ബൈബി​ളി​ന്റെ വീക്ഷണം

വിവാ​ഹ​ത്തിൽ മത ഐക്യം—പ്രാധാ​ന്യ​മർഹി​ക്കു​ന്ന​തി​ന്റെ കാരണം

ഒരു കുടും​ബം അത്താഴം കഴിക്കാൻ ഇരിക്കു​ക​യാണ്‌. പിതാവ്‌ ഉച്ചത്തിൽ പ്രാർഥി​ക്കു​മ്പോൾ അമ്മ മറ്റൊരു ദൈവ​ത്തോ​ടു മൗനമാ​യി പ്രാർഥി​ക്കു​ന്നു. വേറൊ​രു വീട്ടിൽ ഭാര്യ പള്ളിയിൽ പോകു​ന്നു, ഭർത്താവ്‌ സിന​ഗോ​ഗി​ലും. മാതാ​പി​താ​ക്ക​ളിൽ ഒരാൾ മക്കളെ സാന്താ​ക്ലോ​സി​നെ കുറിച്ചു പഠിപ്പി​ക്കു​മ്പോൾ മറ്റെയാൾ യഹൂദ ഉത്സവമായ ഹനുക്കയെ കുറിച്ചു പഠിപ്പി​ക്കുന്ന കുടും​ബ​ങ്ങ​ളും ഉണ്ട്‌.

അന്യ മതസ്ഥരെ വിവാഹം ചെയ്യു​ന്ന​വ​രു​ടെ എണ്ണം വർധി​ക്കു​ന്ന​തി​നാൽ അത്തരം രംഗങ്ങൾ സാധാ​ര​ണ​മാ​ണെന്നു സമീപ​കാല പഠനങ്ങൾ തെളി​യി​ക്കു​ന്നു. ഒരു സർവേ അനുസ​രിച്ച്‌, ഐക്യ​നാ​ടു​ക​ളിൽ 21 ശതമാനം കത്തോ​ലി​ക്കർ അന്യ മതക്കാരെ വിവാഹം ചെയ്യുന്നു; മോർമൻകാ​രു​ടെ ഇടയിൽ അത്‌ 30 ശതമാ​ന​മാണ്‌; മുസ്ലീ​ങ്ങ​ളു​ടെ ഇടയിൽ 40 ശതമാ​ന​വും യഹൂദ​രു​ടെ ഇടയിൽ 50 ശതമാ​ന​വും ആണത്‌. നൂറ്റാ​ണ്ടു​കൾ പഴക്കമുള്ള മതവി​ദ്വേ​ഷം കണക്കി​ലെ​ടു​ക്കു​മ്പോൾ, ചിലർ മിശ്ര​വി​വാ​ഹത്തെ അസഹി​ഷ്‌ണു​ത​യു​ടെ മേലുള്ള വിജയ​മാ​യി കണക്കാ​ക്കു​ന്നു. ഒരു പത്രപം​ക്തീ​കാ​രൻ ഇങ്ങനെ എഴുതി: “ഏതു തരത്തി​ലുള്ള മിശ്ര​വി​വാ​ഹ​വും അങ്ങേയറ്റം പ്രകീർത്തി​ക്ക​പ്പെ​ടേ​ണ്ട​താണ്‌.” എന്നാൽ, ബൈബി​ളി​ന്റെ വീക്ഷണം അതാണോ?

വർഗീ​യ​മോ വംശീ​യ​മോ ആയ മുൻവി​ധി​കളെ ബൈബിൾ പ്രോ​ത്സാ​ഹി​പ്പി​ക്കു​ന്നില്ല എന്നതു കുറി​ക്കൊ​ള്ളേ​ണ്ട​താണ്‌. ദൈവ​വ​ചനം വർഗീയ നിഷ്‌പ​ക്ഷ​തയെ പ്രോ​ത്സാ​ഹി​പ്പി​ക്കു​ന്നു. അതേക്കു​റി​ച്ചു പത്രൊസ്‌ അപ്പൊ​സ്‌തലൻ വ്യക്തമാ​യി ഇങ്ങനെ പറഞ്ഞു: “ദൈവ​ത്തി​ന്നു മുഖപ​ക്ഷ​മില്ല എന്നും ഏതു ജാതി​യി​ലും അവനെ ഭയപ്പെട്ടു നീതി പ്രവർത്തി​ക്കു​ന്ന​വനെ അവൻ അംഗീ​ക​രി​ക്കു​ന്നു എന്നും ഞാൻ ഇപ്പോൾ യഥാർത്ഥ​മാ​യി ഗ്രഹി​ക്കു​ന്നു.” (പ്രവൃ​ത്തി​കൾ 10:34, 35) അതേസ​മയം, യഹോ​വ​യു​ടെ സത്യാ​രാ​ധകർ, “കർത്താ​വിൽ വിശ്വ​സി​ക്കു​ന്ന​വ​നു​മാ​യി മാത്രമേ” വിവാഹം ചെയ്യാവൂ എന്നു ബൈബിൾ പഠിപ്പി​ക്കു​ന്നു. (1 കൊരി​ന്ത്യർ 7:39) എന്തു​കൊണ്ട്‌?

