ഒരു മികച്ച വിദ്യാ​ഭ്യാ​സ​ത്തി​ന്റെ അടിസ്ഥാന സംഗതി​കൾ

അടുത്ത​യി​ടെ ദ ന്യൂ​യോർക്ക്‌ ടൈംസ്‌ അതിന്റെ മുൻപേ​ജിൽ തന്നെ 16 വയസ്സുള്ള ലതോയാ എന്ന ഹൈസ്‌കൂൾ വിദ്യാർഥി​നി​യു​ടെ കഥ പ്രസി​ദ്ധീ​ക​രി​ച്ചു. 11 വയസ്സു​ണ്ടാ​യി​രു​ന്ന​പ്പോൾ സ്വന്തം പിതാവ്‌ അവളെ മർദി​ക്കാ​നും ലൈം​ഗി​ക​മാ​യി ദ്രോ​ഹി​ക്കാ​നും തുടങ്ങി എന്നവൾ പറഞ്ഞു. മയക്കു​മ​രു​ന്നു​കൾ ഉപയോ​ഗി​ക്കു​മാ​യി​രുന്ന അവളുടെ അമ്മ കുടും​ബത്തെ ഉപേക്ഷി​ച്ചു​പോ​യി​രു​ന്നു. “വീട്‌, കക്കൂസു​പോ​ലു​മി​ല്ലാത്ത ഉപേക്ഷി​ക്ക​പ്പെട്ട ഒരു കെട്ടിടം അഥവാ അവൾ കിടന്നു​റ​ങ്ങാൻ വല്ലാതെ ഭയപ്പെ​ട്ടി​രുന്ന ഒരു മുറി ആയിരു​ന്നു”വെന്ന്‌ ആ പത്രം വിശദീ​ക​രി​ച്ചു. എന്നാൽ ലതോയാ വ്യത്യ​സ്‌ത​യാ​യി​രു​ന്നു. ഇതെല്ലാ​മാ​യി​രു​ന്നി​ട്ടും ഈ വർഷാ​രം​ഭ​ത്തിൽ അവൾ തന്റെ ഹൈസ്‌കൂ​ളി​ലെ, കുട്ടി​കൾക്കു​വേ​ണ്ടി​യുള്ള നാഷണൽ ഓണർ സൊ​സൈറ്റി എന്ന സംഘട​ന​യു​ടെ പ്രസി​ഡ​ണ്ടാ​യി​രു​ന്നു, ഉപരി​പ​ഠ​ന​ക്ലാ​സു​ക​ളിൽ ബി ഗ്രേഡ്‌ നിലനിർത്തു​ക​യും ചെയ്‌തു.

മോശ​മാ​യ പരിത​സ്ഥി​തി​ക​ളിൽനി​ന്നാ​ണു വരുന്ന​തെ​ങ്കി​ലും വിദ്യാ​ല​യ​ത്തിൽ നല്ല പ്രകടനം കാഴ്‌ച​വ​യ്‌ക്കാൻ ഒരു കുട്ടിയെ സഹായി​ക്കാൻ എന്തിനു കഴിയും? പലപ്പോ​ഴും നല്ല വിദ്യാ​ഭ്യാ​സ​ത്തി​നു​വേണ്ട ഒരടി​സ്ഥാ​ന​ഘ​ടകം വിദ്യാർഥി​യിൽ ഉത്തരവാ​ദി​ത്വ​പൂർവം താത്‌പ​ര്യ​മെ​ടു​ക്കുന്ന, പിന്തുണ നൽകു​ക​യും കുട്ടി​യു​ടെ വിദ്യാ​ഭ്യാ​സ​കാ​ര്യ​ങ്ങ​ളിൽ കൂടുതൽ ഉൾപ്പെ​ട്ടി​രി​ക്കു​ക​യും ചെയ്യുന്ന മുതിർന്ന ഒരാൾ—കുട്ടി​യു​ടെ സ്വന്തം മാതാ​പി​താ​ക്ക​ളി​ലൊ​രാ​ളോ രണ്ടു​പേ​രും​കൂ​ടി​യോ ആയാൽ നന്ന്‌—ഉണ്ടായി​രി​ക്കുക എന്നതാണ്‌. ഒരു മുതിർന്ന ഹൈസ്‌കൂൾ വിദ്യാർഥി​നിക്ക്‌ ഇതു വളരെ പ്രാധാ​ന്യ​മു​ള്ള​താ​യി തോന്നി​യ​തു​കൊണ്ട്‌ അവൾ ഹൃദയ​പൂർവം ഇങ്ങനെ പറഞ്ഞു: “രക്ഷാകർത്താ​ക്ക​ളു​ടെ പിന്തു​ണ​യു​ണ്ടെ​ങ്കിൽ മാത്രമേ കുട്ടി​കൾക്കു വിദ്യാ​ല​യ​ത്തിൽ പിടി​ച്ചു​നിൽക്കാൻ സാധി​ക്കു​ക​യു​ള്ളൂ.”

ഒട്ടുമു​ക്കാ​ലും അധ്യാ​പകർ ഇതി​നോ​ടു യോജി​ക്കു​ന്നു. “നല്ല പ്രകടനം കാഴ്‌ച​വ​യ്‌ക്കു​ന്ന​വ​രും ഈ വിദ്യാ​ഭ്യാ​സ​വ്യ​വ​സ്ഥ​യിൽനി​ന്നു ജയിച്ചു​പോ​കു​ന്ന​വ​രു​മായ ഓരോ വിദ്യാർഥി​ക്കും—അങ്ങനെ​യു​ള്ളവർ ധാരാ​ള​മുണ്ട്‌—അവരുടെ ഓരോ ചുവടു​കൾക്കും തുണനിന്ന ഒരു രക്ഷിതാ​വു​ണ്ടാ​യി​രി​ക്കും” എന്ന്‌ ന്യൂ​യോർക്ക്‌ നഗരത്തി​ലെ ഒരധ്യാ​പകൻ ഉറപ്പിച്ചു പറഞ്ഞു.

രക്ഷാകർത്തൃ പിന്തുണ, ഒരു സുപ്ര​ധാന ഘടകം

കഴിഞ്ഞ വർഷം റീഡേ​ഴ്‌സ്‌ ഡൈജസ്റ്റ്‌ “ചില വിദ്യാർഥി​കൾ മറ്റുള്ള​വ​രെ​ക്കാൾ നല്ലപ്ര​ക​ടനം കാഴ്‌ച​വ​യ്‌ക്കു​ന്ന​തെ​ന്തു​കൊ​ണ്ടാണ്‌?” എന്ന ചോദ്യ​ത്തെ​ക്കു​റി​ച്ചു പഠനം നടത്തി. “കെട്ടു​റ​പ്പുള്ള കുടും​ബങ്ങൾ കുട്ടി​കൾക്കു വിദ്യാ​ല​യ​ങ്ങ​ളിൽ ഒരനു​കൂല ഘടകമാ​യി​ത്തീ​രു​ന്നു” എന്നതാ​യി​രു​ന്നു അവരെ​ത്തി​ച്ചേർന്ന നിഗമ​ന​ങ്ങ​ളി​ലൊന്ന്‌. അത്തരം കുടും​ബ​ങ്ങ​ളി​ലെ മാതാ​പി​താ​ക്കൾ തങ്ങളുടെ കുട്ടി​കൾക്കു വാത്സല്യ​പൂർണ​മായ ശ്രദ്ധ നൽകു​ക​യും ഉചിത​മായ മൂല്യ​ങ്ങ​ളും ലക്ഷ്യങ്ങ​ളും അവരിൽ വളർത്തി​യെ​ടു​ക്കു​ക​യും ചെയ്യുന്നു. എന്നാൽ ഒരു രക്ഷാകർത്താ​വു പറഞ്ഞു: “വിദ്യാ​ല​യ​ത്തിൽ നടക്കുന്ന കാര്യങ്ങൾ എന്താ​ണെ​ന്ന​റി​യി​ല്ലെ​ങ്കിൽ നിങ്ങൾക്കു ശരിയായ മാർഗ​നിർദേശം കൊടു​ക്കാ​നാ​വില്ല.”

