തെക്കൻ ആഫ്രി​ക്ക​യി​ലെ വിനാ​ശ​കാ​രി​യായ വരൾച്ച

ആഫ്രിക്കയിലെ ഉണരുക! ലേഖകൻ

ഈ നൂററാ​ണ്ടിൽ ഉണ്ടായി​ട്ടു​ള്ള​തിൽ വെച്ച്‌ ഏററവും വലിയ വരൾച്ച​യാ​യി​രു​ന്നു ഇതെന്നാണ്‌ അനേക​രു​ടെ​യും അഭി​പ്രാ​യം. തെക്കൻ ആഫ്രി​ക്ക​യു​ടെ ചരി​ത്ര​ത്തിൽ വെച്ച്‌ ഏററവും മോശ​മായ സംഭവം ഇതാ​ണെ​ന്നു​പോ​ലും ചിലർ പറയുന്നു. തെക്കൻ ആഫ്രി​ക്ക​യിൽ ആഞ്ഞടി​ച്ച​തും രണ്ടു വർഷം നീണ്ടു​നി​ന്ന​തു​മായ ഈ വരൾച്ച വിനാ​ശ​ങ്ങളെ ഒന്നൊ​ന്നാ​യി ആനയിച്ചു. “അത്‌ മോശ​മാണ്‌. നാം പ്രതീ​ക്ഷി​ച്ച​തി​നെ​ക്കാൾ വളരെ വളരെ മോശം. പര്യട​ന​യാ​ത്രകൾ നടത്തു​മ്പോൾ നാം ദുരി​ത​ത്തി​ന്റെ​യും മാനു​ഷിക കഷ്ടപ്പാ​ടി​ന്റെ​യും ഇല്ലായ്‌മ​യു​ടെ​യും ഇതുവരെ രേഖ​പ്പെ​ടു​ത്ത​പ്പെ​ട്ടി​ട്ടി​ല്ലാത്ത ആഴങ്ങളി​ലേക്ക്‌ ഊളി​യി​ട്ടി​റ​ങ്ങു​ക​യാണ്‌,” തെക്കൻ ആഫ്രി​ക്ക​യി​ലെ ഒരു സ്വകാര്യ സഹായ സംഘമായ ഓപ്പ​റേഷൻ ഹങ്കറിന്റെ തലവൻ പ്രസ്‌താ​വി​ച്ചു.

“ഇവിടെ ഒന്നും വളരു​ക​യില്ല. ഭൂമി നിർജീ​വ​മാണ്‌,” ഒരു ഗ്രാമീണ കർഷകൻ നിരാ​ശ​പ്പെട്ടു. ചില സ്ഥലങ്ങളി​ലാ​ണെ​ങ്കിൽ വിശപ്പു സഹിക്ക​വ​യ്യാ​തെ ഗ്രാമ​വാ​സി​കൾ മണ്ണും കാട്ടു​സ​സ്യ​ങ്ങ​ളു​ടെ വേരു​ക​ളും ഭക്ഷിക്കു​ക​യു​ണ്ടാ​യി. ഭക്ഷ്യസ​ഹാ​യങ്ങൾ നൽകുന്ന ഏജൻസി​കൾക്ക്‌ സഹായാ​ഭ്യർഥ​നകൾ കാരണം ഇരിക്ക​പ്പൊ​റു​തി​യി​ല്ലാ​താ​യി. ദ ഗാർഡി​യൻ വീക്ക്‌ലി പറയു​ന്ന​ത​നു​സ​രിച്ച്‌, “1985-ലെ ഭീകര വരൾച്ച​യിൽ എത്യോ​പ്യ​ക്കും സുഡാ​നും നഷ്ടമാ​യ​തി​ല​ധി​കം വിളകൾ തെക്കൻ ആഫ്രി​ക്ക​യ്‌ക്കു നഷ്ടമായി.”

