“കാങ്കു” വിമാ​ന​ത്താ​വളം—കാണാ​മെ​ങ്കി​ലും കേൾക്കാൻ കഴിയാ​ത്തത്‌

ജപ്പാനിലെ ഉണരുക! ലേഖകൻ

ആകാശ​ത്തു​നിന്ന്‌ കൺസായി അന്താരാ​ഷ്ട്ര വിമാ​ന​ത്താ​വ​ളത്തെ സമീപി​ക്കു​മ്പോൾ ഇംഗ്ലീ​ഷിൽ “കൺസായി” എന്ന ആലേഖ​ന​മുള്ള ഒരു ദ്വീപു നിങ്ങൾക്കു കാണാം.a തീരത്തു​നിന്ന്‌ ഏതാണ്ട്‌ അഞ്ചു കിലോ​മീ​റ്റർ മാറി ഒസാകാ ഉൾക്കട​ലി​ലാണ്‌ ജപ്പാനി​ലെ ഈ ദ്വീപ്‌ സ്ഥിതി​ചെ​യ്യു​ന്നത്‌. വിമാ​ന​ത്താ​വ​ള​വും അതി​നോ​ട​നു​ബ​ന്ധി​ച്ചുള്ള മറ്റു സംവി​ധാ​ന​ങ്ങ​ളു​മ​ല്ലാ​തെ മറ്റൊ​ന്നും കാണാൻ കഴിയില്ല. വാസ്‌തവം പറഞ്ഞാൽ വിമാ​ന​ത്താ​വ​ള​ത്തി​നു വേണ്ടി പ്രത്യേ​കം നിർമി​ച്ച​താണ്‌ ഈ ദ്വീപ്‌. 1994 സെപ്‌റ്റം​ബ​റിൽ ഉദ്‌ഘാ​ട​നം​ചെയ്‌ത ഈ വിമാ​ന​ത്താ​വ​ള​ത്തിന്‌ അതിന്റെ ജപ്പാൻ നാമമായ കൺസായി കൊകൂ​സൈ കൂകോ​യു​ടെ ചുരു​ക്ക​മായ കാങ്കു എന്ന അപരനാ​മം നൽക​പ്പെട്ടു.

റോഡ്‌മാർഗ​വും റയിൽമാർഗ​വും വിമാ​ന​ത്താ​വള ദ്വീപി​ലെ​ത്തി​ച്ചേ​ര​ത്ത​ക്ക​വി​ധം, 3.75 കിലോ​മീ​റ്റർ നീളമുള്ള ഒരു എക്‌സ്‌പ്ര​സ്‌വേ പാലം വൻകര​യെ​യും ആ ദ്വീപി​നെ​യും തമ്മിൽ ബന്ധിക്കു​ന്നു. ഈ ദ്വീപിൽ കപ്പലു​കൾക്കു​വേണ്ടി തുറമു​ഖ​സൗ​ക​ര്യ​ങ്ങ​ളും ഫെറി സർവീ​സു​ക​ളും ഉണ്ട്‌. എന്നാൽ, ഒരു വിമാ​ന​ത്താ​വ​ള​ത്തി​നു​വേണ്ടി പുതിയ ഒരു ദ്വീപ്‌ ഒന്നാകെ നിർമി​ക്കു​ന്ന​തെ​ന്തി​നാണ്‌?

