ആർ​ത്രൈ​റ്റിസ്‌ രോഗി​കൾക്കു പ്രത്യാശ

“ഹൃ​ദ്രോ​ഗ​മോ കാൻസ​റോ പോ​ലെ​യുള്ള ഒരു മുഖ്യ മരണകാ​ര​ണമല്ല ആർ​ത്രൈ​റ്റിസ്‌. എന്നാൽ അത്‌ ഒരു വ്യക്തി​യു​ടെ ജീവി​ത​ത്തി​ന്റെ ഗുണനി​ല​വാ​രത്തെ അങ്ങേയറ്റം ബാധി​ക്കു​ന്നു” എന്ന്‌ ഡോ. ഫാത്തിമ മിലി പറയുന്നു. ആർ​ത്രൈ​റ്റിസ്‌ ഒരു വ്യക്തി​യു​ടെ ജീവി​ത​ത്തി​ന്റെ സമസ്‌ത തലങ്ങ​ളെ​യും ബാധി​ച്ചേ​ക്കാം. ആർ​ത്രൈ​റ്റിസ്‌ രോഗി​കൾ നേരി​ടുന്ന ചില പ്രശ്‌നങ്ങൾ എന്തൊ​ക്കെ​യാണ്‌? അവയു​മാ​യി പൊരു​ത്ത​പ്പെ​ടുക സാധ്യ​മാ​ണോ?

ഇറ്റലി​യിൽനി​ന്നുള്ള 28 വയസ്സു​കാ​രി കാറ്റ്യാa പറയുന്നു: “20-ാമത്തെ വയസ്സിൽ എനിക്ക്‌ ആർ​ത്രൈ​റ്റിസ്‌ ആണെന്ന്‌ അറിഞ്ഞ​പ്പോൾ മുതൽ എന്റെ മുഴു ജീവി​ത​ത്തി​നും മാറ്റം വന്നിരി​ക്കു​ന്നു. വേദന കാരണം ജോലി ഉപേക്ഷി​ക്കു​ക​യും മുഴു​സമയ ശുശ്രൂഷ നിറു​ത്തു​ക​യും ചെയ്യേണ്ടി വന്നു.” ആർ​ത്രൈ​റ്റിസ്‌ രോഗി​കൾക്കെ​ല്ലാം പൊതു​വി​ലുള്ള ഒരു പ്രശ്‌ന​മാണ്‌ വേദന. ഇംഗ്ലണ്ടി​ലെ 63 വയസ്സുള്ള അലൻ പറയുന്നു: “എപ്പോ​ഴും ശരീര​ത്തിൽ എവി​ടെ​യെ​ങ്കി​ലു​മൊ​ക്കെ വേദന കാണും, ചില​പ്പോൾ അതു സഹിക്കാ​വുന്ന അളവി​ലാ​യി​രി​ക്കു​മെന്നു മാത്രം.” ക്ഷീണമാണ്‌ മറ്റൊരു വെല്ലു​വി​ളി. “വേദന​യും വീക്കവു​മൊ​ക്കെ പോകട്ടെ എന്നു വെക്കാം, എന്നാൽ ക്ഷീണമു​ണ്ട​ല്ലോ, അത്‌ അസഹനീ​യ​മാണ്‌,” 21 വയസ്സു​കാ​രി സാറ പറയുന്നു.

വൈകാ​രിക വേദന

ജപ്പാനി​ലെ 61 വയസ്സുള്ള സെറ്റ്‌സു​ക്കോ പറയു​ന്ന​ത​നു​സ​രിച്ച്‌ വിട്ടു​മാ​റാത്ത വേദന​യു​മാ​യുള്ള അനുദിന പോരാ​ട്ടം ഒരു വ്യക്തിയെ “മാനസി​ക​മാ​യും വൈകാ​രി​ക​മാ​യും തളർത്തി​ക്ക​ള​യും.” എന്തിന്‌, ഒരു പെൻസിൽ അല്ലെങ്കിൽ ഫോണി​ന്റെ റിസീവർ പിടി​ക്കാൻ ശ്രമി​ക്കു​ന്നതു പോലും ഒരു വെല്ലു​വി​ളി ആയിരു​ന്നേ​ക്കാം! 47 വയസ്സുള്ള കാസുമീ ഇങ്ങനെ വിലപി​ക്കു​ന്നു: “ഒരു കൊച്ചു​കു​ട്ടി​ക്കു ചെയ്യാൻ കഴിയുന്ന കാര്യ​ങ്ങൾപോ​ലും എനിക്കി​പ്പോൾ ചെയ്യാ​നാ​കു​ന്നില്ല.” 60 വയസ്സുള്ള ജാനീ​സിന്‌ ഇപ്പോൾ ഏറെ നേരം നിൽക്കാ​നോ നടക്കാ​നോ കഴിയില്ല. അവർ പറയുന്നു: “ചെയ്‌തു​കൊ​ണ്ടി​രുന്ന കാര്യങ്ങൾ ചെയ്യാൻ കഴിയാ​തെ വരു​മ്പോൾ നിരു​ത്സാ​ഹം തോന്നു​ന്നു.”

