ദൈവം—ചൂതാ​ട്ട​ക്കാ​ര​നോ സ്രഷ്ടാ​വോ?

“പ്രകൃ​ത്യ​തീ​ത​മായ ഏതുതരം തർക്കങ്ങ​ളെ​യും പല ശാസ്‌ത്ര​ജ്ഞ​ന്മാ​രും ഇഷ്ടാനു​സ​രണം എതിർക്കു​ന്നു​വെന്ന കാര്യ​ത്തിൽ സംശയ​മില്ല. വേദാ​ന്ത​പ​ര​മായ കാര്യ​ങ്ങ​ളെ​ക്കു​റി​ച്ചു പറയു​കയേ വേണ്ട. ഒരു ദൈവ​മോ സൃഷ്ടി​പ​ര​മായ ഒരു അമൂർത്ത തത്ത്വമോ . . . ഉണ്ടായി​രു​ന്നേ​ക്കാ​മെന്ന ആശയത്തെ അവർ പുച്ഛി​ച്ചു​ത​ള്ളു​ന്നു. വ്യക്തി​പ​ര​മാ​യി ഞാൻ അവരുടെ മനോ​ഭാ​വത്തെ അംഗീ​ക​രി​ക്കു​ന്നില്ല,” ദക്ഷിണ ഓസ്‌​ട്രേ​ലി​യ​യി​ലെ അഡലെ​യ്‌ഡ്‌ യൂണി​വേ​ഴ്‌സി​റ്റി​യി​ലുള്ള ഗണിത​ഭൗ​തി​ക​ശാ​സ്‌ത്ര പ്രൊ​ഫ​സ​റായ പോൾ ഡേവീസ്‌ ദൈവ​മ​നസ്സ്‌ (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ പറയുന്നു.

ഡേവീസ്‌ ഇങ്ങനെ​യും പറയുന്നു: “പ്രപഞ്ച​ത്തി​ലെ നിയമങ്ങൾ, വിവിധ സങ്കീർണ ജീവരൂ​പ​ങ്ങ​ളു​ടെ ഉത്ഭവത്തി​നു തികച്ചും അനുകൂ​ല​മാ​ണെന്ന്‌ ശ്രദ്ധാ​പൂർവ​മായ പഠനം സൂചി​പ്പി​ക്കു​ന്നു. ജീവജാ​ല​ങ്ങ​ളു​ടെ കാര്യ​ത്തിൽ, അവയുടെ അസ്‌തി​ത്വം ഭാഗ്യ​വ​ശാ​ലുള്ള അനേകം യാദൃ​ച്ഛിക സംഭവ​ങ്ങളെ ആധാര​മാ​ക്കി​യു​ള്ള​താ​ണെന്നു കാണ​പ്പെ​ടു​ന്നു. ചില ശാസ്‌ത്ര​ജ്ഞ​ന്മാ​രും തത്ത്വചി​ന്ത​ക​രും അതിനെ തികച്ചും ആശ്ചര്യ​ജ​ന​ക​മായ ഒരു സംഗതി എന്നു പാടി​പ്പു​ക​ഴ്‌ത്തി​യി​രി​ക്കു​ന്നു.”

അദ്ദേഹം തുടർന്നു പറയുന്നു: “ശാസ്‌ത്രീയ അന്വേ​ഷണം അജ്ഞാത​മാ​യ​തി​ലേ​ക്കുള്ള ഒരു യാത്ര​യാണ്‌. . . . പക്ഷേ ഈ അന്വേ​ഷ​ണ​ത്തി​ലു​ട​നീ​ളം പരിചി​ത​മായ ന്യായ​ബോ​ധ​വും ക്രമവും കാണാ​വു​ന്ന​താണ്‌. ഈ പ്രാപ​ഞ്ചിക ക്രമത്തി​നു പിന്നിൽ, അതി​ലോ​ല​വും ഏകോ​പി​ത​വു​മായ ഒരു ഐക്യത ഉളവാ​ക്ക​ത്ത​ക്ക​വി​ധം പരസ്‌പരം ബന്ധപ്പെട്ടു കിടക്കുന്ന സുനി​ശ്ചി​ത​മായ ഗണിത​ശാ​സ്‌ത്ര​നി​യ​മങ്ങൾ ഉള്ളതായി നാം കാണും. ഈ നിയമ​ങ്ങൾക്കു സുന്ദര​മായ ലാളി​ത്യ​മുണ്ട്‌.”

ഇപ്രകാ​രം പറഞ്ഞു​കൊണ്ട്‌ ഡേവീസ്‌ ഉപസം​ഹ​രി​ക്കു​ന്നു: “പ്രപഞ്ച​ത്തി​ന്റെ സ്വഭാവം മനസ്സി​ലാ​ക്കാ​നുള്ള കഴിവ്‌ ഹോമോ സാപ്പി​യൻസി​നു മാത്രം ഉള്ളതിന്റെ കാരണം വലി​യൊ​രു പിടി​കി​ട്ടാ​പ്ര​ശ്‌ന​മാണ്‌. . . . നാം ഈ പ്രപഞ്ച​ത്തിൽ സ്ഥിതി ചെയ്യു​ന്നതു കേവലം യാദൃ​ച്ഛി​ക​മോ ആകസ്‌മി​ക​മോ ആയ ഒരു സംഭവ​ത്താ​ലാ​ണെന്ന്‌ എനിക്കു വിശ്വ​സി​ക്കാൻ കഴിയു​ന്നില്ല. നാം ഈ പ്രപഞ്ച​വു​മാ​യി അഭേദ്യ​മാ​യി ബന്ധപ്പെ​ട്ടി​രി​ക്കു​ന്നു . . . നാം ഇവിടെ ആയിരി​ക്കാൻ ഉദ്ദേശി​ക്ക​പ്പെ​ട്ടി​രി​ക്കു​ന്ന​തു​ത​ന്നെ​യാണ്‌.” എങ്കിലും ഒരു രൂപകൽപ്പി​താവ്‌, അതായത്‌ ദൈവം ഉണ്ടെന്ന നിഗമ​ന​ത്തിൽ ഡേവീസ്‌ എത്തി​ച്ചേ​രു​ന്നില്ല. എന്നാൽ നിങ്ങളോ? മനുഷ്യ​വർഗം ഇവി​ടെ​യാ​യി​രി​ക്കാൻ ഉദ്ദേശി​ക്ക​പ്പെ​ട്ടി​രു​ന്നോ? അങ്ങനെ​യെ​ങ്കിൽ നാം ഇവിടെ ആയിരി​ക്കാൻ ഉദ്ദേശി​ച്ചത്‌ ആരാണ്‌?

