ആറു ഭൂഖണ്ഡങ്ങൾ ഒന്നിക്കു​ന്നി​ടം

യൂക്രെയിനിലെ ഉണരുക! ലേഖകൻ

പക്ഷിക​ളെ​യും മൃഗങ്ങ​ളെ​യും അവയുടെ സ്വാഭാ​വിക ചുറ്റു​പാ​ടു​ക​ളിൽ നിരീ​ക്ഷി​ക്കു​ന്നത്‌ നിങ്ങൾക്കി​ഷ്ട​മാ​ണോ? അങ്ങനെ​യാ​ണെ​ങ്കിൽ, ആഫ്രി​ക്ക​യും ഏഷ്യയും ഓസ്‌​ട്രേ​ലി​യ​യും യൂറോ​പ്പും വടക്കേ അമേരി​ക്ക​യും തെക്കേ അമേരി​ക്ക​യും സന്ദർശി​ക്കു​ന്നത്‌—എല്ലാം ഒരു സ്ഥലത്തു​തന്നെ—നിങ്ങൾ തീർച്ച​യാ​യും ആസ്വദി​ക്കും. അത്തര​മൊ​രു സന്ദർശനം എങ്ങനെ​യാ​ണു സാധ്യ​മാ​കു​ന്നത്‌? തെക്കൻ യൂ​ക്രെ​യി​നി​ലെ പ്രകൃതി സംരക്ഷണ കേന്ദ്ര​മായ അസ്‌കാൻയാ-നോവാ ബയോ​സ്‌ഫി​യർ റിസർവ്‌ സന്ദർശി​ക്കു​ന്ന​തി​ലൂ​ടെ. ഇവി​ടെ​യുള്ള സമതല​ങ്ങ​ളിൽ ആറു ഭൂഖണ്ഡ​ങ്ങ​ളിൽനി​ന്നുള്ള വന്യജീ​വി​കൾ വിഹരി​ക്കു​ന്നു എന്നു മാത്രമല്ല അവ സമാധാ​ന​ത്തോ​ടും ഐക്യ​ത്തോ​ടും കൂടെ ജീവി​ക്കു​ക​യും ചെയ്യുന്നു.

ഈ പ്രകൃതി സംരക്ഷണ കേന്ദ്ര​ത്തി​ന്റെ വേരുകൾ തേടി​പ്പോ​കു​ക​യാ​ണെ​ങ്കിൽ 1883-ൽ ചെന്നെ​ത്തും. ആ വർഷം ഫ്രി​ഡ്രിച്ച്‌ പിഫാൽറ്റ്‌സ്‌-പ്‌ഫൈൻ എന്ന ജർമൻ കുടി​യേ​റ്റ​ക്കാ​രൻ മനുഷ്യൻ കൈക​ട​ത്തി​യി​ട്ടി​ല്ലാത്ത വിശാ​ല​മായ ഒരു പുൽപ്ര​ദേശം പ്രകൃതി സംരക്ഷണ കേന്ദ്ര​മാ​ക്കു​ന്ന​തി​നു​വേണ്ടി തിര​ഞ്ഞെ​ടു​ത്തു. അവിടെ അദ്ദേഹ​ത്തിന്‌ 50-ലധികം വർഗങ്ങ​ളിൽപ്പെ​ടുന്ന പക്ഷിക​ളു​ടെ​യും സസ്‌ത​നി​ക​ളു​ടെ​യും ഒരു സ്വകാര്യ മൃഗശാ​ല​യു​ണ്ടാ​യി​രു​ന്നു. പിന്നീട്‌, 1887-ൽ ഒരു സസ്യശാ​സ്‌ത്ര ഉദ്യാ​ന​വും കൂട്ടി​ച്ചേർക്ക​പ്പെട്ടു. ഇപ്പോൾ അസ്‌കാൻയാ-നോവാ ബയോ​സ്‌ഫി​യർ റിസർവിൽ ഒരു സസ്യശാ​സ്‌ത്ര ഉദ്യാ​ന​വും 27,000 ഏക്കറി​ല​ധി​കം​വ​രുന്ന സ്വാഭാ​വിക അവസ്ഥയി​ലുള്ള വിശാ​ല​മായ പുൽമേ​ടും ഒരു മൃഗശാ​ല​യു​മുണ്ട്‌.