കേൾക്കാൻ കഴിയാത്ത ഒരു വിമാ​ന​ത്താ​വ​ളം

കൺസാ​യി​യി​ലേ​ക്കുള്ള വിനോദ സഞ്ചാരി​ക​ളു​ടെ​യും സന്ദർശ​ക​രു​ടെ​യും എണ്ണം വർധി​ക്കു​ന്ന​തു​കൊണ്ട്‌ ഒസാകാ അന്താരാ​ഷ്ട്ര​വി​മാ​ന​ത്താ​വ​ള​ത്തി​നു ചുറ്റു​മുള്ള പാർപ്പി​ട​പ്ര​ദേ​ശ​ങ്ങൾക്കു​മു​ക​ളിൽ ഇരമ്പുന്ന വിമാ​ന​ങ്ങ​ളു​ടെ എണ്ണം വർധിച്ചു. അവിടെ താമസി​ക്കുന്ന ജനങ്ങളെ ശബ്ദമലി​നീ​ക​ര​ണ​ത്തിൽനി​ന്നു രക്ഷപ്പെ​ടു​ത്താൻവേണ്ടി രാത്രി 9 മണി മുതൽ രാവിലെ 7 മണി വരെ നീളുന്ന ഒരു കർഫ്യൂ ഏർപ്പെ​ടു​ത്തി. 1974 മുതലി​ങ്ങോട്ട്‌ അന്താരാ​ഷ്ട്ര വിമാ​ന​സർവീ​സു​ക​ളു​ടെ എണ്ണം കൂട്ടാൻ അനുവാ​ദ​മി​ല്ലാ​യി​രു​ന്നു. അതു​കൊണ്ട്‌, ശബ്ദം വൻകര​യി​ലേക്കു കേൾക്കാ​തെ​തന്നെ, വർധിച്ച എണ്ണം യാത്ര​ക്കാ​രെ​യും ചരക്കു​ക​ളെ​യും കൈകാ​ര്യം ചെയ്യാൻ സാധി​ക്കുന്ന ഒരു വിമാ​ന​ത്താ​വളം ഒരത്യാ​വ​ശ്യ​മാ​യി​ത്തീർന്നു.

ശബ്ദമലി​നീ​ക​ര​ണ​മി​ല്ലാ​തെ മുഴു​സ​മ​യ​വും പ്രവർത്തി​ച്ചു​കൊ​ണ്ടി​രി​ക്കുന്ന ഒരു വിമാ​ന​ത്താ​വളം—ഈ പദ്ധതി​യു​മാ​യി ബന്ധപ്പെ​ട്ട​വർക്ക്‌ അതൊരു വലിയ വെല്ലു​വി​ളി​യാ​യി​രു​ന്നു. നിർദേ​ശി​ക്ക​പ്പെട്ട ഒരേ​യൊ​രു പരിഹാ​ര​മാർഗം ജനങ്ങൾ താമസി​ക്കു​ന്നി​ട​ത്തു​നി​ന്നു വളരെ ദൂരേ​ക്കു​മാ​റി ഒരു ദ്വീപു നിർമിച്ച്‌ അതൊരു വിമാ​ന​ത്താ​വ​ള​മാ​ക്കി മാറ്റുക എന്നതാ​യി​രു​ന്നു. തീർച്ച​യാ​യും ഒരു ഭീമൻ പദ്ധതി തന്നെ!

പുതിയ വിമാ​ന​ത്താ​വളം നിർമി​ക്കാ​നും പ്രവർത്തി​പ്പി​ക്കാ​നും​വേണ്ടി ഒരു സ്വകാര്യ കമ്പനി രൂപവ​ത്‌ക​രി​ച്ചു​കൊണ്ട്‌, 1,500 ശതകോ​ടി ഡോളർ ചെലവു​വ​രുന്ന ഈ പദ്ധതി​ക്കു​വേണ്ടി മുതൽമു​ട​ക്കി​യത്‌, ദേശീയ, പ്രാ​ദേ​ശിക ഗവണ്മെ​ന്റു​ക​ളും പ്രാ​ദേ​ശിക വ്യാപാ​ര​മേ​ഖ​ല​യും ചേർന്നാണ്‌. “ദ്വീപു നിർമി​ക്കു​ന്ന​തിന്‌ ഒരുപാ​ടു സമയം ചെലവ​ഴി​ക്കാൻ ഒരു സ്വകാര്യ കമ്പനി​യെ​ന്ന​നി​ല​യിൽ ഞങ്ങൾക്കു കഴിയില്ല. പണി ത്വരി​ത​ഗ​തി​യിൽ തീർക്കേ​ണ്ട​തുണ്ട്‌” എന്ന്‌ കൺസായി അന്താരാ​ഷ്ട്ര വിമാ​ന​ത്താ​വള കമ്പനി​യു​ടെ എക്‌സി​ക്യൂ​ട്ടീവ്‌ വൈസ്‌ പ്രസി​ഡ​ണ്ടായ ശ്രീ. കേസൂകേ കീമൂ​റൊ ഉണരുക!യോടു പറഞ്ഞു.