“പിടി​കി​ട്ടാ​പ്രശ്‌ന”ത്തിനുള്ള താക്കോ​ലു​കൾ

‘വലി​യൊ​രു പിടി​കി​ട്ടാ​പ്ര​ശ്‌നം’ എന്ന്‌ ഡേവീസ്‌ വിളി​ച്ചത്‌ മനസ്സി​ലാ​ക്കാൻ അപ്പോ​സ്‌ത​ല​നായ പൗലൊസ്‌ നമുക്ക്‌ ഒരു സൂചന നൽകുന്നു. ദൈവം തന്നെത്താൻ വെളി​പ്പെ​ടു​ത്തി​യി​രി​ക്കു​ന്ന​തെ​ങ്ങ​നെ​യെന്നു പൗലൊസ്‌ കാണി​ക്കു​ന്നു: “[അനീതി​കൊ​ണ്ടു സത്യത്തെ തടുക്കുന്ന മനുഷ്യ​രു​ടെ] സകല അഭക്ഷി​ക്കും അനീതി​ക്കും നേരെ ദൈവ​ത്തി​ന്റെ കോപം സ്വർഗ്ഗ​ത്തിൽ നിന്നു വെളി​പ്പെ​ടു​ന്നു. ദൈവ​ത്തെ​ക്കു​റി​ച്ചു അറിയാ​കു​ന്നതു അവർക്കു വെളി​വാ​യി​രി​ക്കു​ന്നു; ദൈവം അവർക്കു വെളി​വാ​ക്കി​യ​ല്ലോ. അവന്റെ നിത്യ​ശ​ക്തി​യും ദിവ്യ​ത്വ​വു​മാ​യി അവന്റെ അദൃശ്യ​ല​ക്ഷ​ണങ്ങൾ ലോക​സൃ​ഷ്ടി​മു​തൽ അവന്റെ പ്രവൃ​ത്തി​ക​ളാൽ ബുദ്ധി​ക്കു​തെ​ളി​വാ​യി വെളി​പ്പെ​ട്ടു​വ​രു​ന്നു; അവർക്കു പ്രതി​വാ​ദ​മി​ല്ലാ​തി​രി​ക്കേ​ണ്ട​തി​ന്നു തന്നേ.” (റോമർ 1:18-20)a അതേ, ജീവരൂ​പ​ങ്ങ​ളു​ടെ അനന്തമായ വൈവി​ധ്യ​ങ്ങൾ അവയുടെ അമ്പരപ്പി​ക്കുന്ന സങ്കീർണത, മനോ​ജ്ഞ​മായ രൂപകൽപ്പന എന്നിവ മനുഷ്യൻ എന്നെങ്കി​ലും അറിഞ്ഞി​ട്ടുള്ള എന്തി​നെ​ക്കാ​ളും ഏറെ ഉത്‌കൃ​ഷ്ട​മായ ഒരു പരമോ​ന്നത ശക്തി, ബുദ്ധി​ശക്തി അല്ലെങ്കിൽ മനസ്സ്‌ ഉണ്ടെന്നു തിരി​ച്ച​റി​യാൻ താഴ്‌മ​യും ഭയഭക്തി​യു​മുള്ള ഒരുവനെ സഹായി​ക്കേ​ണ്ട​താണ്‌.—സങ്കീർത്തനം 8:3, 4.

ദൈവത്തെ തള്ളിക്ക​ള​യു​ന്ന​വരെ സംബന്ധി​ച്ചുള്ള പൗലൊ​സി​ന്റെ പിൻവ​രുന്ന വാക്കുകൾ ഒരുവനു ചിന്തി​ക്കാൻ വകനൽകു​ന്നു: “ജ്ഞാനികൾ എന്നു പറഞ്ഞു​കൊ​ണ്ടു അവർ മൂഢരാ​യി​പ്പോ​യി . . . ദൈവ​ത്തി​ന്റെ സത്യം അവർ വ്യാജ​മാ​ക്കി മാററി​ക്ക​ളഞ്ഞു, സൃഷ്ടി​ച്ച​വ​നെ​ക്കാൾ സൃഷ്ടിയെ ഭജിച്ചു ആരാധി​ച്ചു; അവൻ എന്നേക്കും വാഴ്‌ത്ത​പ്പെ​ട്ടവൻ, ആമേൻ.” (റോമർ 1:22, 25) “പ്രകൃതി”യെ പൂജി​ക്കു​ക​യും ദൈവത്തെ തള്ളിക്ക​ള​യു​ക​യും ചെയ്യു​ന്നവർ യഹോ​വ​യു​ടെ കാഴ്‌ച​പ്പാ​ടിൽ ഒരിക്ക​ലും ജ്ഞാനി​കളല്ല. പരസ്‌പര വിരു​ദ്ധ​മായ പരിണാ​മ​സി​ദ്ധാ​ന്ത​ങ്ങ​ളു​ടെ ചെളി​ക്കു​ണ്ടിൽ ആണ്ടു​പോയ അവർ, സ്രഷ്ടാ​വി​നെ​യും അവന്റെ സൃഷ്ടി​യു​ടെ സങ്കീർണ​ത​യെ​യും രൂപകൽപ്പ​ന​യെ​യും അംഗീ​ക​രി​ക്കു​ന്ന​തിൽ പരാജ​യ​പ്പെ​ടു​ന്നു.

