യുവജ​നങ്ങൾ ചോദി​ക്കു​ന്നു . . .

എനിക്കി​ഷ്ട​മാ​ണെന്ന്‌ ഞാൻ എങ്ങനെ പറയും?

“മനസ്സിലെ ഇഷ്ടം ആദ്യം തുറന്നു​പ​റ​യേ​ണ്ടത്‌ ആരാണ്‌, പുരു​ഷ​നോ സ്‌ത്രീ​യോ? അതൊന്ന്‌ അറിഞ്ഞി​രു​ന്നെ​ങ്കിൽ . . .” —ലോറ.a

അദ്ദേഹത്തെ നിങ്ങൾ അടുത്ത​കാ​ലത്തു പരിച​യ​പ്പെ​ട്ട​താണ്‌, അല്ലെങ്കിൽ കുറെ നാളു​ക​ളാ​യി പരിച​യ​മു​ള്ള​താണ്‌. അദ്ദേഹത്തെ വെറും സുഹൃത്ത്‌ എന്നതി​ലു​പ​രി​യാ​യി കാണാൻ നിങ്ങൾ ആഗ്രഹി​ക്കു​ന്നു. അദ്ദേഹ​ത്തി​ന്റെ മനസ്സി​ലും നിങ്ങ​ളോട്‌ ഒരു ഇഷ്ടമു​ണ്ടെന്നു നിങ്ങൾ മനസ്സി​ലാ​ക്കു​ന്നു, പക്ഷേ തുറന്നു പറയാൻ എന്തോ ഒരു ധൈര്യ​ക്കു​റവ്‌. അങ്ങനെ​യാ​ണെ​ങ്കിൽ ഞാൻതന്നെ മുൻ​കൈ​യെ​ടുത്ത്‌ അങ്ങോട്ടു പറയു​ന്ന​താ​യി​രി​ക്കി​ല്ലേ നല്ലത്‌ എന്നു നിങ്ങൾ ചിന്തി​ക്കു​ന്നു.b

എന്നാൽ, ആ വിഷയ​ത്തി​ലേക്കു കടക്കു​ന്ന​തി​നു മുമ്പ്‌ നിങ്ങളു​ടെ കുടും​ബാം​ഗ​ങ്ങ​ളു​ടെ​യും സമൂഹ​ത്തി​ലു​ള്ള​വ​രു​ടെ​യും വികാ​ര​ങ്ങൾകൂ​ടി നമു​ക്കൊ​ന്നു കണക്കി​ലെ​ടു​ക്കാം. ഉദാഹ​ര​ണ​ത്തിന്‌, നിങ്ങൾക്ക്‌ ഒരു വിവാഹ ഇണയെ കണ്ടെ​ത്തേ​ണ്ടത്‌ മാതാ​പി​താ​ക്കൾ ആയിരി​ക്ക​ണ​മെന്നു പ്രാ​ദേ​ശിക കീഴ്‌വ​ഴ​ക്കങ്ങൾ നിഷ്‌കർഷി​ക്കു​ന്നു​ണ്ടോ?c പ്രണയ​വും വിവാ​ഹ​വു​മൊ​ക്കെ വ്യക്തി​പ​ര​മായ കാര്യ​ങ്ങ​ളല്ലേ എന്നു നിങ്ങൾ ചിന്തി​ച്ചേ​ക്കാം, ശരിയാണ്‌. എന്നിരു​ന്നാ​ലും, മറ്റുള്ള​വരെ വ്രണ​പ്പെ​ടു​ത്തി​യേ​ക്കാ​വുന്ന സംഗതി​കൾ കഴിവ​തും ഒഴിവാ​ക്കാൻ ക്രിസ്‌ത്യാ​നി​കൾ ശ്രമി​ക്കു​ന്നു. ചില കാര്യങ്ങൾ ചെയ്യു​ന്നത്‌ തെറ്റ​ല്ലെ​ങ്കിൽപ്പോ​ലും കുടും​ബാം​ഗ​ങ്ങ​ളു​ടെ​യും പ്രിയ​പ്പെ​ട്ട​വ​രു​ടെ​യും വികാ​രങ്ങൾ കൂടി പരിഗ​ണി​ക്കാൻ അവർ ആഗ്രഹി​ക്കു​ന്നു.

