യുവജ​നങ്ങൾ ചോദി​ക്കു​ന്നു . . .

വീട്ടിൽനിന്ന്‌ ഒളിച്ചു​ക​ട​ക്കു​ന്ന​തിൽ എന്താണ്‌ ഇത്ര കുഴപ്പം?

“ഞങ്ങൾ പാതി​രാ​ത്രിക്ക്‌ ഒളിച്ചും പാത്തും വീടിനു വെളി​യിൽ കടന്ന്‌ കൂട്ടു​കാ​രോ​ടൊ​ത്താ​യി​രി​ക്കാൻ വേണ്ടി കാപ്പി​ക്ക​ട​യി​ലേക്ക്‌ പോകു​മാ​യി​രു​ന്നു. പിന്നീട്‌ ഞങ്ങൾ ഏതെങ്കി​ലു​മൊ​രു കുന്നിൻമു​ക​ളി​ലേക്ക്‌ പോയി അവി​ടെ​യൊ​ക്കെ കറങ്ങി നടക്കും. ഞാനൊ​രി​ക്ക​ലും പുക വലിച്ചി​രു​ന്നി​ല്ലെ​ങ്കി​ലും എന്റെ കൂട്ടു​കാർക്കൊ​ക്കെ ആ ശീലമു​ണ്ടാ​യി​രു​ന്നു. ഹെവി​മെറ്റൽ സംഗീതം കേട്ടു​കൊണ്ട്‌, വട്ടം കൂടി​യി​രുന്ന്‌ ഞങ്ങൾ ഒരുപാ​ടു കാര്യങ്ങൾ സംസാ​രി​ക്കു​മാ​യി​രു​ന്നു. പിന്നെ, അച്ഛനും അമ്മയും ഉണരു​ന്ന​തി​നു മുമ്പ്‌ എത്താനാ​യി പുലർച്ച​യ്‌ക്ക്‌ 5 മണിക്ക്‌ വീട്ടി​ലേക്കു തിരി​ക്കു​മാ​യി​രു​ന്നു.”—താര.a

“ഡാഡി ജോലി​ക്കു പോയ​ശേഷം മമ്മി ഉറക്കം പിടി​ക്കുന്ന സമയത്ത്‌ ഞാൻ മുൻവാ​തി​ലി​ലൂ​ടെ ഒളിച്ചും പാത്തും വീടിനു വെളി​യിൽ കടക്കു​മാ​യി​രു​ന്നു. ലോഹ​നിർമി​ത​മായ കതകട​യ്‌ക്കുന്ന ശബ്ദം മമ്മി കേൾക്കു​മെന്നു പേടിച്ച്‌ ഞാനതു തുറന്നു തന്നെ ഇടുമാ​യി​രു​ന്നു. രാത്രി മുഴുവൻ കൂട്ടു​കാ​രോ​ടൊ​ത്തു ചുറ്റി​ക്ക​റ​ങ്ങി​യിട്ട്‌ സൂര്യൻ ഉദിക്കു​മ്പോ​ഴേ​ക്കും തിരി​ച്ചെ​ത്താൻ ഞാൻ ശ്രമി​ച്ചി​രു​ന്നു. എന്നാൽ, ചില​പ്പോ​ഴൊ​ക്കെ ഞാൻ പോയി​രി​ക്കു​ന്ന​താ​യി മമ്മി കണ്ടുപി​ടി​ക്കു​ക​യും എന്നെ അകത്തു കടത്താതെ വാതിൽ പൂട്ടു​ക​യും ചെയ്‌തി​രു​ന്നു.”—ജോസഫ്‌.

രാത്രി ഒളിച്ചും പാത്തും വീട്ടിൽനി​ന്നു പുറത്തു​പോ​കൽ—അതു വളരെ ആവേശ​ജ​ന​ക​വും രസകര​വു​മാ​ണെന്ന്‌ തോന്നി​യേ​ക്കാം. ഏതാനും മണിക്കൂർ നേര​ത്തേക്ക്‌ നിങ്ങളു​ടേതു മാത്ര​മായ ഒരു ലോകത്ത്‌ ജീവിതം ആസ്വദി​ക്കാ​നുള്ള ഒരവസ​ര​മാണ്‌ അത്‌. ആരോ​ടും കണക്കു ബോധി​പ്പി​ക്കാ​തെ നിങ്ങൾക്കു തോന്നു​ന്ന​തെ​ന്തും ചെയ്യാ​നും നിങ്ങൾ ഇഷ്ടപ്പെ​ടു​ന്ന​വ​രോ​ടൊത്ത്‌ ആയിരി​ക്കാ​നു​മുള്ള സുവർണാ​വ​സരം. കൂടാതെ, രാത്രി​യിൽ പാത്തും പതുങ്ങി​യും വീടിനു വെളി​യിൽ പോയ​പ്പോൾ ചെയ്‌ത കാര്യ​ങ്ങ​ളെ​ക്കു​റി​ച്ചും അതെന്തു രസമാ​യി​രു​ന്നു എന്നു​മൊ​ക്കെ കൂട്ടു​കാർ പൊങ്ങച്ചം പറയു​ന്നതു നിങ്ങൾ കേട്ടി​രി​ക്കാം. അവരോ​ടൊ​പ്പം ചേരാൻ ഇതു നിങ്ങളെ വളരെ​യ​ധി​കം പ്രലോ​ഭി​പ്പി​ച്ചേ​ക്കാം.