“യാദൃ​ച്ഛിക സംഭവ​ങ്ങ​ളു​ടെ വൻ പരമ്പര”

പൗലൊസ്‌ ഇങ്ങനെ​യും എഴുതി: “എന്നാൽ വിശ്വാ​സം കൂടാതെ ദൈവത്തെ പ്രസാ​ദി​പ്പി​പ്പാൻ കഴിയു​ന്നതല്ല; ദൈവ​ത്തി​ന്റെ അടുക്കൽ വരുന്നവൻ ദൈവം ഉണ്ടു എന്നും തന്നെ അന്വേ​ഷി​ക്കു​ന്ന​വർക്കു പ്രതി​ഫലം കൊടു​ക്കു​ന്നു എന്നും വിശ്വ​സി​ക്കേ​ണ്ട​ത​ല്ലോ.” (എബ്രായർ 11:6) ക്ഷണവി​ശ്വാ​സമല്ല, മറിച്ച്‌ സൂക്ഷ്‌മ പരിജ്ഞാ​നത്തെ ആധാര​മാ​ക്കി​യുള്ള വിശ്വാ​സം, നാം എന്തു​കൊ​ണ്ടാണ്‌ അസ്‌തി​ത്വ​ത്തി​ലു​ള്ള​തെന്നു മനസ്സി​ലാ​ക്കു​ന്ന​തി​ലേക്കു നമ്മെ നയിക്കും. (കൊ​ലൊ​സ്സ്യർ 1:9, 10) ജീവൻ സ്ഥിതി ചെയ്യു​ന്നത്‌ “പത്തു ലക്ഷം ഡോള​റി​ന്റെ ഭാഗ്യ​ക്കു​റി ഒന്നിനു പുറകേ ഒന്നായി പത്തു ലക്ഷം തവണ അടി​ച്ചെ​ടു​ത്ത​തു​പോ​ലെ”യാണെന്ന്‌ ചില ശാസ്‌ത്ര​ജ്ഞ​ന്മാർ നമ്മെ വിശ്വ​സി​പ്പി​ക്കാൻ ആഗ്രഹി​ക്കു​മ്പോ​ഴാണ്‌ ക്ഷണവി​ശ്വാ​സം രംഗ​പ്ര​വേശം ചെയ്യു​ന്നത്‌.

ജീവന്‌ അനിവാ​ര്യ​മായ രണ്ട്‌ മൂലക​ങ്ങ​ളു​ടെ—കാർബ​ണി​ന്റെ​യും ഓക്‌സി​ജ​ന്റെ​യും—രൂപീ​ക​ര​ണ​ത്തി​ലേക്കു നയിച്ച ന്യൂക്ലി​യർ പ്രവർത്ത​നങ്ങൾ, സന്തുലി​ത​മായ അളവിൽ ഈ മൂലകങ്ങൾ ഉത്‌പാ​ദി​പ്പി​ച്ചത്‌ ഭാഗ്യ​വ​ശാ​ലു​ണ്ടായ ഒരു ആകസ്‌മിക സംഭവ​ത്താൽ മാത്ര​മാ​ണെന്ന്‌ ബ്രിട്ടീഷ്‌ ശാസ്‌ത്ര​ജ്ഞ​നായ ഫ്രെഡ്‌ ഹോയ്‌ൽ സിദ്ധാ​ന്തി​ച്ചു.

അദ്ദേഹം മറ്റൊരു ഉദാഹ​രണം നൽകുന്നു: “പ്രോ​ട്ടോ​ണി​ന്റെ​യും ഇലക്‌​ട്രോ​ണി​ന്റെ​യും സംയോ​ജിത പിണ്ഡം പെട്ടെന്ന്‌, ന്യൂ​ട്രോ​ണി​ന്റെ പിണ്ഡ​ത്തെ​ക്കാൾ അൽപ്പം കുറവാ​യി​രി​ക്കു​ന്ന​തി​നു​പ​കരം കൂടു​ക​യാ​ണെ​ങ്കിൽ ഫലം വിപത്‌ക​ര​മാ​യി​രി​ക്കും. . . . പ്രപഞ്ച​ത്തി​ലൊ​ട്ടാ​കെ ഹൈ​ഡ്രജൻ ആറ്റങ്ങൾ തത്‌ക്ഷണം വിഘടിച്ച്‌ ന്യൂ​ട്രോ​ണു​ക​ളും ന്യൂ​ട്രി​നോ​ക​ളും ആയിത്തീ​രും. ന്യൂക്ലി​യർ ഇന്ധനം ഇല്ലാതാ​യാൽ സൂര്യൻ എരിഞ്ഞ​മ​രും.” പ്രപഞ്ച​ത്തി​ലെ ശതകോ​ടി​ക്ക​ണ​ക്കി​നു നക്ഷത്ര​ങ്ങ​ളു​ടെ കാര്യ​ത്തി​ലും ഇതു ബാധക​മാ​കും.

ഹോയ്‌ൽ ഇപ്രകാ​രം ഉപസം​ഹ​രി​ക്കു​ന്നു: ‘ജീവനുള്ള പദാർഥങ്ങൾ ഉൾപ്പെ​ടാത്ത യാദൃ​ച്ഛിക സംഭവ​ങ്ങ​ളു​ടെ ആർഷക​മായ ഒരു വൻ പരമ്പര​യി​ലൂ​ടെ, കാർബ​ണീയ പദാർഥ​ങ്ങ​ളും തന്നിമി​ത്തം മനുഷ്യ ജീവനും അസ്‌തി​ത്വ​ത്തിൽ വന്നതായി കാണ​പ്പെ​ടു​ന്നു.’ അദ്ദേഹം പറയുന്നു: “[ജീവന്‌ ആധാര​മായ] അത്തരം ഗുണധർമങ്ങൾ ആനന്ദക​ര​മായ യാദൃ​ച്ഛിക സംഭവ​ങ്ങ​ളു​ടെ ഒരു ഇഴപോ​ലെ സ്വാഭാ​വിക ലോക​മെന്ന ഉടയാ​ട​യിൽ നെയ്‌തു​ചേർക്ക​പ്പെ​ട്ടി​രി​ക്കു​ന്ന​തു​പോ​ലെ തോന്നു​ന്നു. എന്നാൽ, ജീവന്‌ അനിവാ​ര്യ​മായ ഈ വിചിത്ര യാദൃ​ച്ഛിക സംഭവങ്ങൾ വളരെ​യ​ധി​ക​മു​ള്ള​തു​കൊണ്ട്‌ അവയ്‌ക്കു നിദാ​ന​മായ ഒരു വിശദീ​ക​രണം ആവശ്യ​മു​ള്ള​താ​യി തോന്നു​ന്നു.”—ചെരി​ച്ചെ​ഴു​ത്തു ഞങ്ങളു​ടേത്‌.

