യുവജനങ്ങൾ ചോദിക്കുന്നു . . .
യുവജന ഡാൻസ്‌ ക്ലബ്ബുകളെ എങ്ങനെ വീക്ഷിക്കണം?
“ശരിക്കൊന്ന്‌ ആഘോഷിക്കാനാണ്‌ ഞാൻ അവിടെ പോയിരുന്നത്‌.”—ഷോൺ.
“സത്യം പറയാമല്ലോ, അതു രസമായിരുന്നു—ശരിക്കും ആസ്വാദ്യം! രാത്രി മുഴുവനും ഡാൻസുതന്നെ.”—ഏർണസ്റ്റ്‌.
യുവജന ഡാൻസ്‌ ക്ലബ്ബുകൾ സമീപവർഷങ്ങളിൽ വളരെ പ്രസിദ്ധിയാർജിച്ചിട്ടുണ്ട്‌. വിനോദം തേടുന്ന ചെറുപ്പക്കാർ ഇത്തരം ക്ലബ്ബുകളിലെ സ്ഥിരം സന്ദർശകരാണ്‌.
തീർച്ചയായും നാമെല്ലാം വിനോദം ആസ്വദിക്കുന്നു. ‘ചിരിക്കാൻ ഒരു കാല’വും ‘നൃത്തം ചെയ്യാൻ ഒരു കാല’വും ഉണ്ടെന്ന്‌ ബൈബിളും പറയുന്നു. (സഭാപ്രസംഗി 3:4) എന്നാൽ യുവജനങ്ങൾക്കു വേണ്ടിയുള്ള ഡാൻസ്‌ ക്ലബ്ബുകൾക്ക്‌ ആരോഗ്യാവഹമായ വിനോദം പ്രദാനം ചെയ്യാനാകുമോ? അതോ അത്തരമൊരു സ്ഥലത്തേക്കു പോകുന്നതിനുമുമ്പ്‌ രണ്ടു വട്ടം ചിന്തിക്കണമോ?
‘വെറിക്കൂത്തുകൾ’
മാന്യമായ രീതിയിൽ നടക്കുന്ന സാമൂഹിക കൂടിവരവുകളെ ബൈബിൾ കുറ്റംവിധിക്കുന്നില്ല. എന്നാൽ വെറിക്കൂത്തുകൾക്കെതിരെ അതു മുന്നറിയിപ്പു നൽകുന്നു. (ഗലാത്യർ 5:19-21) ബൈബിൾ കാലങ്ങളിൽ അത്തരം ചില സാമൂഹിക കൂടിവരവുകൾ മിക്കപ്പോഴും അനിയന്ത്രിത പെരുമാറ്റത്തിലേക്കു നയിച്ചിട്ടുണ്ട്‌. യെശയ്യാ പ്രവാചകൻ ഇപ്രകാരം എഴുതി: “അതികാലത്തു എഴുന്നേററു മദ്യം തേടി ഓടുകയും വീഞ്ഞു കുടിച്ചു മത്തരായി സന്ധ്യാസമയത്തു വൈകി ഇരിക്കയും ചെയ്യുന്നവർക്കും അയ്യോ കഷ്ടം! അവരുടെ വിരുന്നുകളിൽ കിന്നരവും വീണയും തപ്പും കുഴലും വീഞ്ഞും ഉണ്ടു; എന്നാൽ യഹോവയുടെ പ്രവൃത്തിയെ അവർ നോക്കുന്നില്ല.”—യെശയ്യാവു 5:11, 12.
