ഗർഭാ​ശ​യ​ത്തി​ലേ​ക്കുള്ള ഒരു ജാലകം

ഓസ്‌ട്രേലിയയിലെ ഉണരുക! ലേഖകൻ

അജാത ശിശു​വിന്‌ ഉണ്ടായി​രു​ന്നേ​ക്കാ​വുന്ന ശാരീ​രി​ക​മോ മാനസി​ക​മോ ആയ പല വൈക​ല്യ​ങ്ങ​ളും വർധിച്ച കൃത്യ​ത​യോ​ടെ നിർണ​യി​ക്കാൻ ആധുനിക പ്രസവ​പൂർവ പരി​ശോ​ധ​നകൾ ഇപ്പോൾ ഡോക്ടർമാ​രെ സഹായി​ക്കു​ന്നു. ഇതിനു​പ​യോ​ഗി​ക്കുന്ന ഏറ്റവും പ്രചാ​ര​മാർന്ന മാർഗ​ങ്ങ​ളിൽ പെടു​ന്ന​വ​യാണ്‌ അൾട്രാ​സൗ​ണ്ടും ജരായു​ദ്ര​വ​ശേ​ഖ​ര​ണ​വും (amniocentesis).

ശ്രവ്യ​മ​ല്ലാ​ത്ത, ഉയർന്ന ആവൃത്തി​യുള്ള ശബ്ദ തരംഗങ്ങൾ ഉപയോ​ഗിച്ച്‌ ഗർഭാ​ശ​യ​ത്തി​ലുള്ള ശിശു​വി​ന്റെ കമ്പ്യൂ​ട്ടർവ​ത്‌കൃത പ്രതി​ച്ഛായ രൂപീ​ക​രി​ക്കുന്ന ശസ്‌ത്ര​ക്രി​യാ​ര​ഹി​ത​മായ നടപടി​യാണ്‌ അൾട്രാ​സൗണ്ട്‌. ഗർഭാ​ശ​യ​ത്തിൽ കുഞ്ഞ്‌ കിടക്കുന്ന ദ്രാവ​ക​മായ ജരായു​ദ്ര​വ​ത്തി​ന്റെ ഒരു സാമ്പിൾ സിറി​ഞ്ചു​കൊണ്ട്‌ എടുത്ത്‌, ഗർഭസ്ഥ​ശി​ശു​വിന്‌ ഡൗൺസ്‌ സിൻ​ഡ്രോം പോ​ലെ​യുള്ള വൈക​ല്യ​ങ്ങ​ളു​ണ്ടോ​യെന്നു കണ്ടുപി​ടി​ക്കു​ന്ന​തി​നുള്ള രാസപ​രി​ശോ​ധ​നകൾ നടത്തു​ന്നത്‌ ജരായു​ദ്ര​വ​ശേ​ഖ​ര​ണ​ത്തിൽ ഉൾപ്പെ​ടു​ന്നു.

കുളത്തി​ലേക്ക്‌ ഒരു വലിയ ഉരുളൻകല്ലു വീഴു​ന്ന​തു​പോ​ലെ സമൂഹ​ത്തി​ലേക്കു കടന്നുവന്ന, വരണാത്മക (selective) ഗർഭച്ഛി​ദ്ര​വു​മാ​യി ബന്ധപ്പെട്ട ഇത്തരം വൈദ്യ സാങ്കേ​തി​ക​വി​ദ്യ വൈദ്യ​സം​ബ​ന്ധ​മായ സാന്മാർഗി​ക​ത​ക​ളു​ടെ ജലാശ​യ​ത്തിൽ വലിയ ചില ഓളങ്ങൾ സൃഷ്ടി​ക്കു​ന്നു.a ദുഃഖ​ക​ര​മെന്നു പറയട്ടെ, ഈ ലോക​ത്തി​ന്റെ മൂല്യ വ്യവസ്ഥ ധാർമി​ക​വും സാൻമാർഗി​ക​വു​മായ വാദവി​ഷ​യ​ങ്ങൾക്കു തീരു​മാ​നം കൽപ്പി​ക്കാൻ പറ്റിയ ഒരു സുസ്ഥി​ര​മായ വേദിയല്ല, അവ കൂടു​ത​ലും ആഞ്ഞടി​ക്കുന്ന തിരമാ​ല​ക​ളിൽ പെട്ടു​ഴ​ലുന്ന ലക്ഷ്യം​തെ​റ്റിയ ഒരു ചങ്ങാടം പോ​ലെ​യാണ്‌.