എന്നിരു​ന്നാ​ലും ഇന്ന്‌ അനേകം ദേശങ്ങ​ളിൽ, വിവാഹം കഴിക്ക​ണോ എന്നു തീരു​മാ​നി​ക്കു​ന്ന​തി​നു മുമ്പ്‌ യുവതീ​യു​വാ​ക്കൾ സ്വന്ത ഇഷ്ടപ്ര​കാ​രം അടുത്തു പരിച​യ​പ്പെ​ടു​ന്നത്‌ അഥവാ കോർട്ടിങ്‌ നടത്തു​ന്നതു സാധാ​ര​ണ​മാണ്‌. എന്നാൽ, ചോദ്യം ഇതാണ്‌: ഒരു പുരു​ഷ​നോ​ടുള്ള തന്റെ ഇഷ്ടം വെളി​പ്പെ​ടു​ത്താൻ സ്‌ത്രീ മുൻ​കൈ​യെ​ടു​ക്കു​ന്നതു തെറ്റാ​യി​രി​ക്കു​മോ? ഇവി​ടെ​യും, കുടും​ബ​ത്തി​ന്റെ​യും സമൂഹ​ത്തി​ന്റെ​യും വികാ​ര​ങ്ങൾക്കു വിലകൽപ്പി​ക്കേ​ണ്ട​തുണ്ട്‌. അത്‌ അവരെ ഞെട്ടി​ക്കു​ക​യോ ഇടറി​ക്കു​ക​യോ ചെയ്യു​മോ?

ഒരു സ്‌ത്രീ ഇക്കാര്യ​ത്തിൽ മുൻകൈ എടുക്ക​ണ​മോ എന്നതി​ന്മേൽ ബൈബിൾ കൂടു​ത​ലാ​യി എന്തു വെളി​ച്ച​മാ​ണു വീശു​ന്നത്‌? ബൈബിൾ കാലങ്ങ​ളിൽ നടന്ന ഒരു സംഭവം പരിചി​ന്തി​ക്കുക. രൂത്ത്‌ എന്ന ദൈവ​ഭ​ക്ത​യായ സ്‌ത്രീ വിവാ​ഹാ​ഭ്യർഥ​ന​യു​മാ​യി ബോവസ്‌ എന്നു പേരുള്ള ഒരു പുരു​ഷനെ സമീപി​ച്ചു. യഹോ​വ​യാം ദൈവം അവളുടെ ശ്രമത്തെ അനു​ഗ്ര​ഹി​ക്കു​ക​യും ചെയ്‌തു! (രൂത്ത്‌ 3:1-13) രൂത്ത്‌ വെറു​മൊ​രു കൊച്ചു​പെൺകു​ട്ടി ആയിരു​ന്നില്ല, ഒരു വിധവ​യാ​യി​രുന്ന അവൾ വിവാഹം കഴിക്കാൻ പ്രായ​മുള്ള സ്‌ത്രീ​യാ​യി​രു​ന്നു എന്നതിനു സംശയ​മില്ല. മാത്രമല്ല, അവൾ അദ്ദേഹത്തെ സമീപി​ച്ചത്‌ വെറും കുട്ടി​ക്കളി എന്ന മട്ടിലോ ശൃംഗ​രി​ക്കുക എന്ന ലക്ഷ്യത്തി​ലോ അല്ലായി​രു​ന്നു. മറിച്ച്‌, അവൾ വിവാഹം സംബന്ധിച്ച ദൈവിക നിയമങ്ങൾ അപ്പാടെ അനുസ​രി​ക്കു​ക​യാ​യി​രു​ന്നു.—ആവർത്ത​ന​പു​സ്‌തകം 25:5-10.

ഒരുപക്ഷേ നിങ്ങൾക്ക്‌ വിവാഹം കഴിക്കു​ന്ന​തി​നെ​ക്കു​റി​ച്ചു ചിന്തി​ക്കാ​നുള്ള പ്രായ​മു​ണ്ടാ​യി​രി​ക്കാം, ഒരു യുവാവ്‌ നിങ്ങളു​ടെ ഹൃദയ​ത്തിൽ കയറി​ക്കൂ​ടി​യി​ട്ടു​മു​ണ്ടാ​യി​രി​ക്കാം. എന്നിരു​ന്നാ​ലും, നിങ്ങൾക്കു തോന്നുന്ന അതേ ഇഷ്ടം അയാൾക്ക്‌ ഇങ്ങോ​ട്ടി​ല്ലെ​ങ്കിൽ നിങ്ങളു​ടെ ഹൃദയം തുറക്കു​ന്നത്‌ സൂക്ഷി​ച്ചു​ചെ​യ്യേണ്ട, അപകടം പിടിച്ച ഒരു കാര്യ​മാണ്‌. അത്‌ നിങ്ങളു​ടെ ഹൃദയം അടർത്തി മറ്റൊ​രാ​ളു​ടെ കയ്യിൽ വെച്ചു​കൊ​ടു​ക്കും​പോ​ലെ​യാണ്‌. അയാൾ അത്‌ ആർദ്ര​ത​യോ​ടെ താലോ​ലി​ക്കു​മോ, അതോ തറയി​ലേക്ക്‌ ഇട്ടുക​ള​യു​മോ? ഇവിടെ, അനാവ​ശ്യ​മായ ജാള്യ​വും ഉള്ളുല​യ്‌ക്കുന്ന നൊമ്പ​ര​വും ഒഴിവാ​ക്കു​ന്ന​തിന്‌ ബൈബിൾ തത്ത്വങ്ങൾ പിൻപ​റ്റു​ന്ന​താ​യി​രി​ക്കും ഏറ്റവും നല്ലത്‌.