ലഹരി പിടിപ്പിക്കുന്ന മദ്യവും വന്യമായ സംഗീതവും ഇത്തരം കൂടിവരവുകളുടെ വിശേഷതകളായിരുന്നു. നേരത്തേ തുടങ്ങുന്ന ആഘോഷം സന്ധ്യവരെ നീളുമായിരുന്നു. വെറിക്കൂത്തിൽ ഏർപ്പെടുന്നവരുടെ മനോഭാവം ശ്രദ്ധിക്കൂ—ദൈവം ഇല്ല എന്നപോലെയാണ്‌ അവർ പെരുമാറുന്നത്‌! അത്തരം കൂടിവരവുകൾ ദൈവം വിലക്കിയതിൽ യാതൊരു അതിശയവുമില്ല. അങ്ങനെയെങ്കിൽ ഇന്ന്‌, യുവജനങ്ങൾക്കായുള്ള ഡാൻസ്‌ ക്ലബ്ബുകളിൽ നടക്കുന്ന കാര്യങ്ങളെ ദൈവം എങ്ങനെയായിരിക്കും വീക്ഷിക്കുക?
ചില വസ്‌തുതകൾ പരിചിന്തിക്കുക. ചില ക്ലബ്ബുകൾ മോഷിങ്‌ എന്നു വിളിക്കപ്പെടുന്ന അക്രമാസക്തമായ ഒരിനം ഡാൻസിനു പേരുകേട്ടവയാണ്‌. ഒരു ഉറവ്‌ പറയുന്നതനുസരിച്ച്‌ “ഐക്യനാടുകളിൽ എൺപതുകളുടെ മധ്യത്തിൽ ‘പങ്ക്‌’ ക്ലബ്ബുകൾ നിലവിൽവന്ന ശേഷമാണ്‌ ഇത്‌ ആവിർഭവിച്ചത്‌. പങ്കെടുക്കുന്നവർ പരസ്‌പരം ഇടിക്കുന്ന ഒരു തരം ഡാൻസിൽനിന്നാണ്‌ മോഷിങ്‌ ഉടലെടുത്തത്‌.” മുകളിലേക്കും താഴേക്കും ചാടുക, ശിരസ്സ്‌ ദ്രുതഗതിയിൽ ചലിപ്പിക്കുക, മൃഗങ്ങളെപ്പോലെ തലകൊണ്ടിടിക്കുക, പരസ്‌പരം കൂട്ടിയിടിക്കുക എന്നിവയൊക്കെയാണ്‌ മോഷിങ്ങിന്റെ ചിട്ടവട്ടങ്ങൾ. കൈകാലുകൾ ഒടിയുകയും മുറിയുകയും ചെയ്യുന്നത്‌ തികച്ചും സാധാരണമാണ്‌. നട്ടെല്ലിനും തലയ്‌ക്കും പരിക്കേറ്റ സന്ദർഭങ്ങളും ഉണ്ടായിട്ടുണ്ട്‌. എന്തിന്‌, ചിലപ്പോൾ മരണം പോലും സംഭവിച്ചിട്ടുണ്ട്‌. കൂടാതെ ചില ക്ലബ്ബുകൾ ആളുകൾക്ക്‌ ക്രൗഡ്‌ സർഫിങ്‌ എന്ന ഒരുതരം വിനോദത്തിൽ ഏർപ്പെടാൻ അവസരം ഒരുക്കുന്നു. ഇതിൽ, കുറെ പേർ ചേർന്ന്‌ ഒരു വ്യക്തിയെ തങ്ങളുടെ തലയ്‌ക്കു മുകളിൽ പൊക്കിപ്പിടിക്കുന്നു, ആൾക്കൂട്ടത്തിനിടയിലൂടെ ‘സർഫിങ്‌’ നടത്തുകയാണെന്നു തോന്നുമാറ്‌ അയാൾ അവരുടെ കൈകളിലൂടെ തെന്നിനീങ്ങുന്നു. ഇങ്ങനെ ചെയ്യുന്നതിനിടയിൽ പലരും താഴെ വീണ്‌ പരിക്കേറ്റിട്ടുണ്ട്‌. ഇതിനിടയിൽ പെൺകുട്ടികളെ അനുചിതമായി തലോടുകയും സ്‌പർശിക്കുകയും ചെയ്യുന്നതു സാധാരണമാണ്‌.