അതറി​യാ​നു​ള്ള ഒരു നല്ല മാർഗം വിദ്യാ​ലയം സന്ദർശി​ക്കുക എന്നതാണ്‌. പതിവാ​യി സന്ദർശ​നങ്ങൾ നടത്താ​റുള്ള ഒരു മാതാവ്‌ എഴുതി: “മോളു​ടെ സ്‌കൂ​ളി​ന്റെ ഇടനാ​ഴി​ക​ളിൽകൂ​ടി നടക്കു​മ്പോൾ അശ്ലീല​ച്ചു​വ​യുള്ള അസഭ്യ​സം​സാ​രം കേൾക്കാം. എവിടെ നോക്കി​യാ​ലും കുട്ടികൾ പ്രേമാ​വേ​ശ​ത്തോ​ടെ ചുംബി​ക്കു​ക​യും തഴുകു​ക​യും ചെയ്യു​ന്നതു കാണാം—ഒരു സിനി​മ​യാ​യി​രു​ന്നെ​ങ്കിൽ തീർച്ച​യാ​യും അതിനെ ‘മുതിർന്ന​വർക്കു​മാ​ത്രം’ എന്ന വിഭാ​ഗ​ത്തിൽ പെടു​ത്തി​യേനേ.” ഇക്കാലത്ത്‌ മികച്ച വിദ്യാ​ഭ്യാ​സം ലഭിക്കുക എന്നതും സദാചാ​ര​പ​ര​മായ ഒരു ജീവിതം നയിക്കുക എന്നതും കുട്ടി​കളെ സംബന്ധി​ച്ചി​ട​ത്തോ​ളം എത്ര പ്രയാ​സ​മാ​ണെ​ന്നതു വിലമ​തി​ക്കാൻ അത്തരം സന്ദർശ​നങ്ങൾ നിങ്ങളെ സഹായി​ച്ചേ​ക്കാം.

അമേരി​ക്ക​യി​ലെ അധ്യാ​പകൻ 1994 (ഇംഗ്ലീഷ്‌) എന്ന പ്രസി​ദ്ധീ​ക​ര​ണ​ത്തി​ന്റെ അഭി​പ്രാ​യം ശ്രദ്ധേ​യ​മാണ്‌: “അധ്യാ​പ​ക​രു​മാ​യുള്ള വ്യക്തി​പ​ര​മായ കൂടി​ക്കാ​ഴ്‌ചകൾ, രക്ഷാകർത്തൃ​യോ​ഗങ്ങൾ അല്ലെങ്കിൽ അധ്യാപക-രക്ഷാകർത്തൃ യോഗങ്ങൾ, സ്‌കൂൾസ​ന്ദർശ​നങ്ങൾ എന്നിവ തങ്ങളുടെ മാതാ​പി​താ​ക്കൾക്കു വളരെ വിരള​മാ​യേ ഉള്ളൂ​വെന്ന്‌ അക്രമ​ത്തി​നി​ര​യായ കുട്ടികൾ പറയാ​നുള്ള എല്ലാ സാധ്യ​ത​ക​ളു​മുണ്ട്‌.”

മാതാ​പി​താ​ക്ക​ളു​ടെ ഭാഗത്തു​നിന്ന്‌ ആവശ്യ​മാ​യി​രി​ക്കു​ന്ന​തെ​ന്താ​ണെന്ന്‌ ഉത്‌ക​ണ്‌ഠാ​കു​ല​യായ ഒരു മാതാവു വെളി​പ്പെ​ടു​ത്തി. അവരുടെ വാക്കുകൾ: “അവിടെ ചെല്ലുക! നിങ്ങളു​ടെ കുട്ടി പഠിക്കുന്ന കാര്യങ്ങൾ എന്താ​ണെ​ന്ന​റി​യു​ന്ന​തിൽ നിങ്ങൾ തത്‌പ​ര​രാ​ണെന്നു സ്‌കൂൾ അധികാ​രി​കൾ മനസ്സി​ലാ​ക്കട്ടെ. ഞാൻ പതിവാ​യി സ്‌കൂൾ സന്ദർശി​ക്കു​ക​യും ക്ലാസുകൾ നടക്കു​മ്പോൾ ഒരു സന്ദർശ​ക​യെ​ന്ന​നി​ല​യിൽ അവി​ടെ​യി​രി​ക്കു​ക​യും ചെയ്യുന്നു.” കുട്ടി​യു​ടെ വക്താവാ​യി​രി​ക്കു​ന്ന​തി​ന്റെ മൂല്യ​ത്തെ​യാ​ണു മറ്റൊരമ്മ ഊന്നി​പ്പ​റ​ഞ്ഞത്‌. അവർ ഇങ്ങനെ വിശദീ​ക​രി​ച്ചു: “ഒരു ദിവസം എന്റെ കുട്ടികൾ ഒരു ഗുണ​ദോ​ഷ​ക​നോ​ടു സംസാ​രി​ക്കു​ന്ന​തി​നു​വേണ്ടി സ്‌കൂ​ളി​ലെ ഓഫീ​സിൽ ചെന്ന​പ്പോൾ അവരെ തീർത്തും അവഗണി​ക്കു​ക​യാ​ണു​ണ്ടാ​യത്‌. എന്നാൽ പിറ്റേ​ദി​വസം കുട്ടി എന്നെയും കൂട്ടി​ക്കൊ​ണ്ടു​ചെ​ന്ന​പ്പോൾ അവർ എന്നെയും എന്റെ കുട്ടി​യെ​യും സഹായി​ക്കാൻ വളരെ ഉത്സുകത കാണിച്ചു.”

നാല്‌ ആൺമക്ക​ളുള്ള ഈ അമ്മ കുട്ടി​യു​ടെ വിദ്യാ​ഭ്യാ​സത്തെ നേരിട്ടു ബാധി​ക്കുന്ന കലാല​യ​പ്ര​വർത്ത​ന​ങ്ങ​ളിൽ താത്‌പ​ര്യ​മെ​ടു​ക്കേ​ണ്ട​തി​ന്റെ പ്രാധാ​ന്യ​വും എടുത്തു​പ​റഞ്ഞു. “അധ്യാപക-രക്ഷാകർത്തൃ യോഗങ്ങൾ, ശാസ്‌ത്ര​മേള തുടങ്ങി മാതാ​പി​താ​ക്കളെ ക്ഷണിച്ചി​ട്ടു​ള്ള​തോ കുട്ടികൾ പങ്കെടു​ക്കു​ന്ന​തോ ആയ ഏതു പരിപാ​ടി​ക്കും സന്നിഹി​ത​രാ​വുക. ഇതു നിങ്ങളു​ടെ കുട്ടി​യു​ടെ അധ്യാ​പ​ക​രു​മാ​യി കൂടി​ക്കാഴ്‌ച നടത്താൻ അവസര​ങ്ങ​ളൊ​രു​ക്കു​ന്നു. കുട്ടി​യു​ടെ വിദ്യാ​ഭ്യാ​സത്തെ അവന്റെ ജീവി​ത​ത്തി​ലെ ഒരു പ്രധാ​ന​ഭാ​ഗ​മാ​യി നിങ്ങൾ കണക്കാ​ക്കു​ന്നു എന്ന്‌ അവർ മനസ്സി​ലാ​ക്കണം. അധ്യാ​പകർ അതു മനസ്സി​ലാ​ക്കി​ക്ക​ഴി​യു​മ്പോൾ നിങ്ങളു​ടെ കുട്ടി​ക്കു​വേണ്ടി സമയം മാറ്റി​വ​യ്‌ക്കാ​നും അധികം ശ്രമം ചെലു​ത്താ​നും അവർ കൂടുതൽ തത്‌പ​ര​രാ​യി​രി​ക്കും.”

അധ്യാ​പ​ക​രു​മാ​യുള്ള സഹകരണം

രക്ഷാകർത്താ​ക്കൾക്ക്‌ അധ്യാ​പ​ക​രു​മാ​യി ബന്ധപ്പെ​ടാ​നുള്ള പ്രത്യേക അവസരങ്ങൾ സ്‌കൂ​ളു​കൾ പട്ടിക​പ്പെ​ടു​ത്തു​മ്പോൾ അത്തരം വൈകു​ന്നേ​ര​ങ്ങ​ളിൽ തങ്ങൾക്ക്‌ അതിലും പ്രാധാ​ന്യ​മുള്ള കാര്യങ്ങൾ ചെയ്യാ​നു​ണ്ടെന്നു മാതാ​പി​താ​ക്കൾക്കു തോന്നി​യേ​ക്കാം. എന്നാൽ നിങ്ങളു​ടെ കുട്ടി​കളെ മികച്ച വിദ്യാ​ഭ്യാ​സം നേടാൻ സഹായി​ക്കാൻ ശ്രമി​ക്കു​ന്ന​വ​രു​ടെ അടുക്കൽ പോവുക എന്നതി​നെ​ക്കാൾ പ്രാധാ​ന്യ​മു​ള്ള​താ​യി മറ്റെന്താ​ണു​ള്ളത്‌? നല്ല അധ്യാപക-രക്ഷാകർതൃ സഹകരണം അത്യന്താ​പേ​ക്ഷി​ത​മാണ്‌!

