യുവജ​നങ്ങൾ ചോദി​ക്കു​ന്നു . . .

എനിക്കു പഠിക്കാൻ കഴിയാ​ത്ത​തെ​ന്തു​കൊണ്ട്‌?

“വീട്ടിൽവന്നു മാതാ​പി​താ​ക്കളെ അഭിമു​ഖീ​ക​രി​ക്കാൻ ഞാൻ ആഗ്രഹി​ച്ചില്ല. ഞാൻ വീണ്ടും പല വിഷയ​ങ്ങ​ളിൽ തോറ്റു​പോ​യി​രു​ന്നു” എന്ന്‌ ജെസ്സിക്ക സ്‌മരി​ക്കു​ന്നു.a 15 വയസ്സുള്ള ജെസ്സിക്ക ബുദ്ധി​മ​തി​യും സുന്ദരി​യു​മാണ്‌. എന്നാൽ പല യുവജ​ന​ങ്ങ​ളെ​യും​പോ​ലെ ജയിക്കാ​നുള്ള ഗ്രേഡു നിലനിർത്താൻ അവൾക്കു ബുദ്ധി​മു​ട്ടാണ്‌.

സ്‌കൂ​ളി​ലെ മോശ​മായ നിലവാ​രം പലപ്പോ​ഴും വിദ്യാ​ഭ്യാ​സ​ത്തോ​ടോ ഒരുവന്റെ അധ്യാ​പ​ക​നോ​ടോ ഉള്ള ഉദാസീന മനോ​ഭാ​വ​ത്തി​ന്റെ ഫലമാണ്‌. എന്നാൽ ജെസ്സി​ക്ക​യു​ടെ കാര്യ​ത്തിൽ അതല്ല സംഗതി. ദുർഗ്ര​ഹ​മായ ആശയങ്ങൾ മനസ്സി​ലാ​ക്കാൻ അവൾക്കു വളരെ പ്രയാ​സ​മാ​ണെ​ന്നേ​യു​ള്ളൂ. ഇതുനി​മി​ത്തം സ്വാഭാ​വി​ക​മാ​യും കണക്കിൽ ജയിക്കാൻ ജെസ്സി​ക്ക​യ്‌ക്കു ബുദ്ധി​മു​ട്ടാ​യി​രു​ന്നു. വായി​ക്കാ​നുള്ള ബുദ്ധി​മു​ട്ടു കാരണം അവൾക്കു മറ്റു വിഷയ​ങ്ങ​ളി​ലും മികവു കാട്ടാൻ കഴിഞ്ഞില്ല.

അതേസ​മ​യം മരിയ​യ​യു​ടെ പ്രശ്‌നം അക്ഷര​ത്തെ​റ്റു​കൂ​ടാ​തെ എഴുതാൻ കഴിയു​ന്നില്ല എന്നതാണ്‌. അക്ഷര​ത്തെ​റ്റു​ക​ളെ​ക്കു​റി​ച്ചുള്ള ജാള്യം നിമിത്തം, ക്രിസ്‌തീയ യോഗ​ങ്ങ​ളിൽവെച്ച്‌ എഴുതി​യെ​ടു​ക്കുന്ന കുറി​പ്പു​കൾ അവൾ എല്ലായ്‌പോ​ഴും മറച്ചു​പി​ടി​ക്കു​ന്നു. എന്നിരു​ന്നാ​ലും, ജെസ്സി​ക്ക​യോ മരിയ​യോ ബുദ്ധി​യി​ല്ലാ​ത്ത​വരല്ല. ജെസ്സിക്ക ആളുക​ളോ​ടു നന്നായി പെരു​മാ​റു​ന്ന​വ​ളാണ്‌, അതു​കൊണ്ട്‌ അവളുടെ സഹപാ​ഠി​ക​ളു​ടെ​യി​ട​യിൽ പ്രശ്‌നങ്ങൾ ഉണ്ടാകു​മ്പോൾ മധ്യസ്ഥ​യോ പ്രശ്‌ന പരിഹാ​ര​ക​യോ ആയി സേവി​ക്കു​ന്ന​തി​നു സ്‌കൂൾ അവളെ നിയമി​ച്ചി​രി​ക്കു​ന്നു. പഠനകാ​ര്യ​ത്തിൽ മരിയ അവളുടെ ക്ലാസ്സിലെ ഏറ്റവും ഉയർന്ന മാർക്കുള്ള 10 ശതമാനം കുട്ടി​ക​ളിൽ പെടുന്നു.

