പ്രകൃതി എന്തു പഠിപ്പി​ക്കു​ന്നു?

“മൃഗങ്ങ​ളോ​ടു ചോദിക്ക; അവ നിന്നെ ഉപദേ​ശി​ക്കും; ആകാശ​ത്തി​ലെ പക്ഷിക​ളോ​ടു ചോദിക്ക; അവ പറഞ്ഞു​ത​രും. അല്ല, ഭൂമി​യോ​ടു സംഭാ​ഷിക്ക; അതു നിന്നെ ഉപദേ​ശി​ക്കും; സമു​ദ്ര​ത്തി​ലെ മത്സ്യം നിന്നോ​ടു വിവരി​ക്കും.”—ഇയ്യോബ്‌ 12:7, 8.

അടുത്ത​കാ​ലത്ത്‌ ശാസ്‌ത്ര​ജ്ഞ​ന്മാ​രും എഞ്ചിനീ​യർമാ​രും അക്ഷരാർഥ​ത്തിൽ സസ്യമൃ​ഗാ​ദി​ക​ളിൽനിന്ന്‌ ‘ഉപദേശം’ സ്വീക​രി​ച്ചി​രി​ക്കു​ന്നു. പുതിയ ഉത്‌പ​ന്നങ്ങൾ നിർമി​ക്കാ​നും നിലവി​ലുള്ള യന്ത്രങ്ങ​ളു​ടെ കാര്യ​ക്ഷമത മെച്ച​പ്പെ​ടു​ത്താ​നു​മാ​യി അവർ ജീവജാ​ല​ങ്ങ​ളു​ടെ രൂപസ​വി​ശേ​ഷ​തകൾ പഠനവി​ധേ​മാ​ക്കു​ക​യും അതെല്ലാം പകർത്താൻ ശ്രമി​ക്കു​ക​യും ചെയ്യുന്നു. ബയോ​മി​മെ​റ്റി​ക്‌സ്‌ എന്നാണ്‌ ഈ ശാസ്‌ത്ര​ശാ​ഖ​യു​ടെ പേര്‌. പിൻവ​രുന്ന ഉദാഹ​ര​ണങ്ങൾ പരിചി​ന്തി​ക്കു​മ്പോൾ ‘ഈ രൂപമാ​തൃ​ക​ക​ളു​ടെ​യെ​ല്ലാം ബഹുമതി അർഹി​ക്കു​ന്നത്‌ ആരാണ്‌?’ എന്നു സ്വയം ചോദി​ക്കുക.

തിമിം​ഗ​ല​ത്തി​ന്റെ ചിറകു​ക​ളിൽനി​ന്നു പഠിക്കു​ന്നു

വിമാ​ന​ത്തി​ന്റെ രൂപകൽപ്പനാ വിദഗ്‌ധർക്ക്‌ കൂനൻ തിമിം​ഗ​ല​ത്തിൽനിന്ന്‌ എന്തെങ്കി​ലും പഠിക്കാ​നു​ണ്ടോ? ഉണ്ട്‌, വളരെ​യ​ധി​കം. പൂർണ​വ​ളർച്ച​യെ​ത്തിയ ഒരു കൂനൻ തിമിം​ഗ​ല​ത്തി​നു 30 ടണ്ണോളം ഭാരമുണ്ട്‌. 12 മീറ്റർ നീളവും അനായാ​സം വഴങ്ങാത്ത ശരീര​വും വലിയ ചിറകു​ക​ളു​മുള്ള ഇവ വെള്ളത്തിൽ നിഷ്‌പ്ര​യാ​സം തെന്നി​നീ​ങ്ങു​ന്നു. ഉദാഹ​ര​ണ​ത്തിന്‌ ഇരതേ​ടു​മ്പോൾ ഇവ, തുടർച്ച​യാ​യി കുമി​ളകൾ വിട്ടു​കൊണ്ട്‌ കവചജീ​വി​ക​ളു​ടെ​യും മത്സ്യങ്ങ​ളു​ടെ​യും അടിയിൽനിന്ന്‌ സർപ്പി​ളാ​കൃ​തി​യിൽ മുകളി​ലേക്കു നീന്തി​ച്ചെ​ല്ലു​ന്നു. 1.5 മീറ്റർ മാത്രം വ്യാസം​വ​രുന്ന ഈ കൊച്ചു കുമി​ളവല, അതിൽ കുടു​ങ്ങുന്ന ജീവികൾ ജലോ​പ​രി​ത​ല​ത്തിൽ ഒരുമി​ച്ചു​വ​രാൻ ഇടയാ​ക്കു​ന്നു. അങ്ങനെ കുമി​ളവല ഒരുക്കുന്ന സ്വാദി​ഷ്‌ഠ​മായ സദ്യ ഇവ ആർത്തി​യോ​ടെ അകത്താ​ക്കു​ന്നു.

അധികം വഴങ്ങാത്ത ശരീര​മുള്ള ഈ ജീവി വളരെ ചെറിയ വട്ടത്തി​നു​ള്ളിൽ തിരി​യു​ന്നത്‌ എങ്ങനെ​യാണ്‌? അതു ഗവേഷ​കരെ ശരിക്കും അമ്പരപ്പി​ച്ചു. അതിന്റെ ചിറകു​ക​ളു​ടെ ആകൃതി​യി​ലാണ്‌ രഹസ്യം ഒളിഞ്ഞി​രി​ക്കു​ന്ന​തെന്ന്‌ അവർ കണ്ടെത്തി. വിമാ​ന​ത്തി​ന്റെ ചിറകു​ക​ളിൽനി​ന്നു വ്യത്യ​സ്‌ത​മാ​യി അതിന്റെ ചിറകു​ക​ളു​ടെ മുൻഭാ​ഗം കുതകൾ നിറഞ്ഞ​താണ്‌. അവിടെ റ്റ്യൂബർക്കിൾസ്‌ എന്നു വിളി​ക്ക​പ്പെ​ടുന്ന മുഴക​ളു​ടെ ഒരു നിരതന്നെ ഉണ്ട്‌.