വരൾച്ച ഏതാണ്ട്‌ 1 കോടി 80 ലക്ഷം ആളുകളെ പട്ടിണി​യു​ടെ വക്കത്തെ​ത്തി​ച്ചു. അംഗോ​ള​യു​ടെ കാര്യ​ത്തി​ലാ​ണെ​ങ്കിൽ ഇതു​പോ​ലെ മോശ​മായ ഒരു പ്രതി​സന്ധി അതിന്റെ ചരി​ത്ര​ത്തിൽ മുമ്പെ​ങ്ങും ഉണ്ടായി​ട്ടില്ല. പത്തുലക്ഷം കന്നുകാ​ലി​കൾ ചത്തൊ​ടു​ങ്ങി​യ​താ​യും ഒററവർഷം​കൊണ്ട്‌ വിളക​ളു​ടെ ഏതാണ്ട്‌ 60 ശതമാനം നഷ്ടമാ​യ​താ​യും കണക്കാ​ക്ക​പ്പെ​ടു​ന്നു. വരൾച്ച​യാൽ ഏററവു​മ​ധി​കം ബാധി​ക്ക​പ്പെ​ട്ട​വർക്കു സഹായം നൽകു​ന്ന​തി​നാ​യി അവരു​ടെ​യ​ടുത്ത്‌ എത്തി​പ്പെ​ടാ​നും കഴിഞ്ഞില്ല. 1992 ആഗസ്‌ററ്‌ ആയപ്പോ​ഴേ​ക്കും സാംബി​യ​യി​ലെ വിളക​ളു​ടെ മൂന്നിൽ രണ്ടു ഭാഗവും നശിച്ചി​രു​ന്നു. നേരത്തെ തീരു​മാ​നി​ച്ചി​രു​ന്ന​തു​പോ​ലെ പത്തുലക്ഷം ടൺ ചോളം ഇറക്കു​മതി ചെയ്യേ​ണ്ടത്‌ അത്യാ​വ​ശ്യ​മാ​യി​രു​ന്നു. ഏതാണ്ട്‌ 17 ലക്ഷം ആളുകൾ പട്ടിണി കിടക്കു​ക​യാ​യി​രു​ന്നു.

തെക്കൻ ആഫ്രി​ക്ക​യു​ടെ അപ്പക്കൊട്ട എന്നൊ​രി​ക്കൽ അറിയ​പ്പെ​ട്ടി​രുന്ന സിംബാ​ബ്‌വേ​യിൽ 40 ലക്ഷം ആളുകൾക്ക്‌, അതായത്‌ ജനസം​ഖ്യ​യു​ടെ പകുതിക്ക്‌ ഭക്ഷ്യസ​ഹാ​യം ആവശ്യ​മാ​യി​വന്നു. ഒരു സ്ഥലത്തെ സ്‌കൂൾ അധ്യാ​പിക ഇപ്രകാ​രം പറയു​ക​യു​ണ്ടാ​യി: “ഇവിടെ ഇനി വെള്ളം വളരെ കുറച്ചേ ഉള്ളൂ, ആഹാര​മാ​ണെ​ങ്കിൽ ഒട്ടുമില്ല. മണ്ണിൽ പുല്ലിന്റെ ഒരു നാമ്പു പോലും കാണാ​നില്ല.”

ചില ഗ്രാമ​ങ്ങ​ളി​ലാ​ണെ​ങ്കിൽ ആളുകൾ മരം കയറി ഇലകൾ പറിച്ചു പാകം ചെയ്‌തു ഭക്ഷിച്ചു. ആളോ​ഹരി ഒരു മാസം കൊടു​ക്കേണ്ട ഭക്ഷ്യസ​ഹാ​യ​ത്തി​ന്റെ അളവ്‌, ഗവൺമെൻറിന്‌ 15 കിലോ​ഗ്രാ​മിൽനിന്ന്‌ 5 കിലോ​ഗ്രാ​മാ​യി കുറയ്‌ക്കേ​ണ്ടി​വന്നു. മനുഷ്യ​നിർമിത വൻ തടാക​മായ കരീബ​യി​ലെ വെള്ളം മുമ്പെ​ന്ന​ത്തെ​ക്കാ​ളും വററി​പ്പോ​യി​രു​ന്നു. ബുള​വേ​യോ​യിൽ വെള്ളത്തി​ന്റെ ഉപയോ​ഗം നിയ​ന്ത്രി​ക്ക​പ്പെട്ടു.

