നമ്മുടെ മഴവനങ്ങൾ അതിജീ​വി​ക്കു​മോ?

ഈ നൂറ്റാ​ണ്ടി​ന്റെ ആരംഭ​ത്തിൽ വടക്കേ അമേരി​ക്ക​യി​ലെ സഞ്ചാരി​പ്രാവ്‌ നാമാ​വ​ശേ​ഷ​മാ​യി. ഒരുപക്ഷേ എണ്ണത്തിൽ ഏറ്റവു​മ​ധി​ക​മു​ണ്ടാ​യി​രുന്ന പക്ഷി അതായി​രി​ക്കാം. രണ്ടു നൂറ്റാ​ണ്ടു​മു​മ്പു​വരെ അതിന്റെ എണ്ണം 500 കോടി​ക്കും 1,000 കോടി​ക്കും ഇടയ്‌ക്കാ​യി​രു​ന്നു​വെന്ന്‌ പക്ഷിശാ​സ്‌ത്ര​ജ്ഞ​ന്മാർ കണക്കാ​ക്കു​ന്നു!

എന്നിരു​ന്നാ​ലും, വിലകു​റഞ്ഞ പക്ഷിമാം​സ​ത്തി​ന്റെ ഒരു അക്ഷയ​ശേ​ഖ​രം​പോ​ലെ തോന്നിച്ച അത്‌ നൂറു വർഷം​കൊണ്ട്‌ പൊലി​ഞ്ഞു​പോ​യി. “ഇന്നോളം സംഭവി​ച്ചി​ട്ടു​ള്ള​തി​ലേ​ക്കും ഏറ്റവും ശ്രദ്ധേ​യ​മായ [വംശനാ​ശം]” എന്നു വിശേ​ഷി​പ്പി​ക്കാ​വുന്ന ഒന്ന്‌. യു.എസ്‌.എ.-യിലെ വിസ്‌കോൺസി​നി​ലുള്ള വ്യാലൂ​സിങ്‌ സ്റ്റേറ്റ്‌ പാർക്കിൽ സഞ്ചാരി​പ്രാ​വി​നു​വേ​ണ്ടി​യുള്ള ഒരു സ്‌മാ​ര​ക​ത്തി​ന്മേൽ ഇങ്ങനെ എഴുത​പ്പെ​ട്ടി​രി​ക്കു​ന്നു: “മനുഷ്യ​ന്റെ അത്യാർത്തി​യും ബുദ്ധി​ശൂ​ന്യ​ത​യു​മാണ്‌ ഈ ജീവി​വർഗം അപ്രത്യ​ക്ഷ​മാ​കാൻ കാരണം.”

ലോക​ത്തിൽവെച്ച്‌ എണ്ണത്തിൽ ഏറ്റവു​മ​ധി​ക​മുള്ള ജീവി​കൾപോ​ലും മനുഷ്യ​ന്റെ ആക്രമ​ണ​ത്തിന്‌ എളുപ്പ​ത്തിൽ വിധേ​യ​മാ​കു​മെന്ന്‌ സഞ്ചാരി​പ്രാ​വി​നു നേരിട്ട ഗതി നമ്മെ അനുസ്‌മ​രി​പ്പി​ക്കു​ന്നു. അത്യാർത്തി​യും ബുദ്ധി​ശൂ​ന്യ​മായ പ്രവൃ​ത്തി​ക​ളും ഇന്നും വ്യാപ​ക​മാണ്‌. ഇന്ന്‌ വെറും ഒരു ജീവി​വർഗം മാത്രമല്ല പിന്നെ​യോ മുഴു ആവാസ​വ്യ​വ​സ്ഥ​തന്നെ അപകട​ത്തി​ലാണ്‌. മഴവനം അപ്രത്യ​ക്ഷ​മാ​യാൽ അതിലെ നിവാ​സി​ക​ളെ​ല്ലാം—അതായത്‌ നമ്മുടെ ഗ്രഹത്തി​ലെ ജീവി​വർഗ​ങ്ങ​ളു​ടെ പകുതി—അപ്രത്യ​ക്ഷ​മാ​കും. അത്തര​മൊ​രു വിനാശം “മനുഷ്യൻ [വരുത്തി​വെ​ച്ചി​ട്ടു​ള്ള​തി​ലേ​ക്കും​വെച്ച്‌] ഏറ്റവും വലിയ വിപത്ത്‌” ആയിരി​ക്കു​മെന്ന്‌ ശാസ്‌ത്ര​ജ്ഞ​ന്മാർ പറയുന്നു.

