‘സ്‌നേ​ഹി​ക്കാ​നും നല്ല കാര്യങ്ങൾ ചെയ്യാ​നും പ്രചോ​ദി​പ്പി​ക്കുന്ന’ യോഗങ്ങൾ

നൂറ്റാ​ണ്ടു​ക​ളി​ലു​ട​നീ​ളം യഹോ​വ​യു​ടെ ജനം സംഘടി​ത​മായ വിധത്തിൽ ഒരുമിച്ച്‌ കൂടി​വ​ന്നി​ട്ടുണ്ട്‌. പുരാ​ത​ന​കാ​ലത്ത്‌ ഇസ്രാ​യേ​ലിൽ പുരു​ഷ​ന്മാ​രെ​ല്ലാ​വ​രും മൂന്നു വലിയ ഉത്സവങ്ങൾക്ക്‌ യരുശ​ലേ​മിൽ പോകു​മാ​യി​രു​ന്നു. (ആവ. 16:16) ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​ക​ളും പതിവാ​യി ഒരുമിച്ച്‌ കൂടി​യി​രു​ന്നു. പലപ്പോ​ഴും ആരു​ടെ​യെ​ങ്കി​ലും വീടു​ക​ളി​ലാണ്‌ അവർ സഭാ​യോ​ഗ​ത്തി​നു കൂടി​വ​ന്നി​രു​ന്നത്‌. (ഫിലേ. 1, 2) ഇന്നു നമ്മളും സഭാ​യോ​ഗ​ങ്ങ​ളും സമ്മേള​ന​ങ്ങ​ളും കൺ​വെൻ​ഷ​നു​ക​ളും ഏറെ ഇഷ്ടപ്പെ​ടു​ന്നു. ദൈവ​ദാ​സ​ന്മാർ ഇങ്ങനെ ഒരുമി​ച്ചു​കൂ​ടു​ന്നത്‌ എന്തിനാണ്‌? പ്രധാ​ന​മാ​യും, അതു നമ്മുടെ ആരാധ​ന​യു​ടെ ഒരു മുഖ്യ​ഭാ​ഗ​മാ​യ​തു​കൊണ്ട്‌.​—സങ്കീ. 95:6; കൊലോ. 3:16.

² യോഗ​ങ്ങ​ളിൽ കൂടി​വ​രു​ന്ന​തു​കൊണ്ട്‌ പല പ്രയോ​ജ​ന​ങ്ങ​ളു​മുണ്ട്‌. വാർഷി​ക​കൂ​ടാ​രോ​ത്സ​വ​ങ്ങ​ളിൽ ഓരോ ഏഴാമ​ത്തേ​തി​നെ​യും​പറ്റി ഇസ്രാ​യേ​ല്യ​രോട്‌ ഇങ്ങനെ പറഞ്ഞു: “ഈ നിയമ​ത്തി​ലെ വാക്കു​ക​ളെ​ല്ലാം കേട്ടു​പ​ഠി​ക്കാ​നും ശ്രദ്ധാ​പൂർവം പാലി​ക്കാ​നും നിങ്ങളു​ടെ ദൈവ​മായ യഹോ​വയെ ഭയപ്പെ​ടാ​നും വേണ്ടി ജനത്തെ​യെ​ല്ലാം, പുരു​ഷ​ന്മാ​രെ​യും സ്‌ത്രീ​ക​ളെ​യും കുട്ടി​ക​ളെ​യും നിങ്ങളു​ടെ നഗരങ്ങ​ളിൽ വന്നുതാ​മ​സ​മാ​ക്കിയ വിദേ​ശി​ക​ളെ​യും, വിളി​ച്ചു​കൂ​ട്ടുക.” (ആവ. 31:12) ഒരുമിച്ച്‌ കൂടി​വ​രേ​ണ്ട​തി​ന്റെ ഒരു പ്രധാ​ന​കാ​രണം ‘യഹോ​വ​യാ​ണു പഠിപ്പി​ക്കു​ന്നത്‌’ എന്നതാണ്‌. (യശ. 54:13) കൂടാതെ, പരസ്‌പരം അടുത്ത​റി​യാ​നും പ്രോ​ത്സാ​ഹനം നേടാ​നും നമുക്കു കഴിയു​ന്നു. യോഗ​ങ്ങ​ളിൽ ഒരുമി​ച്ചാ​യി​രി​ക്കു​ന്ന​തി​ലൂ​ടെ നമുക്കു ബലവും പ്രോ​ത്സാ​ഹ​ന​വും ലഭിക്കു​ന്നു.

സഭാ​യോ​ഗ​ങ്ങൾ

³ എ.ഡി. 33-ലെ പെന്തി​ക്കോസ്‌തി​നു ശേഷം പതിവാ​യി കൂടി​വ​ന്നി​രുന്ന ശിഷ്യ​ന്മാർ അപ്പോസ്‌ത​ല​ന്മാ​രു​ടെ ഉപദേ​ശങ്ങൾ ഉത്സാഹ​ത്തോ​ടെ പഠിച്ചു​പോ​ന്നു. “അവർ മുടങ്ങാ​തെ എല്ലാ ദിവസ​വും ഒരേ മനസ്സോ​ടെ ദേവാ​ല​യ​ത്തിൽ വരുക​യും” ചെയ്‌തു. (പ്രവൃ. 2:42, 46) പിന്നീ​ട​ങ്ങോട്ട്‌ ആരാധ​നയ്‌ക്കാ​യി കൂടി​വ​രു​മ്പോൾ അവർ തിരു​വെ​ഴു​ത്തു​കൾ വായി​ക്കു​മാ​യി​രു​ന്നു. അവയിൽ അപ്പോസ്‌ത​ല​ന്മാ​രും മറ്റു ക്രിസ്‌തു​ശി​ഷ്യ​ന്മാ​രും എഴുതിയ ലേഖന​ങ്ങ​ളും ഉൾപ്പെ​ടു​ത്തി​യി​രു​ന്നു. (1 കൊരി. 1:1, 2; കൊലോ. 4:16; 1 തെസ്സ. 1:1; യാക്കോ. 1:1) സഭ ഒരുമി​ച്ചുള്ള പ്രാർഥ​ന​യു​മു​ണ്ടാ​യി​രു​ന്നു. (പ്രവൃ. 4:24-29; 20:36) ഇടയ്‌ക്കൊ​ക്കെ, മിഷന​റി​മാ​രു​ടെ അനുഭ​വ​ങ്ങ​ളും വിവരി​ച്ചി​രു​ന്നു. (പ്രവൃ. 11:5-18; 14:27, 28) ബൈബി​ളു​പ​ദേ​ശ​ങ്ങ​ളും തിരു​വെ​ഴു​ത്തു​പ്ര​വ​ച​ന​ങ്ങ​ളു​ടെ നിവൃ​ത്തി​യും അവിടെ ചർച്ച ചെയ്യും. ഈ യോഗ​ങ്ങ​ളി​ലൂ​ടെ ക്രിസ്‌ത്യാ​നി​കൾക്കു യോജിച്ച പെരു​മാ​റ്റ​ത്തെ​യും നടത്ത​യെ​യും കുറി​ച്ചും ദൈവ​ഭ​ക്തി​യെ​ക്കു​റി​ച്ചും ഉള്ള പ്രബോ​ധനം നൽകി​പ്പോ​ന്നു. സന്തോ​ഷ​വാർത്ത​യു​ടെ തീക്ഷ്‌ണ​ത​യുള്ള ഘോഷ​ക​രാ​കാൻ ഈ യോഗങ്ങൾ എല്ലാവ​രെ​യും ഉത്സാഹി​പ്പി​ച്ചു.​—റോമ. 10:9, 10; 1 കൊരി. 11:23-26; 15:58; എഫെ. 5:1-33.