വിവേ​ക​ത്തോ​ടെ പ്രവർത്തി​ക്കു​ക

പ്രണയാ​ഭി​ലാ​ഷ​ങ്ങ​ളു​ടെ ചിറകി​ലേറി ദിവാ​സ്വ​പ്‌ന​വും കണ്ടിരി​ക്കാൻ എളുപ്പ​മാണ്‌. ആ സ്വപ്‌നങ്ങൾ നിങ്ങളെ വിവാ​ഹ​ദി​ന​ത്തി​ലേ​ക്കും പിന്നീ​ടുള്ള ജീവി​ത​ത്തി​ലേ​ക്കും ഒക്കെ കൂട്ടി​ക്കൊ​ണ്ടു പോ​യെ​ന്നു​വ​രാം. ഇത്തരം ഭാവനാ​വി​ലാ​സങ്ങൾ നിങ്ങളെ കോരി​ത്ത​രി​പ്പി​ച്ചേ​ക്കാ​മെ​ങ്കി​ലും അവ വെറും മായക്കാ​ഴ്‌ച​ക​ളാണ്‌. നിങ്ങൾക്കു പൂവണി​യി​ക്കാ​നാ​വാത്ത തീവ്രാ​ഭി​ലാ​ഷങ്ങൾ മനസ്സിൽ കോരി​നി​റ​യ്‌ക്കാൻ അവയ്‌ക്കു കഴിയും. എന്നാൽ, “ആശാവി​ളം​ബനം ഹൃദയത്തെ ക്ഷീണി​പ്പി​ക്കു​ന്നു” എന്നു ബൈബിൾ പറയുന്നു. (സദൃശ​വാ​ക്യ​ങ്ങൾ 13:12) പകൽക്കി​നാ​വു​കൾക്ക്‌ നിങ്ങളു​ടെ ന്യായ​ബോ​ധത്തെ വികല​മാ​ക്കാ​നും കഴിയും. എന്നാൽ, സദൃശ​വാ​ക്യ​ങ്ങൾ 14:15 ഇപ്രകാ​രം പറയുന്നു: “സൂക്ഷ്‌മ​ബു​ദ്ധി​യോ [വിവേ​കി​യോ] തന്റെ നടപ്പു സൂക്ഷി​ച്ചു​കൊ​ള്ളു​ന്നു.” വിവേകി ആയിരി​ക്കു​ക​യെ​ന്നാൽ, സാമാ​ന്യ​ബോ​ധം അഥവാ വ്യക്തമായ പ്രാ​യോ​ഗിക ചിന്തയും പിഴവറ്റ ന്യായ​ബോ​ധ​വും പ്രകട​മാ​ക്കുക എന്നാണ്‌. എന്നാൽ, നിങ്ങളി​ലെ പ്രണയ​നിർഭ​ര​മായ ഹൃദയ​ത്തിന്‌ ഈ അവസര​ത്തിൽ വിവേ​ക​ത്തോ​ടെ പ്രവർത്തി​ക്കാൻ കഴിയു​ന്നത്‌ എങ്ങനെ​യാണ്‌?