പ്രകൃതി സംരക്ഷണ കേന്ദ്രത്തെ സമീപി​ക്കു​മ്പോൾ, ആദ്യം കാണു​ന്നത്‌ സസ്യശാ​സ്‌ത്ര ഉദ്യാ​ന​മാണ്‌. വർഷങ്ങ​ളി​ലൂ​ടെ ലോക​ത്തി​ന്റെ പല ഭാഗങ്ങ​ളിൽനി​ന്നും നാനാ​തരം വൃക്ഷങ്ങൾ ശാസ്‌ത്ര​ജ്ഞ​ന്മാർ ഇവി​ടേക്കു കൊണ്ടു​വ​ന്നി​ട്ടുണ്ട്‌. പാർക്കിൽ ഏകദേശം 500 ഏക്കർ സ്ഥലത്തു മരങ്ങൾ വെച്ചു​പി​ടി​പ്പി​ച്ചി​രി​ക്കു​ന്നു. ഈ കേന്ദ്രം വരണ്ട പ്രദേ​ശത്തു സ്ഥിതി​ചെ​യ്യു​ന്ന​തി​നാൽ മരങ്ങളും കുറ്റി​ച്ചെ​ടി​ക​ളും നനയ്‌ക്കു​ന്ന​തി​നു​വേണ്ടി കുഴൽക്കി​ണ​റു​ക​ളും നീർച്ചാ​ലു​ക​ളും നിർമി​ച്ചി​ട്ടുണ്ട്‌. 1889-ൽ പാരീസ്‌ ലോക​മേ​ള​യിൽവെച്ച്‌ ഈ ഉദ്യാ​ന​ത്തിൽ ആദ്യമു​ണ്ടാ​യി​രുന്ന ഭൂപ്ര​കൃ​തി​യും ജലസേചന സംവി​ധാ​ന​വും സ്വർണ മെഡലിന്‌ അർഹമാ​യി.

ആറു ഭൂഖണ്ഡ​ങ്ങ​ളിൽനി​ന്നുള്ള മൃഗങ്ങ​ളും പക്ഷിക​ളും

തണൽവി​രിച്ച പാർക്കിൽനി​ന്നു നാം വെയി​ലേ​റ്റു​കി​ട​ക്കുന്ന പുൽമേ​ടു​ക​ളി​ലേക്കു പോകു​ന്നു. 6,000-ത്തോളം ഏക്കർ വരുന്ന വേലി​കെ​ട്ടിയ ഈ സമതല​ങ്ങ​ളിൽ ഏകദേശം 50 വ്യത്യസ്‌ത വർഗങ്ങ​ളി​ലുള്ള വന്യജീ​വി​കൾ പറ്റംപ​റ്റ​മാ​യി വിഹരി​ക്കു​ന്നു. ആദ്യം നമുക്ക്‌ ആഫ്രി​ക്ക​യിൽനി​ന്നുള്ള ചില മൃഗങ്ങളെ നിരീ​ക്ഷി​ക്കാം.

വിനോ​ദ​ത്തി​നാ​യി വേട്ടയാ​ട​പ്പെ​ടുന്ന വലിയ മൃഗങ്ങ​ളിൽവെച്ച്‌ ഏറ്റവും പേരു​കേ​ട്ട​തും അങ്ങേയറ്റം അപകട​കാ​രി​യു​മായ ഒരു മൃഗമാണ്‌ കെയ്‌പ്‌ പോത്ത്‌. അതിന്‌ നല്ല വലുപ്പ​വും—തോളു​യരം 1.7 മീറ്റർ—ഒരു മീറ്റർ നീളമുള്ള കൂറ്റൻ കൊമ്പു​ക​ളു​മാ​ണു​ള്ളത്‌. അങ്ങനെ ആരിലും മതിപ്പു​ണർത്താൻ പോന്ന​താണ്‌ അവയുടെ ആകെക്കൂ​ടി​യുള്ള രൂപം. കെയ്‌പ്‌ പോത്തു​കൾ പ്രവച​നാ​തീ​ത​മായ പ്രകൃ​ത​മു​ള്ള​വ​യും ആക്രമി​ക്കാൻ മുതി​രു​ന്ന​വ​യു​മാ​യ​തു​കൊണ്ട്‌ അവയോട്‌ അടുക്കു​ന്നത്‌ അത്ര പന്തിയല്ല.

