യുവജ​നങ്ങൾ ചോദി​ക്കു​ന്നു . . .

മറ്റുള്ള​വ​രിൽ നിന്നുള്ള സമ്മർദത്തെ എനിക്ക്‌ എങ്ങനെ തരണം ചെയ്യാൻ കഴിയും?

“മറ്റുള്ള​വ​രിൽ നിന്നുള്ള സമ്മർദം എല്ലായി​ട​ത്തു​മുണ്ട്‌.”—പതിനാ​റു​കാ​ര​നായ ജെസി.

“ഞാൻ വളർന്നു​വ​രവേ അഭിമു​ഖീ​ക​രി​ക്കേ​ണ്ടി​വന്ന ഏറ്റവും ദുഷ്‌ക​ര​മായ പ്രശ്‌ന​ങ്ങ​ളി​ലൊന്ന്‌ സ്‌കൂ​ളി​ലെ സഹപാ​ഠി​ക​ളിൽ നിന്നുള്ള സമ്മർദം ആയിരു​ന്നു.”—21 വയസ്സുള്ള ജോനഥൻ

മറ്റുള്ള​വ​രിൽ നിന്നുള്ള സമ്മർദം നാം ഗൗരവ​മാ​യി കാണേണ്ട ഒരു പ്രശ്‌നം​ത​ന്നെ​യാണ്‌. എങ്കിലും അതിനെ ചെറു​ത്തു​നിൽക്കുക സാധ്യ​മാണ്‌. വാസ്‌ത​വ​ത്തിൽ നിങ്ങൾക്ക്‌ അത്തരം സമ്മർദത്തെ വിജയ​ക​ര​മാ​യി കൈകാ​ര്യം ചെയ്യാൻ, എന്തിന്‌ അതിൽനി​ന്നു പ്രയോ​ജനം നേടാൻ പോലും കഴിയും. എങ്ങനെ?

ഈ ലേഖന പരമ്പര​യു​ടെ കഴിഞ്ഞ ലക്കത്തിൽ, മറ്റുള്ള​വ​രിൽ നിന്നുള്ള സമ്മർദത്തെ ചെറു​ക്കു​ന്ന​തി​നു നാം സ്വീക​രി​ക്കേണ്ട ആദ്യ പടിയെ കുറിച്ച്‌ ഞങ്ങൾ വിശദ​മാ​യി പ്രതി​പാ​ദി​ച്ചി​രു​ന്നു. മറ്റുള്ള​വ​രിൽ നിന്നുള്ള സമ്മർദ​ത്തി​നു നിങ്ങളിൽ സ്വാധീ​നം ചെലു​ത്താൻ കഴിയും എന്ന വസ്‌തുത അംഗീ​ക​രി​ക്കു​ന്ന​തും നിങ്ങൾ ആ സമ്മർദ​ത്തി​നു വഴങ്ങാൻ എത്ര​ത്തോ​ളം സാധ്യ​ത​യുണ്ട്‌ എന്നു തിരി​ച്ച​റി​യു​ന്ന​തു​മാണ്‌ അതിൽ ഉൾപ്പെ​ട്ടി​രി​ക്കു​ന്നത്‌.a ക്രിയാ​ത്മ​ക​മായ മറ്റെന്തു നടപടി നിങ്ങൾക്കു സ്വീക​രി​ക്കാൻ കഴിയും? നിങ്ങൾക്കാ​വ​ശ്യ​മായ സഹായം പ്രദാനം ചെയ്യുന്ന മാർഗ​നിർദേ​ശങ്ങൾ ദൈവ​വ​ച​ന​ത്തി​ലുണ്ട്‌. സദൃശ​വാ​ക്യ​ങ്ങൾ 24:5 ഇങ്ങനെ പറയുന്നു: “പരിജ്ഞാ​ന​മു​ള്ളവൻ ബലം വർദ്ധി​പ്പി​ക്കു​ന്നു.” മറ്റുള്ള​വ​രിൽ നിന്നുള്ള സമ്മർദത്തെ ചെറു​ക്കാ​നുള്ള നിങ്ങളു​ടെ കഴിവി​നെ ബലപ്പെ​ടു​ത്തുന്ന എന്തുതരം പരിജ്ഞാ​ന​മാ​ണു​ള്ളത്‌? അതിനുള്ള ഉത്തരം കാണു​ന്ന​തി​നു മുമ്പ്‌, ഇത്തരം സമ്മർദം നിങ്ങളെ കീഴ്‌പെ​ടു​ത്താൻ ഇടയാ​ക്കി​യേ​ക്കാ​വുന്ന ഒരു ഘടകത്തെ കുറിച്ച്‌ നമുക്ക്‌ ആദ്യം ചർച്ച​ചെ​യ്യാം.