⁴ നമ്മുടെ കാലത്തെ ക്രിസ്‌തീ​യ​യോ​ഗങ്ങൾ അപ്പോസ്‌ത​ല​ന്മാർ വെച്ച ആ മാതൃക അടിസ്ഥാ​ന​മാ​ക്കി​യു​ള്ള​താണ്‌. എബ്രായർ 10:24, 25-ലെ തിരു​വെ​ഴു​ത്തു​പ്ര​ബോ​ധ​ന​ത്തി​നു നമ്മൾ ചെവി​കൊ​ടു​ക്കു​ന്നു: “പരസ്‌പരം എങ്ങനെ പ്രചോ​ദി​പ്പി​ക്കാ​മെന്നു നന്നായി ചിന്തി​ക്കുക. . . . ചിലർ ശീലമാ​ക്കി​യി​രി​ക്കു​ന്ന​തു​പോ​ലെ നമ്മുടെ യോഗ​ങ്ങൾക്കു കൂടി​വ​രാ​തി​രി​ക്ക​രുത്‌; പകരം നമുക്കു പരസ്‌പരം പ്രോ​ത്സാ​ഹി​പ്പി​ക്കാം. ആ ദിവസം അടുത്ത​ടുത്ത്‌ വരുന്നതു കാണു​മ്പോൾ നമ്മൾ ഇതു കൂടു​തൽക്കൂ​ടു​തൽ ചെയ്യേ​ണ്ട​താണ്‌.” ഈ അന്ത്യനാ​ളു​ക​ളിൽ നമുക്കു ക്ലേശങ്ങൾ അനവധി​യാണ്‌. നമ്മുടെ ആത്മീയ​ക​രു​ത്തും ദൈവ​ത്തോ​ടുള്ള വിശ്വസ്‌ത​ത​യും നിലനി​റു​ത്തി​ക്കൊ​ണ്ടു​പോ​കാൻ ഇത്തരം യോഗ​ങ്ങ​ളിൽനിന്ന്‌ ലഭിക്കുന്ന കൂടു​ത​ലായ ആശ്വാ​സ​വും പ്രോ​ത്സാ​ഹ​ന​വും നമുക്കു കൂടിയേ തീരൂ. അതു​കൊണ്ട്‌ ഈ യോഗ​ങ്ങ​ളിൽ നമ്മൾ പതിവാ​യി സംബന്ധി​ക്കണം. (റോമ. 1:11, 12) ക്രിസ്‌ത്യാ​നി​ക​ളായ നമ്മൾ ജീവി​ക്കു​ന്നതു വക്രത​യു​ള്ള​തും വഴിപി​ഴ​ച്ച​തും ആയ ഒരു തലമു​റ​യി​ലാണ്‌. അഭക്തി​യും ലൗകി​ക​മോ​ഹ​ങ്ങ​ളും നമ്മൾ വർജി​ച്ചി​ട്ടു​ള്ള​വ​രാണ്‌. (ഫിലി. 2:15, 16; തീത്തോ. 2:12-14) അങ്ങനെ​യുള്ള നമ്മൾ, യഹോ​വ​യു​ടെ ജനത്തിന്റെ കൂടെ​യ​ല്ലാ​തെ മറ്റ്‌ എവി​ടെ​യാണ്‌ ആയിരി​ക്കേ​ണ്ടത്‌? (സങ്കീ. 84:10) ദൈവ​വ​ചനം വായി​ക്കു​ക​യും പഠിക്കു​ക​യും ചർച്ച ചെയ്യു​ക​യും ചെയ്യു​ന്ന​തി​നെ​ക്കാൾ പ്രയോ​ജ​ന​ക​ര​മായ മറ്റ്‌ എന്താണു​ള്ളത്‌? നമ്മുടെ നന്മ മനസ്സിൽക്കണ്ട്‌ ഒരുക്കി​യി​രി​ക്കുന്ന വ്യത്യസ്‌ത സഭാ​യോ​ഗ​ങ്ങ​ളെ​ക്കു​റിച്ച്‌ നമുക്കു നോക്കാം.

വാരാ​ന്ത​യോ​ഗം

⁵ വാരാ​ന്ത​യോ​ഗ​ത്തി​ലെ ആദ്യഭാ​ഗം ഒരു ബൈബി​ള​ധിഷ്‌ഠിത പ്രസം​ഗ​മാണ്‌. മുഖ്യ​മാ​യും പൊതു​ജ​ന​ങ്ങളെ ഉദ്ദേശിച്ച്‌ തയ്യാറാ​ക്കി​യി​രി​ക്കു​ന്ന​താണ്‌ ഇത്‌. അവരിൽ ചിലർ ആദ്യമാ​യി​ട്ടാ​യി​രി​ക്കാം യോഗ​ത്തി​നു വരുന്നത്‌. പൊതു​പ്ര​സം​ഗം, സഭാ​യോ​ഗ​ങ്ങൾക്കു പുതു​താ​യി വന്നുതു​ട​ങ്ങി​യി​ട്ടു​ള്ള​വ​രു​ടെ​യും സഭയിലെ പ്രചാ​ര​ക​രു​ടെ​യും ആത്മീയാ​വ​ശ്യ​ങ്ങൾ നിറ​വേ​റ്റു​ന്ന​തിൽ പ്രധാ​ന​പ്പെട്ട ഒരു പങ്കു വഹിക്കു​ന്നു.​—പ്രവൃ. 18:4; 19:9, 10.

⁶ ക്രിസ്‌തു​യേ​ശു​വും അപ്പോസ്‌ത​ല​ന്മാ​രും അവരുടെ സഹകാ​രി​ക​ളും പൊതു​പ്ര​സം​ഗങ്ങൾ നടത്തി​യി​രു​ന്നു. ഇന്ന്‌ യഹോ​വ​യു​ടെ ജനം നടത്തുന്ന പ്രസം​ഗ​ങ്ങൾപോ​ലെ​യാ​യി​രു​ന്നു അവയെന്നു പറയാം. പൊതു​സ​ദ​സ്സിൽ പ്രസം​ഗി​ക്കുന്ന കാര്യ​ത്തിൽ യേശു​വി​നോ​ളം മികച്ച ഒരു പ്രഭാ​ഷകൻ ഭൂമി​യി​ലു​ണ്ടാ​യി​ട്ടില്ല. “ആ മനുഷ്യൻ സംസാ​രി​ക്കു​ന്ന​തു​പോ​ലെ ആരും ഒരിക്ക​ലും സംസാ​രി​ച്ചി​ട്ടില്ല” എന്നു യേശു​വി​നെ​ക്കു​റിച്ച്‌ ആളുകൾ പറയു​ക​യു​ണ്ടാ​യി. (യോഹ. 7:46) അധികാ​ര​ത്തോ​ടെ​യാ​ണു യേശു സംസാ​രി​ച്ചത്‌, ശ്രോ​താ​ക്കളെ അത്‌ അത്ഭുതസ്‌ത​ബ്ധ​രാ​ക്കി​യി​രു​ന്നു. (മത്താ. 7:28, 29) യേശു പറഞ്ഞ കാര്യങ്ങൾ ഹൃദയ​ത്തി​ലേക്കു സ്വീക​രി​ച്ച​വർക്കെ​ല്ലാം അതിലൂ​ടെ ലഭിച്ച പ്രയോ​ജ​നങ്ങൾ അനവധി​യാ​യി​രു​ന്നു. (മത്താ. 13:16, 17) അപ്പോസ്‌ത​ല​ന്മാ​രും ഇതേ മാതൃക പിന്തു​ടർന്നു. പ്രവൃ​ത്തി​കൾ 2:14-36 വരെയുള്ള ഭാഗത്ത്‌ എ.ഡി. 33-ലെ പെന്തി​ക്കോസ്‌ത്‌ ദിവസം പത്രോസ്‌ നടത്തിയ ശ്രദ്ധേ​യ​മായ പ്രസംഗം കാണാം. കേട്ട കാര്യ​ങ്ങ​ള​നു​സ​രിച്ച്‌ പ്രവർത്തി​ക്കാൻ ആയിരങ്ങൾ അന്നു പ്രചോ​ദി​ത​രാ​യി. പിന്നീട്‌, ആതൻസിൽ പൗലോസ്‌ നടത്തിയ പ്രസംഗം ശ്രദ്ധിച്ച ചില വ്യക്തികൾ വിശ്വാ​സി​ക​ളാ​യി.​—പ്രവൃ. 17:22-34.

⁷ ഈ കാലത്തും, കൺ​വെൻ​ഷ​നു​ക​ളി​ലും സമ്മേള​ന​ങ്ങ​ളി​ലും പൊതു​പ്ര​സം​ഗങ്ങൾ നടത്തു​ന്നുണ്ട്‌. അതു​പോ​ലെ ആഴ്‌ച​തോ​റും സഭകളി​ലും പൊതു​പ്ര​സം​ഗ​ങ്ങ​ളുണ്ട്‌. ദശലക്ഷ​ങ്ങ​ളാണ്‌ ഇതിലൂ​ടെ പ്രയോ​ജനം നേടി​യി​രി​ക്കു​ന്നത്‌. ക്രിസ്‌തീ​യ​മായ ഉപദേ​ശങ്ങൾ ജാഗ്ര​ത​യോ​ടെ പാലി​ക്കാ​നും ദൈവ​രാ​ജ്യ​സേ​വ​ന​ത്തിൽ മുന്നോ​ട്ടു പോകാ​നും ഈ പ്രസം​ഗങ്ങൾ നമ്മളെ സഹായി​ക്കു​ന്നു. പൊതു​ജ​ന​ങ്ങ​ളെ​യും താത്‌പ​ര്യ​ക്കാ​രെ​യും നമ്മൾ ഇതിനാ​യി ക്ഷണിക്കു​ന്ന​തു​കൊ​ണ്ടുള്ള പ്രയോ​ജനം എന്താണ്‌? അടിസ്ഥാ​ന​ബൈ​ബിൾപ​ഠി​പ്പി​ക്ക​ലു​ക​ളു​മാ​യി പരിചി​ത​രാ​കാൻ ആളുകളെ ഇതു നല്ലൊ​ര​ള​വിൽ സഹായി​ക്കും.

