സംഗീതം നമ്മെ സ്വാധീ​നി​ക്കു​ന്ന​തി​ന്റെ കാരണം

സംഗീ​ത​വും ഭാഷയും മനുഷ്യ​ന്റെ മാത്രം സ്വത്താണ്‌. ഇവ രണ്ടും ഇല്ലാത്ത ഒരു ലോകം ഭാവന​യിൽ കാണാൻ പോലും കഴിയില്ല എന്നായി​രി​ക്കു​ന്നു. “സംഗീ​ത​വും ഭാഷയും സാർവ​ത്രി​ക​മാണ്‌, മനുഷ്യർ എവി​ടെ​യെ​ല്ലാ​മു​ണ്ടോ അവി​ടെ​യെ​ല്ലാം അവയു​മുണ്ട്‌” എന്നു സംഗീ​ത​സാ​ന്ദ്ര​മായ മനസ്സ്‌ (ഇംഗ്ലീഷ്‌) എന്ന പുസ്‌തകം പറയുന്നു. ആശയവി​നി​മ​യ​ത്തി​നുള്ള ഉപാധി​ക​ളാണ്‌ അവ. അതു​കൊണ്ട്‌, ഭാഷയു​ടെ കാര്യ​ത്തിൽ സത്യമാ​യി​രി​ക്കു​ന്നതു പോലെ, സംഗീതം “സംസാ​രി​ക്കു”മ്പോൾ നമ്മുടെ വികാ​രങ്ങൾ “കാതോർക്കു​ന്നു” എന്നു പറയാൻ കഴിയും.

എന്നാൽ, സംഗീതം നമ്മുടെ വികാ​ര​ങ്ങ​ളോ​ടു സംസാ​രി​ക്കു​ന്നത്‌ എന്തിനാണ്‌? എങ്ങനെ​യാണ്‌? അതിന്‌ ഉത്തരം കണ്ടെത്തു​ന്ന​തിന്‌ നാം ചില കാര്യ​ങ്ങളെ കുറിച്ചു പരിചി​ന്തി​ക്കേ​ണ്ട​തുണ്ട്‌: (1) സംഗീ​താം​ശ​ങ്ങ​ളെ​യും അവയെ നമ്മുടെ മസ്‌തി​ഷ്‌കം അപഗ്ര​ഥി​ക്കുന്ന വിധ​ത്തെ​യും കുറിച്ച്‌ (2) സംഗീ​ത​ത്തോ​ടുള്ള നമ്മുടെ പ്രതി​ക​ര​ണ​ത്തി​നു നിദാ​ന​മായ നമ്മുടെ വൈകാ​രിക ഘടന​യെ​യും സാംസ്‌കാ​രിക പശ്ചാത്ത​ല​ത്തെ​യും കുറിച്ച്‌ (3) സംഗീ​ത​ത്തോ​ടുള്ള നമ്മുടെ പ്രതി​ക​ര​ണത്തെ സ്വാധീ​നി​ച്ചേ​ക്കാ​വുന്ന മറ്റൊരു ഘടകമായ ഭാഷയെ കുറി​ച്ചും.

സംഗീ​താം​ശ​ങ്ങൾ

സംഗീ​ത​ത്തി​ന്റെ സവി​ശേ​ഷ​ത​ക​ളെ​യാ​ണു മിക്ക​പ്പോ​ഴും “സംഗീ​താം​ശങ്ങൾ” എന്നു വിളി​ക്കു​ന്നത്‌. ഈ അംശങ്ങ​ളിൽ, ഒരു സംഗീ​തോ​പ​ക​ര​ണ​ത്തി​ന്റെ നാദം ഉൾപ്പെ​ടു​ന്നു. ഫ്രഞ്ച്‌ ഹോർണി​ന്റെ കാര്യ​മെ​ടു​ക്കുക. അതിന്റെ നാദത്തെ “ഗാംഭീ​ര്യ​മേ​റിയ” അല്ലെങ്കിൽ കനത്ത എന്നാണു വിശേ​ഷി​പ്പി​ക്കാ​റു​ള്ളത്‌. ട്രംപറ്റ്‌ പുറ​പ്പെ​ടു​വി​ക്കുന്ന “ഗർവ്‌ മുറ്റി നിൽക്കുന്ന” നാദത്തിൽ നിന്നു തികച്ചും വ്യത്യ​സ്‌ത​മാണ്‌ ഇത്‌. ഈ രണ്ടു സംഗീ​തോ​പ​ക​ര​ണ​ങ്ങ​ളും ഒരേ കുടും​ബ​ത്തിൽ, അതായത്‌ സുഷി​ര​വാ​ദ്യ​ങ്ങ​ളു​ടെ ഗണത്തിൽ പെടു​ന്ന​താ​ണെ​ങ്കി​ലും ഇവ വായി​ക്കു​മ്പോൾ, പ്രധാന നാദത്തിന്‌ അകമ്പടി സേവിച്ചു കൊണ്ട്‌ വ്യത്യസ്‌ത തീവ്ര​ത​യിൽ ഉള്ള അവയുടെ പെരു​ക്ക​ങ്ങ​ളായ പ്രകമ്പ​നങ്ങൾ കൂടി ഉണ്ടാകു​ന്നുണ്ട്‌. തീവ്ര​ത​യിൽ ഉള്ള ഈ വ്യത്യാ​സ​മാണ്‌ ഓരോ സംഗീ​തോ​പ​ക​ര​ണ​ത്തി​നും അതിന്റെ തനതായ “ശബ്ദം” ലഭിക്കാൻ ഉള്ള കാരണം. സംഗീ​തോ​പ​ക​ര​ണ​ങ്ങ​ളു​ടെ ഇത്തരം സവി​ശേ​ഷ​ത​ക​ളെ​ല്ലാം പ്രയോ​ജ​ന​പ്പെ​ടു​ത്തി സംഗീ​ത​സം​വി​ധാ​യകർ, ശ്രോ​താ​വി​ന്റെ വികാ​ര​ങ്ങളെ തഴുകി​യു​ണർത്താൻ പോന്ന തരത്തി​ലുള്ള പ്രത്യേക സോണിക്‌ ഇഫക്ടുകൾ സൃഷ്ടി​ച്ചെ​ടു​ക്കു​ന്നു.