ജെസ്സി​ക്ക​യ്‌ക്കും മരിയ​യ്‌ക്കും പഠന തകരാ​റു​കൾ ഉണ്ടെന്നു​ള്ള​താ​ണു പ്രശ്‌നം. മൊത്തം കുട്ടി​ക​ളിൽ ഏതാണ്ട്‌ 3 മുതൽ 10 വരെ ശതമാ​ന​ത്തി​നു പഠനത്തിൽ സമാന​മായ വൈഷ​മ്യ​ങ്ങൾ ഉണ്ടായി​രു​ന്നേ​ക്കാ​മെന്നു വിദഗ്‌ധർ വിശ്വ​സി​ക്കു​ന്നു. 20-കളുടെ തുടക്ക​ത്തി​ലാ​യി​രി​ക്കുന്ന ടാനി​യ​യ്‌ക്ക്‌, ശ്രദ്ധക്കു​റവ്‌ അമിത ചുറു​ചു​റുക്ക്‌ ക്രമ​ക്കേട്‌ (എഡിഎ​ച്ച്‌ഡി) എന്ന പ്രശ്‌ന​മുണ്ട്‌.b അവൾ ഇപ്രകാ​രം പറയുന്നു: “ശ്രദ്ധി​ക്കാ​നോ അനങ്ങാ​തെ​യി​രി​ക്കാ​നോ​പോ​ലും എനിക്കു കഴിയാ​ത്ത​തു​കൊ​ണ്ടു ക്രിസ്‌തീയ യോഗ​ങ്ങ​ളിൽ പങ്കെടു​ക്കാ​നും വ്യക്തി​പ​ര​മായ പഠനം നടത്താ​നും പ്രാർഥി​ക്കാ​നും എനിക്കു പ്രയാസം നേരി​ടു​ന്നു. ഇതുമൂ​ലം എന്റെ ശുശ്രൂ​ഷ​യും ബാധി​ക്ക​പ്പെ​ടു​ന്നു. കാരണം ആർക്കും എന്റെ ഒപ്പം എത്താൻ കഴിയാ​ത്ത​വി​ധം ഞാൻ ഒരു വിഷയ​ത്തിൽനി​ന്നു മറ്റൊരു വിഷയ​ത്തി​ലേക്കു പെട്ടെന്നു പോകു​ന്നു.”

അമിത ചുറു​ചു​റുക്ക്‌ ഇല്ലാത്ത​പ്പോൾ ഈ തകരാറ്‌, ശ്രദ്ധക്കു​റവ്‌ ക്രമ​ക്കേട്‌ (എഡിഡി) എന്നറി​യ​പ്പെ​ടു​ന്നു. ഈ തകരാ​റു​ള്ളവർ പലപ്പോ​ഴും ദിവാ​സ്വ​പ്‌ന​ദർശി​ക​ളാ​യി വർണി​ക്ക​പ്പെ​ട്ടി​രി​ക്കു​ന്നു. എഡിഡി ഉള്ളവ​രെ​ക്കു​റിച്ച്‌ നാഡീ​വി​ദ​ഗ്‌ധ​നായ ഡോ. ബ്രൂസ്‌ റോസ്‌മൻ ഇപ്രകാ​രം പറഞ്ഞു: “അവർ ഒരു പുസ്‌ത​ക​ത്തി​ന്റെ മുമ്പിൽ 45 മിനി​റ്റു​നേരം ഇരിക്കു​ന്നു, ഒന്നും പഠിക്കു​ന്നില്ല.” ഏതോ കാരണ​ത്താൽ അവർക്കു ശ്രദ്ധ കേന്ദ്രീ​ക​രി​ക്കാൻ ബുദ്ധി​മു​ട്ട​നു​ഭ​വ​പ്പെ​ടു​ന്നു.