വേണ്ടത്ര വെള്ളമി​ല്ലാ​ഞ്ഞ​തു​കൊണ്ട്‌ സിംബാ​ബ്‌വേ​യി​ലെ നായാ​ട്ടു​സ്ഥ​ല​ങ്ങ​ളിൽ മേഞ്ഞി​രുന്ന ആയിര​ക്ക​ണ​ക്കി​നു മൃഗങ്ങളെ വെടി​വെ​ച്ചു​കൊ​ല്ലേ​ണ്ടി​വന്നു. ഒരു പത്രം ഇപ്രകാ​രം റിപ്പോർട്ടു ചെയ്‌തു: “ഉണങ്ങി​ക്ക​രിഞ്ഞ മരങ്ങളിൽനി​ന്നു പക്ഷികൾ ചത്തു വീണു. ആമകളും പാമ്പു​ക​ളും എലിക​ളും പ്രാണി​ക​ളും എല്ലാം അപ്രത്യ​ക്ഷ​മാ​യി.”

വരൾച്ച അതിഭ​യ​ങ്ക​ര​മാ​യി ബാധിച്ച ദേശങ്ങ​ളി​ലൊ​ന്നാ​യി​രു​ന്നു മൊസാ​മ്പിക്‌. അതിനാ​വ​ശ്യ​മാ​യി​രുന്ന ആഹാര​ത്തി​ന്റെ 80 ശതമാ​ന​വും അന്തർദേ​ശീയ സഹായ​ത്തി​ലൂ​ടെ​യാണ്‌ ലഭിച്ചത്‌. 32 ലക്ഷം ആളുകൾ പട്ടിണി കിടന്ന​താ​യി കണക്കാ​ക്ക​പ്പെ​ടു​ന്നു. അഭയാർഥി​കൾ മലാവി, ദക്ഷിണാ​ഫ്രിക്ക, സ്വാസീ​ലാൻഡ്‌, സിംബാ​ബ്‌വേ എന്നിവി​ട​ങ്ങ​ളി​ലേക്കു പ്രവഹി​ച്ചു. എന്നാൽ അടുത്ത​കാ​ലത്ത്‌ വരൾച്ച ശമിച്ച​പ്പോൾ മിക്ക അഭയാർഥി​ക​ളും മടങ്ങി​പ്പോ​രു​ക​യു​ണ്ടാ​യി.

ഗ്രാമീ​ണ​രു​ടെ ജീവി​തത്തെ വരൾച്ച എങ്ങനെ​യാണ്‌ ബാധി​ക്കു​ന്നത്‌ എന്നതു സംബന്ധിച്ച്‌ മിക്ക​പ്പോ​ഴും നഗരവാ​സി​കൾ അജ്ഞരാണ്‌. ഭക്ഷ്യസ​ഹായ പദ്ധതി​യി​ലെ ഒരു ഉദ്യോ​ഗസ്ഥൻ ഇപ്രകാ​രം നിരീ​ക്ഷി​ക്കു​ക​യു​ണ്ടാ​യി: “ഭക്ഷ്യ-ജല ദൗർല​ഭ്യ​ത്തി​ന്റെ കാഠി​ന്യം എന്തെന്ന​റി​യാത്ത മുഖ്യ​നഗര പ്രദേ​ശ​ങ്ങ​ളി​ലെ മിക്ക ആളുകൾക്കും വരൾച്ച​യു​ണ്ടാ​ക്കുന്ന വിനാശം മനസ്സി​ലാ​കു​ന്നില്ല.”

പല സ്ഥലങ്ങളി​ലും മഴ ഒരു പരിധി​വരെ ആശ്വാസം കൈവ​രു​ത്തി​യെ​ങ്കി​ലും മൊസാ​മ്പി​ക്കി​ലും സ്വാസീ​ലാൻഡി​ലും ദക്ഷിണാ​ഫ്രി​ക്ക​യി​ലും ഇനിയും മഴ ആവശ്യ​മുണ്ട്‌. ഈ വരൾച്ച​യു​ടെ ഫലങ്ങൾ വരാനി​രി​ക്കുന്ന വർഷങ്ങ​ളി​ലും അനുഭ​വ​വേ​ദ്യ​മാ​കും എന്നതിനു സംശയ​മില്ല.