സാങ്കേ​തി​ക​വി​ദ്യ​യു​ടെ പ്രേര​ണ​യാ​ലുള്ള വരണാത്മക ഗർഭച്ഛി​ദ്രം നിയമ​പ​ര​മാ​യി നിർവ​ചി​ക്ക​പ്പെ​ട്ടി​ട്ടി​ല്ലെ​ങ്കി​ലും പല രാജ്യ​ങ്ങ​ളി​ലും നടപ്പാ​ക്ക​പ്പെ​ടു​ന്നുണ്ട്‌. ഗുരു​ത​ര​മാ​യി വൈക​ല്യം ബാധി​ച്ച​തി​ന്റെ ശക്തമായ സൂചനകൾ തരുന്ന ഒരു ശിശു​വി​നെ ഗർഭച്ഛി​ദ്രം നടത്താ​നുള്ള നിയമ​പ​ര​മായ അവകാശം ഗർഭി​ണി​കൾക്കു​ണ്ടെന്ന്‌ ഐക്യ​നാ​ടു​ക​ളിൽ കഴിഞ്ഞ 15 വർഷക്കാ​ലത്തു നടത്തിയ 13 സർവേ​ക​ളിൽ പ്രതി​ക​രി​ച്ച​വ​രു​ടെ സ്ഥിരമായ 75 മുതൽ 78 ശതമാനം വിശ്വ​സി​ച്ചു. ചില രാജ്യ​ങ്ങ​ളിൽ ഗർഭച്ഛി​ദ്രം അനുവ​ദി​ക്കാൻ “മുൻകൂ​ട്ടി​പ്പ​റ​യ​പ്പെ​ടുന്ന വൈക​ല്യം” മതി.

ഗർഭാ​രം​ഭ​ത്തിൽ റൂബെല്ല (ജർമൻ മീസിൽസ്‌) കണ്ടുപി​ടി​ക്കാൻ തന്റെ ഡോക്ടർ പരാജ​യ​പ്പെ​ട്ടി​രു​ന്ന​തു​മൂ​ല​മു​ണ്ടായ ക്ഷതങ്ങൾക്ക്‌ ഓസ്‌​ട്രേ​ലി​യ​യി​ലെ ഒരു മാതാവ്‌ അടുത്ത​യി​ടെ അദ്ദേഹ​ത്തി​നെ​തി​രെ വിജയ​ക​ര​മാ​യി ഹർജി സമർപ്പി​ച്ചു. ഗർഭാ​രം​ഭ​ത്തിൽ ഈ രോഗം ബാധി​ക്കു​മ്പോൾ അതിന്‌ അജാത​ശി​ശു​വിൽ ഗുരു​ത​ര​മായ വൈക​ല്യ​ങ്ങൾ ഉളവാ​ക്കാൻ കഴിയും. ഡോക്ട​റു​ടെ പരാജയം ശിശു​വി​നെ ഗർഭച്ഛി​ദ്രം നടത്താ​നുള്ള തന്റെ അവസരം കവർന്നു​ക​ള​ഞ്ഞു​വെന്ന്‌ ആ മാതാവ്‌ അവകാ​ശ​പ്പെട്ടു.