നമ്മുടെ ശ്രദ്ധ ആകർഷി​ക്കുന്ന മറ്റൊരു മൃഗം തെക്കു​കി​ഴക്കൻ ആഫ്രി​ക്ക​യി​ലെ ഇലൻഡ്‌ എന്ന ഒരു തരം മാനാണ്‌. 1892-ലാണ്‌ അവ ആദ്യമാ​യി ഇവിടെ എത്തി​ച്ചേർന്നത്‌. പ്രകൃതി സംരക്ഷണ കേന്ദ്ര​ത്തിൽ വേട്ടയാ​ടൽ നിരോ​ധി​ച്ചി​രി​ക്കു​ന്ന​തി​നാൽ അന്നുമു​തൽ ഇലൻഡു​കൾ ഇവിടെ സമാധാ​ന​ത്തോ​ടെ ജീവി​ക്കു​ന്നു. സന്ദർശകർ നോക്കി​നിൽക്കെ അവ മേഞ്ഞു​ന​ട​ക്കു​ന്നു, അവയ്‌ക്ക്‌ മനുഷ്യ​രെ തെല്ലും ഭയമില്ല. ഇലൻഡു​ക​ളിൽ ചിലതി​നെ ഇണക്കി​വ​ളർത്തു​ക​യും പശുക്ക​ളു​ടെ പാൽ കറന്നെ​ടു​ക്കു​ന്ന​തു​പോ​ലെ അവയുടെ പാൽ കറന്നെ​ടു​ക്കു​ക​യും ചെയ്യുന്നു. കൊഴു​പ്പു കൂടു​ത​ലുള്ള പോഷ​ക​സ​മൃ​ദ്ധ​മായ ഈ പാൽ ഉദരത്തി​ലെ അൾസർ പോലു​ള്ള​വ​യു​ടെ ചികി​ത്സ​യ്‌ക്കാ​യി ഉപയോ​ഗി​ക്കു​ന്നു.

പറക്കാൻ കഴിവി​ല്ലാത്ത, എമു പക്ഷി ഓസ്‌​ട്രേ​ലി​യൻ സ്വദേ​ശി​യാണ്‌. വലുപ്പ​ത്തിൽ ഒട്ടകപ്പക്ഷി കഴിഞ്ഞാൽ ലോക​ത്തിൽ അടുത്ത സ്ഥാനം എമുവി​നാണ്‌. ചില എമു പക്ഷികൾക്ക്‌ 1.8 മീറ്റർ ഉയരവും 59 കിലോ​ഗ്രാം ഭാരവും കാണും. വലകൊ​ണ്ടുള്ള ഒരു വേലി ഈ പക്ഷികളെ മറ്റു ജീവി​ക​ളിൽനി​ന്നു വേർതി​രി​ക്കു​ന്നു​വെ​ങ്കി​ലും സ്വത​ന്ത്ര​മാ​യി ഓടി​ന​ട​ക്കാൻ പാകത്തി​നു വലുതാണ്‌ അവയുടെ പ്രദേശം.

