സെർക്‌സി​സി​നേറ്റ കനത്ത പരാജയം

ഗ്രീസിലെ ഉണരുക! ലേഖകൻ

ചരി​ത്ര​മു​റ​ങ്ങുന്ന മണ്ണിനെ കുറിച്ച്‌ അജ്ഞനാ​യി​രുന്ന ഒരു സഞ്ചാരി. ചൂടു​റ​വ​ക​ളും ഗന്ധകവാ​തകം തുപ്പുന്ന ഉഷ്‌ണ​ജ​ല​പ്ര​വാ​ഹ​ങ്ങ​ളും അദ്ദേഹ​ത്തി​ന്റെ താത്‌പ​ര്യം തൊട്ടു​ണർത്തു​ന്നു. “ചൂടു കവാടങ്ങൾ” എന്ന്‌ അർഥം വരുന്ന തെർമോ​പ്പില എന്ന ഈ തീര​ദേ​ശ​സ​മ​ത​ല​സ്ഥാ​നം, പണ്ടു തീരെ വീതി കുറഞ്ഞ​തും ദുർഗ​മ​വു​മായ ഒരു പ്രദേ​ശ​മാ​യി​രു​ന്നു എന്നറി​യു​ന്നത്‌ അദ്ദേഹത്തെ അമ്പരപ്പി​ച്ചേ​ക്കാം. പക്ഷേ ഇവി​ടെ​യും, കുറെ​ക്കൂ​ടി തെക്കോ​ട്ടു മാറി സലാമീസ്‌ ദ്വീപിന്‌ സമീപ​ത്തും ബൈബിൾ പ്രവച​നങ്ങൾ കൃത്യ​മാ​യി നിവൃ​ത്തി​യേ​റി​യ​തി​ന്റെ ഈടുറ്റ തെളിവു കണ്ടെത്താ​നാ​കും എന്ന തിരി​ച്ച​റിവ്‌ അദ്ദേഹ​ത്തിൽ അതി​ലേറെ താത്‌പ​ര്യം ഉണർത്തി​യേ​ക്കാം.

തീർച്ച​യാ​യും, ചരി​ത്ര​ത്തി​ന്റെ ഏടുകൾ പരി​ശോ​ധി​ക്കു​മ്പോ​ഴും പ്രവചന നിവൃ​ത്തി​യു​ടെ വെളി​ച്ച​ത്തിൽ വീക്ഷി​ക്കു​മ്പോ​ഴും, ഈ പ്രദേ​ശ​ങ്ങ​ളോ​ടു ബന്ധപ്പെട്ടു ദാനീ​യേൽ എന്ന ബൈബിൾ പുസ്‌ത​ക​ത്തി​ലുള്ള ചില പ്രവച​ന​ങ്ങ​ളു​ടെ വിശദാം​ശങ്ങൾ ശരിക്കും അത്ഭുത​സ്‌ത​ബ്ധ​മാ​ക്കു​ന്ന​വ​യാണ്‌. ബൈബിൾ ദൈവ​വ​ച​ന​മാണ്‌ എന്നതിന്റെ ബോധ്യ​പ്പെ​ടു​ത്തുന്ന തെളിവ്‌ അവ പ്രദാനം ചെയ്യുന്നു. ദാനീ​യേൽ പതി​നൊ​ന്നാം അധ്യാ​യ​ത്തിൽ നമുക്ക്‌ ഒരു ശ്രദ്ധേ​യ​മായ ദൃഷ്ടാന്തം കാണാൻ കഴിയും. “മേദ്യ​നായ ദാര്യാ​വേ​ശി​ന്റെ ഒന്നാം ആണ്ടിൽ”, പൊ.യു.മു. ഏതാണ്ട്‌ 538-ലാണ്‌ ദാനീ​യേ​ലിന്‌ ഈ പ്രാവ​ച​നിക വിവരം നൽക​പ്പെ​ട്ടത്‌. (ദാനീ​യേൽ 11:1) പക്ഷേ അന്നു വെളി​പ്പെ​ടു​ത്ത​പ്പെട്ട പ്രവചനം നിവൃ​ത്തി​യേ​റി​യത്‌ അനേകം നൂറ്റാ​ണ്ടു​കൾക്കു ശേഷമാണ്‌.

ഒരു പ്രത്യേക പേർഷ്യൻ രാജാ​വി​നെ കുറിച്ചു ദാനീ​യേൽ 11:2 മുൻകൂ​ട്ടി പറഞ്ഞു: “പാർസി​ദേ​ശത്തു ഇനി മൂന്നു രാജാ​ക്ക​ന്മാർ എഴു​ന്നേ​ല്‌ക്കും; നാലാ​മ​ത്തവൻ എല്ലാവ​രി​ലും അധികം ധനവാ​നാ​യി​രി​ക്കും; അവൻ ധനം​കൊ​ണ്ടു ശക്തി​പ്പെ​ട്ടു​വ​രു​മ്പോൾ എല്ലാവ​രെ​യും യവനരാ​ജ്യ​ത്തി​ന്നു നേരെ ഉദ്യോ​ഗി​പ്പി​ക്കും [“എഴു​ന്നേൽപ്പി​ക്കും,” NW].”