സംശയലേശമെന്യേ, ദൈവം അത്തരം പെരുമാറ്റം അംഗീകരിക്കുന്നില്ല. ‘ഭക്തികേടും പ്രപഞ്ചമോഹങ്ങളും വർജ്ജിച്ചിട്ടു സുബോധത്തോടെ’ ജീവിക്കാൻ ദൈവവചനം ക്രിസ്‌ത്യാനികളോടു കൽപ്പിക്കുന്നു.—തീത്തൊസ്‌ 2:13.
സംഗീതവും മയക്കുമരുന്നുകളും
ഭൂരിഭാഗം ഡാൻസ്‌ ക്ലബ്ബുകളിലും ഉപയോഗിക്കുന്ന സംഗീതത്തെ കുറിച്ചും ചിന്തിക്കുക. ദ്രുതഗതിയിലുള്ള താളവും അശ്ലീല വരികളുമൊക്കെയുള്ള ഹാർഡ്‌ റോക്ക്‌, ഹെവി മെറ്റൽ സംഗീതത്തിന്‌ ചില ക്ലബ്ബുകൾ പ്രസിദ്ധമാണ്‌. എന്നാൽ ഹിപ്പ്‌-ഹോപ്പ്‌ അഥവാ റാപ്പ്‌ സംഗീതമാണ്‌ മിക്ക ക്ലബ്ബുകൾക്കും കമ്പം. ലൈംഗികത, അക്രമം, മത്സരം എന്നിവയാണ്‌ ഇവയുടെയും കാമ്പും കഴമ്പും. അനാരോഗ്യകരമായ ചുറ്റുപാടിൽ അത്തരം സംഗീതത്തിനു ചെവികൊടുക്കുന്നത്‌ നിങ്ങളെ ദോഷകരമായി ബാധിക്കുമോ? ഒരു നിശാക്ലബ്ബ്‌ ഉപദേശകനായ ഡേവിഡ്‌ ഹോളിങ്ങ്‌വർത്ത്‌ പറയുന്നു: “സംഗീതത്തിന്‌ ആളുകളുടെ മനസ്സിനെ വലിയ അളവിൽ സ്വാധീനിക്കാൻ കഴിയും. ഒരു വലിയ കൂട്ടത്തോടൊപ്പമായിരിക്കുമ്പോൾ അത്‌ ആളുകളിൽ അക്രമാസക്തമായ മനോഭാവത്തെ പ്രോത്സാഹിപ്പിച്ചേക്കാം.” ഐക്യനാടുകളിലെ മിക്ക നഗരങ്ങളിലും ഡാൻസ്‌ ക്ലബ്ബുകളിൽ അക്രമസംഭവങ്ങൾ അരങ്ങേറിയിട്ടുള്ളതിൽ തെല്ലും അതിശയിക്കാനില്ല. അശ്ലീല പ്രവൃത്തികളെയും മൃഗീയ പെരുമാറ്റത്തെയും മഹത്ത്വീകരിക്കുന്ന സംഗീത സംസ്‌കാരത്തിന്റെ പ്രത്യക്ഷ ഫലമാണിത്‌ എന്ന്‌ മിക്ക ആളുകളും വിചാരിക്കുന്നു.a
സമീപ വർഷങ്ങളിൽ മയക്കുമരുന്നുപയോഗവും ഡാൻസ്‌ ക്ലബ്ബുകളിലെ ഒരു സ്ഥിരം കാഴ്‌ചയായി മാറിയിരിക്കുന്നു. ഒരു ഗവേഷക പറയുന്നതനുസരിച്ച്‌, “മയക്കുമരുന്നുകളുടെ ലഭ്യതയും ലഭിക്കുന്ന ഇനങ്ങളുടെ വൈവിധ്യവും അവ ഉപയോഗിക്കാനുള്ള സൗകര്യവും ആണ്‌ ഡാൻസ്‌ ക്ലബ്ബുകൾക്ക്‌ ഇത്ര പ്രചാരം നേടിക്കൊടുത്തിരിക്കുന്നത്‌.” ഡാൻസ്‌ ഡ്രഗുകൾ എന്ന പേരിൽ അറിയപ്പെടുന്ന മയക്കുമരുന്നുകൾതന്നെയുണ്ട്‌. ഡാൻസ്‌ ക്ലബ്ബുകളിലെ പതിവുകാരിൽ ചിലർ മയക്കുമരുന്നുകളുടെ മിശ്രണം പോലും ഉപയോഗിക്കുന്നു. അങ്ങനെ ഉപയോഗിക്കുന്നതിൽ ഏറ്റവും സാധാരണം കെറ്റാമീൻ (സ്‌പെഷൽ കെ എന്നും അറിയപ്പെടുന്നു) ആണ്‌. ഇത്‌ ശിഥില വ്യക്തിത്വം, ഉന്മാദം, ശ്വാസംമുട്ടൽ, നാഡീസംബന്ധമായ തകരാറുകൾ എന്നിവയ്‌ക്കു വഴിതെളിക്കുന്നു. മെതാംഫെറ്റാമിൻ എന്ന മയക്കുമരുന്ന്‌ ഓർമയില്ലായ്‌മ, ആക്രമണത്വര, അക്രമവാസന, ഹൃദയത്തെയും നാഡികളെയും സംബന്ധിക്കുന്ന തകരാറുകൾക്കുള്ള സാധ്യത എന്നിവയ്‌ക്കു കാരണമാകുന്നു. ഈ കൂട്ടത്തിൽ ഏറ്റവും പ്രചാരമുള്ളത്‌ എക്‌സ്റ്റസി എന്നറിയപ്പെടുന്ന ആംഫിറ്റാമിൻ ചേർന്ന മയക്കുമരുന്നാണ്‌. അത്‌ ആശയക്കുഴപ്പം, ഉത്‌കണ്‌ഠ, ഉയർന്ന നാഡിയിടിപ്പ്‌, ഉയർന്ന രക്തസമ്മർദം, കടുത്ത പനി എന്നിവയ്‌ക്കു കാരണമാകുന്നു. എക്‌സ്റ്റസി ഉപയോഗം നിമിത്തം ചിലർ മരിച്ചിട്ടുമുണ്ട്‌.
മയക്കുമരുന്നുപയോഗം ‘ജഡത്തിലെയും ആത്മാവിലെയും സകല കന്മഷവും നീക്കി നമ്മെത്തന്നേ വെടിപ്പാക്കാനുള്ള’ തിരുവെഴുത്തു കൽപ്പനയ്‌ക്കു വിരുദ്ധമാണ്‌. (2 കൊരിന്ത്യർ 7:1) മയക്കുമരുന്നുപയോഗം സർവവ്യാപകമായിരിക്കുന്ന ഒരു ചുറ്റുപാടിൽ ആയിരിക്കുന്നതു ജ്ഞാനമാണോ?
മോശമായ സഹവാസം
ഏറെ ഉദ്ധരിക്കപ്പെട്ടിട്ടുള്ള ഈ മുന്നറിയിപ്പ്‌ ഓർമിക്കുക: “മോശമായ സഹവാസങ്ങൾ പ്രയോജനപ്രദമായ ശീലങ്ങളെ പാഴാക്കുന്നു.” (1 കൊരിന്ത്യർ 15:33, NW) ബൈബിൾ കാലങ്ങളിലെ വെറിക്കൂത്തുകാരെപോലെ, ഡാൻസ്‌ ക്ലബ്ബുകൾ പതിവായി സന്ദർശിക്കുന്ന ചെറുപ്പക്കാരിൽ സിംഹഭാഗവും ദൈവത്തെ പ്രസാദിപ്പിക്കുന്നതിൽ താത്‌പര്യമെടുക്കാത്തവരാണെന്നു കാണപ്പെടുന്നു. വാസ്‌തവത്തിൽ ഇവരിൽ പലരും “ദൈവപ്രിയരായിരിക്കുന്നതിനുപകരം ഉല്ലാസപ്രിയ”രായിരിക്കുന്നതായി പറയാൻ കഴിയും. (2 തിമൊഥെയൊസ്‌ 3:4, NW) അത്തരം ഒരു കൂട്ടത്തോടു സഹവസിക്കാൻ നിങ്ങൾ യഥാർഥത്തിൽ ആഗ്രഹിക്കുമോ?