ആത്മവി​ശ്വാ​സ​ത്തി​ന്റെ അഭാവം—ഒരു അപകടം

യഹോ​വ​യു​ടെ സാക്ഷി​ക​ളായ യുവജ​ന​ങ്ങൾക്ക്‌, മറ്റുള്ള​വ​രിൽ നിന്നുള്ള സമ്മർദം ചില​പ്പോൾ ഒരു പ്രത്യേക വെല്ലു​വി​ളി ഉയർത്തു​ന്ന​താ​യി തോന്നു​ന്നു. മറ്റുള്ള​വ​രു​മാ​യി തങ്ങളുടെ വിശ്വാ​സം പങ്കു​വെ​ക്കേണ്ടി വരു​മ്പോ​ഴാ​ണിത്‌. (മത്തായി 28:19, 20) നിങ്ങളു​ടെ വിശ്വാ​സ​ത്തെ​ക്കു​റി​ച്ചു മറ്റു ചെറു​പ്പ​ക്കാ​രോ​ടു പറയു​ന്നത്‌ ദുഷ്‌ക​ര​മാ​യി ചില​പ്പോ​ഴൊ​ക്കെ നിങ്ങൾക്കു തോന്നി​യി​ട്ടു​ണ്ടോ? ഉണ്ടെങ്കിൽ ഇക്കാര്യ​ത്തിൽ നിങ്ങൾ ഒറ്റയ്‌ക്കല്ല. 18 വയസ്സുള്ള മെലാനീ പറയു​ന്നതു ശ്രദ്ധിക്കൂ: “ഞാൻ ഒരു സാക്ഷി​യാ​ണെന്നു മറ്റു യുവജ​ന​ങ്ങ​ളോ​ടു പറയേ​ണ്ടി​വ​ന്ന​പ്പോൾ അതു വിചാ​രി​ച്ച​തി​ലു​മ​ധി​കം ബുദ്ധി​മു​ട്ടാ​യി​രു​ന്നു. ധൈര്യം സംഭരി​ച്ചു ഞാനതു പറയാൻ ഒരുങ്ങു​മ്പോ​ഴേ​ക്കും എനിക്കു പിന്നെ​യും ഭയമാ​കും.” സമപ്രാ​യ​ക്കാ​രിൽ നിന്നുള്ള തെറ്റാ​യ​തരം സമ്മർദ​ത്തി​ന്റെ സ്വാധീ​നം, തന്റെ വിശ്വാ​സ​ത്തെ​ക്കു​റി​ച്ചു സംസാ​രി​ക്കു​ന്ന​തിൽ നിന്ന്‌ അവളെ പിന്തി​രി​പ്പി​ച്ചു.

വിശ്വ​സ്‌ത​ത​യു​ടെ കാര്യ​ത്തിൽ ശ്രദ്ധേ​യ​മായ ദൃഷ്ടാന്തം കാഴ്‌ച​വെച്ച സ്‌ത്രീ​പു​രു​ഷ​ന്മാർപോ​ലും ദൈവ​ത്തെ​ക്കു​റിച്ച്‌ ആളുക​ളോ​ടു സംസാ​രി​ക്കു​ന്ന​തിൽ മടി കാണി​ച്ചി​ട്ടുണ്ട്‌ എന്ന്‌ ബൈബിൾ വ്യക്തമാ​ക്കു​ന്നു. യിരെ​മ്യാ​വി​ന്റെ കാര്യം​തന്നെ പരിചി​ന്തി​ക്കുക. ആളുക​ളോ​ടു ധൈര്യ​സ​മേതം തന്റെ സന്ദേശം അറിയി​ക്കാൻ ദൈവം അവനോട്‌ ആവശ്യ​പ്പെട്ടു. അത്‌ അനുസ​രി​ച്ചാൽ പരിഹാ​സ​വും പീഡന​വും ഉണ്ടാകു​മെന്ന്‌ യുവാ​വായ യിരെ​മ്യാ​വിന്‌ അറിയാ​മാ​യി​രു​ന്നു. കൂടാതെ അവന്‌ ആത്മവി​ശ്വാ​സ​വും കുറവാ​യി​രു​ന്നു. എന്തു​കൊണ്ട്‌? അവൻ ദൈവ​ത്തോട്‌ ഇപ്രകാ​രം പറഞ്ഞു: “എനിക്കു സംസാ​രി​പ്പാൻ അറിഞ്ഞു​കൂ​ടാ; ഞാൻ ബാലന​ല്ലോ.” ഒരു ബാലനാ​യ​തി​നാൽ ആ നിയോ​ഗം ഏറ്റെടു​ക്കാൻ താൻ പ്രാപ്‌ത​ന​ല്ലെന്ന്‌ യിരെ​മ്യാ​വു പറഞ്ഞു. എന്നാൽ ദൈവം അതി​നോ​ടു യോജി​ച്ചോ? ഇല്ല. യഹോവ അവന്‌ ഈ ഉറപ്പു നൽകി: “‘ഞാൻ ബാലൻ’ എന്നു നീ പറയരു​തു.” ആ യുവാവ്‌ വിമുഖത പ്രകടി​പ്പി​ച്ചെ​ങ്കി​ലും ഒരു സുപ്ര​ധാന നിയോ​ഗം നൽകി​ക്കൊണ്ട്‌ യഹോവ തന്റെ ഉദ്ദേശ്യ പ്രകാ​രം​തന്നെ മുന്നോ​ട്ടു പോയി.—യിരെ​മ്യാ​വു 1:6, 7.