കോ​രെശ്‌ (സൈറസ്‌) രണ്ടാമൻ, കാം​ബൈ​സിസ്‌ രണ്ടാമൻ, ദാര്യാ​വേശ്‌ ഒന്നാമൻ എന്നിവരെ തുടർന്നു വന്ന ‘നാലാ​മത്തെ രാജാവ്‌’ വാസ്‌ത​വ​ത്തിൽ സെർക്‌സിസ്‌ ഒന്നാമ​നാ​യി​രു​ന്നു. തെളി​വ​നു​സ​രിച്ച്‌, അദ്ദേഹ​മാണ്‌ ബൈബിൾ പുസ്‌ത​ക​മായ എസ്ഥേറിൽ വിവരി​ച്ചി​രി​ക്കുന്ന അഹശ്വേ​രോശ്‌ രാജാവ്‌. അദ്ദേഹം യഥാർഥ​ത്തിൽ ‘എല്ലാവ​രെ​യും യവനരാ​ജ്യ​ത്തി​നു നേരെ എഴു​ന്നേൽപ്പി​ച്ചോ’? അതിന്റെ പരിണ​ത​ഫലം എന്തായി​രു​ന്നു?

സെർക്‌സിസ്‌—കീഴട​ക്കാൻ ദൃഢചി​ത്ത​നാ​യി

തന്റെ പിതാ​വായ ദാര്യാ​വേ​ശി​ന്റെ സൈന്യ​ത്തി​നു മാര​ത്തോ​ണിൽ വെച്ച്‌ ഏറ്റ പരാജ​യ​ത്തി​ന്റെ പരിണ​ത​ഫ​ല​ങ്ങ​ളു​മാ​യി സെർക്‌സി​സി​നു പൊരു​ത്ത​പ്പെ​ടേ​ണ്ട​തു​ണ്ടാ​യി​രു​ന്നു.a അങ്ങനെ, തന്റെ ഭരണത്തി​ന്റെ ആദ്യവർഷങ്ങൾ സാമ്രാ​ജ്യ​ത്തി​ലെ വിപ്ലവ​ങ്ങളെ അടിച്ച​മർത്തു​ന്ന​തി​നും “ധനം​കൊ​ണ്ടു ശക്തി” പ്രാപി​ക്കു​ന്ന​തി​നും അദ്ദേഹം വിനി​യോ​ഗി​ച്ചു.

എന്നിരു​ന്നാ​ലും, തന്റെ ഉത്‌കർഷേ​ച്ഛു​ക്ക​ളായ കൊട്ടാര ഉദ്യോ​ഗസ്ഥർ എരിവു കേറ്റി​യ​തി​ന്റെ ഫലമായി ഗ്രീസി​നെ കീഴട​ക്കുക എന്ന ആഗ്രഹം സെർക്‌സി​സി​ന്റെ മനസ്സിൽ തങ്ങിനിൽക്കു​ന്നു​ണ്ടാ​യി​രു​ന്നു. അതു​കൊണ്ട്‌ പൊ.യു.മു. 484-ൽ തുടങ്ങി മൂന്നു വർഷം കൊണ്ട്‌ അദ്ദേഹം എല്ലാ പേർഷ്യൻ ഗവർണർമാ​രു​ടെ​യും (സേട്രാ​പ്പു​കൾ) അധികാര അതിർത്തി​യിൽ ഉള്ള ജില്ലക​ളിൽ നിന്നും പേർഷ്യൻ നിയ​ന്ത്ര​ണ​ത്തി​ലുള്ള സംസ്ഥാ​ന​ങ്ങ​ളിൽ നിന്നും സൈനി​കരെ കൂട്ടി​ച്ചേർത്തു. ഭൂമു​ഖത്തു മാർച്ചു ചെയ്‌തി​ട്ടു​ള്ള​തിൽ വെച്ച്‌ അതിബൃ​ഹ​ത്തായ സൈന്യ​ങ്ങ​ളിൽ ഒന്നായി​രു​ന്നു ഇത്‌ എന്നു പറയ​പ്പെ​ടു​ന്നു. ഗ്രീക്കു ചരി​ത്ര​കാ​ര​നായ ഹിറോ​ഡോ​ട്ടസ്‌ പറയു​ന്നത്‌, 26,41,610 എന്ന അവിശ്വ​സ​നീയ സംഖ്യ​യാണ്‌ സെർക്‌സി​സി​ന്റെ കരസേ​ന​യി​ലും നാവി​ക​സേ​ന​യി​ലു​മാ​യി ഉണ്ടായി​രു​ന്നത്‌ എന്നാണ്‌.b