⁸ പൊതു​പ്ര​സം​ഗ​ങ്ങ​ളിൽ കൈകാ​ര്യം ചെയ്യുന്ന വിഷയങ്ങൾ വൈവി​ധ്യ​മു​ള്ള​വ​യാണ്‌: ബൈബി​ളു​പ​ദേ​ശങ്ങൾ, പ്രവച​നങ്ങൾ, ദാമ്പത്യ​വും കുടും​ബ​ജീ​വി​ത​വും സംബന്ധിച്ച തിരു​വെ​ഴു​ത്തു​ത​ത്ത്വ​ങ്ങ​ളും ബുദ്ധി​യു​പ​ദേ​ശ​ങ്ങ​ളും, യുവ​പ്രാ​യ​ക്കാർ നേരി​ടുന്ന പ്രശ്‌നങ്ങൾ, ക്രിസ്‌ത്യാ​നി​കൾ പാലി​ച്ചി​രി​ക്കേണ്ട സദാചാ​ര​മൂ​ല്യ​ങ്ങ​ളും നിലവാ​ര​ങ്ങ​ളും അങ്ങനെ പോകു​ന്നു വിഷയങ്ങൾ. ചില പ്രസം​ഗങ്ങൾ യഹോ​വ​യു​ടെ അത്ഭുത​ക​ര​മായ സൃഷ്ടി​ക്രി​യ​ക​ളെ​ക്കു​റി​ച്ചു​ള്ള​വ​യാണ്‌. ബൈബിൾക​ഥാ​പാ​ത്ര​ങ്ങ​ളു​ടെ ശ്രദ്ധേ​യ​മായ വിശ്വാ​സം, ധൈര്യം, അചഞ്ചല​മായ വിശ്വ​സ്‌തത എന്നിവ​യും നമുക്ക്‌ അതിൽനിന്ന്‌ പഠിക്കാ​നുള്ള പാഠങ്ങ​ളും ആണ്‌ മറ്റു ചില പ്രസം​ഗ​ങ്ങ​ളു​ടെ കേന്ദ്ര​വി​ഷയം.

⁹ പൊതു​പ്ര​സം​ഗം എന്ന ക്രമീ​ക​ര​ണ​ത്തി​ന്റെ പ്രയോ​ജനം മുഴുവൻ കിട്ടണ​മെ​ങ്കിൽ, നമ്മൾ ഈ പ്രസം​ഗങ്ങൾ നന്നായി ശ്രദ്ധിച്ച്‌ കേൾക്കണം. പ്രസം​ഗകൻ പറയുന്ന തിരു​വെ​ഴു​ത്തു​കൾ നമ്മളും എടുക്കു​ക​യും അദ്ദേഹം അവ വായി​ക്കു​മ്പോൾ മൗനമാ​യി കൂടെ വായി​ക്കു​ക​യും, വിശദീ​ക​രി​ക്കു​മ്പോൾ ശ്രദ്ധിച്ച്‌ കേട്ട്‌ മനസ്സി​ലാ​ക്കു​ക​യും വേണം. (ലൂക്കോ. 8:18) ഇങ്ങനെ ചർച്ച ചെയ്യുന്ന കാര്യങ്ങൾ ഉറപ്പാക്കി മുന്നോ​ട്ടു പോകു​മ്പോൾ പ്രസം​ഗ​ത്തി​ലൂ​ടെ പഠിക്കുന്ന കാര്യങ്ങൾ നമ്മു​ടേ​താ​ക്കാ​നും അതു​പോ​ലെ ചെയ്‌തു​നോ​ക്കാ​നും നമ്മൾ തീരു​മാ​നി​ച്ചു​റയ്‌ക്കും.​—1 തെസ്സ. 5:21.

¹⁰ ആവശ്യ​ത്തി​നു പ്രസം​ഗ​ക​രു​ണ്ടെ​ങ്കിൽ സഭയിൽ എല്ലാ ആഴ്‌ച​യും പൊതു​പ്ര​സം​ഗം ഉണ്ടായി​രി​ക്കും. പ്രസം​ഗങ്ങൾ നടത്താൻ അയൽസ​ഭ​ക​ളിൽനി​ന്നും പ്രസം​ഗ​കരെ ക്ഷണിക്കും. എല്ലാ ആഴ്‌ച​യി​ലും നടത്താൻ പ്രസം​ഗ​ക​രി​ല്ലെ​ങ്കിൽ സാധി​ക്കു​മ്പോ​ഴെ​ല്ലാം നടത്താൻ ശ്രദ്ധി​ക്കും.

¹¹ വാരാന്തയോഗത്തിന്റെ അടുത്തഭാഗം വീക്ഷാഗോപുരപഠനമാണ്‌. വീക്ഷാഗോപുരത്തിന്റെ പഠനപ്പ​തി​പ്പി​ലെ ലേഖന​ങ്ങ​ളു​ടെ ഒരു ചോദ്യോത്തരപരിചിന്തനമാണ്‌ ഇത്‌. വീക്ഷാ​ഗോ​പു​ര​ത്തി​ലൂ​ടെ യഹോവ നമുക്കു തക്കസമയത്തെ ആത്മീയാ​ഹാ​രം പ്രദാനം ചെയ്യുന്നു.

¹² ബൈബിൾത​ത്ത്വ​ങ്ങൾ അനുദി​ന​ജീ​വി​ത​ത്തിൽ എങ്ങനെ പ്രയോ​ഗ​ത്തി​ലാ​ക്കാ​മെന്നു പഠന​ലേ​ഖ​നങ്ങൾ മിക്ക​പ്പോ​ഴും നമുക്കു കാണി​ച്ചു​ത​രു​ന്നു. ‘ലോക​ത്തി​ന്റെ ആത്മാവി​നും’ അശുദ്ധ​മായ നടത്തയ്‌ക്കും വഴി​പ്പെ​ടാ​തെ ഉറച്ചു​നിൽക്കാൻ അതു ക്രിസ്‌ത്യാ​നി​കളെ സജ്ജരാ​ക്കു​ന്നു. (1 കൊരി. 2:12) ബൈബി​ളു​പ​ദേ​ശ​ങ്ങ​ളും പ്രവച​ന​ങ്ങ​ളും സംബന്ധി​ച്ചുള്ള കൂടു​ത​ലായ പ്രകാശം വീക്ഷാ​ഗോ​പു​ര​ത്തി​ലൂ​ടെ നമുക്കു കിട്ടുന്നു. സത്യ​ത്തെ​ക്കു​റി​ച്ചുള്ള പുതി​യ​പു​തിയ ഗ്രാഹ്യ​ങ്ങൾ അപ്പപ്പോൾ മനസ്സി​ലാ​ക്കി നീതി​മാ​ന്മാ​രു​ടെ പാതയിൽത്തന്നെ മുന്നോ​ട്ടു ചരിക്കാൻ ഇത്‌ എല്ലാവ​രെ​യും പ്രാപ്‌ത​രാ​ക്കു​ന്നു. (സങ്കീ. 97:11; സുഭാ. 4:18) വീക്ഷാ​ഗോ​പു​ര​പ​ഠ​ന​ത്തി​നു ഹാജരാ​കു​ക​യും പങ്കുപ​റ്റു​ക​യും ചെയ്യു​ന്നതു നീതി​യുള്ള പുതിയ ലോക​ത്തെ​ക്കു​റിച്ച്‌ യഹോവ നൽകിയ പ്രത്യാ​ശ​യിൽ സന്തോ​ഷി​ക്കാൻ നമ്മളെ സഹായി​ക്കും. (റോമ. 12:12; 2 പത്രോ. 3:13) സഹോ​ദ​ര​ങ്ങ​ളോ​ടൊ​ത്താ​യി​രി​ക്കു​ന്ന​തും സമയം ചെലവ​ഴി​ക്കു​ന്ന​തും പരിശു​ദ്ധാ​ത്മാ​വി​ന്റെ ഫലം വളർത്തി​യെ​ടു​ക്കാ​നും ശുഷ്‌കാ​ന്തി​യോ​ടെ യഹോ​വയെ സേവി​ക്കാ​നുള്ള ആഗ്രഹം ശക്തി​പ്പെ​ടു​ത്താ​നും നമ്മളെ സഹായി​ക്കും. (ഗലാ. 5:22, 23) പരി​ശോ​ധ​നകൾ സഹിച്ചു​നിൽക്കാ​നുള്ള കരുത്തു നേടാ​നും, “വരുങ്കാ​ല​ത്തേ​ക്കുള്ള . . . ഭദ്രമായ ഒരു അടിത്തറ” ഇടാനും ഇതിലൂ​ടെ നമുക്കു കഴിയു​ന്നു. അങ്ങനെ, ‘യഥാർഥ​ജീ​വ​നിൽ പിടി​യു​റ​പ്പി​ക്കാൻ’ നമുക്കാ​കും.​—1 തിമൊ. 6:19; 1 പത്രോ. 1:6, 7.