വടക്കേ അമേരി​ക്ക​യി​ലെ 110 ഹൈസ്‌കൂൾ വിദ്യാർഥി​ക​ളിൽ—ജൂനി​യ​റും സീനി​യ​റും ആയിട്ടുള്ള—നടത്തിയ ഒരു സർവേ​യിൽ പങ്കെടുത്ത 55 പേർ തങ്ങൾ ഒരു തവണ​യെ​ങ്കി​ലും പാത്തും പതുങ്ങി​യും വീടിനു പുറത്തു പോയ​താ​യി സമ്മതിച്ചു. മിക്കവ​രും തങ്ങളുടെ 14-ാം വയസ്സി​ലാണ്‌ ആദ്യമാ​യി അപ്രകാ​രം ചെയ്‌തത്‌. തങ്ങളുടെ കണ്ണു​വെ​ട്ടിച്ച്‌ കുട്ടികൾ രാത്രി​യിൽ വീടിനു വെളി​യിൽ പോകു​ന്നതു തടയാൻ മാതാ​പി​താ​ക്കൾ വീട്ടിൽ ഇലക്‌​ട്രോ​ണിക്‌ അലാറം സ്ഥാപി​ക്ക​ണ​മെന്ന്‌ ചില വിദഗ്‌ധർ ശുപാർശ ചെയ്യത്ത​ക്ക​വി​ധം അത്ര ഗുരു​ത​ര​മാണ്‌ ഈ പ്രശ്‌നം. എന്തു​കൊ​ണ്ടാണ്‌ ഇത്ര​യേറെ യുവജ​നങ്ങൾ ആരുമ​റി​യാ​തെ വീടിനു വെളി​യിൽ പോയി​ക്കൊണ്ട്‌ മാതാ​പി​താ​ക്ക​ളു​ടെ കോപം ക്ഷണിച്ചു​വ​രു​ത്തു​ന്നത്‌?