വരൾച്ച​യു​ടെ ഒരു കാരണം മഴയുടെ അഭാവ​മാ​ണെ​ന്നു​ള്ളത്‌ ശരിയാണ്‌. എന്നാൽ വരൾച്ച​യു​ടെ ആക്കം കൂട്ടുന്ന മററു കാരണ​ങ്ങ​ളു​മുണ്ട്‌. അവയും നാം പരിഗ​ണി​ക്കേ​ണ്ടി​യി​രി​ക്കു​ന്നു.

മററു സങ്കീർണ​ത​കൾ

ആഫ്രി​ക്ക​യിൽ രാഷ്‌ട്രീയ അസ്ഥിരത വരൾച്ച​യു​ടെ ഫലങ്ങൾക്ക്‌ വൻതോ​തിൽ ആക്കം കൂട്ടുന്നു. ഏററവും കഠിന​മായ ഭക്ഷ്യ ദൗർല​ഭ്യ​ങ്ങൾ കണ്ടിട്ടുള്ള രാജ്യങ്ങൾ അത്തരം അസ്ഥിരത ബാധി​ച്ചി​ട്ടുള്ള രാജ്യ​ങ്ങ​ളാ​യി​രു​ന്നു. അംഗോള, എത്യോ​പ്യ, മൊസാ​മ്പിക്ക്‌, സൊമാ​ലിയ എന്നിവ ഉദാഹ​ര​ണ​ങ്ങ​ളാണ്‌. യുദ്ധങ്ങൾ കൃഷിയെ അവതാ​ള​ത്തി​ലാ​ക്കു​ക​യും അനേകം കർഷകരെ നാടു​വി​ടാൻ പ്രേരി​പ്പി​ക്കു​ക​യും ചെയ്‌തു. അങ്ങനെ അവരുടെ കൃഷി​യി​ടങ്ങൾ ശ്രദ്ധി​ക്കാൻ ആരുമി​ല്ലെ​ന്നാ​യി.

മനുഷ്യ​രാ​ലു​ള്ള അന്തരീക്ഷ മലിനീ​ക​ര​ണ​വും അതിന്റെ ഫലമാ​യുള്ള ആഗോള തപനവും ആണ്‌ വരൾച്ച​യ്‌ക്കുള്ള വിവാ​ദാ​ത്മ​ക​മായ മറെറാ​രു കാരണം. ജനസം​ഖ്യാ​വർധ​ന​വാണ്‌ മറെറാ​രു ഘടകം. ആഫ്രി​ക്ക​യി​ലെ പ്രതി​വർഷ​മുള്ള ശരാശരി വളർച്ചാ​നി​രക്ക്‌ 3 ശതമാ​ന​മാണ്‌. ലോക​ത്തി​ലെ ഏററവും ഉയർന്ന വളർച്ചാ​നി​ര​ക്കു​ക​ളിൽ ഒന്നുതന്നെ. തീററി​പ്പോ​റ​റാ​നുള്ള വയറു​ക​ളു​ടെ എണ്ണം കൂടി​വ​രു​ന്ന​തോ​ടെ കർഷകർ കൃഷിക്ക്‌ അനു​യോ​ജ്യ​മ​ല്ലാത്ത സ്ഥലം കൂടി കൃഷി​ചെ​യ്യു​ന്നു. ഫലപ്രാ​പ്‌തി വീണ്ടെ​ടു​ക്കാൻ തക്കവണ്ണം നിലം ഉഴുതി​ടു​ന്നില്ല.

ഇതുകൂ​ടാ​തെ, കൂടുതൽ കൃഷി​ഭൂ​മി​യു​ണ്ടാ​ക്കുക എന്ന മുഖ്യ ലക്ഷ്യത്തിൽ വനങ്ങൾ വെട്ടി​ന​ശി​പ്പി​ക്ക​പ്പെ​ടു​ന്നു. ആഫ്രിക്കൻ ഇൻ​സൈ​ററ്‌ എന്ന മാഗസിൻ പറയു​ന്ന​ത​നു​സ​രിച്ച്‌ 20 വർഷം മുമ്പ്‌ എത്യോ​പ്യ​യു​ടെ 20 ശതമാനം വനമാ​യി​രു​ന്നു; എന്നാൽ ഇപ്പോൾ 2 ശതമാനം മാത്രമേ വനമുള്ളൂ. ഭൂമിക്കു ഭീഷണി​യാ​യി​രി​ക്കുന്ന പരിസ്ഥി​തി പ്രശ്‌ന​ങ്ങ​ളിൽ വെച്ച്‌ ഏററവും ഗുരു​തരം വനനശീ​ക​ര​ണ​മാ​ണെന്ന്‌ ചില പ്രാമാ​ണി​കർ പറയുന്നു. അത്‌ കാലാ​വ​സ്ഥാ​ക്ര​മ​ങ്ങളെ ബാധി​ക്കു​ക​യും മണ്ണൊ​ലി​പ്പിന്‌ ഇടയാ​ക്കു​ക​യും ചെയ്യുന്നു. ഇത്‌ മരു​പ്ര​ദേ​ശ​ങ്ങ​ളു​ടെ വ്യാപ​ന​ത്തി​നും ഇടവരു​ത്തു​ന്നു.

