അച്ഛനി​ല്ലാത്ത കുടും​ബങ്ങൾ നമ്മുടെ കാലത്തി​ന്റെ പ്രത്യേ​കത

നമ്മുടെ നാളിലെ ഏറ്റവും ഗുരു​ത​ര​മായ സാമൂ​ഹിക പ്രശ്‌നം ഏതാ​ണെന്നു ചോദി​ച്ചാൽ നിങ്ങൾ എന്ത്‌ ഉത്തരം പറയും? ഐക്യ​നാ​ടു​ക​ളിൽ നടത്തിയ ഒരു സർവേ​യിൽ പങ്കെടു​ത്ത​വ​രിൽ ഏകദേശം 80 ശതമാ​ന​വും പറഞ്ഞത്‌ അത്‌ “വീട്ടിൽ അച്ഛൻ എന്നൊ​രാൾ ഇല്ലാതെ വരുന്ന​താണ്‌” എന്നാണ്‌. ഐക്യ​നാ​ടു​ക​ളി​ലെ 2 കോടി 70 ലക്ഷത്തി​ലേറെ കുട്ടി​ക​ളും സ്വന്തം അച്ഛന്മാ​രു​ടെ കൂടെയല്ല പാർക്കു​ന്ന​തെ​ന്നും ഇത്തരം കുട്ടി​ക​ളു​ടെ എണ്ണം അനുദി​നം കുതി​ച്ചു​യ​രു​ക​യാ​ണെ​ന്നും പ്രസ്‌തുത സർവേ ചൂണ്ടി​ക്കാ​ട്ടി. ഐക്യ​രാ​ഷ്‌ട്ര ശിശു​ക്ഷേമ നിധി​യു​ടെ ഒരു റിപ്പോർട്ട്‌ അനുസ​രിച്ച്‌, ഐക്യ​നാ​ടു​ക​ളിൽ ജനിക്കുന്ന വെള്ളക്കാ​രായ കുട്ടി​ക​ളു​ടെ ഏതാണ്ട്‌ 50 ശതമാ​ന​ത്തിന്‌ “ബാല്യ​ത്തി​ന്റെ ഏതെങ്കി​ലു​മൊ​രു ഘട്ടത്തിൽ അച്ഛന്റെ സ്‌നേ​ഹ​ത്ത​ണ​ലി​ല്ലാ​തെ കഴിച്ചു​കൂ​ട്ടേണ്ടി വരുന്നു. കറുത്ത​വർഗ​ക്കാ​രായ കുട്ടി​ക​ളു​ടെ കാര്യ​ത്തിൽ ഇത്‌ 80 ശതമാ​ന​ത്തോ​ളം വരും.” 1980 മുതൽക്കേ സ്ഥിതി ഇതാണ്‌. അതു​കൊണ്ട്‌, “അച്ഛനി​ല്ലാത്ത കുടും​ബ​ങ്ങ​ളു​ടെ കാര്യ​ത്തിൽ ലോക​ത്തി​ലെ ഒന്നാം സ്ഥാനക്കാ​രൻ” എന്ന്‌ യുഎസ്‌എ ടുഡേ, ഐക്യ​നാ​ടു​കളെ വിശേ​ഷി​പ്പി​ച്ചി​രി​ക്കു​ന്നു.

എന്നിരു​ന്നാ​ലും, ദി അറ്റ്‌ലാ​ന്റിക്‌ മന്ത്‌ലി എന്ന മാസി​ക​യി​ലെ ഒരു ലേഖനം ഇപ്രകാ​രം പറയുന്നു: “തകർന്നു​ട​യുന്ന കുടും​ബ​ങ്ങ​ളു​ടെ എണ്ണത്തി​ലുള്ള വർധനവ്‌ അമേരി​ക്കൻ സമൂഹ​ത്തി​ന്റെ മാത്രം പ്രശ്‌നമല്ല. അത്‌ ജപ്പാൻ ഉൾപ്പെടെ, എല്ലാ വികസിത രാജ്യ​ങ്ങ​ളു​ടെ​യും തന്നെ പ്രശ്‌ന​മാണ്‌.” പല വികസ്വര രാജ്യ​ങ്ങ​ളി​ലും ഇതു സംബന്ധിച്ച സ്ഥിതി​വി​വ​ര​ക്ക​ണ​ക്കു​കൾ എടുക്കുക ബുദ്ധി​മു​ട്ടാ​ണെ​ങ്കി​ലും സമാന​മായ ഒരു പ്രതി​സന്ധി അവിട​ങ്ങ​ളി​ലും ഉള്ളതായി കാണുന്നു. വേൾഡ്‌ വാച്ച്‌ മാസിക പറയു​ന്ന​ത​നു​സ​രിച്ച്‌, “വർധിച്ചു വരുന്ന സാമ്പത്തിക സമ്മർദ​ങ്ങ​ളു​ടെ പൽച്ച​ക്ര​ങ്ങൾക്കി​ട​യിൽപ്പെട്ടു ഞെരി​യു​മ്പോൾ, [ദരിദ്ര രാജ്യ​ങ്ങ​ളി​ലെ] പുരു​ഷ​ന്മാർ പലപ്പോ​ഴും ഭാര്യ​യെ​യും മക്കളെ​യും ഉപേക്ഷി​ച്ചു​പോ​കു​ന്നു.” ഒരു കരീബി​യൻ രാജ്യത്തു നടത്തിയ സർവേ, എട്ടു വയസ്സു​കാ​രായ കുട്ടി​ക​ളുള്ള അച്ഛന്മാ​രിൽ 22 ശതമാനം മാത്രമേ തങ്ങളുടെ കുട്ടി​ക​ളോ​ടൊ​പ്പം കഴിഞ്ഞി​രു​ന്നു​ള്ളൂ എന്നു കണ്ടെത്തി.