ഈ പ്രശ്‌ന​ങ്ങൾക്ക്‌ ഇടയാ​ക്കു​ന്ന​തെ​ന്താ​ണെന്നു തങ്ങൾ അടുത്ത​യി​ടെ മനസ്സി​ലാ​ക്കാൻ തുടങ്ങി​യി​രി​ക്കു​ന്ന​താ​യി വൈദ്യ ഗവേഷകർ വിശ്വ​സി​ക്കു​ന്നു. എങ്കിലും, ഇപ്പോ​ഴും വളരെ കാര്യങ്ങൾ അജ്ഞാത​മാണ്‌. പഠനത്തി​നു തടസ്സമാ​കുന്ന വ്യത്യസ്‌ത തകരാ​റു​കൾക്കും വൈക​ല്യ​ങ്ങൾക്കും ഇടയ്‌ക്കുള്ള അതിർവ​ര​മ്പു​കൾ എപ്പോ​ഴും വ്യക്തമല്ല. ഒരു പ്രത്യേക തകരാ​റി​ന്റെ കൃത്യ​മായ കാരണ​മോ അതിനു നൽകി​യി​രി​ക്കുന്ന പേരോ എന്തായി​രു​ന്നാ​ലും—അതു വായി​ക്കു​ന്ന​തോ ഓർമി​ക്കു​ന്ന​തോ ശ്രദ്ധി​ക്കു​ന്ന​തോ അമിത​ചു​റു​ചു​റു​ക്കു​ള്ള​വ​രാ​യി​രി​ക്കു​ന്ന​തോ ആയി ബന്ധപ്പെട്ട പ്രശ്‌ന​മാ​ണെ​ങ്കി​ലും—ആ തകരാ​റിന്‌ ഒരു വ്യക്തി​യു​ടെ വിദ്യാ​ഭ്യാ​സ​ത്തി​നു തടസ്സം സൃഷ്ടി​ക്കാ​നും വളരെ​യ​ധി​കം ദുരി​ത​മു​ള​വാ​ക്കാ​നും കഴിയും. നിങ്ങൾക്ക്‌ ഒരു പഠന വൈക​ല്യ​മു​ണ്ടെ​ങ്കിൽ അതെങ്ങനെ തരണം ചെയ്യാൻ കഴിയും?

തരണം ചെയ്യു​ന്ന​തി​ന്റെ വെല്ലു​വി​ളി

തുടക്ക​ത്തിൽ പരാമർശിച്ച ജെസ്സി​ക്ക​യു​ടെ കാര്യം പരിചി​ന്തി​ക്കുക. തന്റെ വായനാ​വൈ​ക​ല്യം തരണം ചെയ്യാൻ തീരു​മാ​നി​ച്ചു​റച്ച അവൾ വ്യത്യസ്‌ത പുസ്‌ത​കങ്ങൾ വായി​ക്കാൻ ശ്രമം നടത്തി​ക്കൊ​ണ്ടേ​യി​രു​ന്നു. അവൾക്കു വളരെ ആകർഷ​ക​മാ​യി തോന്നിയ കവിത​ക​ള​ട​ങ്ങിയ ഒരു പുസ്‌തകം കണ്ടെത്തി​യ​തോ​ടെ​യാ​യി​രു​ന്നു വഴിത്തി​രി​വു സംഭവി​ച്ചത്‌. അവൾ സമാന​മായ മറ്റൊരു പുസ്‌തകം വാങ്ങി. അതിന്റെ വായന​യും അവൾ ആസ്വദി​ച്ചു. പിന്നീട്‌ ഒരു കൂട്ടം കഥാ പുസ്‌ത​ക​ങ്ങ​ളിൽ അവൾ താത്‌പ​ര്യം കണ്ടെത്തി. അങ്ങനെ ക്രമേണ വായന അത്ര വലിയ പ്രശ്‌ന​മ​ല്ലാ​താ​യി​ത്തീർന്നു. ഇതിൽനി​ന്നു പഠിക്കാ​നുള്ള പാഠം സ്ഥിരോ​ത്സാ​ഹ​ത്തി​നു പ്രതി​ഫലം ലഭിക്കു​ന്നു​വെ​ന്ന​താണ്‌. ശ്രമം ഉപേക്ഷി​ക്കാ​തി​രി​ക്കു​ന്ന​തു​വഴി നിങ്ങൾക്കും പഠന വൈക​ല്യ​ത്തെ തരണം ചെയ്യാൻ, അല്ലെങ്കിൽ കുറഞ്ഞത്‌ ആ ദിശയിൽ വലിയ പുരോ​ഗതി കൈവ​രി​ക്കാൻ കഴിയും.—ഗലാത്യർ 6:9 താരത​മ്യം ചെയ്യുക.