വിവാ​ഹ​ത്തി​ന്റെ ഉദ്ദേശ്യം

വിവാഹം, സവി​ശേ​ഷ​ത​യുള്ള ഒരു ഉറ്റ ബന്ധം ആയിരി​ക്കാൻ ദൈവം ഉദ്ദേശി​ച്ചി​രു​ന്നു. (ഉല്‌പത്തി 2:24) വിവാ​ഹ​ക്ര​മീ​ക​ര​ണ​ത്തി​നു തുടക്ക​മി​ട്ട​പ്പോൾ സഖിത്വ​ത്തെ​ക്കാൾ കവിഞ്ഞ ഒന്നാണു ദൈവ​ത്തി​ന്റെ മനസ്സിൽ ഉണ്ടായി​രു​ന്നത്‌. ആദ്യ ദമ്പതി​കൾക്കു മക്കളെ വളർത്താ​നും തങ്ങളുടെ ഭൗമിക ഭവനത്തെ പരിപാ​ലി​ക്കാ​നു​മുള്ള നിയമനം നൽകവെ, തന്റെ ഉദ്ദേശ്യം നിവർത്തി​ക്കു​ന്ന​തിന്‌ അവർ ഇരുവ​രും ഒത്തൊ​രു​മി​ച്ചു പ്രവർത്തി​ക്കേ​ണ്ട​താ​ണെന്ന്‌ അവൻ വ്യക്തമാ​ക്കി. (ഉല്‌പത്തി 1:28) ഈ വിധത്തിൽ ദൈവത്തെ സേവി​ക്കു​ന്ന​തിൽ സഹകരി​ക്കു​ന്ന​തി​ലൂ​ടെ പുരു​ഷ​നും സ്‌ത്രീ​യും സഖിത്വം മാത്രമല്ല, നിലനിൽക്കുന്ന ഉറ്റ പങ്കാളി​ത്ത​വും ആസ്വദി​ക്കു​മാ​യി​രു​ന്നു.—മലാഖി 2:14 താരത​മ്യം ചെയ്യുക.

പിൻവ​രു​ന്ന, വിഖ്യാ​ത​മായ വാക്കുകൾ പറഞ്ഞ​പ്പോൾ യേശു ആ പങ്കാളി​ത്തത്തെ കുറി​ച്ചാ​ണു സൂചി​പ്പി​ച്ചത്‌: “അവർ മേലാൽ രണ്ടല്ല, ഒരു ദേഹമ​ത്രേ; ആകയാൽ ദൈവം യോജി​പ്പി​ച്ച​തി​നെ മനുഷ്യൻ വേർപി​രി​ക്ക​രു​തു.” (മത്തായി 19:6) വിവാ​ഹ​ബ​ന്ധത്തെ താരത​മ്യ​പ്പെ​ടു​ത്താൻ, ഭാരം വലിക്കു​ന്ന​തി​നു രണ്ടു മൃഗങ്ങളെ ഒരുമി​ച്ചു പിണയ്‌ക്കുന്ന ഒരു നുകത്തെ യേശു പ്രതീ​കാ​ത്മ​ക​മാ​യി ഉപയോ​ഗി​ച്ചു. ഒരേ നുകത്തിൽ പിണച്ചി​രി​ക്കുന്ന രണ്ടു മൃഗങ്ങൾ എതിർ ദിശക​ളി​ലേക്കു വലിക്കു​മ്പോ​ഴത്തെ ബുദ്ധി​മുട്ട്‌ ഒന്ന്‌ ആലോ​ചി​ച്ചു​നോ​ക്കൂ! സമാന​മാ​യി, സത്യ വിശ്വാ​സ​ത്തി​നു വെളി​യി​ലു​ള്ള​വരെ വിവാഹം ചെയ്യു​ന്നവർ, ഇണയുടെ എതിർപ്പി​ന്മ​ധ്യേ ബൈബിൾ തത്ത്വങ്ങൾക്കു ചേർച്ച​യിൽ ജീവി​ക്കാൻ തങ്ങൾക്കു കഠിന ശ്രമം ചെയ്യേ​ണ്ടി​വ​രു​ന്ന​താ​യി കണ്ടെത്തി​യേ​ക്കാം. അനു​യോ​ജ്യ​മാ​യി​ത്തന്നെ ബൈബിൾ പ്രസ്‌താ​വി​ക്കു​ന്നു: “നിങ്ങൾ അവിശ്വാ​സി​ക​ളോ​ടു ഇണയി​ല്ലാ​പ്പിണ കൂടരു​തു.”—2 കൊരി​ന്ത്യർ 6:14.

