തൂവൽ മിനുക്കൽ കേവലം സൗന്ദര്യസംരക്ഷണമോ?
സ്‌പെയിനിലെ ഉണരുക! ലേഖകൻ
പക്ഷികൾ അവയുടെ തൂവൽ കൊത്തിമിനുക്കിക്കൊണ്ട്‌ ധാരാളം സമയം ചെലവിടുന്നത്‌ നിങ്ങൾ ശ്രദ്ധിച്ചിട്ടുണ്ടോ? വിടർത്തിപ്പിടിച്ച തൂവലുകൾ ചിക്കിച്ചികഞ്ഞുകൊണ്ട്‌ അവ ദിവസവും മണിക്കൂറുകൾ ചെലവഴിക്കുന്നു. തത്ത, ഞാറ, കുരുവി, ഫ്‌ളമിംഗോ എന്നുവേണ്ട എല്ലാ പക്ഷികളും പതിവായി ഇങ്ങനെ ചെയ്യാറുണ്ട്‌. എന്നാൽ എന്തിന്‌? തങ്ങളുടെ സൗന്ദര്യം വർധിപ്പിക്കുക മാത്രമാണോ അവയുടെ ലക്ഷ്യം?
യഥാർഥ കാരണം അതിലും വളരെ പ്രാധാന്യം അർഹിക്കുന്നതാണ്‌. വിമാനങ്ങൾ ഇടയ്‌ക്കിടെ പൂർണമായി പരിശോധിച്ച്‌ കേടുപോക്കേണ്ടത്‌ എത്ര പ്രധാനമാണോ അത്രതന്നെ അനിവാര്യമാണ്‌ പക്ഷികൾക്ക്‌
അവയുടെ ഈ തൂവൽ മിനുക്കലും. വാസ്‌തവത്തിൽ തൂവലുകൾ നന്നായി സൂക്ഷിക്കുക എന്നത്‌ പക്ഷികൾക്കു ജീവത്‌പ്രധാനമാണ്‌. പക്ഷികളുടെ തൂവലുകൾക്ക്‌ ഒരുപാട്‌ കേടുപാടുകൾ സംഭവിക്കുന്നുണ്ട്‌. കൊത്തിമിനുക്കലിലൂടെ പക്ഷി പരാദങ്ങളെയെല്ലാം പെറുക്കിക്കളഞ്ഞ്‌ തൂവൽ വൃത്തിയാക്കുന്നതിനു പുറമേ വായുവിലൂടെ സുഗമമായി പറന്നുനീങ്ങാനുള്ള അതിന്റെ പ്രാപ്‌തിക്ക്‌ തകരാറൊന്നും സംഭവിക്കുന്നില്ലെന്നും ഉറപ്പുവരുത്തുന്നു.
ദിവസേനയുള്ള ഈ ചമയത്തിൽ, വേർപെട്ടു പോയിട്ടുള്ള തൂവലിഴകളെ തമ്മിൽ കൊളുത്തി ബന്ധിപ്പിക്കുന്നതും ഉൾപ്പെടുന്നു. ഇങ്ങനെ തൂവലിഴകളെ തമ്മിൽ ബന്ധിപ്പിച്ച്‌ നിറുത്തുകയാണെങ്കിൽ പക്ഷിക്ക്‌ പറന്നുയരാൻ ആവശ്യമായ ഉത്ഥാപകം (lift) നൽകുന്നതിൽ തൂവൽ കൂടുതൽ ഫലപ്രദമായിരിക്കും.
“രണ്ടുകൂട്ടം തൂവലുകൾക്കു സവിശേഷ ശ്രദ്ധ ആവശ്യമാണ്‌,” ബുക്ക്‌ ഓഫ്‌ ബ്രിട്ടീഷ്‌ ബേർഡ്‌സ്‌ വിശദീകരിക്കുന്നു, “ചിറകുകളിലെ പറക്കാൻ സഹായിക്കുന്ന തൂവലുകൾക്കും വാലിലെ ‘ദിശ നിയന്ത്രിക്കുന്ന’ തൂവലുകൾക്കും.”
