വാർധ​ക്യം സുരക്ഷി​ത​മാ​ക്കാൻ

മുറ്റത്ത്‌ ഓടി​ക്ക​ളി​ക്കു​ക​യാണ്‌ ഒരു പെൺകു​ട്ടി. പെട്ടെന്ന്‌ അവൾ കാലി​ടറി വീഴുന്നു. പക്ഷേ അടുത്ത​നി​മി​ഷം​തന്നെ അവൾ വീണി​ട​ത്തു​നിന്ന്‌ ചാടിയെ​ഴുന്നേറ്റ്‌ ചുറ്റുമൊ​ന്നു നോക്കി ആരും കണ്ടി​ല്ലെന്ന്‌ ഉറപ്പു​വ​രു​ത്തി കളി തുടരു​ന്നു. ഇനി, മറ്റൊരു രംഗം: പ്രായ​മായ ഒരു സ്‌ത്രീ വീട്ടി​നു​ള്ളിൽ കാലുതെറ്റി വീഴുന്നു. ആ വീഴ്‌ച​യിൽ ഇടു​പ്പെല്ല്‌ തകർന്ന്‌ അവർ ആശുപത്രി​യി​ലാ​യി. പിന്നെ ശസ്‌ത്രക്രിയ, ചികിത്സ, അങ്ങനെ മാസങ്ങൾ കടന്നുപോ​യി. ഇപ്പോൾ അവർക്ക്‌ എന്തു​ചെ​യ്യാ​നും പേടി​യാണ്‌. ശരീര​മ​നങ്ങി ഒന്നും ചെയ്യാ​ത്ത​തുകൊണ്ട്‌ അവരുടെ ആരോ​ഗ്യം വല്ലാതെ ക്ഷയിച്ചു.

ഒരു പാശ്ചാ​ത്യ​രാ​ജ്യത്ത്‌ ഓരോ വർഷവും മുപ്പതു ശതമാ​ന​ത്തിലേറെ വൃദ്ധജ​ന​ങ്ങൾക്ക്‌ (65-ഉം അതിൽക്കൂ​ടു​ത​ലും പ്രായ​മുള്ള) വീഴ്‌ച​യു​ടെ ഫലമായി പരി​ക്കേൽക്കു​ന്ന​താ​യി അവി​ടെ​നി​ന്നുള്ള റിപ്പോർട്ടു​കൾ സൂചി​പ്പി​ക്കു​ന്നു. ആ പ്രായ​ക്കാർക്കി​ട​യി​ലെ അപകട​മ​ര​ണ​ങ്ങ​ളു​ടെ മുഖ്യ​കാ​രണം ഇത്തരം വീഴ്‌ച​ക​ളാണെന്നു പറയാം! വാർധ​ക്യത്തെ​ക്കു​റിച്ച്‌ ബൈബിൾ പറയു​ന്നത്‌ എത്രയോ സത്യം! “അന്നു അവർ കയറ്റത്തെ പേടി​ക്കും; വഴിയിൽ ഭീതികൾ ഉള്ളതായി തോന്നും.”—സഭാ​പ്ര​സം​ഗി 12:5.

ഇങ്ങനെയൊക്കെ​യാണെ​ങ്കി​ലും, വാർധ​ക്യം സുരക്ഷി​ത​മാ​ക്കാ​നും ആസ്വാ​ദ്യ​മാ​ക്കാ​നും നിങ്ങൾക്കു ചെയ്യാൻ കഴിയുന്ന ചില കാര്യ​ങ്ങ​ളുണ്ട്‌. ആരോ​ഗ്യ​വും ഓജസ്സും നിലനി​റു​ത്തു​ക​യാണ്‌ അതി​ലൊന്ന്‌. വീട്ടി​നു​ള്ളിൽ സുരക്ഷി​ത​ത്വം ഉറപ്പാ​ക്കു​ന്ന​താണ്‌ മറ്റൊരു മാർഗം.

