നിങ്ങൾ അതിഥി​പ്രി​യ​ത്തി​ന്റെ ഗതി പിൻതു​ട​രു​ന്നു​ണ്ടോ?

അന്നൊ​രുഷ്‌ണ ദിവസ​മാ​യി​രു​ന്നു. പ്രായ​മേ​റി​യ​വ​രും ഇളം​പ്രാ​യ​ക്കാ​രു​മായ യഹോ​വ​യു​ടെ സാക്ഷി​ക​ളു​ടെ ഒരു സംഘം ഒരു രാജ്യ​ഹാൾ നവീക​രി​ക്കുന്ന പ്രക്രി​യ​യിൽ ശുചീ​ക​രണം, പെയ്‌ന്റിംഗ്‌ എന്നിവ തുടങ്ങി മറ്റനവധി ജോലി​ക​ളിൽ കഠിനാ​ദ്ധ്വാ​നം ചെയ്‌തു​കൊ​ണ്ടി​രി​ക്കു​ക​യാ​യി​രു​ന്നു. നട്ടുച്ച ആയപ്പോ​ഴേക്ക്‌ അവർ ഏറെക്കു​റെ ക്ഷീണി​ത​രാ​വു​ക​യും, അവരിൽ ചിലർ അൽപ്പം വിശ്ര​മ​ത്തി​നു വേണ്ടി ഇരിക്കു​ക​യും ചെയ്‌തു.

ഉടനെ​ത​ന്നെ, സാക്ഷി​ക​ളായ അവരുടെ സഹോ​ദ​രി​മാ​രിൽ മൂന്നു​പേർ റൊട്ടി​യും കേയ്‌ക്കും, പലഹാ​ര​ങ്ങ​ളും കാപ്പി​യും ചായയും മറ്റു പാനീ​യ​ങ്ങ​ളു​മാ​യി കടന്നു വന്നു. ആ തളർന്ന​വ​ശാ​രായ ദേഹി​കൾക്കു് എത്ര സന്തോ​ഷാ​ശ്ച​ര്യം ആയിരി​ക്കും തോന്നി​യി​രി​ക്കുക! ആ മൂന്നു സഹോ​ദ​രി​മാ​രു​ടെ ഭാഗത്തു​നി​ന്നു​ണ്ടായ അതിഥി​പ്രി​യ​ത്തി​ന്റെ​യും സ്‌നേ​ഹ​ത്തി​ന്റെ​യും ആ പെട്ടെ​ന്നുള്ള പ്രകടനം ജോലി​ക്കാർക്കു് ശാരീ​രിക നവോൻമേഷം പകർന്നു​കൊ​ടു​ക്കുക മാത്രമല്ല അവിടെ ആ ഉച്ചസമ​യ​ത്തു​ണ്ടാ​യി​രുന്ന സഹോ​ദ​രീ​സ​ഹോ​ദ​ര​ന്മാ​രു​ടെ മുഴു കൂട്ടത്തി​നു​മി​ട​യി​ലുള്ള സ്‌നേ​ഹോ​ഷ്‌മ​ള​മായ ആത്മാവി​നു് അതു് വളരെ സംഭാവന ചെയ്യു​ക​യും ചെയ്‌തു.