ഈ കേസിന്റെ നിയമ​പ​ര​വും സാന്മാർഗി​ക​വു​മായ വശങ്ങ​ളെ​ക്കു​റിച്ച്‌ അഭി​പ്രാ​യ​പ്പെ​ട്ടു​കൊണ്ട്‌ നിയമ ഗവേഷ​ക​യായ ജെന്നി​ഫെർ ഫിറ്റ്‌സ്‌ജെ​റാൾഡ്‌ 1995 ഏപ്രി​ലി​ലെ ക്വീൻസ്‌ലൻഡ്‌ ലോ സൊ​സൈറ്റി ജേർണ​ലി​ലെ ഒരു ലേഖന​ത്തിൽ ഇപ്രകാ​രം പറഞ്ഞു: “അവൾ [ഗർഭി​ണി​യായ സ്‌ത്രീ] ‘എനി​ക്കൊ​രു കുട്ടി വേണമോ?’ എന്നു മാത്രമല്ല, ‘എങ്ങനെ​യുള്ള കുട്ടി​യെ​യാണ്‌ എനിക്കു വേണ്ടത്‌?’ എന്നും തീരു​മാ​നി​ക്കേ​ണ്ട​തുണ്ട്‌.” എന്നാൽ നിയമ​പ​ര​മായ ഗർഭച്ഛി​ദ്ര​ത്തി​നു മതിയായ അടിസ്ഥാ​നം നൽകുന്ന വൈക​ല്യം ഏതാണ്‌?, ഫിറ്റ്‌സ്‌ജെ​റാൾഡ്‌ ചോദി​ക്കു​ന്നു. “മുറി​ച്ചുണ്ട്‌, അണ്ണാക്കിൽ വിള്ളൽ, കോങ്കണ്ണ്‌, ഡൗൺസ്‌ സിൻ​ഡ്രോം, സ്‌പൈന ബൈഫി​ഡാ എന്നിവ​യോ?” ലോക​ത്തി​ന്റെ ചില ഭാഗങ്ങ​ളിൽ ഗർഭച്ഛി​ദ്ര​ത്തി​നുള്ള അടിസ്ഥാ​നം കുട്ടി​യു​ടെ ലിംഗ​മാണ്‌, പ്രത്യേ​കിച്ച്‌ അതു പെണ്ണാ​ണെ​ങ്കിൽ!

ഗർഭാ​ശ​യ​ത്തി​ലെ “തൊട്ടു​കൂ​ടാ​ത്തവ”

മനുഷ്യ ജീനോം ശാസ്‌ത്ര​ജ്ഞൻമാ​രു​ടെ മുമ്പാകെ ചുരു​ള​ഴി​യു​ക​യും ഗർഭാ​ശ​യ​ത്തി​ലേ​ക്കുള്ള ജാലകം ഫലത്തിൽ ഗർഭാ​ശയം നോക്കി​ക്കാ​ണാ​നുള്ള ഒരു സൂക്ഷ്‌മ​ദർശി​നി​യാ​യി​ത്തീ​രു​ക​യും ചെയ്യു​മ്പോൾ അജാത​ശി​ശു​ക്ക​ളു​ടെ അവസ്ഥ​യെ​ന്താ​കും? കുറഞ്ഞ വൈക​ല്യ​ങ്ങ​ളുള്ള ശിശു​ക്ക​ളെ​യും നീക്കം ചെയ്യു​മോ? വാസ്‌ത​വ​ത്തിൽ, കഴിഞ്ഞ പതിറ്റാ​ണ്ടു​ക​ളിൽ കുറവല്ല മറിച്ച്‌, കൂടുതൽ ഗർഭച്ഛി​ദ്രങ്ങൾ നടത്താ​നുള്ള പ്രവണ​ത​യാ​ണു​ള്ളത്‌. ഈ വൻ വർധന​വി​നെ​യും നേരത്തെ പരാമർശിച്ച സംഭവം പോലെ നുരച്ചു​പൊ​ന്തുന്ന വിവാ​ദ​ത്തെ​യും നേരി​ടുന്ന ഡോക്ടർമാർ ഉത്‌ക​ണ്‌ഠാ​കു​ല​രാണ്‌. മനസ്സി​ലാ​ക്കാ​വു​ന്ന​തു​പോ​ലെ, ഇത്‌ ഔഷധ​ത്തോ​ടുള്ള കൂടുതൽ ആത്മരക്ഷാ​ക​ര​മായ ഒരു സമീപനം സ്വീക​രി​ക്കാൻ ഡോക്ടർമാ​രെ പ്രേരി​പ്പി​ച്ചേ​ക്കാം. അത്രകണ്ട്‌ മാതാ​വി​നോ ശിശു​വി​നോ വേണ്ടി​യ​ല്ലെ​ങ്കി​ലും തങ്ങളെ​ത്തന്നെ സംരക്ഷി​ക്കു​ന്ന​തി​നു വേണ്ടി ചില പരി​ശോ​ധ​നകൾ ആവശ്യ​പ്പെ​ടു​ന്ന​തു​പോ​ലെ​യു​ള്ള​തു​തന്നെ. അതിന്റെ ഫലമായി, “പ്രസവ​പൂർവ പരി​ശോ​ധ​ന​ക​ളു​ടെ എണ്ണവും അങ്ങനെ വരണാത്മക ഗർഭച്ഛി​ദ്ര​ങ്ങ​ളു​ടെ എണ്ണവും വർധി​ക്കാ​നുള്ള സാധ്യ​ത​യുണ്ട്‌” എന്ന്‌ ഫിറ്റ്‌സ്‌ജെ​റാൾഡ്‌ എഴുതു​ന്നു. “‘തൊട്ടു​കൂ​ടാ​ത്തവർ’ ‘പുറന്ത​ള്ള​പ്പെ​ടു​ന്നവർ’ ആയിത്തീ​രുന്ന, ജാതി വ്യവസ്ഥ​യോ​ടു സമാന​മായ ഒന്നിനെ” ഇത്‌ ആനയി​ക്കും എന്ന്‌ അവർ കൂട്ടി​ച്ചേർക്കു​ന്നു.