ഇത്തരം പരിമി​തി​കൾ ഇച്ഛാഭം​ഗ​ത്തി​ലേ​ക്കും തന്നെക്കു​റി​ച്ചു​ത​ന്നെ​യുള്ള നിഷേ​ധാ​ത്മക ചിന്തക​ളി​ലേ​ക്കും നയി​ച്ചേ​ക്കാം. 27 വയസ്സുള്ള ഗാക്കു യഹോ​വ​യു​ടെ സാക്ഷി​ക​ളിൽ ഒരാളാണ്‌. അദ്ദേഹം ഇങ്ങനെ പറയുന്നു: “പ്രസം​ഗ​വേ​ല​യിൽ പൂർണ പങ്ക്‌ ഉണ്ടായി​രി​ക്കാ​നോ സഭാ ഉത്തരവാ​ദി​ത്വ​ങ്ങൾ നിർവ​ഹി​ക്കാ​നോ കഴിയാ​ത്തത്‌ വ്യക്തി​യെന്ന നിലയിൽ എനിക്കു യാതൊ​രു വിലയു​മില്ല എന്നു തോന്നാൻ ഇടയാ​ക്കു​ന്നു.” രണ്ടു വയസ്സു​ള്ള​പ്പോൾ മുതൽ ആർ​ത്രൈ​റ്റി​സു​മാ​യി മല്ലിടുന്ന ഫ്രാൻസി​സ്‌കാ പറയു​ന്നത്‌ താൻ “നിരാ​ശ​യു​ടെ നീർച്ചു​ഴി​യിൽപ്പെട്ട്‌ കൂടുതൽ കൂടുതൽ ആഴത്തി​ലേക്കു വലിക്ക​പ്പെ​ടു​ക​യാണ്‌” എന്നാണ്‌. ഇത്തരം നിരാശ ഒരുവന്റെ ആത്മീയ​തയെ പ്രതി​കൂ​ല​മാ​യി ബാധി​ച്ചെ​ന്നു​വ​രാം. ദക്ഷിണാ​ഫ്രി​ക്ക​യി​ലെ ഒരു സാക്ഷി​യായ ജോയ്‌സ്‌ താൻ ക്രിസ്‌തീയ യോഗ​ങ്ങൾക്കു പോകു​ന്നതു നിറു​ത്തി​യെന്ന്‌ സമ്മതി​ക്കു​ന്നു. “ആരെയും കാണാൻ ഞാൻ ആഗ്രഹി​ച്ചില്ല,” അവർ പറയുന്നു.

രോഗി​കൾക്ക്‌ ഭാവിയെ സംബന്ധിച്ച പല ഉത്‌ക​ണ്‌ഠ​ക​ളും ഉണ്ടായി​രു​ന്നേ​ക്കാം—പ്രവർത്ത​ന​ശേഷി നഷ്ടപ്പെട്ട്‌ മറ്റുള്ള​വരെ ആശ്രയി​ക്കേണ്ടി വരുമോ, പരിച​രി​ക്കാൻ ആരുമി​ല്ലാ​തെ വന്നേക്കു​മോ, വീണ്‌ എല്ലൊ​ടി​ഞ്ഞേ​ക്കു​മോ, സ്വന്തം കുടും​ബ​ത്തി​നു​വേണ്ടി കരുതാ​നാ​വാ​തെ വരുമോ എന്നൊ​ക്കെ​യുള്ള ഭയം അവരെ വേട്ടയാ​ടി​യേ​ക്കാം. 52 വയസ്സുള്ള യോക്കോ ഇങ്ങനെ സമ്മതിച്ചു പറയുന്നു: “ശരീര​ത്തിൽ വൈകൃ​തങ്ങൾ ഉണ്ടാകു​ന്നതു കാണു​മ്പോൾ അവ വർധി​ച്ചേ​ക്കു​മോ എന്നു ഞാൻ ഭയപ്പെ​ട്ടി​രു​ന്നു.”