¹³ നമ്മളെ ആത്മീയ​മാ​യി പോഷി​പ്പി​ക്കുന്ന ഈ കരുത​ലിൽനിന്ന്‌ എങ്ങനെ പൂർണ​മായ പ്രയോ​ജനം നേടാം? പരിചി​ന്തി​ക്കാ​നുള്ള ഭാഗം ഒറ്റയ്‌ക്കോ കുടും​ബം ഒരുമി​ച്ചോ നേര​ത്തേ​തന്നെ തയ്യാറാ​കണം. തയ്യാറാ​കു​മ്പോൾ, ഉദ്ധരി​ച്ചി​ട്ടി​ല്ലാത്ത തിരു​വെ​ഴു​ത്തു​കൾ എടുത്ത്‌ നോക്കണം, എന്നിട്ട്‌ യോഗ​സ​മ​യത്ത്‌ നമ്മുടെ സ്വന്തം വാക്കു​ക​ളിൽ അഭി​പ്രാ​യങ്ങൾ പറയണം. ഇങ്ങനെ ചെയ്യു​മ്പോൾ സത്യം ഉള്ളി​ലേക്ക്‌ ആഴ്‌ന്നി​റ​ങ്ങും. നമ്മുടെ വിശ്വാ​സം നിറഞ്ഞ വാക്കുകൾ മറ്റുള്ളവർ കേൾക്കു​മ്പോൾ അവർക്ക്‌ അതു പ്രയോ​ജനം ചെയ്യും. മറ്റുള്ളവർ അഭി​പ്രാ​യം പറയു​മ്പോൾ നമ്മളും ശ്രദ്ധിച്ച്‌ കേൾക്കു​ന്നെ​ങ്കിൽ ഓരോ ആഴ്‌ച​യി​ലെ​യും പഠനഭാ​ഗ​ത്തു​നിന്ന്‌ നമുക്കു പൂർണ​മായ പ്രയോ​ജനം നേടാം.

മധ്യവാ​ര​യോ​ഗം

¹⁴ ഓരോ ആഴ്‌ച​യും, നമ്മുടെ ക്രിസ്‌തീയ ജീവി​ത​വും സേവന​വും എന്ന യോഗ​പ​രി​പാ​ടി​ക്കാ​യി സഭ ഒരുമിച്ച്‌ കൂടി​വ​രും. മൂന്നു ഭാഗങ്ങ​ളുള്ള ഒരു യോഗ​മാണ്‌ ഇത്‌. ദൈവ​ത്തി​ന്റെ ശുശ്രൂ​ഷ​ക​രെന്ന നിലയിൽ “യോഗ്യത” നേടാൻ നമ്മളെ സഹായി​ക്കുക എന്നതാണ്‌ ഇതിന്റെ ലക്ഷ്യം. (2 കൊരി. 3:5, 6) ഈ യോഗ​ത്തി​നുള്ള പട്ടിക​യും വിവര​ങ്ങ​ളും മാസം​തോ​റും ലഭിക്കുന്ന നമ്മുടെ ക്രിസ്‌തീയ ജീവി​ത​വും സേവന​വും യോഗ​ത്തി​നുള്ള പഠനസ​ഹാ​യി​യിൽ ലഭ്യമാണ്‌. ജീവിത-സേവന യോഗ​ത്തി​നുള്ള പഠനസ​ഹാ​യി​യിൽ ശുശ്രൂ​ഷ​യിൽ ഉപയോ​ഗി​ക്കാ​നാ​യി സംഭാ​ഷ​ണ​ത്തി​നുള്ള ചില മാതൃ​ക​ക​ളും നൽകി​യി​ട്ടുണ്ട്‌.

¹⁵ ഈ യോഗ​ത്തി​ന്റെ ആദ്യഭാ​ഗം ‘ദൈവ​വ​ച​ന​ത്തി​ലെ നിധികൾ’ എന്ന്‌ അറിയ​പ്പെ​ടു​ന്നു. ചില ബൈബിൾവി​വ​ര​ണ​ങ്ങ​ളു​ടെ പശ്ചാത്ത​ല​വും സന്ദർഭ​വും ആയി പരിചി​ത​രാ​കാ​നും അതിലെ തത്ത്വങ്ങൾ എങ്ങനെ പ്രാ​യോ​ഗി​ക​മാ​ക്കാ​മെന്നു പഠിക്കാ​നും ഈ ഭാഗം നമ്മളെ സഹായി​ക്കു​ന്നു. ഈ യോഗ​ത്തിൽ ഓരോ ആഴ്‌ച​യി​ലെ​യും ബൈബിൾവാ​യ​നാ​ഭാ​ഗത്തെ അടിസ്ഥാ​ന​മാ​ക്കി​യുള്ള പ്രസംഗം, വായന, ചോ​ദ്യോ​ത്തര പരിചി​ന്തനം എന്നിവ ഉൾപ്പെ​ടു​ത്തി​യി​രി​ക്കു​ന്നു. ജീവിത-സേവന യോഗ​ത്തി​നുള്ള പഠനസ​ഹാ​യി​യിൽ ആ ബൈബിൾവി​വ​ര​ണ​ങ്ങ​ളെ​ക്കു​റിച്ച്‌ പഠിക്കാ​നുള്ള ദൃശ്യ​സ​ഹാ​യി​ക​ളും അഭ്യാ​സ​ങ്ങ​ളും കൊടു​ത്തി​ട്ടുണ്ട്‌. അത്തരത്തിൽ ബൈബി​ളി​നെ​ക്കു​റിച്ച്‌ ആഴത്തിൽ പഠിക്കു​ന്നതു നമ്മുടെ വ്യക്തി​പ​ര​മായ ജീവി​ത​ത്തി​ലും പഠിപ്പി​ക്ക​ലി​ലും വളരെ ഗുണം ചെയ്യും. അങ്ങനെ നമ്മൾ “ഏതു കാര്യ​ത്തി​നും പറ്റിയ, എല്ലാ സത്‌പ്ര​വൃ​ത്തി​യും ചെയ്യാൻ സജ്ജനായ, ഒരാളാ​യി​ത്തീ​രു​ന്നു.”​—2 തിമൊ. 3:16, 17.

¹⁶ ‘വയൽസേ​വ​ന​ത്തി​നു സജ്ജരാ​കാം’ എന്നതാണു യോഗ​ത്തി​ന്റെ രണ്ടാം ഭാഗം. വയൽശു​ശ്രൂഷ എങ്ങനെ ചെയ്യാ​മെന്നു പരിശീ​ലി​ച്ചു​നോ​ക്കാ​നും പ്രസംഗ-പഠിപ്പി​ക്കൽ കഴിവു​കൾ മെച്ച​പ്പെ​ടു​ത്താ​നും ഉള്ള അവസരം എല്ലാവർക്കും നൽകു​ക​യാണ്‌ ഇതിന്റെ ഉദ്ദേശ്യം. വിദ്യാർഥി​നി​യ​മ​ന​ങ്ങൾക്കു പുറമേ സംഭാ​ഷ​ണ​ത്തി​നുള്ള മാതൃ​ക​ക​ളു​ടെ വീഡി​യോ​ക​ളും ചർച്ച ചെയ്യും. ‘ക്ഷീണി​ച്ചി​രി​ക്കു​ന്ന​വ​നോട്‌ ഉചിത​മായ വാക്കുകൾ ഉപയോ​ഗിച്ച്‌ സംസാ​രി​ക്കാൻ കഴി​യേ​ണ്ട​തിന്‌’ “വിദ്യാ​സ​മ്പ​ന്ന​രു​ടെ നാവ്‌” നേടാൻ യോഗ​ത്തി​ന്റെ ഈ ഭാഗം നമ്മളെ സഹായി​ക്കു​ന്നു.​—യശ. 50:4.

^{17 ‘}ക്രിസ്‌ത്യാ​നി​ക​ളാ​യി ജീവി​ക്കാം’ എന്നതാണു മൂന്നാം ഭാഗം. അനുദി​ന​ജീ​വി​ത​ത്തിൽ പ്രാ​യോ​ഗി​ക​മാ​ക്കാൻ കഴിയുന്ന ബൈബിൾത​ത്ത്വ​ങ്ങ​ളെ​ക്കു​റിച്ച്‌ ഈ ഭാഗത്ത്‌ പരിചി​ന്തി​ക്കും. (സങ്കീ. 119:105) സഭാ ബൈബിൾപ​ഠനം ആണ്‌ മൂന്നാം ഭാഗത്തി​ന്റെ ഒരു മുഖ്യ​സ​വി​ശേഷത. വീക്ഷാ​ഗോ​പു​ര​പ​ഠ​നം​പോ​ലെ സഭാ ബൈബിൾപ​ഠ​ന​വും ചോ​ദ്യോ​ത്ത​ര​ചർച്ച​യാ​യാ​ണു നടത്തു​ന്നത്‌.