വൈക​ല്യ​മു​ള്ള ഒരു കുട്ടിയെ ഗർഭച്ഛി​ദ്രം നടത്താൻ എല്ലാ അവസര​ങ്ങ​ളും നൽകി​യി​ട്ടും—ഒരുപക്ഷേ പ്രോ​ത്സാ​ഹി​പ്പി​ക്കു​ക​പോ​ലും ചെയ്‌തി​ട്ടും—ഒരു മാതാവ്‌ അതിനു ജന്മം നൽകു​ന്നെ​ങ്കി​ലെന്ത്‌? “കുട്ടിയെ ഗർഭച്ഛി​ദ്രം നടത്താ​മാ​യി​രു​ന്നു എന്നിരി​ക്കെ അതിനു ജന്മം നൽകാൻ അവർ തീരു​മാ​നി​ച്ച​തു​കൊണ്ട്‌ വൈക​ല്യ​മുള്ള കുട്ടി​ക​ളു​ടെ ആവശ്യങ്ങൾ നിറ​വേ​റ്റു​ന്ന​തി​നുള്ള സഹായം അവർക്കു പ്രതീ​ക്ഷി​ക്കാൻ കഴിയു​ക​യി​ല്ലെന്ന്‌ മാതാ​പി​താ​ക്ക​ളോ​ടു പറയുന്ന ഒരു സമയം വന്നേക്കാം” എന്ന്‌ ഫിറ്റ്‌സ്‌ജെ​റാൾഡ്‌ പറയുന്നു.

വരണാത്മക ഗർഭച്ഛി​ദ്രം നമ്മുടെ സമുദാ​യ​ങ്ങ​ളി​ലെ വികലാം​ഗർക്കു നൽകുന്ന സന്ദേശം അവഗണി​ക്കാ​വു​ന്നതല്ല. ഒരു സമൂഹം വൈക​ല്യ​ങ്ങൾ നിമിത്തം അജാതരെ നീക്കം​ചെ​യ്യു​മ്പോൾ മറ്റുള്ള​വർക്കു തങ്ങൾ ഏറെയും ഭാരമാ​യി​രി​ക്കു​ന്ന​തു​പോ​ലെ വികലാം​ഗർക്കു തോന്നാൻ അത്‌ ഇടയാ​ക്കു​മോ? തങ്ങളെ​ക്കു​റിച്ച്‌ ഇപ്പോൾത്ത​ന്നെ​യുള്ള പ്രതി​കൂല പ്രതി​ച്ഛായ തരണം ചെയ്യു​ന്നത്‌ അത്‌ അവർക്ക്‌ കൂടുതൽ വിഷമ​ക​ര​മാ​ക്കി​ത്തീർക്കു​മോ?

തൊഴി​ലാ​ളി​കൾ ഒരു ഉത്‌പാ​ദന നിരയി​ലെ കേടുവന്ന ഭാഗങ്ങൾ നീക്കം ചെയ്യു​ന്ന​തു​പോ​ലെ ആധുനിക സമൂഹം അജാത​രായ കുട്ടി​കളെ നീക്കം ചെയ്യു​ന്നത്‌ ഈ ദുഷ്ട ലോക​ത്തി​ന്റെ “അന്ത്യനാ​ളു​ക​ളിൽ” ജീവി​ക്കുന്ന ആളുക​ളെ​ക്കു​റി​ച്ചു ബൈബിൾ വർണി​ക്കുന്ന വ്യക്തിത്വ രൂപ​രേ​ഖ​യോ​ടു യോജി​ക്കു​ന്നു. ആളുകൾക്കു വലിയ അളവിൽ “സ്വാഭാ​വിക പ്രിയ​മി​ല്ലാ”യിരി​ക്കും എന്ന്‌ അതു മുൻകൂ​ട്ടി​പ്പ​റഞ്ഞു. (2 തിമൊ​ഥെ​യൊസ്‌ 3:1-5, NW) “സ്വാഭാ​വിക പ്രിയ​മി​ല്ലാത്ത” എന്നു പരിഭാ​ഷ​പ്പെ​ടു​ത്തി​യി​രി​ക്കുന്ന ആസ്റ്റോർഗോയ്‌ എന്ന ഗ്രീക്കു പദം ഒരു മാതാ​വി​നു തന്റെ കുട്ടി​ക​ളോ​ടുള്ള സ്‌നേഹം പോലെ, കുടും​ബാം​ഗങ്ങൾ തമ്മിലുള്ള സ്വാഭാ​വിക ബന്ധത്തെ​യാ​ണു പരാമർശി​ക്കു​ന്നത്‌.