എമു പക്ഷിക​ളു​ടെ കൗതു​ക​മു​ണർത്തുന്ന ഒരു പ്രത്യേ​കത, മുട്ട വിരിഞ്ഞു പുറത്തു​വ​രു​ന്ന​തി​നു മുമ്പ്‌ പക്ഷിക്കു​ഞ്ഞു​ങ്ങൾ ആൺ എമു പക്ഷിയു​ടെ ശബ്ദത്തോ​ടു പ്രതി​ക​രി​ക്കു​ന്നു എന്നുള്ള​താണ്‌. ഉദാഹ​ര​ണ​ത്തിന്‌, മുട്ട വിരി​യു​ന്ന​തി​നു കുറച്ചു മുമ്പായി ആൺ എമു പക്ഷിയു​ടെ റെക്കോർഡു ചെയ്‌ത ശബ്ദം കേൾപ്പി​ച്ചാൽ ഉള്ളിലുള്ള കുഞ്ഞു​ങ്ങ​ളു​ടെ ചലനം നിമിത്തം മുട്ട മുമ്പോ​ട്ടും പുറ​കോ​ട്ടും ചലിക്കു​മെന്നു പറയ​പ്പെ​ടു​ന്നു. എന്നിരു​ന്നാ​ലും പെൺപ​ക്ഷി​യു​ടെ ശബ്ദത്തോട്‌ അവ പ്രതി​ക​രി​ക്കു​ന്നില്ല. എന്തു​കൊണ്ട്‌?

മുട്ടയി​ടു​ന്ന​തു പെൺപ​ക്ഷി​യാ​ണെ​ങ്കി​ലും മുട്ടകൾക്ക്‌ അടയി​രി​ക്കു​ന്നത്‌ ആൺപക്ഷി​യാണ്‌. മുട്ട വിരി​യു​ന്ന​തു​വരെ ഏകദേശം 50 ദിവസം അവൻ അവയെ സംരക്ഷി​ക്കു​ന്നു. മുട്ട വിരിഞ്ഞു കുഞ്ഞുങ്ങൾ പുറത്തു വന്നുക​ഴി​ഞ്ഞാൽ അവയെ പരിപാ​ലി​ക്കു​ന്ന​തും അവനാണ്‌. അതു​കൊണ്ട്‌ മുട്ടയ്‌ക്കു​ള്ളിൽ ആയിരി​ക്കു​മ്പോൾത്തന്നെ തങ്ങളെ ആരാണ്‌ സംരക്ഷി​ക്കു​ന്ന​തെന്ന്‌ കുഞ്ഞു​ങ്ങൾക്കു നല്ലവണ്ണം അറിയാം. ഇവ സാധാരണ മുട്ടകളല്ല കേട്ടോ, കടും പച്ച നിറവും നല്ല വലുപ്പ​വു​മുള്ള ഈ മുട്ടകൾക്ക്‌ ഏകദേശം 700 ഗ്രാം തൂക്കം വരും!

ഈ കേന്ദ്ര​ത്തിൽ, പെഷെ​വാൽസ്‌കിസ്‌ കുതി​ര​ക​ളു​ടെ കൂട്ടങ്ങ​ളെ​യും കാണാം. 1899-ൽ അവയെ മംഗോ​ളി​യൻ പുൽപ്ര​ദേ​ശ​ങ്ങ​ളിൽനി​ന്നും കൊണ്ടു​വ​ന്ന​താണ്‌. മേച്ചൽപ്പു​റ​ങ്ങ​ളു​ടെ അഭാവ​വും വേട്ടയാ​ട​ലും കാരണം 1960-കളിൽ ഈ കുതി​ര​കൾക്ക്‌ വന്യചു​റ്റു​പാ​ടു​ക​ളിൽ വംശനാ​ശം സംഭവി​ച്ച​താ​യി കരുത​പ്പെ​ടു​ന്നു.

ഇന്ന്‌, ഈ ഇനത്തിൽപ്പെട്ട 1,100-ഓളം കുതി​രകൾ വിവിധ മൃഗശാ​ല​ക​ളി​ലും വന്യജീ​വി​സ​ങ്കേ​ത​ങ്ങ​ളി​ലു​മാ​യി സംരക്ഷി​ക്ക​പ്പെ​ടു​ന്നുണ്ട്‌. അതിൽ നൂറോ​ളം എണ്ണം അസ്‌കാൻയാ-നോവാ പ്രകൃതി സംരക്ഷണ കേന്ദ്ര​ത്തി​ലാണ്‌. ഈ മൃഗങ്ങളെ കാടു​ക​ളിൽ പുനര​വ​ത​രി​പ്പി​ക്കാ​നുള്ള ഉദ്യമ​ത്തി​ലാണ്‌ ശാസ്‌ത്രജ്ഞർ. അതിന്റെ ഭാഗമാ​യി ഇത്തരം 21 കുതി​ര​കളെ 1992/93-ൽ മംഗോ​ളി​യ​യി​ലേക്കു തിരികെ കൊണ്ടു​പോ​യി.

