ആരോഗ്യം മെച്ചപ്പെടുത്താം!
റുസ്റ്റം
റഷ്യയിലാണ്‌ റുസ്റ്റം താമസിക്കുന്നത്‌. വളരെ തിരക്കുള്ള ജീവിതം നയിക്കുന്ന ആളാണ്‌ അദ്ദേഹം. മുമ്പ്‌ അദ്ദേഹത്തിന്‌ പുകവലിയും മദ്യപാനവും പോലുള്ള ചില ദുശ്ശീലങ്ങളുണ്ടായിരുന്നു. എന്നാൽ അതിന്റെ അപകടം മനസ്സിലായപ്പോൾ അദ്ദേഹം പുകവലി നിറുത്തി, മദ്യത്തിന്റെ ഉപയോഗവും കുറച്ചു. എന്നിട്ടും കമ്പ്യൂട്ടറിന്റെ മുമ്പിൽ കുറച്ചേറെ സമയം ചെലവിട്ടാൽ അദ്ദേഹത്തിന്‌ വല്ലാത്ത ക്ഷീണം തോന്നിയിരുന്നു.
എന്നും രാവിലെ അദ്ദേഹം എട്ടുമണിക്ക്‌ ജോലിതുടങ്ങുമായിരുന്നു. പക്ഷേ രണ്ടുമണിക്കൂറെങ്കിലും കഴിഞ്ഞാലേ ഉന്മേഷത്തോടെ ജോലിചെയ്യാൻ അദ്ദേഹത്തിനു സാധിച്ചിരുന്നുള്ളൂ. പോരാത്തതിന്‌ എപ്പോഴും അസുഖവും. എന്നാൽ റുസ്റ്റം ജീവിതചര്യയിൽ കുറച്ച്‌ മാറ്റങ്ങൾ വരുത്തി. എന്നിട്ടോ? അദ്ദേഹം പറയുന്നു: “കഴിഞ്ഞ ഏഴുവർഷമായി എന്റെ ആരോഗ്യത്തിൽ വലിയ മാറ്റമുണ്ടായിട്ടുണ്ട്‌. അസുഖത്തിന്റെ പേരിൽ വർഷം രണ്ടുദിവസത്തിൽ കൂടുതൽ അവധി എടുക്കേണ്ടിവരാറില്ല. ഇപ്പോൾ എനിക്ക്‌ നല്ല ഉണർവും ഉന്മേഷവുമുണ്ട്‌. ഞാൻ ജീവിതം ആസ്വദിച്ചു തുടങ്ങിയത്‌ ഇപ്പോഴാണെന്നു പറയാം!”
ഇനി, നേപ്പാളിൽ താമസിക്കുന്ന റാമിന്റെ കാര്യമെടുക്കാം. ഭാര്യയും രണ്ടുകുട്ടികളും അടങ്ങുന്നതാണ്‌ അദ്ദേഹത്തിന്റെ കുടുംബം. അവർ താമസിക്കുന്ന സ്ഥലത്ത്‌ മാലിന്യനിർമാർജന സൗകര്യങ്ങളില്ല. അതുകൊണ്ടുതന്നെ കൊതുകിന്റെയും ഈച്ചയുടെയും ശല്യം രൂക്ഷമാണ്‌. ശുചിത്വമില്ലാത്ത ഈ ചുറ്റുപാട്‌ അവരുടെ ആരോഗ്യത്തെ വല്ലാതെ ബാധിച്ചിരുന്നു. അദ്ദേഹത്തിനും കുടുംബത്തിനും ശ്വാസകോശസംബന്ധമായ തകരാറുകളും നേത്രരോഗങ്ങളും കൂടെക്കൂടെ ഉണ്ടാകുമായിരുന്നു. ഈ കുടുംബവും അവരുടെ ശീലങ്ങളിൽ ചില മാറ്റങ്ങൾ വരുത്തി; അവരുടെ ആരോഗ്യം മെച്ചപ്പെട്ടു.
നിങ്ങളുടെ ആരോഗ്യം നിങ്ങളുടെ കൈയിലാണ്‌!
