ബൈബി​ളി​ന്റെ വീക്ഷണം

ദുശ്ശീ​ല​ങ്ങളെ മറിക​ട​ക്കാൻ സാധി​ക്കു​മോ?

എഴുത്തു​കാ​ര​നായ മാർക്‌ ട്വയിൻ ഒരിക്കൽ ഇങ്ങനെ പറഞ്ഞു: “പുകവലി നിറു​ത്തു​ന്ന​താണ്‌ ലോക​ത്തിൽ ഏറ്റവും എളുപ്പ​ത്തിൽ ചെയ്യാ​വുന്ന കാര്യം. ആയിര​ക്ക​ണ​ക്കി​നു പ്രാവ​ശ്യം ഞാൻ പുകവലി നിറു​ത്തി​യി​ട്ടു​ള്ള​തു​കൊണ്ട്‌ എനിക്ക്‌ അതു നന്നായി അറിയാം.” ഫലിത​രൂ​പേ​ണ​യു​ള്ള​തെ​ങ്കി​ലും നിരാശ നിഴലി​ക്കുന്ന ട്വയി​നി​ന്റെ ആ പ്രസ്‌താ​വ​ന​യോ​ടു പലരും യോജി​ച്ചേ​ക്കാം. അത്തരം ശീലങ്ങൾ ധർമവി​രു​ദ്ധ​വും ദോഷ​ക​ര​വു​മാ​ണെന്ന്‌ അവർക്കു നന്നായി അറിയാം. എന്നാൽ അവയെ ചെറു​ക്കു​ക​യോ ഒഴിവാ​ക്കു​ക​യോ ചെയ്യു​ന്നത്‌ വളരെ പ്രയാ​സ​മാ​ണെന്ന്‌ അവർ തിരി​ച്ച​റി​യു​ന്നു. അത്തരം ശീലങ്ങൾക്ക്‌ വർഷങ്ങ​ളു​ടെ പഴക്കമു​ണ്ടാ​കാം. അതു​കൊ​ണ്ടു​തന്നെ അവയ്‌ക്കു മാറ്റം വരുത്താ​നുള്ള ശ്രമം അത്യന്തം ദുഷ്‌ക​ര​മാ​യി​രു​ന്നേ​ക്കാം. അത്തരം തൃഷ്‌ണ​കളെ അടിച്ച​മർത്താൻ ശ്രമി​ക്കു​ന്നത്‌ ആയാസ​ക​ര​വും ഒരുപക്ഷേ വേദനാ​ജ​നകം പോലും ആയിരു​ന്നേ​ക്കാം.

ഒരിക്ക​ലും മറിക​ട​ക്കാ​നാ​വാ​ത്ത​വി​ധം തങ്ങൾ അനിയ​ന്ത്രിത വാഞ്‌ഛ​കൾക്കും അധമ മോഹ​ങ്ങൾക്കും അടി​പ്പെ​ട്ടു​പോ​യി എന്നാണ്‌ മിക്ക​പ്പോ​ഴും കുറ്റപ്പു​ള്ളി​കൾ കരുതു​ന്നത്‌ എന്ന്‌ ഒരു ജയിലി​ലെ ചികി​ത്സ​ക​നായ ഡോക്ടർ ആന്തണി ഡാനി​യേൽസ്‌ പറയുന്നു. ഒരാൾക്ക്‌ എന്തി​ലെ​ങ്കി​ലും ആസക്തി ജനിച്ചു കഴിഞ്ഞാൽ പിന്നെ “അയാൾക്ക്‌ അതിന്റെ നീരാ​ളി​പ്പി​ടി​ത്ത​ത്തിൽനി​ന്നു രക്ഷപ്പെ​ടുക സാധ്യമല്ല” എന്നാണ്‌ അവരുടെ വാദം. അത്തരം ന്യായ​വാ​ദം ശരിയാ​ണെ​ങ്കിൽ നമ്മുടെ ഏതൊരു തൃഷ്‌ണ​യെ​യും തൃപ്‌തി​പ്പെ​ടു​ത്താ​നുള്ള ശ്രമം ഒരു കുറ്റമല്ല. പക്ഷേ, നമ്മുടെ അന്തർചോ​ദ​ന​കൾക്കും അഭിലാ​ഷ​ങ്ങൾക്കും നിസ്സഹാ​യ​ത​യോ​ടെ കീഴ്‌പെ​ടു​ക​യ​ല്ലാ​തെ മറ്റൊരു മാർഗ​വു​മില്ല എന്നതു ശരിയാ​ണോ? അതോ ചീത്ത ശീലങ്ങളെ മറിക​ട​ക്കുക സാധ്യ​മാ​ണോ? ആധികാ​രി​ക​മായ ഉത്തരത്തി​നാ​യി നമുക്കു ബൈബി​ളി​ലേക്കു നോക്കാം.