ആരോ​ഗ്യ​വും ഓജസ്സും സംരക്ഷി​ക്കാം

പ്രായ​മാ​കുമ്പോൾ ശരീരാ​വ​യ​വ​ങ്ങ​ളു​ടെ ഏകോപന പ്രാപ്‌തി ദുർബ​ല​മാ​കും; കാഴ്‌ച മങ്ങും. ബാലൻസ്‌ സംബന്ധ​മായ പ്രശ്‌നങ്ങൾ ഉണ്ടാകാ​നുള്ള സാധ്യ​ത​യും ഏറെ. അസ്ഥിക​ളുടെ​യും പേശി​ക​ളുടെ​യും ബലക്കു​റവ്‌ ആരോ​ഗ്യം ഒന്നുകൂ​ടെ ക്ഷയിപ്പി​ക്കും. എന്നാൽ വ്യായാ​മം പതിവാ​ക്കു​ക​യും ആരോ​ഗ്യ​ഭ​ക്ഷണം ശീലി​ക്കു​ക​യും ചെയ്‌താൽ ഈ പ്രശ്‌നങ്ങൾ ഒരു പരിധി​വരെ കുറയ്‌ക്കാം. “ശരീരം കൂനിപ്പോ​കാ​തി​രി​ക്കാ​നും കായി​ക​ബലം നിലനി​റു​ത്താ​നും ബാലൻസു മെച്ച​പ്പെ​ടു​ത്താ​നും സന്ധികൾക്കു വഴക്കമു​ണ്ടാ​കാ​നും സഹായി​ക്കു​ന്ന​തരം വ്യായാ​മങ്ങൾ ചെയ്യേ​ണ്ടത്‌ പ്രധാ​ന​മാണ്‌.” പറയു​ന്നത്‌ ഫിസി​യോ തെറാ​പ്പി​സ്റ്റായ നീറ്റ.

യു. എസ്‌. ഡിപ്പാർട്ട്‌മെന്റ്‌ ഓഫ്‌ ഹെൽത്ത്‌ ആൻഡ്‌ ഹ്യൂമൺ സർവീ​സ​സി​ന്റെ ഒരു പ്രസി​ദ്ധീ​ക​രണം പറയു​ന്നത്‌ ഇങ്ങനെ: “ആരോ​ഗ്യാ​വസ്ഥ എങ്ങനെ​യു​ള്ള​താണെ​ങ്കി​ലും, കായിക പ്രവർത്ത​ന​ങ്ങ​ളിൽ ഏർപ്പെ​ടു​ന്നത്‌ പ്രായ​മു​ള്ള​വർക്ക്‌ ഏറെ ഗുണം ചെയ്യും. നിൽക്കാ​നോ നടക്കാ​നോ ബുദ്ധി​മു​ട്ടു​ള്ള​വർക്കും വ്യായാ​മം ചെയ്യാം. ഒന്നും ചെയ്യാ​തി​രി​ക്കു​ന്നത്‌ പലപ്പോ​ഴും ദോഷമേ ചെയ്യൂ.”a ശാരീ​രിക പ്രവർത്ത​ന​ങ്ങ​ളിൽ ഏർപ്പെ​ടു​ന്ന​തി​ന്റെ പ്രയോ​ജ​നങ്ങൾ പലതാണ്‌: ഹൃ​ദ്രോ​ഗം, സന്ധി​വേദന, ഓസ്റ്റിയോപൊറോ​സിസ്‌, വിഷാദം എന്നിവയെ ചെറു​ക്കാം. രക്തചംക്ര​മണം, ദഹനം, ഉറക്കം എന്നിവ മെച്ച​പ്പെ​ടു​ത്താം. ഇനി, നിങ്ങൾക്ക്‌ ആത്മവി​ശ്വാ​സ​വും ഉണർവും നൽകാ​നും വ്യായാ​മ​ങ്ങൾക്കാ​കും.