ചില ആഫ്രിക്കൻ ഗവൺമെൻറു​കൾ പട്ടണവാ​സി​ക​ളു​ടെ പ്രീതി നേടാ​നാ​യി ഭക്ഷണത്തി​ന്റെ​യും കന്നുകാ​ലി​ക​ളു​ടെ​യും വിലയി​ടി​ക്കു​ക​യു​ണ്ടാ​യി. ഇങ്ങനെ ചെയ്യു​മ്പോൾ കൃഷി​യിൽനി​ന്നു ലാഭം കൊയ്യാൻ കഴിയാ​തെ കർഷകർ നിരു​ത്സാ​ഹി​ത​രാ​കു​ന്നു. എന്നാൽ ഉത്‌പാ​ദനം വർധി​പ്പി​ക്കു​ന്ന​തിന്‌ കർഷകർക്ക്‌ ഒരു പ്രചോ​ദ​ന​മാ​യി ചോള​വില 64 ശതമാനം വർധി​പ്പി​ച്ചു​കൊണ്ട്‌ സിംബാ​ബ്‌വേ ഗവൺമെൻറ്‌ അവർക്ക​നു​കൂ​ല​മാ​യി പ്രതി​ക​രി​ച്ചു.

എന്താണ്‌ പരിഹാ​രം?

വിദഗ്‌ധർക്ക്‌ നിർദേ​ശങ്ങൾ പലതാ​ണു​ള്ളത്‌. പാശ്ചാത്യ കൃഷി​മാ​തൃ​കകൾ അവലം​ബി​ക്കാൻ അവർ ആഫ്രിക്കൻ രാജ്യ​ങ്ങളെ ചില​പ്പോൾ ഉപദേ​ശി​ച്ചി​ട്ടുണ്ട്‌. എന്നാൽ അത്‌ ആഫ്രിക്കൻ ചുററു​പാ​ടി​നു പററി​യ​ത​ല്ലെന്നു തെളിഞ്ഞു.

പ്രാ​യോ​ഗി​ക​മായ പരിഹാ​രങ്ങൾ ഉടനടി ആവശ്യ​മാ​യി​രി​ക്കു​ന്നു. ആഫ്രി​ക്ക​യ്‌ക്കു വേണ്ടി​യുള്ള യുഎൻ സാമ്പത്തിക കമ്മീഷന്റെ ഒരു സീനിയർ ആഫ്രിക്കൻ ഉദ്യോ​ഗസ്ഥൻ ഇപ്രകാ​രം പ്രസ്‌താ​വി​ക്കു​ക​യു​ണ്ടാ​യി: “ഇതുവരെ നാം കണ്ടിട്ടുള്ള എല്ലാ സാമ്പത്തിക പദ്ധതി​ക​ളു​ടെ​യും അടിസ്ഥാ​ന​ത്തിൽ നോക്കു​മ്പോൾ, 2000 വർഷം ആകു​മ്പോ​ഴേ​ക്കും ആഫ്രിക്ക അതി​പ്പോ​ഴാ​യി​രി​ക്കുന്ന കുഴി​യിൽ ആയിരി​ക്കില്ല. പിന്നെ​യോ ആഴമേ​റിയ ഒരു ഇരുട്ട​റ​യു​ടെ അടിഭാ​ഗ​ത്തെ​ങ്ങോ ആയിരി​ക്കും.”