മെച്ചപ്പെട്ട വിവാ​ഹ​ബ​ന്ധം

സത്യാ​രാ​ധ​ന​യി​ലെ ഐക്യ​ത്തി​നു വിവാ​ഹ​ബ​ന്ധത്തെ അങ്ങേയറ്റം ശക്തമാ​ക്കാൻ കഴിയും. “ഏകീകൃ​ത​മായ ആരാധ​ന​യാ​ണു ഭദ്രത​യും സന്തുഷ്ടി​യു​മുള്ള കുടും​ബ​ങ്ങ​ളു​ടെ പ്രധാന സവി​ശേ​ഷ​ത​ക​ളിൽ ഒന്ന്‌” എന്ന്‌ ഒരു ലേഖകൻ അഭി​പ്രാ​യ​പ്പെട്ടു. സഭാ​പ്ര​സം​ഗി 4:9, 10 ഇങ്ങനെ പറയുന്നു: “ഒരുവ​നെ​ക്കാൾ ഇരുവർ ഏറെ നല്ലതു; അവർക്കു തങ്ങളുടെ പ്രയത്‌ന​ത്താൽ നല്ല പ്രതി​ഫലം കിട്ടുന്നു. വീണാൽ ഒരുവൻ മറേറ​വനെ എഴു​ന്നേ​ല്‌പി​ക്കും.”

തങ്ങളുടെ ജീവിതം ആരാധ​ന​യിൽ കേന്ദ്രീ​ക​രി​ക്കുന്ന ക്രിസ്‌തീയ ദമ്പതികൾ ശാരീ​രി​ക​മാ​യി മാത്രമല്ല ആത്മീയ​മാ​യും ഏകീകൃ​ത​രാണ്‌. ഒരുമി​ച്ചു പ്രാർഥി​ക്കു​ക​യും ദൈവ​വ​ചനം പഠിക്കു​ക​യും സഹക്രി​സ്‌ത്യാ​നി​ക​ളോ​ടൊ​പ്പം കൂടി​വ​രു​ക​യും മറ്റുള്ള​വ​രു​മാ​യി വിശ്വാ​സം പങ്കിടു​ക​യും ചെയ്യവെ, തങ്ങളുടെ വിവാ​ഹ​ബ​ന്ധത്തെ ഊട്ടി​യു​റ​പ്പി​ക്കുന്ന ഒരു ഉറ്റ ആത്മീയ ബന്ധം അവർ വളർത്തി​യെ​ടു​ക്കു​ന്നു. ഒരു ക്രിസ്‌തീയ വനിത ഇങ്ങനെ അഭി​പ്രാ​യ​പ്പെട്ടു: “സത്യാ​രാ​ധന ഒരു ജീവി​ത​രീ​തി​യാണ്‌. ഞാൻ ആരാ​ണെ​ന്നും എന്താ​ണെ​ന്നും ഉള്ള അടിസ്ഥാന വസ്‌തു​തകൾ മനസ്സി​ലാ​ക്കാത്ത ഒരാളെ വിവാഹം ചെയ്യു​ന്നത്‌ എനിക്കു സങ്കൽപ്പി​ക്കാ​നേ കഴിയില്ല.”—മർക്കൊസ്‌ 3:35 താരത​മ്യം ചെയ്യുക.