നാം ഏറ്റവു​മാ​ദ്യം അറിഞ്ഞ സംഗീ​താം​ശം താളം ആയിരി​ക്കാം. പിറന്നു​വീ​ഴു​ന്ന​തി​നു മുമ്പ്‌, അമ്മയുടെ ഹൃദയ​മി​ടി​പ്പും കാതോർത്തു കിടന്ന​പ്പോൾ അത്‌ അറിയാ​തെ തന്നെ നമ്മുടെ സ്വന്തമാ​യി​ത്തീർന്നി​രി​ക്കാം. സംഗീ​ത​ത്തി​ന്റെ താള​ത്തോ​ടു നാം പ്രതി​ക​രി​ക്കുന്ന വിധത്തി​ന്മേൽ ഉപബോ​ധ​ത​ല​ത്തിൽ നമ്മുടെ ഹൃദയ​മി​ടി​പ്പും എന്തിന്‌, ശ്വാ​സോ​ച്ഛ്വാ​സം പോലും സ്വാധീ​നം ചെലു​ത്തു​ന്നുണ്ട്‌ എന്നാണു പറയ​പ്പെ​ടു​ന്നത്‌. അതു​കൊ​ണ്ടു​തന്നെ, മിനി​ട്ടിൽ 70-നും 100-നും ഇടയ്‌ക്കു വിസ്‌പ​ന്ദ​നങ്ങൾ—ആരോ​ഗ്യ​മുള്ള ഒരാളു​ടെ ശരാശരി ഹൃദയ​മി​ടി​പ്പി​ന്റെ എണ്ണം—ഉള്ള താള​വേഗം മിക്കവ​രും ഇഷ്ടപ്പെ​ടു​ന്ന​തിൽ ഒട്ടും അതിശയം വിചാ​രി​ക്കാ​നില്ല. പെഴ്‌സെ​പ്‌ച്വൽ ആൻഡ്‌ മോ​ട്ടോർ സ്‌കിൽസ്‌ എന്ന പത്രി​ക​യാണ്‌ ഇങ്ങനെ ഒരു ആശയം മുന്നോ​ട്ടു​വെ​ച്ചത്‌.

വിവിധ സംഗീ​തോ​പ​ക​ര​ണങ്ങൾ പുറ​പ്പെ​ടു​വി​ക്കുന്ന ശബ്ദങ്ങളും സ്വരാ​നു​ക്ര​മ​ങ്ങ​ളൂം പരിചി​ന്തി​ച്ചാൽ, ഈ സംഗീ​താം​ശ​ങ്ങൾക്ക്‌ എത്രമാ​ത്രം വൈവി​ധ്യ​മാർന്ന സംഗീ​ത​ത്തി​നു ജന്മമേ​കാൻ കഴിയു​മെന്നു മനസ്സി​ലാ​ക്കാ​വു​ന്ന​താണ്‌. മൊസാർട്ടി​ന്റെ ബാസൂൺ കച്ചേരി​യു​ടെ രണ്ടാം ഘട്ടത്തിൽ, ബാസൂ​ണിൽ നിന്നും ഒഴുകി​യെ​ത്തുന്ന വികാ​ര​തീ​വ്ര​മായ ശബ്ദം മനസ്സിന്റെ അഗാധ​ത​ല​ങ്ങളെ പിടി​ച്ചു​ല​യ്‌ക്കും. ജപ്പാനി​ലെ ഷാകൂ​ഹാ​ച്ചി എന്ന ഓടക്കു​ഴ​ലി​ന്റെ വിഷാദം തുടി​ക്കുന്ന ശബ്ദം, ഹൃദയ​ത്തിൽ ഒരു നേർത്ത നൊമ്പരം അവശേ​ഷി​പ്പി​ച്ചേ​ക്കാം. സാക്‌സ​ഫോ​ണി​ന്റെ ഉച്ചസ്ഥാ​യി​യി​ലുള്ള ചിലമ്പിച്ച ശബ്ദം പശ്ചാത്ത​ല​മാ​യുള്ള ശോകാർദ്ര​ഗാ​നങ്ങൾ മനസ്സിൽ ഏറെ നാൾ തങ്ങിനിൽക്കും. ജർമൻ ബാൻഡ്‌ വാദ്യ​ത്തിൽ ഉപയോ​ഗി​ക്കുന്ന ട്യൂബ​യു​ടെ കീഴ്‌സ്ഥാ​യി​യി​ലുള്ള പല്ലവി മനസ്സിൽ ഉല്ലാസ​ത്തി​ന്റെ പൂത്തിരി കത്തിക്കും. വയലി​നു​കൾ, വാൾട്ട്‌സ്‌ നൃത്തത്തി​നു വേണ്ടി സ്‌​ട്രോസ്‌ ചിട്ട​പ്പെ​ടു​ത്തിയ സംഗീ​ത​ത്തി​ലെ ആരോ​ഹ​ണാ​വ​രോ​ഹ​ണങ്ങൾ താണ്ടു​മ്പോൾ ശ്രോ​താ​ക്ക​ളിൽ പലർക്കും നൃത്തം ചെയ്യാ​നുള്ള അഭിവാഞ്‌ഛ ഉടലെ​ടു​ക്കു​ന്നതു സ്വാഭാ​വി​കം. “സംഗീതം മനുഷ്യ​ന്റെ ഓരോ അണുവി​ലേ​ക്കും വ്യാപി​ക്കു​ന്നതു കൊണ്ടാണ്‌” അത്തരം അനുഭൂ​തി​കൾ ഉളവാ​കു​ന്നത്‌ എന്നു ന്യൂ​യോർക്കി​ലെ നോർഡൊഫ്‌-റോബിൻസ്‌ സംഗീത ചികിത്സാ കേന്ദ്ര​ത്തി​ലെ ക്ലൈവ്‌. ഇ. റോബിൻസ്‌ അഭി​പ്രാ​യ​പ്പെ​ടു​ന്നു.