രാഷ്‌ട്രീ​യ സ്ഥിരത കൈവ​രി​ക്കേ​ണ്ട​തും യുദ്ധവും അക്രമ​വും അവസാ​നി​പ്പി​ക്കേ​ണ്ട​തും അത്യന്താ​പേ​ക്ഷി​ത​മാണ്‌. അയൽ രാജ്യ​ങ്ങ​ളു​മാ​യുള്ള സഹകരണം വളർത്തി​യെ​ടു​ക്കേ​ണ്ട​തും ആവശ്യ​മാണ്‌.

യുഎൻ ഭക്ഷ്യ-കാർഷിക സംഘടന പറയു​ന്ന​ത​നു​സ​രിച്ച്‌ ആഫ്രി​ക്ക​യ്‌ക്ക്‌ അതിന്റെ ഇപ്പോ​ഴുള്ള ജനസം​ഖ്യ​യു​ടെ മൂന്നി​ര​ട്ടി​യെ തീററി​പ്പോ​റ​റാ​നുള്ള പ്രാപ്‌തി​യുണ്ട്‌. എന്നാൽ ദശകങ്ങ​ളാ​യിട്ട്‌ അവിടത്തെ ഉത്‌പാ​ദനം കുറഞ്ഞു​വ​രി​ക​യാണ്‌. ഇപ്പോ​ഴത്തെ വളർച്ചാ​നി​രക്ക്‌ അനുസ​രി​ച്ചാ​ണെ​ങ്കിൽ അതിന്റെ ജനസംഖ്യ 30 വർഷം​കൊണ്ട്‌ ഇരട്ടി​യാ​യി​ത്തീ​രും.

വിദേ​ശ​രാ​ജ്യ​ങ്ങ​ളിൽ നിന്നുള്ള ഭക്ഷ്യസ​ഹാ​യം അനേകരെ പട്ടിണി​യിൽനി​ന്നു കരകയ​റ​റി​യി​ട്ടു​ണ്ടെ​ന്ന​തി​നു സംശയ​മില്ല. എന്നിരു​ന്നാ​ലും, എന്നും അങ്ങനെ സഹായം തേടു​ന്നത്‌ പ്രശ്‌ന​ത്തി​നു പരിഹാ​ര​മാ​കു​ന്നി​ല്ല​ല്ലോ. മാത്രമല്ല ഈ രീതി പ്രാ​ദേ​ശിക കർഷകരെ നിരു​ത്സാ​ഹ​പ്പെ​ടു​ത്തു​ന്ന​തി​നാൽ അതി​നൊ​രു പ്രതി​കൂല ഫലവു​മുണ്ട്‌. അവർക്കു തങ്ങളുടെ ഉത്‌പ​ന്നങ്ങൾ ന്യായ​മായ വിലയ്‌ക്ക്‌ വിൽക്കാൻ കഴിയാ​തെ​വ​രു​ന്നു. പലപ്പോ​ഴും ആളുകൾ ഇറക്കു​മ​തി​ചെ​യ്യ​പ്പെട്ട ഭക്ഷണപ​ദാർഥ​ങ്ങ​ളോട്‌ കൂറു വളർത്തി​യെ​ടു​ക്കു​ക​യും തങ്ങളുടെ പ്രദേ​ശ​ത്തു​ണ്ടാ​കുന്ന ധാന്യങ്ങൾ മേലാൽ ഇഷ്ടപ്പെ​ടാ​തി​രി​ക്കു​ക​യും ചെയ്യുന്നു.

എന്താണ്‌ ചെയ്‌തു​കൊ​ണ്ടി​രി​ക്കു​ന്നത്‌?