ഈ പ്രകൃതി സംരക്ഷണ കേന്ദ്ര​ത്തി​ലെ ജീവി​വർഗ​ങ്ങ​ളിൽ എണ്ണത്തിൽ ഏറ്റവും കൂടു​ത​ലു​ള്ളത്‌ ചൈന​യിൽനി​ന്നും ജപ്പാനിൽനി​ന്നു​മുള്ള പുള്ളി​മാ​നാണ്‌. ഇതിന്റെ ശരീര​ത്തിൽ പുള്ളി​ക​ളു​ള്ള​തി​നാൽ ഇതിനെ പൂമാൻ എന്നും വിളി​ക്കു​ന്നു. മെലി​ഞ്ഞൊ​തു​ങ്ങിയ ശരീര​വും ചെറിയ തലയിലെ പ്രൗഢി​യുള്ള കൊമ്പു​ക​ളും ഈ ജീവിയെ അഴകേ​റി​യ​താ​ക്കു​ന്നു.

ഭാഗി​ക​മാ​യി വന്യമൃ​ഗ​ങ്ങ​ളു​ടെ ഗണത്തിൽപ്പെ​ടു​ത്താൻ കഴിയുന്ന കൂറ്റൻ ഇന്ത്യൻ കാളയാണ്‌ ഗായൽ. അവയും പുൽമേ​ടു​ക​ളിൽ ശാന്തമാ​യി മേയു​ന്നതു കാണാം. ഇന്ത്യയി​ലാ​ണെ​ങ്കിൽ പകൽസ​മ​യത്ത്‌ ഇവ കാട്ടിൽ മേയാൻ പോകും, രാത്രി​യിൽ ഗ്രാമ​ത്തി​ലേക്കു മടങ്ങു​ക​യും ചെയ്യും. അസ്‌കാൻയാ-നോവാ​യിൽ കാടോ ഗ്രാമ​മോ ഇല്ലെങ്കി​ലും മറ്റു മൃഗപ​റ്റ​ങ്ങ​ളോ​ടൊ​പ്പം ഇവിടത്തെ പുൽമേ​ടു​ക​ളിൽ അവ സ്വൈ​ര​മാ​യി വിഹരി​ക്കു​ന്നു.

അമേരി​ക്കൻ ബൈസ​ണി​ന്റെ അല്ലെങ്കിൽ കാട്ടു​പോ​ത്തി​ന്റെ ശക്തിയും വലുപ്പ​വും അപാരം​ത​ന്നെ​യാണ്‌. ഏകദേശം 150 വർഷം​മുമ്പ്‌, കോടി​ക്ക​ണ​ക്കി​നു​വ​രുന്ന ഈ ഭീമന്മാർ വടക്കേ അമേരി​ക്കൻ പുൽപ്ര​ദേ​ശ​ങ്ങ​ളിൽ വിഹരി​ച്ചി​രു​ന്നു, എന്നാൽ വേട്ടയാ​ട​ലി​ന്റെ ഫലമായി അവ വംശനാ​ശ​ത്തി​ന്റെ വക്കോ​ള​മെത്തി. യൂറോ​പ്പിൽ ഇവിടെ മാത്രമേ ഇപ്പോൾ അമേരി​ക്കൻ കാട്ടു​പോ​ത്തു​ക​ളു​ടെ പറ്റത്തെ കാണാൻ സാധി​ക്കു​ക​യു​ള്ളൂ. വേനൽക്കാ​ല​ത്താ​യാ​ലും ശൈത്യ​കാ​ല​ത്താ​യാ​ലും ഈ പുൽമേ​ടു​കൾ തങ്ങളുടെ സ്വാഭാ​വിക വാസ​മേ​ഖ​ല​ക​ളാ​ണെന്ന പ്രതീ​തി​യാണ്‌ കാട്ടു​പോ​ത്തു​കൾക്കു​ള്ളത്‌.