തിമിം​ഗ​ലം വെള്ളത്തി​ലൂ​ടെ പാഞ്ഞു​നീ​ങ്ങു​മ്പോൾ ഈ മുഴകൾ ഉത്ഥാപകം (lift) വർധി​പ്പി​ക്കു​ക​യും വലിവ്‌ (drag) കുറയ്‌ക്കു​ക​യും ചെയ്യുന്നു. അതെങ്ങനെ? തിമിം​ഗലം കുത്തനെ മുകളി​ലേക്ക്‌ ഉയരു​മ്പോൾപ്പോ​ലും വെള്ളം ചിറകു​കൾക്കു മുകളി​ലൂ​ടെ അതി​വേഗം കറങ്ങി​യൊ​ഴു​കാൻ റ്റ്യൂബർക്കിൾസ്‌ ഇടയാ​ക്കു​ന്നു​വെന്ന്‌ നാച്വറൽ ഹിസ്റ്ററി എന്ന മാസിക വിശദീ​ക​രി​ക്കു​ന്നു. ചിറകി​ന്റെ മുൻഭാ​ഗം നിരപ്പു​ള്ള​താ​യി​രു​ന്നെ​ങ്കിൽ അതിന്റെ പിമ്പിൽ ചുഴികൾ രൂപം​കൊ​ള്ളു​ക​യും ആവശ്യ​മായ ഉത്ഥാപകം ലഭിക്കാ​തെ പോകു​ക​യും ചെയ്യു​മാ​യി​രു​ന്നു. അങ്ങനെ​യാ​കു​മ്പോൾ ഇത്ര ചെറിയ വൃത്തത്തി​നു​ള്ളിൽ മുകളി​ലേ​ക്കു​യ​രാൻ അതിനു സാധി​ക്കാ​തെ വരുമാ​യി​രു​ന്നു.

ഈ കണ്ടുപി​ടി​ത്തം​കൊണ്ട്‌ എന്തെല്ലാം പ്രയോ​ജ​ന​ങ്ങ​ളുണ്ട്‌? തിമിം​ഗ​ല​ത്തി​ന്റെ ചിറകു​ക​ളു​ടെ രൂപമാ​തൃ​ക​യിൽ നിർമി​ക്ക​പ്പെ​ടുന്ന വിമാ​ന​ത്തി​ന്റെ ചിറകു​കൾക്ക്‌ ഫ്‌ളാ​പ്പു​ക​ളും വായു​പ്ര​വാ​ഹ​ത്തി​ന്റെ ദിശ മാറ്റാ​നുള്ള മറ്റ്‌ ഉപകര​ണ​ങ്ങ​ളും വളരെ കുറച്ചു മാത്രമേ വേണ്ടി​വ​രു​ക​യു​ള്ളൂ. അത്തരം ചിറകു​കൾ സുരക്ഷി​ത​വും അവയുടെ കേടു​പാ​ടു തീർക്കു​ന്നത്‌ എളുപ്പ​വു​മാ​യി​രി​ക്കും. സമീപ​ഭാ​വി​യിൽത്തന്നെ “കൂനൻ തിമിം​ഗ​ല​ത്തി​ന്റെ ചിറകു​ക​ളി​ലു​ള്ള​തു​പോ​ലുള്ള മുഴകൾ എല്ലാ ജെറ്റ്‌ വിമാ​ന​ങ്ങ​ളി​ലും നമുക്കു കാണാൻ കഴി​ഞ്ഞേ​ക്കും” എന്നാണ്‌ ബയോ​മെ​ക്കാ​നി​ക്ക്‌സ്‌ വിദഗ്‌ധ​നായ ജോൺ ലോം​ഗി​ന്റെ വിശ്വാ​സം.

കടൽക്കാ​ക്ക​യു​ടെ ചിറകു​കൾ അനുക​രി​ക്കു​ന്നു

പക്ഷിക​ളു​ടെ ചിറകു​ക​ളു​ടെ മാതൃ​ക​യി​ലാണ്‌ വിമാ​ന​ത്തി​ന്റെ ചിറകു​കൾ രൂപകൽപ്പന ചെയ്യ​പ്പെ​ട്ടി​രി​ക്കു​ന്നത്‌. എന്നിരു​ന്നാ​ലും അടുത്ത​കാ​ലത്ത്‌ എഞ്ചിനീ​യർമാർ അനുക​ര​ണ​ത്തി​ന്റെ കാര്യ​ത്തിൽ നിർണാ​യ​ക​മായ ഒരു ചുവടു​വെപ്പ്‌ നടത്തി​യി​രി​ക്കു​ന്നു. “ആകാശത്ത്‌ ചിറക​ടി​ച്ചു നിൽക്കാ​നും കൂപ്പു​കു​ത്താ​നും ശരവേ​ഗ​ത്തിൽ ഉയർന്നു പറക്കാ​നു​മുള്ള കടൽക്കാ​ക്ക​യു​ടെ കഴിവു​കൾ സംയോ​ജി​പ്പി​ച്ചു​കൊണ്ട്‌ പൈല​റ്റി​ല്ലാ​തെ, റിമോട്ട്‌ കൺ​ട്രോ​ളി​ന്റെ സഹായ​ത്താൽ പറക്കുന്ന വിമാ​ന​ത്തി​ന്റെ ഒരു മാതൃക ഫ്‌ളോ​റി​ഡാ സർവക​ലാ​ശാ​ല​യി​ലെ ഗവേഷകർ വികസി​പ്പി​ച്ചെ​ടു​ത്തി​രി​ക്കു​ന്നു” എന്ന്‌ ന്യൂ സയന്റിസ്റ്റ്‌ മാസിക റിപ്പോർട്ടു ചെയ്യുന്നു.

