ചിത്ര ഛായാ​ഗ്ര​ഹണം—അതു നന്നായി നിർവ​ഹി​ക്കുന്ന വിധം

പ്രിയ സുഹൃ​ത്തു​ക്ക​ളു​ടെ​യും കുടും​ബാം​ഗ​ങ്ങ​ളു​ടെ​യും ഛായാ​ചി​ത്ര​ങ്ങ​ളെ​ക്കാൾ പ്രിയ​ങ്ക​ര​മാ​യി കരുത​പ്പെ​ടു​ന്നവ അധിക​മൊ​ന്നു​മില്ല. ഗുണനി​ല​വാ​ര​മുള്ള ഛായാ​ചി​ത്രം കേവല​മൊ​രു ക്ഷിപ്ര​ചി​ത്ര​ത്തെ​ക്കാൾ (snapshot) കവിഞ്ഞ​താ​ണ​ല്ലോ; അത്‌ ഒരുവന്റെ വ്യക്തി​ത്വ​ത്തി​ന്റെ അന്തഃസ​ത്ത​യെ​ത്തന്നെ പിടി​ച്ചെ​ടു​ക്കാൻ ഉദ്ദേശി​ച്ചുള്ള ഒരു പ്രതി​ഛാ​യ​യാണ്‌!

സാങ്കേ​തി​ക മേന്മയുള്ള ഛായാ​ചി​ത്രങ്ങൾ നമ്മിൽ ചിലരു​ടെ എത്തുപാ​ടിൽ ഒതുങ്ങാ​ത്തത്ര വിലപി​ടി​പ്പു​ള്ള​താ​യി​രി​ക്കാ​മെന്ന​താണ്‌ പ്രശ്‌നം. ഇനി, നിങ്ങൾതന്നെ ഫോ​ട്ടോ​യെ​ടു​ക്കാൻ ശ്രമി​ക്കു​ക​യാ​ണെ​ങ്കി​ലോ, കേവലം ലക്ഷ്യം​പി​ടിച്ച്‌ ഫോ​ട്ടോ​യെ​ടു​ക്കു​ന്ന​തി​നെ​ക്കാൾ വളരെ കാര്യങ്ങൾ ഉൾപ്പെ​ട്ടി​രി​ക്കു​ന്നു​വെന്നു നിങ്ങൾ പെട്ടെന്നു മനസ്സി​ലാ​ക്കും. ഒരു നല്ല ചിത്ര​ത്തിൽ വ്യക്തി മാത്രമല്ല, പ്രകാശം, പശ്ചാത്തലം, രംഗവി​ധാ​നം, നില, മുഖഭാ​വം, നിറം എന്നിവ​യെ​ല്ലാം ഉൾപ്പെ​ട്ടി​രി​ക്കു​ന്നു എന്നതാണ്‌ ഇതിന്റെ കാരണം.

എന്നിരു​ന്നാ​ലും, നിങ്ങൾക്ക്‌ ഒരു കാമറ ഉണ്ടെങ്കിൽ, ചില അടിസ്ഥാന വിദ്യകൾ പഠിക്കാൻ മനസ്സൊ​രു​ക്ക​മു​ണ്ടെ​ങ്കിൽ, നിങ്ങൾക്കു സംതൃ​പ്‌തി​ക​ര​മായ ഫോ​ട്ടോ​കൾ എടുക്കാ​വു​ന്ന​താണ്‌. എങ്ങനെ? ഉത്തരത്തി​നാ​യി ഈ രംഗത്തു പത്തില​ധി​കം വർഷത്തെ പരിച​യ​മുള്ള ഒരു വിദഗ്‌ധ ഫോ​ട്ടോ​ഗ്രാ​ഫ​റോ​ടു നമുക്കു ചില ചോദ്യ​ങ്ങൾ ചോദി​ക്കാം.