റഷ്യയിൽ അധ്യാപക-രക്ഷാകർതൃ സഹകര​ണ​ത്തി​ന്റെ ഉന്നമന​ത്തി​നാ​യി ഒരു നല്ല ക്രമീ​ക​ര​ണ​മുണ്ട്‌. എല്ലാ സ്‌കൂൾനി​യ​മ​ന​ങ്ങ​ളും ഡ്‌​നൈ​വ്‌നീക്‌ എന്നു വിളി​ക്ക​പ്പെ​ടുന്ന ഒന്നിൽ രേഖ​പ്പെ​ടു​ത്തു​ന്നു—ഇത്‌ ദൈനം​ദിന പ്രവർത്ത​ന​ങ്ങ​ളു​ടെ ഒരു രേഖയാണ്‌, ഒപ്പം ഒരു കലണ്ടറു​മു​ണ്ടാ​യി​രി​ക്കും. വിദ്യാർഥി​കൾ എല്ലാ ക്ലാസ്‌ദി​വ​സ​ങ്ങ​ളി​ലും അവരവ​രു​ടെ ഡ്‌​നൈ​വ്‌നീക്‌ കൊണ്ടു​വ​രി​ക​യും അധ്യാ​പകൻ ആവശ്യ​പ്പെ​ടു​ന്ന​പക്ഷം അതു കാണി​ക്കു​ക​യും വേണം. വിദ്യാർഥി​കൾ ഡ്‌​നൈ​വ്‌നീക്‌ രക്ഷിതാ​ക്ക​ളെ​യും കാണി​ച്ചി​രി​ക്കണം, രക്ഷിതാ​ക്കൾ ഓരോ ആഴ്‌ച​യി​ലും അതിൽ ഒപ്പിടു​ക​യും വേണം. സ്‌കൂൾപ്രാ​യ​ത്തി​ലുള്ള കുട്ടി​ക​ളുള്ള മോസ്‌കോ​ക്കാ​ര​നായ വീക്ടർ ലബാ​ഷൊവ്‌ എന്ന പിതാ​വി​ന്റെ അഭി​പ്രാ​യ​ത്തിൽ, “ഈ വിവരങ്ങൾ തങ്ങളുടെ കുട്ടി​കൾക്കു ലഭിക്കുന്ന നിയമ​നങ്ങൾ, അവരുടെ ഗ്രേഡു​കൾ എന്നിവ സംബന്ധി​ച്ചു പരിചി​ത​രാ​യി​രി​ക്കാൻ രക്ഷിതാ​ക്കളെ സഹായി​ക്കു​ന്നു.”

രക്ഷിതാ​ക്കൾ തങ്ങളുടെ കുട്ടി​ക​ളു​ടെ വിദ്യാ​ഭ്യാ​സ​കാ​ര്യ​ത്തിൽ താത്‌പ​ര്യ​മെ​ടു​ക്കു​ന്നി​ല്ലെ​ന്നത്‌ ഇക്കാലത്ത്‌ അധ്യാ​പ​ക​രു​ടെ പതിവു പരാതി​യാണ്‌. കുട്ടികൾ വിദ്യാ​ഭ്യാ​സ​പ​ര​മാ​യി മോശ​മായ പ്രകട​ന​മാ​ണു കാഴ്‌ച​വ​യ്‌ക്കു​ന്ന​തെന്നു രക്ഷിതാ​ക്കളെ ധരിപ്പി​ച്ചു​കൊണ്ട്‌ താനൊ​രി​ക്കൽ 63 കത്തുക​ളെ​ഴു​തി​യ​താ​യി ഐക്യ​നാ​ടു​ക​ളി​ലെ ഒരു ഹൈസ്‌കൂൾ അധ്യാ​പകൻ പറഞ്ഞു. വെറും മൂന്നു​പേർ മാത്രമേ പ്രതി​ക​ര​ണ​മാ​യി അദ്ദേഹ​വു​മാ​യി ബന്ധപ്പെ​ട്ടു​ള്ളു!

അതു തികച്ചും ദുഃഖ​കരം തന്നെ! മാതാ​പി​താ​ക്കൾ അവരുടെ കുട്ടി​യു​ടെ വിദ്യാ​ഭ്യാ​സ​കാ​ര്യ​ത്തിൽ ആഴത്തിൽ ഉൾപ്പെ​ടണം. അതു പ്രഥമ​മാ​യും അവരുടെ ഉത്തരവാ​ദി​ത്വ​മാണ്‌. “ഔപചാ​രി​ക​വി​ദ്യാ​ഭ്യാ​സ​ത്തി​ന്റെ പ്രഥമ​ല​ക്ഷ്യം ചുമത​ലാ​ബോ​ധ​മുള്ള പക്വമ​തി​ക​ളായ ചെറു​പ്പ​ക്കാ​രെ വളർത്തി​യെ​ടു​ക്കു​ന്ന​തിൽ മാതാ​പി​താ​ക്കളെ പിന്തു​ണ​ക്കുക എന്നതാണ്‌” എന്നു പറഞ്ഞു​കൊണ്ട്‌ ഒരു വിദ്യാ​ഭ്യാ​സ​വി​ദ​ഗ്‌ധൻ ഇതു കൃത്യ​മാ​യി​ത്തന്നെ പ്രസ്‌താ​വി​ച്ചു.

അതു​കൊണ്ട്‌, തങ്ങളുടെ കുട്ടി​യു​ടെ അധ്യാ​പ​കരെ പരിച​യ​പ്പെ​ടാൻ രക്ഷിതാ​ക്കാൾ മുൻ​കൈ​യെ​ടു​ക്കണം. ഒരു രക്ഷിതാ​വു പറഞ്ഞതു​പോ​ലെ, “അധ്യാ​പ​കർക്ക്‌ എപ്പോൾ വേണ​മെ​ങ്കി​ലും നിങ്ങളെ വിളി​ക്കാ​നുള്ള സ്വാത​ന്ത്ര്യം തോന്നണം.” മാത്ര​വു​മല്ല, അധ്യാ​പകർ തങ്ങളുടെ കുട്ടി​യെ​പ്പറ്റി തുറന്നു സംസാ​രി​ക്കു​ന്ന​തി​നെ രക്ഷിതാ​ക്കൾ സ്വാഗതം ചെയ്യു​ക​യും പ്രോ​ത്സാ​ഹി​പ്പി​ക്കു​ക​പോ​ലും വേണം. എന്റെ കുട്ടി​യെ​ക്കൊ​ണ്ടു നിങ്ങൾക്കെ​ന്തെ​ങ്കി​ലും പ്രശ്‌ന​മു​ണ്ടോ? അവൻ ആദരവു​ള്ള​വ​നാ​ണോ? അവൻ എല്ലാ ക്ലാസു​കൾക്കും ഹാജരാ​കു​ന്നു​ണ്ടോ? അവൻ കൃത്യ​സ​മ​യ​ത്തു​തന്നെ എത്തുന്നു​ണ്ടോ? എന്നിങ്ങ​നെ​യുള്ള കാര്യ​മാ​ത്ര​പ്ര​സ​ക്ത​മായ ചോദ്യ​ങ്ങൾ രക്ഷിതാ​ക്കൾ അവരോ​ടു ചോദി​ക്കണം.

അധ്യാ​പ​കൻ നിങ്ങളു​ടെ കുട്ടി​യെ​ക്കു​റി​ച്ചു ഹിതക​ര​മ​ല്ലാത്ത എന്തെങ്കി​ലും പറയു​ക​യാ​ണെ​ങ്കി​ലോ? അത്‌ അസത്യ​മാ​ണെന്നു വിചാ​രി​ക്ക​രുത്‌. വീട്ടി​ലോ ആരാധ​നാ​സ്ഥ​ല​ത്തോ ഒക്കെ മാന്യ​മായ ജീവിതം നയിക്കു​ന്നു​വെന്നു തോന്നുന്ന പല ചെറു​പ്പ​ക്കാ​രും വാസ്‌ത​വ​ത്തിൽ ഒരു കപടജീ​വി​ത​മാ​ണു നയിക്കു​ന്നത്‌ എന്നതാണു ഖേദക​ര​മായ ഒരു വസ്‌തുത. അതു​കൊണ്ട്‌ അധ്യാ​പകർ പറയു​ന്നത്‌ ആദരപൂർവം ശ്രദ്ധി​ക്കുക, അവർ പറയു​ന്ന​തെ​ന്താ​ണെന്നു പരി​ശോ​ധി​ച്ചു​നോ​ക്കുക.