സത്യ​ക്രി​സ്‌ത്യാ​നി​ത്വ​ത്തി​ന്റെ അടയാളം

അതിഥി​പ്രി​യ​വും സ്‌നേ​ഹ​വും ഒരിക്ക​ലും അത്തരം പ്രത്യേക അവസര​ങ്ങ​ളി​ലേ​ക്കാ​യി പരിമി​ത​പ്പെ​ടു​ന്നില്ല. തന്റെ യഥാർഥ അനുഗാ​മി​ക​ളെ​ക്കു​റിച്ച്‌ സത്യ​ക്രി​സ്‌ത്യാ​നി​ത്വ​ത്തി​ന്റെ സ്ഥാപക​നായ യേശു​ക്രി​സ്‌തു ഇതു ചൂണ്ടി​ക്കാ​ട്ടി: “നിങ്ങളു​ടെ ഇടയിൽ തന്നെ നിങ്ങൾക്കു സ്‌നേ​ഹ​മു​ണ്ടെ​ങ്കിൽ ഇതിനാൽ നിങ്ങൾ എന്റെ ശിഷ്യ​ന്മാർ ആകുന്നു​വെ​ന്നു് സകലരും അറിയും.” ഇതു​പോ​ലെ അപ്പോ​സ്‌ത​ല​നായ പൗലോസ്‌ തന്റെ സഹക്രി​സ്‌ത്യാ​നി​കളെ ഇങ്ങനെ ബുദ്ധി​യു​പ​ദേ​ശി​ച്ചു: “അതിഥി​പ്രി​യ​ത്തി​ന്റെ ഗതി പിന്തു​ട​രുക.” (യോഹ​ന്നാൻ 13:35; റോമർ 12:13) മറ്റു വാക്കു​ക​ളിൽപ്പ​റ​ഞ്ഞാൽ മറ്റുള്ള​വ​രോ​ടുള്ള നിസ്വാർത്ഥ സ്‌നേ​ഹ​ത്താൽ പ്രേരി​പ്പി​ക്ക​പ്പെ​ടുന്ന അതിഥി​പ്രി​യം സത്യ​ക്രി​സ്‌ത്യാ​നി​കൾക്കു് ഒരു ജീവി​ത​മാർഗ്ഗം തന്നെയാ​ണു്.

അത്തരം ഗുണങ്ങൾ പക്ഷേ ഒരുവൻ ഒരു ക്രിസ്‌ത്യാ​നി ആയിത്തീ​രു​മ്പോൾ സ്വതവെ കൈവ​രു​ക​യില്ല. പിന്നെ​യോ അവ വളർത്തി​യെ​ടു​ക്കാൻ ഒരുവൻ കഠിനാ​ദ്ധ്വാ​നം ചെയ്യേ​ണ്ട​തു​ണ്ടു്. ബൈബിൾ മുൻകൂ​ട്ടി​പ്പ​റ​ഞ്ഞ​തു​പോ​ലെ മിക്ക ആളുക​ളു​ടെ​യും സ്‌നേഹം തണുത്തു​പോ​യി​രി​ക്കുന്ന ഇന്നത്തെ ലോക​ത്തിൽ ഇതു വിശേ​ഷാൽ അങ്ങനെ​യാ​ണു്. (മത്തായി 24:12) പക്ഷെ അത്തരം ഗുണങ്ങൾ നിലനിൽക്കു​ന്നി​ട​ത്തു് എത്ര വിപരീ​ത​മാണ്‌ സ്ഥിതി! ഉറ്റബന്ധ​മുള്ള ഒരു കുടും​ബ​ത്തിൽ ഒരംഗം മറ്റൊ​രം​ഗ​ത്തി​ന്റെ സാന്നി​ദ്ധ്യം ആസ്വദി​ക്കു​ക​യും ഒന്നിച്ചു സമയം ചെലവ​ഴി​ക്കു​ന്ന​തിൽ സന്തോ​ഷി​ക്കു​ക​യും ചെയ്യുന്നു. അതു​പോ​ലെ ക്രിസ്‌തീയ സഭാം​ഗങ്ങൾ യോഗ​ങ്ങ​ളി​ലും, വയൽ ശുശ്രൂ​ഷ​യി​ലും മറ്റവസ​ര​ങ്ങ​ളി​ലും ക്രമമാ​യി സഹവസി​ക്കു​മ്പോൾ അവർ വാസ്‌ത​വ​ത്തിൽ അന്യോ​ന്യം അടുത്ത​റി​യാൻ ഇടവരു​ന്നു. അവർ കുടും​ബാം​ഗ​ങ്ങ​ളെ​ക്കാൾ ഉറ്റവരായ യഥാർഥ ചങ്ങാതി​കൾ ആയിത്തീ​രു​ന്നു. (സദൃശ​വാ​ക്യ​ങ്ങൾ 18:24) യഹോ​വ​യു​ടെ സാക്ഷി​കൾക്കി​ട​യി​ലുള്ള ഈ സുഹൃ​ദ്‌ബന്ധം ലോക​ത്തി​ന്റെ അനാ​രോ​ഗ്യ​ക​ര​മായ സ്വാധീ​ന​ങ്ങൾക്കെ​തി​രെ ഒരു ശക്തമായ മതിൽ ആയി വർത്തി​ക്കു​ന്നു.

