​രക്ക്‌ പത്തുലക്ഷം ശതമാ​ന​മാ​യി ഉയർന്നു. ജീവന​ച്ചെ​ലവ്‌ മുൻ മാസ​ത്തേ​തി​ന്റെ 2,839 ഇരട്ടി​യാ​യി​രു​ന്നു. അതു വർഷാ​രം​ഭ​ത്തിൽ ഉണ്ടായി​രു​ന്ന​തി​ന്റെ 6 ലക്ഷം കോടി മടങ്ങാണ്‌. അതു​കൊണ്ട്‌ അച്ചടിച്ച കറൻസി നോട്ടു​കൾ പുറത്തി​റങ്ങി ദിവസ​ങ്ങൾക്കു​ള്ളിൽ ചവറായി മാറുന്നു. ഈ പ്രശ്‌നത്തെ തരണം ചെയ്യാൻ കേന്ദ്ര ബാങ്ക്‌, ദിനാ​റിൽനി​ന്നു പൂജ്യങ്ങൾ കുറച്ചു​കൊ​ണ്ടി​രി​ക്കു​ക​യാണ്‌. കേവലം മൂന്നു മാസം​കൊണ്ട്‌ 5 ലക്ഷം കോടി ദിനാ​റി​ന്റെ മൂല്യം വെറും 5 ദിനാ​റാ​യി താണു.

മതപര​മായ ഉൾപ്പെടൽ

90 ശതമാനം അമേരി​ക്ക​ക്കാർ ദൈവ​ത്തിൽ വിശ്വ​സി​ക്കു​ന്ന​താ​യി ഒരു സർവേ​യിൽ കണ്ടെത്തി. 40 ശതമാ​ന​ത്തി​ല​ധി​കം പേർ ഓരോ വാരത്തി​ലും പള്ളിശു​ശ്രൂ​ഷ​ക​ളിൽ സംബന്ധി​ക്കു​ന്ന​താ​യി അവകാ​ശ​പ്പെട്ടു. 1992-ൽ നടത്തിയ ഒരു സർവേ​യ​നു​സ​രിച്ച്‌, ഐക്യ​നാ​ടു​ക​ളി​ലെ ശരാശരി 45 ശതമാനം പ്രൊ​ട്ട​സ്‌റ​റൻറു​കാ​രും 51 ശതമാനം കത്തോ​ലി​ക്ക​രും ഏതെങ്കി​ലും വാരത്തിൽ പള്ളിയിൽ പോയി. എന്നാൽ, യഥാർഥ​ത്തിൽ മതഭക്തി​യു​ള്ള​വ​രു​ടെ യഥാർഥ എണ്ണത്തെ​ക്കാൾ കൂടുതൽ ആളുകൾ മതഭക്തി​യു​ള്ള​വ​രാ​ണെ​ന്നും ക്രമമാ​യി പള്ളിയിൽ പോകു​ന്ന​വ​രാ​ണെ​ന്നും അവകാ​ശ​പ്പെ​ടു​ന്ന​താ​യി പുതിയ പഠനങ്ങൾ പ്രകട​മാ​ക്കു​ന്നു. ഒരു സംഘം ഗവേഷകർ പറയു​ന്ന​ത​നു​സ​രിച്ച്‌, 20 ശതമാനം പ്രൊ​ട്ട​സ്‌റ​റൻറു​കാ​രും 28 ശതമാനം കത്തോ​ലി​ക്ക​രും മാത്രമേ വാസ്‌ത​വ​ത്തിൽ വാരം​തോ​റും പള്ളിയിൽ പോകു​ന്നു​ള്ളൂ. പ്രായ​പൂർത്തി​യായ 3 കോടി 60 ലക്ഷം—19 ശതമാനം—അമേരി​ക്ക​ക്കാർ മാത്രമേ ക്രമമാ​യി തങ്ങളുടെ മതം ആചരി​ക്കു​ന്നു​ള്ളൂ​വെ​ന്നും 18 വയസ്സിനു മേലുള്ള അമേരി​ക്ക​ക്കാ​രിൽ ഏതാണ്ട്‌ മൂന്നി​ലൊ​ന്നു പേർക്ക്‌ തികച്ചും മതേത​ര​മായ ഒരു വീക്ഷണ​മാ​ണു​ള്ള​തെ​ന്നും മറെറാ​രു ഗവേഷ​ക​സം​ഘം കണ്ടെത്തി. “മതം അമേരി​ക്കൻ മണ്ണി​ലെ​ല്ലാ​യി​ട​വും വ്യാപി​ച്ചി​ട്ടു​ണ്ടെ​ങ്കി​ലും ഒരു ന്യൂന​പക്ഷം മാത്രമേ അതിനെ ഗൗരവ​മാ​യി എടുക്കു​ന്നു​ള്ളൂ. തങ്ങളുടെ മനോ​ഭാ​വ​ങ്ങ​ളു​ടെ​യോ പെരു​മാ​റ​റ​ത്തി​ന്റെ​യോ ഗുണത്തെ സ്വാധീ​നി​ക്കാത്ത ഒരു മതമാണ്‌ അമേരി​ക്കൻ ജനതയിൽ പകുതി പേരും അവകാ​ശ​പ്പെ​ടു​ന്നത്‌” എന്ന്‌ ന്യൂസ്‌വീക്ക്‌ പറയുന്നു.