തോൾഭാ​ഗ​വും ചിറകു​ക​ളു​ടെ മുട്ടു​ക​ളും വഴക്കമു​ള്ള​താ​യ​തി​നാൽ കടൽക്കാ​ക്ക​കൾക്ക്‌ അമ്പരപ്പി​ക്കുന്ന അഭ്യാ​സ​പ്ര​ക​ട​നങ്ങൾ കാഴ്‌ച​വെ​ക്കാൻ കഴിയു​ന്നു. ചിറകു​ക​ളു​ടെ ഈ മാതൃക അനുക​രി​ച്ചു​കൊണ്ട്‌ “24 ഇഞ്ച്‌ നീളമുള്ള ഈ വിമാനം ഒരു കൊച്ചു മോ​ട്ടോർ ഉപയോ​ഗിച്ച്‌, ചിറകു​കളെ ചലിപ്പി​ക്കുന്ന ഒരു കൂട്ടം ലോഹ കമ്പികളെ നിയ​ന്ത്രി​ക്കു​ന്നു” എന്ന്‌ മാസിക പറയുന്നു. വിദഗ്‌ധ​മാ​യി രൂപകൽപ്പന ചെയ്യപ്പെട്ട ചിറകു​കൾ ഉള്ളതു കാരണം ഇതിന്‌ ആകാശ​ത്തിൽ നിശ്ചല​മാ​യി നിൽക്കാ​നും കൂറ്റൻ കെട്ടി​ട​ങ്ങൾക്കി​ട​യിൽക്കൂ​ടി കൂപ്പു​കു​ത്താ​നും സാധി​ക്കു​ന്നു. വൻനഗ​ര​ങ്ങ​ളിൽ രാസ, ജൈവ ആയുധ​ങ്ങ​ളു​ടെ തിരച്ചി​ലിന്‌ ഉപയോ​ഗ​പ്പെ​ടു​ത്താ​നാ​യി ഇത്തരം സവി​ശേ​ഷ​ത​ക​ളുള്ള ഒരു വിമാനം വികസി​പ്പി​ച്ചെ​ടു​ക്കു​ന്ന​തി​ന്റെ ആവേശ​ത്തി​ലാണ്‌ യു.എസ്‌. എയർ ഫോഴ്‌സ്‌.

ഗെക്കോ​യു​ടെ പാദങ്ങൾ പകർത്തു​ന്നു

കരയി​ലുള്ള മൃഗങ്ങ​ളും പഠിപ്പി​ക്കു​ന്ന​തിൽ ഒട്ടും പിന്നിലല്ല. ഉദാഹ​ര​ണ​ത്തിന്‌, ഗെക്കോ എന്നറി​യ​പ്പെ​ടുന്ന ചെറിയ പല്ലിക്ക്‌ ചുവരി​ലൂ​ടെ​യും മച്ചിലൂ​ടെ​യും ഓടി​ന​ട​ക്കാ​നുള്ള കഴിവുണ്ട്‌. ബൈബിൾ കാലങ്ങ​ളിൽപ്പോ​ലും ഈ ജീവി​യു​ടെ വിസ്‌മ​യാ​വ​ഹ​മായ കഴിവ്‌ അറിയ​പ്പെ​ട്ടി​രു​ന്നു. (സദൃശ​വാ​ക്യ​ങ്ങൾ 30:28) ഭൂഗു​രു​ത്വാ​കർഷ​ണത്തെ ഭേദി​ക്കാൻ ഗെക്കോ​യ്‌ക്ക്‌ കഴിയു​ന്നത്‌ എങ്ങനെ​യാണ്‌?

സ്‌ഫടിക സമാന പ്രതല​ങ്ങ​ളിൽപ്പോ​ലും ഗെക്കോ​യ്‌ക്ക്‌ പറ്റിപ്പി​ടി​ച്ചി​രി​ക്കാൻ കഴിയു​ന്ന​തി​ന്റെ രഹസ്യം ഒളിഞ്ഞി​രി​ക്കു​ന്നത്‌ അതിന്റെ പാദത്തെ പൊതി​യുന്ന, അതിസൂ​ക്ഷ്‌മ​വും രോമ​സ​മാ​ന​വു​മായ സീറ്റക​ളി​ലാണ്‌. അതിന്റെ പാദത്തി​ലൂ​ടെ പശയൊ​ന്നും പുറ​ത്തേക്കു വരുന്നില്ല, വാൻ ഡർ വോൾസ്‌ ബലങ്ങൾ എന്നറി​യ​പ്പെ​ടുന്ന താരത​മ്യേന ശക്തി കുറഞ്ഞ തന്മാത്രാ ബലമാണ്‌ പറ്റിപ്പി​ടി​ച്ചി​രി​ക്കാൻ അവയെ സഹായി​ക്കു​ന്നത്‌. ഈ ആകർഷണ ബലങ്ങൾ രണ്ട്‌ ഉപരി​ത​ല​ങ്ങ​ളി​ലുള്ള തന്മാ​ത്രകൾ പരസ്‌പരം ഒട്ടി​ച്ചേ​രാൻ ഇടയാ​ക്കു​ന്നു. സാധാ​ര​ണ​ഗ​തി​യിൽ, ഭൂഗു​രു​ത്വ​ബലം ഈ ബലങ്ങ​ളെ​ക്കാൾ ശക്തമാണ്‌, അതു​കൊ​ണ്ടാണ്‌ ഒരു പല്ലി കയറി​പ്പോ​കു​ന്ന​തു​പോ​ലെ നിങ്ങൾക്കു ചുവരി​ലൂ​ടെ കയറി​പ്പോ​കാൻ കഴിയാ​ത്തത്‌. എന്നാൽ ഗെക്കോ​യു​ടെ സൂക്ഷ്‌മ സീറ്റകൾ, ചുവരു​മാ​യി സമ്പർക്ക​ത്തി​ലാ​കുന്ന ഉപരി​ത​ല​ത്തി​ന്റെ വിസ്‌താ​രം വർധി​പ്പി​ക്കു​ന്നു. പാദങ്ങ​ളി​ലെ ആയിര​ക്ക​ണ​ക്കി​നു സീറ്റക​ളു​ടെ വാൻ ഡർ വോൾസ്‌ ബലങ്ങൾ കൂടി​ച്ചേ​രു​മ്പോൾ കൊച്ചു പല്ലിയു​ടെ ഭാരത്തെ പിടി​ച്ചു​നി​റു​ത്താൻ ആവശ്യ​മായ ആകർഷണ ബലം ഉളവാ​കു​ന്നു.