“ദ്വീപു നിർമി​ക്കു​ന്നു”

തീരത്തി​ന​ടു​ത്താ​യി ഭൂമി നികത്തി​യെ​ടു​ക്കുക എന്നതു തന്നെ വിഷമ​ക​ര​മാണ്‌, അപ്പോൾ പിന്നെ തീരത്തു​നിന്ന്‌ അഞ്ചു കിലോ​മീ​റ്റർ മാറി ഒരു ദ്വീപു നിർമി​ക്കു​ന്ന​തി​നെ​പ്പറ്റി പറയേ​ണ്ട​തി​ല്ല​ല്ലോ. 1,260 ഏക്കർ വിസ്‌തൃ​തി​യുള്ള ഈ വിമാ​ന​ത്താ​വള ദ്വീപു നിർമി​ക്കാൻ വേണ്ടി ഭൂമി നികത്തു​ന്ന​തിന്‌ 18 കോടി ഘനമീറ്റർ മണലും മണ്ണും ഉപയോ​ഗി​ച്ചു. “അത്‌ 73 പിരമി​ഡു​കൾക്കു തുല്യ​മാണ്‌—ഞാനു​ദ്ദേ​ശി​ക്കു​ന്നത്‌, ഖുഫു രാജാവു നിർമിച്ച, ഏറ്റവും വലിയ​വ​യേ​യാണ്‌” എന്ന്‌ ശ്രീ കീമൂ​റൊ വിവരി​ക്കു​ന്നു.

കടൽത്ത​റ​യിൽ ശരാശരി 18 മീറ്റർ ആഴത്തിൽ മൃദു​ല​മായ ഒരു കളിമൺ പാളി​യുണ്ട്‌. അതിൽനി​ന്നു വെള്ളം വറ്റിച്ചു​ക​ള​യണം. “വെള്ളം വറ്റിച്ച്‌ അടിത്തറ ഉറപ്പി​ക്കാൻവേണ്ടി 40 സെൻറീ​മീ​റ്റർ [16 ഇഞ്ച്‌] വ്യാസ​മുള്ള മണലി​റ​ക്കാ​വുന്ന പത്തുലക്ഷം തൂണുകൾ ആ പാളി​യി​ലേക്ക്‌ കുഴി​ച്ചി​റ​ക്കേ​ണ്ടി​വന്നു. നികത്താ​നു​പ​യോ​ഗിച്ച മണ്ണി​ന്റെ​യും മണലി​ന്റെ​യും ഭാരം മൂലം 20 മീറ്ററു​ണ്ടാ​യി​രുന്ന [66 അടി] മൃദു​വായ മൺപാ​ളി​യു​ടെ കനം 14 മീറ്ററാ​ക്കി [46 അടി] ചുരു​ക്കി​ക്കൊണ്ട്‌ വെള്ളം പുറന്ത​ള്ള​പ്പെട്ടു. ഞങ്ങൾ ഏറ്റവും ഭയപ്പെ​ട്ടി​രു​ന്നത്‌ അടിമണ്ണ്‌ അസന്തു​ലി​ത​മാ​യി ഇരുന്നു​പോ​യേ​ക്കു​മോ എന്നായി​രു​ന്നു. അത്‌ ഒരേ നിരപ്പി​ലാ​യി​രി​ക്ക​ത്ത​ക്ക​വി​ധം, നികത്താ​നുള്ള മണ്ണും മണലും എവി​ടെ​യാണ്‌ ഉപയോ​ഗി​ക്കേ​ണ്ട​തെന്നു കൃത്യ​മാ​യി കണക്കാ​ക്കാൻ വേണ്ടി ഞങ്ങൾ കമ്പ്യൂട്ടർ ഉപയോ​ഗി​ച്ചു” എന്ന്‌ ഭൂമി​നി​കത്തൽ പദ്ധതിക്കു മേൽനോ​ട്ടം വഹിച്ച ശ്രീ. കെനീ​ച്ചീ​റോ മീനാമീ വിവരി​ക്കു​ന്നു.