ക്രിസ്‌തീയ സ്‌ത്രീ​ക​ളു​ടെ പങ്ക്‌

“അതിഥി​പ്രി​യ​ത്തി​ന്റെ ഗതി പിന്തു​ട​രാൻ” എല്ലാ ക്രിസ്‌ത്യാ​നി​ക​ളും ബുദ്ധി​യു​പ​ദേ​ശി​ക്ക​പ്പെ​ട്ടി​രി​ക്കു​ന്നു​വെ​ങ്കി​ലും ഈ കാര്യ​ത്തിൽ ക്രിസ്‌തീയ സ്‌ത്രീ​കൾക്ക്‌ ഒരു സുപ്ര​ധാ​ന​മായ പങ്ക്‌ വഹിക്കാ​നു​ണ്ടു്. വാസ്‌ത​വ​ത്തിൽ, അതിഥി​പ്രി​യം കാണി​ക്കു​ന്ന​തി​നോ​ടുള്ള ബന്ധത്തിൽ മിക്ക ജോലി​ക​ളും ചെയ്യു​ന്ന​തു് സാധാ​ര​ണ​യാ​യി സ്‌ത്രീ​കൾ, വിശേ​ഷിച്ച്‌ ഭാര്യ​മാർ അല്ലേ? ഭർത്താവ്‌ സഭയിലെ ചിലരെ ഒരു ക്രിസ്‌തീയ കൂട്ടാ​യ്‌മ​യ്‌ക്കു​വേണ്ടി ക്ഷണിക്കു​മ്പോൾ സാധാരണ വീട്‌ വൃത്തി​യാ​ക്കു​ന്ന​തും ഭക്ഷണപാ​നീ​യങ്ങൾ ഉണ്ടാക്കു​ന്ന​തും ഒടുവി​ലുള്ള ശുചീ​ക​ര​ണ​ജോ​ലി ചെയ്യു​ന്ന​തും ഭാര്യ​യല്ലേ? സഹായ​ഹ​സ്‌തം നീട്ടാൻ ഭർത്താ​വി​നും കുട്ടി​കൾക്കും ആകു​മെ​ന്നി​രു​ന്നാ​ലും അവർ സന്നദ്ധരാ​യി​രു​ന്നാ​ലും സർവ്വതും ഉത്തമമാ​യി കരുതി​ക്കാ​ണു​ന്ന​തി​നുള്ള ഉത്തരവാ​ദി​ത്ത​ഭാ​രം പേറു​ന്ന​തു് അനിവാ​ര്യ​മാ​യും ഭാര്യ​തന്നെ ആയിരി​ക്കും.