¹⁸ ജീവിത-സേവന യോഗ​ത്തി​നുള്ള പഠനസ​ഹാ​യി കിട്ടി​യാ​ലു​ടൻ മൂപ്പന്മാ​രു​ടെ സംഘത്തി​ന്റെ ഏകോ​പകൻ അല്ലെങ്കിൽ അദ്ദേഹത്തെ സഹായി​ക്കുന്ന ഒരു മൂപ്പൻ ഓരോ മാസ​ത്തെ​യും പരിപാ​ടി​കൾ ശ്രദ്ധാ​പൂർവം വിശക​ലനം ചെയ്‌ത്‌ ഒരു പട്ടിക തയ്യാറാ​ക്കും. ഓരോ ആഴ്‌ച​യും മൂപ്പന്മാ​രു​ടെ സംഘം അംഗീ​ക​രിച്ച പഠിപ്പി​ക്കൽപ്രാപ്‌തി​യുള്ള ഒരു മൂപ്പനാ​യി​രി​ക്കും ഈ യോഗ​ത്തിൽ അധ്യക്ഷത വഹിക്കു​ന്നത്‌. അദ്ദേഹം വിദ്യാർഥി​നി​യ​മ​നങ്ങൾ നിർവ​ഹി​ക്കു​ന്ന​വരെ അഭിന​ന്ദി​ക്കു​ക​യും അവർക്കു വേണ്ട ബുദ്ധി​യു​പ​ദേശം നൽകു​ക​യും ചെയ്യുന്നു. കൂടാതെ യോഗങ്ങൾ കൃത്യ​സ​മ​യത്ത്‌ തുടങ്ങു​ക​യും അവസാ​നി​ക്കു​ക​യും ചെയ്യുന്നു എന്ന്‌ ഉറപ്പു​വ​രു​ത്തു​ന്നു.

¹⁹ ജീവിത-സേവന യോഗ​ത്തി​നാ​യി ക്രമമാ​യി തയ്യാറാ​കു​ന്ന​തും ഹാജരാ​കു​ന്ന​തും അതിൽ പങ്കെടു​ക്കു​ന്ന​തും പ്രധാ​ന​മാണ്‌. തിരു​വെ​ഴു​ത്തു​ക​ളെ​ക്കു​റി​ച്ചുള്ള അറിവ്‌ നേടാ​നും ബൈബിൾത​ത്ത്വ​ങ്ങ​ളെ​ക്കു​റി​ച്ചുള്ള ഗ്രാഹ്യം വർധി​പ്പി​ക്കാ​നും ആത്മവി​ശ്വാ​സ​ത്തോ​ടെ സന്തോ​ഷ​വാർത്ത പ്രസം​ഗി​ക്കാ​നും ശിഷ്യരെ ഉളവാ​ക്കു​ന്ന​തിൽ വൈദ​ഗ്‌ധ്യം നേടാ​നും അങ്ങനെ നമുക്കു കഴിയും. സ്‌നാ​ന​മേ​റ്റി​ട്ടി​ല്ലാ​ത്ത​വർക്കും ഈ യോഗ​ത്തിൽ പങ്കെടു​ക്കാ​നും ഹൃദ്യ​മായ സഹവാ​സ​ത്തിൽനി​ന്നും ബലപ്പെ​ടു​ത്തുന്ന ആത്മീയ​ചർച്ച​ക​ളിൽനി​ന്നും പ്രയോ​ജനം നേടാ​നും കഴിയും. ഈ യോഗ​ത്തി​നും മറ്റുള്ള യോഗ​ങ്ങൾക്കും വേണ്ടി തയ്യാറാ​കാ​നാ​യി വാച്ച്‌ടവർ ലൈ​ബ്ര​റി​യോ JW ലൈ​ബ്ര​റി​യോ വാച്ച്‌ടവർ ഓൺലൈൻ ലൈ​ബ്ര​റി​യോ രാജ്യ​ഹാ​ളി​ലുള്ള ലൈ​ബ്ര​റി​യോ ഉപയോ​ഗ​പ്പെ​ടു​ത്തു​ന്നതു വളരെ നന്നായി​രി​ക്കും. യഹോ​വ​യു​ടെ സാക്ഷി​ക​ളു​ടെ ലഭ്യമായ എല്ലാ പ്രസി​ദ്ധീ​ക​ര​ണ​ങ്ങ​ളും ഉൾക്കൊ​ള്ളു​ന്ന​താ​ണു രാജ്യ​ഹാൾ ലൈ​ബ്രറി. നിഘണ്ടു, പദസൂ​ചിക നിഘണ്ടു, പല ബൈബിൾപ​രി​ഭാ​ഷകൾ, യഹോ​വ​യു​ടെ സാക്ഷി​കൾക്കു​വേ​ണ്ടി​യുള്ള ഗവേഷ​ണ​സ​ഹാ​യി, വാച്ച്‌ടവർ പ്രസി​ദ്ധീ​കരണ സൂചിക (ഇംഗ്ലീഷ്‌), സഹായ​ക​മായ മറ്റു ഗ്രന്ഥങ്ങൾ തുടങ്ങി​യ​വ​യും ലൈ​ബ്ര​റി​യി​ലു​ണ്ടാ​യി​രി​ക്കും. യോഗ​ങ്ങൾക്കു മുമ്പോ ശേഷമോ രാജ്യ​ഹാ​ളി​ലെ ഈ പ്രസി​ദ്ധീ​ക​ര​ണങ്ങൾ ഉപയോ​ഗി​ക്കാൻ നിങ്ങൾ മടി​ക്കേ​ണ്ട​തില്ല.

വയൽസേ​വ​ന​യോ​ഗങ്ങൾ

²⁰ വയൽസേ​വ​ന​യോ​ഗ​ങ്ങൾക്ക്‌ ഇടദി​വ​സ​ങ്ങ​ളി​ലും വാരാ​ന്ത​ത്തി​ലും പ്രചാ​രകർ പല കൂട്ടങ്ങ​ളാ​യി കൂടി​വ​രാ​റുണ്ട്‌. ഈ യോഗങ്ങൾ സാധാ​ര​ണ​യാ​യി സഹോ​ദ​ര​ങ്ങ​ളു​ടെ വീടു​ക​ളി​ലോ മറ്റു സ്ഥലങ്ങളി​ലോ വെച്ച്‌ നടത്തുന്നു. രാജ്യ​ഹാ​ളു​ക​ളും ഇതിനു​വേണ്ടി ഉപയോ​ഗി​ക്കാം. സഭാ​പ്ര​ദേ​ശത്ത്‌ പലയി​ട​ങ്ങ​ളിൽ ചെറിയ കൂട്ടങ്ങ​ളാ​യി കൂടി​വ​രു​ന്നെ​ങ്കിൽ വയൽസേ​വ​ന​യോ​ഗ​ങ്ങ​ളിൽ പങ്കെടു​ക്കാ​നും പ്രവർത്ത​ന​പ്ര​ദേ​ശത്ത്‌ എത്തി​ച്ചേ​രാ​നും പ്രചാ​ര​കർക്ക്‌ എളുപ്പ​മാ​കും. കൂടാതെ, പ്രചാ​ര​കരെ ജോടി​ക​ളാ​യി തിരി​ക്കാ​നും പ്രവർത്ത​ന​പ്ര​ദേ​ശ​ത്തേക്കു പറഞ്ഞു​വി​ടാ​നും എളുപ്പം കഴിയും. ഗ്രൂപ്പ്‌ മേൽവി​ചാ​ര​കനു തന്റെ ഗ്രൂപ്പി​ലു​ള്ള​വർക്ക്‌ അടുത്ത ശ്രദ്ധ കൊടു​ക്കാ​നും ഇതുമൂ​ലം കഴിയും. കൂട്ടങ്ങൾ വെവ്വേ​റെ​യാ​യി കൂടു​ന്ന​തു​കൊണ്ട്‌ പ്രയോ​ജ​ന​ങ്ങ​ളുണ്ട്‌. എന്നാൽ ചില സാഹച​ര്യ​ങ്ങ​ളിൽ പല കൂട്ടങ്ങൾ ഒരുമിച്ച്‌ കൂടി​വ​ന്നേ​ക്കാം. ഉദാഹ​ര​ണ​ത്തിന്‌, ഇടദി​വ​സ​ങ്ങ​ളിൽ ശുശ്രൂ​ഷയ്‌ക്കു പോകുന്ന പ്രചാ​ര​ക​രു​ടെ എണ്ണം കുറവാ​ണെ​ങ്കിൽ പല കൂട്ടങ്ങളെ ഒരുമിച്ച്‌ ചേർക്കാ​നാ​കും. അല്ലെങ്കിൽ സഭയിലെ എല്ലാവ​രെ​യും രാജ്യ​ഹാ​ളി​ലോ സൗകര്യ​പ്ര​ദ​മായ മറ്റൊരു സ്ഥലത്തോ കൂട്ടി​വ​രു​ത്തു​ന്ന​തും പ്രയോ​ജനം ചെയ്‌തേ​ക്കാം. അങ്ങനെ​യാ​കു​മ്പോൾ എല്ലാ പ്രചാ​ര​കർക്കും, കൂടെ പ്രവർത്തി​ക്കാൻ ആളുണ്ടാ​കും. പൊതു അവധി​ദി​വ​സ​ങ്ങ​ളിൽ സഭയൊ​ന്നാ​കെ രാജ്യ​ഹാ​ളിൽ ഒരുമി​ച്ചു​കൂ​ടു​ന്നതു ചില​പ്പോൾ സൗകര്യ​പ്ര​ദ​മാ​യേ​ക്കും. അല്ലെങ്കിൽ വീക്ഷാ​ഗോ​പു​ര​പ​ഠ​ന​ത്തി​നു ശേഷം എല്ലാ കൂട്ടങ്ങ​ളെ​യും ചേർത്ത്‌ ഒരൊറ്റ വയൽസേ​വ​ന​യോ​ഗ​മാ​യി നടത്താ​നും സഭ തീരു​മാ​നി​ച്ചേ​ക്കാം.