ചിലർ ആരുമ​റി​യാ​തെ പുറത്തു​പോ​കു​ന്ന​തി​ന്റെ കാരണം

വിരസത അനുഭ​വ​പ്പെ​ടു​മ്പോൾ കൂട്ടു​കാ​രു​മൊത്ത്‌ അൽപ്പസ​മയം ഉല്ലസി​ക്കു​ന്ന​തി​നു വേണ്ടി മാത്രം ആയിരി​ക്കാം ചില യുവജ​നങ്ങൾ മാതാ​പി​താ​ക്ക​ളു​ടെ കണ്ണു​വെ​ട്ടിച്ച്‌ വീടിനു വെളി​യിൽ പോകു​ന്നത്‌. കൗമാ​ര​പ്രാ​യ​ക്കാ​രും യുവജ​ന​ങ്ങ​ളും (ഇംഗ്ലീഷ്‌) എന്ന പുസ്‌തകം വിശദീ​ക​രി​ക്കുന്ന പ്രകാരം യുവാക്കൾ ആരുമ​റി​യാ​തെ വീടിനു വെളി​യിൽ പോകു​ന്നത്‌, “വൈകിട്ട്‌ നേരത്തേ വീട്ടി​ലെ​ത്ത​ണ​മെന്ന നിയമം വെച്ചു​കൊ​ണ്ടോ ശിക്ഷയു​ടെ ഭാഗമാ​യോ സാമൂ​ഹിക പരിപാ​ടി​കൾക്കും മറ്റും പോകു​ന്ന​തിൽനിന്ന്‌ അവരെ വിലക്കു​ന്നതു നിമി​ത്ത​മാ​കാം. ഇത്തരം സാഹച​ര്യ​ങ്ങ​ളിൽ യുവജ​നങ്ങൾ ഏതു വിധേ​ന​യും പോകു​ന്നു. ആരുമ​റി​യാ​തെ തിരി​ച്ചെ​ത്തു​ന്ന​തിൽ ചില​പ്പോ​ഴൊ​ക്കെ വിജയി​ക്കു​ക​യും ചെയ്യുന്നു.” പാത്തും പതുങ്ങി​യും വീടിനു വെളി​യിൽ പോകു​ന്ന​തി​ന്റെ കാരണം ഒരു പതിനാ​റു​കാ​രി വിശദീ​ക​രി​ച്ചത്‌ ഇപ്രകാ​ര​മാണ്‌: “ഞാൻ വെറു​മൊ​രു കൊച്ചു​കു​ട്ടി​യെ​പ്പോ​ലെ​യാ​ണെ​ന്നും എനിക്ക്‌ എന്റേതായ ഒരു ജീവിതം നയിക്കാൻ സ്വാത​ന്ത്ര്യ​മി​ല്ലെ​ന്നും എനിക്കു തോന്നു​ന്നു. . . മറ്റു കുട്ടി​ക​ളെ​ക്കാ​ളൊ​ക്കെ നേരത്തേ ഞാൻ വീട്ടി​ലെ​ത്തേ​ണ്ട​തുണ്ട്‌. എന്റെ കൂട്ടു​കാർ പോകുന്ന സ്ഥലങ്ങളി​ലൊ​ന്നും പോകാൻ മാതാ​പി​താ​ക്കൾ എന്നെ അനുവ​ദി​ക്കാ​റില്ല . . . അതു​കൊണ്ട്‌ ഞാൻ എങ്ങനെ​യെ​ങ്കി​ലു​മൊ​ക്കെ പോവു​ക​യും അവരോ​ടു നുണ പറയു​ക​യും ചെയ്യുന്നു.” തുടക്ക​ത്തിൽ പരാമർശിച്ച ജോസഫ്‌, ആരുമ​റി​യാ​തെ വീടിനു വെളി​യിൽ പോകാൻ തുടങ്ങി​യത്‌ തന്റെ 14-ാമത്തെ വയസ്സിൽ, പങ്കെടു​ക്ക​രു​തെന്നു മാതാ​പി​താ​ക്കൾ വിലക്കി​യി​രുന്ന ഒരു റാപ്‌ സംഗീ​ത​ക്ക​ച്ചേ​രി​ക്കു പോയ​പ്പോ​ഴാ​യി​രു​ന്നു.

തെറ്റായ ഉദ്ദേശ്യ​ത്തോ​ടെയല്ല മിക്ക യുവജ​ന​ങ്ങ​ളും മാതാ​പി​താ​ക്ക​ളു​ടെ കണ്ണു​വെ​ട്ടിച്ച്‌ വീട്ടിൽനി​ന്നു പുറത്തു​ക​ട​ക്കു​ന്നത്‌ എന്നതു ശരിതന്നെ. തുടക്ക​ത്തിൽ പരാമർശിച്ച താര ഇങ്ങനെ പറഞ്ഞു: “‘നമുക്കു പോയി എന്തെങ്കി​ലും വലിയ തെറ്റു ചെയ്യാം’ എന്നതാ​യി​രു​ന്നില്ല ആദ്യം ഞങ്ങളുടെ മനസ്സിൽ. ഞാൻ എന്റെ സഹോ​ദ​രി​യോ​ടൊത്ത്‌ ആയിരി​ക്കാൻ ആഗ്രഹി​ച്ചു, പുറത്തു പോയി കൂട്ടു​കാ​രോ​ടൊത്ത്‌ ഉല്ലസി​ക്കാൻ ആയിരു​ന്നു അവൾക്കി​ഷ്ടം.” ജോസഫ്‌ പറഞ്ഞത്‌ ഇപ്രകാ​ര​മാണ്‌: “വെറുതെ ചുറ്റി​ന​ട​ക്ക​ണ​മെന്നേ ഞങ്ങൾക്കു​ണ്ടാ​യി​രു​ന്നു​ള്ളൂ. കൂട്ടു​കാ​രോ​ടൊത്ത്‌ ആയിരി​ക്കാ​നും അവരോ​ടു സംസാ​രി​ക്കാ​നും ഞാൻ ആഗ്രഹി​ച്ചു.” എന്നാൽ, കൂട്ടു​കാ​രോ​ടൊ​പ്പം ചുറ്റി​ന​ട​ക്കു​ന്നത്‌ വലിയ കുറ്റകൃ​ത്യ​ങ്ങ​ളി​ലേക്ക്‌ നയിക്കു​ന്നതു വിരള​മാ​യി​രി​ക്കാ​മെ​ങ്കി​ലും പല യുവജ​ന​ങ്ങ​ളും ഗുരു​ത​ര​മായ കുഴപ്പ​ത്തിൽ അകപ്പെ​ടു​ക​തന്നെ ചെയ്യുന്നു.