അദ്ദേഹം ഇങ്ങനെ​യും പറഞ്ഞു: “യാദൃ​ച്ഛി​ക​മെന്നു തോന്നി​ക്കുന്ന ഇത്തരം ആകസ്‌മിക ക്രമീ​ക​ര​ണങ്ങൾ ശരിക്കും യാദൃ​ച്ഛി​കം​ത​ന്നെ​യാ​യി​രു​ന്നോ അതോ അല്ലായി​രു​ന്നോ എന്നുള്ള​തും അതു​കൊ​ണ്ടു​തന്നെ ജീവൻ ആകസ്‌മി​ക​മാ​യി​ട്ടു​ണ്ടാ​യ​താ​ണോ അല്ലയോ എന്നുള്ള​തും തീരു​മാ​നി​ക്കു​ന്ന​താണ്‌ പ്രശ്‌ന​മാ​യി​രി​ക്കു​ന്നത്‌. അത്തരം ചോദ്യം ചോദി​ക്കാൻ ഒരു ശാസ്‌ത്ര​ജ്ഞ​നും ഇഷ്ടപ്പെ​ടില്ല, എങ്കിലും അതു ചോദി​ക്കേ​ണ്ടി​യി​രി​ക്കു​ന്നു. ഈ ക്രമീ​ക​ര​ണങ്ങൾ ബുദ്ധി​പൂർവം ചെയ്‌ത മനപ്പൂർവ പ്രവൃ​ത്തി​യാ​യി​രി​ക്കു​മോ?”

പോൾ ഡേവിസ്‌ എഴുതു​ന്നു: “‘ന്യൂക്ലി​യർ ഊർജ​ത​ന്ത്ര​ത്തി​ലെ നിയമങ്ങൾ, അവ നക്ഷത്ര​ങ്ങൾക്കു​ള്ളിൽ ഉളവാ​ക്കുന്ന ഫലങ്ങൾ കണക്കി​ലെ​ടുത്ത്‌ മനപ്പൂർവം രൂപകൽപ്പന ചെയ്യപ്പെട്ട’തുപോ​ലെ​യാ​ണെന്ന്‌ അഭി​പ്രാ​യ​പ്പെ​ടാൻ ഹോയ്‌ൽ പ്രേരി​ത​നാ​യി. കാരണം ‘യാദൃ​ച്ഛിക സംഭവ​ങ്ങ​ളു​ടെ ഈ വൻ പരമ്പര’ അദ്ദേഹ​ത്തിൽ അത്രയ്‌ക്കും മതിപ്പു​ള​വാ​ക്കി​യി​രു​ന്നു.” ഈ “[ഭാഗ്യ​വ​ശാ​ലുള്ള] യാദൃ​ച്ഛിക സംഭവ​ങ്ങ​ളു​ടെ വൻ പരമ്പര”യ്‌ക്ക്‌ ആരാണ്‌ അല്ലെങ്കിൽ എന്താണ്‌ കാരണ​മാ​യി​രി​ക്കു​ന്നത്‌? അനന്തമായ വൈവി​ധ്യ​ത്തോ​ടു​കൂ​ടിയ മനോ​ജ്ഞ​മായ ലക്ഷക്കണ​ക്കി​നു സസ്യങ്ങ​ളും ജന്തുക്ക​ളും നിറഞ്ഞ ഈ കൊച്ചു ഗ്രഹം ഉണ്ടാക്കി​യത്‌ ആരാണ്‌ അല്ലെങ്കിൽ എന്താണ്‌?

ബൈബി​ളി​ന്റെ ഉത്തരം

ഏതാണ്ട്‌ മൂവാ​യി​രം വർഷം മുമ്പ്‌ സങ്കീർത്ത​ന​ക്കാ​രൻ ഭയഭക്തി​യോ​ടെ ഇപ്രകാ​രം എഴുതി: “യഹോവേ, നിന്റെ പ്രവൃ​ത്തി​കൾ എത്ര പെരു​കി​യി​രി​ക്കു​ന്നു! ജ്ഞാന​ത്തോ​ടെ നീ അവയെ ഒക്കെയും ഉണ്ടാക്കി​യി​രി​ക്കു​ന്നു; ഭൂമി നിന്റെ സൃഷ്ടി​ക​ളാൽ നിറെ​ഞ്ഞി​രി​ക്കു​ന്നു. വലിപ്പ​വും വിസ്‌താ​ര​വും ഉള്ള സമുദ്രം അതാ കിടക്കു​ന്നു! അതിൽ സഞ്ചരി​ക്കുന്ന ചെറി​യ​തും വലിയ​തു​മായ അസംഖ്യ​ജ​ന്തു​ക്കൾ ഉണ്ടു.”—സങ്കീർത്തനം 104:24, 25.

അപ്പോ​സ്‌ത​ല​നാ​യ യോഹ​ന്നാൻ ഇങ്ങനെ പറഞ്ഞു: “കർത്താവേ, നീ സർവ്വവും സൃഷ്ടി​ച്ച​വ​നും എല്ലാം നിന്റെ ഇഷ്ടം ഹേതു​വാൽ ഉണ്ടായ​തും സൃഷ്ടി​ക്ക​പ്പെ​ട്ട​തും ആകയാൽ മഹത്വ​വും ബഹുമാ​ന​വും ശക്തിയും കൈ​ക്കൊൾവാൻ യോഗ്യൻ.” (വെളി​പ്പാ​ടു 4:11) ജീവൻ, ആകസ്‌മിക യാദൃ​ച്ഛി​ക​ത​യു​ടെ, ലക്ഷക്കണ​ക്കി​നു ജീവരൂ​പങ്ങൾ ഉളവാ​കു​ന്ന​തിൽ കലാശിച്ച ഏതെങ്കി​ലും ഒരു പ്രാപ​ഞ്ചിക ഭാഗ്യ​ക്കു​റി നറു​ക്കെ​ടു​പ്പി​ന്റെ പരിണ​തി​യല്ല.