പരിസ്ഥി​തി​യെ​പ്പറ്റി ഒരു നൂറ്റാ​ണ്ടു​മുമ്പ്‌ ഉണ്ടായി​രു​ന്ന​തി​നെ​ക്കാൾ അധികം അറിവ്‌ നമുക്കി​പ്പോൾ ഉണ്ടെന്നു​ള്ളതു ശരിതന്നെ. എന്നാൽ നശീക​ര​ണ​ത്തി​ന്റെ വേലി​യേ​റ്റത്തെ ഇല്ലാതാ​ക്കാൻ ഈ ഉൾക്കാ​ഴ്‌ച​യ്‌ക്കു കഴിഞ്ഞി​ട്ടില്ല. “അമൂല്യ​മായ ഒന്നാണ്‌ നാം നശിപ്പി​ച്ചു​കൊ​ണ്ടി​രി​ക്കു​ന്നത്‌” എന്ന്‌ സസ്യശാ​സ്‌ത്ര​ജ്ഞ​നായ ഫിഡാൽഗോ വിലപി​ക്കു​ന്നു. “വളരെ സമയ​മൊ​ന്നും ഇനി ബാക്കി​യില്ല. മരം​വെ​ട്ടു​കാർക്ക്‌ എത്തി​പ്പെ​ടാൻ സാധി​ക്കാത്ത മലഞ്ചെ​രി​വു​ക​ളി​ലുള്ള വനങ്ങൾ മാത്രമേ നശിപ്പി​ക്ക​പ്പെ​ടാ​തെ അവശേ​ഷി​ക്കു​ക​യു​ള്ളൂ എന്ന സ്ഥിതി​വി​ശേഷം ഏതാനും വർഷങ്ങൾക്കകം സംജാ​ത​മാ​കു​മെന്നു ഞാൻ ഭയക്കുന്നു.”

മഴവനങ്ങൾ പുനഃ​സ്ഥി​തീ​ക​രി​ക്കാൻ അങ്ങേയറ്റം പ്രയാ​സ​ക​ര​മാ​യ​തി​നാൽ വനസം​ര​ക്ഷകർ പരി​ഭ്രാ​ന്ത​രാണ്‌. ഹരിത​ഭാ​സു​ര​മായ മേഖല: ഭൂമി​യു​ടെ അമൂല്യ മഴവനങ്ങൾ എന്ന പുസ്‌തകം വനവത്‌ക​ര​ണത്തെ “മന്ദഗതി​യി​ലു​ള്ള​തും ചെല​വേ​റി​യ​തും . . . മഴവന നശീക​ര​ണ​ത്തോ​ടുള്ള പ്രതി​ക​ര​ണ​മെ​ന്ന​നി​ല​യി​ലുള്ള അവസാന പോം​വഴി” എന്നൊക്കെ തുറന്നു വിശേ​ഷി​പ്പി​ക്കു​ന്നു. വനവത്‌ക​ര​ണ​ത്തി​ലൂ​ടെ ഏതാനും ഉഷ്‌ണ​മേ​ഖലാ വൃക്ഷയി​ന​ങ്ങളെ മാത്രമേ വീണ്ടെ​ടു​ക്കാൻ കഴിയു​ക​യു​ള്ളൂ. കൂടാതെ, കളകൾ തൈകളെ ഞെരി​ച്ചു​ക​ള​യാ​തി​രി​ക്കേ​ണ്ട​തിന്‌ അവയ്‌ക്കു നിരന്തര പരിച​രണം ആവശ്യ​മാ​യി​രു​ന്നേ​ക്കാം.

ഒരു വനത്തിന്‌ അതിന്റെ മുമ്പത്തെ കാന്തി എന്നെങ്കി​ലും വീണ്ടെ​ടു​ക്കാൻ സാധി​ക്കു​മോ എന്നുള്ളത്‌ തൈകൾ രണ്ടാമതു വെച്ചു​പി​ടി​പ്പിച്ച പ്രദേശം കന്യാ​വ​ന​വു​മാ​യി എത്ര അടുത്ത്‌ സ്ഥിതി​ചെ​യ്യു​ന്നു എന്നതിനെ ആശ്രയി​ച്ചി​രി​ക്കും. അടുത്ത സാമീ​പ്യം മാത്രമേ വനവത്‌ക​രി​ക്ക​പ്പെട്ട പ്രദേ​ശത്തെ കാല​ക്ര​മ​ത്തിൽ, ഒരു യഥാർഥ മഴവന​ത്തി​നു രൂപം​നൽകുന്ന പതിനാ​യി​ര​ക്ക​ണ​ക്കി​നു ജീവി​വർഗ​ങ്ങ​ളാൽ അധിവ​സി​ക്ക​പ്പെ​ടാൻ പര്യാ​പ്‌ത​മാ​ക്കു​ക​യു​ള്ളൂ. എങ്കിൽപ്പോ​ലും ഇത്‌ നൂറ്റാ​ണ്ടു​കൾ വേണ്ടി​വ​രുന്ന ഒരു പ്രക്രി​യ​യാണ്‌. ആയിരം വർഷം​മുമ്പ്‌ മായൻ നാഗരി​കത തറപറ്റി​യ​പ്പോൾ ഉപേക്ഷി​ക്ക​പ്പെട്ട ചില പ്രദേ​ശങ്ങൾ ഇപ്പോ​ഴും മുഴു​വ​നാ​യി പൂർവ​സ്ഥി​തി കൈവ​രി​ച്ചി​ട്ടില്ല.