തങ്ങളുടെ ആത്മീയ സഹോ​ദ​രീ​സ​ഹോ​ദ​ര​ന്മാ​രോ​ടു യഥാർഥ​മായ അതിഥി​പ്രി​യം കാട്ടു​ന്ന​തി​നു് ക്രിസ്‌തീയ ഭാര്യ​മാ​രായ അനേകർ മനസ്സൊ​രു​ക്ക​ത്തോ​ടെ ആത്മാർപ്പണം ചെയ്യുന്നു. ഉദാഹ​ര​ണ​ത്തിന്‌ ഹോം​ഗ്‌കോ​ങ്ങി​ലെ മുഴു​സമയ പയണിയർ ശുശ്രൂ​ഷ​ക​യായ ഡിപ്‌ ഈ എന്ന സഹോ​ദ​രി​യു​ടെ കാര്യ​മെ​ടു​ക്കാം. അവളുടെ ഭർത്താവ്‌ ഒരു പ്രാ​ദേ​ശിക സഭയിലെ ഒരു മൂപ്പനാ​ണു്. അവർ സഹോ​ദ​ര​ന്മാ​രെ​യും സഹോ​ദ​രി​മാ​രെ​യും, ചില​പ്പോൾ മുഴു അദ്ധ്യയന കൂട്ട​ത്തെ​യും അവരുടെ വീട്ടി​ലേക്കു ക്ഷണിക്കു​മ്പോൾ അവൾക്കു് വളരെ ജോലി​യു​ണ്ടെ​ങ്കി​ലും അവൾ സന്തോ​ഷ​പൂർവം ആഥിത്യം കാണി​ക്കു​ന്നു. “ഞങ്ങൾ ഊണു വളരെ ലഘുവാ​ക്കു​ന്നു. എന്നവർ പറയുന്നു. “സഹോ​ദ​ര​ന്മാർ സഹവാസം അത്യധി​കം ഇഷ്ടപ്പെ​ടു​ന്ന​തും അതിനാൽ പരിപു​ഷ്ടി പ്രാപി​ക്കു​ന്ന​തും കാണു​ന്ന​തു് നല്ലതാണ്‌.” തീർച്ച​യാ​യും തങ്ങളുടെ അതിഥി​പ്രി​യ​ത്തി​ലൂ​ടെ സഭയിൽ ഒരു ഊഷ്‌മ​ളാ​ത്മാവ്‌ വളർത്ത​ക്കൊ​ണ്ടു വരുന്ന​തിൽ ക്രിസ്‌തീയ സ്‌ത്രീ​കൾ വളരെ വലുതായ ഒരു പങ്കു വഹിക്കു​ന്നു.

അതിഥി​പ്രി​യം കാണി​ക്കു​ന്ന​തി​ലുൾപ്പെ​ട്ടി​രി​ക്കുന്ന കാര്യ​ങ്ങ​ള​ത്ര​യും ചിന്തി​ക്കു​മ്പോൾ അതു തീർച്ച​യാ​യും ഉത്സാഹ​വും ആത്മത്യാ​ഗ​വും ആവശ്യ​മാ​ക്കി​ത്തീർക്കു​ന്നു എന്നു കാണാം. എന്നാൽ അവരുടെ അദ്ധ്വാനം അവരുടെ ഭർത്താ​ക്ക​ന്മാ​രാ​ലും മറ്റു നന്ദിയുള്ള അനു​ഭോ​ക്താ​ക്ക​ളാ​ലും വളരെ വിലമ​തി​ക്ക​പ്പെ​ടു​ന്നു എന്ന ഉറപ്പോ​ടെ അവർക്കു് കൃതാർത്ഥ​രാ​യി​രി​ക്കാൻ കഴിയും. തീർച്ച​യാ​യും ചില​പ്പോൾ ചില ആളുകൾ അവർക്കാ​യി ചെയ്യുന്ന കാര്യ​ങ്ങ​ളോ​ടു് ഉചിത​മായ വിലമ​തിപ്പ്‌ കാട്ടി​യെ​ന്നി​രി​ക്കല്ല. പക്ഷേ അതു് നിരു​ത്സാ​ഹ​പ്പെ​ടു​ന്ന​തി​നോ നീരസം കൊള്ളു​ന്ന​തി​നോ അല്ലെങ്കിൽ അതിഥി​പ്രി​യ​മു​ണ്ടാ​യി​രി​ക്കു​ന്ന​തു് നിർത്തി​ക്ക​ള​യു​ന്ന​തി​നോ ഉള്ള ഒരു കാരണ​മോ അല്ല. മറ്റുള്ള​വ​രിൽ നിന്നു നന്ദി​പ്ര​ക​ട​നങ്ങൾ സ്വീക​രി​ക്കു​ന്ന​തും നമ്മുടെ യത്‌നങ്ങൾ വിലമ​തി​ക്ക​പ്പെ​ട്ടു​വെന്നു തിരി​ച്ച​റി​യു​ന്ന​തും ആത്മസം​തൃ​പ്‌തി പകരു​ന്ന​താ​ണെ​ന്നി​രി​ക്കെ നാം ആഥിത്യം കാണി​ക്കേ​ണ്ട​തു് പ്രാഥ​മി​ക​മാ​യി അതു് ഒരു ഉചിത​വും സ്‌നേ​ഹ​പൂർവ്വ​ക​വും ആയ നടപടി ആണെന്നു​ള്ള​തു​കൊ​ണ്ടാ​യി​രി​ക്കണം. എല്ലാറ്റി​ലു​മു​പ​രി​യാ​യി നാമങ്ങനെ ചെയ്യു​ന്ന​തു് യഹോ​വ​യാം ദൈവത്തെ സന്തുഷ്ട​നാ​ക്കു​ന്നു.