ദൈവം ‘സർവ്വവും സൃഷ്ടിച്ചു, എല്ലാം [അവന്റെ] ഇഷ്ടം ഹേതു​വാൽ ഉണ്ടാകു​ക​യും സൃഷ്ടി​ക്ക​പ്പെ​ടു​ക​യും ചെയ്‌തു’ എന്നതാണ്‌ ലളിത​മായ സത്യം. യേശു​ക്രി​സ്‌തു​ത​ന്നെ​യും പരീശ​ന്മാ​രോട്‌ ഇപ്രകാ​രം ചോദി​ച്ചു: ‘സൃഷ്ടി​ച്ചവൻ ആദിയിൽ അവരെ ആണും പെണ്ണു​മാ​യി സൃഷ്ടിച്ചു എന്നു നിങ്ങൾ വായി​ച്ചി​ട്ടി​ല്ല​യോ?’ യേശു​വി​നു സ്രഷ്ടാ​വി​നെ അറിയാ​മാ​യി​രു​ന്നു! യഹോ​വ​യു​ടെ വിദഗ്‌ധ വേലക്കാ​ര​നെ​ന്ന​നി​ല​യിൽ സൃഷ്ടി​പ്പി​ന്റെ സമയത്ത്‌ അവൻ യഹോ​വ​യു​ടെ അരികി​ലു​ണ്ടാ​യി​രു​ന്നു.—മത്തായി 19:4, 5; സദൃശ​വാ​ക്യ​ങ്ങൾ 8:22-31.

എന്നാൽ, സ്രഷ്ടാ​വി​നെ​ക്കു​റി​ച്ചുള്ള ഈ അടിസ്ഥാന സത്യം ഗ്രഹി​ക്കാ​നും അംഗീ​ക​രി​ക്കാ​നും വിശ്വാ​സ​വും താഴ്‌മ​യും ആവശ്യ​മാണ്‌. ഇത്‌ അന്ധമായ ക്ഷണവി​ശ്വാ​സമല്ല. അനുഭ​വ​വേ​ദ്യ​മായ, ദൃശ്യ​മായ തെളി​വി​നെ അടിസ്ഥാ​ന​പ്പെ​ടു​ത്തി​യു​ള്ള​താ​ണത്‌. അതേ, ‘[ദൈവ​ത്തി​ന്റെ] നിത്യ​ശ​ക്തി​യും ദിവ്യ​ത്വ​വു​മാ​യി അവന്റെ അദൃശ്യ​ല​ക്ഷ​ണങ്ങൾ ലോക​സൃ​ഷ്ടി​മു​തൽ വെളി​പ്പെ​ട്ടു​വ​രു​ന്നു.’—റോമർ 1:20.

ദൈവം സൃഷ്ടി​ക്രിയ നടത്തി​യത്‌ എങ്ങനെ​യെന്ന്‌ നമ്മുടെ ഇപ്പോ​ഴത്തെ പരിമി​ത​മായ ശാസ്‌ത്ര​വി​ജ്ഞാ​നം​കൊ​ണ്ടു വിശദീ​ക​രി​ക്കാൻ സാധി​ക്കു​ക​യില്ല. അതു​കൊണ്ട്‌, ജീവന്റെ ഉത്ഭവം സംബന്ധിച്ച സകലതും അറിയാ​നോ മനസ്സി​ലാ​ക്കാ​നോ ഇപ്പോൾ നമുക്കു സാധി​ക്കു​ക​യി​ല്ലെ​ന്നത്‌ നാം അംഗീ​ക​രി​ക്കേ​ണ്ടി​യി​രി​ക്കു​ന്നു. യഹോ​വ​യു​ടെ ഈ വാക്കുകൾ അതു നമ്മെ ഓർമി​പ്പി​ക്കു​ന്നു: “എന്റെ വിചാ​രങ്ങൾ നിങ്ങളു​ടെ വിചാ​രങ്ങൾ അല്ല; നിങ്ങളു​ടെ വഴികൾ എന്റെ വഴിക​ളു​മല്ല . . . ആകാശം ഭൂമി​ക്കു​മീ​തെ ഉയർന്നി​രി​ക്കു​ന്ന​തു​പോ​ലെ എന്റെ വഴികൾ നിങ്ങളു​ടെ വഴിക​ളി​ലും എന്റെ വിചാ​രങ്ങൾ നിങ്ങളു​ടെ വിചാ​ര​ങ്ങ​ളി​ലും ഉയർന്നി​രി​ക്കു​ന്നു.”—യെശയ്യാ​വു 55:8, 9.

തിര​ഞ്ഞെ​ടു​പ്പു നിങ്ങളു​ടേ​താണ്‌: ഒന്നുകിൽ ഭാഗ്യ​വ​ശാൽ സംഭവിച്ച പരിണാ​മ​ത്തിൽ, വിജയ​പൂർണ​മായ ഒരു പരിണ​തി​യി​ലേക്കു നയിച്ച അസംഖ്യം യാദൃ​ച്ഛിക സംഭവ​ങ്ങ​ളിൽ, ഉള്ള വിശ്വാ​സം അല്ലെങ്കിൽ ഉദ്ദേശ്യ​ക​നും സ്രഷ്ടാ​വും രൂപകൽപ്പി​താ​വു​മായ യഹോ​വ​യാം ദൈവ​ത്തി​ലുള്ള വിശ്വാ​സം. നിശ്വസ്‌ത പ്രവാ​ചകൻ യഥോ​ചി​തം ഇപ്രകാ​രം പറഞ്ഞു: “യഹോവ നിത്യ​ദൈവം; ഭൂമി​യു​ടെ അറുതി​കളെ സൃഷ്ടി​ച്ചവൻ തന്നേ; അവൻ ക്ഷീണി​ക്കു​ന്നില്ല, തളർന്നു​പോ​കു​ന്ന​തു​മില്ല; അവന്റെ ബുദ്ധി അപ്ര​മേ​യ​മ​ത്രേ.”—യെശയ്യാ​വു 40:28.