ആകെക്കൂ​ടി നികത്തിയ ഭൂമി​യു​ടെ ആഴം നോക്കി​യാൽ 33 മീറ്റ​റോ​ള​മുണ്ട്‌, അതായത്‌ ഒരു പത്തുനി​ല​ക്കെ​ട്ടി​ട​ത്തി​നു തുല്യം. എന്നാൽ നികത്താ​നു​പ​യോ​ഗിച്ച മണ്ണി​ന്റെ​യും മണലി​ന്റെ​യും ഭാരം മൂലം കടൽത്തറ താണു, ഇപ്പോ​ഴും താണു​കൊ​ണ്ടി​രി​ക്കു​ക​യാണ്‌. 50 വർഷത്തി​നു​ള്ളിൽ കടൽത്തറ 1.5 മീറ്റർ കൂടി താഴു​മെന്നു കണക്കാ​ക്ക​പ്പെ​ടു​ന്നു. അപ്പോൾ ദ്വീപി​ന്റെ ഉയരം സമു​ദ്ര​നി​ര​പ്പിൽനി​ന്നു നാലു മീറ്ററാ​യി​രി​ക്കും.

1991-ൽ, മുഴു ദ്വീപും പണിതു​ണ്ടാ​ക്കു​ന്ന​തി​നു​മു​മ്പു​തന്നെ യാത്ര​ക്കാർക്കു വന്നു​ചേ​രാ​നും പുറ​പ്പെ​ടാ​നു​മുള്ള കെട്ടി​ട​ത്തി​ന്റെ​യും (പാസഞ്ചർ ടെർമി​നൽ ബിൽഡിങ്‌) കൺ​ട്രോൾ ടവറി​ന്റെ​യും പണി തുടങ്ങി. ഏഴു വർഷത്തി​ല​ധി​കം നീണ്ടു​നിന്ന അശ്രാ​ന്ത​പ​രി​ശ്ര​മ​ത്തി​ന്റെ ഫലമായി ദ്വീപി​ന്റെ​യും വിമാ​ന​ത്താ​വ​ള​ത്തി​ന്റെ​യും അവയോ​ട​നു​ബ​ന്ധി​ച്ചു വേണ്ട മറ്റു സൗകര്യ​ങ്ങ​ളു​ടെ​യും നിർമാ​ണം പൂർത്തി​യാ​യി.

അതിബൃ​ഹ​ത്തെ​ങ്കി​ലും അവിക​ല​മാ​യത്‌

വിമാ​ന​ത്തിൽ വരുന്ന യാത്ര​ക്കാ​രെ ഒരു രസകര​മായ വിസ്‌മ​യ​മാണ്‌ എതി​രേൽക്കു​ന്നത്‌. ഐക്യ​നാ​ടു​ക​ളിൽനി​ന്നുള്ള ഒരു യാത്ര​ക്കാ​രൻ പറയുന്നു: “ഞങ്ങൾ ബാഗേജ്‌ എടുക്കാ​നുള്ള സ്ഥലത്തെ​ത്തി​യ​പ്പോ​ഴേക്ക്‌, ഞങ്ങളുടെ സ്യൂട്ട്‌കേ​സു​കൾ അവി​ടെ​യു​ണ്ടാ​യി​രു​ന്നു.” ഇത്രയും ഭംഗി​യാ​യി കാര്യങ്ങൾ നടക്കു​ന്ന​തി​നു പിന്നിലെ രഹസ്യ​മെ​ന്താണ്‌? “പാസഞ്ചർ ടെർമി​നൽ ബിൽഡിങ്‌ അതിബൃ​ഹ​ത്താ​യ​താ​ണെ​ങ്കി​ലും അവിക​ല​മാണ്‌. എല്ലാ അന്താരാ​ഷ്ട്ര​വി​മാ​ന​ത്താ​വ​ള​ങ്ങ​ളി​ലെ​യും പോലെ യാത്ര​ക്കാർക്കു നൂറു​നൂറ്‌ ഇടനാ​ഴി​ക​ളിൽ കൂടി കയറി​യി​റ​ങ്ങേണ്ട” എന്ന്‌ ആ കെട്ടി​ട​ത്തി​ന്റെ മേൽനോ​ട്ടം വഹിക്കുന്ന ശ്രീ. കാസൂ​ഹി​തോ ആറൊ​വോ പറയുന്നു.