കുട്ടി വീട്ടി​ലെ​ത്തു​മ്പോൾ

നിങ്ങൾ രക്ഷിതാ​ക്കൾ, ജോലി​ക​ഴി​ഞ്ഞു വീട്ടി​ലെ​ത്തു​മ്പോൾ നിങ്ങൾക്ക്‌ എന്താണു തോന്നാറ്‌? തളർന്ന​വ​ശ​രാ​ണോ? നിരാ​ശ​രാ​ണോ? നിങ്ങളു​ടെ കുട്ടി​കൾക്ക്‌ വിദ്യാ​ല​യ​ത്തിൽനി​ന്നു തിരി​ച്ചെ​ത്തു​മ്പോൾ അതിലും മോശ​മായ വികാ​ര​ങ്ങ​ളാ​യി​രി​ക്കാം ഉള്ളത്‌. അതു​കൊണ്ട്‌ ഒരു പിതാവ്‌ ഇങ്ങനെ പ്രോ​ത്സാ​ഹി​പ്പി​ച്ചു: “വീട്ടി​ലെ​ത്തുക എന്നത്‌ അവരി​ഷ്ട​പ്പെ​ടുന്ന ഒരു സംഗതി​യാ​ക്കി മാറ്റുക. ഒരുപക്ഷേ വളരെ ദുഷ്‌ക​ര​മായ ഒരു ദിവസ​ത്തെ​യാ​യി​രി​ക്കും അവർ നേരി​ട്ടത്‌.”

സാധി​ക്കു​മ്പോ​ഴെ​ല്ലാം, കുട്ടി വരുന്ന സമയത്തു രക്ഷിതാ​വു വീട്ടി​ലു​ണ്ടാ​യി​രി​ക്കു​ന്നതു തീർച്ച​യാ​യും നല്ലതാ​യി​രി​ക്കും. ഒരമ്മയു​ടെ അഭി​പ്രാ​യ​ത്തിൽ “കുട്ടി​ക​ളോ​ടു സംസാ​രി​ക്കാൻ നിങ്ങൾ സ്ഥലത്തി​ല്ലെ​ങ്കിൽ എന്തു നടക്കുന്നു എന്നതി​നെ​പ്പറ്റി അവർക്കു നിങ്ങ​ളോ​ടു പറയാൻ സാധി​ക്കില്ല. അതു​കൊണ്ട്‌ കുട്ടികൾ വീട്ടി​ലെ​ത്തു​മ്പോൾ അവിടെ ഉണ്ടായി​രി​ക്കാൻ ഞാൻ പരമാ​വധി ശ്രമി​ക്കു​ന്നു.” തന്റെ കുട്ടി എന്തു ചെയ്യുന്നു എന്നതു മാത്രമല്ല, അവരുടെ ചിന്തക​ളും വികാ​ര​ങ്ങ​ളും എന്താ​ണെ​ന്നു​കൂ​ടി ഒരു രക്ഷിതാ​വു മനസ്സി​ലാ​ക്കണം. അതു മനസ്സി​ലാ​ക്കു​ന്ന​തി​നു ധാരാളം സമയവും ശ്രമവും വേണ​മെന്നു മാത്രമല്ല, സാവധാ​നം ചുഴി​ഞ്ഞി​റങ്ങി കണ്ടുപി​ടി​ക്കു​ക​യും വേണം. (സദൃശ​വാ​ക്യ​ങ്ങൾ 20:5) ദിവ​സേ​ന​യുള്ള ആശയവി​നി​യമം സുപ്ര​ധാ​ന​മാണ്‌.

“ഏതൊരു ദിവസ​മെ​ടു​ത്താ​ലും അന്നെല്ലാം പ്രതി​സ​ന്ധി​യി​ലായ ഒരു വിദ്യാ​ല​യ​വ്യ​വ​സ്ഥ​യു​ടെ മൂല്യങ്ങൾ നിങ്ങളു​ടെ കുട്ടി​യി​ലേക്കു പകർന്നി​ട്ടു​ണ്ടാ​യി​രി​ക്കാം” എന്ന്‌ ന്യൂ​യോർക്ക്‌ നഗരത്തി​ലെ ഒരു പ്രൈ​മറി സ്‌കൂൾ അധ്യാ​പകൻ അഭി​പ്രാ​യ​പ്പെട്ടു. അതു​കൊണ്ട്‌ അദ്ദേഹം ഇങ്ങനെ പ്രോ​ത്സാ​ഹി​പ്പി​ച്ചു: “നിങ്ങളു​ടെ കുട്ടി​യു​ടെ ഹൃദയ​ത്തിൽ വികാസം പ്രാപി​ക്കു​ന്ന​തെ​ന്താണ്‌ എന്നുള്ള​തി​നെ​പ്പറ്റി ജാഗ്ര​ത​യു​ള്ള​വ​രാ​യി​രി​ക്കുക. നിങ്ങൾ എത്ര ക്ഷീണി​ത​രാ​യി​രു​ന്നാ​ലും അതു ഗണ്യമാ​ക്കാ​തെ മനസ്സു​തു​റന്നു സംസാ​രി​ക്കാൻ അവനെ അനുവ​ദി​ക്കുക. തെറ്റായ മൂല്യ​ങ്ങൾമാ​റ്റി അവയുടെ സ്ഥാനത്തു ശരിയാ​യവ പ്രതി​ഷ്‌ഠി​ക്കുക.”—സദൃശ​വാ​ക്യ​ങ്ങൾ 1:5.

അതു​പോ​ലെ, പരിച​യ​സ​മ്പ​ന്ന​നായ ഒരു ഹൈസ്‌കൂ​ള​ധ്യാ​പ​കന്റെ ഉപദേ​ശ​മി​താണ്‌: “സ്‌കൂ​ളിൽ എന്തു നടന്നു എന്നു വെറുതെ ചോദി​ക്കു​ന്ന​തി​നു​പ​കരം ആ ദിവസ​ത്തെ​ക്കു​റി​ച്ചും അന്നത്തെ പ്രവർത്ത​ന​ങ്ങ​ളെ​ക്കു​റി​ച്ചും പ്രസക്ത​മായ കുറി​ക്കു​കൊ​ള്ളുന്ന ചോദ്യ​ങ്ങൾ ചോദി​ക്കു​ന്ന​താ​യി​രി​ക്കും പ്രയോ​ജ​ന​കരം. ഇത്‌ മയമി​ല്ലാത്ത രീതി​യി​ലോ ചുഴി​ഞ്ഞി​റങ്ങി കണ്ടുപി​ടി​ക്കാൻ ശ്രമി​ക്കു​ന്ന​തു​പോ​ലെ​യോ ആയിരി​ക്കേ​ണ്ട​തില്ല. നേരേ​മ​റിച്ച്‌, കുട്ടി​യോ​ടു സാധാരണ സംസാ​രി​ക്കുന്ന രീതി​യിൽ തന്നെയാ​യി​രി​ക്കണം.”

യു.എസ്‌. വിദ്യാ​ഭ്യാ​സ സെക്ര​ട്ട​റി​യായ റിച്ചാർഡ്‌ ഡബ്ലിയു. റിലേ ഇങ്ങനെ പ്രോ​ത്സാ​ഹി​പ്പി​ച്ചു: “മദ്യം, മയക്കു​മ​രു​ന്നു​കൾ എന്നിവ​കൊ​ണ്ടുള്ള അപകടങ്ങൾ, നിങ്ങളു​ടെ കുട്ടി​കൾക്കു​ണ്ടാ​യി​രി​ക്കാൻ നിങ്ങളാ​ഗ്ര​ഹി​ക്കുന്ന മൂല്യങ്ങൾ എന്നിവ​യെ​പ്പറ്റി അവരോ​ടു നേരിട്ടു സംസാ​രി​ക്കുക. അത്തരം വ്യക്തി​പ​ര​മായ സംഭാ​ഷ​ണങ്ങൾ നിങ്ങൾക്ക്‌ അസ്വസ്ഥ​ത​യു​ള​വാ​ക്കി​യേ​ക്കാ​മെ​ങ്കി​ലും അവരുടെ ജീവൻ രക്ഷിക്കാ​നു​ത​കി​യേ​ക്കാം.”