നല്ല ശീലങ്ങളുണ്ടെങ്കിലേ നല്ല ആരോഗ്യവും ഉണ്ടാകൂ. പലരും പക്ഷേ ഇക്കാര്യം തിരിച്ചറിയുന്നില്ല. ‘നല്ല ആരോഗ്യമെന്നൊക്കെ പറയുന്നത്‌ ഒരു ഭാഗ്യംപോലെയാണ്‌; ഉണ്ടെങ്കിൽ ഉണ്ടെന്നുപറയാം.’ പലരും കരുതുന്നത്‌ അങ്ങനെയാണ്‌. ആരോഗ്യപരിപാലനത്തിനായി തങ്ങൾക്ക്‌ പ്രത്യേകിച്ചൊന്നും ചെയ്യാനില്ലെന്നാണ്‌ ഇവരുടെ ചിന്ത. ഇങ്ങനെ ചിന്തിക്കുന്നവരിൽ ധനികരും ദരിദ്രരും ഒക്കെ ഉൾപ്പെടും. ഈ ധാരണ ദോഷംചെയ്യും. കാരണം, ഇങ്ങനെയുള്ളവർ ആരോഗ്യപരിരക്ഷയ്‌ക്കായി ഒന്നും ചെയ്യാൻ മിനക്കെടില്ല. ഫലമോ? നല്ലൊരു ജീവിതം ആസ്വദിക്കാൻ അവർക്കു കഴിയാതെപോകുന്നു.
നിങ്ങളുടെ സാമ്പത്തികസ്ഥിതി എന്തായിരുന്നാലും, ചില കാര്യങ്ങൾ ശ്രദ്ധിച്ചാൽ സ്വന്തം ആരോഗ്യവും കുടുംബത്തിന്റെ ആരോഗ്യവും പരിരക്ഷിക്കാൻ നിങ്ങൾക്കാകും. അതിനുവേണ്ടി നിങ്ങൾ ചെയ്യുന്ന ഓരോ ശ്രമവും മൂല്യവത്താണ്‌. നല്ലൊരു ജീവിതം നയിക്കാനും ആയുസ്സു വർധിപ്പിക്കാനും അതു നിങ്ങളെ സഹായിക്കും.
റാം കുടിവെള്ളം ശേഖരിക്കുന്നു
നല്ല ആരോഗ്യശീലങ്ങൾ വളർത്തിയെടുക്കുന്ന കാര്യത്തിൽ മക്കൾക്കു മാതൃക വെക്കേണ്ടത്‌ മാതാപിതാക്കൾതന്നെ. അതിനുവേണ്ടി കുറച്ചു പണവും സമയവും ചെലവഴിക്കേണ്ടിവന്നേക്കാം എന്നതു നേര്‌. പക്ഷേ അതൊരു നഷ്ടമേയല്ല. അതിന്റെ പ്രയോജനങ്ങളെക്കുറിച്ച്‌ ഓർത്തുനോക്കൂ: നല്ല ആരോഗ്യശീലങ്ങളുണ്ടെങ്കിൽ ആശുപത്രി കയറിയിറങ്ങേണ്ടിവരില്ല. സമയവും ലാഭം, പണവും ലാഭം! ‘പ്രതിരോധമാണ്‌ പ്രതിവിധിയെക്കാൾ മെച്ചം’ എന്നു പറയുന്നത്‌ എത്രയോ ശരി!
ആരോഗ്യപരിരക്ഷയ്‌ക്കുള്ള അഞ്ച്‌ അടിസ്ഥാന പടികളെക്കുറിച്ചുള്ളതാണ്‌ തുടർന്നുവരുന്ന ലേഖനങ്ങൾ. റുസ്റ്റമിനെയും റാമിനെയും പോലുള്ള നിരവധിപ്പേരെ സഹായിച്ചിട്ടുള്ള വിവരങ്ങളാണ്‌ അവ. നിങ്ങൾക്കും ആ നിർദേശങ്ങളിൽനിന്ന്‌ പ്രയോജനം നേടാനാകും! (g11-E 03)