ഒരു സമനി​ല​യുള്ള വീക്ഷണം ഉണ്ടായി​രി​ക്കു​ക

വിലകൾ കുതി​ച്ചു​യ​രുന്ന ഈ കാലത്തു തങ്ങൾക്കു താങ്ങാ​നാ​വില്ല എന്ന കാരണം ചൊല്ലി ചിലർ അതിഥി​പ്രി​യം കാട്ടു​ന്ന​തിൽ വിമുഖത കാണി​ച്ചേ​ക്കാം. ഇവി​ടെ​യാ​ണു് നമുക്കു ഒരു സമനി​ല​യുള്ള വീക്ഷണം ഉണ്ടായി​രി​ക്കേ​ണ്ട​തു് പ്രധാ​ന​മാ​യി​രി​ക്കു​ന്നു​തു്. ഭക്ഷണമോ പാനീ​യ​മോ എന്ന നിലയിൽ വിശേ​ഷ​മാ​യി​ട്ടെ​ന്തെ​ങ്കി​ലും ഉണ്ടായി​രി​ക്കു​ന്നതു അവസര​ത്തി​ന്റെ മാധു​ര്യ​ത്തി​നു മാറ്റു കൂട്ടു​മെ​ങ്കി​ലും ഏറ്റവും പ്രധാ​ന​മായ സംഗതി അതല്ല. ദൈവ​വ​ചനം അതു ചൂണ്ടി​ക്കാ​ണി​ക്കു​ന്ന​തി​ങ്ങ​നെ​യാ​ണു്: “തൊഴു​ത്തിൽ കൊഴു​പ്പിച്ച കാള​യോ​ടൊ​പ്പം വിദ്വേ​ഷ​ത്തേ​ക്കാൾ സ്‌നേ​ഹ​മു​ള്ള​ടത്തെ ഒരു പാത്രം സസ്യ​ഭോ​ജനം നല്ലതു്.” (സദൃശ​വാ​ക്യ​ങ്ങൾ 15:17) നമു​ക്കെ​ന്തു​ണ്ടെ​ന്നോ നാം എന്തു വിളമ്പു​മെ​ന്നോ ഉള്ളതല്ല പ്രധാന സംഗതി പരസ്‌പരം പരിപു​ഷ്ടി​പ്പെ​ടു​ത്തുന്ന സഹവാ​സ​വും നാം കാട്ടുന്ന സ്‌നേ​ഹ​ത്തി​ന്റെ ആത്മാവും ആണു്.