ജലക്ഷാമം അകലെയല്ല

“മഞ്ഞും വർഷപാ​ത​വും താരത​മ്യേന സ്ഥിരമാ​യ​തി​നാൽ ശുദ്ധീ​ക​രി​ക്കാ​വുന്ന ജലം തീർത്തും പരിമി​ത​മാണ്‌. 2025 എന്ന വർഷമാ​കു​മ്പോ​ഴേ​ക്കും ജലക്ഷാ​മ​മുള്ള രാജ്യ​ങ്ങ​ളിൽ വസിക്കുന്ന ആളുക​ളു​ടെ എണ്ണം 300 കോടി​യോ​ട​ടു​ക്കും. 2000 എന്ന വർഷമാ​കു​മ്പോൾത്തന്നെ ആഫ്രി​ക്ക​യി​ലെ​യും മധ്യപൂർവ​ദേ​ശ​ത്തെ​യും രാജ്യ​ങ്ങളെ ജലക്ഷാമം വിശേ​ഷി​ച്ചും രൂക്ഷമാ​യി ബാധി​ച്ചി​രി​ക്കും” എന്ന്‌ സയൻസ്‌ മാഗസിൻ അഭി​പ്രാ​യ​പ്പെ​ടു​ന്നു. പോപ്പു​ലേഷൻ ആക്‌ഷൻ ഇൻറർനാ​ഷണൽ എന്ന ഏജൻസി​യു​ടെ ഒരു റിപ്പോർട്ട​നു​സ​രിച്ച്‌, അനേകം രാജ്യ​ങ്ങ​ളി​ലും ഇപ്പോൾത്തന്നെ ഭൂഗർഭ​ജ​ല​ശേ​ഖരം കുറഞ്ഞു​വ​രി​ക​യാണ്‌. തങ്ങളുടെ ദീർഘ​കാല പദ്ധതി​യിൽ ശുദ്ധീ​ക​രി​ക്കാ​വു​ന്ന​തും അല്ലാത്ത​തു​മായ ജലമേ​തെന്നു തിരി​ച്ച​റി​യാൻ അനവധി രാജ്യ​ങ്ങ​ളും പരാജ​യ​പ്പെ​ടു​ന്നു. ജലശേ​ഖരം ഗുണമു​ള്ള​താ​ക്കി​ത്തീർക്കാൻ ശ്രമങ്ങൾ നടക്കു​ന്നു​ണ്ടെ​ങ്കി​ലും അത്തരം ശ്രമങ്ങൾ ജനസം​ഖ്യാ വളർച്ച​യാൽ നിഷ്‌പ്ര​ഭ​മാ​യി​ത്തീ​രു​ക​യാണ്‌ ചെയ്‌തി​ട്ടു​ള്ളത്‌.