•ആദ്യമായി, ഫോ​ട്ടോ​യ്‌ക്കു​വേണ്ടി ഒരുവനെ പുഞ്ചി​രി​പ്പി​ക്കു​ന്ന​തി​ലെ രഹസ്യ​മെ​ന്താണ്‌?ഫോ​ട്ടോ​യെ​ടു​ക്കാൻ പറ്റിയ മാനസിക ഭാവത്തി​ലാ​ണു വ്യക്തി​യെന്ന്‌ ഉറപ്പു​വ​രു​ത്തുക! ഉദാഹ​ര​ണ​ത്തിന്‌, നിങ്ങൾക്ക്‌ ഒരു കൊച്ചു പെൺകു​ട്ടി​യു​ടെ ഫോട്ടോ എടുക്ക​ണ​മെന്നു വിചാ​രി​ക്കുക. അവൾ ക്ഷീണി​ത​യോ വിശന്നി​രി​ക്കു​ന്ന​വ​ളോ ആണെങ്കിൽ, വിജയ​ക​ര​മാ​യി അവളുടെ ഫോട്ടോ എടുക്കു​ന്നതു ബുദ്ധി​മു​ട്ടാ​യി​രി​ക്കും. മാത്ര​വു​മല്ല, അവൾ ക്ഷീണി​ത​യാ​ണെ​ങ്കിൽ മുഖത്തും കണ്ണുക​ളി​ലും പിരി​മു​റു​ക്കം ദൃശ്യ​മാ​കും. അതു ചിത്ര​ത്തി​ന്റെ മേന്മ കുറയ്‌ക്കും. അതു​കൊണ്ട്‌ ഫോ​ട്ടോ​യെ​ടു​ക്കൽ തുടങ്ങു​ന്ന​തി​നു മുമ്പ്‌ അൽപ്പ​നേരം ഉറങ്ങാ​നും എന്തെങ്കി​ലും ലഘുഭ​ക്ഷണം കഴിക്കാ​നും അവളെ പ്രോ​ത്സാ​ഹി​പ്പി​ക്കുക.

വ്യക്തി​യു​മാ​യി ഇടപെ​ടു​ന്ന​തും സഹായ​ക​മാണ്‌. പ്രസന്ന​വ​ദ​ന​നും ആഹ്‌ളാ​ദ​ഭ​രി​ത​നും ആയിരി​ക്കുക. സംഭാ​ഷി​ച്ചു​കൊണ്ട്‌ അവളുടെ പിരി​മു​റു​ക്ക​ത്തിന്‌ അയവു​വ​രു​ത്തുക, എന്നാൽ അവളെ വല്ലാതെ ചിരി​പ്പി​ക്കാൻ ശ്രമി​ക്ക​രുത്‌. കണ്ണുകൾ പാതി അടഞ്ഞി​രി​ക്കാ​നും മുഖം രക്തമയ​മാ​കാ​നും ഇത്‌ ഇടയാ​ക്കു​ന്നു. വിഭിന്ന മുഖഭാ​വ​ങ്ങ​ളി​ലുള്ള ഫോ​ട്ടോ​കൾ എടുത്തു​നോ​ക്കുക. നിങ്ങൾ എത്ര കൂടുതൽ ഫോ​ട്ടോ​കൾ എടുക്കു​ന്നു​വോ, അത്ര കൂടു​ത​ലാണ്‌ ആ വ്യക്തിയെ ഏറ്റവും നന്നായി എടുത്തു​കാ​ണി​ക്കുന്ന ഫോട്ടോ ലഭിക്കു​ന്ന​തി​നുള്ള സാധ്യത.

•വസ്‌ത്രധാരണവും ചമയവും സംബന്ധി​ച്ചോ? ഗ്രൂപ്പ്‌ ഫോ​ട്ടോ​ക​ളിൽ, വർണ​പ്പൊ​രു​ത്തം അഭികാ​മ്യ​മാണ്‌. ഉദാഹ​ര​ണ​ത്തിന്‌, നിങ്ങൾ ഒരു കുടും​ബ​ത്തി​ന്റെ ചിത്ര​മാണ്‌ എടുക്കു​ന്ന​തെ​ങ്കിൽ, പൊരു​ത്ത​പ്പെ​ടുന്ന വർണങ്ങ​ളി​ലുള്ള വസ്‌ത്രം ധരിക്കാൻ നിർദേ​ശി​ക്കുക. അല്ലെങ്കിൽ ഒരുപക്ഷേ അവർ എല്ലാവ​രും ഒരേ വർണങ്ങ​ളി​ലുള്ള വസ്‌ത്രം ധരിക്കട്ടെ. എന്നാൽ, വണ്ണമുള്ള ആളുകൾ കടും വർണങ്ങ​ളി​ലും വണ്ണംകു​റഞ്ഞ ആളുകൾ ഇളം വർണങ്ങ​ളി​ലും ഏറ്റവും മെച്ചമാ​യി കാണ​പ്പെ​ടു​ന്നു​വെന്ന്‌ ഓർമി​ക്കുക.