മറ്റു ക്രിസ്‌തീയ യുവജനങ്ങളോടൊത്തു ഡാൻസ്‌ ക്ലബ്ബിൽ പോകുന്നതിൽ അപകടമില്ലല്ലോ എന്നു ചിലർ ന്യായവാദം ചെയ്‌തേക്കാം. എന്നാൽ, ‘നടപ്പിൽ വിശ്വാസികൾക്കു മാതൃകയായിരിക്കുന്ന’ യുവക്രിസ്‌ത്യാനികൾ അങ്ങനെ പോകാൻ ആഗ്രഹിക്കുകയില്ല. (1 തിമൊഥെയൊസ്‌ 4:12) ഇനി, ഒരു കൂട്ടം യുവസാക്ഷികൾ ഡാൻസ്‌ ക്ലബ്ബിൽ പോകുകയും അവർ മാത്രം ഒരുമിച്ചായിരിക്കുകയും ചെയ്‌താൽ പോലും ആരോഗ്യാവഹമല്ലാത്ത സംഗീതത്തിനും അന്തരീക്ഷത്തിനും അപ്പോഴും മാറ്റമൊന്നുമില്ല. സാക്ഷികളല്ലാത്തവരോടൊപ്പം ഡാൻസു ചെയ്യാൻ ക്ഷണിക്കപ്പെടുകയാണെങ്കിൽ അവരെ സംബന്ധിച്ചിടത്തോളം അത്‌ വല്ലായ്‌മയ്‌ക്കും പിരിമുറുക്കത്തിനും ഇടയാക്കിയേക്കാം. ചില യുവജനങ്ങൾ സംഘർഷങ്ങളിൽപ്പോലും അകപ്പെട്ടിട്ടുണ്ട്‌! അത്‌ ബൈബിളിലെ ഈ ബുദ്ധിയുപദേശത്തിന്റെ സത്യതയിലേക്കു വിരൽചൂണ്ടുന്നു: “ജ്ഞാനികളോടുകൂടെ നടക്ക; നീയും ജ്ഞാനിയാകും; ഭോഷന്മാർക്കു കൂട്ടാളിയായവനോ വ്യസനിക്കേണ്ടിവരും.”—സദൃശവാക്യങ്ങൾ 13:20.
വികാരോദ്ദീപകമായ ഡാൻസ്‌
ഇനി, അവിടെ നടക്കുന്ന ഡാൻസിനെ കുറിച്ചുതന്നെ ചിന്തിക്കുക. തികച്ചും അസാധാരണമായ ഒരുതരം ഡാൻസിന്‌ ഇപ്പോൾ വളരെ പ്രചാരം സിദ്ധിച്ചിട്ടുണ്ട്‌, വിശേഷിച്ചും ഐക്യനാടുകളിലെ യുവാക്കളുടെയിടയിൽ. ലൈംഗിക ചേഷ്ടകളെ പച്ചയായി വിവരിക്കുന്ന ഹിപ്പ്‌-ഹോപ്പ്‌ സംഗീതത്തിന്റെ അകമ്പടിയോടെയാണ്‌ ഇതിന്റെ അവതരണം. മാത്രമല്ല, ഡാൻസ്‌ അതിൽത്തന്നെ ലൈംഗിക പ്രക്രിയയുടെ അനുകരണമാണ്‌. അതിനാൽ ഇത്തരം ഡാൻസ്‌ അറിയപ്പെടുന്നതുതന്നെ ‘വസ്‌ത്രം സഹിതമുള്ള ലൈംഗികത’ എന്നാണ്‌.