വാഞ്‌ഛ​ക​ളും പ്രവൃ​ത്തി​ക​ളും

നമ്മുടെ പ്രവർത്ത​ന​ങ്ങൾക്ക്‌ ദൈവ​മു​മ്പാ​കെ നാം തന്നെയാണ്‌ ഉത്തരവാ​ദി​കൾ എന്ന്‌ ബൈബിൾ വ്യക്തമാ​ക്കു​ന്നു. (റോമർ 14:12) മാത്രമല്ല, നാം അവന്റെ നീതി​യുള്ള നിലവാ​ര​ങ്ങൾക്കൊത്ത്‌ ജീവി​ക്കാൻ അവൻ നമ്മോട്‌ ആവശ്യ​പ്പെ​ടു​ക​യും ചെയ്യുന്നു. (1 പത്രൊസ്‌ 1:15) നമ്മുടെ സ്രഷ്ടാവ്‌ എന്ന നിലയിൽ നമുക്ക്‌ മെച്ചമാ​യത്‌ എന്താ​ണെന്ന്‌ അവനറി​യാം. ഈ ലോക​ത്തിൽ സാധാ​ര​ണ​മായ പല ശീലങ്ങ​ളെ​യും അവന്റെ തത്ത്വങ്ങൾ കുറ്റം​വി​ധി​ക്കു​ന്നു. (1 കൊരി​ന്ത്യർ 6:9, 10; ഗലാത്യർ 5:19-21) എന്നിരു​ന്നാ​ലും അപൂർണ മനുഷ്യ​രോട്‌ അവൻ സഹാനു​ഭൂ​തി​യു​ള്ള​വ​നാണ്‌, അവരെ​ക്കൊ​ണ്ടു സാധി​ക്കു​ന്നതേ അവൻ അവരിൽനി​ന്നു പ്രതീ​ക്ഷി​ക്കു​ന്നു​ള്ളൂ.—സങ്കീർത്തനം 78:38; 103:13, 14.

അതു​കൊണ്ട്‌ സങ്കീർത്ത​ന​ക്കാ​രൻ ഇങ്ങനെ എഴുതി: “യഹോവേ, നീ അകൃത്യ​ങ്ങളെ ഓർമ്മ​വെ​ച്ചാൽ കർത്താവേ, ആർ നിലനി​ല്‌ക്കും?” (സങ്കീർത്തനം 130:3) ഉവ്വ്‌, ‘മനുഷ്യ​ന്റെ മനോ​നി​രൂ​പണം ബാല്യം​മു​തൽ ദോഷ​മുള്ള’താണ്‌ എന്ന്‌ യഹോ​വ​യ്‌ക്കു നന്നായി അറിയാം. (ഉല്‌പത്തി 8:21) നമ്മുടെ ജനിതക പൈതൃ​കം, സഹജമായ ദൗർബ​ല്യ​ങ്ങൾ, പൂർവാ​നു​ഭ​വങ്ങൾ എന്നിവ നിമിത്തം എല്ലാ ദുഷിച്ച ചിന്തക​ളെ​യും ആഗ്രഹ​ങ്ങ​ളെ​യും ഒഴിവാ​ക്കാൻ നമുക്കു കഴിയാ​തെ പോകു​ന്നു. അതു​കൊണ്ട്‌ സ്‌നേ​ഹ​പൂർവം, യഹോവ നമ്മിൽനി​ന്നു പൂർണത ആവശ്യ​പ്പെ​ടു​ന്നില്ല.—ആവർത്ത​ന​പു​സ്‌തകം 10:12, 13; 1 യോഹ​ന്നാൻ 5:3.