‘കർത്താ​വിൽ വിശ്വ​സി​ക്കുന്ന’വരെ വിവാഹം ചെയ്യു​ന്ന​വർക്കു തങ്ങളുടെ ഇണ യേശു​വി​ന്റെ മാതൃക അനുക​രി​ക്കു​മെന്നു പ്രതീ​ക്ഷി​ക്കാ​നാ​കും. യേശു സഭയോ​ടു സ്‌നേ​ഹ​പു​ര​സ്സരം ഇടപെ​ട്ട​തു​പോ​ലെ ക്രിസ്‌തീയ ഭർത്താ​ക്ക​ന്മാർ ഭാര്യ​മാ​രോട്‌ ഇടപെ​ടേ​ണ്ട​താണ്‌. ക്രിസ്‌തീയ ഭാര്യ​മാ​രാ​കട്ടെ ഭർത്താ​ക്ക​ന്മാ​രോട്‌ ആദര​വോ​ടെ ഇടപെ​ടേ​ണ്ട​തുണ്ട്‌. (1 കൊരി​ന്ത്യർ 11:3; എഫെസ്യർ 5:25, 29, 33) അതിന്റെ പിന്നിലെ അവരുടെ ഉദ്ദേശ്യം, തങ്ങളുടെ ഇണകളെ മാത്രമല്ല ദൈവ​ത്തെ​യും സന്തോ​ഷി​പ്പി​ക്കുക എന്നതാണ്‌. കാരണം, തങ്ങൾ അന്യോ​ന്യം എങ്ങനെ പെരു​മാ​റു​ന്നു എന്നതിനെ ആസ്‌പ​ദ​മാ​ക്കി ദമ്പതികൾ ദൈവ​ത്തോ​ടു കണക്കു ബോധി​പ്പി​ക്കേ​ണ്ടി​യി​രി​ക്കു​ന്നു.—മലാഖി 2:13, 14; 1 പത്രൊസ്‌ 3:1-7.

ക്രിസ്‌തീ​യ ദമ്പതികൾ ഇരുവ​രും ഒരേ വിശ്വാ​സ​ത്തോ​ടു പറ്റിനിൽക്കു​ന്നതു സമാധാ​ന​പ​ര​മാ​യി പ്രശ്‌നങ്ങൾ പരിഹ​രി​ക്കാ​നും അവരെ സഹായി​ക്കു​ന്നു. “ഓരോ​രു​ത്തൻ സ്വന്തഗു​ണമല്ല മററു​ള്ള​വന്റെ ഗുണവും കൂടെ നോ​ക്കേണം” എന്നു ക്രിസ്‌ത്യാ​നി​കളെ ബൈബിൾ ബുദ്ധി​യു​പ​ദേ​ശി​ക്കു​ന്നു. (ഫിലി​പ്പി​യർ 2:4) വ്യക്തി​പ​ര​മായ താത്‌പ​ര്യ​ങ്ങൾ ഗണ്യമാ​ക്കാ​തെ, വിശ്വാ​സ​ത്തിൽ ഏകീകൃ​ത​രായ ഇണകൾ പ്രശ്‌ന​ങ്ങ​ളു​ടെ പരിഹാ​രാർഥം ഒരു പൊതു ആധികാ​രിക ഉറവി​ട​മെന്ന നിലയിൽ ദൈവ​വ​ച​ന​ത്തി​ലേക്കു തിരി​യു​ന്നു. (2 തിമൊ​ഥെ​യൊസ്‌ 3:16, 17) അങ്ങനെ, ‘ഏകമനസ്സ്‌’ ഉള്ളവരാ​യി​രി​ക്കണം എന്ന ബൈബി​ളി​ന്റെ ബുദ്ധി​യു​പ​ദേശം ക്രിസ്‌ത്യാ​നി​കൾ പിൻപ​റ്റു​ന്നു.—1 കൊരി​ന്ത്യർ 1:10; 2 കൊരി​ന്ത്യർ 13:11; ഫിലി​പ്പി​യർ 4:2.