പെട്ടെ​ന്നു​ള്ള മറവി​പ്ര​ശ്‌നം കൈകാ​ര്യം ചെയ്യു​ന്നതു സംബന്ധി​ച്ചെന്ത്‌? ഈ പ്രശ്‌നം പരിഹ​രി​ക്കാ​നുള്ള ഒരു പ്രധാന താക്കോൽ ഈ പഴമൊ​ഴി​യി​ലുണ്ട്‌: “ആവർത്ത​ന​മാണ്‌ ഓർമ​യു​ടെ മാതാവ്‌.” താൻ കേട്ടതും വായി​ച്ച​തു​മായ സംഗതി​കൾ സ്വയം ആവർത്തിച്ച്‌ ഉച്ചരി​ച്ചതു കാര്യങ്ങൾ ഓർമി​ക്കാൻ തന്നെ സഹായി​ച്ച​താ​യി നിക്കി കണ്ടെത്തി. അതു പരീക്ഷി​ച്ചു​നോ​ക്കുക. നിങ്ങൾക്കും അതു സഹായ​ക​മാ​യേ​ക്കാം. ബൈബിൾ കാലങ്ങ​ളിൽ ആളുകൾ സ്വയം വായി​ക്കു​മ്പോൾപ്പോ​ലും വാക്കുകൾ ഉച്ചരി​ച്ചി​രു​ന്നു എന്നതു ശ്രദ്ധേ​യ​മാണ്‌. “[ദൈവ​ത്തി​ന്റെ ന്യായ​പ്ര​മാ​ണം] നീ രാവും പകലും ഒരു മന്ദസ്വ​ര​ത്തിൽ വായി​ക്കണം” എന്ന്‌ യഹോവ ബൈബിൾ എഴുത്തു​കാ​ര​നായ യോശു​വ​യോ​ടു കൽപ്പിച്ചു. (യോശുവ 1:8, NW; സങ്കീർത്തനം 1:2) വാക്കുകൾ ഉച്ചരി​ക്കു​ന്നത്‌ ഇത്ര പ്രധാ​ന​മാ​യി​രു​ന്ന​തെ​ന്തു​കൊണ്ട്‌? എന്തു​കൊ​ണ്ടെ​ന്നാൽ അങ്ങനെ ചെയ്യു​മ്പോൾ രണ്ട്‌ ഇന്ദ്രി​യങ്ങൾ—ശ്രവണ​വും കാഴ്‌ച​യും—പ്രവർത്ത​നാ​ത്മ​ക​മാ​കു​ക​യും കാര്യങ്ങൾ വായന​ക്കാ​രന്റെ മനസ്സിൽ കൂടുതൽ ആഴത്തിൽ പതിയാൻ സഹായി​ക്കു​ക​യും ചെയ്‌തു.

ജെസ്സി​ക്ക​യ്‌ക്ക്‌ കണക്കു പഠിക്കു​ന്ന​തും ഒരു ഭഗീര​ഥ​പ്ര​യ​ത്‌ന​മാ​യി​രു​ന്നു. എന്നാൽ, അവൾ കണക്കിലെ നിയമങ്ങൾ ആവർത്തി​ച്ചാ​വർത്തി​ച്ചു പഠിച്ചു​നോ​ക്കി—ചില​പ്പോൾ ഓരോ​ന്നി​നും അര മണിക്കൂർ വീതം അവൾ ചെലവ​ഴി​ച്ചു. അവളുടെ ശ്രമങ്ങൾക്ക്‌ ഒടുവിൽ ഫലമു​ണ്ടാ​യി. അതു​കൊണ്ട്‌ ആവർത്തി​ക്കുക, ആവർത്തി​ക്കുക, ആവർത്തി​ക്കുക! ക്ലാസ്സിൽ ശ്രദ്ധി​ക്കു​മ്പോ​ഴോ വായി​ക്കു​മ്പോ​ഴോ നിങ്ങൾക്കു കുറി​പ്പു​കൾ എഴുതി​യെ​ടു​ക്ക​ത്ത​ക്ക​വണ്ണം കടലാ​സും പെൻസി​ലും എടുക്കാ​വുന്ന വിധത്തിൽ വയ്‌ക്കു​ന്ന​താ​ണു ജ്ഞാനപൂർവ​ക​മായ ഒരു നടപടി.

പഠനത്തി​നാ​യി നിങ്ങ​ളെ​ത്തന്നെ അർപ്പി​ക്കു​ന്നതു മർമ​പ്ര​ധാ​ന​മാണ്‌. സ്‌കൂൾ വിട്ടതി​നു​ശേഷം തങ്ങുന്ന​തും നിങ്ങളു​ടെ അധ്യാ​പ​ക​രോ​ടു സംസാ​രി​ക്കു​ന്ന​തും ഒരു ശീലമാ​ക്കുക. അവരെ അറിയുക. നിങ്ങൾക്കു പഠന കാര്യ​ത്തിൽ പ്രശ്‌ന​മു​ണ്ടെ​ന്നും അതു തരണം ചെയ്യാൻ തീരു​മാ​നി​ച്ചി​രി​ക്കു​ക​യാ​ണെ​ന്നും അവരോ​ടു പറയുക. മിക്ക അധ്യാ​പ​ക​രും സഹായി​ക്കാൻ വളരെ താത്‌പ​ര്യ​മു​ള്ള​വ​രാ​യി​രി​ക്കും. അതു​കൊണ്ട്‌ അവരുടെ സഹായം ഉൾപ്പെ​ടു​ത്തുക. ജെസ്സിക്ക അതു ചെയ്യു​ക​യും അവൾക്ക്‌ അനുക​മ്പ​യുള്ള ഒരു അധ്യാ​പ​ക​നിൽനിന്ന്‌ ആവശ്യ​മായ വളരെ​യ​ധി​കം സഹായം ലഭിക്കു​ക​യും ചെയ്‌തു.