താള​പ്പൊ​രു​ത്തം, ശ്രുതി​ഭം​ഗം, സ്വരാ​നു​ക്ര​മം

സംഗീ​ത​ത്തിൽ താള​പ്പൊ​രു​ത്തം ഉണ്ടെങ്കിൽ അത്‌ ഇമ്പമധു​ര​മാ​യി​രി​ക്കും. ശ്രുതി​ഭം​ഗം ആണ്‌ ഉണ്ടാകു​ന്ന​തെ​ങ്കിൽ, അപസ്വ​ര​ങ്ങ​ളാ​യി​രി​ക്കും പുറ​പ്പെ​ടുക. എന്നാൽ ചില തരം സംഗീ​ത​ങ്ങ​ളിൽ, ഇവ പരസ്‌പരം പൂരക​ങ്ങ​ളാ​യി വർത്തി​ക്കു​ന്നു എന്നു നിങ്ങൾക്ക്‌ അറിയാ​മാ​യി​രു​ന്നോ? കേൾക്കു​മ്പോൾ നല്ല താള​പ്പൊ​രു​ത്ത​മു​ള്ള​താ​യി തോന്നുന്ന ഒരു സംഗീ​ത​ശ​ക​ല​ത്തിൽ ഒരുപക്ഷേ, നിങ്ങൾ കരുതു​ന്ന​തി​നെ​ക്കാൾ കൂടുതൽ ശ്രുതി​ഭം​ഗം ഉണ്ടായി​രു​ന്നേ​ക്കാം. താള​പ്പൊ​രു​ത്ത​വും ശ്രുതി​ഭം​ഗ​വും തമ്മിലുള്ള നിരന്തര സമന്വയം നമ്മുടെ ഉള്ളിൽ അനുഭൂ​തി​കൾ അലയടി​ച്ചു​യ​രാൻ ഇടയാ​ക്കു​ന്നു. മിക്ക​പ്പോ​ഴും ഇവ നമുക്ക്‌ അനുഭ​വ​വേ​ദ്യ​മാ​കാ​ത്തത്ര നേർത്ത​താ​ണെ​ങ്കി​ലും ക്രമേണ അതു നമ്മുടെ വികാ​ര​ങ്ങ​ളി​ലേക്കു പടർന്നു​ക​യ​റു​ന്നു. ഒരു തൂവൽസ്‌പർശം പോലെ സൗമ്യ​മായ ഒരു അനുഭ​വ​മാണ്‌ ഇതു സമ്മാനി​ക്കു​ന്നത്‌. എന്നാൽ, സംഗീ​ത​ത്തിൽ ശ്രുതി​ഭം​ഗം മാത്ര​മാണ്‌ ഉള്ളതെ​ങ്കിൽ അതു നമ്മെ അരോ​ച​ക​പ്പെ​ടു​ത്തുക മാത്രമല്ല അസഹ്യ​പ്പെ​ടു​ത്തു​ക​യും ചെയ്യും. നഖം കൊണ്ട്‌ സ്ലേറ്റിൽ ഉരസുന്ന ശബ്ദമോ ചോക്ക്‌ കൊണ്ട്‌ ബോർഡിൽ എഴുതുന്ന ശബ്ദമോ കേൾക്കുന്ന തരത്തി​ലുള്ള ഒരു അനുഭ​വ​മാ​യി​രി​ക്കും അത്‌. നേരെ​മ​റിച്ച്‌, ഒരു സംഗീ​ത​ത്തിൽ താള​പ്പൊ​രു​ത്തം മാത്രമേ ഉള്ളു​വെ​ങ്കി​ലോ, അതു പെട്ടെ​ന്നു​തന്നെ നമ്മിൽ മടുപ്പു​ള​വാ​ക്കും.

ഏകസ്വ​ര​ങ്ങൾ (single notes) ക്രമമാ​യും ഇമ്പകര​മാ​യും ചിട്ട​പ്പെ​ടു​ത്തി​യി​രി​ക്കു​ന്ന​തി​നെ​യാണ്‌ സ്വരാ​നു​ക്രമം എന്നു പറയു​ന്നത്‌. സ്വരാ​നു​ക്രമം എന്നതിന്റെ ഇംഗ്ലീഷ്‌ പദമായ മെലഡി​യു​ടെ ഉത്ഭവം, “ഗീതം” എന്നർഥം വരുന്ന ഗ്രീക്ക്‌ പദമായ മെലോ​സിൽ നിന്നാ​ണെ​ന്നാണ്‌ ചില ആധികാ​രിക ഉറവി​ടങ്ങൾ പറയു​ന്നത്‌. “മെലഡി” എന്ന വാക്കിന്‌ മധുര​മായ സംഗീതം, അല്ലെങ്കിൽ ഏതെങ്കി​ലും മധുര​മായ ശബ്ദം എന്നൊ​ക്കെ​യാണ്‌ നിഘണ്ടു​ക്കൾ അർഥം കൊടു​ക്കാ​റു​ള്ളത്‌.