നമുക്ക്‌ ആത്മവി​ശ്വാ​സം കുറവാ​ണെ​ങ്കിൽ നമ്മെക്കു​റി​ച്ചു തന്നെ ഒരു അനിശ്ചി​ത​ത്വം തോന്നാ​നി​ട​യുണ്ട്‌. അപ്പോൾ പുറത്തു നിന്നുള്ള സമ്മർദത്തെ ചെറു​ത്തു​നിൽക്കാൻ നമുക്ക്‌ ഏറെ ബുദ്ധി​മു​ട്ടു തോന്നി​യേ​ക്കാം. ഗവേഷണ ഫലങ്ങൾ ഇതു ശരി​വെ​ക്കു​ന്നു. ഉദാഹ​ര​ണ​ത്തിന്‌, 1937-ൽ മുസാ​ഫെർ ഷെരീഫ്‌ എന്ന ടർക്കിഷ്‌-അമേരി​ക്കൻ ശാസ്‌ത്രജ്ഞൻ പ്രസി​ദ്ധ​മാ​യൊ​രു പരീക്ഷണം നടത്തി. അദ്ദേഹം കുറെ​പ്പേരെ ഒരു ഇരുട്ടു​മു​റി​യിൽ അടച്ചിട്ടു. എന്നിട്ട്‌ ഒരു പ്രകാ​ശ​ബി​ന്ദു കാണിച്ചു. ആ പ്രകാ​ശ​ബി​ന്ദു അവിടെ നിന്ന്‌ എത്ര ദൂരം നീങ്ങി​യി​ട്ടു​ണ്ടെന്ന്‌ അവരോ​ടു ചോദി​ച്ചു.

വാസ്‌ത​വ​ത്തിൽ അതു നിശ്ചല​മാ​യി​രു​ന്നു. നീങ്ങുന്നു എന്നത്‌ വെറും ഒരു തോന്നൽ ആയിരു​ന്നു. ഓരോ​രു​ത്ത​രോ​ടാ​യി ചോദി​ച്ച​പ്പോൾ അവരെ​ല്ലാം സ്വന്ത അഭി​പ്രാ​യങ്ങൾ പറഞ്ഞു, വ്യത്യ​സ്‌ത​ങ്ങ​ളായ അഭി​പ്രാ​യങ്ങൾ. പിന്നീട്‌ അദ്ദേഹം എല്ലാവ​രെ​യും ഒന്നിച്ചു നിറുത്തി ഓരോ​രു​ത്ത​രു​ടെ​യും അഭി​പ്രാ​യങ്ങൾ ഉറക്കെ​പ്പ​റ​യാൻ ആവശ്യ​പ്പെട്ടു. എന്തു സംഭവി​ച്ചു? തങ്ങൾ എത്തി​ച്ചേർന്ന നിഗമ​നങ്ങൾ ആത്മവി​ശ്വാ​സ​ത്തോ​ടെ വിളി​ച്ചു​പ​റ​യാൻ അവർക്കാ​യില്ല. അവർ പരസ്‌പരം സ്വാധീ​നി​ക്ക​പ്പെട്ടു. പരീക്ഷണം ആവർത്തി​ച്ച​പ്പോൾ അവരുടെ അഭി​പ്രാ​യ​ങ്ങ​ളും ഏകീഭ​വി​ച്ചു. അങ്ങനെ ആ കൂട്ടത്തിന്‌ ഒരു “പൊതു അഭി​പ്രായ”മുണ്ടായി. അതിനു​ശേഷം ഓരോ​രു​ത്ത​രോ​ടാ​യി വീണ്ടും അഭി​പ്രാ​യം ആരാഞ്ഞ​പ്പോ​ഴും കൂട്ടത്തി​ന്റെ പൊതു അഭി​പ്രാ​യ​ത്തോ​ടു പറ്റിനിൽക്കാ​നുള്ള പ്രവണ​ത​യാ​യി​രു​ന്നു ഭൂരി​പ​ക്ഷ​ത്തി​നും.