സാഹസങ്ങൾ

മാനസി​കാ​രോ​ഗ്യ വിദഗ്‌ധ​യായ ഡോ. ലിൻ ഇ. പോ​ന്റോൺ പറയുന്നു: “കൗമാ​ര​പ്രാ​യ​ക്കാർ സാഹസങ്ങൾ കാട്ടാൻ ശ്രമി​ക്കു​ന്നതു സ്വാഭാ​വി​ക​മാണ്‌.” സ്വത​ന്ത്ര​രാ​യി​രി​ക്കാ​നും പുതിയ കാര്യങ്ങൾ പരീക്ഷി​ച്ചു നോക്കാ​നും രസകര​മായ പുതിയ സാഹച​ര്യ​ങ്ങ​ളിൽ ആയിരി​ക്കാ​നു​മൊ​ക്കെ ആഗ്രഹി​ക്കു​ന്നത്‌ യുവജ​ന​ങ്ങളെ സംബന്ധി​ച്ചി​ട​ത്തോ​ളം സ്വാഭാ​വി​ക​മാ​ണെന്നു മാത്രമല്ല ആരോ​ഗ്യാ​വഹം പോലു​മാ​യി​രു​ന്നേ​ക്കാ​മെ​ന്നും അത്‌ വളർച്ച​യു​ടെ ഭാഗമാ​ണെ​ന്നും ഡോ. പോ​ന്റോൺ തുടർന്നു വിശദീ​ക​രി​ക്കു​ന്നു. എന്നാൽ അനേകം യുവജ​ന​ങ്ങ​ളും ന്യായ​മായ എല്ലാ അതിരു​ക​ളും ലംഘി​ച്ചു​കൊ​ണ്ടാണ്‌ സാഹസ​ങ്ങൾക്ക്‌ ഒരു​മ്പെ​ടു​ന്നത്‌, പ്രത്യേ​കി​ച്ചും മാതാ​പി​താ​ക്ക​ളു​ടെ നോട്ട​മെ​ത്താത്ത സ്ഥലങ്ങളിൽ ആയിരി​ക്കു​മ്പോൾ. റ്റീൻ മാസിക ഇങ്ങനെ പറയുന്നു: “സമപ്രാ​യ​ക്കാ​രിൽ നിന്നുള്ള സമ്മർദം, വിരസത, യുവത്വ​ത്തി​ന്റെ പ്രസരിപ്പ്‌ എന്നിവ​യും ഒരുപക്ഷേ ബിയർ പോ​ലെ​യുള്ള മറ്റേ​തെ​ങ്കി​ലും ഉത്‌​പ്രേ​ര​ക​വും കൂടെ​യാ​കു​മ്പോൾ . . . അതിരു കടന്ന സാഹസി​ക​ത​യി​ലേക്ക്‌ എടുത്തു ചാടാൻ യുവജ​നങ്ങൾ പ്രേരി​ത​രാ​യേ​ക്കാം. അതിനു വിലയാ​യി നൽകേണ്ടി വരുന്ന​തോ, സ്വന്തം ജീവനും.” അമിത​വേഗം, പൊതു​മു​ത​ലും മറ്റും നശിപ്പി​ക്കൽ, മദ്യപി​ച്ചു വണ്ടി​യോ​ടി​ക്കൽ, മോഷണം എന്നിവയെ ഒക്കെ കൗമാ​ര​പ്രാ​യ​ക്കാർ ചെയ്യുന്ന സാഹസ​പ്ര​വൃ​ത്തി​ക​ളാ​യി ഒരു സർവേ പട്ടിക​പ്പെ​ടു​ത്തു​ക​യു​ണ്ടാ​യി.