ആഫ്രിക്കൻ ജനതയെ സഹായി​ക്കു​ന്ന​തിന്‌ ആത്മാർഥ​രായ അനേക​മാ​ളു​കൾ നടത്തുന്ന അക്ഷീണ ശ്രമങ്ങൾ പ്രശം​സാർഹ​ങ്ങ​ളാണ്‌. ചില പ്രദേ​ശ​ങ്ങ​ളിൽ അത്തരം ശ്രമങ്ങൾ ഫലമു​ള​വാ​ക്കി​യി​ട്ടുണ്ട്‌. സിംബാ​ബ്‌വേ​യി​ലാ​ണെ​ങ്കിൽ ഒരു അന്തർദേ​ശീയ ഗവേഷണ സംഘം ഒരു പദ്ധതി നടപ്പാ​ക്കു​ക​യു​ണ്ടാ​യി. ഉണക്കുള്ള പ്രദേ​ശ​ങ്ങ​ളിൽ നല്ലരീ​തി​യി​ലും താരത​മ്യേന വേഗത്തി​ലും വളരുന്ന മരങ്ങൾ നട്ടുപി​ടി​പ്പി​ക്കു​ന്ന​തി​നുള്ള ഒരു പദ്ധതി​യാ​യി​രു​ന്നു അത്‌. ഇന്ധന പ്രതി​സ​ന്ധി​യെ തരണം ചെയ്യാൻ തക്കവണ്ണം ഈ മരങ്ങൾ വൻതോ​തിൽ നട്ടുപി​ടി​പ്പി​ക്കുക എന്നതാ​യി​രു​ന്നു ഉദ്ദേശ്യം. എന്തു​കൊ​ണ്ടെ​ന്നാൽ അവിടെ 80 ശതമാനം ആളുക​ളും പാചകം ചെയ്യാൻ വിറകാണ്‌ ഉപയോ​ഗി​ക്കു​ന്നത്‌.

പച്ചക്കറി​ക​ളു​ടെ​യും ഫലവൃ​ക്ഷ​ങ്ങ​ളു​ടെ​യും ചുവട്ടിൽ പാറക്ക​ഷ​ണങ്ങൾ ഇടാൻ സിംബാ​ബ്‌വേ​യി​ലെ വരൾച്ച ബാധിത പ്രദേ​ശ​മായ മാസ്‌വി​ങ്കോ​യി​ലെ ചാരിഞ്ച്‌ ഗ്രാമ​ത്തി​ലെ കർഷക​രോട്‌ നിർദേ​ശി​ക്കു​ക​യു​ണ്ടാ​യി. ഇതിന്റെ ഫലമായി ചെടി​കൾക്ക്‌ വളരെ കുറച്ചു ജലം മാത്രമേ ആവശ്യ​മാ​യി വരുന്നു​ള്ളൂ. വിളകൾ വളരെ നന്നായി വളരു​ക​യും ചെയ്‌തു. അവർക്കു ഭക്ഷ്യപ​ദാർഥങ്ങൾ വിൽക്കാ​നും ഉണ്ടായി​രു​ന്നു.

ദക്ഷിണാ​ഫ്രി​ക്ക​യി​ലെ ഒരു വലിയ കമ്പനി കൽക്കരി​യിൽനി​ന്നു പെ​ട്രോ​ളി​യം ഉണ്ടാക്കുന്ന അതിന്റെ വ്യവസാ​യ​ശാല പരിഷ്‌ക​രി​ക്കു​ക​യു​ണ്ടാ​യി. അതിന്റെ ഫലമായി, ഉപയോ​ഗം കഴിഞ്ഞ മുഴുവൻ ജലവും ശക്തമായ രാസ​പ്ര​വർത്ത​ന​ങ്ങൾക്കു​ശേഷം വീണ്ടും ഉപയോ​ഗി​ക്കാ​വുന്ന പരുവ​ത്തി​ലാ​വു​ന്നു. വ്യവസായ ജലത്തിന്റെ ശുദ്ധീ​ക​രണം ചെല​വേ​റി​യ​താ​ണെ​ങ്കി​ലും കാല​ക്ര​മേണ 70 ശതമാ​ന​ത്തോ​ളം വ്യവസായ ജലം ശുദ്ധീ​ക​രി​ക്കു​ക​യെന്ന ലക്ഷ്യത്തി​ലാണ്‌ ദക്ഷിണാ​ഫ്രിക്ക ഇപ്പോൾ.