ഒന്നാമ​താ​യി, “പരിജ്ഞാ​ന​ത്തോ​ടെ പ്രവർത്തി​ക്കു”വാൻ ശ്രമി​ക്കുക. (സദൃശ​വാ​ക്യ​ങ്ങൾ 13:16) ഒരു യുവതി​യു​ടെ അഭി​പ്രാ​യം ശ്രദ്ധി​ക്കുക: “ഒരു വ്യക്തിയെ അടുത്ത​റി​യാ​തെ നിങ്ങൾക്ക്‌ അയാളെ ഉള്ളുതു​റന്നു സ്‌നേ​ഹി​ക്കാ​നാ​വില്ല.” അതു​കൊണ്ട്‌ മറ്റൊ​രാൾക്കു നിങ്ങളു​ടെ ഹൃദയം തുറന്നു​കൊ​ടു​ക്കു​ന്ന​തി​നു മുമ്പ്‌ അയാൾ ചെയ്യുന്ന കാര്യ​ങ്ങ​ളും സംസാ​രി​ക്കുന്ന വിധവും ഒക്കെ നന്നായി മനസ്സി​ലാ​ക്കുക. അദ്ദേഹം മറ്റുള്ള​വ​രോട്‌ എങ്ങനെ ഇടപെ​ടു​ന്നു എന്നു നിരീ​ക്ഷി​ക്കുക. “അയാൾ ഏതുത​ര​ക്കാ​ര​നാണ്‌ എന്ന്‌ അയാളെ അടുത്ത​റി​യാ​വുന്ന മുതിർന്ന​വ​രോ​ടും കൂട്ടു​കാ​രോ​ടും ചോദി​ക്കുക,” എന്ന്‌ ഒരു യുവാവു നിർദേ​ശി​ക്കു​ന്നു. അദ്ദേഹം ക്രിസ്‌തീയ സഭയിൽ “നല്ല സാക്ഷ്യം​കൊ​ണ്ടവൻ” ആണോ? (പ്രവൃ​ത്തി​കൾ 16:2) ഇസബെൽ എന്നു പേരുള്ള ഒരു യുവതി ഇപ്രകാ​രം പറയുന്നു: “ഒരു കൂട്ട​ത്തോ​ടൊ​പ്പം പുറത്തു​പോ​കു​ന്ന​തും അദ്ദേഹ​ത്തി​ന്റെ കുടും​ബത്തെ പരിച​യ​പ്പെ​ടു​ന്ന​തും സഹായ​ക​മാ​യി​രു​ന്നേ​ക്കാം.” അതേ, ഒരു കൂട്ട​ത്തോ​ടൊ​പ്പം ആയിരി​ക്കു​മ്പോൾ അധികം സംഭ്ര​മ​മോ ഉത്‌ക​ണ്‌ഠ​യോ ഇല്ലാതെ നിങ്ങൾക്കു മറ്റേ വ്യക്തിയെ നിരീ​ക്ഷി​ക്കാൻ കഴിയും.

ഈ വിധത്തിൽ ഒരു വ്യക്തിയെ അടുത്ത​റി​യു​ന്ന​തി​നു സമയവും ക്ഷമയും ആവശ്യ​മാണ്‌ എന്നതു ശരിതന്നെ. എന്നാൽ, ഇങ്ങനെ ചെയ്യു​ന്നത്‌ ആ വ്യക്തി​യു​ടെ മനോ​ഭാ​വം, സ്വഭാവം, ഗുണഗ​ണങ്ങൾ എന്നിവ​യൊ​ക്കെ അടുത്ത​റി​യാൻ നിങ്ങളെ സഹായി​ക്കും. ഇതിന്റെ അടിസ്ഥാ​ന​ത്തിൽ ഒന്നുകിൽ നിങ്ങൾക്ക്‌ നിങ്ങളു​ടെ ഹൃദയാ​ഭി​ലാ​ഷ​ങ്ങൾക്ക്‌ ‘പച്ചക്കൊ​ടി കാണി​ക്കാം,’ അല്ലെങ്കിൽ അവയ്‌ക്കു തിരശ്ശീ​ല​യി​ടാം. സദൃശ​വാ​ക്യ​ങ്ങൾ 20:11 ഇപ്രകാ​രം പറയുന്നു: “ബാല്യ​ത്തി​ലെ [അല്ലെങ്കിൽ യുവത്വ​ത്തി​ലെ] ക്രിയ​ക​ളാൽ തന്നേ ഒരുത്തന്റെ പ്രവൃത്തി വെടി​പ്പും നേരു​മു​ള്ള​താ​കു​മോ എന്നു അറിയാം.” അതേ, ഇന്നല്ലെ​ങ്കിൽ നാളെ അയാളു​ടെ ഉള്ളിലി​രിപ്പ്‌ പ്രവൃ​ത്തി​ക​ളി​ലൂ​ടെ വ്യക്തമാ​കും.

അതു​കൊണ്ട്‌, സമയത്തി​നു​മു​മ്പേ ഇഷ്ടം വെളി​പ്പെ​ടു​ത്താ​നുള്ള പ്രലോ​ഭ​നത്തെ ബുദ്ധി​പൂർവം ചെറു​ക്കുക. നിങ്ങൾ ചിന്തി​ക്കാ​തെ തിടു​ക്ക​ത്തിൽ നടത്തിയ അഭ്യർഥന മറ്റേയാൾ ഇരും​കൈ​യും നീട്ടി സ്വീക​രി​ച്ചെ​ന്നി​രി​ക്കട്ടെ, പിന്നീട്‌, അയാൾ ഒരു ഉത്തമ ഇണയാ​കാൻ പറ്റിയ ആളല്ലെന്ന്‌ ഒരുപക്ഷേ നിങ്ങൾ കണ്ടെത്തു​ന്നെ​ങ്കി​ലോ?d ഒരിക്കൽ അയാ​ളോ​ടുള്ള പ്രണയം വെളി​പ്പെ​ടു​ത്തി​യ​തി​നു​ശേഷം നിങ്ങൾ ആ ബന്ധത്തിൽനി​ന്നു പിന്മാ​റു​ന്നെ​ങ്കിൽ അത്‌ ആ യുവാ​വി​നെ വേദനി​പ്പി​ച്ചേ​ക്കാം, ഒരുപക്ഷേ അയാളെ ആകെ തകർത്തു​ക​ള​ഞ്ഞെന്നു വരാം.