അഭയാർഥി​കൾക്കു നേരെ വാതിൽ കൊട്ടി​യ​ട​യ്‌ക്കു​ന്നു

കഴിഞ്ഞ രണ്ടു ദശകങ്ങ​ളിൽ അഭയാർഥി​ക​ളു​ടെ എണ്ണം എട്ടുമ​ട​ങ്ങി​ല​ധി​ക​മാ​യി വർധി​ച്ചി​രി​ക്കു​ന്നു എന്ന്‌ അഭയാർഥി​കൾക്കു വേണ്ടി​യുള്ള യുഎൻ ഹൈക്ക​മ്മീ​ഷണർ സേഡാ​ക്കോ ഓഗേ​ററാ പറയുന്നു. “അപരി​ചി​ത​രോ​ടുള്ള പകയും ഭയവും കലർന്ന മനോ​ഭാ​വ​ത്തി​ന്റെ ഞെട്ടി​ക്കുന്ന വർധന”വിൽ ഇതു കലാശി​ച്ചി​രി​ക്കു​ന്നു. കഴിഞ്ഞ വർഷാ​വ​സാ​നം, 1 കോടി 97 ലക്ഷം അഭയാർഥി​കൾ തങ്ങളുടെ സ്വന്തരാ​ജ്യ​ങ്ങൾക്കു പുറത്തു ജീവിച്ചു. 2 കോടി 40 ലക്ഷം പേർ സ്വന്തരാ​ജ്യ​ങ്ങ​ളിൽത്തന്നെ പല സ്ഥലങ്ങളിൽ ജീവി​ക്കേ​ണ്ടി​വന്നു. ലോക​വ്യാ​പ​ക​മാ​യി, 125 പേരിൽ ഒരാൾ വീതം അക്രമം, ആഭ്യന്ത​ര​യു​ദ്ധം, അല്ലെങ്കിൽ പീഡനം എന്നിവ മുഖാ​ന്തരം സാധാരണ ജീവിതം ഉപേക്ഷി​ക്കാൻ നിർബ​ന്ധി​ത​രാ​ക്ക​പ്പെ​ട്ടി​ട്ടുണ്ട്‌. ഇതു “പ്രതി​ക​രി​ക്കാ​നുള്ള ലോക​ത്തി​ന്റെ പ്രാപ്‌തി​യെ​യും അഭയസ്ഥാ​നം നൽകു​ക​യെന്ന മനുഷ്യ പാരമ്പ​ര്യ​ത്തെ​യും” ജയിച്ച​ട​ക്കി​യി​രി​ക്കു​ന്നു എന്ന്‌ അഭയാർഥി​ക​ളെ​ക്കു​റി​ച്ചുള്ള ആദ്യത്തെ ആഗോള പഠന​ത്തെ​ക്കു​റിച്ച്‌ അഭി​പ്രാ​യം പറഞ്ഞു​കൊണ്ട്‌ ദ വാഷി​ങ്‌ടൺ പോസ്‌ററ്‌ റിപ്പോർട്ടു ചെയ്യുന്നു. അവകാ​ശ​പ​രി​ത്യ​ജ​ന​ത്താൽ ഭാര​പ്പെ​ടു​ത്ത​പ്പെ​ടു​ക​യും അപരി​ഹാ​ര്യ​മെന്നു തോന്നുന്ന പോരാ​ട്ട​ങ്ങ​ളാൽ വലയു​ക​യും ചെയ്‌ത അനേകം രാജ്യങ്ങൾ അഭയാർഥി​ക​ളു​ടെ നേർക്കു തങ്ങളുടെ വാതാ​യ​നങ്ങൾ കൊട്ടി​യ​ട​യ്‌ക്കാൻ പടികൾ സ്വീക​രി​ച്ചി​രി​ക്കു​ന്നു. “1993-ൽ ലോക​ത്ത​ര​ങ്ങേ​റിയ, അഭയാർഥി​കളെ പടച്ചു​വി​ടുന്ന, പോരാ​ട്ട​ങ്ങ​ളെ​ല്ലാം . . . രാഷ്‌ട്ര​ങ്ങൾക്ക​കത്തു തന്നെയാ​യി​രു​ന്നു നടന്നത്‌, അല്ലാതെ രാഷ്‌ട്രങ്ങൾ തമ്മിലല്ല” എന്ന്‌ ആഭ്യന്ത​ര​യു​ദ്ധ​ങ്ങൾക്ക്‌ അറുതി വരുത്താ​നുള്ള ഒരു അന്തർദേ​ശീയ നയത്തിന്‌ ആഹ്വാനം ചെയ്‌തു​കൊണ്ട്‌ ആ പഠനം പ്രസ്‌താ​വി​ക്കു​ക​യു​ണ്ടാ​യി. ഇതിനി​ടെ, “അതിഥി​പ്രി​യം കുറഞ്ഞ ഒരു സ്ഥിതി​വി​ശേഷ”മാണ്‌ അഭയാർഥി​കളെ സ്വാഗതം ചെയ്യു​ന്നത്‌.