വ്യായാ​മം ചെയ്യുന്ന ശീലം നിങ്ങൾക്കില്ലെ​ങ്കിൽ ഡോക്‌ടറെ കണ്ടതി​നുശേഷം അതു തുടങ്ങു​ന്ന​താ​യി​രി​ക്കും ബുദ്ധി. വ്യായാ​മ​ത്തി​നി​ടെ തലചു​റ്റ​ലോ നെഞ്ചുവേ​ദ​ന​യോ അനുഭ​വപ്പെ​ടുന്നെ​ങ്കിൽ ഡോക്‌ടറെ കാണാൻ മടിക്ക​രുത്‌. ഈ ആപത്‌സൂ​ച​നകൾ നിസ്സാ​ര​മാ​യി കാണരുത്‌! എത്രയും പെട്ടെന്ന്‌ വൈദ്യ​സ​ഹാ​യം തേടണം. വർഷത്തിലൊ​രി​ക്കൽ കണ്ണ്‌ ടെസ്റ്റുചെ​യ്യു​ന്ന​തും നന്നായി​രി​ക്കും.

ഇനി, ഭക്ഷണത്തി​ന്റെ കാര്യം. എളുപ്പം പാചകം ചെയ്യാൻ കഴിയുന്ന റെഡിമെ​യ്‌ഡ്‌ ഭക്ഷണങ്ങൾ ഇന്ന്‌ വിപണി​യി​ലുണ്ട്‌. ഇവയിൽ പോഷ​ക​മൂ​ല്യം തീരെ കുറവാ​യി​രി​ക്കും എന്നതി​നാൽ അങ്ങനെ​യുള്ള ആഹാരം ഒഴിവാ​ക്കുക. അസ്ഥിബ​ല​ത്തിന്‌ വിറ്റാ​മിൻ ഡി-യും കാൽസ്യ​വും അത്യന്താപേ​ക്ഷി​ത​മാണ്‌. അതു​കൊണ്ട്‌ അവ ധാരാ​ള​മാ​യി അടങ്ങിയ ആഹാര​സാ​ധ​നങ്ങൾ പ്രായ​മാ​യവർ നിർബ​ന്ധ​മാ​യും കഴിക്കണം. തവിടു​നീ​ക്കാത്ത ധാന്യങ്ങൾ, കൊഴുപ്പ്‌ അധികം അടങ്ങി​യി​ട്ടി​ല്ലാത്ത പാലുൽപ്പ​ന്നങ്ങൾ, പഴങ്ങൾ, പച്ചക്കറി​കൾ എന്നിവ​യിൽ വിറ്റാ​മിൻ ഡി-യും കാൽസ്യ​വും ധാരാ​ള​മുണ്ട്‌. ആഹാര​ശീ​ല​ങ്ങ​ളിൽ കാര്യ​മായ മാറ്റങ്ങൾ വരുത്തു​ന്ന​തി​നു​മുമ്പ്‌ ഡോക്‌ടറോട്‌ അഭി​പ്രാ​യം ചോദി​ക്കു​ന്നത്‌ നല്ലതാണ്‌. നിങ്ങളു​ടെ ആരോ​ഗ്യാ​വസ്ഥ കണക്കിലെ​ടു​ത്തുകൊണ്ട്‌ എന്തൊക്കെ ഭക്ഷണം കഴിക്കാം, എന്തൊക്കെ ഒഴിവാ​ക്കണം എന്നീ കാര്യ​ങ്ങ​ളിൽ വേണ്ട നിർദേ​ശങ്ങൾ നൽകാൻ അദ്ദേഹ​ത്തി​നാ​കും.