ഇത്തരം ഡാൻസിൽ ഉൾപ്പെടാൻ ഒരു യുവക്രിസ്‌ത്യാനി ആഗ്രഹിക്കുമോ? ദൈവത്തെ പ്രസാദിപ്പിക്കാൻ ആഗ്രഹിക്കുന്ന ക്രിസ്‌തീയ ചെറുപ്പക്കാർ അതു ചെയ്യുകയില്ല. എന്തുകൊണ്ടെന്നാൽ “ദുർന്നടപ്പു വിട്ടു ഓടുവിൻ” എന്നാണ്‌ ദൈവം കൽപ്പിക്കുന്നത്‌. (1 കൊരിന്ത്യർ 6:18) ‘എല്ലാവരും ചെയ്യുന്നതല്ലേ, അതുകൊണ്ട്‌ അത്‌ അത്ര കുഴപ്പമുള്ളതായിരിക്കാൻ വഴിയില്ല’ എന്നു ചിലർ ന്യായവാദം ചെയ്‌തേക്കാം. എന്നാൽ ഭൂരിപക്ഷം ആളുകളും ഒരു സംഗതി ചെയ്യുന്നു എന്നതുകൊണ്ട്‌ അതു ശരിയായിക്കൊള്ളണമെന്നില്ല. (പുറപ്പാടു 23:2) നിങ്ങളുടെ സമപ്രായക്കാരുടെ തെറ്റായ പ്രേരണകളെ ധീരമായി ചെറുത്തുനിൽക്കുകയും ദൈവമുമ്പാകെ നല്ല മനസ്സാക്ഷി കാത്തുസൂക്ഷിക്കുകയും ചെയ്യുക.—1 പത്രൊസ്‌ 4:3, 4.
തീരുമാനമെടുക്കൽ
എല്ലാത്തരം ഡാൻസും മോശമാണെന്നല്ല ഇതിന്റെ അർഥം. വിശുദ്ധ നിയമപെട്ടകവും കൊണ്ട്‌ യെരൂശലേമിലേക്കു വന്നപ്പോൾ സന്തോഷം കൊണ്ടു മതിമറന്ന ദാവീദ്‌ രാജാവ്‌ അതിനു ചുറ്റും, ‘പൂർണ്ണശക്തിയോടെ നൃത്തം ചെയ്‌തുകൊണ്ടിരുന്നു’ എന്ന്‌ ബൈബിൾ നമ്മോടു പറയുന്നു. (2 ശമൂവേൽ 6:14) ധൂർത്തപുത്രനെ സംബന്ധിച്ച യേശുവിന്റെ ഉപമയിൽ, മകന്റെ തിരിച്ചുവരവിങ്കൽ നടന്ന ആഘോഷത്തിൽ ‘വാദ്യവും നൃത്തവും’ ഉണ്ടായിരുന്നു.—ലൂക്കൊസ്‌ 15:25.
സമാനമായി നിങ്ങളുടെ പ്രദേശത്തും ചിലതരം ഡാൻസുകൾ ക്രിസ്‌ത്യാനികൾക്ക്‌ സ്വീകാര്യമായിരുന്നേക്കാം. അപ്പോൾപ്പോലും സമനിലയും വിവേചനയും പ്രധാനമാണ്‌. വേണ്ടത്ര നിയന്ത്രണവും മേൽനോട്ടവുമുള്ള ക്രിസ്‌തീയ കൂടിവരവുകളിലെ സംഗീതവും നൃത്തവുമാണ്‌ ചെറുപ്പക്കാർക്കുള്ള ക്ലബ്ബുകളിലേതിനെക്കാൾ സുരക്ഷിതം. നല്ല മേൽനോട്ടമുള്ള ക്രിസ്‌തീയ കൂടിവരവുകളിൽ യുവാക്കൾ ഒറ്റപ്പെടാതെ വ്യത്യസ്‌ത പ്രായപരിധിയിലുള്ള ക്രിസ്‌ത്യാനികളുമൊത്ത്‌ ആരോഗ്യാവഹമായ സഹവാസം ആസ്വദിക്കുന്നു.