വീടു​തോ​റു​മുള്ള വേലയെ പാപ്പാ പിന്തു​ണ​യ്‌ക്കു​ന്നു

ജോൺ പോൾ രണ്ടാമന്റെ ആഹ്വാ​നങ്ങൾ സ്വീക​രി​ച്ചു​കൊണ്ട്‌ കാത്തലിക്‌ നിയോ-കാറെ​റ​ക്യു​മെനൽ പ്രസ്ഥാ​ന​ത്തി​ന്റെ ഒരു കൂട്ടം പിൻഗാ​മി​കൾ റോമി​ലും പ്രാന്ത​പ്ര​ദേ​ശ​ങ്ങ​ളി​ലും വീടു​തോ​റും മാത്രമല്ല തെരു​വു​ക​ളി​ലും പ്രസം​ഗി​ക്കാ​മെന്നു സമ്മതി​ച്ചി​ട്ടുണ്ട്‌. ലാ റിപ്പബ്ലിക്ക ദിനപ​ത്ര​ത്തിൽ റിപ്പോർട്ടു ചെയ്‌ത​തു​പോ​ലെ “യഹോ​വ​യു​ടെ സാക്ഷി​കൾക്കെ​തി​രായ വായാ​ടി​ക​ളായ ഇവർ യേശു​വി​ന്റെ ജീവി​ത​ക​ഥ​യാ​ണു പറയാൻ പോകു​ന്നത്‌.” ആദ്യ സംഘത്തിൽ ഉള്ളത്‌ 15 കുടും​ബ​ങ്ങ​ളാണ്‌, എന്നാൽ ഈ പദ്ധതി “എല്ലായി​ട​ത്തും സമൃദ്ധ​മായ ഫലം വിളയി​ക്കു​മെന്ന്‌” പാപ്പാ പ്രത്യാ​ശി​ക്കു​ന്നു. എന്തു​കൊ​ണ്ടാണ്‌ ഇങ്ങനെ​യൊ​രു പുതിയ തുടക്കം? കത്തോ​ലി​ക്കാ സഭയ്‌ക്ക്‌ അതിന്റെ “വശീകരണ പ്രാപ്‌തി​യും മതപര​മായ ആകർഷ​ണ​വും കൈ​മോ​ശം വന്നിരി​ക്കുന്ന”തായി കത്തോ​ലി​ക്കാ പുരോ​ഹി​താ​ധി​പ​ത്യം മനസ്സി​ലാ​ക്കു​ന്നു​വെ​ന്നും “ശക്തമായ വൈകാ​രിക സ്വാധീ​ന​ത്തി​ലൂ​ടെ മതാനു​സാ​രി​കളെ നേടാ​നുള്ള” സംരം​ഭ​ങ്ങളെ പാപ്പാ പ്രോ​ത്സാ​ഹി​പ്പി​ക്കു​ന്നു​വെ​ന്നും സാമൂ​ഹിക ശാസ്‌ത്ര​ജ്ഞ​യായ മാരിയ മാച്ചോ​ററി പറയുന്നു. കത്തോ​ലി​ക്കാ എഴുത്തു​കാ​ര​നായ സെർഷോ ക്വിൻസി​യോ ഇങ്ങനെ കൂട്ടി​ച്ചേർക്കു​ന്നു: “എന്തും ഉപയോ​ഗ​പ്ര​ദ​മാ​യി​രു​ന്നേ​ക്കാ​മെ​ന്നുള്ള പ്രതീ​ക്ഷ​യാൽ അഥവാ വ്യർഥ​മോ​ഹ​ത്താൽ ഒരവസ​ര​വും പാഴാ​ക്കാൻ അദ്ദേഹം ആഗ്രഹി​ക്കു​ന്നി​ല്ലാ​ത്ത​തു​പോ​ലെ തോന്നു​ന്നു.”

റഷ്യയി​ലെ പരിസ്ഥി​തി വിപത്ത്‌

“റഷ്യയി​ലെ പരിസ്ഥി​തി മന്ത്രി​യായ വിക്ടർ ഡാനി​ലോ-ഡാനിൽജൻ, റഷ്യയു​ടെ കരഭാ​ഗ​ത്തി​ന്റെ 15 ശതമാനം പരിസ്ഥി​തി വിനാ​ശ​മേ​ഖ​ല​യാ​ണെന്നു പ്രഖ്യാ​പി​ച്ചി​രി​ക്കു​ന്നു” എന്ന്‌ ജർമൻ ദിനപ​ത്ര​മായ ഫ്രാങ്ക്‌ഫർട്ടർ ആൽജെ​മൈന ററ്‌​സൈ​റ​റുങ്‌ റിപ്പോർട്ടു ചെയ്യുന്നു. റിപ്പോർട്ട​നു​സ​രിച്ച്‌, റഷ്യയി​ലെ കൃഷി​യി​ട​ങ്ങ​ളിൽ പകുതി​യും കൃഷി​യോ​ഗ്യ​മ​ല്ലാ​താ​യി​രി​ക്കു​ന്നു. റേഡി​യോ ആക്‌റ​റീ​വത വളരെ കൂടു​ത​ലുള്ള സ്ഥലങ്ങളിൽ 1,00,000-ത്തിലധി​കം ആളുകൾ താമസി​ക്കു​ന്നുണ്ട്‌. ഇതിനും പുറമേ, രാസാ​യു​ധങ്ങൾ നിർമി​ച്ചി​രുന്ന ഫാക്ടറി​ക​ളിൽനി​ന്നു വിഷബാ​ധ​യേ​ററ്‌ പതിനാ​യി​ര​ക്ക​ണ​ക്കി​നാ​ളു​കൾ മരണമ​ട​ഞ്ഞി​ട്ടു​ള്ള​താ​യി റിപ്പോർട്ടു ചെയ്യ​പ്പെ​ട്ടി​ട്ടുണ്ട്‌. രാസസു​ര​ക്ഷിത യൂണി​യന്റെ പ്രസി​ഡൻറായ ല്യൂ ഫ്യോ​ഡ​റോഫ്‌ ഇപ്രകാ​രം അഭി​പ്രാ​യ​പ്പെട്ടു: “വൈദ്യ​ശാ​സ്‌ത്ര​ത്തി​ന്റെ നിലപാ​ടിൽനി​ന്നു നോക്കു​മ്പോൾ, ഒരു രാസയു​ദ്ധ​ത്തി​നു വേണ്ടി​യുള്ള നമ്മുടെ തയ്യാ​റെ​ടു​പ്പു​കൾ വിപത്‌ക​ര​മായ പരിണ​ത​ഫ​ലങ്ങൾ വരുത്തി​വെ​ച്ചി​രി​ക്കു​ന്നു.”