തങ്ങൾ സ്‌നേ​ഹി​ക്കുന്ന ഒരാൾ ദുരിതം അനുഭ​വി​ക്കു​ന്നതു ദിവസ​വും കാണേണ്ടി വരുന്ന കുടും​ബാം​ഗ​ങ്ങ​ളും വൈകാ​രിക വേദന അനുഭ​വി​ച്ചേ​ക്കാം. ചിലരു​ടെ ദാമ്പത്യ ബന്ധത്തിന്‌ സാരമാ​യി ഉലച്ചിൽ തട്ടുന്ന​തി​നു പോലും ഇത്‌ ഇടയാ​ക്കി​യേ​ക്കാം. ഡെന്നീസ്‌ എന്നു പേരുള്ള ഒരു ഇംഗ്ലണ്ടു​കാ​രി ഇങ്ങനെ പറയുന്നു: “15 വർഷത്തെ വിവാ​ഹ​ജീ​വി​ത​ത്തി​നു ശേഷം എന്റെ ഭർത്താവു പറഞ്ഞു: ‘നിന്റെ​യൊ​രു ആർ​ത്രൈ​റ്റിസ്‌. എനിക്കു മടുത്തു, ഇനി ഇതു സഹിക്കാൻ എന്നെ​ക്കൊ​ണ്ടാ​വില്ല!’ അദ്ദേഹം എന്നെയും 5 വയസ്സുള്ള ഞങ്ങളുടെ മകളെ​യും ഉപേക്ഷി​ച്ചു.”

അതു​കൊണ്ട്‌ രോഗി​കൾക്കും അവരുടെ കുടും​ബ​ങ്ങൾക്കും ആർ​ത്രൈ​റ്റിസ്‌ വലിയ വെല്ലു​വി​ളി ഉയർത്തു​ന്നു. എന്നിരു​ന്നാ​ലും പലരും ഇതുമാ​യി പൊരു​ത്ത​പ്പെ​ടു​ന്ന​തിൽ വിജയം നേടി​യി​ട്ടുണ്ട്‌! ചിലർ ഇത്‌ എങ്ങനെ ചെയ്‌തി​രി​ക്കു​ന്നു​വെന്ന്‌ നമുക്കു നോക്കാം.

നിങ്ങളു​ടെ പരിമി​തി​കൾ തിരി​ച്ച​റി​ഞ്ഞു പ്രവർത്തി​ക്കു​ക

നിങ്ങൾ ഒരു ആർ​ത്രൈ​റ്റിസ്‌ രോഗി​യാ​ണെ​ങ്കിൽ നന്നായി വിശ്ര​മി​ക്കുക; ക്ഷീണത്തെ ലഘൂക​രി​ക്കു​ന്ന​തിന്‌ ഇത്‌ അത്യന്താ​പേ​ക്ഷി​ത​മാണ്‌. ഇതിന്റെ അർഥം നിങ്ങൾ യാതൊ​ന്നും ചെയ്യാതെ വെറു​തെ​യി​രി​ക്കണം എന്നല്ല. തിമൊ​ഥി വിശദീ​ക​രി​ക്കു​ന്നു: “ആർ​ത്രൈ​റ്റിസ്‌ നിങ്ങളെ മാനസി​ക​മാ​യി കീഴ്‌പെ​ടു​ത്താ​തി​രി​ക്ക​ണ​മെ​ങ്കിൽ നിങ്ങൾ പ്രവർത്ത​ന​നി​രതൻ ആയിരി​ക്കേ​ണ്ട​തുണ്ട്‌. അല്ലാത്ത​പക്ഷം ഒരിടത്തു ചടഞ്ഞു​കൂ​ടി​യി​രുന്ന്‌ വേദന അനുഭ​വി​ക്കാ​നേ നിങ്ങൾക്കു നേരമു​ണ്ടാ​യി​രി​ക്കൂ.” മേയോ ക്ലിനി​ക്കി​ലെ വാത​രോ​ഗ​ചി​കി​ത്സാ വിദഗ്‌ധ​നായ വില്യം ഗിൻസ്‌ബർഗ്‌ പറയുന്നു: “വളരെ കൂടുതൽ ചെയ്യു​ന്ന​തി​നും തീരെ കുറച്ചു ചെയ്യു​ന്ന​തി​നും ഇടയ്‌ക്കുള്ള വിടവു വളരെ ചെറു​താണ്‌. രോഗം കണക്കി​ലെ​ടു​ത്തു​കൊണ്ട്‌ തങ്ങളുടെ പ്രവർത്തനം വെട്ടി​ച്ചു​രു​ക്കാൻ ചില സമയങ്ങ​ളിൽ ആളുകളെ ഓർമി​പ്പി​ക്കേ​ണ്ടി​വ​രു​ന്നു.”