അനുസ​ര​ണ​ക്കേ​ടിൽ ചെറു​താ​യി ഉൾപ്പെട്ടു തുടങ്ങി​യാൽ പിന്നെ, കൂടുതൽ ഗുരു​ത​ര​മായ തെറ്റു​ക​ളി​ലേക്കു നീങ്ങുക എളുപ്പ​മാണ്‌. “അത്യല്‌പ​ത്തിൽ നീതി​കെ​ട്ടവൻ അധിക​ത്തി​ലും നീതി​കെ​ട്ടവൻ” എന്ന്‌ ലൂക്കൊസ്‌ 16:10-ൽ യേശു പറഞ്ഞതി​നു സമാന​മാണ്‌ അത്‌. അതു​കൊണ്ട്‌ ആരുമ​റി​യാ​തെ കൂട്ടു​കാ​രോ​ടൊ​പ്പം പുറത്തു പോകു​ന്നത്‌ ഗുരു​ത​ര​മായ പാപങ്ങ​ളി​ലേക്കു നയിക്കു​ന്ന​തിൽ അതിശ​യി​ക്കാ​നില്ല. താര പരസം​ഗ​ത്തിൽ ഏർപ്പെട്ടു. മയക്കു​മ​രു​ന്നു വിൽപ്പന ആരംഭിച്ച ജോസഫ്‌ അറസ്റ്റി​ലാ​വു​ക​യും ജയിലിൽ അടയ്‌ക്ക​പ്പെ​ടു​ക​യും ചെയ്‌തു. ജോൺ എന്ന ഒരു ക്രിസ്‌തീയ യുവാവ്‌ മയക്കു​മ​രു​ന്നു ദുരു​പ​യോ​ഗ​ത്തി​ലും കാർമോ​ഷ​ണ​ത്തി​ലും ഏർപ്പെ​ടാൻ തുടങ്ങി. ദുഃഖ​ക​ര​മെന്നു പറയട്ടെ, ധാരാളം യുവജ​നങ്ങൾ ഇത്തരം പ്രവർത്ത​ന​ങ്ങ​ളു​ടെ ശാരീ​രി​ക​മായ ഭവിഷ്യ​ത്തു​കൾ കൊയ്യു​ന്നു. ആഗ്രഹി​ക്കാത്ത ഗർഭധാ​രണം, ലൈം​ഗി​ക​മാ​യി പകരുന്ന രോഗങ്ങൾ, മദ്യത്തി​നും മയക്കു​മ​രു​ന്നി​നും അടിമ​യാ​കൽ മുതലാ​യവ.—ഗലാത്യർ 6:7, 8.

നഷ്ടങ്ങളും മുറി​വു​ക​ളും

ശാരീ​രിക മുറി​വു​ക​ളെ​ക്കാൾ വളരെ​യേറെ ഹാനി​ക​ര​മാ​യി​രു​ന്നേ​ക്കാം വൈകാ​രിക മുറി​വു​കൾ. മനസ്സാ​ക്ഷി​ക്കുത്ത്‌ അനുഭ​വി​ക്കേണ്ടി വരുന്നത്‌ വളരെ വേദനാ​ജ​ന​ക​മാ​യി​രി​ക്കാൻ കഴിയും. (സങ്കീർത്തനം 38:3, 4) ജോസഫ്‌ പറയുന്നു: “‘കണ്ണു പോകു​മ്പോ​ഴേ കണ്ണിന്റെ വിലയ​റി​യൂ’ എന്നൊരു ചൊല്ലുണ്ട്‌. പിന്തി​രി​ഞ്ഞു നോക്കു​മ്പോൾ ഞാനിത്ര വിവേ​ക​ശൂ​ന്യ​നാ​യി​രു​ന്നു എന്നത്‌ എനിക്കു വിശ്വ​സി​ക്കാ​നേ കഴിയു​ന്നില്ല.”

നിങ്ങളു​ടെ സത്‌പേര്‌ നഷ്ടപ്പെ​ടാ​നുള്ള സാധ്യ​ത​യും അവഗണി​ക്കാ​വതല്ല. സഭാ​പ്ര​സം​ഗി 10:1 (പി.ഒ.സി. ബൈബിൾ) ഇപ്രകാ​രം പറയുന്നു: “ചത്ത ഈച്ച പരിമ​ള​ദ്ര​വ്യ​ത്തിൽ ദുർഗ്ഗന്ധം കലർത്തു​ന്നു; അതു​പോ​ലെ ജ്ഞാനവും പ്രശസ്‌തി​യും കെടു​ത്താൻ അല്‌പം മൗഢ്യം മതി.” പുരാ​ത​ന​കാ​ല​ങ്ങ​ളിൽ, ചത്ത ഈച്ച​യെ​പ്പോ​ലുള്ള ചെറിയ ഒന്നിന്‌ വില​യേ​റിയ ലേപന​ത്തെ​യോ പരിമ​ള​ദ്ര​വ്യ​ത്തെ​യോ ഉപയോ​ഗ​ശൂ​ന്യ​മാ​ക്കാൻ കഴിയു​മാ​യി​രു​ന്നു. സമാന​മാ​യി, “അല്‌പം മൗഢ്യം” വളരെ പണി​പ്പെട്ടു നേടി​യെ​ടുത്ത നിങ്ങളു​ടെ സത്‌പേ​രി​നെ കളങ്ക​പ്പെ​ടു​ത്തി​യേ​ക്കാം. നിങ്ങൾ ഒരു ക്രിസ്‌ത്യാ​നി​യാ​ണെ​ങ്കിൽ, ഇത്തരം ദുഷ്‌പെ​രു​മാ​റ്റം സഭയിൽ പദവികൾ ലഭിക്കു​ന്ന​തിൽനി​ന്നു നിങ്ങളെ തടയും എന്നതിൽ സംശയ​മില്ല. മാത്ര​വു​മല്ല, നിങ്ങൾതന്നെ ബൈബിൾ തത്ത്വങ്ങൾ പിൻപ​റ്റു​ന്നില്ല എന്നു മറ്റുള്ള​വർക്ക്‌ അറിയാ​മെ​ന്നി​രി​ക്കെ, അവ പിൻപ​റ്റ​ണ​മെന്ന്‌ നിങ്ങൾക്ക്‌ എങ്ങനെ അവരോ​ടു പറയാ​നാ​കും?—റോമർ 2:1-3.