ഇതേസ​മയം, ഗ്രീക്കു​കാർ തങ്ങളു​ടേ​തായ രീതി​യിൽ തയ്യാ​റെ​ടു​പ്പു​കൾ നടത്താൻ തുടങ്ങി​യി​രു​ന്നു. പതിവാ​യി സമു​ദ്ര​യാ​ത്ര നടത്തു​ന്ന​വ​രാ​യി​രു​ന്നെ​ങ്കി​ലും ദുർബ​ല​മായ ഒരു നാവി​കപ്പട ആയിരു​ന്നു അവർക്ക്‌ ഉണ്ടായി​രു​ന്നത്‌. എന്നാൽ ഇപ്പോൾ, പേർഷ്യ​ക്കാ​രിൽ നിന്നുള്ള കടുത്ത ആക്രമണ ഭീഷണി ഉണ്ടായ​തി​നാ​ലും ഡെൽഫി​യിൽ നിന്നുള്ള ഒരു വെളി​ച്ച​പ്പാട്‌ ‘മര മതിലു​ക​ളാൽ’ തങ്ങളെ​ത്തന്നെ സംരക്ഷി​ക്കാൻ ഉപദേ​ശി​ച്ച​തി​നാ​ലും, ഏഥൻസു​കാർ ശക്തമായ ഒരു നാവി​കപ്പട രൂപീ​ക​രി​ക്കാൻ തുടങ്ങി.

ലോറി​യ​ത്തി​ലെ സർക്കാർ വക ഖനിക​ളിൽ വെള്ളി നിക്ഷേപം സമൃദ്ധ​മാ​യി ഉണ്ടായി​രു​ന്നു. 200 ട്രൈ​റി​മു​കൾ അടങ്ങുന്ന ഒരു നാവിക വ്യൂഹം രൂപീ​ക​രി​ക്കാ​നാ​യി ഈ ഖനിക​ളിൽ നിന്നുള്ള മുഴു​ലാ​ഭ​വും ഉപയോ​ഗി​ക്കാൻ ഏഥൻസി​ലെ ഒരു പ്രമുഖ രാഷ്‌ട്ര​ത​ന്ത്ര​ജ്ഞ​നാ​യി​രുന്ന തെമി​സ്‌തോ​ക്ലിസ്‌ അസംബ്ലി​യെ ശക്തമായി പ്രേരി​പ്പി​ച്ചു. ആദ്യം അൽപ്പം മടി​ച്ചെ​ങ്കി​ലും, 30-തോളം ഗ്രീക്കു നഗരരാ​ഷ്‌ട്രങ്ങൾ അടങ്ങുന്ന യവന സഖ്യം രൂപീ​ക​രി​ക്കു​ന്ന​തി​നു സ്‌പാർട്ട നേതൃ​ത്വം നൽകി.

ഇതേസ​മ​യം, സെർക്‌സിസ്‌ തന്റെ ആക്രമ​ണോ​ത്സു​ക​മായ വിനാശക സേനയെ യൂറോ​പ്പി​ലേക്കു നയിക്കു​ക​യാ​യി​രു​ന്നു—വെല്ലു​വി​ളി നിറഞ്ഞ ഒരു സംരംഭം തന്നെ. വഴിമ​ധ്യേ ഉള്ള നഗരങ്ങ​ളാ​യി​രു​ന്നു ഭക്ഷണം പ്രദാനം ചെയ്യേ​ണ്ടി​യി​രു​ന്നത്‌. മുഴു സൈന്യ​ത്തി​ന്റെ​യും ഒരൊറ്റ നേരത്തെ ആഹാര​ത്തിന്‌ ഒരു ദിവസം 400 താലന്ത്‌ സ്വർണം മുട​ക്കേ​ണ്ടി​യി​രു​ന്നു. രാജ​ഭോ​ജ​ന​ത്തി​നു വേണ്ട ആടുമാ​ടു​കൾ, പക്ഷികൾ, ധാന്യം എന്നിവ ഒരു​ക്കേ​ണ്ട​തി​നു മാസങ്ങൾക്കു മുമ്പു തന്നെ രാജകി​ങ്ക​ര​ന്മാ​രെ അയയ്‌ക്കു​ക​യു​ണ്ടാ​യി. സെർക്‌സി​സി​നു മാത്ര​മാണ്‌ ഒരു കൂടാരം ഉണ്ടായി​രു​ന്നത്‌. ശേഷം സൈന്യം മുഴുവൻ വെളി​മ്പ്ര​ദേ​ശ​ത്താ​ണു കിടന്നു​റ​ങ്ങി​യി​രു​ന്നത്‌.