എന്നാൽ, ദൈവം കാണി​ക്കുന്ന ഈ പരിഗണന തെറ്റായ ആഗ്രഹ​ങ്ങളെ നിയ​ന്ത്രി​ക്കാ​നുള്ള ഉത്തരവാ​ദി​ത്വ​ത്തിൽനി​ന്നു നമ്മെ ഒഴിവു​ള്ള​വ​രാ​ക്കു​ന്നില്ല. തനിക്കു തന്നോ​ടു​തന്നെ ഒരു പോരാ​ട്ടം ഉണ്ട്‌ എന്ന്‌ പൗലൊസ്‌ പറഞ്ഞു. എന്നാൽ അവൻ ഒരിക്ക​ലും ആ പോരാ​ട്ട​ത്തിൽനി​ന്നു തോറ്റു​പി​ന്മാ​റി​യില്ല. (റോമർ 7:21-24) ‘ഞാൻ എന്റെ ശരീരത്തെ ദണ്ഡിപ്പി​ച്ചു അടിമ​യാ​ക്കു​ക​യ​ത്രേ ചെയ്യു​ന്നത്‌’ എന്ന്‌ അവൻ പറഞ്ഞു. ഏതു ലക്ഷ്യത്തിൽ? ‘താൻ തന്നേ കൊള്ള​രു​താ​ത്ത​വ​നാ​യി പോകാ​തി​രി​ക്കേ​ണ്ട​തിന്‌.’ (1 കൊരി​ന്ത്യർ 9:27) അതേ, നമ്മുടെ തെറ്റായ ചായ്‌വു​കൾക്കും ശീലങ്ങൾക്കും എതിരെ പൊരു​തി അവയു​ടെ​മേൽ വിജയം വരിക്കു​ന്ന​തിന്‌ ആത്മനി​യ​ന്ത്രണം അനിവാ​ര്യ​മാണ്‌.

മാറ്റം സാധ്യ​മാണ്‌

നല്ല ശീലങ്ങൾ എന്നപോ​ലെ ദുഷിച്ച ശീലങ്ങ​ളും കാല​ക്ര​മേണ ആർജി​ക്കു​ക​യും വികസി​പ്പി​ച്ചെ​ടു​ക്കു​ക​യും ചെയ്യു​ന്ന​വ​യാണ്‌ എന്ന്‌ പെരു​മാ​റ്റ​രീ​തി​കളെ കുറിച്ചു പഠിക്കുന്ന ശാസ്‌ത്രജ്ഞർ പറയുന്നു. അതു ശരിയാ​ണെ​ങ്കിൽ ആർജിച്ച ദുശ്ശീ​ലങ്ങൾ തീർച്ച​യാ​യും ഉപേക്ഷി​ക്കാ​നും സാധി​ക്കും. എങ്ങനെ? “ആ പ്രത്യേക ശീലം ഉപേക്ഷി​ക്കു​ന്ന​തി​ന്റെ പ്രയോ​ജ​നത്തെ കുറിച്ചു ചിന്തി​ക്കുക,” സമ്മർദ നിയ​ന്ത്ര​ണത്തെ കുറി​ച്ചുള്ള ഒരു പുസ്‌ത​ക​ത്തി​ന്റെ എഴുത്തു​കാർ പറയുന്നു. എന്നിട്ട്‌, “അങ്ങനെ​യൊ​രു മാറ്റം വരുത്തു​ന്നത്‌ ജീവി​തത്തെ എങ്ങനെ മെച്ച​പ്പെ​ടു​ത്തും എന്നതിന്റെ ഒരു പട്ടിക തയ്യാറാ​ക്കുക.” അതേ, ദുഷിച്ച ശീലം ഉപേക്ഷി​ക്കു​ന്ന​തി​ന്റെ പ്രയോ​ജ​ന​ങ്ങ​ളിൽ ശ്രദ്ധ കേന്ദ്രീ​ക​രി​ക്കു​ന്നത്‌ മാറ്റം വരുത്താൻ നമ്മെ പ്രചോ​ദി​പ്പി​ക്കും.

