ബൈബി​ളി​ന്റെ വീക്ഷണം

ദൈവ​ത്തി​ന്റെ പരിശു​ദ്ധാ​ത്മാവ്‌ എന്താണ്‌?

“ജനം എല്ലാം സ്‌നാനം ഏല്‌ക്കു​ക​യിൽ യേശു​വും സ്‌നാനം ഏററു, പ്രാർത്ഥി​ക്കു​മ്പോൾ സ്വർഗ്ഗം തുറന്നു, പരിശു​ദ്ധാ​ത്മാ​വു ദേഹരൂ​പ​ത്തിൽ പ്രാവു എന്നപോ​ലെ അവന്റെ​മേൽ ഇറങ്ങി​വന്നു. നീ എന്റെ പ്രിയ പുത്രൻ; നിന്നിൽ ഞാൻ പ്രസാ​ദി​ച്ചി​രി​ക്കു​ന്നു എന്നു സ്വർഗ്ഗ​ത്തിൽനി​ന്നു ഒരു ശബ്ദവും ഉണ്ടായി.”—ലൂക്കൊസ്‌ 3:21, 22.

പുരാതന ഗ്രീസിൽ ഒരു കൂട്ടം തത്ത്വചി​ന്ത​ക​രോ​ടു പ്രസം​ഗി​ക്കവേ, അപ്പൊ​സ്‌ത​ല​നായ പൗലൊസ്‌ ദൈവത്തെ ‘സ്വർഗ​ത്തി​ന്നും ഭൂമി​ക്കും നാഥൻ’ എന്നു വിളിച്ചു. ഈ ദൈവ​മാണ്‌ ‘ലോക​വും അതിലു​ള്ളതു ഒക്കെയും ഉണ്ടാക്കി​യ​തും എല്ലാവർക്കും ജീവനും ശ്വാസ​വും സകലവും കൊടു​ക്കു​ന്ന​തും’ എന്ന്‌ പൗലൊസ്‌ പറയു​ക​യു​ണ്ടാ​യി. (പ്രവൃ​ത്തി​കൾ 17:24-28) ദൈവം ഇതെല്ലാം ചെയ്യു​ന്നത്‌ എങ്ങനെ​യാണ്‌? തന്റെ പരിശു​ദ്ധാ​ത്മാവ്‌ അഥവാ പ്രവർത്ത​ന​നി​ര​ത​മായ ശക്തി മുഖാ​ന്തരം.

‘ചലനാത്മക ഊർജ​ത്തി​ന്റെ സമൃദ്ധി​യും ശക്തിയിൽ വീര്യ​വും’ ഉള്ളവനാ​യി ബൈബിൾ ദൈവത്തെ വർണി​ക്കു​ന്നു. (യെശയ്യാ​വു 40:26, NW) അതേ, മുഴു പ്രപഞ്ച​വും സൃഷ്ടി​ച്ചതു ദൈവ​മാണ്‌. അത്‌ അവന്റെ ചലനാത്മക ഊർജ​ത്തെ​യും ശക്തി​യെ​യും വെളി​പ്പെ​ടു​ത്തു​ന്നു.

പ്രവർത്ത​ന​നി​ര​ത​മായ ശക്തി

പരിശു​ദ്ധാ​ത്മാവ്‌ കേവലം ദൈവ​ത്തി​ന്റെ ശക്തിയാണ്‌ എന്നു പറയു​ന്നത്‌ അത്ര കൃത്യ​മാ​യി​രി​ക്കില്ല. കാരണം, ചാർജു ചെയ്യ​പ്പെ​ട്ട​തെ​ങ്കി​ലും ഉപയോ​ഗി​ക്കാത്ത ഒരു ബാറ്ററി​യിൽ അടങ്ങി​യി​രി​ക്കുന്ന ശക്തി പോലെ ആരി​ലെ​ങ്കി​ലും അല്ലെങ്കിൽ എന്തി​ലെ​ങ്കി​ലും, പ്രകട​മ​ല്ലാത്ത രീതി​യി​ലോ നിഷ്‌ക്രി​യ​മായ അവസ്ഥയി​ലോ ശക്തി സ്ഥിതി ചെയ്‌തേ​ക്കാം. എന്നാൽ, ഉപയോ​ഗി​ച്ചു കൊണ്ടി​രി​ക്കുന്ന ഒരു ബാറ്ററി​യി​ലൂ​ടെ പ്രവഹി​ക്കുന്ന വൈദ്യു​തി പോലെ ചലനാ​ത്മ​ക​മായ ഒന്നായി​ട്ടാ​ണു തിരു​വെ​ഴു​ത്തു​കൾ ദൈവ​ത്തി​ന്റെ ആത്മാവി​നെ വിശേ​ഷി​പ്പി​ക്കു​ന്നത്‌. (ഉല്‌പത്തി 1:2) അതു​കൊണ്ട്‌ ദൈവ​ത്തി​ന്റെ പരിശു​ദ്ധാ​ത്മാവ്‌ അവന്റെ പ്രേഷിത ഊർജം, അവന്റെ പ്രവർത്ത​ന​നി​ര​ത​മായ ശക്തി ആണ്‌.