എന്നിരു​ന്നാ​ലും, ഏതെങ്കി​ലും ഒരു ക്രമത്തിൽ സ്വരങ്ങൾ ചിട്ട​പ്പെ​ടു​ത്തി​യാൽ ശ്രുതി​മ​ധു​ര​മായ സ്വരാ​നു​ക്രമം അല്ലെങ്കിൽ സംഗീതം ഉണ്ടാവു​ക​യില്ല. ഉദാഹ​ര​ണ​ത്തിന്‌, അടുത്ത​ടുത്ത സ്വരങ്ങൾക്കി​ട​യിൽ, കൂടെ​ക്കൂ​ടെ നീണ്ട ഇടവേ​ളകൾ വരുന്നത്‌ സംഗീ​ത​ത്തിന്‌ ഒരുതരം നാടകീ​യത പകരു​മെ​ങ്കി​ലും അതു ശ്രുതി​മ​ധു​ര​മാ​യി​രി​ക്കില്ല. നേരെ​മ​റിച്ച്‌, നീണ്ട ഇടവേ​ളകൾ അധികം ഇല്ലാതെ സ്വരങ്ങൾ സ്വച്ഛമാ​യി ഒഴുകു​ക​യാ​ണെ​ങ്കിൽ, ആ സംഗീ​ത​ത്തി​നു കാതു​കളെ കോരി​ത്ത​രി​പ്പി​ക്കാൻ കഴിയും. സ്വരങ്ങ​ളു​ടെ​യും ഇടവേ​ള​ക​ളു​ടെ​യും വിവിധ രീതി​യിൽ ഉള്ള ചിട്ട​പ്പെ​ടു​ത്ത​ലാണ്‌ സംഗീ​ത​ത്തിന്‌ ഒന്നുകിൽ വിഷാ​ദ​ച്ഛായ അല്ലെങ്കിൽ ഉല്ലാസ​ഭാ​വം കൈവ​രു​ത്തു​ന്നത്‌. താള​പ്പൊ​രു​ത്ത​ത്തി​ന്റെ കാര്യ​ത്തിൽ എന്ന പോലെ, സ്വരാ​നു​ക്ര​മ​വും അതി​ന്റേ​തായ പിരി​മു​റു​ക്ക​വും അയവും സൃഷ്ടി​ക്കാ​റുണ്ട്‌. അതിലെ സ്വരസ്ഥാ​യി​ക​ളു​ടെ ഉച്ചനീ​ച​ത്വം, അതായത്‌, സ്വരങ്ങ​ളു​ടെ ഉയർച്ച​യും താഴ്‌ച​യും, നമ്മുടെ വികാ​ര​ങ്ങളെ ബാധി​ക്കും.

ഈ സംഗീ​താം​ശ​ങ്ങ​ളു​ടെ പരസ്‌പര ലയത്തിന്‌, ഒന്നുകിൽ വികാ​ര​ങ്ങൾക്കു ചൂടു​പി​ടി​പ്പി​ക്കാ​നോ അല്ലെങ്കിൽ പറഞ്ഞറി​യി​ക്കാ​നാ​വാത്ത പ്രശാന്തത കൊണ്ടു മനസ്സിനെ തണുപ്പി​ക്കാ​നോ കഴിയും. നമ്മുടെ മസ്‌തി​ഷ്‌കം സംഗീ​തത്തെ ഉൾക്കൊ​ള്ളു​ന്ന​തും അതിനെ അപഗ്ര​ഥി​ക്കു​ന്ന​തും വിവിധ തരത്തി​ലാ​യതു കൊണ്ടാണ്‌ ഇങ്ങനെ സംഭവി​ക്കു​ന്നത്‌.