ഈ കണ്ടുപി​ടി​ത്തം​കൊണ്ട്‌ ഉണ്ടാ​യേ​ക്കാ​വുന്ന പ്രയോ​ജനം എന്താണ്‌? ഗെക്കോ​യു​ടെ പാദങ്ങളെ അനുക​രി​ച്ചു​കൊ​ണ്ടു നിർമി​ക്കുന്ന കൃത്രിമ പദാർഥങ്ങൾ വെൽ​ക്രോ​യ്‌ക്കു—പ്രകൃ​തി​യിൽനി​ന്നു​തന്നെ കടമെ​ടുത്ത മറ്റൊരു ആശയംa—പകരം ഉപയോ​ഗി​ക്കാൻ കഴിയും. “ചികി​ത്സ​യിൽ രാസസ്വ​ഭാ​വ​മുള്ള ബാൻഡേ​ജു​കൾ ഉപയോ​ഗി​ക്കാൻ പറ്റാത്ത സാഹച​ര്യ​ത്തിൽ” “ഗെക്കോ ടേപ്പ്‌” വിശേ​ഷാൽ പ്രയോ​ജ​ന​പ്ര​ദ​മാ​യി​രി​ക്കു​മെന്ന്‌ ഒരു ഗവേഷകൻ പറഞ്ഞതാ​യി ദി ഇക്കോ​ണൊ​മിസ്റ്റ്‌ എന്ന മാസിക ഉദ്ധരി​ക്കു​ന്നു.

ബഹുമതി അർഹി​ക്കു​ന്നത്‌ ആരാണ്‌?

തേളി​നെ​പ്പോ​ലെ നടക്കുന്ന, എട്ടു കാലുള്ള ഒരു റോ​ബോ​ട്ടി​നെ വികസി​പ്പി​ച്ചെ​ടു​ക്കു​ന്ന​തി​ന്റെ തിരക്കി​ലാണ്‌ നാഷനൽ എയറോ​നോ​ട്ടി​ക്‌സ്‌ ആൻഡ്‌ സ്‌പേസ്‌ അഡ്‌മി​നി​സ്‌​ട്രേഷൻ. ഒരു ഭീമൻ പ്രാണി​യു​ടെ മാതൃ​ക​യിൽ, തടസ്സങ്ങൾ മറിക​ട​ന്നു​പോ​കാൻ കഴിവുള്ള ആറു കാലുള്ള ഒരു റോ​ബോ​ട്ടി​നെ ഫിൻലൻഡി​ലെ എഞ്ചിനീ​യർമാർ വികസി​പ്പി​ച്ചെ​ടു​ത്തു കഴിഞ്ഞു. അന്തരീക്ഷ ഊഷ്‌മാ​വിന്‌ അനുസൃ​ത​മാ​യി സ്വയം തുറക്കു​ക​യും അടയു​ക​യും ചെയ്യുന്ന പൈൻകോ​ണു​ക​ളു​ടെ സവി​ശേഷത അനുക​രി​ച്ചു​കൊണ്ട്‌ ചില ഗവേഷകർ ഫ്‌ളാ​പ്പു​ക​ളോ​ടൂ​കൂ​ടിയ വസ്‌ത്രങ്ങൾ ഡിസൈൻ ചെയ്‌തി​രി​ക്കു​ന്നു. ബോക്‌സ്‌ഫി​ഷി​ന്റെ അസാധാ​രണ രൂപഘടന അനുക​രി​ച്ചു​കൊണ്ട്‌ പ്രതി​രോ​ധം പരമാ​വധി കുറയ്‌ക്കുന്ന വിധത്തി​ലുള്ള കാർ വികസി​പ്പി​ച്ചെ​ടു​ക്കാ​നുള്ള ശ്രമത്തി​ലാണ്‌ ഒരു വാഹന നിർമാണ കമ്പനി. എബെ​ലോൺ എന്ന ജീവി​യു​ടെ പുറം​തോ​ടിന്‌ ഷോക്ക്‌ അബ്‌സോർബ​റാ​യി വർത്തി​ക്കാ​നുള്ള കഴിവുണ്ട്‌, കനം കുറഞ്ഞ​തും എന്നാൽ നല്ല ഉറപ്പു​ള്ള​തു​മായ രക്ഷാക​വ​ചങ്ങൾ നിർമി​ക്കാ​നുള്ള ഉദ്ദേശ്യ​ത്തിൽ ഗവേഷകർ എബെ​ലോ​ണി​ന്റെ ഈ സവി​ശേ​ഷ​ത​യെ​പ്പറ്റി പഠിച്ചു​കൊ​ണ്ടി​രി​ക്കു​ക​യാണ്‌.