പരിശു​ദ്ധാ​ത്മാവ്‌ ഏതെങ്കി​ലും ഒരു പ്രത്യേക ദൗത്യം നിർവ​ഹി​ക്കു​ന്ന​താ​യോ ദൈവ​ത്തിൽനിന്ന്‌ അകലെ വേറൊ​രു സ്ഥലത്ത്‌ ആയിരി​ക്കു​ന്ന​താ​യോ ബൈബി​ളി​ന്റെ ചില ഭാഗങ്ങ​ളിൽ പറയു​ന്നുണ്ട്‌. (മത്തായി 28:19, 20; ലൂക്കൊസ്‌ 3:21, 22; പ്രവൃ​ത്തി​കൾ 8:39; 13:4; 15:28, 29) ആ വാക്യങ്ങൾ വായി​ച്ചി​ട്ടുള്ള ചിലർ പരിശു​ദ്ധാ​ത്മാ​വി​നു ദൈവ​ത്തിൽ നിന്ന്‌ വേറിട്ട്‌ തനതായ ഒരു വ്യക്തി​ത്വം ഉള്ളതായി കരുതു​ന്നു. എന്തു​കൊ​ണ്ടാണ്‌ തിരു​വെ​ഴു​ത്തു​ക​ളിൽ അത്തരം ഒരു ഭാഷാ​പ്ര​യോ​ഗം നടത്തി​യി​രി​ക്കു​ന്നത്‌? ദൈവ​ത്തിൽ നിന്ന്‌ വേറിട്ട്‌ ഒരു വ്യക്തി​യാ​യി നില​കൊ​ള്ളുന്ന ഒന്നാണോ പരിശു​ദ്ധാ​ത്മാവ്‌?

ജഡിക സൃഷ്ടി​ക​ളു​ടേ​തിൽ നിന്നു തികച്ചും വ്യത്യ​സ്‌ത​മായ ഒരു മണ്ഡലത്തി​ലാ​ണു സർവശ​ക്ത​നായ ദൈവം നിവസി​ക്കു​ന്നത്‌. പരിമിത പ്രാപ്‌തി​ക​ളുള്ള നമ്മുടെ ഇന്ദ്രി​യ​ങ്ങൾക്ക്‌ ദൃശ്യ​മ​ല്ലാത്ത ഒരു ആത്മവ്യ​ക്തി​യാണ്‌ അവൻ. (യോഹ​ന്നാൻ 4:24) യഹോ​വ​യാം ദൈവം സ്വർഗ​ത്തിൽ വസിക്കു​ന്ന​താ​യും അവിടെ നിന്ന്‌ അവൻ മനുഷ്യ​വർഗത്തെ നോക്കു​ന്ന​താ​യും ബൈബിൾ പറയുന്നു. (സങ്കീർത്തനം 33:13, 14) ഇത്‌ മനസ്സി​ലാ​ക്കാ​വു​ന്ന​തേ​യു​ള്ളൂ. സൃഷ്ടി​ക്രി​യ​ക​ളിൽ ഉപയോ​ഗി​ക്കുന്ന മൂലക​ങ്ങ​ളെ​ക്കാൾ ശ്രേഷ്‌ഠ​നാ​യി​രി​ക്കണം സ്രഷ്ടാവ്‌. അവൻ അവയുടെ മേൽ അധികാ​രം ചെലു​ത്തു​ന്നു, അവയെ അധീന​ത​യി​ലാ​ക്കു​ന്നു, രൂപ​പ്പെ​ടു​ത്തു​ന്നു, നിയ​ന്ത്രി​ക്കു​ന്നു.—ഉല്‌പത്തി 1:1.