²¹ ഗ്രൂപ്പു​കൾ വെവ്വേറെ കൂട്ടങ്ങ​ളാ​യാ​ണു കൂടു​ന്ന​തെ​ങ്കിൽ വയൽസേ​വ​ന​യോ​ഗം നടത്തു​ന്നതു ഗ്രൂപ്പ്‌ മേൽവി​ചാ​ര​ക​നാ​യി​രി​ക്കും. ഇടയ്‌ക്കി​ടെ ഗ്രൂപ്പ്‌ മേൽവി​ചാ​രകൻ സഹായി​യെ​യോ യോഗ്യ​ത​യുള്ള മറ്റൊരു സഹോ​ദ​ര​നെ​യോ ഈ യോഗങ്ങൾ നടത്താൻ നിയമി​ച്ചേ​ക്കാം. വയൽശു​ശ്രൂ​ഷ​യിൽ സഹായ​ക​വും പ്രാ​യോ​ഗി​ക​വും ആയ എന്തെങ്കി​ലും കാര്യം ചർച്ച ചെയ്യു​ന്ന​തി​നു നിർവാ​ഹകൻ തയ്യാറാ​യി​രി​ക്കണം. വയൽസേ​വ​ന​ത്തി​നു വേണ്ട ക്രമീ​ക​ര​ണങ്ങൾ ചെയ്‌ത​തി​നു ശേഷം ഗ്രൂപ്പി​ലെ ഒരാൾ പ്രാർഥി​ക്കു​ന്നു. ഇതിനു ശേഷം ഒട്ടും വൈകാ​തെ അവരെ​ല്ലാം പ്രദേ​ശ​ത്തേക്കു പോകും. ഇത്തരം വയൽസേ​വ​ന​യോ​ഗ​ങ്ങ​ളു​ടെ ദൈർഘ്യം അഞ്ചു മിനി​ട്ടു​മു​തൽ ഏഴു മിനി​ട്ടു​വരെ ആകാം. എന്നാൽ, ഒരു സഭാ​യോ​ഗ​ത്തി​നു ശേഷമാ​ണെ​ങ്കിൽ സമയം അതിലും കുറവാ​യി​രി​ക്കണം. വയൽസേ​വ​ന​യോ​ഗങ്ങൾ പ്രസം​ഗ​പ്ര​വർത്ത​ന​ത്തി​നു പോകു​ന്ന​വർക്കു പ്രോ​ത്സാ​ഹ​ന​വും പ്രാ​യോ​ഗി​ക​നിർദേ​ശ​ങ്ങ​ളും മാർഗ​നിർദേ​ശ​ങ്ങ​ളും നൽകു​ന്ന​വ​യാ​യി​രി​ക്കണം. പുതി​യ​വ​രെ​യും സഹായം ആവശ്യ​മു​ള്ള​വ​രെ​യും അനുഭ​വ​പ​രി​ച​യ​മുള്ള പ്രചാ​ര​ക​രു​ടെ​കൂ​ടെ പ്രവർത്തി​ക്കാൻ ക്രമീ​ക​രി​ക്കാ​നാ​കും. അങ്ങനെ അവർക്കു പരിശീ​ലനം ലഭിക്കു​ന്നു.

പുതി​യ​തോ ചെറു​തോ ആയ സഭകളി​ലെ യോഗ​ക്ര​മീ​ക​ര​ണങ്ങൾ

²² ശിഷ്യ​ന്മാർ വർധി​ക്കു​മ്പോൾ സഭകളു​ടെ എണ്ണവും കൂടുന്നു. സാധാ​ര​ണ​യാ​യി, ഒരു പുതിയ സഭയ്‌ക്കുള്ള അപേക്ഷ സമർപ്പി​ക്കു​ന്നതു സർക്കിട്ട്‌ മേൽവി​ചാ​ര​ക​നാണ്‌. ചില അവസര​ങ്ങ​ളിൽ ചെറിയ കൂട്ടങ്ങൾക്ക്‌ അടുത്തുള്ള സഭയു​മാ​യി സഹവസി​ക്കു​ന്ന​താ​യി​രി​ക്കും കൂടുതൽ പ്രയോ​ജ​ന​കരം.

²³ ചില ചെറിയ സഭകളിൽ ഒരുപക്ഷേ സഹോ​ദ​രി​മാർ മാത്രമേ ഉള്ളൂ എന്നും വരാം. അങ്ങനെ വരു​മ്പോൾ തിരു​വെ​ഴു​ത്തിൽ കാണുന്ന ക്രമീ​ക​ര​ണ​ങ്ങൾക്കു ചേർച്ച​യിൽ ശിരോ​വസ്‌ത്രം ധരിച്ചു​കൊണ്ട്‌ ഒരു സഹോ​ദരി പ്രാർഥി​ക്കു​ക​യോ യോഗങ്ങൾ നടത്തു​ക​യോ ചെയ്യുന്നു. (1 കൊരി. 11:3-16) മിക്ക സന്ദർഭ​ങ്ങ​ളി​ലും സഹോ​ദരി ഇരുന്നു​കൊ​ണ്ടാ​ണു യോഗം നടത്താ​റു​ള്ളത്‌, കൂട്ടത്തിന്‌ അഭിമു​ഖ​മാ​യി​ട്ടാ​യി​രി​ക്കും ഇരിക്കുക. സഹോ​ദ​രി​മാർ ഒരിക്ക​ലും സഹോ​ദ​ര​ന്മാർ ചെയ്യു​ന്ന​തു​പോ​ലെ നേരിട്ട്‌ സഭയോ​ടാ​യി പ്രസം​ഗങ്ങൾ നടത്തു​ക​യില്ല. പകരം, അവർ സംഘടന നൽകി​യി​രി​ക്കുന്ന വിവരങ്ങൾ വായി​ക്കു​ക​യോ അവയെ​പ്പറ്റി അഭി​പ്രാ​യങ്ങൾ പറയു​ക​യോ ചെയ്യുന്നു. അല്ലെങ്കിൽ, വൈവി​ധ്യ​ത്തി​നു​വേണ്ടി വിവരങ്ങൾ ചർച്ചയാ​യോ അവതര​ണ​മാ​യോ നടത്താ​വു​ന്ന​താണ്‌. ബ്രാ​ഞ്ചോ​ഫീ​സു​മാ​യി കത്തിട​പാ​ടു​കൾ നടത്താ​നും യോഗങ്ങൾ നടത്താ​നും സഹോ​ദ​രി​മാ​രി​ലൊ​രാ​ളെ ബ്രാഞ്ച്‌ ചുമത​ല​പ്പെ​ടു​ത്തു​ന്നു. ക്രമേണ, സഹോ​ദ​ര​ന്മാർ യോഗ്യ​രാ​യി​ത്തീ​രു​മ്പോൾ അവർ ഈ ചുമത​ലകൾ നിർവ​ഹി​ക്കും.