ധാരാളം വെള്ളം കുടി​ക്കു​ക​യും വേണം. പ്രായ​മാ​യ​വർക്കി​ട​യിൽ—പ്രത്യേ​കി​ച്ചും ഒറ്റയ്‌ക്ക്‌ താമസി​ക്കു​ന്ന​വ​രും നഴ്‌സിങ്‌ ഹോമു​ക​ളിൽ കഴിയു​ന്ന​വ​രു​മായ വൃദ്ധജ​ന​ങ്ങൾക്കി​ട​യിൽ—സാധാരണ കണ്ടുവ​രുന്ന ഒരു പ്രശ്‌ന​മാണ്‌ നിർജ​ലീ​ക​രണം. ഇത്‌ വളരെ ഗുരു​ത​ര​മാണ്‌. ശരീരകോ​ശ​ങ്ങ​ളിൽ ആവശ്യ​ത്തി​നു വെള്ളമി​ല്ലാ​തെ വരുന്നത്‌ വീഴ്‌ച​യ്‌ക്കു കാരണ​മായേ​ക്കാം. ചിന്തകൾ കുഴഞ്ഞുപോ​കുക, തൊലി​യിൽ ചുളി​വു​കൾ വീഴുക, മലബന്ധം, അണുബാധ എന്നിങ്ങനെ​യുള്ള ദോഷങ്ങൾ വേറെ​യും. ചില കേസു​ക​ളിൽ മരണംപോ​ലും സംഭവി​ക്കാം.

വീട്‌ സുരക്ഷി​ത​മാ​ക്കു​ക

പ്രായംചെ​ന്ന​വ​രിൽ മിക്കവ​രും വീഴു​ന്നത്‌ വീട്ടി​നു​ള്ളിൽത്തന്നെ​യാണ്‌. ചില മുൻക​രു​ത​ലു​കൾ എടുത്താൽ ഈ അപകട​സാ​ധ്യത ഗണ്യമാ​യി കുറയ്‌ക്കാം. ചില നിർദേ​ശ​ങ്ങ​ളി​താ:

കുളി​മു​റി:

● പെട്ടെന്നു വഴുതി​വീ​ഴാത്ത വിധത്തിൽവേണം കുളി​മു​റി​യു​ടെ തറ പാക​പ്പെ​ടു​ത്താൻ.

● ബാത്ത്‌ ടബ്ബുക​ളു​ടെ പ്രതല​വും മിനു​സ​മു​ള്ള​താ​യി​രി​ക്ക​രുത്‌. ഇരുന്നു​കു​ളി​ക്കുന്ന സ്റ്റൂളോ കസേര​യോ, ടാപ്പി​ന​ടുത്ത്‌ അല്ലെങ്കിൽ ബക്കറ്റി​ന​ടുത്ത്‌ ആണെന്ന്‌ ഉറപ്പു​വ​രു​ത്തുക. ഹാൻഡ്‌ ഷവർ ഉണ്ടെങ്കിൽ പ്രായ​മാ​യ​വർക്ക്‌ ഏറെ സൗകര്യ​മാ​യി​രി​ക്കും.

● കുളി​മു​റി​ക്കു​ള്ളി​ലും ടോയ്‌ല​റ്റി​ലും പിടിച്ചെ​ഴുന്നേൽക്കാൻ തക്കവി​ധ​മുള്ള കൈപ്പി​ടി​കൾ ഉണ്ടായി​രി​ക്കണം; അത്‌ നല്ല ഉറപ്പു​ള്ള​തു​മാ​യി​രി​ക്കണം. വീട്ടിൽ ഒരു യൂറോ​പ്യൻ ക്ലോസ​റ്റു​ള്ള​തും നല്ലതാണ്‌. അതാകുമ്പോൾ വലിയ ആയാസ​മി​ല്ലാ​തെ ഇരിക്കാ​നും എഴു​ന്നേൽക്കാ​നും പറ്റും.

● രാത്രി നേർത്ത വെളി​ച്ച​മുള്ള ലൈറ്റ്‌ തെളി​ച്ചി​ടാം. അല്ലെങ്കിൽ ടോർച്ച്‌ ഉപയോ​ഗി​ക്കാം.