ഒരു രക്ഷിതാവ്‌, പ്രത്യേ​കി​ച്ചും ക്രിസ്‌തീയ സഭയിൽ ഉത്തരവാ​ദി​ത്വ​ങ്ങ​ളുള്ള ഒരാൾ ഒരിക്ക​ലും കുട്ടികൾ പറയു​ന്നതു കേൾക്കാൻ സമയമി​ല്ലാ​ത്ത​തു​പോ​ലെ താൻ തിരക്കി​ലാ​ണെന്ന ഒരു പ്രതീതി ഉളവാ​ക്ക​രുത്‌. അവർ പറയു​ന്നതു കേൾക്കു​ന്നത്‌ അരോ​ച​ക​മാ​യി തോന്നി​യാൽപോ​ലും നിങ്ങളു​ടെ മുഖഭാ​വ​ത്തിൽനി​ന്നും പെരു​മാ​റ്റ​ത്തിൽനി​ന്നും അവർ നിങ്ങ​ളോ​ടു തുറന്നു സംസാ​രി​ക്കു​ന്ന​തിൽ നിങ്ങൾ സന്തുഷ്ട​നാ​ണെന്ന്‌ അവരറി​യണം. ഇതാ ഒരു വിദ്യാർഥി​നി​യു​ടെ നിർദേശം: “നിങ്ങളു​ടെ കുട്ടി സ്‌കൂ​ളി​ലെ മയക്കു​മ​രു​ന്നു​പ​യോ​ഗം, ലൈം​ഗി​കത തുടങ്ങി​യ​വ​യെ​ക്കു​റി​ച്ചൊ​ക്കെ സംസാ​രി​ക്കു​മ്പോൾ ഞെട്ടി​പ്പോ​ക​രുത്‌.”

കുടും​ബ​ജീ​വി​ത​ത്തി​ലെ തകർച്ച മൂലം “അനാഥ​ന്മാർ” എന്ന ഗണത്തിൽ പെടു​ത്താ​വുന്ന അനേകർ ഇക്കാല​ത്തുണ്ട്‌. (ഇയ്യോബ്‌ 24:3; 29:12; സങ്കീർത്തനം 146:9) സഹായ​മാ​വ​ശ്യ​മുള്ള ഒരു ചെറു​പ്പ​ക്കാ​രനെ സഹായി​ക്കാൻ കഴിയുന്ന ആരെങ്കി​ലും മിക്കവാ​റും ക്രിസ്‌തീയ സഭക്കു​ള്ളിൽ ഉണ്ടാവും. അതിനു സാധി​ക്കുന്ന ഒരാളാ​ണോ നിങ്ങൾ?

പഠനശീ​ല​വും ചുമത​ലാ​ബോ​ധ​വും വളർത്തി​യെ​ടു​ക്കുക

യുവജ​ന​ങ്ങ​ളി​ല​ധി​കം​പേ​രും സ്‌കൂൾജോ​ലി​കൾ ചെയ്യുന്ന കാര്യ​ത്തിൽ മുഖവു​ര​യിൽ പരാമർശിച്ച ലതോ​യാ​യു​ടെ​യത്ര അർപ്പി​തരല്ല. ഭൂരി​പ​ക്ഷ​ത്തി​നും പഠനത്തിൽ നല്ല പ്രോ​ത്സാ​ഹനം ആവശ്യ​മാണ്‌. ന്യൂ​യോർക്ക്‌ നഗരത്തി​ലെ വിദ്യാ​ല​യ​ങ്ങ​ളു​ടെ മുൻചാൻസ​ല​റാ​യി​രുന്ന ജോസഫ്‌ ഫെർണാ​ണ്ടസ്‌ തന്റെ കുട്ടി​ക​ളെ​ക്കു​റിച്ച്‌ ഇങ്ങനെ പറഞ്ഞു: “ഞങ്ങളുടെ വീട്ടിൽ നിർബന്ധ പഠനസ​മ​യ​ങ്ങ​ളു​ണ്ടാ​യി​രു​ന്നു. ഞങ്ങൾ കുട്ടി​കൾക്കു പുസ്‌ത​കങ്ങൾ വാങ്ങി​ക്കൊ​ടു​ത്തു. വായന​ശാ​ല​യിൽ പോകാൻ അവരെ പ്രോ​ത്സാ​ഹി​പ്പി​ച്ചു, സ്‌കൂൾഹാ​ജർ, മറ്റു സ്‌കൂൾപ്ര​വർത്ത​നങ്ങൾ എന്നിവ​യ്‌ക്കു മുൻഗണന കൊടു​ത്തു”

മറ്റൊരു സ്‌കൂൾ അധികാ​രി പറഞ്ഞു: “നാമിന്നു കുട്ടി​കൾക്കു ചുറ്റും സൃഷ്ടി​ച്ചി​രി​ക്കുന്ന ടെലി​വി​ഷൻ, ചലച്ചി​ത്രങ്ങൾ, വീഡി​യോ​കൾ, റോഡു​വ​ക്കി​ലെ കടകൾ എന്നിവ​യു​ടെ ആവരണ​ത്തി​നു പകരം പുസ്‌ത​കങ്ങൾ, കഥകൾ എന്നിവ​യു​ടെ ആവരണം സൃഷ്ടി​ക്കണം.” കുട്ടികൾ ഗൃഹപാ​ഠം ചെയ്യു​മ്പോൾ മാതാ​പി​താ​ക്കൾക്ക്‌ എന്തെങ്കി​ലും വായി​ച്ചു​കൊ​ണ്ടോ സ്വന്തമായ പഠനം നടത്തി​ക്കൊ​ണ്ടോ അടു​ത്തെ​വി​ടെ​യെ​ങ്കി​ലും ഉണ്ടായി​രി​ക്കാ​നുള്ള ക്രമീ​ക​രണം ചെയ്യാൻ കഴിയും. നിങ്ങൾ വിദ്യാ​ഭ്യാ​സ​ത്തി​നു വില കല്‌പി​ക്കു​ന്നു​ണ്ടെന്ന്‌ അതുവഴി നിങ്ങളു​ടെ കുട്ടി​കൾക്കു മനസ്സി​ലാ​കും.

പല വീടു​ക​ളി​ലും പഠനത്തിന്‌ ഏറ്റവും വലിയ വെല്ലു​വി​ളി​യാ​യി​രി​ക്കു​ന്നതു ടെലി​വി​ഷ​നാണ്‌. ഒരു വിദ്യാ​ഭ്യാ​സ​വി​ദ​ഗ്‌ധൻ പറഞ്ഞതി​ങ്ങ​നെ​യാണ്‌: “18 വയസ്സാ​കു​ന്ന​തോ​ടെ ചെറു​പ്പ​ക്കാർ ക്ലാസ്‌മു​റി​യിൽ 11,000 മണിക്കൂ​റും ടെലി​വി​ഷൻ കണ്ടു​കൊണ്ട്‌ 22,000 മണിക്കൂ​റും ചെലവ​ഴി​ച്ചി​രി​ക്കും.” മാതാ​പി​താ​ക്കൾ തന്നെ ടെലി​വി​ഷൻ കാണു​ന്നതു വല്ലപ്പോ​ഴു​മാ​ക്കി​ക്കൊണ്ട്‌ കുട്ടികൾ അതു കാണു​ന്ന​തി​നെ പരിമി​ത​പ്പെ​ടു​ത്തേ​ണ്ട​താ​യി വന്നേക്കാം. അതിനു​പു​റമേ, നിങ്ങളു​ടെ കുട്ടി​ക​ളോ​ടൊ​പ്പം എന്തെങ്കി​ലും പഠിക്കാൻ സമയം ചെലവ​ഴി​ക്കുക. ഒരുമി​ച്ചു വായി​ക്കുക. ഗൃഹപാ​ഠം പരി​ശോ​ധി​ക്കാൻ ഓരോ ദിവസ​വും സമയം പട്ടിക​പ്പെ​ടു​ത്തുക.