ആകർഷ​ണ​വും പൊതു​വായ മൂല്യ​ങ്ങ​ളും

ഒരേ വിശ്വാ​സം പങ്കിടു​ന്ന​തി​ലും അധികം ഒരു ബന്ധത്തിൽ ഉൾപ്പെ​ട്ടി​രി​ക്കു​ന്നു എന്നതു മനസ്സി​ലാ​ക്കാ​വു​ന്നതേ ഉള്ളൂ. പരസ്‌പര ആകർഷണം പ്രധാ​ന​പ്പെട്ട ഒരു ഘടകമാണ്‌. (ഉത്തമഗീ​തം 3:5; 4:7, 9; 5:10) എന്നാൽ, ഒരു വിവാഹം നിലനിൽക്കു​ന്ന​തിന്‌ പൊതു​വായ മൂല്യ​ങ്ങ​ളും മർമ​പ്ര​ധാ​ന​മാണ്‌. ആർ യു ദ വൺ ഫോർ മീ? എന്ന ഗ്രന്ഥം പറയു​ന്ന​ത​നു​സ​രിച്ച്‌, “പൊതു​വായ മൂല്യങ്ങൾ ഉള്ള ദമ്പതികൾ സന്തോ​ഷ​പ്ര​ദ​വും യോജി​പ്പു​ള്ള​തും നിലനിൽക്കു​ന്ന​തു​മായ ബന്ധം വളർത്തി​യെ​ടു​ക്കാൻ വർധിച്ച സാധ്യ​തകൾ ഉണ്ട്‌.”

ദുഃഖ​ക​ര​മെ​ന്നു പറയട്ടെ, പരസ്‌പരം ആകർഷി​ത​രാ​കുന്ന വ്യക്തികൾ വിവാഹം കഴിയു​ന്നതു വരെ ഗൗരവാ​വ​ഹ​മായ പ്രശ്‌നങ്ങൾ ഗൗനി​ക്കാ​തി​രു​ന്നേ​ക്കാം. ഉദാഹ​ര​ണ​മെന്ന നിലയിൽ, ഒരു വീടു വാങ്ങുന്ന കാര്യ​മെ​ടു​ക്കുക. മുഖ്യ​മാ​യും, അതിന്റെ പുറ​മേ​യുള്ള ഭംഗി ഇഷ്ടപ്പെ​ട്ട​തു​കൊ​ണ്ടാ​കാം നിങ്ങൾ അതു വാങ്ങു​ന്നത്‌. എന്നാൽ, അതി​ലേക്കു താമസം മാറ്റിയ ശേഷമാണ്‌ അതിന്റെ അടിത്തറ ഭദ്രമല്ല എന്നു നിങ്ങൾ മനസ്സി​ലാ​ക്കു​ന്നത്‌. എത്രതന്നെ ആകർഷ​ക​മായ സവി​ശേ​ഷ​തകൾ ഉണ്ടായി​രു​ന്നാ​ലും, ഈടുറ്റ അടിത്ത​റ​യി​ല്ലാത്ത വീടു​കൊ​ണ്ടു യാതൊ​രു പ്രയോ​ജ​ന​വും ഇല്ല. സമാന​മാ​യി, അന്യ മതത്തിൽപ്പെട്ട, പൊരു​ത്ത​മു​ള്ള​താ​യി കാണ​പ്പെ​ടുന്ന ഒരു വ്യക്തി​യോ​ടു നിങ്ങൾക്ക്‌ ആകർഷണം തോന്നി​യേ​ക്കാം. എന്നാൽ, വിവാ​ഹ​ശേഷം ആ ബന്ധത്തിനു ഗുരു​ത​ര​മായ വിധത്തിൽ ഉലച്ചിൽ തട്ടി​യേ​ക്കാം.

മിശ്ര​വി​വാ​ഹ​ത്തിൽ പിന്നീട്‌ ഉയർന്നു​വ​ന്നേ​ക്കാ​വുന്ന ദുഷ്‌ക​ര​മായ ചില പ്രശ്‌ന​ങ്ങളെ കുറിച്ചു പരിചി​ന്തി​ക്കുക: ആരാധ​ന​യ്‌ക്കു കുടും​ബം എവിടെ പോകും? ഏതു തരത്തി​ലുള്ള മതപരി​ശീ​ല​ന​മാ​ണു കുട്ടി​കൾക്കു ലഭിക്കുക? ഏതു മതത്തി​നാ​ണു കുടും​ബം സാമ്പത്തിക പിന്തുണ നൽകുക? ഇണകളിൽ ഒരാൾ വ്യാജ​മ​ത​ത്തി​ന്റേ​തെന്നു കരുതുന്ന മത ആചാര​ങ്ങ​ളി​ലും വിശേഷ ദിവസ​ങ്ങ​ളി​ലും പങ്കുപ​റ്റ​ണ​മെന്നു മറ്റേ ഇണ നിർബന്ധം പിടി​ക്കു​മോ? (യെശയ്യാ​വു 52:11) ഏതൊരു വിവാ​ഹ​ബ​ന്ധ​ത്തി​ലും ഇരു പങ്കാളി​ക​ളും ന്യായ​യു​ക്ത​മായ പൊരു​ത്ത​പ്പെ​ടു​ത്ത​ലു​കൾ വരു​ത്തേ​ണ്ടത്‌ ആവശ്യ​മാണ്‌. എന്നുവ​രി​കി​ലും, ഒരു വിവാ​ഹ​ബന്ധം നിലനിർത്താൻ വേണ്ടി​യാ​ണെ​ങ്കിൽ പോലും, ബൈബിൾ തത്ത്വങ്ങ​ളിൽ വിട്ടു​വീഴ്‌ച വരുത്തു​ന്നതു ദൈവ​ത്തി​നു സ്വീകാ​ര്യ​മല്ല.—ആവർത്ത​ന​പു​സ്‌തകം 7:3, 4-ഉം നെഹെ​മ്യാ​വു 13:26, 27-ഉം താരത​മ്യം ചെയ്യുക.