നിങ്ങളു​ടെ പരിമി​തി​കളെ നിങ്ങൾ വീക്ഷി​ക്കുന്ന വിധത്തി​നു മാറ്റം വരുത്തു​ന്നത്‌ ഇതിൽ ഉൾപ്പെ​ട്ടേ​ക്കാം. ദക്ഷിണാ​ഫ്രി​ക്ക​യിൽനി​ന്നുള്ള ഡാഫ്‌നി പറയുന്നു: “ഞാൻ യാഥാർഥ്യ ബോധ​മു​ള്ളവൾ ആയിരി​ക്കേ​ണ്ടി​യി​രു​ന്നു. ചില കാര്യങ്ങൾ ചെയ്യാ​നുള്ള ശേഷി എനിക്കു നഷ്ടമാ​യി​ട്ടില്ല, മറിച്ച്‌ അവ കുറേ​ക്കൂ​ടി സാവകാ​ശം ചെയ്യു​കയേ വേണ്ടു എന്ന്‌ എനിക്കു മനസ്സി​ലാ​ക്കേ​ണ്ട​താ​യി വന്നിരി​ക്കു​ന്നു. ഉത്‌ക​ണ്‌ഠ​യ്‌ക്കോ നിരാ​ശ​യ്‌ക്കോ അടി​പ്പെ​ടു​ന്ന​തി​നു പകരം ജോലി​ക​ളൊ​ക്കെ കുറേ​ശ്ശെ​യാ​യി ചെയ്‌തു​തീർക്കാൻ ഞാൻ ശ്രമി​ക്കു​ന്നു.”

ലഭ്യമാ​യി​രു​ന്നേ​ക്കാ​വുന്ന വിവിധ സഹായക ഉപകര​ണ​ങ്ങളെ കുറിച്ചു മനസ്സി​ലാ​ക്കി​യി​രി​ക്കു​ന്ന​തും നല്ലതാ​യി​രി​ക്കും. ഒരുപക്ഷേ നിങ്ങളു​ടെ ഡോക്ട​റു​മാ​യോ ഫിസി​യോ​തെ​റാ​പ്പി​സ്റ്റു​മാ​യോ അവയെ കുറിച്ചു ചർച്ച ചെയ്യാ​വു​ന്ന​താണ്‌. കേയ്‌ക്കോ പറയുന്നു: “ഞങ്ങൾ ഗോവ​ണി​പ്പ​ടി​യിൽ ഒരു ലിഫ്‌റ്റ്‌ പിടി​പ്പി​ച്ചി​ട്ടുണ്ട്‌. വാതി​ലി​ന്റെ പിടി തിരി​ക്കു​മ്പോൾ കൈക്കുഴ വേദനി​ക്കു​ന്ന​തി​നാൽ ഞങ്ങൾ അവയെ​ല്ലാം മാറ്റി. ഇപ്പോൾ എല്ലാ വാതി​ലു​ക​ളും എനിക്ക്‌ തലകൊണ്ട്‌ തള്ളിത്തു​റ​ക്കാൻ കഴിയും. വീട്ടിലെ എല്ലാ പൈപ്പു​ക​ളി​ലും ലീവർ പോലുള്ള പിടികൾ ഞങ്ങൾ ഘടിപ്പി​ച്ചു. അതു​കൊണ്ട്‌ കുറ​ച്ചെ​ങ്കി​ലും വീട്ടു​പണി ചെയ്യാൻ എനിക്കു കഴിയു​ന്നു.” മറ്റൊരു ആർ​ത്രൈ​റ്റിസ്‌ രോഗി​യായ ഗെയ്‌ൽ പറയുന്നു: “എന്റെ കാറി​ന്റെ​യും വീടി​ന്റെ​യും താക്കോ​ലു​കൾ ഒരു വലിയ പിടി​യിൽ ഘടിപ്പി​ച്ചി​രി​ക്കു​ക​യാണ്‌, ഇത്‌ അവ തിരി​ക്കു​ന്നത്‌ കൂടുതൽ എളുപ്പ​മാ​ക്കി​യി​രി​ക്കു​ന്നു. അതു​പോ​ലെ എന്റെ ചീപ്പി​നും ബ്രഷി​നു​മെ​ല്ലാം വലിയ പിടി​ക​ളാ​ണു​ള്ളത്‌. മുടി ചീകു​ന്ന​തിന്‌ അവ വ്യത്യസ്‌ത വശങ്ങളി​ലേക്കു തിരി​ക്കാ​നും കഴിയും.”