നിങ്ങൾ വിശദാം​ശ​ത്തി​നും ശ്രദ്ധ നൽകണം: ഏറ്റവും കുറഞ്ഞ ചുളി​വു​ക​ളോ​ടെ വസ്‌ത്രം നേരെ കിടക്കു​ന്നു​വോ? ടൈ കിടക്കു​ന്നതു നേരെ​യാ​ണോ? തലമുടി ചീകി ഒതുക്കി​യി​രി​ക്കു​ന്നു​വോ? നിങ്ങളു​ടെ കണ്ണുകൾ പാറി​പ്പ​റന്നു കിടക്കുന്ന തലമുടി ശ്രദ്ധി​ച്ചി​ല്ലെ​ന്നു​വ​രാം, എന്നാൽ കാമറ ശ്രദ്ധി​ക്കും! വ്യക്തി ഒരു സ്‌ത്രീ ആണെങ്കിൽ, അവൾ മേയ്‌ക്കപ്പ്‌ ഉചിത​മാ​യി ചെയ്‌തി​ട്ടു​ണ്ടോ?

•കണ്ണടധാരികളെ സംബന്ധി​ച്ചോ? തിളക്കം നിമിത്തം ഇത്‌ ഒരു പ്രശ്‌ന​മാ​യി​രി​ക്കാ​വു​ന്ന​താണ്‌. ഒന്നാമ​താ​യി, അനാവ​ശ്യ​മായ എന്തെങ്കി​ലും തിളക്ക​മു​ണ്ടോ​യെന്നു കാണാൻ വ്യൂ​ഫൈൻഡ​റി​ലൂ​ടെ നോക്കുക. ഉണ്ടെങ്കിൽ, പ്രതി​ഫ​ലനം കണ്ണിന്റെ മധ്യത്തിൽനി​ന്നു നീങ്ങി​പ്പോ​കു​ക​യോ അപ്രത്യ​ക്ഷ​മാ​കു​യോ ചെയ്യു​ന്ന​തു​വരെ വ്യക്തി തല സാവധാ​നം തിരി​ക്കട്ടെ. വ്യക്തി താടി താഴ്‌ത്തു​ന്നതു ചില​പ്പോൾ സഹായ​ക​മാ​കും, എന്നാൽ ഇരട്ടത്താ​ടി വരാതി​രി​ക്കാൻ ശ്രദ്ധി​ക്കുക!

•പശ്ചാത്തലത്തിൽ എന്തു പ്രത്യ​ക്ഷ​പ്പെ​ടു​ന്നു​വെ​ന്നത്‌ പ്രാധാ​ന്യ​മർഹി​ക്കു​ന്നു​വോ? നിസ്സം​ശ​യ​മാ​യും! വൈദ്യു​ത ലൈനു​കൾ, റോഡു​കൾ, അല്ലെങ്കിൽ മോ​ട്ടോർ വാഹനങ്ങൾ തുടങ്ങി​യ​വ​കൊണ്ട്‌ അടുക്കും​ചി​ട്ട​യു​മി​ല്ലാത്ത തിര​ക്കേ​റിയ ഒരു പശ്ചാത്തലം നിങ്ങളു​ടെ ഫോ​ട്ടോ​യു​ടെ ഗുണം കുറയ്‌ക്കു​കയേ ഉള്ളൂ. അതു​കൊണ്ട്‌, ഒരു വൃക്ഷം, പൂത്തു​നിൽക്കുന്ന ഒരു ചെടി​ക്കൂ​ട്ടം, ഒരു മരവേലി, ഒരു പഴയ കളപ്പു​ര​യു​ടെ വശം തുടങ്ങി വ്യക്തി​യോ​ടു താത്‌പ​ര്യം വർധി​പ്പി​ക്കു​ക​യോ കൂട്ടി​ച്ചേർക്കു​ക​യോ ചെയ്യുന്ന ഒരു പശ്ചാത്തലം അന്വേ​ഷി​ക്കുക.