ശ്രദ്ധ കേന്ദ്രീ​ക​രി​ക്കാൻ പഠിക്കുക

നിങ്ങൾക്കു​വേണ്ടി ഒരു ലക്ഷ്യവും പ്രതിഫല വ്യവസ്ഥ​യും വെക്കു​ന്ന​തും സഹായ​ക​മാണ്‌. ടെലി​വി​ഷ​നോ നിങ്ങൾക്കി​ഷ്ട​പ്പെട്ട സംഗീ​ത​മോ ഓൺചെ​യ്യു​ന്ന​തി​നു​മുമ്പ്‌, ഒരു നിർദിഷ്ട ലക്ഷ്യം—ഗൃഹപാ​ഠ​ത്തി​ന്റെ ഒരു ഭാഗം ചെയ്‌തു​തീർക്കു​ന്ന​തു​പോ​ലെ​യുള്ള ഒന്ന്‌—വയ്‌ക്കു​ന്നതു ശ്രദ്ധി​ക്കാൻ നിങ്ങളെ പ്രേരി​പ്പി​ച്ചേ​ക്കാം. നിങ്ങൾ ന്യായ​മായ ലക്ഷ്യങ്ങ​ളാ​ണു വയ്‌ക്കു​ന്ന​തെന്ന്‌ ഉറപ്പു​വ​രു​ത്തുക.—ഫിലി​പ്യർ 4:5, NW താരത​മ്യം ചെയ്യുക.

നിങ്ങളു​ടെ ചുറ്റു​പാ​ടു​ക​ളിൽ പുരോ​ഗ​മ​നാ​ത്മ​ക​മായ മാറ്റങ്ങൾ വരുത്തു​ന്നതു ചില​പ്പോൾ സഹായ​ക​ര​മാ​യി​രു​ന്നേ​ക്കാം. മെച്ചമാ​യി ശ്രദ്ധി​ക്കു​ന്ന​തി​നു ക്ലാസ്സിന്റെ മുമ്പിൽ, അധ്യാ​പ​ക​ന്റെ​യ​ടു​ത്തി​രി​ക്കാൻ നിക്കി ക്രമീ​ക​രണം ചെയ്‌തു. നന്നായി പഠിക്കുന്ന ഒരു കൂട്ടു​കാ​രി​യോ​ടൊ​പ്പ​മി​രു​ന്നു ഗൃഹപാ​ഠം ചെയ്യു​ന്നത്‌ ജെസ്സിക്ക പ്രയോ​ജ​ന​ക​ര​മാ​യി കണ്ടെത്തി. നിങ്ങളു​ടെ മുറി സുഖവും സൗകര്യ​വും ഉള്ളതാ​ക്കു​ന്നതു സഹായ​ക​ര​മാ​യി നിങ്ങൾ കണ്ടെത്തി​യേ​ക്കാം.

അസ്വാ​സ്ഥ്യം കുറയ്‌ക്കൽ

നിങ്ങൾക്ക്‌ അമിത​ചു​റു​ചു​റു​ക്കു​ള്ള​വ​രാ​യി​രി​ക്കാ​നുള്ള പ്രവണ​ത​യു​ണ്ടെ​ങ്കിൽ പഠനം വിഷമ​ക​ര​മായ ഒരു കഠിന​പ​രീ​ക്ഷ​യാ​യി​രി​ക്കാൻ കഴിയും. എന്നാൽ അമിത​ചു​റു​ചു​റു​ക്കി​നെ ശാരീ​രിക വ്യായാ​മ​ത്തി​ലേക്കു തിരി​ച്ചു​വി​ടാൻ കഴിയു​മെന്നു ചില വിദഗ്‌ധർ പറയുന്നു. “വായവ വ്യായാ​മം ചെയ്യു​ന്ന​തു​മൂ​ലം മസ്‌തി​ഷ്‌ക​ത്തി​ലു​ണ്ടാ​കുന്ന ജീവശാ​സ്‌ത്ര മാറ്റങ്ങൾ, പുതിയ വിവരങ്ങൾ പഠിക്കു​ന്ന​തി​നും പഴയ വിവരങ്ങൾ ഓർക്കു​ന്ന​തി​നു​മുള്ള ഓരോ വ്യക്തി​യു​ടെ​യും കഴിവു മെച്ച​പ്പെ​ടു​ത്തു​ന്നു​വെ​ന്ന​തി​നുള്ള തെളിവു വർധി​ച്ചു​വ​രി​ക​യാണ്‌” എന്ന്‌ യു.എസ്‌.ന്യൂസ്‌ & വേൾഡ്‌ റിപ്പോർട്ട്‌ പറയുന്നു. അതു​കൊണ്ട്‌, നീന്തൽ, ഓട്ടം, പന്തുകളി, സൈക്കിൾ സവാരി, സ്‌കേ​റ്റിങ്‌ തുടങ്ങിയ മിതമായ അളവു​ക​ളി​ലുള്ള വ്യായാ​മം ശരീര​ത്തി​നും മനസ്സി​നും നല്ലതാണ്‌.—1 തിമൊ​ഥെ​യൊസ്‌ 4:8.