ഈ ബൃഹത്തായ സൈന്യ​ത്തിന്‌ ആദ്യം, ഏഷ്യയെ യൂറോ​പ്പിൽ നിന്നു വേർതി​രി​ക്കുന്ന ഒരു ഇടുങ്ങിയ കടലി​ടു​ക്കായ ഹെലസ്‌പോന്റ്‌ (ഇപ്പോൾ ഡാർഡ​നെൽസ്‌ എന്നു വിളി​ക്ക​പ്പെ​ടു​ന്നു) മുറിച്ചു കടക്കേ​ണ്ടി​യി​രു​ന്നു. ഒരു കൊടു​ങ്കാ​റ്റിൽ പെട്ടു രണ്ടു തോണി​പ്പാ​ലങ്ങൾ തകർന്ന​പ്പോൾ ഭ്രാന്ത​മായ കോപാ​വേ​ശ​ത്തിൽ സെർക്‌സിസ്‌ ഹെലസ്‌പോ​ന്റി​ലെ വെള്ളത്തെ 300 പ്രാവ​ശ്യം ചാട്ടയ്‌ക്കു പ്രഹരി​ക്കാ​നും ചങ്ങലയിൽ തളയ്‌ക്കാ​നും അതിൽ ഇരുമ്പു ചുട്ടു​പ​ഴു​പ്പി​ച്ചു വെക്കാ​നും ഉത്തരവി​ട്ടു. അവ നിർമിച്ച എഞ്ചിനീ​യർമാ​രെ അദ്ദേഹം ശിര​ച്ഛേദം ചെയ്യി​ക്കു​ക​യും ചെയ്‌തു. ഹെലസ്‌പോ​ന്റി​നു മുകളി​ലൂ​ടെ വീണ്ടും രണ്ടു പാലങ്ങൾ കൂടി നിർമി​ക്കു​ക​യു​ണ്ടാ​യി. മുഴു സൈന്യ​വും ആ പാലങ്ങ​ളി​ലൂ​ടെ അക്കരെ കടക്കാൻ ഒരാഴ്‌ച എടുത്തു.

തെർമോ​പ്പില—ദുർഗ​മ​മായ ഒരു ഇടുങ്ങിയ പ്രദേശം

പൊ.യു.മു. 480-ന്റെ മധ്യ​ത്തോ​ട​ടു​ത്തു പേർഷ്യൻ സാമ്രാ​ജ്യ​ത്തി​ന്റെ കരസേന—ഒപ്പം നാവി​ക​സേ​ന​യും—തെസ്സാലി തീരത്തു കൂടെ മുന്നേറി. നീണ്ടു കിടക്കു​ന്ന​തെ​ങ്കി​ലും ഇടുങ്ങിയ പ്രദേ​ശ​മാ​യി​രുന്ന തെർമോ​പ്പി​ല​യിൽ നിലയു​റ​പ്പി​ക്കാൻ ഗ്രീക്കു സഖ്യസേന അവസാനം തീരു​മാ​നി​ച്ചു. വൻകര​യി​ലെ ചെങ്കു​ത്തായ പർവത​ങ്ങ​ളു​ടെ അടിവാ​ര​ത്തുള്ള ആ കടലോ​ര​പാ​ത​യ്‌ക്ക്‌ അന്നു 15 മീറ്റർ പോലും വീതി​യു​ണ്ടാ​യി​രു​ന്നില്ല.c

പേർഷ്യൻ സൈന്യ​ത്തി​ലെ തീരെ കുറച്ചു പടയാ​ളി​കൾക്കു മാത്രമേ ഒരേ സമയം ഈ ഇടുങ്ങിയ പ്രദേ​ശത്തു കൂടെ മുന്നേ​റാൻ ആകുമാ​യി​രു​ന്നു​ള്ളു. അതു​കൊണ്ട്‌, ദൃഢഗാ​ത്ര​രായ ഏതാനും ഗ്രീക്കു പടയാ​ളി​കൾ വിചാ​രി​ച്ചാൽ അവരെ തടഞ്ഞു​നിർത്താൻ സാധി​ക്കു​മാ​യി​രു​ന്നു. സ്‌പാർട്ട​യി​ലെ രാജാ​വാ​യി​രുന്ന ലിയാ​ണി​ഡ​സി​ന്റെ നേതൃ​ത്വ​ത്തിൽ 7,000 ഗ്രീക്കു​കാർ അടങ്ങുന്ന ഒരു സൈന്യം നേരത്തെ തന്നെ വന്നു തെർമോ​പ്പി​ല​യ്‌ക്ക്‌ അടുത്തുള്ള കടലി​ടു​ക്കു​കൾക്കു സമീപം സ്ഥാനം പിടി​ച്ചി​രു​ന്നു. ഇതേ സമയം, പേർഷ്യ​ക്കാ​രെ ചതിയിൽ പരാജ​യ​പ്പെ​ടു​ത്തു​ന്ന​തി​നാ​യി 270 യുദ്ധക്ക​പ്പ​ലു​കൾ അടങ്ങുന്ന ഗ്രീക്കു നാവി​ക​സേന ആർത്തേ​മി​സി​യം തീരത്തിന്‌ അകലെ​യാ​യി നങ്കൂര​മു​റ​പ്പി​ച്ചി​രു​ന്നു.