“ഒരു പുതിയ അന്താരാ​ഷ്‌ട്ര​വ​ത്‌ക​രണം”

ആവുന്നത്ര ജീവി​വർഗ​ങ്ങളെ പരിര​ക്ഷി​ക്കാൻ ഇന്നു സ്ഥിതി​ചെ​യ്യുന്ന മഴവന​ങ്ങ​ളു​ടെ 10 ശതമാനം വരും​ത​ല​മു​റ​യ്‌ക്കാ​യി നീക്കി​വെ​ക്ക​ണ​മെന്ന്‌ വാഷി​ങ്‌ടൺ ഡി.സി.-യിലെ സ്‌മി​ത്സോ​ണി​യൻ സ്ഥാപന​ത്തി​ലെ ഒരു ശാസ്‌ത്രജ്ഞൻ അഭി​പ്രാ​യ​പ്പെട്ടു. ഇപ്പോൾ 8 ശതമാ​ന​ത്തോ​ളം സംരക്ഷി​ക്ക​പ്പെ​ട്ടി​ട്ടുണ്ട്‌. എന്നാൽ ഈ സംരക്ഷി​ത​വ​നങ്ങൾ അഥവാ ദേശീ​യ​പാർക്കു​കൾ പേരു​കൊ​ണ്ടു മാത്ര​മാണ്‌ അങ്ങനെ ആയിരി​ക്കു​ന്നത്‌. കാരണം അവയെ സംരക്ഷി​ക്കാൻ ആവശ്യ​മായ നിക്ഷേ​പ​ങ്ങ​ളോ ചുമത​ല​പ്പെട്ട വ്യക്തി​ക​ളോ ഒന്നും ഇല്ല. കൂടു​ത​ലായ എന്തെങ്കി​ലും ചെയ്യണ​മെന്നു വ്യക്തം.

മഴവന പരിര​ക്ഷ​ണ​ത്തി​ന്റെ വക്താവായ പീറ്റർ റേവൻ വിവരി​ക്കു​ന്നു: “മഴവന​ങ്ങളെ സംരക്ഷി​ക്കാൻ ഒരു പുതിയ അന്താരാ​ഷ്‌ട്ര​വ​ത്‌ക​രണം ആവശ്യ​മാണ്‌, ഭൂമി​യി​ലെ​ങ്ങു​മുള്ള ആളുകൾക്ക്‌ അതിന്റെ ഇപ്പോ​ഴത്തെ സ്ഥിതി​യിൽ ഒരു പങ്കുണ്ട്‌ എന്നുള്ള ബോധ​വ​ത്‌ക​രണം. ലോക​മൊ​ട്ടുക്ക്‌ പട്ടിണി​യും ദാരി​ദ്ര്യ​വും ഇല്ലാതാ​ക്കാ​നുള്ള വഴികൾ കണ്ടെത്തണം. രാഷ്‌ട്രങ്ങൾ തമ്മിൽ പുതിയ കരാറു​കൾ ആവിഷ്‌ക​രി​ക്കണം.”