ഫലപ്ര​ദ​മാ​യ എത്ര​യെത്ര ആശയങ്ങ​ളു​ടെ ഭണ്ഡാര​മാണ്‌ പ്രകൃതി. ആയിര​ക്ക​ണ​ക്കി​നു ജൈവ​വ്യ​വ​സ്ഥകൾ പട്ടിക​പ്പെ​ടു​ത്തി​യി​രി​ക്കുന്ന ഒരു ഡേറ്റാ​ബേ​സി​നു ഗവേഷകർ രൂപം​കൊ​ടു​ത്തു​ക​ഴി​ഞ്ഞു. “രൂപസം​വി​ധാ​ന​ത്തോ​ടു ബന്ധപ്പെട്ട പ്രശ്‌ന​ങ്ങൾക്കു പ്രകൃ​തി​യിൽനി​ന്നു പരിഹാ​രം” കണ്ടെത്താൻ ശാസ്‌ത്ര​ജ്ഞർക്ക്‌ ഈ ഡേറ്റാ​ബേസ്‌ പരി​ശോ​ധി​ക്കാൻ കഴിയു​മെന്ന്‌ ദി ഇക്കോ​ണൊ​മിസ്റ്റ്‌ പറയുന്നു. ഇതിൽ ഉൾപ്പെ​ടു​ത്തി​യി​രി​ക്കുന്ന ജൈവ​വ്യ​വ​സ്ഥകൾ “ജൈവ പേറ്റന്റു​കൾ” എന്നാണ്‌ അറിയ​പ്പെ​ടു​ന്നത്‌. സാധാ​ര​ണ​ഗ​തി​യിൽ, ഒരു പുതിയ ആശയമോ യന്ത്രമോ നിയമ​പ​ര​മാ​യി രജിസ്റ്റർ ചെയ്യുന്ന വ്യക്തി​യോ കമ്പനി​യോ ആണ്‌ അതിന്റെ പേറ്റന്റ്‌ ഉടമ. ജൈവ പേറ്റന്റു​ക​ളു​ടെ ഡേറ്റാ​ബേ​സി​നെ​ക്കു​റി​ച്ചു ചർച്ച​ചെ​യ്യവേ, ദി ഇക്കോ​ണൊ​മിസ്റ്റ്‌ പറയുന്നു: “ബയോ​മി​മെ​റ്റിക്‌ സൂത്ര​ങ്ങളെ ‘ജൈവ പേറ്റന്റു​കൾ’ എന്നു വിളി​ക്കു​ക​വഴി, ഫലത്തിൽ പ്രകൃ​തി​യാണ്‌ പേറ്റന്റ്‌ ഉടമ​യെന്നു ഗവേഷകർ ഊന്നി​പ്പ​റ​യു​ക​യാ​ണു ചെയ്യു​ന്നത്‌.”

ഈ ഉജ്ജ്വല ആശയങ്ങൾ പ്രകൃതി സ്വായ​ത്ത​മാ​ക്കി​യത്‌ എങ്ങനെ​യാണ്‌? കോടി​ക്ക​ണ​ക്കി​നു വർഷങ്ങൾ എടുത്ത പരിണാ​മ​പ​ര​മായ പരീക്ഷ​ണ​ങ്ങ​ളി​ലൂ​ടെ ഉരുത്തി​രി​ഞ്ഞ​താണ്‌ പ്രകൃ​തി​യിൽ കാണുന്ന വിദഗ്‌ധ​മായ രൂപകൽപ്പ​ന​ക​ളെന്നു പല ഗവേഷ​ക​രും അഭി​പ്രാ​യ​പ്പെ​ടു​ന്നു. എന്നിരു​ന്നാ​ലും മറ്റു ഗവേഷകർ വ്യത്യ​സ്‌ത​മായ ഒരു നിഗമ​ന​ത്തിൽ എത്തി​ച്ചേ​രു​ന്നു. മൈ​ക്രോ​ബ​യോ​ള​ജി​സ്റ്റായ മൈക്കിൾ ബീഹി 2005-ൽ ദ ന്യൂ​യോർക്ക്‌ ടൈം​സിൽ ഇപ്രകാ​രം എഴുതി: “[പ്രകൃ​തി​യിൽ] സമൃദ്ധ​മാ​യി കാണുന്ന രൂപകൽപ്പ​നകൾ ബോധ്യം​വ​രു​ത്തു​ന്ന​തും ലളിത​വു​മായ ഒരു ന്യായം സമർഥി​ക്കു​ന്നു: അത്‌ താറാ​വി​നെ​പ്പോ​ലെ​യാ​ണി​രി​ക്കു​ന്ന​തും നടക്കു​ന്ന​തും കരയു​ന്ന​തു​മെ​ങ്കിൽ, അത്‌ താറാ​വ​ല്ലെന്നു തെളി​യി​ക്കാൻ അനി​ഷേ​ധ്യ​മായ തെളി​വു​ക​ളു​ടെ അഭാവ​ത്തിൽ, അതൊരു താറാ​വാ​ണെന്ന്‌ ആധികാ​രി​ക​മാ​യി പറയാൻ നമുക്കു കഴിയും.” അദ്ദേഹ​ത്തി​ന്റെ നിഗമനം എന്തായി​രു​ന്നു? “രൂപരചന കണ്ടി​ല്ലെന്നു നടിക്ക​രുത്‌ കാരണം അത്രയ്‌ക്കും പ്രകട​മാ​ണത്‌.”