നിങ്ങൾ നൽകുന്ന പ്രതി​ച്ഛാ​യ

നിങ്ങളു​ടെ മനസ്സിൽ കയറി​ക്കൂ​ടിയ ആ ചെറു​പ്പ​ക്കാ​രൻ നിങ്ങ​ളെ​യും നല്ലവണ്ണം നിരീ​ക്ഷി​ക്കു​ന്നു​ണ്ടാ​യി​രി​ക്കും! ദൈവിക ഗുണങ്ങൾ പ്രതി​ഫ​ലി​പ്പി​ക്കുന്ന രീതി​യി​ലാ​ണോ നിങ്ങളു​ടെ പെരു​മാ​റ്റം? “മാന്യ​മാ​യി വസ്‌ത്ര​ധാ​രണം നടത്താത്ത ധാരാളം പെൺകു​ട്ടി​കളെ ഞാൻ കണ്ടിട്ടുണ്ട്‌,” ഇസബെൽ പറയുന്നു. “ആത്മീയ കാഴ്‌ച​പ്പാ​ടുള്ള ഒരു വ്യക്തി​യു​ടെ ഹൃദയം കവരണ​മെ​ങ്കിൽ നിങ്ങൾ മാന്യ​മാ​യി വസ്‌ത്ര​ധാ​രണം നടത്തേ​ണ്ട​തുണ്ട്‌.” ഫാഷൻ ലോക​ത്തി​ന്റെ പുതു​പു​ത്തൻ അഭിരു​ചി​കൾ എന്തുത​ന്നെ​യാ​യി​ക്കൊ​ള്ളട്ടെ, നിങ്ങൾ “യോഗ്യ​മായ വസ്‌ത്രം ധരിച്ചു ലജ്ജാശീ​ല​ത്തോ​ടും സുബോ​ധ​ത്തോ​ടും​കൂ​ടെ” അണി​ഞ്ഞൊ​രു​ങ്ങു​മ്പോൾ ദൈവിക ഗുണങ്ങ​ളുള്ള ഒരു പുരു​ഷന്റെ കണ്ണിൽ നിങ്ങളു​ടെ അഴകു വർധി​ക്കു​ക​തന്നെ ചെയ്യും.—1 തിമൊ​ഥെ​യൊസ്‌ 2:9.

“വാക്കി​ലും [അഥവാ സംസാ​ര​ത്തി​ലും] . . . മാതൃ​ക​യാ​യി​രി”ക്കാൻ ബൈബിൾ യുവ ക്രിസ്‌ത്യാ​നി​കളെ പ്രോ​ത്സാ​ഹി​പ്പി​ക്കു​ന്നു. (1 തിമൊ​ഥെ​യൊസ്‌ 4:12) നിങ്ങൾ സംസാ​രി​ക്കുന്ന വിധം നിങ്ങ​ളെ​ക്കു​റി​ച്ചു വളരെ​യ​ധി​കം വെളി​പ്പെ​ടു​ത്തു​ന്നു. ഇഷ്ടപ്പെ​ടുന്ന യുവാ​വി​നോ​ടു സംസാ​രി​ക്കാൻ അവസരം ലഭിക്കു​മ്പോൾ നിങ്ങൾ എന്തു ചെയ്യണം? അയാൾ ലജ്ജാലു​വാ​ണെ​ങ്കിൽ അയാൾക്ക്‌ അസ്വസ്ഥ​ത​യും പരി​ഭ്ര​മ​വും ഒക്കെ ഉണ്ടായി​രി​ക്കും. അബി എന്ന യുവതി ഇങ്ങനെ പറയുന്നു: “അദ്ദേഹം എങ്ങനെ പ്രതി​ക​രി​ക്കും എന്ന്‌ അറിയ​ണ​മെ​ങ്കിൽ നിങ്ങൾതന്നെ സംഭാ​ഷണം തുട​ങ്ങേ​ണ്ട​തു​ണ്ടാ​യി​രി​ക്കാം.”