സംഗീ​ത​വും മസ്‌തി​ഷ്‌ക​വും

ഭാഷയും യുക്തി​യും കൈകാ​ര്യം ചെയ്യു​ന്നതു പ്രധാ​ന​മാ​യും മസ്‌തി​ഷ്‌ക​ത്തി​ന്റെ ഇടതു​ഭാ​ഗ​മാണ്‌ എന്നും വികാ​ര​ങ്ങ​ളും അനുഭൂ​തി​ക​ളു​മെ​ല്ലാം കൈകാ​ര്യം ചെയ്യുന്ന മസ്‌തി​ഷ്‌ക​ത്തി​ന്റെ വലതു​ഭാ​ഗ​മാണ്‌ സംഗീ​തത്തെ അപഗ്ര​ഥി​ക്കു​ന്നത്‌ എന്നും ചിലർ അഭി​പ്രാ​യ​പ്പെ​ടു​ന്നു. ഇതു സത്യമാ​ണെ​ങ്കി​ലും അല്ലെങ്കി​ലും, ശ്രോ​താ​വിൽ തത്‌ക്ഷണ പ്രതി​ക​ര​ണങ്ങൾ ഉളവാ​ക്കാൻ സംഗീ​ത​ത്തി​നു കഴിവുണ്ട്‌ എന്ന കാര്യം സ്‌പഷ്ട​മാണ്‌. പെഴ്‌സെ​പ്‌ച്വൽ ആൻഡ്‌ മോ​ട്ടോർ സ്‌കിൽസ്‌ എന്ന പത്രിക അതു സംബന്ധിച്ച്‌ ഇങ്ങനെ വിശദീ​ക​രി​ക്കു​ന്നു: “ഒരു നിമി​ഷാർധം കൊണ്ട്‌ ആരിലും വികാ​രാ​നു​ഭൂ​തി​ക​ളു​ടെ തരംഗങ്ങൾ ഉണർത്താൻ സംഗീ​ത​ത്തി​നുള്ള കഴിവ്‌ അപാരം​ത​ന്നെ​യാണ്‌. ഇതേ അനുഭവം ഒരു പുസ്‌ത​ക​ത്തിൽ നിന്നു ലഭിക്ക​ണ​മെ​ങ്കിൽ വളരെ​യേറെ വാചകങ്ങൾ വേണ്ടി​വ​രും . . .  എന്നാൽ സംഗീ​ത​ത്തിൽ, ഒരു താളവട്ടം കൊണ്ടോ ഒരൊറ്റ കോഡ്‌ (chord) കൊണ്ടോ ഇതു സാധി​ച്ചെ​ടു​ക്കാ​വു​ന്നതേ ഉള്ളൂ.”

കാഴ്‌ച​യും കേൾവി​യും തമ്മിലുള്ള പ്രതി​പ്ര​വർത്ത​നത്തെ കുറി​ച്ചും ഇവയോ​രൊ​ന്നും നമ്മിൽ ഉളവാ​ക്കുന്ന പ്രതി​ക​ര​ണത്തെ കുറി​ച്ചും സംഗീ​ത​വും മനസ്സും എന്ന പുസ്‌തകം രസകര​മായ ഈ നിരീ​ക്ഷണം നടത്തുന്നു: “നാം കേൾക്കുന്ന കാര്യ​ങ്ങ​ളാണ്‌ കാണുന്ന കാര്യ​ങ്ങ​ളെ​ക്കാൾ വൈകാ​രി​ക​മാ​യി നമ്മെ കൂടുതൽ ആഴത്തിൽ ബാധി​ക്കു​ന്നത്‌. . . . മുറി​വേറ്റ ഒരു മൃഗ​ത്തെ​യോ നിശ്ശബ്ദ​മാ​യി വേദന സഹിക്കുന്ന ഒരു വ്യക്തി​യെ​യോ കാണു​ന്നതു കാഴ്‌ച​ക്കാ​രെ കുറ​ച്ചൊ​ക്കെ വികാ​ര​ത​ര​ളി​ത​രാ​ക്കി​യേ​ക്കാം. എന്നാൽ അവർ ഉറക്കെ കരയു​ക​യാ​ണെ​ങ്കിൽ, കണ്ടുനിൽക്കു​ന്ന​വനെ അതു ശക്തിയാ​യി പിടി​ച്ചു​ല​യ്‌ക്കും.”

ഈരടി​ക​ളും സംഗീ​ത​വും നിങ്ങളും

ഒരു സംഗീതം അതിന്റെ എല്ലാ ശ്രോ​താ​ക്ക​ളെ​യും ഒരു​പോ​ലെ​യാണ്‌ ബാധി​ക്കുക എന്ന്‌ അനേകർ കരുതു​ന്നു. മറ്റു ചിലർ കരുതു​ന്നത്‌, ഒരു ഗാനം ശ്രോ​താ​വിൽ ഉളവാ​ക്കുന്ന പ്രതി​ക​രണം, അയാളു​ടെ അപ്പോ​ഴത്തെ മാനസി​കാ​വ​സ്ഥ​യു​ടെ​യോ മുമ്പു​ണ്ടായ ഏതെങ്കി​ലും അനുഭ​വ​ത്തി​ന്റെ​യോ പ്രതി​ഫ​ല​ന​മാ​യി​രി​ക്കും എന്നാണ്‌. ഉദാഹ​ര​ണ​ത്തിന്‌, പ്രിയ​പ്പെട്ട ഒരാളെ മരണത്തിൽ നഷ്ടപ്പെട്ട വ്യക്തി ഒരു ആരാധ​നാ​സ്ഥ​ലത്തു വെച്ച്‌ ഒരു പ്രത്യേക ഗാനം കേൾക്കാ​നി​ട​യാ​കു​ന്നു എന്നിരി​ക്കട്ടെ. അത്‌ അയാളു​ടെ കാതു​ക​ളിൽ പതിയു​മ്പോൾ പ്രിയ​പ്പെട്ട ആളെ കുറി​ച്ചുള്ള ഓർമകൾ മനസ്സി​ലേക്ക്‌ ഓടി​യെ​ത്തി​യേ​ക്കാം. ആ ഓർമകൾ ദുഃഖ​മാ​യി മനസ്സിൽ അടിഞ്ഞു​കൂ​ടു​മ്പോൾ അറിയാ​തെ തന്നെ അയാളു​ടെ മിഴികൾ നിറഞ്ഞു​തു​ളു​മ്പു​ന്നു. എന്നാൽ ഈ സാഹച​ര്യ​ത്തിൽ അല്ലാത്ത മറ്റുള്ളവർ, ഇതേ ഗാനം തന്നെ ആനന്ദ​ത്തോ​ടെ ആലപി​ക്കു​ക​യും ചെയ്‌തേ​ക്കാം.