ഒരു എതിരാ​ളി​യായ ഭർത്താ​വുള്ള 40 കാരി​യായ ഫുംഗ്‌ ഹിംഗ്‌ എന്ന സഹോ​ദ​രി​യു​ടെ സംഗതി എടുക്കുക. ഹോം​കോം​ഗി​ലെ ഭീമാ​കാ​ര​മായ പൊതു ഭവന എസ്റ്റേറ്റു​ക​ളി​ലൊ​ന്നി​ലെ ഒറ്റമു​റി​മാ​ത്ര​മുള്ള ഒരു നന്നെ ചെറിയ പാർപ്പി​ട​ത്തിൽ അവൾ താമസി​ക്കു​ന്നു. അവളുടെ ജീവിതം സുഭി​ക്ഷ​മോ ആയിരു​ന്നില്ല. അവളുടെ കുടുംബ വരുമാ​ന​ത്തി​ന്റെ കുറവ്‌ നികത്താൻ അവൾക്കു് അംശകാല ജോലി​യും ചെയ്യേ​ണ്ട​തു​ണ്ടാ​യി​രു​ന്നു. എന്നിട്ടും, അവൾക്കു​ള്ള​തു​കൊ​ണ്ടു് അവൾ ഔദാ​ര്യ​മു​ള്ള​വ​ളാ​യി​രു​ന്നു. സാക്ഷികൾ അവളുടെ അയൽ പ്രദേ​ശത്തു വീടു​തോ​റു​മുള്ള പ്രസംഗം ചെയ്യു​ന്ന​തി​നു വരു​മ്പോൾ ഒരു ചെറിയ സത്‌ക്കാ​ര​ത്തി​നു് വേണ്ടി അവരെ മിക്ക​പ്പോ​ഴും തന്റെ വീട്ടി​ലേക്ക്‌ അവൾ ക്ഷണിക്കു​ന്നു. അത്തരം സ്‌നേ​ഹ​വാ​യ്‌പ്പോ​ടു കൂടിയ നടപടി അവളുടെ സഹക്രി​സ്‌ത്യാ​നി​ക​ളാൽ വിലമ​തി​ക്ക​പ്പെ​ടു​ന്നു​വെന്നു മാത്രമല്ല യഥാർത്ഥ അതിഥി​പ്രി​യം കാട്ടു​ന്ന​തി​നു് ഒരാൾ സമ്പന്നനാ​യി​രി​ക്കേ​ണ്ട​തില്ല എന്നു് കാണി​ക്കാൻ അതു സാഹി​ക്ക​കൂ​ടി ചെയ്യുന്നു.

നമ്മുടെ സത്‌ക്കാ​ര​ത്തിൽ നാം എത്രതന്നെ മിതത്വം പാലി​ച്ചാ​ലും അതിഥി​പ്രി​യം കാണി​ക്കു​ന്ന​തി​നു് പിന്നെ​യും കുറെ കാര്യങ്ങൾ ത്യജി​ക്കേ​ണ്ട​തു് അത്യാ​വ​ശ്യ​മാ​യി വരുന്നു. അതിനു തക്ക വിലയ​തി​നു​ണ്ടോ? നമ്മെ പ്രേരി​പ്പി​ക്കു​ന്നതു സത്യ​ക്രി​സ്‌തീയ സ്‌നേഹം ആണെങ്കിൽ തീർച്ച​യാ​യും ഉണ്ടു്. കാരണം ത്യാഗ​മി​ല്ലാത്ത സ്‌നേഹം ഏതുണ്ടു്? യഹോ​വ​യും യേശു​ക്രി​സ്‌തു​വും മനുഷ്യ​രോ​ടുള്ള സ്‌നേഹം വലിയ ത്യാഗങ്ങൾ സഹിച്ചു​കൊ​ണ്ടാ​ണു് കാട്ടി​യി​രി​ക്കു​ന്ന​തു്. യഹോവ തന്റെ പുത്ര​നെ​യും യേശു തന്റെ സ്വന്ത പൂർണ്ണ മാനു​ഷ​ജീ​വ​നെ​യും അർപ്പി​ച്ചു​കൊ​ണ്ടു തന്നെ.—യോഹ​ന്നാൻ 3:16; 15:13.