അപ്പോൾ, നിങ്ങൾ എന്തു വിശ്വ​സി​ക്കും? നിങ്ങളു​ടെ തീരു​മാ​നം നിങ്ങളു​ടെ ഭാവി​പ്ര​തീ​ക്ഷ​ക​ളിൽ ഒരു വലിയ മാറ്റമു​ള​വാ​ക്കും. പരിണാ​മ​ത്തി​ലേക്ക്‌ “ദേഹി”യെ തിരു​കി​ക്ക​യ​റ്റാൻ കത്തോ​ലി​ക്കാ ദൈവ​ശാ​സ്‌ത്രം അതിസ​ങ്കീർണ​മായ, വർണപ്പ​കി​ട്ടാർന്ന വാദഗ​തി​കൾ നടത്തി​യി​ട്ടു​ണ്ടെ​ങ്കി​ലും, പരിണാ​മം സത്യമാ​ണെ​ങ്കിൽ മരണം എന്നു പറയു​ന്നതു സമ്പൂർണ വിസ്‌മൃ​താ​വ​സ്ഥയെ അർഥമാ​ക്കും.b മരണത്തെ തടുക്കാ​നാ​വി​ല്ലെന്ന വസ്‌തുത മനുഷ്യ​നു മരിക്കാത്ത ദേഹി​യു​ണ്ടെന്നു പറഞ്ഞ്‌ ലഘൂക​രി​ക്കാ​നാ​വില്ല.—ഉല്‌പത്തി 2:7; യെഹെ​സ്‌കേൽ 18:4, 20.

ബൈബിൾ സത്യമാ​ണെ​ന്നും ജീവനുള്ള ദൈവ​മാണ്‌ സ്രഷ്ടാ​വെ​ന്നും നാം അംഗീ​ക​രി​ക്കു​ക​യാ​ണെ​ങ്കിൽ, സന്തുലി​ത​വും ഏകോ​പി​ത​വു​മായ അവസ്ഥയി​ലേക്കു പുനഃ​സ്ഥി​തീ​ക​രി​ക്ക​പ്പെട്ട ഒരു ഭൂമി​യി​ലെ നിത്യ​ജീ​വ​നി​ലേക്ക്‌, പൂർണ​ത​യുള്ള ജീവനി​ലേക്ക്‌ പുനരു​ത്ഥാ​നം ചെയ്യ​പ്പെ​ടു​മെ​ന്നുള്ള വാഗ്‌ദ​ത്ത​മുണ്ട്‌. (യോഹ​ന്നാൻ 5:28, 29) നിങ്ങൾ എന്തിൽ വിശ്വാ​സ​മർപ്പി​ക്കും? ഡാർവി​ന്റെ പരിണാ​മ​സി​ദ്ധാ​ന്ത​ത്തി​ന്റെ അവിശ്വ​സ​നീയ യാദൃ​ച്ഛി​ക​ത​യി​ലോ? അതോ ഉദ്ദേശ്യ​ത്തോ​ടെ പ്രവർത്തിച്ച, തുടർന്നും അങ്ങനെ​തന്നെ പ്രവർത്തി​ക്കുന്ന ഒരു സ്രഷ്ടാ​വി​ലോ?c

[അടിക്കു​റി​പ്പു​കൾ]

[14-ാം പേജിലെ ആകർഷ​ക​വാ​ക്യം]

ഭൂമിയിലെ നമ്മുടെ അസ്‌തി​ത്വം “പത്തു ലക്ഷം ഡോള​റി​ന്റെ ഭാഗ്യ​ക്കു​റി ഒന്നിനു പുറകേ ഒന്നായി പത്തു ലക്ഷം തവണ അടി​ച്ചെ​ടു​ത്ത​തു​പോ​ലെ”യാണെ​ന്നാണ്‌ ചില പരിണാ​മ​വാ​ദി​കൾ ഫലത്തിൽ പറയു​ന്നത്‌.

[15-ാം പേജിലെ ചതുരം/ചിത്രം]

അനന്തമായ വൈവി​ധ്യ​വും രൂപകൽപ്പ​ന​യും

പ്രാണികൾ “വർഷം​തോ​റും ശാസ്‌ത്ര​ജ്ഞ​ന്മാർ 7,000 മുതൽ 10,000 വരെ പുതിയ ഇനം പ്രാണി​കളെ കണ്ടെത്തു​ന്നു,” ദ വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ പറയുന്നു. എന്നിട്ടും, “പത്തു ലക്ഷംമു​തൽ ഒരു കോടി​വരെ ഇനങ്ങളെ ഇനിയും കണ്ടെത്താ​നുണ്ട്‌.” ല മോൺട്‌ എന്ന ഫ്രഞ്ച്‌ വർത്തമാ​ന​പ​ത്ര​ത്തിൽ കാത്‌റിൻ വിൻസൻറ്‌ എഴുതിയ ഒരു ലേഖനത്തെ ഉദ്ധരി​ച്ചു​കൊണ്ട്‌ ഗാർഡി​യൻ വീക്ക്‌ലി ഇങ്ങനെ പറയുന്നു: രേഖ​പ്പെ​ടു​ത്ത​പ്പെ​ട്ടി​ട്ടുള്ള ഇനങ്ങൾ, “ഏതാണ്ട്‌ 50 ലക്ഷം മുതൽ 5 കോടി വരെ വരുന്ന . . . സാക്ഷാൽ സംഖ്യ​യു​മാ​യി തട്ടിച്ചു നോക്കു​മ്പോൾ ഏതുമല്ല.”