ഇനി, ഫ്രഞ്ച്‌ ഹോർണി​ന്റെ​യും ട്രംപ​റ്റി​ന്റെ​യും ശബ്ദത്തെ കുറിച്ചു മുമ്പു പ്രതി​പാ​ദിച്ച വിവര​ണ​ങ്ങ​ളു​ടെ കാര്യ​മെ​ടു​ക്കുക. ഫ്രഞ്ച്‌ ഹോർണി​ന്റെ ശബ്ദം ഗാംഭീ​ര്യ​മേ​റി​യ​താണ്‌ എന്ന അഭി​പ്രാ​യ​ത്തോ​ടു നിങ്ങൾക്കു യോജി​പ്പി​ല്ലാ​യി​രി​ക്കാം. വെറും കളിമ​ട്ടി​ലുള്ള ഒരുതരം കോലാ​ഹ​ല​മാണ്‌ അതിൽ നിന്നു പുറ​പ്പെ​ടു​ന്നത്‌ എന്നായി​രി​ക്കാം നിങ്ങൾക്കു തോന്നി​യി​ട്ടു​ള്ളത്‌. എന്നാൽ ട്രംപ​റ്റി​ന്റെ ശബ്ദം നിങ്ങളെ ചിന്തക​ളു​ടെ നിലയി​ല്ലാ​ക്ക​യ​ത്തി​ലേക്കു തള്ളിവി​ട്ടേ​ക്കാം. ചുരു​ക്ക​ത്തിൽ, സംഗീ​ത​ത്തി​ന്റെ മൃദു​സ്‌പർശം നമ്മിൽ ഓരോ​രു​ത്ത​രി​ലും ഉണർത്തുക വ്യത്യ​സ്‌ത​മായ വികാ​രങ്ങൾ ആയിരി​ക്കും. അതു​കൊണ്ട്‌, നാം അതി​നോ​ടു പ്രതി​ക​രി​ക്കു​ന്ന​തും നമ്മു​ടേ​തായ വിധത്തി​ലാ​യി​രി​ക്കും.

വാക്കു​ക​ളോ ആശയങ്ങ​ളോ സംഗീത രൂപത്തി​ലാ​കു​മ്പോൾ അതു നമ്മുടെ വികാ​ര​ങ്ങളെ സ്‌പർശി​ക്കു​ന്നു. അതു​കൊ​ണ്ടാണ്‌ ഒട്ടുമിക്ക റേഡി​യോ, ടെലി​വി​ഷൻ പരസ്യ​ങ്ങ​ളും സംഗീ​ത​ത്തി​ന്റെ അകമ്പടി​യോ​ടെ അവതരി​പ്പി​ക്ക​പ്പെ​ടു​ന്നത്‌. മിക്ക​പ്പോ​ഴും ഈ പരസ്യ​ങ്ങ​ളി​ലെ വാക്കു​കൾക്കു വലിയ അർഥ​മൊ​ന്നും ഉണ്ടാവില്ല. എന്നാൽ, അനു​യോ​ജ്യ​മായ പശ്ചാത്തല സംഗീതം ഉണ്ടെങ്കിൽ, പരസ്യങ്ങൾ ശ്രോ​താ​ക്ക​ളു​ടെ വികാ​ര​ങ്ങളെ സ്‌പർശി​ക്കു​ന്നു. വാങ്ങൽ എന്ന പ്രക്രിയ ഒരു വികാ​ര​പ​ര​മായ പ്രതി​ക​രണം ആക്കിത്തീർക്കുക—അല്ലാതെ യുക്തി​പ​ര​മായ ഒന്നല്ല—എന്നതാണു മിക്ക പരസ്യ​ങ്ങ​ളു​ടെ​യും ലക്ഷ്യം എന്നു പറയു​ന്നത്‌ എത്ര സത്യമാണ്‌!

പരസ്യങ്ങൾ, പൊതു​ജ​ന​ങ്ങ​ളു​ടെ കീശ ചോർത്തുക മാത്രമല്ല ചെയ്യു​ന്നത്‌. അവയുടെ സംഗീ​ത​ത്തി​ലും ഈരടി​ക​ളി​ലും ഒളിഞ്ഞി​രി​ക്കുന്ന ശക്തിക്കു കൂടുതൽ അപകട​ക​ര​മായ മറ്റൊരു വശം കൂടെ​യുണ്ട്‌. പാട്ടിലെ ആവർത്തി​ച്ചു വരുന്ന ഈരടി​ക​ളി​ലൂ​ടെ ഗാനര​ച​യി​താ​ക്കൾ വാസ്‌ത​വ​ത്തിൽ, കൗമാ​ര​ക്കാ​രോ​ടു മറ്റുള്ള​വ​രു​ടെ അഭി​പ്രാ​യങ്ങൾ കാറ്റിൽ പറത്താ​നും “മർക്കട​മു​ഷ്ടി കാണി​ക്കാ​നും” പഠിപ്പി​ക്കു​ക​യാ​ണു ചെയ്യു​ന്ന​തെന്നു ജേർണൽ ഓഫ്‌ യൂത്ത്‌ ആൻഡ്‌ അഡോ​ള​സെൻസ്‌ അഭി​പ്രാ​യ​പ്പെ​ടു​ന്നു. “വിവാദം സൃഷ്ടി​ച്ചി​ട്ടുള്ള റാപ്പ്‌ സംഗീ​ത​ത്തി​ലെ ഈരടി​കൾ” നൽകുന്ന സന്ദേശം “ഹെവി മെറ്റൽ സംഗീ​ത​ത്തി​ന്റെ ഈരടി​ക​ളെ​ക്കാൾ വ്യക്തമാണ്‌” എന്നും അതിനു ശ്രോ​താ​വി​ന്റെ വികാ​ര​ങ്ങ​ളി​ലേക്ക്‌ ആഴ്‌ന്നി​റ​ങ്ങാ​നും അവരെ സാമൂ​ഹി​ക​വി​രുദ്ധ പ്രവർത്ത​ന​ങ്ങ​ളി​ലേക്കു നയിക്കാ​നും കഴിവു​ണ്ടെ​ന്നും മറ്റൊരു ഉറവിടം പറയുന്നു.