ആദിമ ക്രിസ്‌ത്യാ​നി​ക​ളും ഒരു സ്‌നേ​ഹ​പൂർവ​ക​മായ ഗതി പിന്തു​ടർന്നു. മാസി​ഡോ​ണി​യാ​യി​ലെ സഹോ​ദ​ര​ങ്ങളെ കുറിച്ചു പൗലൊസ്‌ അപ്പോ​സ്‌തലൻ ഇങ്ങനെ എഴുതി: “യാതന​യിൻ കീഴെ ഒരു വലിയ പരി​ശോ​ധ​ന​യി​ങ്കലെ അവരുടെ സന്തോഷ സമൃദ്ധി​യും അവരുടെ മഹാദാ​രി​ദ്ര്യ​വും അവരുടെ ഔദാ​ര്യ​ത്തി​ന്റെ പുഷ്ടി വർദ്ധി​ക്കു​വാൻ ഇടയാക്കി. എന്തെന്നാൽ ഇതു് അവരുടെ യഥാർത്ഥ പ്രാപ്‌തി​ക്കൊ​ത്ത​വണ്ണം. അതെ, അവരുടെ പ്രാപ്‌തി​ക്ക​തീ​ത​മാ​യി​ട്ടാ​യി​രു​ന്നു എന്നു ഞാൻ സാക്ഷ്യ​പ്പെ​ടു​ത്തു​ന്നു, ദയാദാ​നം ചെയ്യു​ന്ന​തി​നുള്ള പദവി​ക്കു​വേണ്ടി അവർ സ്വമേ​ധയാ ഞങ്ങളോ​ടു് വളരെ അപേക്ഷ​ക​ളാൽ യാചി​ച്ചു​കൊ​ണ്ടു​തന്നെ.” (2 കൊരി​ന്ത്യർ 8:2-4) അവരുടെ “കടുത്ത ദാരി​ദ്ര്യ​വും” അവർ “തങ്ങളുടെ യഥാർത്ഥ പ്രാപ്‌തി​ക്ക​തീത”മായി ചെയ്‌തു എന്നതും അത്ര​യേറെ അവരുടെ ഉദാര​തയെ വാസ്‌ത​വി​ക​വും ഹൃദയ​സ്‌പർശി​യും ആക്കിത്തീർക്കു​ന്നു.

ഒരുവൻ ദരി​ദ്ര​നോ സാമാ​ന്യം ഭേദ​പ്പെ​ട്ട​വ​നോ ആയി​ക്കൊ​ള്ളട്ടെ, പക്ഷേ, ഇന്നത്തെ ആധുനിക സൗകര്യ​ങ്ങ​ളെ​ല്ലാം ഉണ്ടായാ​ലും അതിഥി പ്രിയം കാണി​ക്കു​ന്ന​തി​നു് സമയവും ഊർജ്ജ​വും വിഭവ​ങ്ങ​ളും ആവശ്യ​മാ​യി​വ​രു​ന്നു. അപ്പോൾ അടിസ്ഥാന ചോദ്യം ഇതാണു്: മറ്റുള്ളവർ ക്രിസ്‌തീയ സഹവാസം ആസ്വദി​ക്ക​ത്ത​ക്ക​വണ്ണം നാം നമ്മെത്തന്നെ ആത്മാർപ്പണം ചെയ്യു​ന്ന​തി​നു് ഒരുക്ക​മു​ള്ള​വ​രാ​ണോ? “ഉദാര​നാ​യവൻ ദേഹപു​ഷ്ടി പ്രാപി​ക്കും” എന്നും “മറ്റുള്ള​വരെ നിർലോ​ഭ​മാ​യി തണുപ്പി​ക്കു​ന്നവൻ താൻ നിർലോ​ഭ​മാ​യി തണുപ്പി​ക്ക​പ്പെ​ടും എന്നും ഒരു ബൈബിൾ സദൃശ​വാ​ക്യം പറയു​ന്ന​തോർക്കുക. യഹോ​വ​യു​ടെ പ്രഖ്യാ​പിത ആജ്ഞയുടെ അനുസ​രണം എന്ന നിലക്കും അവന്റെ മഹത്തായ മാതൃ​ക​യു​ടെ അനുക​രണം എന്ന നിലക്കും നാം അതിഥി​പ്രി​യം കാണി​ക്കു​മ്പോൾ നാം ഫലത്തിൽ “യഹോ​വ​ക്കു് വായ്‌പ കൊടു​ക്കു​ക​യാ​ണു്” എന്ന ഉൾബോ​ദ്ധ്യ​ത്തിൽ നമുക്കു് ആശ്വസി​ക്കാം.—സദൃശ​വാ​ക്യ​ങ്ങൾ 11:25; 19:17.