സർക്കിട്ട്‌ സമ്മേള​ന​ങ്ങൾ

²⁴ ഒരു സർക്കി​ട്ടി​നു കീഴി​ലുള്ള സഭകൾക്ക്‌ ആണ്ടു​തോ​റും ഓരോ ദിവസം വീതമുള്ള രണ്ടു സർക്കിട്ട്‌ സമ്മേള​ന​ങ്ങ​ളുണ്ട്‌. സന്തോ​ഷ​ക​ര​മായ ഈ അവസര​ങ്ങ​ളിൽ കൂടി​വ​രുന്ന എല്ലാവ​രും നല്ല ക്രിസ്‌തീ​യ​സ​ഹ​വാ​സം ആസ്വദിച്ച്‌ തങ്ങളുടെ ‘ഹൃദയം വിശാ​ല​മാ​യി തുറക്കു​ന്നു.’ (2 കൊരി. 6:11-13) ഏതെങ്കി​ലും പ്രത്യേ​കാ​വ​ശ്യം മനസ്സിൽ കണ്ടു​കൊ​ണ്ടാണ്‌ യഹോ​വ​യു​ടെ സംഘടന സമ്മേള​ന​ങ്ങ​ളു​ടെ തിരു​വെ​ഴു​ത്തു​വി​ഷ​യ​ങ്ങ​ളും കാര്യ​പ​രി​പാ​ടി​യു​ടെ വിവിധ ഭാഗങ്ങ​ളും തയ്യാറാ​ക്കു​ന്നത്‌. പ്രസം​ഗങ്ങൾ, അവതര​ണങ്ങൾ, പുനര​വ​ത​ര​ണങ്ങൾ, ആത്മഗതങ്ങൾ, അഭിമു​ഖങ്ങൾ എന്നിങ്ങനെ ആകർഷ​ക​മാ​യി വിവരങ്ങൾ അവതരി​പ്പി​ക്കു​ന്നു. സമയോ​ചി​ത​മായ അത്തരം പരിപാ​ടി​കൾ കൂടി​വ​ന്നി​രി​ക്കുന്ന എല്ലാവ​രെ​യും നന്നായി പ്രവർത്തി​ക്കാൻ പ്രേരി​പ്പി​ക്കു​ന്നു. ഈ സമ്മേള​ന​ങ്ങ​ളിൽ പുതിയ ശിഷ്യർക്ക്‌ യഹോ​വയ്‌ക്കുള്ള തങ്ങളുടെ സമർപ്പ​ണ​ത്തി​ന്റെ അടയാ​ള​മാ​യി സ്‌നാ​ന​മേൽക്കു​ന്ന​തി​നുള്ള സൗകര്യ​വും ഉണ്ടായി​രി​ക്കും.

മേഖലാ കൺ​വെൻ​ഷ​നു​കൾ

²⁵ വർഷത്തി​ലൊ​രി​ക്കൽ വലിയ കൂടി​വ​ര​വു​ക​ളും സംഘടി​പ്പി​ക്കു​ന്നു. സാധാ​ര​ണ​യാ​യി മൂന്നു ദിവസം നീളുന്ന കൂടി​വ​ര​വാണ്‌ ഇത്‌. പല സർക്കി​ട്ടു​ക​ളി​ലെ സഭകൾ ഇവയിൽ ഒന്നിച്ച്‌ പങ്കെടു​ക്കു​ന്നു. ചെറിയ ബ്രാഞ്ചു​കൾ, അവയുടെ പ്രദേ​ശ​ത്തുള്ള സഭക​ളെ​ല്ലാം ഒരു സ്ഥലത്ത്‌ ഒന്നിച്ച്‌ കൂടാൻ ക്രമീ​ക​രി​ക്കു​ന്നതു പ്രാ​യോ​ഗി​ക​മാ​ണെന്നു കണ്ടിട്ടുണ്ട്‌. ഓരോ ദേശങ്ങ​ളി​ലെ​യും സാഹച​ര്യ​ങ്ങൾക്ക​നു​സ​രി​ച്ചോ സംഘട​ന​യിൽനി​ന്നുള്ള നിർദേ​ശ​ങ്ങൾക്ക​നു​സ​രി​ച്ചോ കൺ​വെൻ​ഷ​നു​ക​ളു​ടെ ക്രമീ​ക​ര​ണ​ത്തിൽ വ്യത്യാ​സങ്ങൾ കണ്ടേക്കാം. ചില രാജ്യ​ങ്ങ​ളിൽ അന്താരാഷ്‌ട്ര​കൺ​വെൻ​ഷ​നു​ക​ളോ പ്രത്യേ​ക​കൺ​വെൻ​ഷ​നു​ക​ളോ ഇടയ്‌ക്കി​ടെ നടത്താ​റുണ്ട്‌. പല രാജ്യ​ങ്ങ​ളിൽനി​ന്നുള്ള പതിനാ​യി​ര​ക്ക​ണ​ക്കി​നു സാക്ഷികൾ അവയിൽ പങ്കെടു​ക്കു​ന്നു. യഹോ​വ​യു​ടെ സാക്ഷി​ക​ളു​ടെ ഈ വലിയ കൂടി​വ​ര​വു​കൾക്കു നൽകുന്ന വിപു​ല​മായ പ്രചാ​രണം, വർഷങ്ങ​ളി​ലു​ട​നീ​ളം അനേകർ ദൈവ​രാ​ജ്യ​ത്തെ​ക്കു​റി​ച്ചുള്ള സന്തോ​ഷ​വാർത്ത അറിയാൻ ഇടയാ​ക്കി​യി​രി​ക്കു​ന്നു.

²⁶ യഹോ​വ​യു​ടെ സമർപ്പി​ത​ജ​ന​ത്തിന്‌ ഒത്തൊ​രു​മ​യോ​ടെ ആരാധി​ക്കാ​നുള്ള ആനന്ദ​വേ​ള​ക​ളാ​ണു കൺ​വെൻ​ഷ​നു​കൾ. സത്യത്തി​ന്മേൽ വീശുന്ന കൂടു​ത​ലായ വെളിച്ചം വെളി​പ്പെ​ടു​ത്താ​നുള്ള വേദി​യൊ​രു​ക്കു​ന്ന​വ​യാണ്‌ ഇവ. ചില കൺ​വെൻ​ഷ​നു​ക​ളിൽ പുതിയ പ്രസി​ദ്ധീ​ക​ര​ണങ്ങൾ പ്രകാ​ശനം ചെയ്യാ​റുണ്ട്‌. അവ വ്യക്തി​പ​ര​വും സഭാപ​ര​വും ആയ പഠനത്തിന്‌ അല്ലെങ്കിൽ വയൽശു​ശ്രൂ​ഷ​യി​ലെ ഉപയോ​ഗ​ത്തിന്‌ ഉതകുന്നു. പുതി​യവർ സ്‌നാ​ന​മേൽക്കു​ന്ന​തും കൺ​വെൻ​ഷ​നു​ക​ളു​ടെ സവി​ശേ​ഷ​ത​യാണ്‌. ആത്മീയ​വ​ളർച്ച വേഗത്തി​ലാ​ക്കു​ന്ന​തിൽ കൺ​വെൻ​ഷ​നു​കൾക്കു നല്ല പങ്കുണ്ട്‌. യേശു​ക്രിസ്‌തു​വി​ന്റെ ശിഷ്യ​ന്മാ​രെ തിരി​ച്ച​റി​യി​ക്കുന്ന അടയാളം വഹിക്കു​ന്ന​വ​രാണ്‌ യഹോ​വ​യു​ടെ ജനം. ഈ സമർപ്പി​ത​ക്രിസ്‌ത്യാ​നി​ക​ളു​ടെ ആഗോ​ള​സാ​ഹോ​ദ​ര്യ​ത്തി​ന്റെ തെളി​വു​ക​ളാണ്‌ അവരുടെ കൺ​വെൻ​ഷ​നു​കൾ.​—യോഹ. 13:35.

²⁷ യഹോ​വ​യു​ടെ ജനത്തിന്റെ സഭാ​യോ​ഗ​ങ്ങ​ളി​ലും അതു​പോ​ലെ സമ്മേള​ന​ങ്ങ​ളി​ലും കൺ​വെൻ​ഷ​നു​ക​ളി​ലും പങ്കെടു​ക്കു​മ്പോൾ, യഹോ​വ​യു​ടെ ഇഷ്ടം ചെയ്യാൻ നമ്മൾ ശക്തരാ​ക്ക​പ്പെ​ടു​ക​യാണ്‌. കൂടാതെ, ക്രിസ്‌തീ​യ​വി​ശ്വാ​സ​ത്തി​നു തുരങ്കം വെച്ചേ​ക്കാ​വുന്ന ലോക​ത്തി​ന്റെ സ്വാധീ​ന​ങ്ങ​ളിൽനിന്ന്‌ നമുക്കു സംരക്ഷ​ണ​വും ലഭിക്കു​ന്നു. ഇങ്ങനെ​യുള്ള കൂടി​വ​ര​വു​ക​ളെ​ല്ലാം യഹോ​വയ്‌ക്കു സ്‌തു​തി​യും മഹത്ത്വ​വും കരേറ്റാൻ ഉപകരി​ക്കു​ന്നു. (സങ്കീ. 35:18; സുഭാ. 14:28) ഈ അന്ത്യനാ​ളു​ക​ളിൽ കൺ​വെൻ​ഷ​നു​കൾ യഹോ​വ​യു​ടെ സമർപ്പി​ത​ജ​ന​ത്തിന്‌ ആത്മീയ​ന​വോ​ന്മേഷം പകരുന്നു. ഈ സന്തോ​ഷ​ക​ര​മായ അവസരങ്ങൾ നൽകു​ന്ന​തി​നു നമ്മൾ യഹോ​വ​യോ​ടു നന്ദിയു​ള്ള​വ​രല്ലേ?