‘നമ്മുടെ ഉള്ളിലെ ആത്മാവു സംബന്ധ​മാ​യി പുതുക്കം പ്രാപി​ക്കാ’നുള്ള അപ്പൊ​സ്‌ത​ല​നായ പൗലൊ​സി​ന്റെ അനുശാ​സ​നത്തെ കുറിച്ചു ചിന്തി​ക്കുക. (എഫെസ്യർ 4:22, 23) ഇവിടെ ആത്മാവ്‌ എന്നു പറയു​ന്നത്‌ നമ്മുടെ പ്രമുഖ മാനസിക ചായ്‌വാണ്‌. ദൈവ​ത്തോട്‌ അടുത്തു​ചെ​ല്ലു​ക​യും അവന്റെ നിലവാ​ര​ങ്ങ​ളോട്‌ വിലമ​തി​പ്പു നട്ടുവ​ളർത്തു​ക​യും ചെയ്‌തു​കൊണ്ട്‌ ആ ആത്മാവിന്‌ മാറ്റം വരുത്തുക. യഹോ​വ​യ്‌ക്കു പ്രസാ​ദ​ക​ര​മാ​യ​താ​ണു ചെയ്യു​ന്നത്‌ എന്ന തിരി​ച്ച​റിവ്‌ ആവശ്യ​മായ മാറ്റങ്ങൾ വരുത്താൻ നിങ്ങളെ പ്രോ​ത്സാ​ഹി​പ്പി​ക്കും.—സങ്കീർത്തനം 69:30-33; സദൃശ​വാ​ക്യ​ങ്ങൾ 27:11; കൊ​ലൊ​സ്സ്യർ 1:9, 10.

വർഷങ്ങ​ളോ​ളം നമ്മുടെ ജീവി​തത്തെ അടക്കി ഭരിച്ച ദുശ്ശീ​ല​ങ്ങളെ മറിക​ട​ക്കു​ന്നത്‌ ദുഷ്‌ക​ര​മാ​യി​രി​ക്കും. അതിനു വേണ്ടി​വ​ന്നേ​ക്കാ​വുന്ന പോരാ​ട്ടത്തെ നിസ്സാ​ര​മാ​യി കാണരുത്‌. പിൻവാ​ങ്ങ​ലും പരാജ​യ​വും തീർച്ച​യാ​യും ഉണ്ടാ​യേ​ക്കാം. എന്നാൽ കാലാ​ന്ത​ര​ത്തിൽ കാര്യങ്ങൾ മെച്ച​പ്പെ​ടും എന്നതിൽ ഉറപ്പു​ണ്ടാ​യി​രി​ക്കുക. നിങ്ങൾ എത്ര​ത്തോ​ളം ശ്രമം ചെലു​ത്തു​ന്നു​വോ അത്ര​ത്തോ​ളം പുതിയ സ്വഭാവം നിങ്ങളിൽ പ്രകട​മാ​യി​രി​ക്കും.