•മുറിക്കകത്തെ രംഗവി​ധാ​ന​ത്തി​ലാണ്‌ നിങ്ങൾ ചിത്രം എടുക്കു​ന്ന​തെ​ങ്കി​ലോ? ഇളം നിറമുള്ള ഒരു ഭിത്തി​യു​ടെ​യോ മുറി​ക്ക​കത്തു വളരുന്ന ഒരു ചെടി​യു​ടെ​യോ മുന്നി​ലുള്ള കസേര​യി​ലോ സോഫ​യി​ലോ വ്യക്തിയെ ഇരുത്തി​ക്കൊണ്ട്‌ നിങ്ങൾക്കു ഫോ​ട്ടോ​യെ​ടു​ത്തു​നോ​ക്കാ​വു​ന്ന​താണ്‌. പശ്ചാത്ത​ല​ത്തിൽ വർക്ക്‌ ടേബി​ളോ, ഡെസ്‌ക്കോ, അല്ലെങ്കിൽ തയ്യൽ വസ്‌തു​ക്ക​ളോ സഹിതം, വ്യക്തി ജോലി ചെയ്യു​ന്ന​താ​യോ ഇഷ്ടപ്പെട്ട വിനോ​ദ​ത്തി​ലോ പ്രവർത്ത​ന​ത്തി​ലോ ഏർപ്പെ​ട്ടി​രി​ക്കു​ന്ന​താ​യോ ചിത്രീ​ക​രി​ക്കു​ന്നതു വിശേ​ഷി​ച്ചും രസകര​മാണ്‌.

•ആകർഷകമായൊരു പശ്ചാത്തലം കണ്ടെത്താൻ കഴിയു​ന്നി​ല്ലെ​ങ്കി​ലോ? പശ്ചാത്തലം ഫോക്ക​സി​നു വെളി​യി​ലാ​ക്കാൻ ശ്രമി​ക്കുക. വ്യക്തിയെ പശ്ചാത്ത​ല​ത്തിൽനിന്ന്‌ അകലത്തിൽ നിർത്താൻ കഴിയുന്ന, മുറിക്കു പുറത്തു​വെ​ച്ചുള്ള ചിത്ര​ങ്ങ​ളിൽ ഇത്‌ ഏറ്റവും പ്രാ​യോ​ഗി​ക​മാണ്‌. എഫ്‌-സ്റ്റോപ്പ്‌ അല്ലെങ്കിൽ ലെൻസ്‌ ദ്വാരം (lens aperture) ക്രമീ​ക​രി​ച്ചു​കൊണ്ട്‌ ഇതു ചെയ്യാം. f5.6 പോലുള്ള ഒരു താഴ്‌ന്ന എഫ്‌-സ്റ്റോപ്പ്‌ നമ്പർ വ്യക്തിയെ വ്യക്തമായ ഫോക്ക​സി​ലാ​ക്കു​ക​യും എന്നാൽ പശ്ചാത്തലം അവ്യക്ത​മാ​ക്കു​ക​യും ചെയ്യും.—ഒന്നാമത്തെ ഫോട്ടോ കാണുക.