ഏറെ സുരക്ഷി​ത​വും കാര്യ​ക്ഷ​മ​വു​മായ ചിറകു​കൾ വിമാ​ന​ത്തി​നു​വേണ്ടി രൂപകൽപ്പന ചെയ്യുന്ന ഒരു എഞ്ചിനീ​യർ തീർച്ച​യാ​യും അഭിന​ന്ദനം അർഹി​ക്കു​ന്നു. വിവി​ധോ​ദ്ദേ​ശ്യ​ങ്ങ​ളുള്ള ബാൻഡേജ്‌, ഏറെ സുഖ​പ്ര​ദ​മായ വസ്‌ത്രങ്ങൾ, കൂടുതൽ കാര്യ​ക്ഷ​മ​ത​യുള്ള വാഹനം—ഇവയു​ടെ​യെ​ല്ലാം ഉപജ്ഞാ​താ​ക്ക​ളും തങ്ങളുടെ രൂപകൽപ്പ​ന​യ്‌ക്കുള്ള ബഹുമതി അർഹി​ക്കു​ന്നു. വാസ്‌ത​വ​ത്തിൽ, മറ്റുള്ള​വ​രു​ടെ രൂപകൽപ്പ​നകൾ പകർത്തു​ക​യും യഥാർഥ രൂപസം​വി​ധാ​യ​കനെ അംഗീ​ക​രി​ക്കാ​നോ ആദരി​ക്കാ​നോ പരാജ​യ​പ്പെ​ടു​ക​യും ചെയ്യുന്ന ഒരു നിർമാ​താവ്‌ ഒരു കുറ്റവാ​ളി​യാ​യി വീക്ഷി​ക്ക​പ്പെ​ട്ടേ​ക്കാം.

എഞ്ചിനീ​യ​റി​ങ്ങി​ലെ സങ്കീർണ​മായ പ്രശ്‌നങ്ങൾ പരിഹ​രി​ക്കു​ന്ന​തി​നു പ്രകൃ​തി​യി​ലെ രൂപകൽപ്പ​ന​ക​ളു​ടെ ഒരു ഏകദേശ രൂപം പകർത്തുന്ന വിദഗ്‌ധ​രായ ഗവേഷകർ ബുദ്ധി​വൈ​ഭവം തുളു​മ്പുന്ന ‘ഒറിജി​നൽ’ ആശയങ്ങൾക്കുള്ള ബഹുമതി ബുദ്ധി​ഹീ​ന​മായ പരിണാ​മ​ത്തി​നു നൽകു​ന്നത്‌ ന്യായ​യു​ക്ത​മാ​ണെന്നു നിങ്ങൾക്കു തോന്നു​ന്നു​ണ്ടോ? കേവലം രൂപമാ​തൃ​ക​യു​ണ്ടാ​ക്കു​ന്ന​തിന്‌ വിദഗ്‌ധ​നായ ഒരു രൂപസം​വി​ധാ​യകൻ ആവശ്യ​മാ​ണെ​ങ്കിൽ, ഒറിജി​ന​ലി​ന്റെ കാര്യ​ത്തി​ലോ? യഥാർഥ​ത്തിൽ, വിദഗ്‌ധ​നായ ഒരു അധ്യാ​പ​ക​നാ​ണോ അതോ അദ്ദേഹ​ത്തി​ന്റെ വിദ്യകൾ കേവലം പകർത്തുന്ന ഒരു വിദ്യാർഥി​യാ​ണോ കൂടുതൽ ബഹുമതി അർഹി​ക്കു​ന്നത്‌?

യുക്തി​സ​ഹ​മായ ഒരു നിഗമനം

പ്രകൃ​തി​യിൽ കാണുന്ന രൂപകൽപ്പ​ന​യ്‌ക്കുള്ള തെളി​വു​കൾ ശ്രദ്ധാ​പൂർവം പരി​ശോ​ധി​ച്ചി​രി​ക്കുന്ന അനേകർ സങ്കീർത്ത​ന​ക്കാ​രന്റെ അഭി​പ്രാ​യ​ത്തോ​ടു യോജി​ക്കു​ന്നു. അവൻ ഇങ്ങനെ എഴുതി: “യഹോവേ, നിന്റെ പ്രവൃ​ത്തി​കൾ എത്ര പെരു​കി​യി​രി​ക്കു​ന്നു! ജ്ഞാന​ത്തോ​ടെ നീ അവയെ ഒക്കെയും ഉണ്ടാക്കി​യി​രി​ക്കു​ന്നു; ഭൂമി നിന്റെ സൃഷ്ടി​ക​ളാൽ നിറെ​ഞ്ഞി​രി​ക്കു​ന്നു.” (സങ്കീർത്തനം 104:24) ബൈബിൾ എഴുത്തു​കാ​ര​നായ പൗലൊ​സും സമാന​മായ ബോധ്യം പ്രകടി​പ്പി​ച്ചു. അവൻ എഴുതി: “അവന്റെ [ദൈവ​ത്തി​ന്റെ] നിത്യ​ശ​ക്തി​യും ദിവ്യ​ത്വ​വു​മാ​യി അവന്റെ അദൃശ്യ​ല​ക്ഷ​ണങ്ങൾ ലോക​സൃ​ഷ്ടി​മു​തൽ അവന്റെ പ്രവൃ​ത്തി​ക​ളാൽ ബുദ്ധി​ക്കു​തെ​ളി​വാ​യി വെളി​പ്പെ​ട്ടു​വ​രു​ന്നു.”—റോമർ 1:19, 20.

എന്നിരു​ന്നാ​ലും, പരിണാ​മ​ത്തി​ലൂ​ടെ​യാ​യി​രി​ക്കാം ദൈവം പ്രകൃ​തി​യി​ലെ അത്ഭുത​ക​ര​മായ സൃഷ്ടികൾ ഉളവാ​ക്കി​യ​തെന്നു ബൈബി​ളി​നെ ആദരി​ക്കു​ക​യും ദൈവ​ത്തിൽ വിശ്വ​സി​ക്കു​ക​യും ചെയ്യുന്ന ആത്മാർഥ​ഹൃ​ദ​യ​രായ പലരും ന്യായ​വാ​ദം ചെയ്യുന്നു. ബൈബിൾ അതു സംബന്ധിച്ച്‌ എന്താണു പഠിപ്പി​ക്കു​ന്നത്‌?