തന്റെ അദൃശ്യ വാസസ്ഥ​ലത്ത്‌ ഇരുന്നു​കൊണ്ട്‌ എവിടെ, എപ്പോൾ വേണ​മെ​ങ്കി​ലും കാര്യങ്ങൾ നടത്താൻ ദൈവ​ത്തി​നു കഴിയും. അതു​കൊണ്ട്‌ തന്റെ കർമോ​ദ്യു​ക്ത ശക്തി പ്രവർത്തി​ക്കു​ന്നി​ടത്ത്‌ ദൈവം ഉണ്ടായി​രി​ക്കേണ്ട ആവശ്യ​മില്ല. ഒരു ദൗത്യം നിർവ​ഹി​ക്കു​ന്ന​തിന്‌ തന്റെ ആത്മാവി​നെ അയയ്‌ക്കാൻ അവനു സാധി​ക്കും. (സങ്കീർത്തനം 104:30, NW) റിമോട്ട്‌ കൺ​ട്രോൾ ഉപയോ​ഗിച്ച്‌ ടെലി​വി​ഷ​നും മറ്റും പ്രവർത്തി​പ്പി​ക്കുന്ന ആധുനിക കാലത്തെ ആളുകൾക്ക്‌ ഇത്‌ എളുപ്പം മനസ്സി​ലാ​കും. അദൃശ്യ​മാ​യി​രി​ക്കുന്ന വൈദ്യു​തി അല്ലെങ്കിൽ ഇൻഫ്രാ​റെഡ്‌ തരംഗങ്ങൾ പോലു​ള്ള​വ​യു​ടെ ശക്തിയെ കുറിച്ച്‌ ഇന്ന്‌ നമുക്ക്‌ അറിയാം. സമാന​മാ​യി, ഒരിട​ത്തു​നിന്ന്‌ മറ്റൊ​രി​ട​ത്തേക്കു പോകാ​തെ തന്നെ തന്റെ അദൃശ്യ പരിശുദ്ധ ശക്തിയെ അഥവാ ആത്മാവി​നെ ഉപയോ​ഗിച്ച്‌ താൻ ഉദ്ദേശി​ക്കുന്ന കാര്യങ്ങൾ നിവർത്തി​ക്കാൻ ദൈവ​ത്തി​നു കഴിയും.—യെശയ്യാ​വു 55:11.

ബൈബിൾ കാലങ്ങ​ളിൽ ഈ ആശയം ഗ്രഹി​ക്കുക ബുദ്ധി​മുട്ട്‌ ആയിരു​ന്നി​രി​ക്കാം. വേറി​ട്ടുള്ള ഒരു ശക്തിയാ​യി പരിശു​ദ്ധാ​ത്മാ​വി​നെ പ്രതി​പാ​ദി​ച്ചത്‌, തന്റെ ശക്തി പ്രവർത്തി​ക്കു​ന്നി​ടത്ത്‌ വ്യക്തി​പ​ര​മാ​യി സന്നിഹി​ത​നാ​കാ​തെ തന്നെ ദൈവം ആ ശക്തി എങ്ങനെ ഉപയോ​ഗി​ക്കു​ന്നു എന്നു മനസ്സി​ലാ​ക്കാൻ നിസ്സം​ശ​യ​മാ​യും വായന​ക്കാ​രെ സഹായി​ച്ചു. പരിശു​ദ്ധാ​ത്മാവ്‌ ഏതെങ്കി​ലും ഒരു പ്രത്യേക കാര്യം ചെയ്‌ത​താ​യി പരാമർശി​ക്കു​മ്പോൾ വാസ്‌ത​വ​ത്തിൽ തിരു​ഹി​തം നിവർത്തി​ക്കാൻ ദൈവം​തന്നെ വ്യക്തി​ക​ളു​ടെ​യോ വസ്‌തു​ക്ക​ളു​ടെ​യോ മേൽ തന്റെ ശക്തിയെ അയച്ചു അല്ലെങ്കിൽ ഉപയോ​ഗി​ച്ചു എന്നാണു ബൈബിൾ അർഥമാ​ക്കു​ന്നത്‌.