ഗോവ​ണി​പ്പ​ടി​കൾ:

● ഗോവ​ണി​പ്പ​ടി​കൾ ഉറപ്പും ബലവു​മു​ള്ള​താ​യി​രി​ക്കണം; പടികൾ വ്യക്തമാ​യി കാണു​മാറ്‌ നല്ല വെളി​ച്ച​മു​ണ്ടാ​യി​രി​ക്കണം; പടിക​ളിൽ സാധനങ്ങൾ വെക്കരുത്‌.

● പടിക​ളിൽ ഇരുവ​ശ​വും ബലമുള്ള കൈവരി ഉണ്ടായി​രി​ക്കണം. ഗോവ​ണി​യു​ടെ മുകളി​ലും താഴെ​യും തെന്നാത്ത തരത്തി​ലുള്ള ചവിട്ടി​കൾ ഇടുന്ന​തും സ്വിച്ച്‌ ബോർഡു​കൾ വയ്‌ക്കു​ന്ന​തും നല്ലതാണ്‌.

● നട കയറി​യി​റ​ങ്ങു​ന്നത്‌ പ്രായ​മാ​യ​വ​രു​ടെ കാലു​കൾക്ക്‌ ബലം നൽകും. എന്നാൽ ബാലൻസ്‌ തെറ്റി വീഴുമെ​ന്നു​ള്ളവർ ഒറ്റയ്‌ക്ക്‌ നട കയറാ​തി​രി​ക്കു​ന്ന​താ​വും നല്ലത്‌.

കിടപ്പു​മു​റി:

● തട്ടിത്ത​ട​യാ​തെ നടക്കാൻ പാകത്തി​ലാ​യി​രി​ക്കണം മുറി​യിൽ കട്ടിലും മറ്റു ഫർണി​ച്ച​റു​ക​ളും ഇടേണ്ടത്‌.

● വസ്‌ത്രം മാറു​ക​യും മുടി ചീകു​ക​യുമൊ​ക്കെ ചെയ്യു​ന്നി​ടത്ത്‌ ഒരു കസേര​യി​ടു​ന്നത്‌ നല്ലതാണ്‌.

● കിടക്ക​യ്‌ക്ക്‌ അരികിൽ ബെഡ്‌ ലാംപോ ടോർച്ചോ ഉണ്ടായി​രി​ക്കാൻ ശ്രദ്ധി​ക്കുക.

അടുക്കള:

● കിച്ചൺ സ്ലാബിൽ സാധനങ്ങൾ നിരത്തിവെ​ക്ക​രുത്‌. പാചകം ചെയ്യുമ്പോൾ അത്‌ അസൗക​ര്യ​മാ​കും.

● അടുക്ക​ള​യു​ടെ തറ മിനു​സ​മു​ള്ള​താ​യി​രി​ക്ക​രുത്‌.

● ഷെൽഫു​കൾ വളരെ ഉയരത്തി​ലോ തീരെ താഴെ​യോ ആയിരി​ക്ക​രുത്‌. അതാകുമ്പോൾ പരസഹാ​യ​മി​ല്ലാ​തെ സാധനങ്ങൾ എടുക്കാ​നും വെക്കാ​നും കഴിയും. സാധനങ്ങൾ എടുക്കാൻ ഏണിയോ സ്റ്റൂളോ കസേര​യോ ഉപയോ​ഗി​ക്ക​രുത്‌.

മറ്റു ചില നിർദേ​ശങ്ങൾ:

● ബാത്ത്‌റൂം പോലെ രാത്രി​യിൽ പോകാ​നി​ട​യുള്ള സ്ഥലങ്ങളി​ലും അവി​ടേ​ക്കുള്ള വഴിക​ളി​ലും ലൈറ്റ്‌ തെളി​ച്ചി​ടുക.

● ഉറക്കച്ച​ടവോ​ടെ എഴു​ന്നേറ്റു പോകുമ്പോൾ വീഴാൻ സാധ്യ​ത​യു​ള്ള​തി​നാൽ ഊന്നു​വ​ടി​യോ വാക്കറോ ഉപയോ​ഗി​ക്കുക.