അവസാ​ന​മാ​യി, നിങ്ങൾ സ്ഥലത്തില്ല എന്നു മാതാ​പി​താ​ക്കൾ മനസ്സി​ലാ​ക്കു​മ്പോൾ അത്‌ അവരിൽ ഉളവാ​ക്കി​യേ​ക്കാ​വുന്ന മാനസിക വ്യഥയെ കുറിച്ചു ചിന്തി​ക്കുക. തന്റെ പതിന​ഞ്ചു​കാ​രി​യായ മകൾ വീട്ടി​ലി​ല്ലെന്നു കണ്ടെത്തി​യത്‌ എത്ര ഭീകര​മായ അനുഭ​വ​മാ​യി​രു​ന്നു എന്ന്‌ ഒരു മാതാവ്‌ വിശദീ​ക​രി​ക്കു​ന്നു. മകൾ എവി​ടെ​പ്പോ​യി എന്നതിനെ കുറിച്ച്‌ യാതൊ​രു വിവര​വും ഇല്ലായി​രു​ന്ന​തി​നാൽ താനും ഭർത്താ​വും ‘മനഃ​ക്ലേ​ശ​ത്താൽ തളർന്നു​പോ​യി’ എന്നാണ്‌ അവർ പറഞ്ഞത്‌. നിങ്ങളു​ടെ മാതാ​പി​താ​ക്കളെ ഇങ്ങനെ വേദനി​പ്പി​ക്കാൻ നിങ്ങൾ ആഗ്രഹി​ക്കു​ന്നു​വോ?—സദൃശ​വാ​ക്യ​ങ്ങൾ 10:1.

കൂടുതൽ സ്വാത​ന്ത്ര്യം ലഭിക്കാൻ . . .

നിങ്ങളെ മാതാ​പി​താ​ക്കൾ അമിത​മാ​യി നിയ​ന്ത്രി​ക്കു​ന്നു​വെന്നു തോന്നു​മ്പോൾ നിങ്ങൾക്കു നിരാശ അനുഭ​വ​പ്പെ​ടും എന്നതു ശരിതന്നെ. എന്നാൽ അവരുടെ കണ്ണു​വെ​ട്ടിച്ച്‌ വീട്ടിൽനി​ന്നു പുറത്തു പോകു​ന്ന​താ​ണോ യഥാർഥ പരിഹാ​രം? ഒടുവിൽ, നിങ്ങൾ പിടി​ക്ക​പ്പെ​ടാ​നാണ്‌ സാധ്യത. മാതാ​പി​താ​ക്കളെ വിഡ്‌ഢി​ക​ളാ​ക്കാൻ തക്ക സാമർഥ്യം നിങ്ങൾക്കു​ണ്ടെ​ങ്കിൽക്കൂ​ടി, യഹോ​വ​യു​ടെ കണ്ണിൽനിന്ന്‌ യാതൊ​ന്നും മറച്ചു​വെ​ക്കാൻ നിങ്ങൾക്കാ​വില്ല. രാത്രി​യു​ടെ മറവി​ലാ​ണു ചെയ്യു​ന്ന​തെ​ങ്കിൽപ്പോ​ലും യഹോവ അതു കാണു​ന്നുണ്ട്‌. (ഇയ്യോബ്‌ 34:21) അതു​കൊണ്ട്‌, ഇന്ന്‌ അല്ലെങ്കിൽ നാളെ കള്ളി വെളി​ച്ച​ത്താ​വു​ക​തന്നെ ചെയ്യും. മാതാ​പി​താ​ക്കൾക്ക്‌ നിങ്ങളിൽ ഉണ്ടായി​രുന്ന വിശ്വാ​സ​വും കൂടെ നഷ്ടമാ​കാൻ അത്‌ ഇടയാ​ക്കും. ഫലമോ? നിങ്ങൾ ഏറ്റവു​മ​ധി​കം ആഗ്രഹി​ച്ചി​രുന്ന ആ സംഗതി​യിൽ—സ്വാത​ന്ത്ര്യ​ത്തിൽ—അധിക​വും നിങ്ങൾക്കു നഷ്ടമാ​കും!