പാസഞ്ചർ ടെർമി​നൽ ബിൽഡിം​ഗി​ന്റെ ഘടന ലളിത​മാ​ണെ​ങ്കി​ലും അനുപ​മ​മാണ്‌. പ്രധാ​ന​കെ​ട്ടി​ടം രൂപക​ല്‌പന ചെയ്യ​പ്പെ​ട്ടി​രി​ക്കു​ന്നത്‌ യാത്ര​ക്കാർ അനാവ​ശ്യ​മാ​യി അങ്ങോ​ട്ടു​മി​ങ്ങോ​ട്ടും നടക്കു​ന്നത്‌ ഒഴിവാ​ക്ക​ത്ത​ക്ക​വി​ധ​മാണ്‌. രാജ്യ​ത്തി​നു​ള്ളിൽ മാത്രം യാത്ര ചെയ്യുന്ന യാത്ര​ക്കാർക്ക്‌ തീവണ്ടി സ്റ്റേഷനിൽനി​ന്നു നേരെ വിമാ​ന​ത്താ​വ​ള​ത്തി​ലെ ടിക്കറ്റു കാണി​ക്കു​ക​യും ലഗേജു​കൾ കൊടു​ക്കു​ക​യും ചെയ്യുന്ന സ്ഥലത്തേക്ക്‌ (ചെക്ക്‌ ഇൻ കൗണ്ടർ) പ്രവേ​ശി​ക്കാം. അവി​ടെ​നിന്ന്‌ നടക​ളൊ​ന്നും കയറി​യി​റ​ങ്ങാ​തെ ബോർഡിങ്‌ ഗേറ്റി​ലേക്കു പോകാം.

ചെക്ക്‌ ഇൻ കൗണ്ടറു​കൾ, ഇമി​ഗ്രേഷൻ ഓഫീ​സു​കൾ, കസ്റ്റംസ്‌ എന്നിവ സ്ഥിതി​ചെ​യ്യുന്ന മുഖ്യ​കെ​ട്ടി​ട​ത്തിൽനി​ന്നു വടക്കോ​ട്ടും തെക്കോ​ട്ടും 700 മീറ്റർ വീതം നീണ്ടു കിടക്കുന്ന രണ്ടു കെട്ടി​ടങ്ങൾ 33 ബോർഡിങ്‌ ഗേറ്റു​ക​ളി​ലേക്കു നീളുന്നു. മുഖ്യ​കെ​ട്ടി​ട​ത്തി​ലേ​ത​ല്ലാത്ത ഗേറ്റുകൾ ഉപയോ​ഗി​ക്കുന്ന യാത്ര​ക്കാർക്ക്‌ വിങ്‌ ഷട്ടിൽ എന്ന പേരിൽ അറിയ​പ്പെ​ടുന്ന സ്വയം പ്രവർത്തി​ക്കു​ന്ന​തും പ്രത്യേ​കം സജ്ജീക​രിച്ച പാതക​ളിൽക്കൂ​ടി സഞ്ചരി​ക്കു​ന്ന​തു​മായ വാഹന സംവി​ധാ​നം ഉപയോ​ഗി​ക്കാം. അത്‌ അഞ്ചു മിനി​റ്റി​നു​ള്ളിൽ യാത്ര​ക്കാ​രെ അവർക്കെ​ത്തേണ്ട ഗേറ്റി​ലെ​ത്തി​ക്കും—ഷട്ടിലി​നു വേണ്ടി കാത്തു​നിൽക്കുന്ന സമയമുൾപ്പെ​ടെ​യാ​ണിത്‌.