ഈ പരീക്ഷണം ഒരു സുപ്ര​ധാന വസ്‌തുത വ്യക്തമാ​ക്കു​ന്നു. അതായത്‌, ഉറച്ച ബോധ്യ​മോ ആത്മവി​ശ്വാ​സ​മോ ഇല്ലാത്ത​പ്പോൾ ആളുകൾ മറ്റുള്ള​വ​രാൽ സ്വാധീ​നി​ക്ക​പ്പെ​ടാൻ ഏറെ സാധ്യ​ത​യുണ്ട്‌. അത്‌ ഗൗരവ​മുള്ള ഒരു സംഗതി​യാണ്‌, അല്ലേ? ഇനി, ഗൗരവ​മായ പരിചി​ന്തനം അർഹി​ക്കുന്ന ചില സുപ്ര​ധാന കാര്യ​ങ്ങ​ളിൽ, അതായത്‌, വിവാ​ഹ​ത്തി​നു മുമ്പേ​യുള്ള ലൈം​ഗി​കത, മയക്കു​മ​രു​ന്നി​ന്റെ ദുരു​പ​യോ​ഗം, പിന്തു​ട​രേണ്ട ജീവിത ലക്ഷ്യങ്ങൾ എന്നിവ​യി​ലൊ​ക്കെ മറ്റുള്ള​വ​രിൽ നിന്നുള്ള സമ്മർദം ഒരു വില്ല​നെ​പ്പോ​ലെ കടന്നു​വ​രാ​റുണ്ട്‌. ഇത്തരം സന്ദർഭ​ങ്ങ​ളി​ലും ‘പൊതു​ജ​നാ​ഭി​പ്രാ​യം’ പിന്തു​ട​രു​ന്നെ​ങ്കിൽ നാം സ്വന്തം ഭാവി​ക്കു​തന്നെ തുരങ്കം വെക്കു​ക​യാ​യി​രി​ക്കും. (പുറപ്പാ​ടു 23:2) അങ്ങനെ​യെ​ങ്കിൽ നമുക്ക്‌ എന്തു ചെയ്യാൻ കഴിയും?

മേൽപ്പറഞ്ഞ പരീക്ഷ​ണ​ത്തിൽ, പ്രകാ​ശ​ബി​ന്ദു നിശ്ചല​മാ​ണെന്നു നിങ്ങൾക്ക്‌ ഉറപ്പു​ണ്ടാ​യി​രു​ന്നെ​ങ്കിൽ നിങ്ങൾ എന്തു ചെയ്യു​മാ​യി​രു​ന്നു? നിങ്ങൾ അതു തുറന്നു പറയു​മാ​യി​രു​ന്നോ? തീർച്ച​യാ​യും, മറ്റുള്ള​വ​രാൽ സ്വാധീ​നി​ക്ക​പ്പെ​ടാ​തി​രി​ക്കാൻ നമുക്ക്‌ ആത്മവി​ശ്വാ​സം ഉണ്ടായി​രി​ക്കണം. എന്തുതരം ആത്മവി​ശ്വാ​സം? നമുക്ക്‌ അതെങ്ങനെ നേടാൻ കഴിയും?

യഹോ​വ​യിൽ ആശ്രയി​ക്കു​ക

ആത്മവി​ശ്വാ​സം വളർത്തി​യെ​ടു​ക്കു​ന്ന​തി​നെ​പ്പറ്റി ആളുകൾ വാതോ​രാ​തെ സംസാ​രി​ക്കു​ന്നത്‌ ഒരുപക്ഷേ നിങ്ങൾ കേട്ടി​രി​ക്കാം. എന്നാൽ അത്‌ എപ്രകാ​രം നേടാം, ഏത്‌ അളവോ​ളം അത്‌ ഉണ്ടായി​രി​ക്കണം എന്നീ കാര്യ​ങ്ങ​ളിൽ പലരു​ടെ​യും കാഴ്‌ച​പ്പാ​ടു​കൾ വ്യത്യ​സ്‌ത​മാണ്‌, ചില​പ്പോൾ പരസ്‌പ​ര​വി​രു​ദ്ധം പോലു​മാണ്‌. എന്നാൽ ബൈബിൾ സമനി​ല​യുള്ള ഒരു വീക്ഷണം പുലർത്തു​ന്നു. അതിങ്ങനെ പറയുന്നു: “ഭാവി​ക്കേ​ണ്ട​തി​ന്നു മീതെ ഭാവി​ച്ചു​യ​രാ​തെ . . . സുബോ​ധ​മാ​കും​വണ്ണം ഭാവി​ക്കേ​ണ​മെന്നു ഞാൻ . . . നിങ്ങളിൽ ഓരോ​രു​ത്ത​നോ​ടും പറയുന്നു.” (റോമർ 12:3) ഈ വാക്യ​ത്തി​ന്റെ മറ്റൊരു പരിഭാഷ പിൻവ​രുന്ന പ്രകാ​ര​മാണ്‌: “തനിക്ക്‌ യഥാർഥ​ത്തിൽ ഉള്ളതി​ല​ധി​കം മൂല്യം തനിക്ക്‌ ഉണ്ടെന്ന്‌ ആരും ഭാവി​ക്ക​രുത്‌ എന്നു ഞാൻ നിങ്ങളിൽ ഓരോ​രു​ത്ത​രോ​ടും പറയുന്നു; മറിച്ച്‌, സമചി​ത്ത​ത​യോ​ടു കൂടി സ്വയം വിലയി​രു​ത്തുക.”—ചാൾസ്‌ ബി. വില്യംസ്‌.