അദ്ദേഹ​ത്തി​ന്റെ നിർദേശം പലർക്കും അഭികാ​മ്യ​മാ​യി തോന്നു​ന്നു. മനുഷ്യ​വർഗം നേരി​ടുന്ന മറ്റനേകം പ്രതി​സ​ന്ധി​ക​ളു​ടെ കാര്യ​ത്തി​ലെ​ന്ന​പോ​ലെ മഴവനങ്ങൾ പരിര​ക്ഷി​ക്കു​ന്ന​തിന്‌ ഒരു ആഗോള പരിഹാ​രം ആവശ്യ​മാണ്‌. ലോക​വ്യാ​പ​ക​മായ ഒരു വിപത്ത്‌ സംഭവി​ക്കു​ന്ന​തി​നു​മുമ്പ്‌, വരുത്തി​വെ​ച്ചി​രി​ക്കുന്ന നാശം അപരി​ഹാ​ര്യ​മായ ഒന്നായി​ത്തീ​രു​ന്ന​തി​നു​മുമ്പ്‌ “രാഷ്‌ട്രങ്ങൾ തമ്മിൽ കരാറു​കൾ” ഉണ്ടാക്കു​ക​യെ​ന്ന​താണ്‌ പ്രശ്‌നം. പീറ്റർ റേവൻ സൂചി​പ്പി​ക്കു​ന്ന​തു​പോ​ലെ മഴവന​ത്തി​ന്റെ നശീക​രണം പട്ടിണി​യും ദാരി​ദ്ര്യ​വും​പോ​ലെ വികസ്വ​ര​രാ​ജ്യ​ങ്ങ​ളി​ലെ മറ്റ്‌ അപരി​ഹാ​ര്യ​മായ പ്രശ്‌ന​ങ്ങ​ളു​മാ​യി അടുത്തു ബന്ധപ്പെട്ടു കിടക്കു​ന്നു.

ഇതുവരെ, അത്തരം പ്രശ്‌ന​ങ്ങ​ളു​ടെ നേർക്ക്‌ തിരി​ച്ചു​വി​ട്ടി​രി​ക്കുന്ന ശ്രമങ്ങൾക്കു പരിമി​ത​മായ വിജയമേ ഉണ്ടായി​ട്ടു​ള്ളൂ. സങ്കുചി​ത​വും പരസ്‌പ​ര​വി​രു​ദ്ധ​വു​മായ താത്‌പ​ര്യ​ങ്ങളെ മറിക​ട​ന്നു​കൊണ്ട്‌ രാഷ്‌ട്രങ്ങൾ പൊതു​ന​ന്മ​യ്‌ക്കു​വേണ്ടി പ്രവർത്തി​ക്കു​മോ അതോ “ഒരു പുതിയ അന്താരാ​ഷ്‌ട്ര​വ​ത്‌ക​രണം” വെറു​മൊ​രു സ്വപ്‌ന​മാ​യി അവശേ​ഷി​ക്കു​മോ എന്നാണ്‌ ചില ആളുകൾ ചോദി​ക്കു​ന്നത്‌.

ചരിത്രം ശുഭാ​പ്‌തി​വി​ശ്വാ​സ​ത്തി​നു​വേണ്ട അടിസ്ഥാ​നം നൽകു​ന്നില്ല. എങ്കിലും ഒരു ഘടകം മിക്ക​പ്പോ​ഴും അവഗണി​ക്ക​പ്പെ​ടു​ന്നു—മഴവന​ത്തി​ന്റെ സ്രഷ്‌ടാ​വി​ന്റെ വീക്ഷണം. “നാം സൃഷ്ടി​യു​ടെ ഒരു ഭാഗമാണ്‌ നശിപ്പി​ച്ചു​കൊ​ണ്ടി​രി​ക്കു​ന്നത്‌” എന്ന്‌ ഹാർവാർഡ്‌ പ്രൊ​ഫ​സ​റായ എഡ്വാർഡ്‌ ഒ. വിൽസൺ ചൂണ്ടി​ക്കാ​ട്ടു​ന്നു. “അങ്ങനെ നമുക്കു കൈമാ​റി കിട്ടിയ സംഗതി​കൾ നാം വരും​ത​ല​മു​റ​കൾക്കു നിഷേ​ധി​ക്കു​ക​യാണ്‌.”

തന്റെ കൈ​വേ​ലയെ പൂർണ​മാ​യി നശിപ്പി​ക്കാൻ ഭൂമി​യു​ടെ സ്രഷ്‌ടാവ്‌ മനുഷ്യ​വർഗത്തെ അനുവ​ദി​ക്കു​മോ? അനുവ​ദി​ക്കു​മെന്നു വിശ്വ​സി​ക്കാൻ പ്രയാ​സ​മാണ്‌.a പകരം ദൈവം ‘ഭൂമിയെ നശിപ്പി​ക്കു​ന്ന​വരെ നശിപ്പി​ക്കും’ എന്ന്‌ ബൈബിൾ മുൻകൂ​ട്ടി പറയുന്നു. (വെളി​പ്പാ​ടു 11:18) ദൈവം തന്റെ പരിഹാ​രം എങ്ങനെ നടപ്പി​ലാ​ക്കും? ഭൂമി​യി​ലെ എല്ലാ പ്രശ്‌ന​ങ്ങ​ളും പരിഹ​രി​ക്കു​ന്ന​തും “ഒരുനാ​ളും നശിച്ചു​പോ​കാത്ത”തുമായ ഒരു രാജ്യം—ഒരു ദേശീ​യാ​തീത സ്വർഗീയ ഗവൺമെൻറ്‌ സ്ഥാപി​ക്കു​മെന്ന്‌ അവൻ വാഗ്‌ദാ​നം ചെയ്യുന്നു.—ദാനീ​യേൽ 2:44.