“ഉപദേ​ശ​ത്തി​ന്റെ ഓരോ കാററി​നാൽ അലഞ്ഞു​ഴ​ലുന്ന” ഈ ലോക​ത്തി​ലെ ചുക്കാ​നി​ല്ലാത്ത ആളുകൾ ദൈവ​ത്തി​ന്റെ സുനി​ശ്ചിത വചനം പിന്തു​ട​രു​ന്ന​വ​രിൽനി​ന്നു തീർച്ച​യാ​യും കടകവി​രു​ദ്ധ​രാണ്‌. (എഫെസ്യർ 4:14) ദേഹിക്ക്‌ ചുക്കാ​നെ​ന്ന​പോ​ലെ ബൈബിൾ നമ്മെ പ്രക്ഷു​ബ്ധ​മായ കടലിൽ ധാർമി​ക​മാ​യി ഉറപ്പും സ്ഥിരത​യും ഉള്ളവരാ​ക്കി നിർത്തു​ന്നു. (എബ്രായർ 6:19 താരത​മ്യം ചെയ്യുക.) ഗൗരവ​മാ​യി വൈരൂ​പ്യം ബാധിച്ച ഭ്രൂണ​ത്തെ​യോ ഗർഭസ്ഥ​ശി​ശു​വി​നെ​യോ ഒരു സ്‌ത്രീ സ്വാഭാ​വി​ക​മാ​യി പുറന്ത​ള്ളി​യേ​ക്കാ​മെന്നു ക്രിസ്‌ത്യാ​നി​കൾ മനസ്സി​ലാ​ക്കു​മ്പോൾത്തന്നെ, കുഞ്ഞിനെ അവിടെ നിലനിർത്താൻ തക്കവണ്ണം അതിന്‌ ആരോ​ഗ്യ​മു​ണ്ടോ എന്നു കാണാ​നാ​യി ഗർഭാ​ശ​യ​ത്തി​ലേക്കു ചുഴി​ഞ്ഞു​നോ​ക്കുന്ന ചിന്ത​പോ​ലും അവർക്കു തീർത്തും അനിഷ്ട​ക​ര​മാണ്‌.b—പുറപ്പാ​ടു 21:22, 23 താരത​മ്യം ചെയ്യുക.

നിർമലത നിലനിർത്താ​നുള്ള ഒരു ക്രിസ്‌ത്യാ​നി​യു​ടെ തീരു​മാ​നത്തെ അരക്കി​ട്ടു​റ​പ്പി​ക്കു​ന്ന​താണ്‌ “എനിക്കു ദീനം എന്നു യാതൊ​രു നിവാ​സി​യും പറകയി”ല്ലാത്ത സമയ​ത്തെ​ക്കു​റി​ച്ചുള്ള ദൈവ​ത്തി​ന്റെ വാഗ്‌ദാ​നം. (യെശയ്യാ​വു 33:24; 35:5, 6) അതേ, വൈക​ല്യ​മു​ള്ളവർ ഇപ്പോൾ വിഷമ​തകൾ അനുഭ​വി​ക്കു​ക​യും അവരെ പരിപാ​ലി​ക്കു​ന്നവർ ത്യാഗങ്ങൾ സഹിക്കു​ക​യും ചെയ്യേ​ണ്ടി​വ​രു​ന്നു​വെ​ങ്കി​ലും ‘ദൈവത്തെ ഭയപ്പെ​ടുന്ന ഭക്തന്മാർക്കു നന്മ വരും.’—സഭാ​പ്ര​സം​ഗി 8:12.

[അടിക്കു​റി​പ്പു​കൾ]