പഠന തകരാ​റു​കൾക്കു പതിവാ​യി ഔഷധങ്ങൾ നിർദേ​ശി​ക്ക​പ്പെ​ടു​ന്നു. ഉത്തേജക മരുന്നു​കൾ കൊടു​ത്ത​പ്പോൾ എഡിഎ​ച്ച്‌ഡി ബാധിച്ച ചെറു​പ്പ​ക്കാ​രിൽ ഏതാണ്ട്‌ 70 ശതമാനം പ്രതി​ക​രി​ച്ച​താ​യി അവകാ​ശ​പ്പെ​ടു​ന്നു. നിങ്ങൾ ഔഷധങ്ങൾ സ്വീക​രി​ക്ക​ണ​മോ​യെ​ന്നു​ള്ളതു പ്രശ്‌ന​ത്തി​ന്റെ ഗുരു​ത​രാ​വസ്ഥ, സാധ്യ​ത​യുള്ള പാർശ്വ​ഫ​ലങ്ങൾ, മറ്റു ഘടകങ്ങൾ എന്നിവ കണക്കി​ലെ​ടു​ത്ത​ശേഷം നിങ്ങളും മാതാ​പി​താ​ക്ക​ളും തീരു​മാ​നി​ക്കേണ്ട ഒരു സംഗതി​യാണ്‌.

നിങ്ങളു​ടെ ആത്മാഭി​മാ​നം നിലനിർത്തു​ക

പഠന വൈഷ​മ്യ​ത്തെ ഒരു വൈകാ​രിക പ്രശ്‌ന​മാ​യി കണക്കാ​ക്കു​ന്നി​ല്ലെ​ങ്കി​ലും അതിനു വൈകാ​രിക ഫലങ്ങളു​ണ്ടാ​യി​രി​ക്കാൻ കഴിയും. മാതാ​പി​താ​ക്ക​ളിൽനി​ന്നും അധ്യാ​പ​ക​രിൽനി​ന്നു​മുള്ള നിരന്ത​ര​മായ അംഗീ​കാ​ര​മി​ല്ലാ​യ്‌മ​യും വിമർശ​ന​വും മോശ​മോ ഇടത്തര​മോ ആയ സ്‌കൂൾ ഫലങ്ങളും ഉറ്റ മിത്ര​ങ്ങ​ളു​ടെ അഭാവ​വും, എല്ലാം​കൂ​ടി ആകു​മ്പോൾ ആത്മാഭി​മാ​നം അനായാ​സേന കുറഞ്ഞു​പോ​കാ​വു​ന്ന​താണ്‌. ചില യുവജ​നങ്ങൾ ഈ തോന്നൽ ഉള്ളി​ലൊ​തു​ക്കി​ക്കൊ​ണ്ടു പുറമേ കോപാ​കു​ല​വും ഭീഷണി​മു​ഴ​ക്കു​ന്ന​തു​മായ ഒരു രീതി​യിൽ ഇടപെ​ടു​ന്നു.

എന്നാൽ, പഠന സംബന്ധ​മായ പ്രശ്‌നങ്ങൾ ഉള്ളതു​കൊ​ണ്ടു നിങ്ങൾക്ക്‌ ആത്മാഭി​മാ​നം നഷ്ടമാ​കേ​ണ്ട​തില്ല.c പഠന സംബന്ധ​മായ പ്രശ്‌ന​ങ്ങ​ളുള്ള യുവജ​ന​ങ്ങ​ളു​ടെ​കൂ​ടെ പ്രവർത്തി​ക്കുന്ന ഒരു ഉദ്യോ​ഗസ്ഥൻ ഇപ്രകാ​രം പറയുന്നു: “ജീവി​ത​ത്തോ​ടുള്ള അവരുടെ മനോ​ഭാ​വം—‘ഞാൻ മടയനാണ്‌, എനി​ക്കൊ​ന്നും ശരിയാ​യി ചെയ്യാൻ കഴിയില്ല’ എന്നതിൽനി​ന്നും . . . ‘ഞാൻ ഒരു പ്രശ്‌നത്തെ തരണം​ചെ​യ്‌തു​കൊ​ണ്ടി​രി​ക്കു​ക​യാണ്‌, എനിക്കു ചെയ്യാൻ കഴിയു​മെന്ന്‌ ഞാൻ വിചാ​രി​ച്ച​തി​നെ​ക്കാൾ വളരെ​യ​ധി​കം എനിക്കു കഴിയും’ എന്നാക്കി—മാറ്റു​ക​യാണ്‌ എന്റെ ലക്ഷ്യം.”