[അടിക്കു​റിപ്പ്‌]

[5-ാം പേജിലെ ആകർഷക വാക്യം]

ഉജ്ജ്വലമായ ഇത്രയ​ധി​കം ആശയങ്ങൾ പ്രകൃതി സ്വായ​ത്ത​മാ​ക്കി​യത്‌ എങ്ങനെ​യാണ്‌?

[6-ാം പേജിലെ ആകർഷക വാക്യം]

പ്രകൃതിയുടെ പേറ്റന്റ്‌ ഉടമ ആരാണ്‌?

[7-ാം പേജിലെ ചതുരം/ചിത്രങ്ങൾ]

രൂപമാ​തൃക ഉണ്ടാക്കു​ന്ന​തിന്‌ വിദഗ്‌ധ​നായ ഒരു രൂപസം​വി​ധാ​യകൻ ആവശ്യ​മാ​ണെ​ങ്കിൽ ഒറിജി​ന​ലി​ന്റെ കാര്യ​ത്തി​ലോ?

ഗെക്കോ​യു​ടെ പാദങ്ങ​ളിൽ അഴുക്കു പിടി​ക്കു​ന്നില്ല, അവ കാൽപ്പാ​ടു​കൾ അവശേ​ഷി​പ്പി​ക്കു​ന്നു​മില്ല. ടെഫ്‌ളോൺ ഒഴികെ ഏതു പ്രതല​ത്തി​ലും ഇവയുടെ പാദങ്ങൾക്ക്‌ അനായാ​സം ഒട്ടിപ്പി​ടി​ക്കാ​നും വേറി​ട്ടു​പോ​രാ​നും കഴിയും. ഗവേഷകർ ഇവയെ പകർത്താൻ ശ്രമി​ക്കു​ന്നു

അമ്പരപ്പി​ക്കുന്ന അഭ്യാസ പ്രകട​നങ്ങൾ കാഴ്‌ച​വെ​ക്കുന്ന ഈ വിമാ​ന​ത്തി​ന്റെ ചിറകു​കൾ കടൽക്കാ​ക്ക​യു​ടെ ചിറകു​ക​ളു​ടെ മാതൃക യിലാണു നിർമി ച്ചിരി​ക്കു​ന്നത്‌

ബോക്‌സ്‌ഫി​ഷി​ന്റെ അസാധാ​രണ രൂപഘടന അനുക​രി​ച്ചു​കൊണ്ട്‌ പ്രതി​രോ​ധം പരമാ​വധി കുറയ്‌ക്കുന്ന വിധത്തി​ലുള്ള കാർ വികസി​പ്പി​ച്ചെ​ടു​ക്കാ​നുള്ള ശ്രമത്തി​ലാണ്‌ ഒരു വാഹന നിർമാണ കമ്പനി

[കടപ്പാട്‌]

വിമാനം: Kristen Bartlett/ University of Florida; ഗെക്കോ​യു​ടെ പാദം: Breck P. Kent; ബോക്‌സ്‌ ഫിഷും കാറും: Mercedes-Benz USA

[8-ാം പേജിലെ ചതുരം/ചിത്രങ്ങൾ]

സഹജജ്ഞാനമുള്ള സഞ്ചാരി​കൾ

സഞ്ചാര​മാർഗം കണ്ടെത്തു​ന്ന​തിൽ പല ജീവി​ക​ളും സഹജജ്ഞാ​നം പ്രകട​മാ​ക്കു​ന്നു. (സദൃശ​വാ​ക്യ​ങ്ങൾ 30:24, 25) രണ്ട്‌ ഉദാഹ​ര​ണങ്ങൾ ശ്രദ്ധി​ക്കുക.