കുടും​ബ​ത്തി​ന്റെ പിന്തുണ—“ഒരു ശക്തിദുർഗം”

ബ്രസീ​ലിൽനി​ന്നുള്ള കാർള പറയുന്നു: “എന്റെ ഭർത്താ​വി​ന്റെ പിന്തുണ ഒരു പ്രധാന ഘടകമാ​യി​രു​ന്നി​ട്ടുണ്ട്‌. ഡോക്ടറെ കാണാൻ പോകു​മ്പോൾ അദ്ദേഹ​വും കൂടെ വന്നിരു​ന്നത്‌ എനി​ക്കൊ​രു ധൈര്യ​മാ​യി​രു​ന്നു. ഈ രോഗം എന്റെ ശരീരത്തെ ബാധി​ക്കു​ന്നത്‌ എങ്ങനെ​യാ​ണെ​ന്നും അതിന്റെ ലക്ഷണങ്ങൾ എന്തൊ​ക്കെ​യാ​ണെ​ന്നും എന്തു ചികി​ത്സ​യാണ്‌ ആവശ്യ​മാ​യി​രി​ക്കു​ന്ന​തെ​ന്നും ഞങ്ങൾ രണ്ടു​പേ​രും ഒരുമി​ച്ചു മനസ്സി​ലാ​ക്കി. ഞാൻ എന്താണ്‌ അനുഭ​വി​ക്കു​ന്ന​തെന്ന്‌ അദ്ദേഹ​ത്തി​നു മനസ്സി​ലാ​ക്കാൻ കഴിഞ്ഞി​രു​ന്ന​തി​നാൽ എനിക്കു വളരെ ആശ്വാസം തോന്നി.” അതേ, തന്റെ ഇണയുടെ പരിമി​തി​കൾ അംഗീ​ക​രി​ക്കു​ക​യും അവയെ കുറിച്ചു കൂടുതൽ മനസ്സി​ലാ​ക്കാൻ തയ്യാറാ​കു​ക​യും ചെയ്യുന്ന ഭർത്താ​ക്ക​ന്മാർക്കും ഭാര്യ​മാർക്കും ശക്തിയു​ടെ​യും പിന്തു​ണ​യു​ടെ​യും ഒരു വലിയ ഉറവ്‌ ആയിരി​ക്കാൻ കഴിയും.

ഉദാഹ​ര​ണ​ത്തിന്‌, ആർ​ത്രൈ​റ്റിസ്‌ മൂലം ഭർത്താ​വിന്‌ തന്റെ നിർമാണ ജോലി വെട്ടി​ക്കു​റ​യ്‌ക്കേണ്ടി വന്നപ്പോൾ ബെറ്റ്‌ ശുചീ​കരണ ജോലി​കൾ ഏറ്റെടു​ത്തു. കാസു​മീ​യു​ടെ ഭർത്താവ്‌ അവരെ പരിച​രി​ക്കുക മാത്രമല്ല അവർക്കു ചെയ്യാൻ കഴിയാത്ത വീട്ടു​ജോ​ലി​കൾ ചെയ്‌തു കൊടു​ക്കു​ക​യും ചെയ്‌തു. കൂടാതെ, തങ്ങളാ​ലാ​കുന്ന വിധങ്ങ​ളിൽ സഹായി​ക്കാൻ അദ്ദേഹം കുട്ടി​ക​ളെ​യും പരിശീ​ലി​പ്പി​ച്ചു. കാസുമീ ഇങ്ങനെ പറയുന്നു: “എന്റെ ഭർത്താവ്‌ ഒരു ശക്തിദുർഗം ആയിരു​ന്നി​ട്ടുണ്ട്‌. അദ്ദേഹ​ത്തി​ന്റെ സഹായം ഇല്ലായി​രു​ന്നെ​ങ്കിൽ എന്റെ അവസ്ഥ ഇതിലും എത്രയോ വഷളാ​യി​രു​ന്നേനേ.”