മതപര​മാ​യി ഭിന്നിച്ച കുടും​ബ​ങ്ങ​ളിൽ, ദാമ്പത്യ സമാധാ​നം നിലനിർത്തു​ന്ന​തി​നു ചില ദമ്പതികൾ അവരവ​രു​ടെ വിശ്വാ​സങ്ങൾ തനിച്ചു പിൻപ​റ്റു​ന്നു. ദുഃഖ​ക​ര​മെന്നു പറയട്ടെ, ഒറ്റയ്‌ക്കുള്ള ആരാധന വിവാഹ ജീവി​ത​ത്തിൽ ഒരു ആത്മീയ ശൂന്യത സൃഷ്ടി​ക്കു​ന്നു. തന്റെ വിശ്വാ​സം പിൻപ​റ്റാത്ത ഒരു വ്യക്തിയെ വിവാഹം ചെയ്‌ത ഒരു ക്രിസ്‌തീയ സ്‌ത്രീ ഇങ്ങനെ വിലപി​ച്ചു: “ഞങ്ങൾ വിവാ​ഹി​ത​രാ​യി​ട്ടു 40 വർഷം ആയെങ്കി​ലും എന്റെ ഭർത്താവ്‌ ഇതുവരെ എന്നെ ശരിക്കും മനസ്സി​ലാ​ക്കി​യി​ട്ടില്ല.” നേരെ മറിച്ച്‌, ഇണകൾ ഇരുവ​രും, “ആത്മാവി​ലും സത്യത്തി​ലും” ആരാധി​ക്കുന്ന ഒരു വിവാ​ഹ​ബ​ന്ധ​ത്തി​ന്റെ കേന്ദ്ര​ബി​ന്ദു ദൈവം ആയിരി​ക്കും. ബൈബിൾ കാവ്യാ​ത്മ​ക​മാ​യി പറയു​ന്ന​പ്ര​കാ​രം, “മുപ്പി​രി​ച്ച​രടു വേഗത്തിൽ അററു​പോ​ക​യില്ല.”—യോഹ​ന്നാൻ 4:23, 24; സഭാ​പ്ര​സം​ഗി 4:12.

കുട്ടി​ക​ളു​ടെ കാര്യ​മോ?

മിശ്ര​വി​വാ​ഹത്തെ കുറിച്ചു ചിന്തി​ക്കു​ന്നവർ, മക്കൾക്ക്‌ ഇരുകൂ​ട്ട​രു​ടെ​യും മതവി​ശ്വാ​സങ്ങൾ മനസ്സി​ലാ​ക്കാൻ അവസരം നൽകു​ക​യും ഒടുവിൽ തിര​ഞ്ഞെ​ടു​ക്കാൻ അവരെ അനുവ​ദി​ക്കു​ക​യും ചെയ്യാ​നാ​കു​മെന്നു കരുതി​യേ​ക്കാം. മതപര​മായ പരിശീ​ലനം നൽകാൻ ഇരു മാതാ​പി​താ​ക്കൾക്കും നിയമ​പ​ര​വും ധാർമി​ക​വു​മായ അവകാശം ഉണ്ടെന്ന​തും ഒടുവിൽ തീരു​മാ​നം എടുക്കു​ന്നതു മക്കളാ​ണെ​ന്ന​തും ശരിതന്നെ.a