തെക്കേ അമേരി​ക്കയെ പ്രതി​നി​ധീ​ക​രി​ക്കു​ന്നത്‌ പറക്കാൻ കഴിവി​ല്ലാത്ത റിയ (അല്ലെങ്കിൽ നന്ദു) എന്ന വലിയ പക്ഷിയാണ്‌. ഓസ്‌​ട്രേ​ലി​യൻ എമുവി​നോട്‌ സാമ്യ​മുള്ള ഈ പക്ഷികൾക്ക്‌ 1.5 മീറ്റർ ഉയരവും 50 കിലോ​ഗ്രാം ഭാരവും കണ്ടേക്കാം. എമുവി​നെ​പ്പോ​ലെ ആൺ റിയയാണ്‌ മുട്ടയ്‌ക്ക്‌ അടയി​രി​ക്കു​ന്നത്‌. എന്നാൽ എമു പക്ഷികൾക്ക്‌ ഒരു ഇണയെ ഉള്ളു​വെ​ങ്കിൽ റിയകൾക്ക്‌ ഒന്നി​ലേറെ ഇണകളു​ണ്ടെ​ന്നു​ള്ള​താണ്‌ പ്രകട​മായ ഒരു വ്യത്യാ​സം. അതു​കൊണ്ട്‌ മൂന്നു​മു​തൽ അഞ്ചുവരെ പെൺ റിയകൾ ഒരു കൂട്ടിൽത്തന്നെ മുട്ടകൾ ഇട്ടേക്കാം.

ചെമന്ന മാനും റോ മാനും യൂറോ​പ്പിൽനി​ന്നു​ള്ള​വ​യാണ്‌. പുൽമേ​ടു​ക​ളിൽ സുഖമാ​യി ജീവി​ക്കുന്ന അസാമാ​ന്യ പൊരു​ത്ത​പ്പെടൽ പ്രാപ്‌തി​യുള്ള ഈ മൃഗങ്ങൾക്ക്‌ ചൂടി​നെ​യും തണുപ്പി​നെ​യും ഒരു​പോ​ലെ ചെറു​ത്തു​നിൽക്കാ​നുള്ള കഴിവുണ്ട്‌. യൂറോ​പ്പി​ന്റെ വിവിധ ഭാഗങ്ങ​ളി​ലുള്ള വന്യജീ​വി സങ്കേത​ങ്ങ​ളി​ലും അതു​പോ​ലെ​തന്നെ വേട്ടയാ​ട​ലി​നാ​യി വേർതി​രി​ച്ചി​ട്ടുള്ള പ്രദേ​ശ​ങ്ങ​ളി​ലും വംശവർധന നടത്തു​ന്ന​തി​നു​വേണ്ടി ഇവി​ടെ​യുള്ള മാനു​കളെ ഉപയോ​ഗി​ക്കു​ന്നു. ഷെറ്റ്‌ലാൻഡ്‌ പോണി​കൾ എന്ന ചെറിയ ഇനം കുതി​രകൾ 1960-ലാണ്‌ വടക്കൻ യൂറോ​പ്പിൽനി​ന്നും അസ്‌കാൻയാ-നോവാ​യി​ലെ​ത്തി​ച്ചേർന്നത്‌. അപ്പോൾമു​തൽ അവയുടെ സംഖ്യ ഗണ്യമാ​യി വർധി​ച്ചി​രി​ക്കു​ന്നു.