◼ ഉറുമ്പി​ന്റെ ട്രാഫിക്‌ രഹസ്യം ആഹാരം തേടി​പ്പോ​കുന്ന ഉറുമ്പു​കൾ വഴി​തെ​റ്റാ​തെ കൂട്ടിൽ തിരി​ച്ചെ​ത്തു​ന്നത്‌ എങ്ങനെ​യാണ്‌? സഞ്ചാര​പഥം പ്രത്യേക ഗന്ധമുള്ള ഫിറോ​മോൺകൊണ്ട്‌ അടയാ​ള​പ്പെ​ടു​ത്തു​ന്ന​തി​നു പുറമേ ചില ഉറുമ്പു​കൾ ക്ഷേത്ര​ഗ​ണിത തത്ത്വങ്ങൾ ഉപയോ​ഗി​ച്ചു വഴിത്താര സൃഷ്ടി​ക്കു​ന്നത്‌ കൂട്‌ കണ്ടുപി​ടി ക്കുന്നത്‌ എളുപ്പ​മാ​ക്കി ത്തീർക്കു​ന്നു​വെന്ന്‌ യു​ണൈ​റ്റഡ്‌ കിങ്‌ഡ​ത്തി​ലെ ഗവേഷകർ കണ്ടെത്തി. ഉദാഹ​ര​ണ​ത്തിന്‌ ഫറവോൻ ഉറുമ്പു​കൾ “കൂട്ടിൽനിന്ന്‌ പുറ​ത്തേക്കു പോകു​മ്പോൾ 50 മുതൽ 60 വരെ ഡിഗ്രി കോണിൽ രണ്ടായി പിരി​യുന്ന വഴിത്താ​രകൾ സൃഷ്ടി​ക്കു​ന്നു” എന്ന്‌ ന്യൂ സയന്റിസ്റ്റ്‌ പറയുന്നു. ഈ വിധത്തിൽ സഞ്ചാര​പഥം സൃഷ്ടി​ക്കു​ന്ന​തു​കൊ​ണ്ടുള്ള പ്രയോ​ജനം എന്താണ്‌? കൂട്ടി​ലേ​ക്കുള്ള മടക്കയാ​ത്ര​യിൽ പാത രണ്ടായി പിരി​യു​ന്നി​ട​ങ്ങ​ളിൽ എത്തു​മ്പോൾ, ചെറിയ തോതിൽ മാത്രം വ്യതി​ച​ലി​ക്കുന്ന പാത ഉറുമ്പു​കൾ സ്വതവേ തിര​ഞ്ഞെ​ടു​ക്കു​ന്നു. ഈ പാതയാ​കട്ടെ എല്ലായ്‌പോ​ഴും കൂട്ടി​ലേക്കു നയിക്കു​ന്ന​താ​യി​രി​ക്കും. ആ ലേഖനം പറയു​ന്ന​പ്ര​കാ​രം, “ഇടയ്‌ക്കി​ടെ രണ്ടായി പിരി​യുന്ന രൂപമാ​തൃക യിലുള്ള ഈ സഞ്ചാര​മാർഗം, അതിലൂ​ടെ​യുള്ള ഉറുമ്പു​ക​ളു​ടെ സഞ്ചാരം സുഗമ​മാ​ക്കി​ത്തീർക്കു​ന്നു, പ്രത്യേ​കി​ച്ചും രണ്ടു ദിശയി​ലേ​ക്കും ഒരേസ​മയം സഞ്ചാര​മു​ള്ള​പ്പോൾ. തന്നെയു​മല്ല തെറ്റായ ദിശയിൽ സഞ്ചരി​ക്കു​ന്നതു മൂലമു​ണ്ടാ​കുന്ന ഊർജ​നഷ്ടം പരമാ​വധി കുറയ്‌ക്കു​ന്ന​തി​നും അത്‌ ഉപകരി​ക്കു​ന്നു.”

◼ പക്ഷിക​ളു​ടെ ദിക്‌സൂ​ച​കങ്ങൾ ദീർഘ​ദൂ​രം സഞ്ചരി​ക്കുന്ന ദേശാടന പക്ഷികൾ ഏതു കാലാ​വ​സ്ഥ​യി​ലും അവയുടെ ലക്ഷ്യസ്ഥാ​നത്ത്‌ കൃത്യ​മാ​യി എത്തി​ച്ചേ​രു​ന്നു. അത്‌ എങ്ങനെ​യാ​ണു സാധി​ക്കു​ന്നത്‌? പക്ഷികൾക്ക്‌ ഭൂമി​യു​ടെ കാന്തിക മണ്ഡലം തിരി​ച്ച​റി​യാ​നുള്ള കഴിവു​ണ്ടെന്നു ഗവേഷകർ കണ്ടെത്തി​യി​രി​ക്കു​ന്നു. എന്നിരു​ന്നാ​ലും, ഭൂമി​യു​ടെ “കാന്തിക മണ്ഡല രേഖക​ളു​ടെ ദിശ ഓരോ പ്രദേ​ശ​ത്തും വ്യത്യാസ പ്പെട്ടി​രി​ക്കു​മെ​ന്നും അത്‌ എല്ലായ്‌പോ​ഴും ഉത്തരദി​ക്കി​നു നേർക്കാ​യി​രി​ക്കി​ല്ലെ​ന്നും” സയൻസ്‌ എന്ന മാസിക പറയുന്നു. തെറ്റായ ദിശയിൽ പറക്കു​ന്ന​തിൽനി​ന്നും ദേശാടന പക്ഷികളെ തടയു​ന്നത്‌ എന്താണ്‌? ദിവസ​വും വൈകു​ന്നേരം സൂര്യാ​സ്‌ത​മ​യ​ത്തി​ന്റെ ദിശ നോക്കി പക്ഷികൾ അവയുടെ ആന്തരിക ദിക്‌സൂ​ചകം ട്യൂൺ ചെയ്യുന്നു. അക്ഷാം​ശ​രേ​ഖ​യ്‌ക്കും കാലങ്ങൾക്കും അനുസൃ​ത​മാ​യി സൂര്യാ​സ്‌തമയ ത്തിന്റെ സ്ഥാനം മാറു​ന്ന​തി​നാൽ, “കാലത്തെ സംബന്ധിച്ച്‌ സൂചന നൽകുന്ന ഒരു ജൈവ ഘടികാ​ര​ത്തി​ന്റെ” സഹായ​ത്താൽ ആവശ്യ​മായ മാറ്റങ്ങൾ വരുത്താൻ അവയ്‌ക്ക്‌ സാധി​ക്കു​ന്നു​വെന്ന്‌ ഗവേഷകർ അഭി​പ്രാ​യ​പ്പെ​ടു​ന്നു എന്ന്‌ ആ മാസിക പറയുന്നു.

ഉറുമ്പി​നെ ക്ഷേത്ര​ഗ​ണിത തത്ത്വങ്ങൾ പഠിപ്പി​ച്ചത്‌ ആരാണ്‌? ദിക്‌സൂ​ച​ക​വും ജൈവ ഘടികാ​ര​വും ഇവ നൽകുന്ന സൂചനകൾ വ്യാഖ്യാ​നി​ക്കാൻ പ്രാപ്‌തി​യുള്ള തലച്ചോ​റും പക്ഷികൾക്ക്‌ നൽകി​യത്‌ ആരാണ്‌? ബുദ്ധി​ഹീ​ന​മായ പരിണാ​മ​മോ ബുദ്ധി​വൈ​ഭ​വ​മുള്ള ഒരു സ്രഷ്ടാ​വോ?

[കടപ്പാട്‌]

© E.J.H. Robinson 2004