എങ്ങനെ തുടങ്ങണം? നിങ്ങൾ നിങ്ങ​ളെ​ക്കു​റി​ച്ചു​തന്നെ വാതോ​രാ​തെ സംസാ​രി​ച്ചു​കൊ​ണ്ടി​രി​ക്കു​ക​യാ​ണെ​ങ്കി​ലോ? എങ്കിൽ അയാളു​ടെ മനസ്സിൽ പതിയുന്ന ചിത്രം, നിങ്ങൾ സ്വന്തം കാര്യ​ത്തിൽ മാത്രം തത്‌പ​ര​യും യാതൊ​രു കാര്യ​ബോ​ധ​മി​ല്ലാ​ത്ത​വ​ളും ആണെന്നാ​യി​രി​ക്കും. ബൈബിൾ ഇപ്രകാ​രം നിർദേ​ശി​ക്കു​ന്നു: “ഓരോ​രു​ത്തൻ സ്വന്തഗു​ണമല്ല മററു​ള്ള​വന്റെ ഗുണവും കൂടെ നോ​ക്കേണം.” (ഫിലി​പ്പി​യർ 2:4) അയാളെ കുറി​ച്ചോ അയാൾക്കു താത്‌പ​ര്യ​മുള്ള കാര്യ​ങ്ങളെ കുറി​ച്ചോ ഉചിത​മായ ചില ചോദ്യ​ങ്ങൾ ചോദി​ക്കു​ന്നത്‌, മടികൂ​ടാ​തെ സംസാ​രി​ക്കാൻ കുറ​ച്ചൊ​ക്കെ അയാളെ സഹായി​ച്ചേ​ക്കാം.

ഇത്‌ ‘വഞ്ചന’ കാണി​ക്കാ​നും ‘വ്യാജം’ പറയാ​നും ഉള്ള സമയമല്ല, എന്നു​വെ​ച്ചാൽ ആ വ്യക്തി​യെ​ക്കു​റി​ച്ചു മുഖസ്‌തു​തി പറയാ​നുള്ള അവസരമല്ല എന്നർഥം. (സങ്കീർത്തനം 120:2) വിവേ​ച​ന​യുള്ള ഒരു പുരു​ഷന്‌ നിങ്ങളു​ടെ അത്തരം സംസാ​ര​ത്തി​ന്റെ പൊള്ള​ത്തരം മനസ്സി​ലാ​ക്കാൻ ബുദ്ധി​മു​ട്ടു​ണ്ടാ​യി​രി​ക്കില്ല. അയാൾ കേൾക്കാൻ ആഗ്രഹി​ക്കു​ന്നു​വെന്ന്‌ നിങ്ങൾക്കു തോന്നുന്ന കാര്യങ്ങൾ പറഞ്ഞു​കൊ​ണ്ടി​രി​ക്കു​ന്ന​തും ഒഴിവാ​ക്കുക. നിങ്ങളു​ടെ സംഭാ​ഷണം കൂടുതൽ ഗൗരവ​ത​ര​മായ കാര്യ​ങ്ങ​ളി​ലേക്കു തിരി​യു​മ്പോൾ, വ്യക്തി​പ​ര​മായ ആത്മീയ ലക്ഷ്യങ്ങ​ളെ​ക്കു​റി​ച്ചും മറ്റും സംസാ​രി​ച്ചു തുടങ്ങു​മ്പോൾ ഇതു വിശേ​ഷാൽ പ്രധാ​ന​മാണ്‌. സ്വാഭാ​വി​ക​മാ​യി പെരു​മാ​റുക, നാട്യ​മോ ജാടയോ ഇല്ലാതെ, നേരോ​ടും പരമാർഥ​ത​യോ​ടും​കൂ​ടെ ഇടപെ​ടുക. അപ്പോൾ നിങ്ങൾക്കു മനസ്സി​ലാ​കും നിങ്ങൾ ഒരേ തൂവൽപ്പ​ക്ഷി​ക​ളാ​ണോ എന്ന്‌.

പ്രതി​ക​ര​ണ​മി​ല്ലെ​ങ്കി​ലോ?