നിങ്ങളു​ടെ “മൂല്യം” വസ്‌തു​നി​ഷ്‌ഠ​മാ​യി “വിലയി​രു​ത്തു”ന്നെങ്കിൽ, ദുരഭി​മാ​നം, പൊങ്ങച്ചം, അഹംഭാ​വം എന്നിങ്ങനെ അമിത ആത്മവി​ശ്വാ​സ​ത്തി​ന്റേ​തായ ലക്ഷണങ്ങൾ ഒഴിവാ​ക്കാൻ നിങ്ങൾക്കു കഴിയും. മാത്രമല്ല, സമനി​ല​യുള്ള ഒരു കാഴ്‌ച​പ്പാട്‌ ഉണ്ടെങ്കിൽ, നേരാം​വണ്ണം ചിന്തി​ക്കാ​നും ന്യായ​വാ​ദം ചെയ്യാ​നും ജ്ഞാനപൂർവ​ക​മായ തീരു​മാ​നം എടുക്കാ​നും ആവശ്യ​മായ ആത്മവി​ശ്വാ​സ​വും നിങ്ങൾക്ക്‌ ഉണ്ടായി​രി​ക്കും. സ്രഷ്ടാവ്‌ നിങ്ങൾക്കു ‘ന്യായ​ബോ​ധം’ നൽകി​യി​ട്ടുണ്ട്‌. അതു നിസ്സാ​ര​മാ​യി കാണേണ്ട ഒന്നല്ല, മറിച്ച്‌ മൂല്യ​വ​ത്തായ ഒരു സമ്മാന​മാണ്‌. (റോമർ 12:1, NW) ഇതു മനസ്സിൽ പിടി​ക്കു​ന്നെ​ങ്കിൽ, സ്വയം തീരു​മാ​നങ്ങൾ എടുക്കാ​തെ ആ ഉത്തരവാ​ദി​ത്വം മറ്റുള്ള​വരെ ഏൽപ്പി​ക്കുന്ന പ്രവണ​തയെ ചെറു​ക്കാൻ നിങ്ങൾക്കു കഴിയും. എന്നിരു​ന്നാ​ലും നിങ്ങൾക്കു കൂടുതൽ സംരക്ഷ​ണ​മാ​യി ഉതകുന്ന മറ്റൊരു തരം ആത്മവി​ശ്വാ​സം ഉണ്ട്‌.

ദിവ്യ നിശ്വ​സ്‌ത​ത​യിൽ ദാവീ​ദ്‌രാ​ജാവ്‌ ഇങ്ങനെ എഴുതി: “യഹോ​വ​യായ കർത്താവേ, നീ എന്റെ പ്രത്യാ​ശ​യാ​കു​ന്നു; ബാല്യം​മു​തൽ നീ എന്റെ ആശ്രയം തന്നേ.” (സങ്കീർത്തനം 71:5) അതേ, ദാവീദ്‌ തന്റെ സ്വർഗീയ പിതാ​വിൽ പൂർണ ആശ്രയം വെച്ചു. ചെറുപ്പം മുതൽത്തന്നെ അവൻ അങ്ങനെ ചെയ്‌തി​രു​ന്നു. ഫെലി​സ്‌ത്യ മല്ലനായ ഗൊല്യാത്ത്‌ ദ്വന്ദ്വ​യു​ദ്ധ​ത്തി​നു യിസ്രാ​യേൽ പടയാ​ളി​കളെ വെല്ലു​വി​ളി​ച്ച​പ്പോൾ ദാവീദ്‌ ഒരു ബാലൻ അല്ലെങ്കിൽ കൗമാ​ര​പ്രാ​യ​ക്കാ​രൻ ആയിരു​ന്നി​രി​ക്കാം. ഗൊല്യാ​ത്തി​ന്റെ പോർവി​ളി​യിൽ ഭടന്മാ​രെ​ല്ലാം ഭയന്നു​പോ​യി. (1 ശമൂവേൽ 17:11, 33) സാധ്യ​ത​യ​നു​സ​രിച്ച്‌ പ്രതി​കൂല സ്വാധീ​നം ചെലു​ത്തുന്ന ഒരു സമ്മർദം അവർക്കി​ട​യി​ലും ഉണ്ടായി. ഇത്ര അതികാ​യ​നും ധൈര്യ​ശാ​ലി​യും മല്ലനു​മായ ഒരുവന്റെ വെല്ലു​വി​ളി സ്വീക​രിച്ച്‌ അവനു​മാ​യി അങ്കം കുറി​ക്കാൻമാ​ത്രം ചിത്ത​ഭ്ര​മ​മൊ​ന്നും തങ്ങൾക്കില്ല എന്നവർ പരസ്‌പരം സംസാ​രി​ച്ചി​ട്ടുണ്ട്‌ എന്നതിനു തർക്കമില്ല. അവരുടെ സംസാ​ര​ത്തിൽ ശുഭാ​പ്‌തി​വി​ശ്വാ​സം ഇല്ലായി​രു​ന്നു. എന്നാൽ ഇത്തരം സമ്മർദ​മൊ​ന്നും യുവാ​വായ ദാവീ​ദി​നെ ഒരു തരത്തി​ലും ബാധി​ച്ചില്ല. എന്തു​കൊണ്ട്‌?