ദൈവത്തെ സ്‌നേ​ഹി​ക്കുന്ന ഒരുവന്‌ അവനിൽനി​ന്നുള്ള സഹായ​വും അനു​ഗ്ര​ഹ​വും സംബന്ധിച്ച്‌ ഉറപ്പു​ണ്ടാ​യി​രി​ക്കാ​നാ​കും. അപ്പൊ​സ്‌ത​ല​നായ പൗലൊസ്‌ പറയുന്നു: “ദൈവം വിശ്വ​സ്‌തൻ; നിങ്ങൾക്കു കഴിയു​ന്ന​തി​ന്നു​മീ​തെ പരീക്ഷ നേരി​ടു​വാൻ സമ്മതി​ക്കാ​തെ നിങ്ങൾക്കു സഹിപ്പാൻ കഴി​യേ​ണ്ട​തി​ന്നു . . . അവൻ പോക്കു​വ​ഴി​യും ഉണ്ടാക്കും.” (1 കൊരി​ന്ത്യർ 10:13) വളരെ പെട്ടെ​ന്നു​തന്നെ യഹോ​വ​യാം ദൈവം ഈ ദുഷ്ട വ്യവസ്ഥി​തി​യെ​യും ഇതിന്റെ അധഃപ​തിച്ച പ്രലോ​ഭ​ന​ങ്ങ​ളെ​യും മോഹ​ങ്ങ​ളെ​യും തൃഷ്‌ണ​ക​ളെ​യും നശിപ്പി​ച്ചു​ക​ള​യും. (2 പത്രൊസ്‌ 3:9-13; 1 യോഹ​ന്നാൻ 2:16, 17) ഈ നാശത്തെ അതിജീ​വി​ക്കുന്ന എല്ലാ അപൂർണ മനുഷ്യർക്കും ക്രമേണ, ശാരീ​രി​ക​വും മാനസി​ക​വും വൈകാ​രി​ക​വു​മായ എല്ലാ വ്യാധി​ക​ളിൽനി​ന്നും എന്നേക്കും പൂർണ​മാ​യി മുക്തി നേടാ​നാ​കും. “മുമ്പി​ലെത്തവ ആരും ഓർക്കു​ക​യില്ല; ആരു​ടെ​യും മനസ്സിൽ വരിക​യു​മില്ല” എന്ന്‌ ദൈവം വാഗ്‌ദാ​നം ചെയ്യുന്നു. (യെശയ്യാ​വു 65:17) “മുമ്പി​ലെത്തവ”യിൽ നിസ്സം​ശ​യ​മാ​യും വ്യസന​കാ​ര​ണ​മായ വാഞ്‌ഛ​ക​ളും ആഗ്രഹ​ങ്ങ​ളും ഉൾപ്പെ​ടു​ന്നു. ചീത്ത ശീലങ്ങളെ ചെറു​ക്കു​ന്ന​തിൽ ഇന്നു നമ്മുടെ പരമാ​വധി ചെയ്യു​ന്ന​തി​നുള്ള മഹത്തായ ഒരു കാരണ​മല്ലേ ഇത്‌? (g04 4/8)

[27-ാം പേജിലെ ചതുരം/ചിത്രങ്ങൾ]

ദുശ്ശീലങ്ങൾ എങ്ങനെ ഒഴിവാ​ക്കാം?

1. ചീത്ത ശീലങ്ങൾ തിരി​ച്ച​റി​യു​ക​യും അതു സമ്മതി​ക്കു​ക​യും ചെയ്യുക. നിങ്ങ​ളോ​ടു​തന്നെ ചോദി​ക്കുക, ‘ഈ ശീലം​കൊണ്ട്‌ എനിക്കു യഥാർഥ​ത്തിൽ പ്രയോ​ജനം ഉണ്ടോ? അതു മറ്റുള്ള​വർക്കു ബുദ്ധി​മുട്ട്‌ ഉണ്ടാക്കു​ന്നു​ണ്ടോ? അത്‌ എന്റെ ആരോ​ഗ്യ​ത്തെ​യോ സാമ്പത്തി​ക​നി​ല​യെ​യോ ക്ഷേമ​ത്തെ​യോ കുടും​ബ​ത്തെ​യോ മനസ്സമാ​ധാ​ന​ത്തെ​യോ ബാധി​ക്കു​ന്നു​ണ്ടോ? അത്‌ ഒഴിവാ​ക്കി​യാൽ എനിക്ക്‌ എന്തു മെച്ചമു​ണ്ടാ​കും?’