•പൊരുത്തം സംബന്ധിച്ച്‌ എന്തെങ്കി​ലും ഉപദേ​ശ​മു​ണ്ടോ? ആദ്യം​തന്നെ, നിങ്ങളു​ടെ കാമറ ഒരു മുക്കാ​ലി​യേൽ വെക്കു​ന്നതു സഹായ​ക​മാണ്‌. അപ്പോൾ നിങ്ങൾക്കു പൊരു​ത്ത​ത്തിൽ കൂടുതൽ ശ്രദ്ധ കേന്ദ്രീ​ക​രി​ക്കാ​വു​ന്ന​താണ്‌. സാധാ​ര​ണ​മാ​യി, ഛായാ​ചി​ത്രങ്ങൾ മുഴു​വ​നാ​യു​ള്ള​തോ മുക്കാൽ ഭാഗമു​ള്ള​തോ (അരമുതൽ മേൽപ്പോട്ട്‌) അടുത്തു​നിന്ന്‌ എടുക്കു​ന്ന​തോ (തലയും തോളും അല്ലെങ്കിൽ തലമാ​ത്രം) ആണ്‌. (രണ്ടാമത്തെ ഫോട്ടോ കാണുക.) 105 മില്ലി​മീ​റ്റ​റി​നും 150 മില്ലി​മീ​റ്റ​റി​നും ഇടയി​ലുള്ള ഏതു ലെൻസും ഫോട്ടോ എടുക്കു​ന്ന​തി​നു തികച്ചും അനു​യോ​ജ്യ​മാ​യി​രി​ക്കും. നിങ്ങളു​ടെ കാമറ​യി​ലെ ലെൻസ്‌ ക്രമീ​ക​രി​ക്കാ​നോ മാറ്റാ​നോ സാധി​ക്കാ​ത്ത​താ​ണെ​ങ്കിൽ, നിങ്ങൾ ആഗ്രഹി​ക്കുന്ന പ്രതി​ബിം​ബം ലഭിക്കു​ന്ന​തു​വരെ വ്യക്തി​യോട്‌ അടുത്തു​വ​രുക, അല്ലെങ്കിൽ പിന്നോ​ക്കം​പോ​കുക. ഫോ​ട്ടോ​യെ​ടു​ക്കു​മ്പോൾ തലയ്‌ക്കു മുകളി​ലും വശങ്ങൾക്കു ചുറ്റും പാദങ്ങൾക്കു താഴെ​യും കുറെ സ്ഥലം നൽകു​ന്നതു വിവേ​ക​മാ​യി​രി​ക്കും. ഫോട്ടോ വലുതാ​ക്കു​മ്പോൾ തലയോ പാദങ്ങ​ളോ ഛേദി​ക്ക​പ്പെ​ടു​ന്നത്‌ അല്ലെങ്കിൽ തലയും കൈകാ​ലു​ക​ളും ഇല്ലാ​തെ​വ​രു​ന്നത്‌ ഇപ്രകാ​രം നിങ്ങൾക്ക്‌ ഒഴിവാ​ക്കാം. നിങ്ങൾ എത്രമാ​ത്രം വലുതാ​ക്കു​ന്നു​വോ അത്രമാ​ത്രം പ്രതി​ബിം​ബം, വലുതാ​ക്കൽ പ്രക്രി​യ​യിൽ നഷ്ടപ്പെ​ട്ടേ​ക്കാം, ഇതു ഫോ​ട്ടോ​യു​ടെ ബോർഡ​റി​ന്റെ വലുപ്പത്തെ ആശ്രയി​ച്ചി​രി​ക്കു​ന്നു.

റൂൾ ഓഫ്‌ തേർഡ്‌സ്‌ എന്നു വിളി​ക്ക​പ്പെ​ടു​ന്ന​താ​ണു പ്രയോ​ജ​ന​പ്ര​ദ​മായ ഒരു മാർഗ​രേഖ. വ്യക്തി​യു​ടെ മുഖമോ കണ്ണുക​ളോ, ചിത്ര​ത്തി​ന്റെ മുകളിൽനി​ന്നും താഴെ​നി​ന്നും വശങ്ങളിൽനി​ന്നും ഉള്ള അകലത്തി​ന്റെ മൂന്നി​ലൊ​ന്നു ദൂരത്തിൽ സ്ഥാപി​ക്കു​ന്നത്‌ ഇതിൽ ഉൾപ്പെ​ടു​ന്നു. (മൂന്നാ​മത്തെ ഫോട്ടോ കാണുക.) എന്നാൽ, കണ്ണുകൾ ചിത്ര​ത്തി​ന്റെ മധ്യത്തി​ലാ​യി​രി​ക്കു​ന്നതു ചില​പ്പോൾ വളരെ ഫലപ്ര​ദ​മാണ്‌.