തയ്യാറാ​യി​ച്ചെ​ല്ലാ​നുള്ള പല നിയമ​ന​ങ്ങ​ളും വിദ്യാ​ല​യ​ത്തിൽനി​ന്നു കുട്ടി​കൾക്കു ലഭിക്കും. അതെല്ലാം അവർ കൃത്യ​മാ​യി ചെയ്യു​ന്നു​ണ്ടോ? കുടും​ബ​ത്തി​ലെ ഉത്തരവാ​ദി​ത്വ​ങ്ങ​ളിൽ ശ്രദ്ധി​ക്കാൻ നിങ്ങൾ അവരെ പഠിപ്പി​ച്ചി​ട്ടു​ണ്ടെ​ങ്കിൽ അവർ അതു ചെയ്‌തേ​ക്കാം. ഇതു ചെയ്യാ​നുള്ള ഏറ്റവും നല്ല മാർഗം അവർക്കൊ​രു പ്രത്യേക ദിനചര്യ ഏല്‌പി​ച്ചു​കൊ​ടു​ക്കുക എന്നതാണ്‌. എന്നിട്ട്‌ ഒരു നിർദിഷ്ട പട്ടിക​യ​നു​സ​രിച്ച്‌ അവർ അതു നിർവ​ഹി​ക്ക​ണ​മെന്നു നിബന്ധന വയ്‌ക്കുക. അത്തരം ഒരു പരിശീ​ലനം കൊടു​ക്കു​ന്ന​തി​നു നിങ്ങളു​ടെ ഭാഗത്തു​നി​ന്നു വളരെ​യേറെ ശ്രമം വേണ്ടി​വ​രു​മെ​ന്നതു വാസ്‌ത​വ​മാണ്‌. എന്നാൽ അതവരെ വിദ്യാ​ല​യ​ത്തി​ലും ഭാവി​ജീ​വി​ത​ത്തി​ലും വിജയം​വ​രി​ക്കാ​നാ​വ​ശ്യ​മായ ചുമത​ലാ​ബോ​ധം അഭ്യസി​പ്പി​ക്കും.

വിദ്യാർഥി​ക​ളു​ടെ അർപ്പണ​ബോ​ധം, ഒരു സുപ്ര​ധാ​ന​ഘ​ട​കം

ആരംഭ​ത്തിൽ പരാമർശിച്ച ലതോ​യാ​യെ​പ്പറ്റി പിൻവ​രു​ന്ന​പ്ര​കാ​രം പറഞ്ഞ​പ്പോൾ മാർഗോ​പ​ദേ​ശ​ക​നായ ആർതർ കിർസൻ മികച്ച വിദ്യാ​ഭ്യാ​സ​ത്തി​നുള്ള മറ്റൊരു പ്രധാന ഘടകം ചൂണ്ടി​ക്കാ​ട്ടി: “വീട്ടിൽ നടന്ന ഏറ്റവും വലിയ സംഭവ​ങ്ങ​ളി​ലൊ​ന്നി​നു തൊട്ടു​പി​ന്നാ​ലെ​യാ​ണു ഞാനവളെ ആദ്യമാ​യി കണ്ടുമു​ട്ടു​ന്നത്‌. [തന്റെ അച്ഛനിൽനിന്ന്‌ എന്നാ​രോ​പി​ക്ക​പ്പെ​ടുന്ന ദ്രോ​ഹ​ത്താൽ] മാന്തി​ക്കീ​റിയ മുഖവു​മാ​യി ആ കുട്ടി ഇരിക്കു​ന്നു. അവൾ വേവലാ​തി​പ്പെ​ടു​ന്ന​താ​യി ഞാൻ കണ്ടിട്ടു​ള്ളത്‌ തന്റെ സ്‌കൂൾപ​ഠ​ന​ത്തെ​ക്കു​റി​ച്ചു മാത്ര​മാ​യി​രു​ന്നു.

അതേ, മികച്ച വിദ്യാ​ഭ്യാ​സ​ത്തി​നു​വേണ്ട ഒരടി​സ്ഥാ​ന​ഘ​ടകം പഠനത്തിൽ കുട്ടി​ക്കുള്ള തീവ്ര​മായ അർപ്പണ​മ​നോ​ഭാ​വ​മാണ്‌. ന്യൂ​യോർക്ക്‌ നഗരത്തി​ലുള്ള ഒരു യുവാ​വി​ന്റെ അഭി​പ്രാ​യ​മി​താ: “ഇക്കാലത്ത്‌ വിദ്യാ​ല​യ​ങ്ങ​ളിൽനി​ന്നു പ്രയോ​ജനം നേടു​ന്ന​തിന്‌ ആത്മ​പ്രേ​ര​ണ​യും അച്ചടക്ക​വും വളർത്തി​യെ​ടു​ക്കുക എന്നതു പൂർണ​മാ​യും വിദ്യാർഥി​കളെ ആശ്രയി​ച്ചാ​ണി​രി​ക്കു​ന്നത്‌.”

ഉദാഹ​ര​ണ​ത്തിന്‌, തന്റെ കുട്ടി​യു​ടെ വിദ്യാ​ഭ്യാ​സ​ത്തെ​പ്പറ്റി വ്യാകു​ല​പ്പെട്ട ഒരു മാതാ​വി​നോട്‌ അധ്യാ​പകൻ പറഞ്ഞതി​താണ്‌: “നിങ്ങൾ വിഷമി​ക്കേണ്ട ശ്രീമതി സ്‌മിത്ത്‌. ജസ്റ്റിൻ വളരെ മിടു​ക്ക​നാണ്‌. അവന്‌ അക്ഷര​ത്തെ​റ്റു​കൂ​ടാ​തെ എഴുതാൻ പഠിക്കേണ്ട ആവശ്യം വരില്ല. അതൊക്കെ ചെയ്യാൻ അവനൊ​രു സെക്ര​ട്ടറി ഉണ്ടാവും.” കുട്ടി എത്ര മിടു​ക്ക​നാ​ണെ​ങ്കി​ലും, വ്യക്തമായ രചന, വായി​ക്കാ​വുന്ന തരത്തി​ലുള്ള കൈയ​ക്ഷരം, ശരിയായ അക്ഷരവി​ന്യാ​സം എന്നിവ​യുൾപ്പടെ എഴുതാ​നും വായി​ക്കാ​നു​മുള്ള കഴിവു നേടുക എന്നതു പ്രധാ​ന​മാണ്‌.

“യാതൊ​രു പ്രസക്തി​യു​മി​ല്ലെന്നു കാണുന്ന എന്തെങ്കി​ലും പഠിക്കാൻ ആരും ഒരിക്ക​ലും ശ്രമി​ക്ക​രുത്‌” എന്നു പ്രശസ്‌ത മനഃശാ​സ്‌ത്ര​ജ്ഞ​നായ കാൾ റോ​ജേ​ഴ്‌സ്‌ തീർത്തു​പ​റ​ഞ്ഞ​പ്പോൾ ചില വിദ്യാ​ഭ്യാ​സ​വി​ദ​ഗ്‌ധർക്ക്‌ എതിർക്കാൻ കഴിഞ്ഞി​ല്ലെ​ന്നത്‌ ഉദ്വേ​ഗ​ജ​ന​ക​മായ വസ്‌തു​ത​യാണ്‌. അദ്ദേഹ​ത്തി​ന്റെ പ്രസ്‌താ​വ​ന​യിൽ എന്താണു പിശക്‌? എല്ലാവർക്കു​മ​റി​യാ​വു​ന്ന​തു​പോ​ലെ​തന്നെ, കുട്ടി​ക​ളോ​ടു പഠിക്കാൻ പറയുന്ന കാര്യ​ങ്ങൾക്ക്‌ ഭാവി​യി​ലേക്ക്‌ എന്തു മൂല്യ​മാ​ണു​ള്ള​തെന്നു മുൻകൂ​ട്ടി​ക്കാ​ണാൻ പലപ്പോ​ഴും കുട്ടിക്കു കഴിയു​ന്നില്ല. മിക്ക​പ്പോ​ഴും അതിന്റെ മൂല്യം ഭാവി​ജീ​വി​ത​ത്തി​ലെ തിരി​ച്ച​റി​യു​ന്നു​ള്ളു. വ്യക്തമാ​യും, ഇന്ന്‌, മികച്ച വിദ്യാ​ഭ്യാ​സം ലഭിക്കാൻ കുട്ടികൾ സ്വയം അർപ്പണ​മ​നോ​ഭാ​വ​മു​ള്ള​വ​രാ​യി​രി​ക്കണം!