ഓസ്‌​ട്രേ​ലി​യ​ക്കാ​രി​യായ കാരൾ ഈ മുന്നറി​യി​പ്പു നൽകുന്നു: “നിങ്ങളു​ടെ പട്ടിക​യിൽ കൂടുതൽ പ്രവർത്ത​നങ്ങൾ തിക്കി​ക്കൊ​ള്ളി​ക്കാ​തി​രി​ക്കാൻ ശ്രദ്ധി​ക്കുക. കുടും​ബ​ത്തോ​ടൊ​പ്പം നീങ്ങാൻ കഴിഞ്ഞി​ല്ലെ​ങ്കിൽ പെട്ടെ​ന്നു​തന്നെ എന്നെ​ക്കൊണ്ട്‌ ഒന്നിനും കൊള്ളില്ല എന്ന ചിന്ത എനിക്കു​ണ്ടാ​കു​ന്നു.” യഥാർഥ ഗ്രാഹ്യ​ത്തോ​ടും പരിഗ​ണ​ന​യോ​ടും​കൂ​ടെ നൽക​പ്പെ​ടുന്ന കുടുംബ പിന്തു​ണ​യ്‌ക്ക്‌ രോഗി​യെ സംബന്ധി​ച്ചി​ട​ത്തോ​ളം ഒരു ശക്തിദുർഗം ആയിരി​ക്കാൻ കഴിയും.

ആത്മീയ സഹായം

കാറ്റ്യാ പറയുന്നു: “ഇത്തരം രോഗ​മുള്ള ഒരു വ്യക്തി താൻ എന്താണ്‌ അനുഭ​വി​ക്കു​ന്ന​തെന്ന്‌ ആർക്കും മനസ്സി​ലാ​വില്ല എന്ന്‌ ദൃഢമാ​യി വിശ്വ​സി​ക്കു​ന്നു. അതിനാൽ യഹോ​വ​യാം ദൈവ​ത്തിന്‌ നമ്മുടെ ശാരീ​രി​ക​വും വൈകാ​രി​ക​വു​മായ അവസ്ഥ നന്നായി മനസ്സി​ലാ​കു​മെന്ന്‌ അറിഞ്ഞു​കൊണ്ട്‌ അവനി​ലേക്കു തിരി​യു​ന്നതു വളരെ പ്രധാ​ന​മാണ്‌. (സങ്കീർത്തനം 31:7) അവനു​മാ​യുള്ള നല്ല ബന്ധം, രോഗ​ത്താൽ കഷ്ടപ്പെ​ടു​മ്പോ​ഴും ഏറെക്കു​റെ ശാന്തമായ ഒരു ജീവിതം നയിക്കാൻ ആവശ്യ​മായ മാനസിക സമാധാ​നം എനിക്കു നൽകി​യി​രി​ക്കു​ന്നു.” ബൈബിൾ ഉചിത​മാ​യി​ത്തന്നെ യഹോ​വയെ ‘[നമുക്കുള്ള] കഷ്ടത്തിൽ ഒക്കെയും [നമ്മെ] ആശ്വസി​പ്പി​ക്കുന്ന സർവ്വാ​ശ്വാ​സ​വും നല്‌കുന്ന ദൈവം’ എന്നു വിളി​ക്കു​ന്നു.—2 കൊരി​ന്ത്യർ 1:3, 4.