ശരി, നിങ്ങൾ വിനയ​ത്തോ​ടെ​യും മാന്യ​ത​യോ​ടെ​യും ഇടപെ​ട്ടി​ട്ടും അപ്പുറ​ത്തു​നിന്ന്‌ പ്രണയ​ത്തി​ന്റെ ഒരു നേരിയ സ്‌പന്ദ​നം​പോ​ലും കേൾക്കാ​നാ​കു​ന്നി​ല്ലെ​ങ്കി​ലോ? ഒരുപക്ഷേ, ഇതി​നോ​ടകം ആഴ്‌ച​ക​ളും മാസങ്ങ​ളും കടന്നു​പോ​യി​രി​ക്കാം, പക്ഷേ അദ്ദേഹ​ത്തി​നു നിങ്ങ​ളോ​ടുള്ള താത്‌പ​ര്യ​ത്തി​ന്റെ ലക്ഷണങ്ങൾ ഒന്നും കാണു​ന്നില്ല. ഒരുപക്ഷേ അദ്ദേഹ​ത്തിന്‌ അതു പറയാൻ മടിയാ​യി​രി​ക്കും എന്നു നിങ്ങൾ നിഗമനം ചെയ്യു​മോ? ഇങ്ങനെ ഒരു അവസര​ത്തിൽ സ്വയം ചോദി​ക്കുക: ‘അത്ര ലജ്ജാലു​വാ​ണെ​ങ്കിൽ, അദ്ദേഹം വിവാ​ഹ​ത്തി​നു സജ്ജനാ​യി​രി​ക്കു​മോ?, ഞാൻ അദ്ദേഹത്തെ വിവാഹം കഴിക്കു​ക​യാ​ണെ​ങ്കിൽ അദ്ദേഹം കുടും​ബ​ത്തി​ന്റെ ശിരഃ​സ്ഥാ​നം ഏറ്റെടു​ക്കു​മോ, അതോ അതും ഞാൻതന്നെ ചെയ്യാൻ പ്രതീ​ക്ഷി​ക്കു​മോ?’ (1 കൊരി​ന്ത്യർ 11:3) പരിചി​ന്തി​ക്കേണ്ട മറ്റൊരു ചോദ്യ​മുണ്ട്‌, ‘അദ്ദേഹ​ത്തിന്‌ ശരിക്കും ലജ്ജത​ന്നെ​യാ​ണോ, അതോ എന്നോടു പ്രേമം ഇല്ല എന്നാണോ?’ ഒടുവിൽപ്പറഞ്ഞ നിഗമ​ന​ത്തിൽ എത്തി​ച്ചേ​രു​ന്നത്‌ നിങ്ങളെ വല്ലാതെ നൊമ്പ​ര​പ്പെ​ടു​ത്തി​യേ​ക്കാം. പക്ഷേ ഓർക്കുക, ഇപ്പോൾ ഈ നൊമ്പരം ഏറ്റുവാ​ങ്ങു​ന്നെ​ങ്കിൽ, നിങ്ങളെ പ്രണയി​നി​യാ​ക്കാൻ താത്‌പ​ര്യ​മി​ല്ലാത്ത ഒരാ​ളോട്‌ നിങ്ങളു​ടെ പ്രണയാ​ഭി​ലാ​ഷങ്ങൾ അറിയി​ക്കു​മ്പോ​ഴുള്ള ജാള്യം ഒഴിവാ​ക്കാൻ നിങ്ങൾക്കു കഴിയും.

നിങ്ങ​ളോ​ടു​ള്ള ഇഷ്ടത്തിന്റെ സൂചനകൾ അദ്ദേഹം നൽകു​ന്നുണ്ട്‌ എന്നു തോന്നു​ന്നെ​ങ്കി​ലോ? അതൊന്നു പറയാൻ അദ്ദേഹം ഇത്ര വൈകു​ന്ന​തെ​ന്താണ്‌, ഞാൻ ഒന്നു സൂചി​പ്പി​ച്ചാൽ അതു പറയാൻ അദ്ദേഹ​ത്തിന്‌ എളുപ്പ​മാ​യി​രി​ക്കും എന്ന്‌ നിങ്ങൾ ചിന്തി​ക്കാൻ തുടങ്ങു​ന്നു. ഒരുപക്ഷേ ശരിയാ​യി​രി​ക്കാം. ഈ സന്ദർഭ​ത്തിൽ, നിങ്ങൾ മുൻ​കൈ​യെ​ടു​ക്കാൻ തീരു​മാ​നി​ക്കു​ന്നെ​ങ്കിൽ ശ്രദ്ധി​ക്കുക, കാരണം ഇതു സൂക്ഷി​ച്ചു​ചെ​യ്യേണ്ട ഒരു കാര്യ​മാണ്‌. നിങ്ങൾ എന്താണ്‌ പറയാൻ പോകു​ന്നത്‌ എന്നതി​നെ​ക്കു​റി​ച്ചു മാത്രമല്ല, പറയാൻ പറ്റിയ സമയം എപ്പോ​ഴാ​യി​രി​ക്കും എന്നുള്ള​തും വളരെ ഗൗരവ​ത്തോ​ടെ ചിന്തി​ക്കേ​ണ്ട​തുണ്ട്‌.