ദൈവ​രാ​ജ്യം, മനുഷ്യൻ ഭൂമിയെ ദുരു​പ​യോ​ഗം ചെയ്യു​ന്നത്‌ നിർത്ത​ലാ​ക്കു​മെന്നു മാത്രമല്ല, ഭൂമി​യു​ടെ പ്രകൃ​തി​സൗ​ന്ദ​ര്യം പുനഃ​സ്ഥാ​പി​ക്കു​ന്ന​തിന്‌ മേൽനോ​ട്ടം വഹിക്കു​ക​യും ചെയ്യും. മുഴു​ഭൂ​മി​യും ഒടുവിൽ ഒരു ആഗോള ഉദ്യാ​ന​മാ​യി​ത്തീ​രും, നമ്മുടെ സ്രഷ്‌ടാവ്‌ ആദിയിൽ ഉദ്ദേശി​ച്ചി​രു​ന്ന​തു​പോ​ലെ​തന്നെ. (ഉല്‌പത്തി 1:28; 2:15; ലൂക്കൊസ്‌ 23:42, 43) എല്ലായി​ട​ത്തു​മുള്ള ആളുകൾ ‘യഹോ​വ​യാൽ പഠിപ്പി​ക്ക​പ്പെ​ടും’, മഴവനം ഉൾപ്പെ​ടെ​യുള്ള അവന്റെ സൃഷ്ടിയെ സ്‌നേ​ഹി​ക്കാ​നും വിലമ​തി​ക്കാ​നും അവർ പഠിക്കും.—യെശയ്യാ​വു 54:13.

ആ അനുഗൃ​ഹീത കാല​ത്തെ​ക്കു​റിച്ച്‌ സങ്കീർത്ത​ന​ക്കാ​രൻ ഇങ്ങനെ എഴുതി: “വയലും അതിലു​ള്ള​തൊ​ക്കെ​യും ആഹ്ലാദി​ക്കട്ടെ; അപ്പോൾ കാട്ടിലെ സകലവൃ​ക്ഷ​ങ്ങ​ളും ഉല്ലസി​ച്ചു​ഘോ​ഷി​ക്കും. യഹോ​വ​യു​ടെ സന്നിധി​യിൽ തന്നേ; അവൻ വരുന്നു​വ​ല്ലോ; അവൻ ഭൂമിയെ വിധി​പ്പാൻ വരുന്നു; അവൻ ഭൂലോ​കത്തെ നീതി​യോ​ടും ജാതി​കളെ വിശ്വ​സ്‌ത​ത​യോ​ടും​കൂ​ടെ വിധി​ക്കും.”—സങ്കീർത്തനം 96:12, 13.

സന്തോ​ഷ​ക​ര​മെ​ന്നു പറയട്ടെ, മഴവന​ത്തി​ന്റെ ഭാവി ആശ്രയി​ച്ചി​രി​ക്കു​ന്നത്‌ മനുഷ്യ​ന്റെ ശ്രമങ്ങ​ളി​ലോ അത്യാ​ഗ്ര​ഹ​ത്തി​ലോ അല്ല. നമ്മുടെ ഉഷ്‌ണ​മേ​ഖലാ വനങ്ങളെ സംരക്ഷി​ക്കാൻ സ്രഷ്‌ടാ​വു തന്നെ ഇടപെ​ടു​മെന്ന്‌ ഉറപ്പു​ണ്ടാ​യി​രി​ക്കാൻ ബൈബിൾ കാരണം നൽകുന്നു. ദൈവം വാഗ്‌ദാ​നം ചെയ്‌തി​രി​ക്കുന്ന പുതിയ ഭൂമി​യിൽ വരും​ത​ല​മു​റകൾ മഴവന​ത്തി​ന്റെ പ്രൗഢി നോക്കി​ക്കാ​ണും.—വെളി​പ്പാ​ടു 21:1-4.

[അടിക്കു​റിപ്പ്‌]