ആഗസ്റ്റ്‌ ആരംഭ​ത്തിൽ സെർക്‌സിസ്‌ തെർമോ​പ്പി​ല​യിൽ എത്തി, തന്റെ വൻ സൈന്യം ഗ്രീക്കു​കാ​രെ നിശ്ശേഷം തോൽപ്പി​ക്കും എന്ന ആത്മവി​ശ്വാ​സ​ത്തോ​ടെ. എന്നാൽ ഗ്രീക്കു​കാർ വിട്ടു​കൊ​ടു​ക്കാ​താ​യ​പ്പോൾ അവരെ തുരത്താ​നാ​യി അദ്ദേഹം മേദ്യ​രെ​യും സിസി​യ​രെ​യും പറഞ്ഞയച്ചു; പക്ഷേ ഈ സേനകൾക്കു കനത്ത തിരി​ച്ച​ടി​യേറ്റു. സേട്രാപ്പ്‌ ഹിഡാർനെ​സി​ന്റെ നേതൃ​ത്വ​ത്തിൻ കീഴിൽ സെർക്‌സിസ്‌ പറഞ്ഞയച്ച “ഇമ്മോർട്ടൽസ്‌”-ന്റെയും (അതിനി​പു​ണ​രായ പോരാ​ളി​ക​ളു​ടെ ഒരു സംഘം) ഗതി മറ്റൊ​ന്നാ​യി​രു​ന്നില്ല.

എഫിയാൽറ്റിസ്‌, ഒരു പേക്കി​നാവ്‌

പേർഷ്യ​ക്കാ​രു​ടെ വിജയ​ത്തി​നുള്ള സർവസാ​ധ്യ​ത​ക​ളും അസ്‌ത​മി​ച്ചു എന്നു തോന്നി​യ​പ്പോ​ഴാണ്‌ ദുരാ​ഗ്ര​ഹി​യായ ഒരു തെസ്സാ​ലി​യൻ കർഷകൻ എഫിയാൽറ്റിസ്‌ (ഗ്രീക്കിൽ “പേക്കി​നാവ്‌” എന്ന്‌ അർഥം) കുന്നു​ക​ളു​ടെ മുകളിൽ കൂടി അവരെ ഗ്രീക്കു സേനയു​ടെ പിൻഭാ​ഗത്ത്‌ എത്തിക്കാ​മെന്നു വാഗ്‌ദാ​നം ചെയ്‌തത്‌. പിറ്റേന്നു പ്രഭാ​ത​ത്തിൽ, ഗ്രീക്കു​കാ​രെ പിമ്പിൽ നിന്ന്‌ ആക്രമി​ക്കത്തക്ക വിധത്തിൽ പേർഷ്യ​ക്കാർ അവരെ വളഞ്ഞു. തങ്ങളുടെ പതനം ആസന്നമാ​യെന്നു മനസ്സി​ലാ​ക്കിയ സ്‌പാർട്ട​ക്കാർ കടുത്ത വീറോ​ടും വാശി​യോ​ടും കൂടെ പൊരു​തി. ശത്രു നിരക​ളി​ലേക്ക്‌ ഇറങ്ങി​ച്ചെന്നു പോരാ​ടാൻ സൈനി​ക​മേ​ധാ​വി​ക​ളാൽ നിർബ​ന്ധി​ത​രാ​ക്ക​പ്പെട്ട പേർഷ്യ​ക്കാ​രിൽ അനേക​രും ചവി​ട്ടേറ്റു മരിക്കു​ക​യോ കടലിൽ തള്ളപ്പെ​ടു​ക​യോ ചെയ്‌തു. എന്നിരു​ന്നാ​ലും അവസാനം, ലിയാ​ണി​ഡസ്‌ രാജാ​വും അദ്ദേഹ​ത്തി​ന്റെ കൂടെ അപ്പോൾ ഉണ്ടായി​രുന്ന 1,000 സൈനി​ക​രും കൊല്ല​പ്പെട്ടു. ഇങ്ങനെ ഹിഡാർനെസ്‌ ആ സ്‌പാർട്ട​ക്കാ​രു​ടെ മേൽ വിജയം വരിച്ചു.