● വീലു​ക​ളി​ല്ലാ​ത്ത​തും കൈപ്പി​ടി​യു​ള്ള​തു​മായ കസേരകൾ ഉപയോ​ഗി​ക്കുക. അവ പാകത്തിന്‌ ഉയരമു​ള്ള​താ​യി​രി​ക്കണം. അപ്പോൾ ഇരിക്കാ​നും എഴു​ന്നേൽക്കാ​നും എളുപ്പ​മാ​യി​രി​ക്കും.

● കീറി​ത്തു​ട​ങ്ങിയ കാർപ്പെറ്റ്‌, പൊട്ടിയ ടൈലു​കൾ എന്നിവ​യിൽ തട്ടിവീ​ഴാൻ സാധ്യ​ത​യു​ള്ള​തി​നാൽ അവ മാറ്റാൻ ശ്രദ്ധി​ക്കുക. നടക്കുന്ന വഴിയിൽ ഇലക്‌ട്രിക്‌ വയറു​ക​ളോ ടെലിഫോൺ വയറു​ക​ളോ ഒന്നും വീണു​കി​ട​ക്കാൻ പാടില്ല.

● കാർപ്പെ​റ്റിൽ തുണികൊ​ണ്ടുള്ള ചവിട്ടി​കൾ ഇട്ടാൽ തട്ടിവീ​ഴാൻ സാധ്യ​ത​യുണ്ട്‌. മിനു​സ​മുള്ള തറയിൽ ഇടുന്ന ചവിട്ടി​കൾ തെന്നി​മാ​റാത്ത തരത്തി​ലു​ള്ള​താ​യി​രി​ക്കണം.

● ഗ്രിപ്പി​ല്ലാ​ത്ത​തോ ലൂസാ​യ​തോ പൊട്ടി​യ​തോ ആയ ചെരി​പ്പു​കൾ ഉപയോ​ഗി​ക്ക​രുത്‌. ഹീലുള്ള ചെരി​പ്പു​ക​ളും അപകടം ചെയ്യും.

● ചില മരുന്നു​കൾ ബോധ​ക്ഷയം ഉണ്ടാക്കു​ക​യോ മന്ദത വരുത്തു​ക​യോ ചെയ്യും. ഏതെങ്കി​ലും മരുന്നു കഴിച്ചാൽ അങ്ങനെ ഉണ്ടാകുന്നെ​ങ്കിൽ ഡോക്‌ടറെ അറിയി​ക്കാൻ മടിക്ക​രുത്‌. ഡോക്‌ടർ മരുന്നി​ന്റെ ഡോസ്‌ കുറച്ചു​ത​രു​ക​യോ അതു മാറ്റി​ത്ത​രു​ക​യോ ചെയ്യും.

മേൽപ്പറഞ്ഞ കാര്യ​ങ്ങ​ളിൽ ഏതെങ്കി​ലും തനിയെ ചെയ്യാൻ പറ്റി​ല്ലെന്നു തോന്നുന്നെ​ങ്കിൽ കുടും​ബാം​ഗ​ങ്ങ​ളുടെ​യോ സുഹൃ​ത്തു​ക്ക​ളുടെ​യോ സഹായം തേടാം. ഇവയൊ​ന്നും പിന്ന​ത്തേക്ക്‌ മാറ്റിവെ​ക്കേണ്ട കാര്യ​ങ്ങളല്ല.