പരിശു​ദ്ധാ​ത്മാ​വി​ലൂ​ടെ​യുള്ള വിവിധ പ്രവർത്ത​ന​ങ്ങൾ

പരിശു​ദ്ധാ​ത്മാ​വി​നെ ഉപയോ​ഗി​ച്ചാ​ണു ദൈവം സകല ചരാച​ര​ങ്ങ​ളെ​യും സൃഷ്ടി​ച്ചത്‌. (സങ്കീർത്തനം 33:6, NW) അക്രമാ​സ​ക്ത​വും അനുതാ​പ​ര​ഹി​ത​വു​മായ ആളുക​ളു​ടെ ഒരു തലമു​റയെ നശിപ്പി​ക്കാ​നും ദൈവം തന്റെ ആത്മാവി​നെ ഉപയോ​ഗി​ച്ചു. (ഉല്‌പത്തി 6:1-22) തന്റെ പുത്രന്റെ അമൂല്യ ജീവൻ യഹൂദ കന്യക​യായ മറിയ​യു​ടെ ഗർഭാ​ശ​യ​ത്തി​ലേക്കു മാറ്റാൻ ദൈവം ഉപയോ​ഗി​ച്ച​തും പ്രവർത്ത​ന​നി​ര​ത​മായ ഇതേ ശക്തിയെ തന്നെയാണ്‌.—ലൂക്കൊസ്‌ 1:35.

ജീവൻ പണയ​പ്പെ​ടു​ത്തി​ക്കൊണ്ട്‌ ശത്രു​ക്ക​ളു​ടെ മുമ്പാകെ നിർഭ​യ​രാ​യി, സധൈ​ര്യം സത്യം പ്രസ്‌താ​വി​ക്കാൻ പരിശു​ദ്ധാ​ത്മാവ്‌ ആളുകളെ ചില​പ്പോ​ഴൊ​ക്കെ ശക്തീക​രി​ച്ചി​ട്ടുണ്ട്‌. (മീഖാ 3:8) ഈ ശക്തി മുഖാ​ന്തരം സ്‌ത്രീ​പു​രു​ഷ​ന്മാർക്കു പ്രത്യേക ഉൾക്കാ​ഴ്‌ച​യോ ഗ്രാഹ്യ​മോ നൽകി​യി​ട്ടുള്ള അനേകം സന്ദർഭങ്ങൾ—വിശേ​ഷി​ച്ചും പ്രവച​ന​ത്തോ​ടുള്ള ബന്ധത്തിൽ—ബൈബി​ളിൽ കാണാം. ഭാവി​യിൽ എന്തു സംഭവി​ക്കും എന്ന്‌ കൃത്യ​മാ​യി പറയാൻ ഒരു മനുഷ്യ​നും സാധി​ക്കാ​ത്ത​തി​നാൽ അത്‌ പരിശു​ദ്ധാ​ത്മാ​വി​ന്റെ ശ്രദ്ധേ​യ​മായ ഒരു പ്രവർത്ത​ന​മാണ്‌.—2 പത്രൊസ്‌ 1:20, 21.

വ്യക്തി​കൾക്ക്‌ അത്ഭുത​ക​ര​മായ ശക്തി നൽകാ​നും പരിശു​ദ്ധാ​ത്മാ​വി​നു കഴിയും. ഉദാഹ​ര​ണ​ത്തിന്‌, പ്രകൃതി ശക്തികളെ നിയ​ന്ത്രി​ക്കാ​നും രോഗങ്ങൾ സൗഖ്യ​മാ​ക്കാ​നും എന്തിന്‌, മരിച്ച​വരെ ഉയിർപ്പി​ക്കാൻ പോലും ഈ ശക്തി യേശു​വി​നെ പ്രാപ്‌ത​നാ​ക്കി. (ലൂക്കൊസ്‌ 4:18-21; 8:22-26, 49-56; 9:11) മുഴു ഭൂമി​യി​ലും ദൈവ​ത്തി​ന്റെ സാക്ഷി​ക​ളാ​യി സേവി​ക്കാൻ ആദിമ ക്രിസ്‌ത്യാ​നി​കളെ സംഘടി​പ്പി​ച്ച​തും ശക്തീക​രി​ച്ച​തും പരിശു​ദ്ധാ​ത്മാവ്‌ ആയിരു​ന്നു.—പ്രവൃ​ത്തി​കൾ 1:8; 2:1-47; റോമർ 15:18, 19; 1 കൊരി​ന്ത്യർ 12:4-11.