അതു​കൊണ്ട്‌, മാറാത്ത വേദന​യു​മാ​യി മല്ലിടുന്ന ഒരു വ്യക്തിയെ സംബന്ധി​ച്ചി​ട​ത്തോ​ളം പ്രാർഥ​ന​യ്‌ക്ക്‌ ആശ്വാ​സ​ത്തി​ന്റെ ഒരു വലിയ ഉറവ്‌ ആയിരി​ക്കാൻ കഴിയും. കാസുമീ പറയുന്നു: “വേദന കാരണം ഉറങ്ങാൻ കഴിയാ​തെ കിടക്കുന്ന നീണ്ട രാത്രി​ക​ളിൽ ഞാൻ കണ്ണീ​രോ​ടെ യഹോ​വ​യു​ടെ മുമ്പാകെ ഹൃദയം തുറന്നി​ട്ടുണ്ട്‌. വേദന സഹിക്കു​ന്ന​തി​നുള്ള ശക്തിക്കാ​യും എന്റെ എല്ലാ ബുദ്ധി​മു​ട്ടു​ക​ളെ​യും നേരി​ടാൻ ആവശ്യ​മായ ജ്ഞാനത്തി​നാ​യും ഞാൻ അവനോട്‌ അപേക്ഷി​ച്ചി​രി​ക്കു​ന്നു. യഹോവ തീർച്ച​യാ​യും എനിക്ക്‌ ഉത്തരമ​രു​ളി​യി​ട്ടുണ്ട്‌.” ഫ്രാൻസി​സ്‌കാ​യും ഇതു​പോ​ലെ ദൈവ​ത്തി​ന്റെ സ്‌നേ​ഹ​പൂർവ​ക​മായ പിന്തുണ അനുഭ​വി​ച്ച​റി​ഞ്ഞി​രി​ക്കു​ന്നു. അവർ പറയുന്നു: “‘എന്നെ ശക്തനാ​ക്കു​ന്നവൻ മുഖാ​ന്തരം ഞാൻ സകലത്തി​ന്നും മതിയാ​കു​ന്നു’ എന്ന ഫിലി​പ്പി​യർ 4:13-ലെ വാക്കു​ക​ളു​ടെ നിവൃത്തി ഞാൻ കണ്ടിരി​ക്കു​ന്നു.”

മിക്ക​പ്പോ​ഴും യഹോ​വ​യാം ദൈവം തന്റെ ക്രിസ്‌തീയ സഭയി​ലൂ​ടെ പിന്തുണ പ്രദാനം ചെയ്യുന്നു. ഉദാഹ​ര​ണ​ത്തിന്‌, യഹോ​വ​യു​ടെ സാക്ഷി​ക​ളു​ടെ പ്രാ​ദേ​ശിക സഭയിലെ ആത്മീയ സഹോ​ദ​രീ​സ​ഹോ​ദ​ര​ന്മാ​രിൽനി​ന്നു ലഭിച്ച സഹായത്തെ കുറിച്ച്‌ ഗെയ്‌ൽ പറയുന്നു: “അവരുടെ സ്‌നേഹം വിഷാ​ദ​ത്തിന്‌ അടി​പ്പെ​ടാ​തി​രി​ക്കാൻ എന്നെ സഹായി​ച്ചു.” സമാന​മാ​യി “നിങ്ങളു​ടെ ജീവി​ത​ത്തിൽ നല്ലത്‌ എന്നു പറയാൻ കഴിയുന്ന എന്തെങ്കി​ലും ഉണ്ടോ?” എന്നു ചോദി​ച്ച​പ്പോൾ കേയ്‌ക്കോ മറുപടി പറഞ്ഞത്‌ ഇങ്ങനെ​യാണ്‌: “ഉണ്ട്‌, സഭയിലെ എല്ലാവ​രും എന്നോടു കാണി​ക്കുന്ന സ്‌നേ​ഹ​വും സഹാനു​ഭൂ​തി​യും!”

യഹോ​വ​യു​ടെ സാക്ഷി​ക​ളു​ടെ സഭകളിൽ ഇത്തരം പിന്തുണ നൽകുന്ന കാര്യ​ത്തിൽ മേൽവി​ചാ​ര​ക​ന്മാർ മുൻകൈ എടുക്കു​ന്നു. സെറ്റ്‌സൂ​ക്കോ പറയുന്നു: “മൂപ്പന്മാർ ശ്രദ്ധി​ക്കു​ക​യും ആശ്വസി​പ്പി​ക്കു​ക​യും ചെയ്യു​മ്പോൾ രോഗ​വു​മാ​യി മല്ലിടുന്ന വ്യക്തി​യു​ടെ​മേൽ എത്ര വലിയ ഫലമാ​ണു​ള്ള​തെന്ന്‌ പറഞ്ഞറി​യി​ക്കാ​നാ​വില്ല.” എന്നിരു​ന്നാ​ലും ഒരു ആർ​ത്രൈ​റ്റിസ്‌ രോഗി​യായ ഡാന്യേൽ നമ്മെ ഓർമി​പ്പി​ക്കു​ന്നതു പോലെ “നാം അനുവ​ദി​ച്ചാൽ മാത്രമേ നമ്മുടെ ആത്മീയ സഹോ​ദ​ര​ങ്ങൾക്ക്‌ നമ്മെ സഹായി​ക്കാ​നാ​കൂ.” അതു​കൊണ്ട്‌ സഭാ​യോ​ഗ​ങ്ങൾക്കു ഹാജരാ​കാൻ എല്ലാ ശ്രമവും ചെയ്‌തു​കൊണ്ട്‌ സഹക്രി​സ്‌ത്യാ​നി​ക​ളു​മാ​യി ബന്ധം പുലർത്തു​ന്നത്‌ രോഗി​കളെ സംബന്ധി​ച്ചി​ട​ത്തോ​ളം വളരെ പ്രധാ​ന​മാണ്‌. (എബ്രായർ 10:24, 25) അവിടെ അവർക്കു സഹിച്ചു​നിൽക്കാൻ ആവശ്യ​മായ പ്രോ​ത്സാ​ഹനം ലഭിക്കും.