കാണേണ്ട വിമാ​ന​ത്താ​വ​ളം

“പൂർണ​മാ​യും കടലിൽ സ്ഥിതി​ചെ​യ്യുന്ന ഒരു വിമാ​ന​ത്താ​വ​ള​മാ​യ​തു​കൊണ്ട്‌ അത്‌ എല്ലാ പ്രതി​ബ​ന്ധ​ങ്ങ​ളിൽ നിന്നും സ്വത​ന്ത്ര​മാണ്‌” എന്ന്‌ ശ്രീ. ആറൊ​വോ പറയുന്നു. “അതെ, വിമാനം നിലത്തി​റ​ക്കാൻ വളരെ എളുപ്പ​മുള്ള ഒരു വിമാ​ന​ത്താ​വ​ള​മാ​ണി​തെന്നു പൈല​റ്റു​മാർ പറയു​ന്നതു ഞങ്ങൾ കേൾക്കാ​റുണ്ട്‌” എന്നു പറഞ്ഞു​കൊണ്ട്‌ ശ്രീ. കീമൂ​റൊ അതിനെ അനുകൂ​ലി​ക്കു​ന്നു.

മറ്റു പലരും അതിന്റെ മനോ​ഹാ​രി​തയെ വിലമ​തി​ക്കു​ന്നു. വിമാ​ന​ത്തി​ന്റെ ചിറകു​ക​ളു​ടെ ആകൃതി​യി​ലുള്ള ടെർമി​നൽ ബിൽഡിം​ഗി​ന്റെ സമ്മി​ശ്ര​ഘടന കാങ്കു​വി​ലേക്കു നിരവധി ടൂറി​സ്റ്റു​കളെ ആകർഷി​ച്ചി​ട്ടുണ്ട്‌. കൂടാതെ, അസാധാ​ര​ണ​മായ ഈ ദ്വീപ​വി​മാ​ന​ത്താ​വ​ള​ത്തിൽനി​ന്നു വിമാ​നങ്ങൾ പറന്നു​പൊ​ങ്ങു​ന്ന​തും അവി​ടേക്കു പറന്നി​റ​ങ്ങു​ന്ന​തും കാണു​ന്നത്‌ അവർ ആസ്വദി​ക്കു​ന്നു. ഞങ്ങൾ “ആദ്യം ഉദ്ദേശി​ച്ചി​രു​ന്ന​ത​ല്ലെ​ങ്കി​ലും വിമാ​ന​ത്താ​വളം കാണാ​നെ​ത്തുന്ന വിനോ​ദ​സ​ഞ്ചാ​രി​കൾക്കാ​യി ഞങ്ങൾക്കു കേടു​പോ​ക്കൽ കേന്ദ്ര​ത്തി​ന്റെ മുകളിൽ ഒരു നിരീക്ഷണ ഡക്ക്‌ പണി​യേ​ണ്ട​താ​യി വന്നു” എന്ന്‌ ശ്രീ. കീമു​റൊ പറയുന്നു. ഒരു ദിവസം ശരാശരി 30,000 പേർ വിമാ​ന​ത്താ​വളം കാണാൻവേണ്ടി മാത്രം അവിടം സന്ദർശി​ക്കു​ന്നുണ്ട്‌.

നിങ്ങൾ ജപ്പാനിൽ, കൺസായി പ്രദേ​ശ​ത്തി​ന്റെ സമീപ​ത്തെ​വി​ടെ​യെ​ങ്കി​ലും സന്ദർശനം നടത്തു​ക​യാ​ണെ​ങ്കിൽ അയൽവാ​സി​കൾക്കു കാണാൻ കഴിയുന്ന എന്നാൽ കേൾക്കാൻ കഴിയാത്ത വിമാ​ന​ത്താ​വ​ള​മായ കാങ്കു​വി​ലേ​ക്കോ കാങ്കു​വിൽനി​ന്നോ ഒരു വിമാ​ന​യാ​ത്ര നടത്തി​നോ​ക്ക​രു​തോ.

[അടിക്കു​റിപ്പ്‌]

[25-ാം പേജിലെ ചിത്ര​ത്തിന്‌ കടപ്പാട്‌]

Kansai International Airport Co., Ltd.