മറ്റുള്ള​വർക്ക്‌ ചെയ്യാൻ കഴിയുന്ന സഹായങ്ങൾ

പ്രായ​മായ മാതാ​പി​താ​ക്ക​ളോ മുത്തശ്ശീ​മു​ത്ത​ശ്ശ​ന്മാ​രോ സുഹൃ​ത്തു​ക്ക​ളോ നിങ്ങൾക്കു​ണ്ടോ? ഉണ്ടെങ്കിൽ അവരുടെ സുരക്ഷ​യ്‌ക്കാ​യി നിങ്ങൾക്ക്‌ എന്തൊക്കെ ചെയ്യാ​നാ​കും? മേൽപ്പറഞ്ഞ നിർദേ​ശങ്ങൾ നയപൂർവം അവരുമൊ​ത്തു പരിചി​ന്തി​ക്കുക. അവർ ശ്രദ്ധി​ക്കാ​തെ പോയി​ട്ടുള്ള എന്തെങ്കി​ലും കാര്യ​ങ്ങ​ളുണ്ടെ​ങ്കിൽ വേണ്ട ക്രമീ​ക​ര​ണങ്ങൾ ചെയ്യാൻ സഹായി​ക്കുക. ആവശ്യമെ​ങ്കിൽ ആഴ്‌ച​യിൽ ഒന്നോ രണ്ടോ നേരത്തെ ആഹാരം അവർക്ക്‌ പാകം ചെയ്‌തുകൊ​ടു​ക്കാം. പ്രായ​മാ​യ​വർക്ക്‌ പതിവായ വ്യായാ​മം അത്യന്താപേ​ക്ഷി​ത​മാ​യ​തി​നാൽ അക്കാര്യ​ത്തി​ലും അവരെ സഹായി​ക്കാ​നാ​കും. വേണ​മെ​ങ്കിൽ അവരെ​യും കൂട്ടി ഒന്നു നടക്കാൻ പോകാം. ഇതിനുവേണ്ടി പ്രത്യേ​കം സമയം മാറ്റിവെ​ക്ക​ണമെ​ന്നില്ല. നിങ്ങൾക്ക്‌ പുറത്തുപോകേ​ണ്ട​തു​ള്ളപ്പോൾ അവരെ​യും ഒപ്പം കൂട്ടി​യാൽ മതി. കൂട്ടിന്‌ ഒരാളുണ്ടെ​ങ്കിൽ പുറത്തുപോ​കാൻ പ്രായ​മാ​യ​വ​രിൽ പലർക്കും ഇഷ്ടമാണ്‌. വയോ​ജ​ന​ങ്ങ​ളു​ടെ പരിര​ക്ഷാർഥം ചിലയി​ട​ങ്ങ​ളിൽ ‘ഹോംകെയർ പദ്ധതികൾ’ ഏർപ്പെ​ടു​ത്തി​യി​ട്ടുണ്ട്‌. ഇതിന്റെ ഭാഗമാ​യി ഹോം നഴ്‌സിങ്‌, ഫിസി​യോ തെറാപ്പി, ഒക്യുപ്പേ​ഷണൽ തെറാപ്പി തുടങ്ങിയ സേവനങ്ങൾ ലഭ്യമാ​ക്കി​വ​രു​ന്നു. നിങ്ങൾ താമസി​ക്കുന്ന പ്രദേ​ശത്ത്‌ ഇങ്ങനെ​യുള്ള സേവനങ്ങൾ ലഭ്യമാണെ​ങ്കിൽ അതേക്കു​റി​ച്ചുള്ള വിവരങ്ങൾ നൽകാൻ നിങ്ങളു​ടെ ഡോക്‌ടർക്ക്‌ കഴി​ഞ്ഞേ​ക്കും.