നമ്മെ വിസ്‌മ​യ​ഭ​രി​ത​രാ​ക്കുന്ന പ്രാണി​ലോ​ക​ത്തെ​ക്കു​റി​ച്ചു ചിന്തി​ക്കുക! തേനീ​ച്ചകൾ, ഉറുമ്പു​കൾ, കടന്നലു​കൾ, ചിത്ര​ശ​ല​ഭങ്ങൾ, പാറ്റകൾ, ഇന്ദ്ര​ഗോ​പങ്ങൾ, മിന്നാ​മി​നു​ങ്ങു​കൾ, ചിതലു​കൾ, നിശാ​ശ​ല​ഭങ്ങൾ, ഈച്ചകൾ, ആനത്തു​മ്പി​കൾ, കൊതു​കു​കൾ, ഇരട്ടവാ​ലൻ, വിട്ടി​ലു​കൾ, പേൻ, ചീവീ​ടു​കൾ, ചെള്ളുകൾ എന്നിവ അവയിൽ ഏതാനും മാത്ര​മാണ്‌. പട്ടിക​യ്‌ക്ക്‌ അന്തമി​ല്ലാ​ത്ത​തു​പോ​ലെ തോന്നി​ക്കു​ന്നു!

പക്ഷികൾ 28 ഗ്രാമിൽ താഴെ തൂക്കം​വ​രുന്ന ഒരു പക്ഷി​യെ​ക്കു​റിച്ച്‌ നാം എന്തു പറയാ​നാണ്‌? “അലാസ്‌ക​യി​ലെ ഉയർന്ന തലങ്ങളി​ലുള്ള വൃക്ഷനി​ര​ക​ളിൽനിന്ന്‌ തെക്കേ അമേരി​ക്ക​യു​ടെ മഴക്കാ​ടു​കൾവരെ പറന്ന്‌, വൃക്ഷങ്ങൾ വളർന്നു​നിൽക്കുന്ന ഗിരി​ശൃം​ഗ​ങ്ങ​ളും നഗര​പ്രാ​ന്ത​ത്തി​ലെ അംബര​ചും​ബി​ക​ളായ കെട്ടി​ട​ങ്ങ​ളും താണ്ടി അറ്റ്‌ലാൻറിക്‌ സമു​ദ്ര​വും മെക്‌സി​ക്കൻ ഉൾക്കട​ലും മുറി​ച്ചു​ക​ടന്ന്‌ അത്‌ വർഷത്തിൽ 16,000-ത്തിലധി​കം കിലോ​മീ​റ്റർ ദേശാ​ടനം നടത്തു​ന്നതു വിഭാവന ചെയ്യുക.” നമ്മിൽ അത്ഭുത​മു​ണർത്തുന്ന ഈ പക്ഷി ഏതാണ്‌? “ബ്ലാക്ക്‌പോൾ വാർബ്ലർ [ഡെൻ​ഡ്രോയ്‌ക്ക സ്‌ട്ര​യേറ്റ]. വാസ്‌ത​വ​ത്തിൽ, വടക്കേ അമേരി​ക്ക​യി​ലെ കരപ്പക്ഷി​ക​ളിൽ ഒന്നിനും പറക്കലി​ന്റെ കാര്യ​ത്തിൽ ഇതിനെ വെല്ലാൻ സാധി​ക്കു​ക​യില്ല.” (ബുക്ക്‌ ഓഫ്‌ നോർത്ത്‌ അമേരി​ക്കൻ ബേർഡ്‌സ്‌) വീണ്ടും നാം ചോദി​ക്കണം: പ്രകൃ​തി​യി​ലു​ണ്ടായ അസംഖ്യം യാദൃ​ച്ഛിക സംഭവ​ങ്ങ​ളാ​ണോ ഈ പക്ഷിയെ ഉളവാ​ക്കി​യത്‌? അതോ ബുദ്ധി​പൂർവ​ക​മായ രൂപകൽപ്പ​ന​യു​ടെ ഒരു അത്ഭുത​മാ​ണോ ഈ പക്ഷി?

ഈ ഉദാഹ​ര​ണ​ങ്ങൾക്കു പുറമേ, എണ്ണമറ്റ ഗാന​ശേ​ഖ​ര​മുള്ള പക്ഷിക​ളു​മുണ്ട്‌: യൂറോ​പ്പി​ലു​ട​നീ​ള​വും ആഫ്രി​ക്ക​യു​ടെ​യും ഏഷ്യയു​ടെ​യും ഭാഗങ്ങ​ളി​ലും ശ്രുതി​മ​ധു​ര​മായ കളകൂ​ജ​ന​ത്തി​നു പേരു​കേട്ട രാപ്പാടി; “ഒരു ഹാസ്യാ​നു​കരണ വിദഗ്‌ധ​നും ഹൃദി​സ്ഥ​മാ​ക്കിയ ഗാനശ​ക​ലങ്ങൾ പാടാൻ കഴിവു​ള്ളതു”മായ വടക്കേ അമേരി​ക്ക​യി​ലെ വടക്കൻ പരിഹാ​സ​പ്പക്ഷി; “അത്ഭുത​ക​ര​മായ രീതി​യിൽ മറ്റു പക്ഷിക​ളു​ടെ ശബ്ദങ്ങൾ അനുക​രി​ക്കുന്ന, വളരെ ഇമ്പമുള്ള സംഗീ​ത​മു​തിർക്കുന്ന” ഓസ്‌​ട്രേ​ലി​യ​യി​ലെ അതിഗം​ഭീ​ര​നായ ലൈർബേർഡ്‌.—ലോക​ത്തി​ലെ പക്ഷികൾ, ഇംഗ്ലീഷ്‌.

കൂടാതെ, നിരവധി പക്ഷിക​ളു​ടെ വർണത്ത​നി​മ​യും ചിറകു​ക​ളു​ടെ​യും തൂവലു​ക​ളു​ടെ​യും രൂപകൽപ്പ​ന​യും ഒരുവനെ അത്ഭുത​പ​ര​ത​ന്ത്ര​നാ​ക്കു​ന്നു. അതിനു​പു​റമേ, നിലത്തോ കിഴക്കാം​തൂ​ക്കായ പാറക​ളു​ടെ പ്രതല​ങ്ങ​ളി​ലോ വൃക്ഷങ്ങ​ളി​ലോ കൂടു​നെ​യ്യാ​നും കൂടു​കൂ​ട്ടാ​നും അവയ്‌ക്കു കഴിവുണ്ട്‌. നൈസർഗി​ക​മായ അത്തരം ബുദ്ധി​ശക്തി താഴ്‌മ​യു​ള്ള​വ​രിൽ മതിപ്പു​ള​വാ​ക്കേ​ണ്ട​താണ്‌. അവ അസ്‌തി​ത്വ​ത്തിൽ വന്നത്‌ എങ്ങനെ? യാദൃ​ച്ഛിക സംഭവ​ത്താ​ലോ അതോ രൂപകൽപ്പ​ന​യാ​ലോ?