അക്രമാ​സ​ക്ത​രായ കുട്ടികൾ

കൊല​പാ​തകം, കവർച്ച, ബലാൽസം​ഗം എന്നിവ​യിൽ ഏർപ്പെ​ടു​ക​യും പീഡി​പ്പി​ക്കു​ക​യും ചെയ്യുന്ന കുട്ടി​കളെ അനേകം രാജ്യ​ങ്ങ​ളിൽ കാണാം. അക്രമ​സം​ഭ​വ​ങ്ങ​ളും മൃഗീ​യ​ത​യും പെരു​കു​ക​യാണ്‌. ഐക്യ​നാ​ടു​ക​ളിൽ കൊല​പാ​ത​ക​ത്തിൽ ഏർപ്പെട്ട 18 വയസ്സിൽ താഴെ​യുള്ള ചെറു​പ്പ​ക്കാ​രു​ടെ എണ്ണം കഴിഞ്ഞ അഞ്ചു വർഷം​കൊണ്ട്‌ 85 ശതമാനം കണ്ട്‌ ഉയർന്നു. അതു​പോ​ലെ​തന്നെ അസ്വസ്ഥ​മാ​ക്കു​ന്ന​താണ്‌ അതി​ക്ര​മി​ക​ളിൽ അനേക​രും പുലർത്തുന്ന ലജ്ജാക​ര​മായ മനോ​ഭാ​വ​വും. ഈ മാററ​ങ്ങൾക്കു കാരണ​മെ​ന്താണ്‌? “മൂല്യങ്ങൾ ഒഴുകി​യൊ​ലി​ച്ചു​പോയ, അക്രമാ​സ​ക്ത​മായ നമ്മുടെ സമൂഹം അക്രമത്തെ സ്വീകാ​ര്യ​മാ​ക്കി​ത്തീർത്തി​രി​ക്കു​ന്നു. ശരിയും തെററും സംബന്ധിച്ച, നൻമയും തിൻമ​യും സംബന്ധിച്ച, വ്യക്തമായ നിലവാ​രങ്ങൾ . . . മേലാൽ തിരി​ച്ച​റി​യാൻ കഴിയാ​താ​യി​രി​ക്കു​ന്നു” എന്ന്‌ ജർമൻ ന്യൂസ്‌ മാഗസി​നായ ഡേർ ഷ്‌പീ​ജെൽ പറയുന്നു. അതി​പ്ര​കാ​രം കൂട്ടി​ച്ചേർക്കു​ന്നു: “പ്രായം കുറഞ്ഞ കുററ​വാ​ളി​ക​ളും ഇരകളാണ്‌. തങ്ങൾ വളർന്നു​വ​രുന്ന മുതിർന്ന ലോക​ത്തി​ന്റെ പ്രതി​ഫ​ല​ന​ങ്ങ​ളാ​ണവർ. . . . അക്രമാ​സ​ക്ത​മാ​യി പെരു​മാ​റുന്ന ഓരോ കുട്ടി​യും അവിശ്വ​സ​നീ​യ​മായ അളവിൽ അക്രമം നിരീ​ക്ഷി​ക്കു​ക​യും അതു സ്വായ​ത്ത​മാ​ക്കു​ക​യും ചെയ്‌തി​ട്ടുണ്ട്‌.” ടിവി മുഖാ​ന്തരം കുട്ടികൾ “മുഴു ഗ്രഹത്തി​ലെ​യും അക്രമം” കാണുന്നു. അക്രമം നിറഞ്ഞ വീഡി​യോ ചിത്രങ്ങൾ, കമ്പ്യൂട്ടർ കളികൾ, കൊല​പാ​ത​ക​ത്തെ​യും മററു​തരം അക്രമ​പ്ര​വൃ​ത്തി​ക​ളെ​യും വാഴ്‌ത്തുന്ന പാട്ടുകൾ എന്നീ കാര്യങ്ങൾ അവരെ സ്വാധീ​നി​ക്കു​ന്നു. പ്രശ്‌നങ്ങൾ പരിഹ​രി​ക്കാ​നും തർക്കങ്ങൾ ഒത്തുതീർക്കാ​നു​മുള്ള ന്യായ​മായ ഒരു മാർഗ​മാ​യി ടിവി പരിപാ​ടി​കൾ അക്രമത്തെ പ്രോ​ത്സാ​ഹി​പ്പി​ക്കു​ന്നു. “നാം മനുഷ്യ​ത്വ​മററ ഒരു സമൂഹ​മാ​യി മാറി​യി​രി​ക്കു​ന്നു, നമ്മുടെ കുട്ടി​ക​ളും ആ വിധത്തി​ലാ​ണു വളർന്നു​വ​രു​ന്നത്‌” എന്ന്‌ ഹാംബർഗി​ലെ മനശ്ശാ​സ്‌ത്ര പ്രൊ​ഫ​സ​റായ ഷ്‌ററീ​ഫാൻ ഷ്‌മി​റ​റ്‌ച്ചൻ പറയുന്നു.