മറ്റുള്ള​വ​രു​ടെ മനോ​ഭാ​വങ്ങൾ സംബന്ധി​ച്ചു നിങ്ങൾക്കു വളരെ​യൊ​ന്നും ചെയ്യാൻ കഴിയി​ല്ലെ​ങ്കി​ലും നിങ്ങളു​ടെ സ്വന്തം മനോ​ഭാ​വ​ങ്ങളെ നിങ്ങൾക്കു സ്വാധീ​നി​ക്കാൻ കഴിയും. ജെസ്സിക്ക അതാണു ചെയ്‌തത്‌. അവൾ ഇപ്രകാ​രം പറയുന്നു: “സ്‌കൂൾ കുട്ടി​ക​ളു​ടെ പറച്ചി​ലു​ക​ളു​ടെ​യും അവരുടെ പരിഹാ​സ​പ്പേ​രു​വി​ളി​യു​ടെ​യും അടിസ്ഥാ​ന​ത്തിൽ ഞാൻ എന്നെത്തന്നെ വിലയി​രു​ത്തി​യ​പ്പോൾ സ്‌കൂ​ളിൽനിന്ന്‌ ഓടി​പ്പോ​കാൻ ഞാൻ ആഗ്രഹി​ച്ചു. എന്നാൽ അവർ പറയു​ന്നത്‌ അവഗണി​ക്കാ​നും എന്റെ കഴിവി​ന്റെ പരമാ​വധി ചെയ്യാ​നും ഇപ്പോൾ ഞാൻ ശ്രമി​ക്കു​ന്നു. അത്‌ ബുദ്ധി​മു​ട്ടുള്ള സംഗതി​യാണ്‌, എനിക്കു സ്വയം ഓർമ​പ്പെ​ടു​ത്തി​ക്കൊ​ണ്ടി​രി​ക്കണം. പക്ഷേ അതു പ്രാ​യോ​ഗി​ക​മാണ്‌.”

ജെസ്സി​ക്ക​യ്‌ക്ക്‌ മറ്റൊരു യാഥാർഥ്യ​ത്തോ​ടു പോരാ​ടേ​ണ്ട​തു​ണ്ടാ​യി​രു​ന്നു. അവളുടെ ജ്യേഷ്‌ഠൻ എല്ലായ്‌പോ​ഴും എ ഗ്രേഡു വാങ്ങുന്ന ഒരു വിദ്യാർഥി ആയിരു​ന്നു. “ഞാൻ അവനു​മാ​യി എന്നെ താരത​മ്യം ചെയ്യു​ന്നതു നിർത്തു​ന്ന​തു​വരെ അത്‌ എന്റെ ആത്മാഭി​മാ​നത്തെ നശിപ്പി​ച്ചു​കൊ​ണ്ടി​രു​ന്നു” എന്ന്‌ ജെസ്സിക്ക പറയുന്നു. അതു​കൊണ്ട്‌ നിങ്ങളെ നിങ്ങളു​ടെ കൂടപ്പി​റ​പ്പു​ക​ളു​മാ​യി താരത​മ്യം ചെയ്യരുത്‌.—ഗലാത്യർ 6:4 താരത​മ്യം ചെയ്യുക.

