കഥ 9
നോഹ ഒരു പെട്ടകം പണിയുന്നു
നോഹയ്‌ക്ക്‌ ഭാര്യയും മൂന്ന്‌ ആൺമക്കളും ഉണ്ടായിരുന്നു. ശേം, ഹാം, യാഫെത്ത്‌ എന്നിങ്ങനെയായിരുന്നു അവന്റെ മക്കളുടെ പേരുകൾ. ഈ മക്കൾക്ക്‌ ഓരോരുത്തർക്കും ഓരോ ഭാര്യയും ഉണ്ടായിരുന്നു. അങ്ങനെ ആകെ എട്ടു പേരുള്ള ഒരു കുടുംബമായിരുന്നു നോഹയുടേത്‌.
ദൈവം ഇപ്പോൾ നോഹയോട്‌ ഒരു കാര്യം ചെയ്യാൻ പറഞ്ഞു, ഒരു വലിയ പെട്ടകം പണിയുക. അങ്ങനെയൊരു കാര്യം ആരും അതിനുമുമ്പ്‌ ചെയ്‌തിട്ടുണ്ടായിരുന്നില്ല. കപ്പൽ പോലെ വലുപ്പമുള്ള ഈ പെട്ടകം കണ്ടാൽ ഒരുപാടു നീളമുള്ള ഒരു വലിയ പെട്ടിപോലെ ഇരിക്കുമായിരുന്നു. ‘അത്‌ മൂന്നു നിലകളായി പണിയുകയും അതിൽ മുറികൾ ഉണ്ടാക്കുകയും ചെയ്യണം’ എന്നു ദൈവം പറഞ്ഞു. ഈ മുറികൾ നോഹയ്‌ക്കും അവന്റെ കുടുംബത്തിനും താമസിക്കാനും മൃഗങ്ങൾക്കു കഴിയാനും ആവശ്യമായിരുന്ന ഭക്ഷണസാധനങ്ങൾ സൂക്ഷിക്കാനും വേണ്ടിയായിരുന്നു.
വെള്ളം കയറാത്തതുപോലെ പെട്ടകം പണിയണമെന്നും ദൈവം പറഞ്ഞു. അവൻ ഇങ്ങനെ അരുളിച്ചെയ്‌തു: ‘ഞാൻ ഒരു വലിയ ജലപ്രളയം വരുത്തി മുഴുലോകത്തെയും നശിപ്പിക്കാൻ പോകുകയാണ്‌. പെട്ടകത്തിനകത്തല്ലാത്ത സകലരും മരിക്കും.’
നോഹയും അവന്റെ മക്കളും യഹോവയെ അനുസരിക്കുകയും പണി തുടങ്ങുകയും ചെയ്‌തു. എന്നാൽ മറ്റാളുകൾ അവരെ കളിയാക്കി. അവർ ദുഷ്ടന്മാരായിത്തന്നെ തുടർന്നു. ദൈവം ചെയ്യാൻ പോകുന്ന കാര്യത്തെക്കുറിച്ചു നോഹ പറഞ്ഞപ്പോൾ ആരും വിശ്വസിച്ചില്ല.
പെട്ടകം വളരെ വലുപ്പമുള്ളത്‌ ആയിരുന്നു. അതുകൊണ്ട്‌ അതു പണിയാൻ അനേകം വർഷം എടുത്തു. അവസാനം പെട്ടകത്തിന്റെ പണി കഴിഞ്ഞപ്പോൾ മൃഗങ്ങളെ അതിൽ കയറ്റാൻ ദൈവം നോഹയോടു പറഞ്ഞു. ചിലതരം മൃഗങ്ങളെ ഈരണ്ടു വീതവും, അതായത്‌ ഒരു ആണിനെയും ഒരു പെണ്ണിനെയും മറ്റു ചിലതരം മൃഗങ്ങളെ ഏഴെണ്ണം വീതവും അകത്തു കയറ്റണമെന്നു ദൈവം കൽപ്പിച്ചു. എല്ലാ തരത്തിലുള്ള പക്ഷികളെയും പെട്ടകത്തിൽ കയറ്റാൻ ദൈവം പറഞ്ഞു. ദൈവം പറഞ്ഞതുപോലെതന്നെ നോഹ ചെയ്‌തു.
അതുകഴിഞ്ഞ്‌ നോഹയും അവന്റെ കുടുംബവും പെട്ടകത്തിൽ കയറി. അപ്പോൾ ദൈവം വാതിൽ അടച്ചു. ഉള്ളിൽ നോഹയും അവന്റെ കുടുംബവും കാത്തിരുന്നു. പെട്ടകത്തിനുള്ളിൽ നിങ്ങളും അവരോടൊപ്പം ഉണ്ടായിരുന്നുവെന്ന്‌ ഒന്നു സങ്കൽപ്പിക്കുക. എല്ലാവരും കാത്തിരിക്കുകയാണ്‌, ദൈവം പറഞ്ഞതുപോലെ ശരിക്കും ഒരു പ്രളയം ഉണ്ടാകുമോ?