ഓർമി​ക്കു​ക, സ്വാത​ന്ത്ര്യം ലഭിക്ക​ണ​മെ​ങ്കിൽ മാതാ​പി​താ​ക്ക​ളു​ടെ വിശ്വാ​സം നേടി​യെ​ടു​ക്കേ​ണ്ട​തുണ്ട്‌. അതിനുള്ള ഏറ്റവും പറ്റിയ മാർഗ്ഗം അവരെ അനുസ​രി​ക്കുക എന്നതാണ്‌. (എഫെസ്യർ 6:1-3) മാതാ​പി​താ​ക്കൾ ചെയ്യു​ന്നതു ന്യായമല്ല എന്നു നിങ്ങൾക്കു തോന്നുന്ന പക്ഷം, ബഹുമാ​ന​പു​ര​സ്സരം അതേപ്പറ്റി അവരോ​ടു തുറന്നു സംസാ​രി​ക്കുക. നിങ്ങൾ പറയു​ന്നത്‌ അവർ നന്നായി പരിഗ​ണി​ച്ചേ​ക്കാം. അതേസ​മ​യം​തന്നെ, നിങ്ങളെ അവർ നിയ​ന്ത്രി​ക്കു​ന്നതു നല്ല കാരണ​ത്തോ​ടെ​യാ​ണെന്നു നിങ്ങൾക്കു മനസ്സി​ലാ​കു​ക​യും ചെയ്‌തേ​ക്കാം. നിങ്ങൾക്ക്‌ അവരോട്‌ യോജി​ക്കാൻ കഴിഞ്ഞി​ല്ലെ​ങ്കിൽക്കൂ​ടി, അവർ നിങ്ങളെ സ്‌നേ​ഹി​ക്കു​ന്നു​വെ​ന്നും നിങ്ങൾക്കു നന്മയു​ണ്ടാ​ക​ണ​മെന്ന്‌ ആത്മാർഥ​മാ​യി ആഗ്രഹി​ക്കു​ന്നു​വെ​ന്നും ഒരിക്ക​ലും മറക്കരുത്‌. അവർക്കു നിങ്ങളി​ലുള്ള വിശ്വാ​സം ഒന്നി​നൊ​ന്നു വർധി​ക്കുന്ന വിധത്തിൽ പെരു​മാ​റുക. നിങ്ങൾ ആഗ്രഹി​ക്കുന്ന സ്വാത​ന്ത്ര്യം തക്കസമ​യത്തു നിങ്ങൾക്കു ലഭിക്കു​ക​തന്നെ ചെയ്യും.b

‘അവരുടെ വഴിക്കു പോക​രുത്‌’

പുരാ​ത​ന​കാ​ല​ങ്ങ​ളിൽ, അനിയ​ന്ത്രി​ത​മാ​യി പെരു​മാ​റാൻ ദൈവ​ഭ​യ​മു​ണ്ടാ​യി​രുന്ന യുവജ​ന​ങ്ങളെ സമപ്രാ​യ​ക്കാർ പ്രലോ​ഭി​പ്പി​ച്ചി​രു​ന്നു. ശലോ​മോൻ യുവജ​ന​ങ്ങളെ ഇപ്രകാ​രം ഉദ്‌ബോ​ധി​പ്പി​ക്കു​ന്നു: “മകനേ, പാപികൾ നിന്നെ വശീക​രി​ച്ചാൽ വഴി​പ്പെ​ട്ടു​പോ​ക​രു​തു. . . . നീ അവരുടെ വഴിക്കു പോക​രു​തു.” (സദൃശ​വാ​ക്യ​ങ്ങൾ 1:10, 15) ആരുമ​റി​യാ​തെ വീട്ടിൽനി​ന്നു പുറത്തു​ക​ട​ക്കാൻ സുഹൃ​ത്തു​ക്കൾ നിങ്ങളെ പ്രേരി​പ്പി​ക്കു​മ്പോൾ ഈ ബുദ്ധി​യു​പ​ദേശം അനുസ​രി​ക്കുക. ശലോ​മോൻ കൂടു​ത​ലാ​യി ഇങ്ങനെ മുന്നറി​യി​പ്പു നൽകുന്നു: “വിവേ​ക​മു​ള്ളവൻ അനർത്ഥം കണ്ടു ഒളിച്ചു​കൊ​ള്ളു​ന്നു; അല്‌പ​ബു​ദ്ധി​ക​ളോ നേരെ ചെന്നു ചേത​പ്പെ​ടു​ന്നു.”—സദൃശ​വാ​ക്യ​ങ്ങൾ 22:3