2. ദുഷിച്ച ശീലത്തി​നു പകരം ഗുണക​ര​മായ എന്തെങ്കി​ലും ശീലം നട്ടുവ​ളർത്തുക. ദൃഷ്ടാ​ന്ത​ത്തിന്‌, നിങ്ങൾ ഇന്റർനെറ്റ്‌ ഉപയോ​ഗി​ച്ചു​കൊ​ണ്ടോ ഒരുപക്ഷേ ആരോ​ഗ്യാ​വ​ഹ​മ​ല്ലാത്ത കാര്യങ്ങൾ വായി​ച്ചു​കൊ​ണ്ടോ ധാരാളം സമയം ചെലവ​ഴി​ക്കാ​റു​ണ്ടോ? അങ്ങനെ​യെ​ങ്കിൽ ആ സമയം ആരോ​ഗ്യാ​വ​ഹ​മായ വായന, പഠനം അല്ലെങ്കിൽ പരിശീ​ലനം എന്നിവ​യ്‌ക്കു​വേണ്ടി മാറ്റി​വെ​ക്കുക.

3. നിങ്ങളു​ടെ പുരോ​ഗതി നിരീ​ക്ഷി​ക്കുക. ഓരോ ദിവസ​വും ഏതാനും നിമിഷം നിങ്ങളു​ടെ പുരോ​ഗ​തി​യെ കുറിച്ചു ചിന്തി​ക്കുക. നിങ്ങൾ പിന്നാക്കം പോയി​ട്ടു​ണ്ടെ​ങ്കിൽ അതി​ലേക്കു നയിച്ച സാഹച​ര്യം വിലയി​രു​ത്തുക.

4. മറ്റുള്ള​വ​രു​ടെ സഹായം സ്വീക​രി​ക്കുക. നിങ്ങൾ ആ ശീലം ഉപേക്ഷി​ക്കാൻ ശ്രമി​ക്കു​ക​യാ​ണെന്ന്‌ നിങ്ങളു​ടെ കുടും​ബ​ത്തെ​യും സുഹൃ​ത്തു​ക്ക​ളെ​യും അറിയി​ക്കുക. നിങ്ങൾ ആ തീരു​മാ​ന​ത്തിൽനി​ന്നു വ്യതി​ച​ലി​ക്കു​ന്ന​താ​യി കാണു​ന്നെ​ങ്കിൽ അക്കാര്യം ഓർമി​പ്പി​ക്കാൻ അവരോ​ടു പറയുക. ആ ശീലം ഉപേക്ഷി​ക്കു​ന്ന​തിൽ വിജയി​ച്ചി​ട്ടു​ള്ള​വ​രോ​ടു സംസാ​രി​ക്കുക.—സദൃശ​വാ​ക്യ​ങ്ങൾ 11:14, NW.

5. സമനി​ല​യും യാഥാർഥ്യ​ബോ​ധ​വും പ്രകട​മാ​ക്കുക. പെട്ടെ​ന്നുള്ള വിജയം പ്രതീ​ക്ഷി​ക്ക​രുത്‌. കാലങ്ങ​ളാ​യുള്ള ചില ശീലങ്ങൾ ഉപേക്ഷി​ക്കാൻ കുറെ​യ​ധി​കം സമയം എടു​ത്തേ​ക്കാം.

6. ദൈവ​ത്തോ​ടു പ്രാർഥി​ക്കുക. ദൈവ​ത്തി​ന്റെ സഹായ​ത്താൽ ഏതു ദുഷിച്ച ശീലവും ഉപേക്ഷി​ക്കാൻ നിങ്ങൾക്കു കഴിയും.—സങ്കീർത്തനം 55:22; ലൂക്കൊസ്‌ 18:27.