ദുരിതം അവസാ​നി​ക്കും

ആർ​ത്രൈ​റ്റിസ്‌ രോഗി​കൾ വൈദ്യ​ശാ​സ്‌ത്രം കൈവ​രി​ച്ചി​രി​ക്കുന്ന എല്ലാ നേട്ടങ്ങൾക്കും നന്ദിയു​ള്ള​വ​രാണ്‌. എന്നിരു​ന്നാ​ലും ലഭ്യമായ ഏറ്റവും നല്ല ചികി​ത്സ​യ്‌ക്കു പോലും രോഗത്തെ പൂർണ​മാ​യി ഭേദമാ​ക്കാൻ കഴിയു​ന്നില്ല. ഒരു പുതിയ ലോകത്തെ കുറി​ച്ചുള്ള ദൈവ​ത്തി​ന്റെ വാഗ്‌ദാ​ന​ങ്ങ​ളിൽ വിശ്വാ​സം അർപ്പി​ക്കു​ന്ന​തി​ലൂ​ടെ രോഗി​കൾക്കു വലിയ ആശ്വാസം കണ്ടെത്താൻ കഴിയും.b (യെശയ്യാ​വു 33:24; വെളി​പ്പാ​ടു 21:3-5) ആ ലോക​ത്തിൽ “മുടന്തൻ മാനി​നെ​പ്പോ​ലെ ചാടും.” (യെശയ്യാ​വു 35:6) ആർ​ത്രൈ​റ്റി​സും മനുഷ്യ​വർഗത്തെ ബാധി​ക്കുന്ന മറ്റെല്ലാ രോഗ​ങ്ങ​ളും എന്നെ​ന്നേ​ക്കു​മാ​യി പൊയ്‌പ്പോ​യി​രി​ക്കും! സ്‌​പൈനൽ ആർ​ത്രൈ​റ്റിസ്‌ ഉള്ള പീറ്റർ പറയുന്നു: “ഞാൻ സഞ്ചരി​ച്ചു​കൊ​ണ്ടി​രി​ക്കുന്ന ഈ ഇരുണ്ട തുരങ്ക​ത്തി​ന്റെ അങ്ങേയ​റ്റത്ത്‌ എനിക്കു വെളിച്ചം കാണാൻ കഴിയു​ന്നുണ്ട്‌.” സമാന​മാ​യി, ഒരു ക്രിസ്‌ത്യാ​നി​യായ ജൂലി​യാന പറയുന്നു: “കഴിഞ്ഞു പോകുന്ന ഓരോ ദിവസ​ത്തെ​യും ഒരു യുദ്ധ വിജയ​മാ​യാണ്‌ ഞാൻ കാണു​ന്നത്‌. അന്ത്യം വരുന്ന​തി​നു മുമ്പ്‌ തരണം ചെയ്യേണ്ട ദിവസ​ങ്ങ​ളിൽ ഒന്നു കുറവ്‌!” അതേ, ആർ​ത്രൈ​റ്റിസ്‌ മാത്രമല്ല എല്ലാ കഷ്ടപ്പാ​ടു​ക​ളും നീക്കം ചെയ്യ​പ്പെ​ടാ​നുള്ള സമയം ആസന്നമാ​യി​രി​ക്കു​ന്നു! (g01 12/08)

[അടിക്കു​റി​പ്പു​കൾ]

[10-ാം പേജിലെ ചിത്രങ്ങൾ]

ഫലപ്രദമായ ജീവിതം നയിക്കാൻ രോഗി​കളെ സഹായി​ക്കുന്ന നിരവധി ഉപകര​ണങ്ങൾ ലഭ്യമാണ്‌

[12-ാം പേജിലെ ചിത്രം]

ക്രിസ്‌തീയ യോഗ​ങ്ങ​ളിൽ സ്‌നേ​ഹ​പൂർവ​ക​മായ പിന്തുണ ലഭിക്കു​ന്നു