പേർഷ്യൻ കരസേ​ന​യും പേർഷ്യൻ നാവി​ക​പ്പ​ട​യിൽ ശേഷി​ച്ച​വ​രും ചേർന്ന്‌ ഏഥൻസു​കാ​രെ അവരുടെ വീടു​ക​ളി​ലേക്കു തുരത്തി​യോ​ടി​ച്ചു. കണ്ണിൽ കണ്ടതെ​ല്ലാം കൊള്ള​യി​ട്ടും തീവെ​ച്ചും കൊണ്ടു സെർക്‌സിസ്‌ ആറ്റിക്ക​യി​ലേക്കു മാർച്ചു ചെയ്‌തു. ഏഥൻസു​കാർ എല്ലാം ഇട്ടെറിഞ്ഞ്‌ സമീപ​ത്തുള്ള സലാമീസ്‌ ദ്വീപി​ലേക്ക്‌ പോയി. ഗ്രീക്കു നാവി​ക​പ്പ​ട​യാ​കട്ടെ, ഏഥൻസി​നും സലാമീ​സി​നും ഇടയ്‌ക്കു നിലയു​റ​പ്പി​ച്ചു. ഏഥൻസി​ലെ അക്രോ​പ്പൊ​ലിസ്‌ നിലം​പ​രി​ചാ​ക്കാൻ രണ്ടാഴ്‌ച വേണ്ടി വന്നു. അതിലെ കാവൽക്കാ​രെ​ല്ലാം വധിക്ക​പ്പെട്ടു, ദേവാ​ല​യങ്ങൾ കൊള്ള​യ​ടി​ക്ക​പ്പെട്ടു. എന്നിട്ടും മതിവ​രാ​തെ, അവയെ തകർത്തു​ത​രി​പ്പ​ണ​മാ​ക്കി തീവെച്ചു ചുട്ടു കളയു​ക​യും ചെയ്‌തു.

സലാമീസ—“മര മതിലു​കൾ” പ്രവർത്ത​ന​ത്തിൽ

തെർമോ​പ്പി​ല​യ്‌ക്കു സമീപം ഗ്രീക്കു യുദ്ധക്ക​പ്പ​ലു​കൾ പേർഷ്യൻ നാവി​ക​പ്പ​ട​യു​മാ​യി ഉഗ്രമായ, എന്നാൽ പ്രത്യേക യുദ്ധത​ന്ത്ര​ങ്ങ​ളൊ​ന്നും ഉപയോ​ഗി​ക്കാഞ്ഞ ധാരാളം ഏറ്റുമു​ട്ട​ലു​കൾ നടത്തി​യി​രു​ന്നു. ഇപ്പോ​ഴാ​കട്ടെ, കരസേന പിൻവാ​ങ്ങി​യ​തി​നാൽ ഗ്രീക്കു നാവി​ക​പ്പ​ട​യും തെക്കോ​ട്ടേക്കു പിൻവാ​ങ്ങി​യി​രു​ന്നു. സലാമീസ്‌ ഉൾക്കട​ലിൽ നാവി​കപ്പട വീണ്ടും ഒരുമി​ച്ചു ചേർന്നു. ഇവിടെ വെച്ചു തെമി​സ്‌തോ​ക്ലിസ്‌ ഒരു യുദ്ധത​ന്ത്രം മെനയാൻ തുടങ്ങി.

പേർഷ്യൻ നാവി​ക​പ്പ​ട​യു​ടെ ശക്തി​കേ​ന്ദ്ര​മാ​യി വർത്തിച്ച 300 ഫിനി​ഷ്യൻ കപ്പലുകൾ വലിപ്പ​മു​ള്ള​വ​യെ​ങ്കി​ലും, ചെറു​തും ബലിഷ്‌ഠ​വു​മാ​യി​രുന്ന ഗ്രീക്കു ട്രൈ​റി​മു​ക​ളോ​ടുള്ള താരത​മ്യ​ത്തിൽ ഓടി​ക്കാൻ കൂടുതൽ എളുപ്പ​മു​ള്ള​വ​യാ​യി​രു​ന്നു എന്ന്‌ അദ്ദേഹ​ത്തിന്‌ അറിയാ​മാ​യി​രു​ന്നു. പേർഷ്യൻ നാവി​ക​വ്യൂ​ഹ​ത്തിൽ ഏകദേശം 1,200 കപ്പലുകൾ ഉണ്ടായി​രി​ക്കെ ഗ്രീക്കു സേനക്കു വെറും 380 കപ്പലുകൾ മാത്ര​മാണ്‌ ഉണ്ടായി​രു​ന്നത്‌. കൂടാതെ, ഗ്രീക്കു നാവികർ പേർഷ്യൻ യുദ്ധക്ക​പ്പ​ലു​ക​ളി​ലെ നാവി​ക​രു​ടെ അത്രയും പരിച​യ​സ​മ്പ​ന്ന​രും അല്ലായി​രു​ന്നു. എന്നാൽ സലാമീ​സി​നും ആറ്റിക്ക തീരത്തി​നും ഇടയി​ലുള്ള നീർച്ചാൽ ഇടുങ്ങി​യ​താ​യി​രു​ന്നു. വെറും 50 കപ്പലു​കൾക്കു മാത്രമേ ഒരുമിച്ച്‌ അതിലൂ​ടെ മുന്നേ​റാൻ സാധി​ക്കു​മാ​യി​രു​ന്നു​ള്ളു. ഗ്രീക്കു​കാർക്കു പേർഷ്യ​ക്കാ​രെ ഈ പ്രകൃ​തി​ദ​ത്ത​മായ ചോർപ്പി​ലേക്ക്‌ എങ്ങനെ​യെ​ങ്കി​ലും എത്തിക്കാൻ സാധി​ച്ചാൽ, ഓടി​ക്കാൻ വളരെ എളുപ്പ​മായ അനേകം കപ്പലുകൾ ഉണ്ടെന്നുള്ള പേർഷ്യൻ മേധാ​വി​ത്വം തകരു​മാ​യി​രു​ന്നു. ഗ്രീക്കു നാവി​ക​സേന പലായനം ചെയ്യു​ന്ന​തി​നു മുമ്പേ അവരെ ആക്രമി​ക്കാൻ പ്രലോ​ഭി​പ്പി​ച്ചു കൊണ്ടുള്ള ഒരു വഞ്ചനാ​ക​ര​മായ സന്ദേശം സെർക്‌സി​സിന്‌ അയച്ചു​കൊണ്ട്‌ തെമി​സ്‌തോ​ക്ലിസ്‌ യുദ്ധം എത്രയും പെട്ടെന്ന്‌ ആരംഭി​ക്കാൻ ഇടയാ​ക്കി​യ​താ​യി പറയ​പ്പെ​ടു​ന്നു.