ഒളിച്ചും പാത്തും വീട്ടിൽ നിന്നുള്ള പുറത്തു​പോക്ക്‌ നിങ്ങൾ ഇതി​നോ​ടകം ആരംഭി​ച്ചു കഴി​ഞ്ഞെ​ങ്കിൽ അതു നിറു​ത്തുക! കാരണം, അതു നിങ്ങളു​ടെ​തന്നെ നാശത്തിൽ കലാശി​ക്കും. നിങ്ങൾ എന്താണു ചെയ്‌തു​കൊ​ണ്ടി​രു​ന്നത്‌ എന്നു മാതാ​പി​താ​ക്കളെ അറിയി​ക്കുക. അവർ നൽകി​യേ​ക്കാ​വുന്ന ഏതു ശിക്ഷയും അല്ലെങ്കിൽ നിങ്ങളു​ടെ മേൽ വെച്ചേ​ക്കാ​വുന്ന ഏതു നിയ​ന്ത്ര​ണ​ങ്ങ​ളും മടി കൂടാതെ സ്വീക​രി​ക്കുക. ആവശ്യ​മാ​യി​രി​ക്കുന്ന പക്ഷം, നിങ്ങളു​ടെ മേൽ നല്ല സ്വാധീ​നം ചെലു​ത്താൻ കഴിയുന്ന പുതിയ സുഹൃ​ത്തു​ക്കളെ കണ്ടെത്തുക. (സദൃശ​വാ​ക്യ​ങ്ങൾ 13:20) ഉല്ലാസ​ത്തി​നാ​യി, കൂടുതൽ ആരോ​ഗ്യാ​വ​ഹ​വും അപകട​സാ​ധ്യത കുറഞ്ഞ​തു​മായ വഴികൾ തിര​ഞ്ഞെ​ടു​ക്കുക.

ഏറ്റവും പ്രധാ​ന​മാ​യി, ബൈബിൾ വായി​ക്കു​ന്ന​തി​ലൂ​ടെ​യും ക്രിസ്‌തീയ യോഗ​ങ്ങ​ളിൽ പങ്കുപ​റ്റു​ന്ന​തി​ലൂ​ടെ​യും നിങ്ങളു​ടെ ആത്മീയത ബലിഷ്‌ഠ​മാ​ക്കുക. സങ്കീർത്ത​ന​ക്കാ​രൻ ഇങ്ങനെ ചോദി​ച്ചു: “ബാലൻ [“യുവാവ്‌,” NW] തന്റെ നടപ്പിനെ നിർമ്മ​ല​മാ​ക്കു​ന്നതു എങ്ങനെ?” അവൻതന്നെ ഇങ്ങനെ ഉത്തരം നൽകുന്നു: “[ദൈവ​ത്തി​ന്റെ] വചന​പ്ര​കാ​രം അതിനെ സൂക്ഷി​ക്കു​ന്ന​തി​നാൽ തന്നേ.” (സങ്കീർത്തനം 119:9) ശരിയാ​യതു ചെയ്യാൻ നിങ്ങളു​ടെ മനസ്സിനെ പരുവ​പ്പെ​ടു​ത്തവേ, ഒളിച്ചും പാത്തും വീട്ടിൽനി​ന്നു പുറത്തു പോകു​ന്നത്‌ ആവേശ​ജ​ന​ക​വും രസകര​വു​മാ​ണെ​ങ്കി​ലും ഉൾപ്പെ​ട്ടി​രി​ക്കുന്ന അപകട​സാ​ധ്യ​തകൾ കണക്കി​ലെ​ടു​ക്കു​മ്പോൾ അതു മൂല്യ​മു​ള്ളതല്ല എന്ന നിഗമ​ന​ത്തിൽ നിങ്ങൾ എത്തി​ച്ചേ​രും. (g01 2/22)

[അടിക്കു​റി​പ്പു​കൾ]

[26-ാം പേജിലെ ആകർഷക വാക്യം]

“എന്റെ കൂട്ടു​കാർ പോകുന്ന സ്ഥലങ്ങളി​ലൊ​ന്നും പോകാൻ മാതാ​പി​താ​ക്കൾ എന്നെ അനുവ​ദി​ക്കാ​റില്ല. . . അതു​കൊണ്ട്‌ ഞാൻ എങ്ങനെ​യെ​ങ്കി​ലു​മൊ​ക്കെ പോവു​ക​യും അവരോ​ടു നുണ പറയു​ക​യും ചെയ്യുന്നു.”

[25-ാം പേജിലെ ചിത്രം]

ഒളിച്ചും പാത്തും വീട്ടിൽനി​ന്നു പുറത്തു​പോ​കു​ന്നത്‌ മിക്ക​പ്പോ​ഴും ഗുരു​ത​ര​മായ പ്രശ്‌ന​ങ്ങ​ളി​ലേക്കു നയിക്കു​ന്നു