മാതാ​പി​താ​ക്ക​ളെ “കർത്താ​വിൽ” അനുസ​രി​ക്കാൻ ബൈബിൾ കുട്ടി​ക​ളോ​ടു നിർദേ​ശി​ക്കു​ന്നു. (എഫെസ്യർ 6:1) അതേക്കു​റി​ച്ചു സദൃശ​വാ​ക്യ​ങ്ങൾ 6:20 ഇങ്ങനെ പറയുന്നു: “മകനേ, നിന്റെ അപ്പന്റെ കല്‌പന പ്രമാ​ണിക്ക; അമ്മയുടെ ഉപദേശം ഉപേക്ഷി​ക്ക​യു​മ​രു​തു.” ഒരേസ​മയം വ്യത്യ​സ്‌ത​മായ ഉപദേ​ശങ്ങൾ പഠിപ്പി​ക്ക​പ്പെ​ടു​ന്ന​തി​നു പകരം, ഒരു പൊതു മതവി​ശ്വാ​സം പുലർത്തുന്ന മാതാ​പി​താ​ക്കൾ വളർത്തുന്ന കുട്ടികൾ, “കർത്താവു ഒരുവൻ, വശ്വാസം ഒന്നു, സ്‌നാനം ഒന്നു” എന്നു ബൈബിൾ പറയുന്ന പ്രകാരം ഏകീകൃ​ത​രാണ്‌.—എഫെസ്യർ 4:5; ആവർത്ത​ന​പു​സ്‌തകം 11:19.

ശരിക്കും ‘കർത്താ​വിൽ’ ഉള്ളയാൾ

പൊതു​വായ മൂല്യങ്ങൾ പങ്കിടു​ന്നതു വിജയ​പ്ര​ദ​മായ വിവാ​ഹ​ത്തി​നുള്ള താക്കോൽ ആയിരി​ക്കുന്ന സ്ഥിതിക്ക്‌, ക്രിസ്‌ത്യാ​നി​യെന്ന്‌ അവകാ​ശ​പ്പെ​ടുന്ന ഏതൊ​രാ​ളെ​യും വിവാഹം ചെയ്യു​ന്നതു ജ്ഞാനമാ​യി​രി​ക്കു​മോ? ബൈബിൾ ഉത്തരം നൽകുന്നു: “അവനിൽ [യേശു​വിൽ] വസിക്കു​ന്നു എന്നു പറയു​ന്നവൻ അവൻ നടന്നതു​പോ​ലെ നടക്കേ​ണ്ട​താ​കു​ന്നു.” (1 യോഹ​ന്നാൻ 2:6) തന്മൂലം, വിവാ​ഹത്തെ കുറിച്ചു ചിന്തി​ക്കുന്ന ഒരു ക്രിസ്‌ത്യാ​നി, യേശു​വി​നെ അനുഗ​മി​ക്കാൻ പരമാ​വധി ശ്രമി​ക്കുന്ന ഒരു സഹക്രി​സ്‌ത്യാ​നി​യെ വിവാഹം ചെയ്യാ​നാ​യി​രി​ക്കും ആഗ്രഹി​ക്കുക. അത്തര​മൊ​രു ഭാവി ഇണ, ജീവിതം യഹോ​വ​യ്‌ക്കു സമർപ്പി​ച്ചു സ്‌നാ​പ​ന​മേറ്റ ആളായി​രി​ക്കും. അയാൾ യേശു​വി​ന്റെ സ്‌നേ​ഹ​നിർഭ​ര​മായ വ്യക്തി​ത്വം അനുക​രി​ക്കു​ക​യും ദൈവ​രാ​ജ്യ ഘോഷ​ണ​ത്തിൽ അവനെ​പ്പോ​ലെ തീക്ഷ്‌ണത പ്രകട​മാ​ക്കു​ക​യും ചെയ്യും. യേശു ചെയ്‌ത​തു​പോ​ലെ, അയാൾ തന്റെ ജീവിതം ദൈ​വേഷ്ടം ചെയ്യു​ന്ന​തിൽ കേന്ദ്രീ​ക​രി​ക്കും.—മത്തായി 6:33; 16:24; ലൂക്കൊസ്‌ 8:1; യോഹ​ന്നാൻ 18:37.

ദൈവ​ത്തി​ന്റെ ആരാധ​ക​രു​ടെ കുടും​ബ​ത്തിൽ നിന്നു​തന്നെ അനു​യോ​ജ്യ പങ്കാളി​യെ തിര​ഞ്ഞെ​ടു​ക്കാൻ ക്ഷമാപൂർവം കാത്തി​രി​ക്കു​ക​വഴി, വിവാ​ഹത്തെ കുറിച്ചു ചിന്തി​ക്കു​ന്നവർ തങ്ങളുടെ ജീവി​ത​ത്തിൽ ദൈ​വേ​ഷ്ട​ത്തി​നു പ്രഥമ സ്ഥാനം നൽകു​ക​യാ​യി​രി​ക്കും ചെയ്യു​ന്നത്‌. അത്‌ ഒടുവിൽ ഏറെ സന്തുഷ്ട​വും സംതൃ​പ്‌തി​ദാ​യ​ക​വും ആയ വിവാ​ഹ​ജീ​വി​ത​ത്തി​നു വഴി​യൊ​രു​ക്കും.—സഭാ​പ്ര​സം​ഗി 7:8; യെശയ്യാ​വു 48:17, 18.