ഒൻപതാം​ത​ര​ത്തിൽ പഠിക്കുന്ന 14-കാരി​യായ സിൻഡി അത്തരം അർപ്പണ​മ​നോ​ഭാ​വം പ്രകടി​പ്പി​ക്കുന്ന ഒരു ചെറു​പ്പ​ക്കാ​രി​യെന്ന നിലയിൽ നല്ല മാതൃ​ക​യാണ്‌. അവൾ വിശദീ​ക​രി​ച്ചു: “സ്‌കൂൾ വിട്ടു​ക​ഴി​ഞ്ഞും ഞാൻ അവിടെ നിന്ന്‌ അധ്യാ​പ​ക​രു​മാ​യി സംസാ​രിച്ച്‌ അവരെ പരിച​യ​പ്പെ​ടു​ന്നു. കുട്ടി​ക​ളിൽനിന്ന്‌ അവരെ​ന്താ​ണാ​ഗ്ര​ഹി​ക്കു​ന്ന​തെന്നു മനസ്സി​ലാ​ക്കാൻ ഞാൻ ശ്രമി​ക്കു​ന്നു.” അവൾ ക്ലാസിൽ ശ്രദ്ധി​ച്ചി​രി​ക്കു​ക​യും ഗൃഹപാ​ഠ​ങ്ങൾക്കു മുൻഗണന കൊടു​ക്കു​ക​യും ചെയ്യുന്നു. ക്ലാസുകൾ ശ്രദ്ധി​ക്കു​മ്പോ​ഴാ​യാ​ലും വായി​ക്കു​മ്പോ​ഴാ​യാ​ലും വിജയ​പ്ര​ദ​രായ വിദ്യാർഥി​കൾക്ക്‌ നല്ല കുറി​പ്പു​ക​ളെ​ടു​ക്കാൻവേണ്ടി പേനയും പെൻസി​ലും കരുതി​വ​യ്‌ക്കുന്ന ശീലമു​ണ്ടാ​യി​രി​ക്കും.

മികച്ച വിദ്യാ​ഭ്യാ​സം നേടാൻ അത്യന്താ​പേ​ക്ഷി​ത​മായ മറ്റൊരു ഘടകം മോശ​മായ കൂട്ടു​കെ​ട്ടു​കൾ ഒഴിവാ​ക്കാ​നുള്ള ദൃഢനി​ശ്ച​യ​മാണ്‌. സിൻഡി വിവരി​ക്കു​ന്നു: “മികച്ച സദാചാ​ര​മൂ​ല്യ​ങ്ങ​ളുള്ള ആരെ​യെ​ങ്കി​ലും കിട്ടാൻ വേണ്ടി ഞാനെ​പ്പോ​ഴും തിരയു​ന്നു. ഉദാഹ​ര​ണ​മാ​യി, ഇന്നയാൾ മയക്കു​മ​രു​ന്നു​പ​യോ​ഗി​ക്കു​ക​യും അവിഹിത ലൈം​ഗി​ക​ബ​ന്ധ​ങ്ങ​ളി​ലേർപ്പെ​ടു​ക​യും ചെയ്യു​ന്ന​തി​നെ​പ്പറ്റി അവർ എന്തു വിചാ​രി​ക്കു​ന്നു എന്നു ഞാനവ​രോ​ടു ചോദി​ക്കും. ‘അതി​ലെ​ന്താ​ണു തെറ്റ്‌?’ എന്നോ മറ്റോ ആണ്‌ അവരുടെ മറുപ​ടി​യെ​ങ്കിൽ അവർ സഹവസി​ക്കാൻ പറ്റിയ​വ​ര​ല്ലെന്നു ഞാൻ തിരി​ച്ച​റി​യു​ന്നു. എന്നാൽ ആരെങ്കി​ലും അത്തരം പെരു​മാ​റ്റ​ങ്ങ​ളോ​ടു തികഞ്ഞ വെറുപ്പു കാണി​ക്കു​ക​യും അവൾ വ്യത്യ​സ്‌ത​യാ​യി​രി​ക്കാ​നാ​ഗ്ര​ഹി​ക്കു​ന്നു​വെന്നു പറയു​ക​യു​മാ​ണെ​ങ്കിൽ ഉച്ചഭക്ഷ​ണ​സ​മ​യത്ത്‌ എന്നോ​ടൊ​പ്പം ഇരിക്കാൻ ഞാനവളെ തിര​ഞ്ഞെ​ടു​ക്കും.”

ഇന്ന്‌ മികച്ച വിദ്യാ​ഭ്യാ​സം ലഭിക്കു​ന്ന​തിൽ തീർച്ച​യാ​യും അനേകം വെല്ലു​വി​ളി​കൾ അടങ്ങി​യി​രി​ക്കു​ന്നു. എന്നാൽ വിദ്യാർഥി​ക​ളും രക്ഷിതാ​ക്ക​ളും അടിസ്ഥാന സംഗതി​കൾ പ്രയോ​ഗ​ത്തിൽ വരുത്തു​ക​യാ​ണെ​ങ്കിൽ അത്തരം വിദ്യാ​ഭ്യാ​സം സാധ്യ​മാണ്‌. മികച്ച വിദ്യാ​ഭ്യാ​സം നേടാൻ നിങ്ങളെ വളരെ​യ​ധി​കം സഹായി​ക്കുന്ന മറ്റൊരു ക്രമീ​ക​ര​ണ​ത്തെ​ക്കു​റിച്ച്‌ അടുത്ത​താ​യി നമുക്കു പരിചി​ന്തി​ക്കാം.

[7-ാം പേജിലെ ചതുരം]

അമിതലാളനയോ സ്‌നേ​ഹ​പൂർവ​ക​മായ ശിക്ഷണ​മോ?

കൊച്ചു​കു​ട്ടി​കളെ അമിത​മാ​യി ലാളി​ക്കു​ന്നത്‌ ആപത്താ​ണെന്നു ബൈബിൾ മുന്നറി​യി​പ്പു നൽകുന്നു. (സദൃശ​വാ​ക്യ​ങ്ങൾ 29:21) അതിനു ചേർച്ച​യിൽ അമേരി​ക്കൻ അധ്യാപക ഫെഡ​റേ​ഷന്റെ പ്രസി​ഡ​ണ്ടായ ആൽബർട്ട്‌ ശങ്കർ ഇങ്ങനെ പറഞ്ഞു: “എല്ലാകാ​ര്യ​ങ്ങ​ളും കുട്ടികൾ പറയു​ന്ന​തു​പോ​ലെ തന്നെ ചെയ്‌തു​കൊ​ടു​ക്കു​ക​യാ​ണെ​ങ്കിൽ തങ്ങൾ കുട്ടി​കൾക്കു​വേണ്ടി എല്ലാം നന്നായി ചെയ്യു​ന്നു​വെന്നു വിചാ​രി​ക്കുന്ന മാതാ​പി​താ​ക്ക​ളുണ്ട്‌. അതു തെറ്റാ​ണെന്നു നമുക്ക​റി​യാം.”

അത്തരം ലാളന തെറ്റാ​ണെന്നു കുട്ടി​ക​ളിൽപോ​ലും പലർക്കും അറിയാം. ഈ വർഷത്തി​ന്റെ തുടക്ക​ത്തിൽ ഒരു മസാച്ചു​സെ​റ്റ്‌സ്‌ പത്രം ഇങ്ങനെ റിപ്പോർട്ടു ചെയ്‌തു: “വെസ്റ്റ്‌ സ്‌പ്രി​ങ്‌ഫീൽഡി​ലെ, ആറാം​തരം മുതൽ പന്ത്രണ്ടാം​തരം വരെയുള്ള 1572 വിദ്യാർഥി​കളെ ഉൾപ്പെ​ടു​ത്തി നടത്തിയ ഒരു സർവേ​യിൽ ആ പ്രായ​ത്തി​ലുള്ള വിദ്യാർഥി​ക​ളു​ടെ​യി​ട​യി​ലെ മദ്യത്തി​ന്റെ​യും മയക്കു​മ​രു​ന്നി​ന്റെ​യും ഉപയോ​ഗ​ത്തി​നു പിന്നിൽ ഏററവും എടുത്തു​പ​റ​യ​ത്ത​ക്ക​താ​യി​ട്ടുള്ള ഒരു കാരണം സമപ്രാ​യ​ക്കാ​രിൽനി​ന്നുള്ള സമ്മർദമല്ല, മറിച്ച്‌ ‘രക്ഷിതാ​ക്ക​ളു​ടെ അനുവാ​ദാ​ത്‌മകത’യാണെന്നു കണ്ടെത്തി​യി​രി​ക്കു​ന്നു.”