എന്നാൽ, ഒരു വ്യക്തി പാട്ടിന്റെ സംഗീതം മാത്രം ശ്രവി​ക്കു​ക​യും അതിന്റെ ഈരടി​കൾ അവഗണി​ക്കു​ക​യും ചെയ്യു​ന്നെ​ങ്കിൽ അപകടം ഒഴിവാ​ക്കാൻ കഴിയു​മോ? റാപ്പ്‌ സംഗീ​ത​ത്തി​ലെ​യും ഹെവി​മെറ്റൽ സംഗീ​ത​ത്തി​ലെ​യും വാക്കുകൾ മനസ്സി​ലാ​ക്കി​യെ​ടു​ക്കുക ഒരളവു​വരെ ബുദ്ധി​മു​ട്ടാ​ണെന്ന കാര്യം ശരിയാണ്‌. കാതട​പ്പി​ക്കുന്ന പശ്ചാത്തല സംഗീതം കാരണം വാക്കുകൾ വ്യക്തമാ​യി കേൾക്കാൻ പോലും കഴിയില്ല. പക്ഷേ, വാക്കുകൾ മനസ്സി​ലാ​യാ​ലും ഇല്ലെങ്കി​ലും, അതിലെ മുഴങ്ങുന്ന താളത്തി​ലും ആവർത്തി​ക്ക​പ്പെ​ടുന്ന ഈണത്തി​ലും അതിന്റെ സന്ദേശം വ്യക്തമാ​യി കേൾക്കാം!

അത്‌ എങ്ങനെ​യാണ്‌? ചില പാട്ടു​ക​ളു​ടെ ശീർഷ​കങ്ങൾ തന്നെ മനസ്സിൽ ചില പ്രതി​രൂ​പങ്ങൾ പതിപ്പി​ക്കാൻ പോന്ന​വ​യാണ്‌. മാത്രമല്ല, മിക്ക​പ്പോ​ഴും സംഗീതം ഏതു വകഭേ​ദ​ത്തിൽ പെടുന്നു എന്ന്‌ അറിഞ്ഞാൽ അതിന്റെ സന്ദേശം മനസ്സി​ലാ​ക്കി​യെ​ടു​ക്കാൻ കഴിയും. എന്തെല്ലാം സന്ദേശ​ങ്ങ​ളാണ്‌ ശ്രോ​താ​വി​നു ലഭിക്കുക? യുവ​പ്രാ​യ​ക്കാർക്കു വേണ്ടി​യുള്ള ഒരു പത്രിക പറയുന്നു: “അധികാ​രം, കയ്യൂക്ക്‌, ലൈം​ഗി​കത എന്നിവ​യു​മാ​യി ബന്ധപ്പെട്ട സന്ദേശ​ങ്ങ​ളാണ്‌ അവ നൽകു​ന്നത്‌ എന്നു തോന്നു​ന്നു.” മറ്റൊരു പത്രിക പറയുന്നു: “അതിന്റെ അടിസ്ഥാന പ്രതി​പാ​ദ്യ​വി​ഷ​യങ്ങൾ . . . കടുത്ത മത്സരം, അക്രമം, മദ്യം, മയക്കു​മ​രു​ന്നു ദുരു​പ​യോ​ഗം, കുത്തഴിഞ്ഞ ലൈം​ഗി​കത, കടിഞ്ഞാ​ണി​ല്ലാത്ത ജീവിതം, സാത്താന്യ ആരാധന എന്നിവ​യൊ​ക്കെ​യാണ്‌.”