ബൈബിൾ കാലങ്ങ​ളി​ലും അച്ഛനി​ല്ലാത്ത കുട്ടികൾ സാധാ​ര​ണ​മാ​യി​രു​ന്നു. (ആവർത്ത​ന​പു​സ്‌തകം 27:19; സങ്കീർത്തനം 94:6; NW) അന്ന്‌ അച്ഛന്മാരെ കുടും​ബ​ത്തിൽ നിന്നു പറിച്ചു​മാ​റ്റി​യി​രുന്ന മുഖ്യ വില്ലൻ മരണമാ​യി​രു​ന്നു. എന്നാൽ, “ഇന്നാകട്ടെ അത്തര​മൊ​രു സ്ഥിതി​വി​ശേഷം സംജാ​ത​മാ​കു​ന്ന​തി​നു പിന്നിലെ മുഖ്യ കാരണ​ക്കാർ അച്ഛന്മാർ തന്നെയാണ്‌, കുടും​ബത്തെ മനഃപൂർവം ഉപേക്ഷി​ച്ചു കടന്നു​ക​ള​യുന്ന അച്ഛന്മാർ” എന്ന്‌ ലേഖക​നായ ഡേവിഡ്‌ ബ്ലാങ്കെൻഹോൺ പറയുന്നു. നാം കാണാൻ പോകു​ന്ന​തു​പോ​ലെ, അച്ഛനി​ല്ലാത്ത കുട്ടി​ക​ളു​ടെ എണ്ണത്തി​ലുള്ള വർധനവ്‌ പല ആളുക​ളും ഇന്ന്‌ “വാത്സല്യ​മി​ല്ലാത്ത”വർ ആണെന്നു​ള്ള​തി​ന്റെ തെളി​വാണ്‌. ബൈബിൾ പറയു​ന്ന​ത​നു​സ​രിച്ച്‌ ആളുക​ളു​ടെ ഈ സ്വഭാ​വ​വി​ശേഷം, നാം “അന്ത്യകാ​ലത്തു” ആണ്‌ ജീവി​ക്കു​ന്നത്‌ എന്നതിന്റെ ഒരു തെളി​വാണ്‌.—2 തിമൊ​ഥെ​യൊസ്‌ 3:1-3.

അച്ഛനെന്ന കഥാപാ​ത്രം തങ്ങളുടെ ജീവി​ത​ത്തിൽ നിന്നു രംഗ​മൊ​ഴി​യു​മ്പോൾ അതു കുരുന്നു മനസ്സു​കൾക്ക്‌ ഏൽപ്പി​ക്കുന്ന ആഘാതം കുറ​ച്ചൊ​ന്നു​മല്ല. അതോടെ, വേദന​യും മാനസിക തകർച്ച​യും മാത്രം ഇതിവൃ​ത്ത​മായ, കണ്ണീരിൽ കുതിർന്ന ഒരു തുടർക്കഥ ചുരുൾനി​വ​രു​ക​യാ​യി. ഈ ലേഖന പരമ്പര​യിൽ നാം അതേക്കു​റി​ച്ചു ചർച്ച​ചെ​യ്യു​ന്ന​താ​യി​രി​ക്കും. വായന​ക്കാ​രേ, നിങ്ങളെ നിരാ​ശ​പ്പെ​ടു​ത്താ​നല്ല, മറിച്ച്‌ ഈ വിനാ​ശ​ക​ര​മായ പ്രവണ​ത​യ്‌ക്കു തടയി​ടാൻ സഹായ​ക​മായ വിവരങ്ങൾ കുടും​ബ​ങ്ങൾക്ക്‌ പ്രദാനം ചെയ്യാ​നാ​ണത്‌.