ശിശു​വി​നോ​ടൊ​പ്പം ഉറങ്ങൽ

“അമ്മമാർ ഒരു കാര്യം ചെയ്‌താൽ സിഡ്‌സ്‌ (SIDS—Sudden Infant Death Syndrome)—ക്ഷിപ്ര ശിശു മൃത്യു​വ്യാ​ധി—കുറയ്‌ക്കാൻ കഴിയു​മെന്നു മാത്രമല്ല ആരോ​ഗ്യ​മുള്ള, സന്തുഷ്ട​രായ ശിശു​ക്കളെ വളർത്തി​ക്കൊ​ണ്ടു​വ​രാ​നു​മാ​കും: ആദ്യത്തെ ഒരു വർഷ​ത്തേക്കു ശിശു​ക്കളെ ഒററയ്‌ക്ക്‌ ഒരു തൊട്ടി​ലിൽ ആക്കുന്ന​തി​നു പകരം തങ്ങളോ​ടൊ​പ്പം കിടത്തി​യു​റ​ക്കുക.” ഇങ്ങനെ പറയു​ന്നത്‌ കാലി​ഫോർണി​യ​യി​ലെ പോ​മോന കോ​ളെ​ജി​ലെ ഒരു പ്രൊ​ഫ​സ​റായ ജയിംസ്‌ മാക്‌കെ​ന്ന​യാണ്‌. അമ്മയുടെ ശരീര​ത്തോ​ടു ചേർന്നു​കി​ടന്ന്‌ ഉറങ്ങു​ന്നത്‌ “രാത്രി​യി​ലു​ട​നീ​ളം ശിശു​വി​ന്റെ ശരീര​ഘ​ട​നയെ ക്രമ​പ്പെ​ടു​ത്താൻ സഹായി​ക്കു​ന്നു”വെന്ന്‌ ദ ഡല്ലാസ്‌ മോർണിങ്‌ ന്യൂസ്‌ റിപ്പോർട്ടു ചെയ്യുന്നു. ശിശു അമ്മയുടെ അരികിൽ കിടന്നു​റ​ങ്ങു​മ്പോൾ അതിന്റെ “ശ്വാ​സോ​ച്ഛ്വാ​സ​രീ​തി​കൾ, ഹൃദയ​മി​ടി​പ്പു​നി​ര​ക്കു​കൾ, ഉറക്കത്തി​ലെ ഘട്ടങ്ങൾ തുടങ്ങി​യവ അമ്മയു​ടേ​തി​നോ​ടു ചേർന്നു​വ​രു​ന്നു” എന്ന്‌ പരീക്ഷ​ണങ്ങൾ തെളി​യി​ച്ചി​ട്ടുണ്ട്‌. മാത്രമല്ല, അമ്മയും കുട്ടി​യും അഭിമു​ഖ​മാ​യി കിടക്കു​ന്ന​തു​കൊണ്ട്‌ ശിശു ആഗ്രഹി​ക്കുന്ന ഏതു സമയത്തും അതിനു മുല കുടി​ക്കാൻ കഴിയും. “തൊട്ടി​ലിൽ തനിച്ചു കിടക്കുന്ന ശിശു​ക്കൾക്ക്‌ ഇന്ദ്രി​യ​സം​ബ​ന്ധ​മായ ഹാനി സംഭവി​ക്കു​ന്നു. ഇതിനു മർമ​പ്ര​ധാ​ന​മായ ബുദ്ധി​വി​കാ​സ​ത്തി​ന്റെ അഭാവ​ത്തി​ലേ​ക്കും സാധ്യ​ത​യ​നു​സ​രിച്ച്‌ സിഡ്‌സ്‌ എന്ന അപകട​ത്തിന്‌ അനുകൂ​ല​മായ അവസ്ഥക​ളി​ലേ​ക്കും നയിക്കാൻ കഴിയു​മെന്നു ഞങ്ങൾ കരുതു​ന്നു” എന്ന്‌ മിസ്‌ററർ മാക്‌കെന്ന പറയുന്നു. സാധാ​ര​ണ​മാ​യി അമ്മമാ​രോ​ടൊ​പ്പം കുട്ടികൾ കിടന്നു​റ​ങ്ങുന്ന രാജ്യ​ങ്ങ​ളിൽ സിഡ്‌സി​ന്റെ നിരക്ക്‌ വളരെ കുറവാ​ണെന്നു സ്ഥിതി​വി​വ​ര​ക്ക​ണ​ക്കു​കൾ സൂചി​പ്പി​ക്കു​ന്നു.