[അടിക്കു​റി​പ്പു​കൾ]

[20-ാം പേജിലെ ചതുരം]

മതപരമായി ഭിന്നിച്ച കുടും​ബ​ങ്ങൾക്കു സഹായം

വിവാ​ഹി​ത​രായ പലരും ഇന്നു പല കാരണ​ങ്ങ​ളാൽ മതപര​മാ​യി ഭിന്നി​ച്ചി​രി​ക്കു​ന്നു. ചിലർ അന്യ മതത്തിൽ പെട്ട ഒരു വ്യക്തിയെ ഇണയായി തിര​ഞ്ഞെ​ടു​ത്ത​താ​കാം. എന്നാൽ, പല ദമ്പതി​ക​ളും തുടക്ക​ത്തിൽ ഒരേ മതം പിൻപ​റ്റു​ന്നവർ ആയിരു​ന്നെ​ങ്കി​ലും പിൽക്കാ​ലത്ത്‌ ഇണ മറ്റൊരു ആരാധ​നാ​രീ​തി തിര​ഞ്ഞെ​ടു​ത്ത​തി​ന്റെ ഫലമാ​യാ​കാം മതപര​മാ​യി വിഭജി​ക്ക​പ്പെ​ട്ടത്‌. മതപര​മായ ഭിന്നി​പ്പിന്‌ ഇടയാ​ക്കുന്ന വേറെ​യും സാഹച​ര്യ​ങ്ങൾ കുടും​ബ​ത്തിൽ ഉണ്ടായി​രു​ന്നേ​ക്കാം. കാരണങ്ങൾ എന്തുതന്നെ ആയിരു​ന്നാ​ലും, മതകാ​ര്യ​ങ്ങ​ളിൽ ഇണകൾ അഭി​പ്രാ​യ​വ്യ​ത്യാ​സം ഉള്ളവർ ആയിരി​ക്കു​ന്നതു കൊണ്ടു മാത്രം വിവാഹ പ്രതിജ്ഞ ലംഘി​ക്കാ​നോ തുച്ഛീ​ക​രി​ക്കാ​നോ പാടു​ള്ളതല്ല. ഇണകൾ ആരാധ​ന​യിൽ ഏകീകൃ​തർ അല്ലാത്ത​പ്പോൾ പോലും വിവാ​ഹ​ത്തി​ന്റെ പവി​ത്ര​ത​യെ​യും ശാശ്വ​ത​ത്വ​ത്തെ​യും ബൈബിൾ മാനി​ക്കു​ന്നു. (1 പത്രൊസ്‌ 3:1, 2) പൗലൊസ്‌ അപ്പൊ​സ്‌തലൻ ഇങ്ങനെ എഴുതി: “ഒരു സഹോ​ദ​രന്നു അവിശ്വാ​സി​യായ ഭാര്യ ഉണ്ടായി​രി​ക്ക​യും അവൾ അവനോ​ടു​കൂ​ടെ പാർപ്പാൻ സമ്മതി​ക്ക​യും ചെയ്‌താൽ അവളെ ഉപേക്ഷി​ക്ക​രു​തു.” (1 കൊരി​ന്ത്യർ 7:12) ബൈബിൾ തത്ത്വങ്ങൾ ബാധക​മാ​ക്കു​ന്ന​പക്ഷം, സ്‌നേ​ഹ​നിർഭ​ര​വും ആദരണീ​യ​വു​മായ ഒരു ബന്ധം കൈവ​രു​ത്തുന്ന സമാധാ​നം ആസ്വദി​ക്കാൻ ഏതൊരു ദമ്പതി​ക​ളെ​യും സഹായി​ക്കാൻ അവയ്‌ക്കു കഴിയും.—എഫെസ്യർ 5:28-33; കൊ​ലൊ​സ്സ്യർ 3:12-14; തീത്തൊസ്‌ 2:4, 5; 1 പത്രൊസ്‌ 3:7-9.