ഇതു സത്യമാ​യി​രി​ക്കാ​മെ​ങ്കി​ലും, സംഗീതം തങ്ങളുടെ മേൽ മോശ​മായ ഫലങ്ങ​ളൊ​ന്നും ഉളവാ​ക്കാൻ പോകു​ന്നില്ല എന്നു ചില ചെറു​പ്പ​ക്കാർ അവകാ​ശ​പ്പെ​ടു​ന്നു. വ്യക്തി​യെന്ന നിലയിൽ ‘സ്വയം കണ്ടെത്തു​ന്ന​തിന്‌’ അത്തരം സംഗീതം സഹായി​ക്കു​ന്ന​തു​കൊണ്ട്‌ അവ പ്രയോ​ജ​ന​പ്ര​ദ​മാണ്‌ എന്നും അവർ വാദി​ച്ചേ​ക്കാം. എന്നാൽ വാസ്‌തവം അതാണോ? ജേർണൽ ഓഫ്‌ യൂത്ത്‌ ആൻഡ്‌ അഡോ​ള​സെൻസ്‌ പറയുന്നു: “ഹെവി​മെറ്റൽ സംഗീ​ത​ത്തി​ലെ പ്രകട​ഭാ​വ​ങ്ങ​ളായ രോഷം, വൈരം, മേൽക്കോയ്‌മ എന്നിവ പഠിത്ത​ത്തിൽ പുറ​കോ​ട്ടായ കുട്ടികൾ പ്രത്യേ​കി​ച്ചും ഇഷ്ടപ്പെ​ടും. പ്രതീ​ക്ഷി​ക്കുന്ന നിലവാ​ര​ത്തിൽ എത്തി​ച്ചേ​രു​ന്നില്ല എന്ന തോന്ന​ലി​നോ​ടു മല്ലടിച്ച്‌, സ്‌കൂ​ളിൽ ഒരുക​ണ​ക്കിന്‌ ദിവസം കഴിച്ചു​കൂ​ട്ടി തിരി​ച്ചെ​ത്തുന്ന ഇക്കൂട്ടർ ഈ സംഗീതം രണ്ടു കൈയും നീട്ടി സ്വീക​രി​ച്ചേ​ക്കാം.” അത്‌ ഇങ്ങനെ തുടരു​ന്നു: “തനതായ ഒരു വ്യക്തി​ത്വം വാർത്തെ​ടു​ക്കാൻ അവർ ഉപയോ​ഗ​പ്പെ​ടു​ത്തു​ന്നത്‌ എല്ലാവ​രും ഉപയോ​ഗി​ക്കുന്ന ഒരു മാധ്യമം ആണ്‌ എന്നതാണു വിരോ​ധാ​ഭാ​സം. വ്യക്തി​ത്വ​വി​ക​സ​ന​ത്തിന്‌ തങ്ങളു​ടേതു മാത്ര​മായ സവി​ശേ​ഷ​തകൾ ഉപയോ​ഗി​ക്കു​ന്ന​തി​നു പകരം അവർ ഒരു വാണിജ്യ വ്യവസാ​യം പ്രദാനം ചെയ്യുന്ന കാര്യങ്ങൾ അപ്പാടെ സ്വന്തമാ​ക്കുക മാത്ര​മാ​ണു ചെയ്യു​ന്നത്‌.” മറ്റു വാക്കു​ക​ളിൽ പറഞ്ഞാൽ, തങ്ങൾ എന്തു ചിന്തി​ക്കണം, എങ്ങനെ​യൊ​ക്കെ ചിന്തി​ക്കണം എന്നെല്ലാം മറ്റുള്ളവർ ആണ്‌ അവരോ​ടു പറയു​ന്നത്‌.

റോക്ക്‌ കച്ചേരി​ക​ളു​ടെ കാര്യം തന്നെ​യെ​ടു​ക്കുക. അതിനു വേണ്ടി തടിച്ചു​കൂ​ടുന്ന ജനസഹ​സ്ര​ങ്ങളെ അത്‌ എപ്രകാ​ര​മാ​ണു ബാധി​ക്കുക? സംഗീ​ത​വും മനസ്സും എന്ന പുസ്‌തകം ഉത്തരം നൽകുന്നു: “റോക്ക്‌ കച്ചേരി​ക​ളിൽ, ജനക്കൂ​ട്ട​ത്തി​ന്റെ ആവേശം മാനം മുട്ടെ ഉയരുന്നു. തനിച്ചു സംഗീതം കേൾക്കു​ന്ന​തി​നെ​ക്കാൾ, ഒരു കൂട്ടമാ​യി കേൾക്കു​മ്പോൾ ശ്രോ​താ​ക്ക​ളു​ടെ വികാ​രങ്ങൾ അതിന്റെ പരകോ​ടി​യി​ലെ​ത്തു​ന്നു. അത്‌ അവരുടെ ന്യായ​ബോ​ധം നഷ്ടപ്പെ​ടു​ത്തു​ക​യും അവരെ നൈമി​ഷി​ക​മായ വികാ​രാ​വേ​ശ​ത്തി​നു കീഴ്‌പെ​ടു​ത്തു​ക​യും ചെയ്യുന്നു. ജനക്കൂട്ടം ഭ്രാന്ത​മായ ആവേശ​ത്തിന്‌ അടി​പ്പെ​ടു​ന്ന​തി​ന്റെ കാരണം അതാണ്‌.” റോക്ക്‌ സംഗീ​ത​ക്ക​ച്ചേ​രി​കൾ നടക്കുന്ന സ്ഥലങ്ങളിൽ ഇടയ്‌ക്കൊ​ക്കെ അരങ്ങേ​റാ​റുള്ള അക്രമാ​സക്ത സംഭവങ്ങൾ ഈ പ്രസ്‌താ​വ​ന​യു​ടെ സത്യത​യ്‌ക്ക്‌ അടിവ​ര​യി​ടു​ന്നു.

അതു​കൊണ്ട്‌, നമ്മുടെ മനസ്സു​ക​ളും ഹൃദയ​ങ്ങ​ളും ദുഷി​ക്ക​പ്പെ​ടാ​തി​രി​ക്കു​ന്ന​തിന്‌, സംഗീതം തിരഞ്ഞ​ടു​ക്കുന്ന കാര്യ​ത്തിൽ നാം വളരെ​യ​ധി​കം ശ്രദ്ധി​ക്കേ​ണ്ട​തുണ്ട്‌. നമുക്ക്‌ അത്‌ എങ്ങനെ ചെയ്യാൻ കഴിയും? അടുത്ത ലേഖനം ഈ ചോദ്യ​ത്തിന്‌ ഉത്തരം നൽകു​ന്ന​താ​യി​രി​ക്കും.

[7-ാം പേജിലെ ചിത്രം]

സംഗീതം മിക്ക​പ്പോ​ഴും ശ്രോ​താ​ക്ക​ളിൽ നൃത്തം ചെയ്യാ​നുള്ള അഭിവാഞ്‌ഛ ഉളവാ​ക്കു​ന്നു