രസകരമെ​ന്നു പറയട്ടെ, നമ്മുടെ സ്രഷ്ടാ​വായ ദൈവത്തെ ‘വയോ​ധി​കൻ’ എന്ന്‌ ബൈബിൾ വിശേ​ഷി​പ്പി​ച്ചി​ട്ടുണ്ട്‌. (ദാനീ​യേൽ 7:9) ആ ദൈവം പ്രായ​മാ​യ​വരെ, വിശേ​ഷിച്ച്‌ വൃദ്ധമാ​താ​പി​താ​ക്കളെ, ബഹുമാ​നി​ക്ക​ണമെന്ന്‌ നമ്മോട്‌ ആവശ്യപ്പെ​ട്ടി​രി​ക്കു​ന്നു. “നിന്റെ അപ്പനെ​യും അമ്മയെ​യും ബഹുമാ​നിക്ക” എന്നൊരു കൽപ്പന​തന്നെ​യുണ്ട്‌. (പുറപ്പാ​ടു 20:12) “നരച്ചവന്റെ മുമ്പാകെ എഴു​ന്നേ​ല്‌ക്ക​യും വൃദ്ധന്റെ മുഖം ബഹുമാ​നി​ക്ക​യും നിന്റെ ദൈവത്തെ ഭയപ്പെ​ടു​ക​യും വേണം” എന്നും ദൈവം പറഞ്ഞി​രി​ക്കു​ന്നു. (ലേവ്യ​പു​സ്‌തകം 19:32) അതെ, പ്രായ​മാ​യ​വരെ ബഹുമാ​നി​ക്കു​ന്നത്‌ നമുക്ക്‌ ദൈവ​ഭയം ഉണ്ടെന്ന​തി​ന്റെ തെളി​വാണ്‌. അതു​കൊണ്ട്‌, വയോ​ജ​ന​ങ്ങളെ സഹായി​ക്കു​ന്ന​തും പരിച​രി​ക്കു​ന്ന​തും കേവലം ഒരു കടമയാ​യി കാണാ​തി​രി​ക്കുക! ജീവി​ത​ത്തി​ന്റെ സായം​കാ​ലത്ത്‌ അവർക്കൊ​രു കൈത്താ​ങ്ങാ​കാൻ കഴിഞ്ഞാൽ അതിന്റെ സംതൃ​പ്‌തി വലുതാ​യി​രി​ക്കും. പ്രായ​മാ​യവർ തങ്ങൾക്കു ലഭിക്കുന്ന സഹായത്തെ വിലമ​തി​ക്കുമ്പോൾ അവർക്ക്‌ കൂടുതൽ സഹായ​വും പരിച​ര​ണ​വും നൽകാൻ അതു മറ്റുള്ള​വർക്ക്‌ പ്രചോ​ദ​ന​മാ​കും. (g11-E 02)

[അടിക്കു​റിപ്പ്‌]

[25-ാം പേജിലെ ചതുരം/ചിത്രങ്ങൾ]

അടിയന്തിര സാഹച​ര്യ​ങ്ങ​ളിൽ ഇലക്‌​ട്രോ​ണിക്‌ സഹായം

ചില രാജ്യ​ങ്ങ​ളിൽ, വൃദ്ധജ​ന​ങ്ങൾക്ക്‌ അടിയ​ന്തിര സാഹച​ര്യ​ത്തിൽ (ഉദാഹ​ര​ണ​ത്തിന്‌ അവർ വീഴു​ക​യോ മറ്റോ ചെയ്യുമ്പോൾ) ആരോ​ഗ്യ​ക്ഷേമ പ്രവർത്ത​കരെ തത്‌ക്ഷണം വിവരം അറിയി​ക്കാൻ സഹായി​ക്കുന്ന ഒരുതരം ഇലക്‌​ട്രോ​ണിക്‌ ഉപകരണം ലഭ്യമാണ്‌. കഴുത്തിൽ തൂക്കി​യി​ടു​ക​യോ കൈത്ത​ണ്ട​യിൽ കെട്ടു​ക​യോ ചെയ്യാ​വുന്ന ഈ ഉപകര​ണ​ത്തി​ന്റെ ബട്ടൺ ഒന്ന്‌ അമർത്തു​കയേവേണ്ടൂ, തത്‌ക്ഷണം സഹായം ലഭിക്കും. തനിയെ ജീവി​ക്കു​ന്ന​വർക്ക്‌ ഇത്‌ വലി​യൊ​രു സഹായ​മാണ്‌!