ഈ പ്രകൃതി സംരക്ഷണ കേന്ദ്രം വരയൻ കുതി​ര​ക​ളു​ടെ​യും ബ്ലൂ വിൽഡെ​ബി​സ്റ്റു​ക​ളു​ടെ​യും (വലിയ ആഫ്രിക്കൻ ആന്റലോപ്‌) ഏഷ്യൻ കാട്ടു കഴുത​ക​ളു​ടെ​യും സൈഗ​ക​ളു​ടെ​യും (യുറേ​ഷ്യൻ ആന്റലോപ്‌) അതു​പോ​ലെ​തന്നെ വൈവി​ധ്യ​മാർന്ന ഒട്ടനവധി പക്ഷിക​ളു​ടെ​യും സങ്കേത​വും കൂടി​യാണ്‌. ചില ജീവികൾ വർഷം മുഴു​വ​നും പുൽമേ​ടു​ക​ളിൽ കഴിയു​മ്പോൾ മറ്റു ചിലതി​നെ ശൈത്യ​കാ​ലത്ത്‌ ഫാം കെട്ടി​ട​ങ്ങ​ളി​ലേക്കു മാറ്റി​പ്പാർപ്പി​ക്കു​ന്നു.

പ്രകൃതി സംരക്ഷണ മേഖല പരിര​ക്ഷി​ക്ക​പ്പെ​ടു​ന്നു

ഇപ്പോൾ, യൂ​ക്രേ​നി​യൻ ശാസ്‌ത്ര ഗവേഷണ ഇൻസ്റ്റി​റ്റ്യൂ​ട്ടി​ന്റെ ഒരു പഠന​കേ​ന്ദ്ര​മാണ്‌ അസ്‌കാൻയാ-നോവാ. പുൽമേ​ടു​കളെ അവയുടെ സ്വാഭാ​വിക അവസ്ഥയിൽ നിലനി​റു​ത്തു​ന്ന​തി​നും പുതിയ ചുറ്റു​പാ​ടു​മാ​യി ഇണങ്ങി​ച്ചേ​രാൻ ജീവി​വർഗ​ങ്ങളെ സഹായി​ക്കു​ന്ന​തി​നും​വേണ്ടി ഇൻസ്റ്റി​റ്റ്യൂ​ട്ടി​ലുള്ള ജോലി​ക്കാർ കഠിന​മാ​യി യത്‌നി​ക്കു​ന്നു. മറ്റു രാജ്യ​ങ്ങ​ളിൽനി​ന്നു കൊണ്ടു​വ​ന്ന​തും അപൂർവ​വു​മായ ജീവി​ക​ളു​ടെ ഇപ്പോ​ഴുള്ള ശേഖര​ത്തി​ന്റെ ഗുണമേന്മ മെച്ച​പ്പെ​ടു​ത്താൻ ശാസ്‌ത്ര​ജ്ഞ​രും പരി​ശ്ര​മി​ക്കു​ന്നു.

പ്രകൃതി സംരക്ഷണ മേഖലകൾ ഭൂമി​യു​ടെ പല ഭാഗങ്ങ​ളി​ലു​മുണ്ട്‌. നിങ്ങൾക്ക്‌ അവ വടക്കേ അമേരി​ക്ക​യി​ലെ​യും തെക്കേ അമേരി​ക്ക​യി​ലെ​യും പ്രെയ​റി​ക​ളി​ലും പാംപ​ക​ളി​ലും ആഫ്രി​ക്ക​യി​ലെ സാവന്ന​ക​ളി​ലും ഓസ്‌​ട്രേ​ലി​യ​യി​ലെ പുൽപ്ര​ദേ​ശ​ങ്ങ​ളി​ലും ഏഷ്യയി​ലെ​യും യൂറോ​പ്പി​ലെ​യും സ്റ്റെപ്പി​ക​ളി​ലും കാണാൻ സാധി​ക്കും. തനതായ സവി​ശേ​ഷ​ത​ക​ളോ​ടു​കൂ​ടിയ അവയിൽ ഓരോ​ന്നി​ലും വിവിധ ഇനങ്ങളി​ലുള്ള സസ്യങ്ങ​ളും ജന്തുജാ​ല​ങ്ങ​ളു​മുണ്ട്‌. ഭൂമി​യു​ടെ വിവിധ ഭാഗങ്ങ​ളിൽ നിന്നുള്ള ജീവി​വർഗ​ങ്ങൾക്ക്‌ അവയുടെ ചുറ്റു​പാ​ടു​ക​ളു​മാ​യി ഇഴുകി​ച്ചേ​രാ​നും സമാധാ​ന​ത്തോ​ടെ ഒരുമി​ച്ചു കഴിയാ​നും ആകു​മെ​ന്നാണ്‌ അസ്‌കാൻയാ-നോവാ പ്രകൃതി സംരക്ഷണ കേന്ദ്ര​ത്തി​ന്റെ അന്താരാ​ഷ്‌ട്ര സ്വഭാവം കാണി​ക്കു​ന്നത്‌.