ഒരുപക്ഷേ, നിങ്ങളുടെ പ്രദേശത്തുള്ള ചില റെസ്റ്ററന്റുകളിൽ സ്വീകാര്യമായ സംഗീതവും നൃത്തവും ഉണ്ടായിരുന്നേക്കാം. എന്നാൽ അത്തരം ഏതെങ്കിലും സ്ഥലങ്ങളിൽ പോകാനുള്ള ക്ഷണം സ്വീകരിക്കുന്നതിനുമുമ്പ്‌ ഈ ചോദ്യങ്ങൾ സ്വയം ചോദിക്കുന്നതു നന്നായിരിക്കും: ഈ സ്ഥലത്തിന്‌ ഏതു തരം പേരാണുള്ളത്‌? അവിടെ യുവാക്കൾക്കു മാത്രമേ പ്രവേശനമുള്ളോ? അങ്ങനെയാണെങ്കിൽ, അവിടെ ആരോഗ്യാവഹമായ അന്തരീക്ഷം ആയിരിക്കുമോ? എന്തു സംഗീതമാണ്‌ അവിടെ ഉപയോഗിക്കുന്നത്‌? ഏതു തരം ഡാൻസാണ്‌ അവിടെ നടക്കാൻ പോകുന്നത്‌? ഞാൻ അവിടെ പോകുന്നതിനോട്‌ എന്റെ മാതാപിതാക്കൾ എങ്ങനെ പ്രതികരിക്കും? ഇത്തരം ചോദ്യങ്ങൾ ചോദിക്കുന്നത്‌ ദോഷത്തിൽനിന്ന്‌ സ്വയം സംരക്ഷിക്കാൻ നിങ്ങളെ സഹായിക്കും.
തുടക്കത്തിൽ പരാമർശിച്ച ഷോൺ, കാര്യം സംബന്ധിച്ച ശരിയായ ചിത്രം നൽകുന്നു. ക്രിസ്‌ത്യാനി ആയിത്തീരുന്നതിനുമുമ്പ്‌ അവൻ ഡാൻസ്‌ ക്ലബ്ബിൽ പതിവുകാരനായിരുന്നു. അവൻ ഓർക്കുന്നു: “നിശാക്ലബ്ബുകളിൽ കുത്തഴിഞ്ഞ ധാരാളം കാര്യങ്ങൾ നടക്കുന്നുണ്ട്‌. അധഃപതിച്ച സംഗീതവും അങ്ങേയറ്റം അധാർമികമായ നൃത്തവുമായിരിക്കും അവിടെ ഉണ്ടാവുക. അവിടെ പോകുന്നവരിൽ ഭൂരിഭാഗത്തിന്റെയും ലക്ഷ്യം ഒന്നുതന്നെ—ഒരു ലൈംഗിക പങ്കാളിയെ കണ്ടെത്തുക.” യഹോവയുടെ സാക്ഷികളോടൊപ്പം ബൈബിൾ പഠിച്ചപ്പോൾ ഷോൺ ക്ലബ്ബിൽ പോകുന്നതു നിറുത്തി. തന്റെ കയ്‌പേറിയ അനുഭവത്തിന്റെ അടിസ്ഥാനത്തിൽ ഷോൺ അഭിപ്രായപ്പെടുന്നു: “അത്തരം ക്ലബ്ബുകൾ ക്രിസ്‌ത്യാനികൾക്കുള്ളതല്ല.” (g04 4/22)
[അടിക്കുറിപ്പ്‌]
a 1999 ഒക്ടോബർ 8 ലക്കം ഉണരുക!യിലെ “സംഗീതം നമ്മെ സ്വാധീനിക്കുന്നതിന്റെ കാരണം” എന്ന ലേഖനം കാണുക.
[24-ാം പേജിലെ ചിത്രം]
ചില യുവജനങ്ങൾ ഡാൻസ്‌ ക്ലബ്ബുകളിൽ അനുചിതമായ സാഹചര്യങ്ങളിൽ അകപ്പെട്ടിട്ടുണ്ട്‌