കർത്താ​വി​ന്റെ അത്താഴം

²⁸ എല്ലാ വർഷവും യേശു​ക്രിസ്‌തു​വി​ന്റെ മരണത്തി​ന്റെ വാർഷി​കം ലോക​മെ​ങ്ങു​മുള്ള യഹോ​വ​യു​ടെ സാക്ഷി​ക​ളു​ടെ സഭകൾ ആചരി​ക്കു​ന്നു. ക്രിസ്‌തു​വി​ന്റെ മരണത്തി​ന്റെ സ്‌മാ​രകം അഥവാ കർത്താ​വി​ന്റെ അത്താഴം എന്നാണ്‌ ഇത്‌ അറിയ​പ്പെ​ടു​ന്നത്‌. (1 കൊരി. 11:20, 23, 24) യഹോ​വ​യു​ടെ ജനത്തിനു വർഷത്തി​ലെ ഏറ്റവും പ്രധാ​ന​പ്പെട്ട യോഗ​മാ​ണിത്‌. ഈ സ്‌മാ​രകം ആചരി​ക്കാൻ നമ്മളോ​ടു പ്രത്യേ​കം കല്‌പി​ച്ചി​രി​ക്കു​ന്നു.​—ലൂക്കോ. 22:19.

²⁹ ബൈബി​ളിൽ പ്രസ്‌താ​വി​ച്ചി​രി​ക്കുന്ന പെസഹ​യു​ടെ അതേ തീയതി​യി​ലാ​ണു സ്‌മാ​ര​ക​വും. (പുറ. 12:2, 6; മത്താ. 26:17, 20, 26) ബി. സി. 1513-ൽ ഇസ്രാ​യേ​ല്യർ ഈജി​പ്‌തിൽനിന്ന്‌ പുറ​പ്പെ​ട്ടു​പോ​ന്ന​തി​ന്റെ വാർഷിക അനുസ്‌മ​ര​ണാ​ഘോ​ഷ​മാ​യി​രു​ന്നു പെസഹ. അന്ന്‌, ആദ്യത്തെ ചാന്ദ്ര​മാ​സ​ത്തി​ന്റെ 14-ാം തീയതി, അവർക്കു പെസഹാ​ക്കു​ഞ്ഞാ​ടി​നെ ഭക്ഷിക്കാ​നും ഈജിപ്‌തി​ന്റെ അടിമ​ത്ത​ത്തിൽനിന്ന്‌ വിട്ടു​പോ​രാ​നും ഉള്ള ദിവസ​മാ​യി യഹോവ നിശ്ചയി​ച്ചു. (പുറ. 12:1-51) വസന്തവി​ഷു​വ​ത്തിന്‌ ഏറ്റവും അടുത്താ​യി യരുശ​ലേ​മിൽ പുതു​ച​ന്ദ്രൻ കാണ​പ്പെ​ടു​ന്ന​തു​മു​തൽ 13 ദിവസം എണ്ണിയാണ്‌ ഈ തീയതി കണക്കാ​ക്കു​ന്നത്‌. സാധാ​ര​ണ​യാ​യി, വസന്തവി​ഷു​വ​ത്തെ​ത്തു​ടർന്ന്‌ ആദ്യമാ​യി പൂർണ​ച​ന്ദ്രൻ ദൃശ്യ​മാ​കുന്ന ദിവസ​മാണ്‌ ഓരോ വർഷവും സ്‌മാ​ര​കാ​ച​രണം നടക്കു​ന്നത്‌.

³⁰ മത്തായി 26:26-28-ൽ സ്‌മാ​രകം ആചരി​ക്കേ​ണ്ടത്‌ എങ്ങനെ​യാ​ണെന്നു യേശു സ്വന്തം വാക്കു​ക​ളിൽ വിവരി​ക്കു​ന്നുണ്ട്‌. ഇതു ഗൂഢാർഥ​ങ്ങ​ളുള്ള ഒരു ആചാരമല്ല. യേശു​ക്രിസ്‌തു​വി​നോ​ടൊത്ത്‌ സ്വർഗീ​യ​രാ​ജ്യ​ത്തിൽ കൂട്ടവ​കാ​ശി​ക​ളാ​കാൻ വിളി​ക്ക​പ്പെ​ട്ടി​രി​ക്കു​ന്നവർ പങ്കുപറ്റുന്ന, പ്രതീ​കാ​ത്മ​ക​മായ അർഥമുള്ള ഒരു ഭക്ഷണമാണ്‌ ഇത്‌. (ലൂക്കോ. 22:28-30) മറ്റ്‌ എല്ലാ സമർപ്പി​ത​ക്രിസ്‌ത്യാ​നി​ക​ളെ​യും താത്‌പ​ര്യ​മുള്ള ആളുക​ളെ​യും കർത്താ​വി​ന്റെ അത്താഴ​ത്തി​നു നിരീ​ക്ഷ​ക​രെന്ന നിലയിൽ ഹാജരാ​കാൻ പ്രോ​ത്സാ​ഹി​പ്പി​ക്കു​ന്നു. ഈ ആചരണ​ത്തിൽ പങ്കെടു​ത്തു​കൊണ്ട്‌ അവർ, ദൈവ​മായ യഹോവ പുത്രനായ യേശു​ക്രിസ്‌തു​വി​ലൂ​ടെ മനുഷ്യ​വർഗ​ത്തി​ന്റെ മുഴുവൻ പ്രയോ​ജ​ന​ത്തി​നാ​യി ചെയ്‌തി​രി​ക്കുന്ന കരുത​ലു​ക​ളോ​ടുള്ള വിലമ​തി​പ്പും നന്ദിയും കാണി​ക്കു​ന്നു. സ്‌മാ​ര​കാ​ച​ര​ണ​ത്തി​നു മുമ്പ്‌ ഒരു പ്രത്യേക പൊതു​പ്ര​സം​ഗം നടത്താ​റുണ്ട്‌. സ്‌മാ​ര​കാ​ച​ര​ണ​ത്തി​നാ​യി ആകാം​ക്ഷ​യും ഉത്സാഹ​വും ഉണർത്തു​ക​യും ബൈബിൾ പഠിക്കാൻ ആളുക​ളിൽ കൂടുതൽ താത്‌പ​ര്യം ജനിപ്പി​ക്കു​ക​യും ചെയ്യു​ക​യാണ്‌ ഈ പ്രസം​ഗ​ത്തി​ന്റെ ഉദ്ദേശ്യം.

³¹ ‘സ്‌നേ​ഹി​ക്കാ​നും നല്ല കാര്യങ്ങൾ ചെയ്യാ​നും വേണ്ടി പരസ്‌പരം എങ്ങനെ പ്രചോ​ദി​പ്പി​ക്കാ​മെന്നു ചിന്തി​ക്കാൻ’ സഭാ​യോ​ഗങ്ങൾ അവസരം ഒരുക്കു​ന്നു. (എബ്രാ. 10:24) അതു​കൊണ്ട്‌ ഒരുമിച്ച്‌ കൂടി​വ​രാ​നുള്ള അത്തരം അവസര​ങ്ങൾക്കാ​യി യഹോ​വ​യു​ടെ സാക്ഷികൾ സന്തോ​ഷ​ത്തോ​ടും ആകാം​ക്ഷ​യോ​ടും കൂടി കാത്തി​രി​ക്കു​ന്നു. വിശ്വസ്‌ത​നും വിവേ​കി​യും ആയ അടിമ വളരെ താത്‌പ​ര്യ​ത്തോ​ടെ നമ്മുടെ ആത്മീയാ​വ​ശ്യ​ങ്ങൾ കണക്കി​ലെ​ടുത്ത്‌ അങ്ങനെ​യുള്ള യോഗങ്ങൾ ക്രമീ​ക​രി​ക്കു​ന്നു. പതിവാ​യി കൂടി​വ​രാ​നുള്ള ഈ ക്രമീ​ക​ര​ണ​ത്തിൽനിന്ന്‌ പൂർണ​മാ​യി പ്രയോ​ജനം നേടാൻ യഹോ​വ​യു​ടെ എല്ലാ ദാസന്മാ​രും താത്‌പ​ര്യ​ക്കാ​രും ആത്മാർഥ​മാ​യി ശ്രമി​ക്കണം. തന്റെ സംഘട​ന​യി​ലൂ​ടെ യഹോവ ചെയ്‌തി​രി​ക്കുന്ന എല്ലാ കരുത​ലു​ക​ളോ​ടും ഹൃദയം​ഗ​മ​മായ നന്ദിയും വിലമ​തി​പ്പും കാണി​ച്ചു​കൊണ്ട്‌ ദൈവ​ത്തി​ന്റെ ദാസരായ നമുക്ക്‌ ഒറ്റക്കെ​ട്ടാ​യി നില​കൊ​ള്ളാം. ഏറെ പ്രധാ​ന​മാ​യി നമുക്ക്‌ യഹോ​വയെ സ്‌തു​തി​ക്കു​ക​യും വാഴ്‌ത്തു​ക​യും ചെയ്യാം.​—സങ്കീ. 111:1.