അങ്ങനെ, ഒടുവിൽ അതു സംഭവി​ച്ചു. പേർഷ്യൻ നാവി​ക​വ്യൂ​ഹം ആറ്റിക്ക​യു​ടെ മുനമ്പു ചുറ്റി​വ​ളഞ്ഞു നീർച്ചാൽ ലക്ഷ്യമാ​ക്കി കുതിച്ചു. സർവസ​ന്നാ​ഹ​ങ്ങ​ളോ​ടും കൂടി എത്തിയ ഓരോ യുദ്ധക്ക​പ്പ​ലി​ലും തുഴക്കാ​രും യുദ്ധം ചെയ്യു​ന്ന​തി​നാ​യി വില്ലാ​ളി​ക​ളും കുന്തം ഏന്തിയ പോരാ​ളി​ക​ളും നിരന്നി​രു​ന്നു. വിജയം സുനി​ശ്ചി​ത​മാ​ണെന്നു വിശ്വ​സിച്ച സെർക്‌സിസ്‌, യുദ്ധം നടക്കു​ന്നതു സ്വസ്ഥമാ​യി​രു​ന്നു കാണാൻ വേണ്ടി ഒരു മലയുടെ മുകളിൽ തന്റെ സിംഹാ​സനം സ്ഥാപി​ച്ചി​രു​ന്നു.

കനത്ത പരാജയം

ആ ഇടുങ്ങിയ നീർച്ചാ​ലി​ലേക്കു പേർഷ്യ​ക്കാർ തള്ളിക്ക​യ​റി​യ​പ്പോൾ അവിട​മാ​കെ ബഹളമ​യ​മാ​യി. പൊടു​ന്നനെ, സലാമീസ്‌ ദ്വീപി​ന്റെ ഉയരങ്ങ​ളിൽ എവി​ടെ​യോ നിന്ന്‌ ഒരു കാഹള​ശബ്ദം മുഴങ്ങി കേട്ടു. ഗ്രീക്കു കപ്പലുകൾ നിരനി​ര​യാ​യി ശരവേ​ഗ​ത്തിൽ മുന്നോ​ട്ടു കുതിച്ചു. ട്രൈ​റി​മു​കൾ പേർഷ്യൻ കപ്പലു​ക​ളിൽ ഇടിച്ചു അവയുടെ പള്ള തകർക്കു​ക​യും ആ കപ്പലുകൾ തമ്മിൽ കൂട്ടി ഇടിക്കു​ന്ന​തിന്‌ ഇടയാ​ക്കു​ക​യും ചെയ്‌തു. തകർക്ക​പ്പെട്ട ശത്രു കപ്പലു​ക​ളി​ലേക്കു വാളേ​ന്തിയ ഗ്രീക്കു യോദ്ധാ​ക്കൾ ചാടി​ക്ക​യറി.

ആറ്റിക്ക​യു​ടെ തീര​ത്തെ​ങ്ങും തടിക്ക​ഷ​ണ​ങ്ങ​ളും ശരീര​ഭാ​ഗ​ങ്ങ​ളും ചിതറി വീണു. ഈ ദുരന്ത​നാ​ട​കത്തെ തുടർന്ന്‌ അവശേ​ഷിച്ച കപ്പലു​ക​ളു​മാ​യി സെർക്‌സിസ്‌ സ്വരാ​ജ്യ​ത്തേക്കു തിരിച്ചു. ആ വർഷ​ത്തേ​ക്കുള്ള അദ്ദേഹ​ത്തി​ന്റെ സൈനിക പ്രവർത്ത​ന​ങ്ങ​ളെ​ല്ലാം അതോടെ അവസാ​നി​ച്ചു. എന്നിരു​ന്നാ​ലും, ഗണ്യമായ ഒരു കൂട്ടം സൈനി​കരെ ശൈത്യ​കാ​ലം കഴിയു​ന്നതു വരെ തന്റെ സ്യാല​നായ മാർഡോ​ണി​യ​സി​ന്റെ കീഴിൽ നിർത്തി​യി​ട്ടാണ്‌ അദ്ദേഹം അവിടെ നിന്നും പോയത്‌.