ഗൊല്യാ​ത്തി​നോ​ടുള്ള ദാവീ​ദി​ന്റെ വാക്കുകൾ ശ്രദ്ധി​ക്കുക: “നീ വാളും കുന്തവും വേലു​മാ​യി എന്റെ നേരെ വരുന്നു; ഞാനോ നീ നിന്ദി​ച്ചി​ട്ടുള്ള യിസ്രാ​യേൽനി​ര​ക​ളു​ടെ ദൈവ​മായ സൈന്യ​ങ്ങ​ളു​ടെ യഹോ​വ​യു​ടെ നാമത്തിൽ നിന്റെ നേരെ വരുന്നു.” (1 ശമൂവേൽ 17:45) ഗൊല്യാ​ത്തി​ന്റെ അസാധാ​രണ വലിപ്പ​വും ശക്തിയും ആയുധ​ങ്ങ​ളും സംബന്ധി​ച്ചു ദാവീ​ദിന്‌ നല്ല ധാരണ​യു​ണ്ടാ​യി​രു​ന്നു. എന്നാൽ യഹോവ തന്നോടു കൂടെ ഉണ്ട്‌ എന്ന വസ്‌തു​ത​യിൽ അവന്‌ ഉറച്ച ബോധ്യം ഉണ്ടായി​രു​ന്നു. യഹോ​വ​യോ​ടുള്ള താരത​മ്യ​ത്തിൽ ഗൊല്യാത്ത്‌ ഒന്നുമല്ല എന്നും ദാവീ​ദിന്‌ അറിയാ​മാ​യി​രു​ന്നു. യഹോവ തന്റെ പക്ഷത്തു​ണ്ടെ​ങ്കിൽ പിന്നെ ഗൊല്യാ​ത്തി​നെ എന്തിനു ഭയപ്പെ​ടണം? ദൈവ​ത്തി​ലുള്ള അത്തരം ആശ്രയം ദാവീ​ദി​നു സുരക്ഷി​ത​ത്വ​ബോ​ധം നൽകി. മറ്റുള്ള​വ​രിൽ നിന്നുള്ള സമ്മർദ​ത്തി​ന്റെ തിരത്ത​ള്ള​ലിൽപ്പെട്ട്‌ അവൻ ആടിയു​ല​ഞ്ഞില്ല.

നിങ്ങൾക്കു യഹോ​വ​യിൽ അത്തരം ആശ്രയം ഉണ്ടോ? ദാവീ​ദി​ന്റെ നാളു​ക​ളി​ലേ​തു​പോ​ലെ​ത​ന്നെ​യാണ്‌ യഹോവ ഇന്നും. അവന്‌ ഒരു മാറ്റവു​മില്ല. (മലാഖി 3:6; യാക്കോബ്‌ 1:17) യഹോ​വ​യെ​ക്കു​റിച്ച്‌ എത്രയ​ധി​കം പഠിക്കു​ന്നു​വോ അത്രയ​ധി​ക​മാ​യി തന്റെ വചനത്തി​ലൂ​ടെ അവൻ നിങ്ങ​ളോ​ടു പറഞ്ഞി​രി​ക്കുന്ന കാര്യ​ങ്ങ​ളി​ലുള്ള നിങ്ങളു​ടെ ബോധ്യ​വും വർധി​ക്കും. (യോഹ​ന്നാൻ 17:17) ജീവി​ത​ത്തിൽ നിങ്ങളെ വഴിന​യി​ക്കു​ന്ന​തിന്‌ ആവശ്യ​മായ ആശ്രയ​യോ​ഗ്യ​വും മാറ്റമി​ല്ലാ​ത്ത​തു​മായ നിലവാ​രങ്ങൾ ദൈവ​വ​ച​ന​ത്തി​ലുണ്ട്‌. മറ്റുള്ള​വ​രിൽ നിന്നുള്ള സമ്മർദത്തെ ചെറു​ക്കാൻ അവ നിങ്ങളെ സഹായി​ക്കും. യഹോ​വയെ നിങ്ങളു​ടെ ആശ്രയ​മാ​ക്കു​ന്ന​തി​ലു​പ​രി​യാ​യി മറ്റു ചിലതും കൂടെ നിങ്ങൾക്കു ചെയ്യാ​നാ​കും.