മനുഷ്യ മസ്‌തി​ഷ്‌കം “മസ്‌തി​ഷ്‌ക​ത്തിൽ, 10 ലക്ഷം കോടി​മു​തൽ 100 ലക്ഷം കോടി​വരെ സിനാ​പ്‌സു​കൾ ഉണ്ടായി​രു​ന്നേ​ക്കാം. ഇവയി​ലോ​രോ​ന്നും, വൈദ്യു​ത ആവേഗ​ങ്ങ​ളാ​യി വന്നെത്തുന്ന സംജ്ഞകളെ രജിസ്റ്റർ ചെയ്യുന്ന ഓരോ കൊച്ചു കാൽക്കു​ലേ​റ്റ​റു​ക​ളാ​യി വർത്തി​ക്കു​ന്നു.” (മസ്‌തി​ഷ്‌കം) നാം മസ്‌തി​ഷ്‌കത്തെ ഒരു നിസ്സാര വസ്‌തു​വാ​യി​ട്ടാ​ണു കണക്കാ​ക്കു​ന്നത്‌. എന്നാൽ തലയോ​ട്ടി​ക്ക​കത്തു സുരക്ഷി​ത​മാ​യി വെച്ചി​രി​ക്കുന്ന വിസ്‌മ​യ​മു​ള​വാ​ക്കുന്ന ഒരു പ്രപഞ്ച​മാ​ണത്‌. ചിന്തി​ക്കാ​നും ന്യായ​വാ​ദം ചെയ്യാ​നും ആയിര​ക്ക​ണ​ക്കി​നു ഭാഷകൾ സംസാ​രി​ക്കാ​നും നമ്മെ സഹായി​ക്കുന്ന ഈ അവയവം എങ്ങനെ ഉണ്ടായി? ഭാഗ്യ​വ​ശാൽ വിജയം കൈവ​രിച്ച ലക്ഷക്കണ​ക്കി​നു ചൂതാ​ട്ട​ങ്ങ​ളി​ലൂ​ടെ​യോ? അതോ ബുദ്ധി​പൂർവ​ക​മായ രൂപകൽപ്പ​ന​യാ​ലോ?

[16,17 പേജു​ക​ളി​ലെ രേഖാ​ചി​ത്രം]

ബാഹ്യമസ്‌തിഷ്‌കത്തിന്റെ ലഘൂക​രിച്ച ചിത്രം

സെൻസറി കോർട്ട​ക്‌സ്‌

മുഴുശരീരത്തിൽനിന്നും വരുന്ന സംവേദ ആവേഗ​ങ്ങളെ അപഗ്ര​ഥി​ക്കു​ന്നു

അനുകപാല പാളി

ദൃശ്യസംജ്ഞകളെ കൈകാ​ര്യം ചെയ്യുന്നു

സെറിബെല്ലം

സന്തുലനവും ഏകോ​പ​ന​വും നിയ​ന്ത്രി​ക്കു​ന്നു

പ്രി​മോ​ട്ടോർ കോർട്ട​ക്‌സ്‌

പേശികളുടെ ഏകോ​പ​നത്തെ നിയ​ന്ത്രി​ക്കു​ന്നു

മോട്ടോർ കോർട്ട​ക്‌സ്‌

ബോധപൂർവമുള്ള ചലനങ്ങളെ നിയ​ന്ത്രി​ക്കു​ന്ന​തി​നു സഹായി​ക്കു​ന്നു

ഫ്രണ്ടൽ പാളി

യുക്തിയുക്തമായ ചിന്തകൾ, വികാ​രങ്ങൾ, സംസാരം, ചലനം എന്നിവയെ നിയ​ന്ത്രി​ക്കു​ന്ന​തിൽ സഹായി​ക്കു​ന്നു

ടെമ്പറൽ പാളി

ശബ്ദത്തെ കൈകാ​ര്യം ചെയ്യുന്നു; പഠനം, ഓർമ​ശക്തി, ഭാഷ, വികാ​രങ്ങൾ എന്നിവ​യു​ടെ വിവിധ വശങ്ങളെ നിയ​ന്ത്രി​ക്കു​ന്നു

[16-ാം പേജിലെ രേഖാ​ചി​ത്രം]

ആക്‌സോണിന്റെ അഗ്രം

നാഡീപ്രേക്ഷകങ്ങൾ

ഡെൻഡ്രൈറ്റ്‌

സിനാപ്‌സ്‌

[16,17 പേജു​ക​ളി​ലെ രേഖാ​ചി​ത്രം]

ന്യൂറോൺ

ഡെൻഡ്രൈറ്റുകൾ

ആക്‌സോൺ

ഡെൻ​ഡ്രൈ​റ്റു​കൾ

സിനാപ്‌സ്‌

ന്യൂറോൺ

ആക്‌സോൺ

“മസ്‌തി​ഷ്‌ക​ത്തിൽ, 10 ലക്ഷം കോടി​മു​തൽ 100 ലക്ഷം കോടി​വരെ സിനാ​പ്‌സു​കൾ ഉണ്ടായി​രു​ന്നേ​ക്കാം. ഇവയി​ലോ​രോ​ന്നും, വൈദ്യു​ത ആവേഗ​ങ്ങ​ളാ​യി വന്നെത്തുന്ന സംജ്ഞകളെ രജിസ്റ്റർ ചെയ്യുന്ന ഓരോ കൊച്ചു കാൽക്കു​ലേ​റ്റ​റു​ക​ളാ​യി വർത്തി​ക്കു​ന്നു.”—മസ്‌തി​ഷ്‌കം

[13-ാം പേജിലെ ചിത്ര​ത്തിന്‌ കടപ്പാട്‌]

Moon and planets: NASA photo