സാംബി​യ​യി​ലെ ലൂയാൻഷാ​യിൽ പകര പോഷ​കാ​ഹാ​ര​മെന്ന നിലയിൽ സോയാ​ബീൻസ്‌ ഉപയോ​ഗി​ച്ചു തുടങ്ങി. ഒരു ഭക്ഷ്യസ​ഹായ പ്രവർത്തകൻ ഇപ്രകാ​രം പറയു​ക​യു​ണ്ടാ​യി: “പരമ്പരാ​ഗ​ത​മാ​യി ഉപയോ​ഗി​ച്ചു​വ​രുന്ന പ്രധാന ആഹാര​പ​ദാർഥ​ങ്ങ​ളു​ടെ വിതരണം കുറഞ്ഞു​വ​രുന്ന മാർച്ചി​ലും ജൂണി​ലു​മാണ്‌ പോഷ​കാ​ഹാ​ര​ക്കു​റ​വു​കൊ​ണ്ടുള്ള മിക്ക മരണങ്ങ​ളും സംഭവി​ക്കു​ന്നത്‌. എന്നാൽ സോയാ​ബീൻസി​ന്റെ വിള​വെ​ടുപ്പ്‌ ഏപ്രിൽ മാസത്തി​ലാണ്‌. ചോളം, കാക്ക​ച്ചോ​ളം തുടങ്ങിയ പ്രധാന ആഹാര​പ​ദാർഥ​ങ്ങ​ളെ​ക്കാ​ള​ധി​കം​നാൾ ഇരിക്കു​ക​യും ചെയ്യുന്നു.”

വരൾച്ച​യു​ടെ​യും ഭക്ഷ്യ ദൗർല​ഭ്യ​ത്തി​ന്റെ​യും പ്രശ്‌ന​ങ്ങളെ തരണം ചെയ്യു​ന്ന​തി​നുള്ള ഇത്തരം ശ്രമങ്ങൾ വില​പ്പെ​ട്ട​തു​തന്നെ. എന്നാൽ മമനു​ഷ്യ​ന്റെ എല്ലാത്ത​ര​ത്തി​ലു​മുള്ള സാങ്കേ​തിക വിദ്യ​യും പുരോ​ഗ​തി​യും ഉണ്ടായി​ട്ടും ആഫ്രി​ക്ക​യി​ലെ വരൾച്ച​യൊ​ന്നു ശമിപ്പി​ക്കാൻ കഴിയു​ന്നില്ല. എന്നാൽ ഇതിന്റെ ശമനത്തിന്‌ നടപ്പി​ലാ​ക്കേണ്ട എല്ലാക്കാ​ര്യ​ങ്ങ​ളും അറിയാ​വുന്ന ഒരാളുണ്ട്‌. ഒരേ ഒരാൾ. അവൻ ഇതിന്‌ പരിഹാ​രം വരുത്തു​ന്ന​തി​നെ​ക്കു​റിച്ച്‌ ദീർഘ​നാൾ മുമ്പേ മുൻകൂ​ട്ടി​പ്പ​റ​ഞ്ഞി​ട്ടു​മുണ്ട്‌. തന്റെ നിയമിത രാജാ​വായ യേശു​ക്രി​സ്‌തു​വി​ലൂ​ടെ​യുള്ള യഹോ​വ​യാം ദൈവ​ത്തി​ന്റെ രാജ്യ​ഭ​ര​ണ​ത്തിൻ കീഴിൽ പ്രവാ​ച​ക​നായ യെശയ്യാ​വി​ന്റെ ഈ വാക്കുകൾ ഗോള​മാ​സ​കലം അക്ഷരീ​യ​മാ​യി നിറ​വേ​റും: “മരുഭൂ​മി​യിൽ വെള്ളവും നിർജ്ജ​ന​പ്ര​ദേ​ശത്തു തോടു​ക​ളും പൊട്ടി പുറ​പ്പെ​ടും. മരീചിക ഒരു പൊയ്‌ക​യാ​യും വരണ്ടനി​ലം നീരു​റ​വു​ക​ളാ​യും തീരും; കുറു​ക്കൻമാ​രു​ടെ പാർപ്പി​ടത്തു, അവ കിടന്ന സ്ഥലത്തു​തന്നെ, പുല്ലും ഓടയും ഞാങ്ങണ​യും വളരും.”—യെശയ്യാ​വു 35:6, 7.

[12-ാം പേജിലെ ചിത്രം]

ചെളിക്കുഴികളിൽ അവശേ​ഷിച്ച അൽപ്പം ജലത്തി​നു​വേണ്ടി ഗ്രാമ​വാ​സി​ക​ളും കന്നുകാ​ലി​ക​ളും തമ്മിൽ മത്സരിച്ചു

[കടപ്പാട്‌]

The Star, Johannesburg. S.A.