കൂടാതെ പക്ഷികൾക്ക്‌ പരാദങ്ങളോടു തുടർച്ചയായി പൊരുതിയേ മതിയാവൂ. അവ പക്ഷികൾക്ക്‌ ആരോഗ്യ പ്രശ്‌നങ്ങൾ ഉണ്ടാക്കുമെന്നു മാത്രമല്ല, അവയുടെ തൂവലുകൾക്കു കേടുപാടുകൾ വരുത്തുകയും ചെയ്യും. കൊക്കിനു കേടു പറ്റിയ പക്ഷികൾക്ക്‌ വേണ്ടുംവണ്ണം തൂവൽ മിനുക്കാൻ കഴിയാത്തതുകൊണ്ട്‌ സാധാരണ കാണപ്പെടുന്നതിലുമധികം പരാദങ്ങൾ അത്തരം പക്ഷികളുടെ തൂവലുകളിൽ ഉള്ളതായി പ്രകൃതിശാസ്‌ത്രജ്ഞർ നിരീക്ഷിച്ചിട്ടുണ്ട്‌. പരാദങ്ങളെ നീക്കം ചെയ്യുന്നതിനുവേണ്ടി ഉറുമ്പുകളെക്കൊണ്ട്‌ സ്വയം പൊതിയുന്ന ചില പക്ഷികൾ പോലുമുണ്ട്‌! ഉറുമ്പിന്റെ ശരീരത്തിലെ ഫോർമിക്‌ അമ്ലം ഉഗ്രൻ കീടനാശിനിയായി വർത്തിച്ചുകൊള്ളും.
അവസാനമായി, തൂവലുകൾക്ക്‌ എണ്ണമയം ആവശ്യമാണ്‌. നീർപ്പക്ഷികൾക്ക്‌ തൂവലുകളിലുള്ള എണ്ണമയം ഒരു ജലരോധക ആവരണം പ്രദാനം ചെയ്യുന്നു. അതുപോലെ നല്ല എണ്ണമയമുള്ള തൂവലുകൾ എല്ലാ പക്ഷികൾക്കും ചൂടിൽനിന്നും തണുപ്പിൽനിന്നുമൊക്കെയുള്ള സംരക്ഷണമാണ്‌. എവിടെ നിന്നാണ്‌ പക്ഷിക്ക്‌ ഈ എണ്ണ കിട്ടുന്നത്‌? വാലിനു തൊട്ടു മുകളിലുള്ള കൊഴുപ്പ്‌ ഗ്രന്ഥിയിൽനിന്ന്‌. ആ ഗ്രന്ഥി സ്രവിക്കുന്ന കൊഴുപ്പ്‌ എടുത്ത്‌ പക്ഷി ക്ഷമയോടെ ഓരോ തൂവലിലും പുരട്ടുന്നു. പറക്കാൻ സഹായിക്കുന്ന തൂവലുകൾക്ക്‌ ഈ പ്രക്രിയയിലും പ്രത്യേക ശ്രദ്ധ ലഭിക്കുന്നു.
അതുകൊണ്ട്‌ ഒരു പക്ഷി തൂവലുകൾ കൊത്തിമിനുക്കുന്നതു കാണുമ്പോൾ അതു വെറുതെ സമയം പാഴാക്കുകയാണ്‌ എന്നു വിചാരിക്കല്ലേ. തൂവൽ മിനുക്കൽ പക്ഷിയുടെ അഴകു വർധിപ്പിക്കുന്നു എന്നതിനു സംശയമില്ല. എങ്കിൽപ്പോലും അതിന്റെ ആരോഗ്യത്തിനും അത്‌ ആവശ്യമാണ്‌. പറവകളുടെ ജീവൻതന്നെ അതിനെ ആശ്രയിച്ചാണിരിക്കുന്നത്‌. (g04 4/22)
[14-ാം പേജിലെ രേഖാചിത്രം/ചിത്രങ്ങൾ]
(പൂർണരൂപത്തിൽ കാണുന്നതിന്‌ പ്രസിദ്ധീകരണം നോക്കുക)
തണ്ട്‌
തൂവലിഴകൾ
പിച്ഛിക
പിച്ഛികാവർധം
[ചിത്രം]
തൂവൽ മിനുക്കലിലൂടെ പക്ഷികൾ അവയുടെ തൂവലുകളിലെ ചെറിയ ഘടകങ്ങളെ തമ്മിൽ കൊളുത്തുകയും, അങ്ങനെ തൂവലിഴകളെ ബന്ധിപ്പിക്കുകയും ചെയ്യുന്നു
[13-ാം പേജിലെ ചിത്രങ്ങൾക്ക്‌ കടപ്പാട്‌]
Cortesía del Zoo de la Casa de Campo, Madrid
[14-ാം പേജിലെ ചിത്രങ്ങൾക്ക്‌ കടപ്പാട്‌]
ഞാറ: ഫോട്ടോ: Loro Parque, Puerto de la Cruz, Tenerife; parrot: Cortesía del Zoo de la Casa de Campo, Madrid