അത്തരം അമിത​ലാ​ളന ലൈം​ഗിക അരാജ​ക​ത്വം എന്ന മഹാമാ​രി​ക്കു വളം​വെ​ച്ചു​കൊ​ടു​ത്തി​രി​ക്കു​ന്നു. അതേ, ശിക്ഷണം കൊടു​ക്കു​ന്ന​തിൽ പരാജ​യ​പ്പെ​ട്ടാൽ അതു കുടും​ബ​ത്തി​ന്റെ അപമാ​ന​ത്തിൽ കലാശി​ക്കു​ന്നു​വെന്നു ബൈബിൾ പറയുന്നു.—സദൃശ​വാ​ക്യ​ങ്ങൾ 29:15.

[10-ാം പേജിലെ ചതുരം]

രക്ഷിതാക്കൾക്കു ചെയ്യാൻ കഴിയു​ന്നത്‌

✔ നിങ്ങളു​ടെ കുട്ടി​യു​ടെ സ്‌കൂ​ളി​നെ​പ്പ​റ്റി​യും അതിന്റെ ലക്ഷ്യങ്ങ​ളെ​പ്പ​റ്റി​യും നിങ്ങൾ മുറു​കെ​പ്പി​ടി​ക്കുന്ന മൂല്യ​ങ്ങ​ളോ​ടും വിശ്വാ​സ​ങ്ങ​ളോ​ടും അവർക്കുള്ള മനോ​ഭാ​വ​ത്തെ​പ്പ​റ്റി​യും അറിയുക.

✔ നിങ്ങളു​ടെ കുട്ടി​യു​ടെ അധ്യാ​പ​ക​രു​മാ​യി പരിച​യ​പ്പെട്ട്‌ അവരു​മാ​യി പ്രയോ​ജ​ന​ക​ര​മായ ഒരു നല്ല ബന്ധം വളർത്തി​യെ​ടു​ക്കാൻ ശ്രമി​ക്കുക.

✔ നിങ്ങളു​ടെ കുട്ടി​യു​ടെ ഗൃഹപാ​ഠ​ങ്ങ​ളിൽ ആഴമായ താത്‌പ​ര്യ​മെ​ടു​ക്കുക. അവനോ​ടൊ​പ്പം വായി​ക്കു​ന്നതു പതിവാ​ക്കുക.

✔ നിങ്ങളു​ടെ കുട്ടി ടിവി-യിൽ കാണുന്ന കാര്യ​ങ്ങ​ളെ​യും എത്രമാ​ത്രം കാണുന്നു എന്നതി​നെ​യും നിയ​ന്ത്രി​ക്കുക.

✔ നിങ്ങളു​ടെ കുട്ടി​യു​ടെ ഭക്ഷണശീ​ലങ്ങൾ നിരീ​ക്ഷി​ക്കുക. പോഷ​കാം​ശം കുറഞ്ഞ ആഹാരം കഴിക്കു​ന്നത്‌ ശ്രദ്ധ​കേ​ന്ദ്രീ​ക​രി​ക്കാ​നുള്ള അവന്റെ പ്രാപ്‌തി​യെ പ്രതി​കൂ​ല​മാ​യി ബാധി​ച്ചേ​ക്കാം.

✔ നിങ്ങളു​ടെ കുട്ടി വേണ്ടത്ര ഉറങ്ങു​ന്നു​ണ്ടെന്ന്‌ ഉറപ്പു​വ​രു​ത്തുക. ക്ഷീണി​ത​രായ കുട്ടി​കൾക്കു നന്നായി പഠിക്കാൻ കഴിയില്ല.

✔ എല്ലാനി​ല​യി​ലും മെച്ചപ്പെട്ട സുഹൃ​ത്തു​ക്കളെ തിര​ഞ്ഞെ​ടു​ക്കാൻ നിങ്ങളു​ടെ കുട്ടിയെ സഹായി​ക്കാൻ ശ്രമി​ക്കുക.

✔ കുട്ടി​യു​ടെ ഉത്തമ സുഹൃ​ത്താ​യി​രി​ക്കുക. അവനു ലഭിക്കാ​വുന്ന, പക്വത​യുള്ള എല്ലാ സുഹൃ​ത്തു​ക്ക​ളു​ടെ​യും ആവശ്യം അവനുണ്ട്‌.

കുട്ടികൾക്കു ചെയ്യാൻ കഴിയു​ന്നത്‌

✔ നിങ്ങളു​ടെ മാതാ​പി​താ​ക്ക​ളു​ടെ സഹായ​ത്തോ​ടെ വിദ്യാ​ഭ്യാ​സ​പ​ര​മായ ലക്ഷ്യങ്ങൾക്കും അവ നേടി​യെ​ടു​ക്കാ​നുള്ള മാർഗ​ങ്ങൾക്കും വ്യക്തമായ രൂപം നൽകുക. ആ ലക്ഷ്യങ്ങ​ളെ​പ്പറ്റി നിങ്ങളു​ടെ അധ്യാ​പ​ക​രു​മാ​യി സംസാ​രി​ക്കുക.

✔ അധ്യാ​പ​ക​രു​ടെ​യും രക്ഷിതാ​ക്ക​ളു​ടെ​യും സഹായ​ത്തോ​ടെ നിങ്ങളു​ടെ പാഠ്യ​വി​ഷ​യങ്ങൾ ശ്രദ്ധാ​പൂർവം തിര​ഞ്ഞെ​ടു​ക്കുക. ഐശ്ചി​ക​കോ​ഴ്‌സു​കൾ പൊതു​വേ എളുപ്പ​മു​ള്ള​വ​യാ​ണെ​ങ്കി​ലും ഏറ്റവും മെച്ച​പ്പെ​ട്ട​വയല്ല.

✔ അധ്യാ​പ​ക​രു​മാ​യി ഒരു നല്ലബന്ധം വളർത്തി​യെ​ടു​ക്കാൻ ശ്രമി​ക്കുക. അവർ നിങ്ങളിൽനിന്ന്‌ എന്തു പ്രതീ​ക്ഷി​ക്കു​ന്നു എന്നു മനസ്സി​ലാ​ക്കുക. നിങ്ങളു​ടെ പുരോ​ഗ​തി​യെ​പ്പ​റ്റി​യും പ്രശ്‌ന​ങ്ങ​ളെ​പ്പ​റ്റി​യും അവരോ​ടു സംസാ​രി​ക്കുക.

✔ ക്ലാസിൽ നന്നായി ശ്രദ്ധി​ക്കുക. ശിഥി​ലീ​ക​ര​ണ​പ്ര​വ​ണ​ത​ക​ളി​ലേക്കു ചായരുത്‌.

✔ സുഹൃ​ത്തു​ക്കളെ ബുദ്ധി​പൂർവം തിര​ഞ്ഞെ​ടു​ക്കുക. അവർക്ക്‌ സ്‌കൂ​ളി​ലെ നിങ്ങളു​ടെ പുരോ​ഗ​തി​യെ സഹായി​ക്കാ​നോ തടസ്സ​പ്പെ​ടു​ത്താ​നോ കഴിയും.

✔ നിങ്ങളു​ടെ ഗൃഹപാ​ഠ​വും മറ്റു നിയമ​ന​ങ്ങ​ളും നിങ്ങൾക്കു ചെയ്യാ​വു​ന്ന​തി​ന്റെ പരമാ​വധി നന്നായി ചെയ്യുക. നിങ്ങളു​ടെ സമയം അവയ്‌ക്കു​വേണ്ടി പ്രയോ​ജ​ന​ക​ര​മായ രീതി​യിൽ ഉപയോ​ഗി​ക്കുക. സഹായം ആവശ്യ​മെ​ങ്കിൽ രക്ഷിതാ​ക്ക​ളോ​ടോ പക്വത​യുള്ള മറ്റു മുതിർന്ന​വ​രോ​ടോ ചോദി​ക്കുക.

[8-ാം പേജിലെ ചിത്രം]

നിങ്ങളുടെ കുട്ടി​യെ​ക്കു​റിച്ച്‌ ഒരധ്യാ​പ​കനു പരാതി​ക​ളു​ണ്ടെ​ങ്കിൽ ആദര​വോ​ടെ അതു കേൾക്കുക

[9-ാം പേജിലെ ചിത്രം]

എല്ലാ ദിവസ​വും നിങ്ങളു​ടെ കുട്ടി​യോ​ടു സ്‌കൂ​ളി​നെ​പ്പറ്റി ചോദി​ക്കു​ക