നിങ്ങൾ ആശ്രയം വയ്‌ക്കുന്ന ഒരു സുഹൃ​ത്തി​നോ​ടു സംസാ​രി​ക്കു​ന്ന​തും കാര്യ​ങ്ങളെ ശരിയായ വീക്ഷണ​ത്തിൽ നിർത്താൻ നിങ്ങളെ സഹായി​ക്കും. നിങ്ങൾ പുരോ​ഗ​മി​ക്കാൻ ശ്രമം നടത്തു​മ്പോൾ ഒരു യഥാർഥ സുഹൃത്ത്‌ നിങ്ങ​ളോ​ടു വിശ്വ​സ്‌ത​മാ​യി പറ്റിനിൽക്കും. (സദൃശ​വാ​ക്യ​ങ്ങൾ 17:17) നേരേ​മ​റിച്ച്‌, ഒരു വ്യാജ സുഹൃത്ത്‌ നിങ്ങളെ ഇടിച്ചു​താ​ഴ്‌ത്തു​ക​യോ നിങ്ങ​ളെ​ക്കു​റി​ച്ചു​തന്നെ അനുചി​ത​മായ ഉയർന്ന വീക്ഷണം നൽകു​ക​യോ ചെയ്യുന്നു. അതു​കൊ​ണ്ടു ശ്രദ്ധാ​പൂർവം നിങ്ങളു​ടെ സുഹൃ​ത്തു​ക്കളെ തിര​ഞ്ഞെ​ടു​ക്കുക.

നിങ്ങൾക്കു പഠന സംബന്ധ​മായ പ്രശ്‌ന​മു​ണ്ടെ​ങ്കിൽ നിങ്ങൾക്കു മറ്റു യുവജ​ന​ങ്ങ​ളെ​ക്കാ​ള​ധി​കം തിരുത്തൽ ലഭിക്കാൻ ഇടയുണ്ട്‌. പക്ഷേ നിങ്ങ​ളെ​ക്കു​റിച്ച്‌ ഒരു പ്രതി​കൂല വീക്ഷണം ഉണ്ടാകാൻ നിങ്ങൾ അതിനെ അനുവ​ദി​ക്ക​രുത്‌. ശിക്ഷണത്തെ ദൈവിക രീതി​യിൽ, വലിയ മൂല്യ​മുള്ള ഒന്നായി കാണുക. നിങ്ങളു​ടെ മാതാ​പി​താ​ക്ക​ളിൽനി​ന്നുള്ള ശിക്ഷണം, അവർ നിങ്ങളെ സ്‌നേ​ഹി​ക്കു​ന്നു​വെ​ന്നും നിങ്ങൾക്കു​വേണ്ടി ഏറ്റവും നല്ലത്‌ ആഗ്രഹി​ക്കു​ന്നു​വെ​ന്നു​മു​ള്ള​തി​ന്റെ തെളി​വാ​ണെന്ന്‌ ഓർക്കുക.—സദൃശ​വാ​ക്യ​ങ്ങൾ 1:8, 9; 3:11, 12; എബ്രായർ 12:5-9.

ഇല്ല, നിങ്ങളു​ടെ പഠന​പ്ര​ശ്‌നങ്ങൾ നിങ്ങളെ നിരു​ത്സാ​ഹ​പ്പെ​ടു​ത്തേ​ണ്ട​തില്ല. നിങ്ങൾക്ക്‌ അവ സംബന്ധി​ച്ചു ചിലതു ചെയ്യാ​നും ഒരു ഫലപ്ര​ദ​മായ ജീവിതം നയിക്കാ​നും കഴിയും. എന്നാൽ പ്രത്യാ​ശ​യ്‌ക്കുള്ള അതിലും വലിയ കാരണ​മുണ്ട്‌. സമൃദ്ധ​മായ പരിജ്ഞാ​ന​മു​ള്ള​തും മനസ്സി​ന്റെ​യും ശരീര​ത്തി​ന്റെ​യും എല്ലാ തകരാ​റു​ക​ളും പരിഹ​രി​ക്ക​പ്പെ​ടു​ന്ന​തു​മായ നീതി​നി​ഷ്‌ഠ​മായ ഒരു പുതിയ ലോകം കൊണ്ടു​വ​രു​മെന്ന്‌ ദൈവം വാഗ്‌ദാ​നം ചെയ്‌തി​രി​ക്കു​ന്നു. (യെശയ്യാ​വു 11:9; വെളി​പ്പാ​ടു 21:1-4) അതു​കൊണ്ട്‌, യഹോ​വ​യാം ദൈവ​ത്തെ​ക്കു​റി​ച്ചും അവന്റെ ഉദ്ദേശ്യ​ങ്ങ​ളെ​ക്കു​റി​ച്ചും കൂടുതൽ പഠിക്കാ​നും ആ പരിജ്ഞാ​ന​ത്തി​നൊ​ത്തു പ്രവർത്തി​ക്കാ​നും ദൃഢനി​ശ്ച​യ​മു​ള്ള​വ​രാ​യി​രി​ക്കുക.—യോഹ​ന്നാൻ 17:3.

[അടിക്കു​റി​പ്പു​കൾ]

[13-ാം പേജിലെ ചിത്രം]

പഠനത്തിനായി നിങ്ങ​ളെ​ത്തന്നെ അർപ്പി​ക്കു​ക