ഉദാഹ​ര​ണ​ത്തിന്‌, അദ്ദേഹ​ത്തി​ന്റെ മനസ്സിൽ ഇടംപി​ടി​ക്കാ​നുള്ള നിങ്ങളു​ടെ ആഗ്രഹ​ത്തി​ന്റെ സൂചന​യാ​യി “എനിക്കി​ഷ്ട​മാണ്‌” എന്നുമാ​ത്രം തിടു​ക്ക​ത്തിൽ പറഞ്ഞിട്ടു പോരു​ന്ന​തി​ലും മെച്ചമായ ഒരു രീതി​യിൽ കാര്യം അവതരി​പ്പി​ക്കാൻ നിങ്ങൾ തീരു​മാ​നി​ച്ചേ​ക്കാം. അദ്ദേഹത്തെ അടുത്ത​റി​യാൻ ആഗ്രഹി​ക്കു​ന്നു​വെന്ന്‌ വളരെ സ്വാഭാ​വി​ക​വും ഉചിത​വു​മായ ഒരു ചുറ്റു​പാ​ടിൽവെച്ച്‌ ഒരുപക്ഷേ നിങ്ങൾക്കു പറയാൻ കഴിയും. കാര്യം അവതരി​പ്പി​ക്കുന്ന വിധത്തിന്‌ കുറ്റവും കുറവും ഒക്കെ ഉണ്ടായി​രി​ക്കാ​മെ​ങ്കി​ലും വിഷമി​ക്കാ​നൊ​ന്നു​മില്ല. വാക്കുകൾ അത്ര മികച്ച​ത​ല്ലെ​ങ്കിൽക്കൂ​ടി അവയ്‌ക്കു പിന്നിലെ നിഷ്‌ക​പ​ട​മായ വികാരം നിങ്ങൾക്കു വേണ്ടി സംസാ​രി​ക്കും. പക്ഷേ ഒന്നോർക്കുക: നിങ്ങൾ വെളി​പ്പെ​ടു​ത്തു​ന്നത്‌ അടുത്തു പരിച​യ​പ്പെ​ടാ​നുള്ള ആഗ്രഹ​മാണ്‌. അല്ലാതെ ആ വ്യക്തിയെ വിവാ​ഹ​ജീ​വി​ത​ത്തി​ലേക്കു ക്ഷണിക്കു​കയല്ല. എങ്കിൽപ്പോ​ലും, അദ്ദേഹം ഇതു കേട്ട്‌ അമ്പരന്നു​പോ​യേ​ക്കാം. അതു​കൊണ്ട്‌ നിങ്ങൾ പറഞ്ഞതു നന്നായി ഉൾക്കൊ​ള്ളാ​നുള്ള സമയം അദ്ദേഹ​ത്തി​നു നൽകുക.

ഇനി, നിങ്ങൾ ഈ ചെറു​പ്പ​ക്കാ​ര​നെ​ക്കു​റി​ച്ചു നന്നായി മനസ്സി​ലാ​ക്കി എന്നിരി​ക്കട്ടെ. അദ്ദേഹം ദയാലു​വും പരിഗ​ണ​ന​യു​ള്ള​വ​നും ആണെന്ന്‌ നിങ്ങൾ കണ്ണാലെ കാണു​ക​യും ചെയ്‌തു. അദ്ദേഹ​ത്തിൽനി​ന്നു പരുഷ​മായ, അപമാ​ന​പ്പെ​ടു​ത്തു​ന്ന​തരം പ്രതി​ക​രണം ഉണ്ടാകു​മെ​ന്നും നിങ്ങൾ ഭയക്കേ​ണ്ട​തില്ല. എന്നാൽ നിങ്ങളു​ടെ അഭ്യർഥ​നയെ അദ്ദേഹം ദയാപു​ര​സ്സരം എന്നാൽ ദൃഢത​യോ​ടെ നിരസി​ക്കു​ന്നെ​ങ്കി​ലോ? ഇത്തരം സന്ദർഭ​ത്തിൽ ഒരു യുവാവ്‌ എങ്ങനെ പെരു​മാ​റണം? ഒരു ഭാവി ലേഖനം ഈ ചോദ്യ​ങ്ങ​ളെ​ക്കു​റി​ച്ചു ചർച്ച ചെയ്യു​ന്ന​താ​യി​രി​ക്കും. (g04 10/22)

[അടിക്കു​റി​പ്പു​കൾ]

[24-ാം പേജിലെ ചിത്രം]

അദ്ദേഹത്തിന്റെ പെരു​മാ​റ്റം ശ്രദ്ധി​ക്കു​മ്പോൾ അദ്ദേഹ​ത്തോ​ടുള്ള നിങ്ങളു​ടെ വികാ​ര​ങ്ങൾക്കു മാറ്റം വന്നേക്കാം

[24-ാം പേജിലെ ചിത്രം]

നിങ്ങൾക്ക്‌ ആരോ​ടെ​ങ്കി​ലും പ്രണയം തോന്നു​ന്നെ​ങ്കിൽ ആ വ്യക്തിയെ അറിയാ​വുന്ന ഉത്തരവാ​ദി​ത്വ​മുള്ള മുതിർന്ന​വ​രു​മാ​യി സംസാ​രി​ക്കു​ക