ഇസ്രാ​യേ​ലും വത്തിക്കാ​നും ഉടമ്പടി​യിൽ ഒപ്പു വയ്‌ക്കു​ന്നു

അനേക വർഷത്തെ നിരസ​ന​ത്തി​നും 17 മാസത്തെ കൂടി​യാ​ലോ​ച​ന​കൾക്കും ശേഷം വത്തിക്കാൻ ഇസ്രാ​യേ​ലു​മാ​യി ഒരു നയതന്ത്ര ഉടമ്പടി​യിൽ ഒപ്പു​വെ​ച്ചി​രി​ക്കു​ന്നു. ഇരുപ​ക്ഷ​ത്തു​നി​ന്നു​മുള്ള പ്രതി​നി​ധി​കൾ തലയോ​ടി​നോട്‌ വളരെ ഒട്ടിനിൽക്കുന്ന തൊപ്പി​കൾ ധരിച്ചു​നിൽക്കവേ ഇസ്രാ​യേ​ലി​നു വേണ്ടി വിദേ​ശ​കാ​ര്യ മന്ത്രി യോസീ ബൈലി​നും വത്തിക്കാ​നു​വേണ്ടി സ്‌റേ​റ​ററ്‌ മോൺസി​നി​യോ​റു​ടെ ഉപസെ​ക്ര​ട്ട​റി​യായ ക്ലോഡി​യോ ചെയ്‌ലി​യും ഒപ്പുവച്ചു. ചെയ്‌ലി ഇപ്രകാ​രം പറഞ്ഞു: “കത്തോ​ലി​ക്ക​രും ജൂതൻമാ​രും തമ്മിലുള്ള പരസ്‌പര ചർച്ചയ്‌ക്കും ആദരപു​ര​സ്സ​ര​മായ സഹകര​ണ​ത്തി​നും ഇസ്രാ​യേ​ലി​ലും ലോക​ത്തു​ട​നീ​ള​വും ആക്കവും ഊർജ​വും ലഭിക്കു​മെന്ന്‌ ഇപ്പോൾ വിശുദ്ധ സിംഹാ​സ​ന​ത്തി​നു ബോധ്യ​മാ​യി​രി​ക്കു​ന്നു.” ഈ ഉടമ്പടി ശേമ്യ​വി​രോ​ധ​ത്തി​നെ​തി​രെ പൊരു​താൻ വത്തിക്കാ​നെ പ്രതി​ബ​ദ്ധ​മാ​ക്കു​ന്നു. ഇസ്രാ​യേ​ലാ​കട്ടെ തങ്ങളുടെ ദേശത്ത്‌ സഭയ്‌ക്ക്‌ ആശയ​പ്ര​കടന സ്വാത​ന്ത്ര്യ​വും സാമൂ​ഹിക പരിപാ​ടി​കൾ നടത്താ​നുള്ള അവകാ​ശ​വും നൽകാ​മെന്നു സമ്മതി​ച്ചി​രി​ക്കു​ന്നു. ഇസ്രാ​യേ​ലി​ലെ പള്ളിവക സ്വത്തു​ക്ക​ളു​ടെ​മേ​ലുള്ള നികുതി, വിശുദ്ധ സ്ഥലങ്ങളി​ലേ​ക്കുള്ള പ്രവേ​ശനം തുടങ്ങി ചില കാര്യങ്ങൾ ഇനിയും തീരു​മാ​നി​ക്കേ​ണ്ട​തുണ്ട്‌. യെരു​ശ​ലേ​മി​നെ സംബന്ധിച്ച ചോദ്യം ഉടമ്പടി​യിൽ പരാമർശി​ച്ചി​ട്ടി​ല്ലാത്ത സ്ഥിതിക്ക്‌ ആ നഗരത്തി​ന്റെ അന്തിമ നില എന്തായി​രി​ക്ക​ണ​മെ​ന്നതു സംബന്ധിച്ച്‌ ഇപ്പോൾ സ്വാധീ​നം ചെലു​ത്താൻ കഴിയു​മെന്ന്‌ വത്തിക്കാൻ പ്രത്യാ​ശി​ക്കു​ന്നു.