മെച്ചപ്പെട്ട ഉപദേ​ശ​കരെ തിര​ഞ്ഞെ​ടു​ക്കു​ക

ഗുണക​ര​മായ മാർഗ​നിർദേശം തേടേ​ണ്ട​തി​ന്റെ ആവശ്യ​ത്തെ​ക്കു​റിച്ച്‌ ദൈവ​വ​ചനം ഇപ്രകാ​രം ഊന്നി​പ്പ​റ​യു​ന്നു: “വിദഗ്‌ധ​മായ മാർഗ​നിർദേശം സമ്പാദി​ക്കു​ന്ന​വ​നാ​ണു വിവേ​കി​യായ ഒരു മനുഷ്യൻ.” (സദൃശ​വാ​ക്യ​ങ്ങൾ 1:5, NW) നിങ്ങളു​ടെ ക്ഷേമത്തിൽ ആത്മാർഥ താത്‌പ​ര്യ​മുള്ള മാതാ​പി​താ​ക്കൾക്കു​തന്നെ മാർഗ​നിർദേ​ശ​ത്തി​ന്റെ ഒരു ഉറവാ​യി​രി​ക്കാൻ കഴിയും. 25 വയസ്സുള്ള ഇന്ദിര​യ്‌ക്ക്‌ ഈ വസ്‌തുത നന്നായി അറിയാം. അവൾ ഇങ്ങനെ പറയുന്നു: “എന്റെ മാതാ​പി​താ​ക്കൾ തിരു​വെ​ഴു​ത്തു​ക​ളിൽ നിന്ന്‌ എന്നോടു ന്യായ​വാ​ദം ചെയ്യുന്ന പതിവു​ണ്ടാ​യി​രു​ന്നു. അങ്ങനെ യഹോവ എനി​ക്കൊ​രു യാഥാർഥ്യ​മാ​യി​ത്തീർന്നു. അതു​കൊണ്ട്‌ ഞാനി​ന്നും സത്യത്തി​ന്റെ പാതയിൽ തുടരു​ന്നു.” നിരവധി യുവജ​ന​ങ്ങൾക്ക്‌ ഇതേ അഭി​പ്രാ​യ​മുണ്ട്‌.

നിങ്ങൾ ക്രിസ്‌തീയ സഭയിലെ ഒരംഗം ആണെങ്കിൽ, അവി​ടെ​യുള്ള മേൽവി​ചാ​ര​ക​ന്മാ​രും പക്വത​യുള്ള ക്രിസ്‌തീയ സഹോ​ദ​രീ​സ​ഹോ​ദ​ര​ന്മാ​രും സഹായ​ത്തി​ന്റെ​യും പിന്തു​ണ​യു​ടെ​യും വലിയ സ്രോ​ത​സ്സു​കൾത​ന്നെ​യാണ്‌. നാദിയ എന്ന യുവതി പറയുന്നു: “എന്റെ സഭയിലെ മൂപ്പന്മാ​രെ ഞാൻ അതിയാ​യി വിലമ​തി​ക്കു​ക​യും ആദരി​ക്കു​ക​യും ചെയ്യുന്നു. അധ്യക്ഷ​മേൽവി​ചാ​രകൻ ഒരിക്കൽ നടത്തിയ പ്രസംഗം യുവജ​ന​ങ്ങൾക്കാ​യി പ്രത്യേ​കം തയ്യാറാ​ക്കി​യ​താ​യി​രു​ന്നു. അതു കേട്ട്‌ ഞാനും എന്റെ കൂട്ടു​കാ​രി​യും അതിശ​യി​ച്ചു​പോ​യി. കാരണം ഞങ്ങളുടെ വികാ​ര​ങ്ങ​ളാണ്‌ അദ്ദേഹം അതേപടി പ്രസം​ഗ​ത്തിൽ അവതരി​പ്പി​ച്ചത്‌.”