ദൈവ​രാ​ജ്യം മനുഷ്യർക്കി​ട​യിൽ മാത്രമല്ല ഭൂമി​യി​ലുള്ള നാനാ​തരം ജന്തുക്കൾക്കി​ട​യി​ലും സമാധാ​നം കൊണ്ടു​വ​രു​മെന്ന്‌ ബൈബിൾ പ്രവചി​ച്ചി​രി​ക്കുന്ന സമയത്തി​നാ​യി അനേകം ആളുകൾ വലിയ ആകാം​ക്ഷ​യോ​ടെ നോക്കി​പ്പാർത്തി​രി​ക്കു​ന്നു.—യെശയ്യാ​വു 11:6-9; ഹോശേയ 2:18; പ്രവൃ​ത്തി​കൾ 10:34, 35.

[14-ാം പേജിലെ മാപ്പ്‌]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

അസ്‌കാൻയാ-നോവാ ബയോ​സ്‌ഫി​യർ റിസർവ്‌

[15-ാം പേജിലെ ചിത്രം]

ഇലൻഡ്‌

[15-ാം പേജിലെ ചിത്രം]

കെയ്‌പ്‌ പോത്ത്‌

[15-ാം പേജിലെ ചിത്രം]

എമു

[16-ാം പേജിലെ ചിത്രം]

പുള്ളിമാൻ

[16-ാം പേജിലെ ചിത്രം]

പെഷെവാൽസ്‌കിസ്‌ കുതിര

[16-ാം പേജിലെ ചിത്രം]

അമേരിക്കൻ കാട്ടു​പോത്ത്‌

[16, 17 പേജു​ക​ളി​ലെ ചിത്രം]

റിസർവ്‌ വൈവി​ധ്യ​മാർന്ന ഒട്ടനവധി പക്ഷിക​ളു​ടെ സങ്കേത​വു​മാണ്‌

[17-ാം പേജിലെ ചിത്രം]

റിയ

[17-ാം പേജിലെ ചിത്രം]

റോ മാൻ

[17-ാം പേജിലെ ചിത്രം]

ചെമന്ന മാൻ

[17-ാം പേജിലെ ചിത്രം]

സസ്യശാസ്‌ത്ര ഉദ്യാനം

[15-ാം പേജിലെ ചിത്ര​ങ്ങൾക്ക്‌ കടപ്പാട്‌]

ഇലൻഡും എമുവും: Biosphere Reserve “Askaniya-Nova,” Ukraine; ഗ്ലോബുകൾ: Mountain High Maps® Copyright © 1997 Digital Wisdom, Inc.

[16-ാം പേജിലെ ചിത്ര​ങ്ങൾക്ക്‌ കടപ്പാട്‌]

മാൻ: Biosphere Reserve “Askaniya-Nova,” Ukraine; ഗ്ലോബുകൾ: Mountain High Maps® Copyright © 1997 Digital Wisdom, Inc.

[17-ാം പേജിലെ ചിത്ര​ങ്ങൾക്ക്‌ കടപ്പാട്‌]

പക്ഷികൾ: Biosphere Reserve “Askaniya-Nova,” Ukraine; പുഷ്‌പ​ങ്ങ​ളും ഉദ്യാനവും: Olha Dvorna/ Biosphere Reserve “Askaniya-Nova,” Ukraine; ഗ്ലോബുകൾ: Mountain High Maps® Copyright © 1997 Digital Wisdom, Inc.