•വ്യക്തിയെ പോസു​ചെ​യ്യി​ക്കു​ന്നതു സംബന്ധി​ച്ചെന്ത്‌? പിരി​മു​റു​ക്കം ഇല്ലാത്ത ഒരു നിലയിൽ വ്യക്തി കാമറയെ അഭിമു​ഖീ​ക​രി​ക്കട്ടെ, ഇരിക്കു​ക​യോ നിൽക്കു​ക​യോ ചാരി​ക്കി​ട​ക്കു​ക​യോ ആകാം, എന്നാൽ വശത്തേക്ക്‌ അൽപം ചെരി​യണം. മുഖം വളരെ വൃത്താ​കാ​ര​മാ​ണെന്നു തോന്നു​ന്നു​വെ​ങ്കിൽ, മുഖത്തി​ന്റെ പകുതി​മാ​ത്രം പ്രകാ​ശി​ക്കേ​ണ്ട​തിന്‌ വ്യക്തി തലയോ ശരീര​മോ അൽപം തിരി​ക്കട്ടെ. കാമറ​യോട്‌ ഏറ്റവും അടുത്തു​വ​രു​ന്നത്‌ നിഴലി​ലുള്ള പകുതി​ഭാ​ഗ​മാ​യി​രി​ക്കണം. മുഖം ഇടുങ്ങി​യ​താ​യി തോന്നാൻ ഇത്‌ ഇടയാ​ക്കും. നേരേ​മ​റിച്ച്‌, മുഖം മുഴു​വ​നാ​യി കാണ​പ്പെ​ടാൻ നിങ്ങൾ ആഗ്രഹി​ക്കു​ന്നു​വെ​ങ്കിൽ വെളി​ച്ച​ത്താൽ മുഖം മുഴു​വ​നും പ്രകാ​ശി​ക്കു​ന്ന​തു​വരെ വ്യക്തി തലയോ ശരീര​മോ തിരി​ക്കട്ടെ.

കൈകൾക്കു പ്രത്യേക ശ്രദ്ധ നൽകുക. അവ ആയാസ​ര​ഹി​ത​മാ​യി കാണ​പ്പെ​ടു​ക​യും സ്വഭാ​വി​ക​മായ ഒരു നിലയി​ലാ​യി​രി​ക്കു​ക​യും വേണം, താടി​ക്കോ മുഖത്തി​ന്റെ വശത്തോ പതുക്കെ കൈ​കൊ​ടു​ക്കു​ന്ന​തു​പോ​ലെ. വ്യക്തി നിൽക്കു​ക​യാ​ണെ​ങ്കിൽ, കൈകൾ വശങ്ങളിൽ നേരേ താഴേക്കു തൂക്കി​യി​ടുന്ന സർവസാ​ധാ​ര​ണ​മായ പിഴവ്‌ ഒഴിവാ​ക്കുക. കൈകൾക്കൊണ്ട്‌ എന്തി​നെ​യെ​ങ്കി​ലും പിടി​ക്കു​ക​യോ അവയെ സ്വഭാ​വി​ക​മായ നിലയിൽ ശാന്തമാ​യി വെക്കു​ക​യോ ചെയ്യു​ന്നതു നല്ലതാണ്‌.

•ദമ്പതിമാരുടെ ഫോ​ട്ടോ​യെ​ടു​ക്കു​ന്ന​തി​നു വേണ്ടി എന്തെങ്കി​ലും ഉപദേ​ശ​മു​ണ്ടോ? അവരുടെ തലകൾ പരസ്‌പരം അൽപം ചരിച്ച്‌ ഫോ​ട്ടോ​യെ​ടു​ത്തു നോക്കുക. അവരി​രു​വ​രും ഒരേ ലെവലിൽ നിൽക്കു​ന്നത്‌ ഒഴിവാ​ക്കു​ന്നതു സാധാ​ര​ണ​മാ​യി വളരെ നല്ലതാണ്‌. ഒരു വ്യക്തി​യു​ടെ കണ്ണുകൾ മറ്റേ വ്യക്തി​യു​ടെ മൂക്കിന്റെ ലെവലിൽ ആയിരി​ക്ക​ത്ത​ക്ക​വണ്ണം നിങ്ങൾക്ക്‌ അവരെ നിർത്താ​വു​ന്ന​താണ്‌.—നാലാ​മത്തെ ഫോട്ടോ കാണുക.