ഉത്സുക​രാ​യ ബൈബിൾ വിദ്യാർഥി​കൾക്ക്‌, സലാമീ​സി​ലെ പരാജയം, ദാനീ​യേൽ പ്രവച​ന​ത്തിൽ പരാമർശി​ച്ചി​രി​ക്കുന്ന മേദോ​പേർഷ്യ​യാ​കുന്ന “രണ്ടു കൊമ്പുള്ള ആട്ടു​കൊറ്റ”ന്റെ മേൽ ഗ്രീസ്‌ എന്ന “കോലാ​ട്ടു​കൊ​റ്റൻ” നേടുന്ന ആത്യന്തിക മേധാ​വി​ത്വ​ത്തി​ന്റെ വളരെ നേര​ത്തേ​യുള്ള ഒരു സൂചന​യാ​യി​രു​ന്നു. (ദാനീ​യേൽ 8:5-8) അതിലും പ്രധാ​ന​മാ​യി, അധികാ​ര​ത്തി​നു വേണ്ടി​യുള്ള മനുഷ്യ​ന്റെ നിഷ്‌ഫ​ല​മായ പോരാ​ട്ട​ങ്ങൾക്കു രാജാ​വായ യേശു​ക്രി​സ്‌തു​വി​ന്റെ ഭരണാ​ധി​പ​ത്യം ഒരു പരിസ​മാ​പ്‌തി കുറി​ക്കും എന്ന ഉറപ്പാണു ബൈബിൾ പ്രവച​നങ്ങൾ ദൈവ​ദാ​സർക്കു നൽകു​ന്നത്‌.—യെശയ്യാ​വു 9:6; ദാനീ​യേൽ 2:44.

[അടിക്കു​റി​പ്പു​കൾ]

[25-ാം പേജിലെ ചതുരം/ചിത്രം]

ട്രൈ​റിം—ഒരു മാരക കപ്പൽ

പൊ.യു.മു. അഞ്ചാം നൂറ്റാ​ണ്ടിൽ ഇജിയ​നിൽ വെച്ച്‌ ഏഥൻസു​കാർ നേടിയ നാവി​ക​വി​ജ​യ​ത്തി​ന്റെ പിമ്പി​ലുള്ള ശക്തി ട്രൈ​റി​മാ​യി​രു​ന്നു. സാധാ​ര​ണ​ഗ​തി​യിൽ പായയു​ടെ സഹായ​ത്താൽ സഞ്ചരി​ച്ചി​രുന്ന വീതി കുറഞ്ഞ ആ കപ്പൽ നാവിക യുദ്ധങ്ങ​ളു​ടെ സമയത്തു തുഴക്കാർ തുഴഞ്ഞി​രു​ന്നു. ഓരോ തുഴക്ക​പ്പ​ലി​ലും ഒരു ചെറു സംഘം സൈനി​കർ ഉണ്ടായി​രു​ന്നു. പക്ഷേ ശത്രു​ക​പ്പ​ലു​ക​ളിൽ ചാടി​ക്ക​യറി ആക്രമി​ക്കുക എന്നതി​നെ​ക്കാൾ ട്രൈ​റി​മി​ന്റെ ലോഹം കൊണ്ടുള്ള കൂർത്ത മുന്ന​ഗ്ര​ത്താൽ ശത്രു​ക​പ്പ​ലു​കളെ തകർക്കുക എന്നതാ​യി​രു​ന്നു ഇവരുടെ ലക്ഷ്യം. 170 തുഴക്കാ​രാ​യി​രു​ന്നു ട്രൈ​റി​മിൽ ഉണ്ടായി​രു​ന്നത്‌.

[കടപ്പാട്‌]

Hellenic Maritime Museum/ ഫോട്ടോ: P. Stolis

[26-ാം പേജിലെ ഭൂപടം]

(പൂർണ​രൂ​പ​ത്തിൽ കാണു​ന്ന​തി​നു പ്രസി​ദ്ധീ​ക​രണം നോക്കുക.)

സെർക്‌സിസിന്റെ സേനകൾ

തെസ്സാലി

ആർത്തേമിസിയം

തെർമോപ്പില

ആറ്റിക്ക

സലാമീസ്‌

മാരത്തോൺ

ഏഥൻസ്‌

ലോറിയം

സ്‌പാർട്ട

ഹെലസ്‌പോന്റ്‌

[കടപ്പാട്‌]

Mountain High Maps® Copyright © 1997 Digital Wisdom, Inc.