ജീവശാ​സ്‌ത്ര ഉടമ്പടി നിയമ​മാ​യി​ത്തീ​രു​ന്നു

1992-ൽ ബ്രസീ​ലിൽവെച്ച്‌ 167 രാഷ്‌ട്രങ്ങൾ ഒപ്പുവെച്ച ഒരു ഉടമ്പടി ഈ വർഷാ​രം​ഭ​ത്തിൽ അന്തർദേ​ശീയ നിയമ​മാ​യി​ത്തീർന്നു. കൺ​വെൻ​ഷൻ ഓൺ ബയോ​ള​ജി​ക്കൽ ഡൈ​വേ​ഴ്‌സി​ററി എന്നു വിളി​ക്ക​പ്പെ​ടുന്ന ഈ ഉടമ്പടി, തങ്ങളുടെ അതിർത്തി​കൾക്കു​ള്ളി​ലുള്ള മൃഗങ്ങ​ളെ​യും സസ്യങ്ങ​ളെ​യും ഏകകോ​ശ​ജീ​വി​ക​ളെ​യും അതു​പോ​ലെ​തന്നെ അവയ്‌ക്ക്‌ ആവശ്യ​മായ ആവാസ​സ്ഥ​ല​ങ്ങ​ളെ​യും പരിര​ക്ഷി​ക്കാ​നുള്ള മാർഗങ്ങൾ ആസൂ​ത്രണം ചെയ്യാൻ അതിൽ ഒപ്പുവെച്ച രാഷ്‌ട്ര​ങ്ങളെ പ്രതി​ബ​ദ്ധ​മാ​ക്കു​ന്നു. അപകട​ത്തി​ലായ ജീവി​വർഗ​ങ്ങളെ സംരക്ഷി​ക്കാ​നും ജൈവ​വി​ഭ​വ​ങ്ങ​ളു​ടെ ഉചിത​മായ ഉപയോ​ഗ​വും പരിര​ക്ഷ​ണ​ത്തി​ന്റെ ആവശ്യ​വും സംബന്ധി​ച്ചു പൊതു​ജ​ന​ങ്ങളെ ബോധ​വാൻമാ​രാ​ക്കാ​നും ഉടമ്പടി​യിൽ ഒപ്പുവെച്ച രാഷ്‌ട്രങ്ങൾ നിയമങ്ങൾ പാസാ​ക്കേ​ണ്ട​താണ്‌. വംശനാ​ശം ഞെട്ടി​ക്കുന്ന വിധത്തിൽ വർധി​ച്ചു​വ​രു​ന്നു എന്ന അറിവും 2050 എന്ന വർഷ​ത്തോ​ടെ അവശേ​ഷി​ക്കുന്ന ജീവി​വർഗ​ങ്ങ​ളിൽ പകുതി​യും അപ്രത്യ​ക്ഷ​മാ​യേ​ക്കാ​മെന്ന ഭയവു​മാണ്‌ ഈ ഉടമ്പടി​ക്കു നിദാനം. ഈ ഉടമ്പടി യഥാർഥ​ത്തിൽ എങ്ങനെ പ്രാവർത്തി​ക​മാ​കു​മെന്നു തീരു​മാ​നി​ക്കാൻ ഒപ്പുവെച്ച രാഷ്‌ട്രങ്ങൾ ഈ വർഷാ​വ​സാ​നം വീണ്ടും സമ്മേളി​ക്കാ​നി​രി​ക്കു​ക​യാണ്‌.