•നമുക്കു പ്രകാ​ശ​ത്തെ​ക്കു​റി​ച്ചു സംസാ​രി​ക്കാം. മുറിക്കു വെളി​യിൽവെച്ച്‌ ഫോ​ട്ടോ​യെ​ടു​ക്കാ​നുള്ള ഏറ്റവും മെച്ചമായ പകൽ സമയം ഏതാണ്‌? അപരാഹ്നം. അപ്പോൾ അന്തരീക്ഷം സാധാ​ര​ണ​മാ​യി ശാന്തവും പ്രകാ​ശ​ത്തി​ന്റെ നിറം ഊഷ്‌മ​ള​വു​മാണ്‌. സൂര്യ​പ്ര​കാ​ശം മുഖത്തി​ന്റെ ഒരു വശത്തെ പ്രകാ​ശി​പ്പി​ക്കാൻ കഴിയ​ത്ത​ക്ക​വി​ധ​വും നിഴലി​ലുള്ള മുഖവ​ശത്ത്‌ കോണാ​കൃ​തി​യിൽ മാത്രം പ്രകാശം പതിക്ക​ത്ത​ക്ക​വി​ധ​വും നിങ്ങളു​ടെ സുഹൃ​ത്തി​നെ നിർത്തി ഫോ​ട്ടോ​യെ​ടു​ത്തു​നോ​ക്കുക. ഇതു വ്യക്തി​യു​ടെ കണ്ണ്‌ കൂമ്പി​പ്പോ​കാ​തി​രി​ക്കാൻ സഹായി​ക്കും. മുഖത്തി​ന്റെ ഒരു പാർശ്വ​വീ​ക്ഷണം എടുക്കാ​നാ​ണു നിങ്ങൾ ആഗ്രഹി​ക്കു​ന്ന​തെ​ങ്കിൽ, മുഖത്തി​ന്റെ നിഴലുള്ള വശത്തേക്കു നിങ്ങളു​ടെ കാമറ തിരി​ക്കുക. കൂടാതെ, സൂര്യ​പ്ര​കാ​ശ​ത്തിൽനി​ന്നു നിങ്ങളു​ടെ കാമറാ​ലെൻസ്‌ നിങ്ങൾ മറയ്‌ക്കു​ന്നു​വെന്ന്‌ ഉറപ്പു​വ​രു​ത്തുക.

•പ്രകാശം വളരെ തീവ്ര​മാ​ണെ​ങ്കിൽ എന്ത്‌? സൂര്യൻ പിമ്പി​ലാ​യി​രി​ക്ക​ത്ത​ക്ക​വണ്ണം നിങ്ങളു​ടെ സുഹൃ​ത്തി​നെ നിർത്തി പടമെ​ടു​ത്തു​നോ​ക്കുക.

•അയാളുടെ മുഖം നിഴലിൽ വരാൻ അതു കാരണ​മാ​വി​ല്ലേ? ഉവ്വ്‌, എന്നാൽ നിഴൽവീണ ഭാഗം പ്രകാ​ശി​പ്പി​ക്കാ​നാ​യി നിങ്ങൾക്കു ഫ്‌ളാഷ്‌ ഉപയോ​ഗി​ക്കാ​വു​ന്ന​താണ്‌. ചില കാമറകൾ ഇതു സ്വയം ചെയ്യുന്നു. സഹായി​യാ​യി പ്രവർത്തി​ക്കാൻ ഒരു സുഹൃത്ത്‌ ഉണ്ടായി​രി​ക്കു​ക​യെ​ന്ന​താ​ണു മറ്റൊരു പരിഹാ​ര​മാർഗം. അയാൾക്ക്‌ ഒരു പ്രതി​ഫ​ല​നി​യോ വലിയ ഒരു കഷണം വെളുത്ത കാർഡ്‌ബോർഡോ ഉയർത്തി​പ്പി​ടിച്ച്‌ ചിതറി​വീ​ഴുന്ന സൂര്യ​പ്ര​കാ​ശ​ത്തിൽ കുറെ വ്യക്തി​യു​ടെ മുഖ​ത്തേക്കു പ്രതി​ഫ​ലി​പ്പി​ക്കാ​വു​ന്ന​താണ്‌.