നമ്മുടെ മേൽ ചൊരി​യ​പ്പെ​ടുന്ന ദൈവ​ത്തി​ന്റെ ശക്തി

അപരി​മേ​യ​മായ ഈ ഊർജം പകർന്നെ​ടു​ക്കാൻ ഇന്നത്തെ ഭൗമിക ദൈവ​ദാ​സ​ന്മാർക്കു കഴിയു​മോ? കഴിയും! തന്റെ ഹിതം മനസ്സി​ലാ​ക്കാ​നും നിവർത്തി​ക്കാ​നു​മാ​യി ദൈവം ഒരളവു​വരെ ആളുകൾക്കു പരിശു​ദ്ധാ​ത്മാ​വി​നെ നൽകു​ന്നുണ്ട്‌. പ്രാർഥ​ന​യി​ലൂ​ടെ ആത്മാർഥ​മാ​യി യാചി​ക്കുന്ന, ശരിയായ ഹൃദയ​നില ഉള്ള, തന്റെ വ്യവസ്ഥ​കൾക്കു ചേർച്ച​യിൽ പ്രവർത്തി​ക്കുന്ന വ്യക്തി​കൾക്കാ​ണു ദൈവം പരിശു​ദ്ധാ​ത്മാ​വി​നെ നൽകു​ന്നത്‌. (1 കൊരി​ന്ത്യർ 2:10-16) “അത്യന്ത​ശക്തി” നൽകി​ക്കൊണ്ട്‌, തടസ്സങ്ങ​ളു​ണ്ടെ​ങ്കി​ലും ദൈവത്തെ വിശ്വ​സ്‌ത​ത​യോ​ടെ സേവി​ക്കാൻ അപൂർണ മനുഷ്യ​രെ പ്രാപ്‌ത​രാ​ക്കു​ന്ന​തി​നു പരിശു​ദ്ധാ​ത്മാ​വി​നു കഴിയും. അതു​കൊണ്ട്‌, ദൈവാ​ത്മാ​വി​നെ സ്വീക​രി​ക്കാ​നും അത്‌ സദാ തങ്ങളിൽ വ്യാപ​രി​ക്കാ​നും ദൈവ​ഭ​യ​മുള്ള എല്ലാ ആളുക​ളും ആഗ്രഹി​ക്കു​ന്നു.—2 കൊരി​ന്ത്യർ 4:7; ലൂക്കൊസ്‌ 11:13; പ്രവൃ​ത്തി​കൾ 15:8; എഫെസ്യർ 4:30.

താമസി​യാ​തെ, ഈ ദുഷ്ട​ലോ​ക​ത്തി​ലെ അനീതി​ക്കും കഷ്ടപ്പാ​ടി​നും അറുതി വരുത്താ​നും അങ്ങനെ തന്റെ ഉന്നതമായ പരിശുദ്ധ നാമത്തെ വിശു​ദ്ധീ​ക​രി​ക്കാ​നും ദൈവം ഈ ചലനാത്മക ശക്തിയെ ഉപയോ​ഗി​ക്കും. ദൈവാ​ത്മാ​വി​ന്റെ പ്രവർത്ത​ന​ത്തിൽ നിന്ന്‌ മുഴു ലോക​വും പ്രയോ​ജനം അനുഭ​വി​ക്കും. അതിന്റെ ഫലങ്ങൾ എല്ലാവർക്കും ദൃശ്യ​മാ​യി​രി​ക്കും, അതിന്റെ സ്രോ​ത​സ്സി​നു മഹത്ത്വം കരേറ്റി​ക്കൊ​ണ്ടു തന്നേ.—ഗലാത്യർ 5:22, 23; വെളി​പ്പാ​ടു 21:3-5എ.