നമ്മു​ടെ​മേൽ പ്രതി​കൂല സ്വാധീ​നം ചെലു​ത്തി​യേ​ക്കാ​വുന്ന സമ്മർദത്തെ എതിർക്കാൻ നമുക്ക്‌ ക്രിയാ​ത്മക സമ്മർദത്തെ ഉപയോ​ഗി​ക്കാൻ കഴിയും. സുഹൃ​ത്തു​ക്കളെ ജ്ഞാനപൂർവം തിര​ഞ്ഞെ​ടു​ക്കു​ന്നെ​ങ്കിൽ നല്ല ലക്ഷ്യങ്ങ​ളോ​ടും ശരിയായ നിലവാ​ര​ങ്ങ​ളോ​ടു​മൊ​ക്കെ പറ്റിനിൽക്കാൻ അവരുടെ പിന്തുണ നിങ്ങൾക്ക്‌ ഉണ്ടായി​രി​ക്കും. എങ്ങനെ​യാണ്‌ നല്ല സുഹൃ​ത്തു​ക്കളെ തിര​ഞ്ഞെ​ടു​ക്കാ​നാ​വുക? ഈ ബുദ്ധി​യു​പ​ദേശം മനസ്സിൽ പിടി​ക്കുക: “ജ്ഞാനി​ക​ളോ​ടു​കൂ​ടെ നടക്കു​ന്നവൻ ജ്ഞാനി​യാ​യി​ത്തീ​രും, എന്നാൽ മൂഢൻമാ​രോട്‌ ഇടപാ​ടു​ക​ളു​ള്ളവൻ ചീത്തയാ​കും.” (സദൃശ​വാ​ക്യ​ങ്ങൾ 13:20, NW) നാദിയ തന്റെ വിദ്യാ​ല​യ​ത്തി​ലെ ജ്ഞാനി​ക​ളായ സുഹൃ​ത്തു​ക്കളെ തിര​ഞ്ഞെ​ടു​ത്തു. തന്റെ അതേ ധാർമിക നിലവാ​രങ്ങൾ പുലർത്തുന്ന സഹാരാ​ധ​ക​രാ​യി​രു​ന്നു അവർ. അവൾ ഇങ്ങനെ അനുസ്‌മ​രി​ക്കു​ന്നു: “സ്‌കൂ​ളിൽ വെച്ച്‌ സാക്ഷികൾ അല്ലാത്ത ആൺകു​ട്ടി​കൾ ഞങ്ങളോ​ടു ‘സംസാ​രി​ക്കാൻ’ ചുറ്റും കൂടി​യ​പ്പോൾ, ഞങ്ങൾ പിന്തു​ണ​യ്‌ക്കാ​യി പരസ്‌പരം ആശ്രയി​ച്ചു.” നല്ല കൂട്ടു​കാർക്കു നിങ്ങളി​ലെ അഭികാ​മ്യ​മായ ഗുണങ്ങൾ പുറത്തു​കൊ​ണ്ടു​വ​രാൻ കഴിയും. അവരെ കണ്ടെത്തു​ന്ന​തി​നാ​യി നാം ചെയ്യുന്ന ശ്രമം തക്ക മൂല്യ​മു​ള്ള​താണ്‌.

നിങ്ങൾ യഹോ​വ​യിൽ ആശ്രയി​ക്കു​ന്നെ​ങ്കിൽ, മാർഗ​നിർദേ​ശ​ത്തി​നാ​യി പക്വത​യുള്ള ക്രിസ്‌ത്യാ​നി​കളെ സമീപി​ക്കു​ന്നെ​ങ്കിൽ, സുഹൃ​ത്തു​ക്കളെ ജ്ഞാനപൂർവം തിര​ഞ്ഞെ​ടു​ക്കു​ന്നെ​ങ്കിൽ മറ്റുള്ള​വ​രിൽ നിന്നുള്ള സമ്മർദത്തെ വിജയ​ക​ര​മാ​യി തരണം ചെയ്യാൻ നിങ്ങൾക്കു തീർച്ച​യാ​യും കഴിയും. സുഹൃ​ത്തു​ക്കൾക്കി​ട​യിൽ നിങ്ങൾ ക്രിയാ​ത്മ​ക​മായ ഒരു സ്വാധീ​ന​മാ​യി​രി​ക്കും. അങ്ങനെ ജീവന്റെ പാതയിൽ നിങ്ങ​ളോ​ടൊ​പ്പ​മാ​യി​രി​ക്കു​ന്ന​തിന്‌ നിങ്ങൾക്ക്‌ അവരെ​യും സഹായി​ക്കാ​നാ​കും. (g02 12/22)

[അടിക്കു​റിപ്പ്‌]

[26-ാം പേജിലെ ആകർഷക വാക്യം]

നിങ്ങളെപ്പോലെതന്നെ, ദൈവ​ത്തെ​യും അവന്റെ നിലവാ​ര​ങ്ങ​ളെ​യും സ്‌നേ​ഹി​ക്കുന്ന നല്ല സുഹൃ​ത്തു​ക്കളെ തിര​ഞ്ഞെ​ടു​ക്കു​ക

[26-ാം പേജിലെ ചിത്രങ്ങൾ]

“മോശ​മായ സഹവാ​സങ്ങൾ പ്രയോ​ജ​ന​പ്ര​ദ​മായ ശീലങ്ങളെ പാഴാ​ക്കു​ന്നു.”—1 കൊരി​ന്ത്യർ 15:33, NW

“ജ്ഞാനി​ക​ളോ​ടു​കൂ​ടെ നടക്കു​ന്നവൻ ജ്ഞാനി​യാ​യി​ത്തീ​രും.”—സദൃശ​വാ​ക്യ​ങ്ങൾ 13:20, NW