•മുറിക്കകത്തെ പ്രകാശം സംബന്ധി​ച്ചെന്ത്‌? വ്യക്തിയെ ജന്നലി​ന​ടു​ത്തു പോസ്‌ ചെയ്യി​ച്ചു​കൊണ്ട്‌ നിങ്ങൾക്കു പ്രകൃ​തി​ദത്ത വെളിച്ചം ഉപയോ​ഗി​ക്കാ​വു​ന്ന​താണ്‌. പ്രകാ​ശത്തെ ചിതറി​ക്കു​ന്ന​തിന്‌ ഒരു നേരിയ കർട്ടൻ ഉപയോ​ഗി​ക്കാൻ കഴിയും. മുഖത്തി​ന്റെ വളരെ ഇരുണ്ട​താ​യി തോന്നുന്ന ഭാഗങ്ങളെ പ്രകാ​ശി​പ്പി​ക്കു​ന്ന​തിന്‌ ആവശ്യ​മെ​ങ്കിൽ നിങ്ങൾക്ക്‌ ഫ്‌ളാഷ്‌ ഫിൽ-ഇനോ ഒരു കാർഡ്‌ബോർഡ്‌ പ്രതി​ഫ​ല​നി​യോ ഉപയോ​ഗി​ക്കാ​വു​ന്ന​താണ്‌.—അഞ്ചാമത്തെ ഫോട്ടോ കാണുക.

•ലഭ്യമായ പ്രകാശം മതിയാ​യ​ത​ല്ലെ​ങ്കി​ലോ? അത്തരം സാഹച​ര്യ​ങ്ങ​ളിൽ നിങ്ങൾ ഫ്‌ളാഷ്‌ ഉപയോ​ഗി​ക്കേ​ണ്ട​തുണ്ട്‌. വെളുത്ത പാർശ്വ​ഭി​ത്തി​യുള്ള ഒരു സ്ഥലത്തു വ്യക്തിയെ നിർത്തി ഫോ​ട്ടോ​യെ​ടു​ത്തു നോക്കുക. വെളിച്ചം പാർശ്വ​ഭി​ത്തി​യിൽ തട്ടി പ്രതി​ഫ​ലി​ക്ക​ത്ത​ക്ക​വണ്ണം നിങ്ങളു​ടെ ഫ്‌ളാഷ്‌ ചെരി​ക്കുക. വശത്തു​നി​ന്നു പ്രകാശം വരുന്ന​തു​കൊണ്ട്‌ മുഖത്തി​ന്റെ എത്രമാ​ത്രം ഭാഗം പ്രകാ​ശി​ക്ക​ണ​മെ​ന്നുള്ള കാര്യ​ത്തിൽ നിങ്ങൾക്കു കൂടുതൽ നിയ​ന്ത്ര​ണ​മു​ണ്ടാ​യി​രി​ക്കും.

തീർച്ച​യാ​യും, നല്ല ഫലങ്ങൾ ലഭിക്കു​ന്ന​തി​നു ചില പരീക്ഷണ-പരാജ​യങ്ങൾ ആവശ്യ​മാ​യി​വ​രും. എന്നാൽ ചിത്ര ഛായാ​ഗ്ര​ഹ​ണ​ത്തി​ന്റെ അടിസ്ഥാന തത്ത്വങ്ങൾ ലളിത​മാണ്‌. ശ്രദ്ധാ​പൂർവ​മായ ആസൂ​ത്ര​ണ​ത്താ​ലും വിശദാം​ശ​ങ്ങൾക്കു ശ്രദ്ധനൽകു​ന്ന​തി​നാ​ലും നിങ്ങൾക്ക്‌ ഏറ്റവും ലളിത​മായ കാമറ​കൾകൊ​ണ്ടു​പോ​ലും, നിങ്ങളും നിങ്ങളു​ടെ പ്രിയ​പ്പെ​ട്ട​വ​രും വരും​വർഷ​ങ്ങ​ളിൽ പ്രിയ​ങ്ക​ര​മാ​യി സൂക്ഷി​ക്കുന്ന നല്ല ഛായാ​ചി​ത്രങ്ങൾ എടുക്കാൻ കഴിയും!