ആരെ ക്ഷണിക്കണം?

“നിങ്ങൾ ഒരു വിരു​ന്നോ അത്താഴ​മോ ഒരുക്കു​മ്പോൾ നിങ്ങളു​ടെ സുഹൃ​ത്തു​ക്ക​ളെ​യോ നിങ്ങളു​ടെ സഹോ​ദ​ര​ങ്ങ​ളെ​യോ നിങ്ങളു​ടെ സമ്പന്നരായ ബന്ധുക്ക​ളെ​യോ വിളി​ക്ക​രുത്‌.” എന്തു​കൊ​ണ്ട​രു​തു്? “ഒരു പക്ഷേ ഒരു സമയത്തു് അവർ പകരമാ​യി നിങ്ങളെ അങ്ങോ​ട്ടും ക്ഷണിക്ക​യും അതു് ഒരു പ്രത്യു​പ​കാ​ര​മാ​യി​ത്തീ​രു​ക​യും ചെയ്യും.” (ലൂക്കൊസ്‌ 14:12) യേശു ഇവിടെ വ്യക്തമാ​ക്കിയ സംഗതി നാം ഒരു ഊണി​നു് നമ്മുടെ സഹോ​ദ​ര​ങ്ങ​ളെ​യോ ബന്ധുക്ക​ളെ​യോ വിളി​ച്ചു​കൂ​ടാ എന്നുള്ളതല്ല. മറിയ​യു​ടെ​യും മാർത്ത​യു​ടെ​യും ഭവനത്തിൽ വച്ച്‌ അവൻ തന്റെ സ്‌നേ​ഹി​ത​രോ​ടൊ​ത്തു് വിരു​ന്നു് ആസ്വദി​ക്കുക തന്നെ ചെയ്‌തി​ട്ടു​ണ്ടു്. നമ്മുടെ അതിഥി​പ്രി​യം എന്തെങ്കി​ലും തിരികെ ലഭിക്കു​ന്ന​തി​നുള്ള ചിന്തയു​ടെ പ്രേരണ കൊണ്ടാ​യി​രി​ക്ക​രു​തു് എന്നതാ​ണു് ആശയം.

യേശു തന്റെ വിശദീ​ക​ര​ണ​ത്തിൽ തുടർന്നു് കാണി​ച്ച​പ്ര​കാ​രം ക്ഷണം നൽകു​ന്ന​തി​നു് നാം പ്രഥമ​പ​രി​ഗണന നൽകു​ന്ന​തു് സഹവാ​സ​ത്തിൽ നിന്നു് പരമാ​വധി പ്രയോ​ജനം അനുഭ​വി​ക്കാ​നി​ട​യു​ള്ള​വർക്കു് ആണു്. (ലൂക്കോസ്‌ 14:13) അവരിൽ പ്രോ​ത്സാ​ഹനം ആവശ്യ​മാ​യി​ട്ടു​ള്ള​വ​രും സത്യത്തിൽ പുതി​യ​വ​രും പരി​ഭ്ര​മ​മു​ള്ളവർ അല്ലെങ്കിൽ ഉൾവലി​യുന്ന പ്രവണ​ത​യു​ള്ള​വ​രും വാർദ്ധ്യ​ക്യ​ത്തി​ലു​ള്ള​വ​രും ഉൾപ്പെ​ടു​ന്നു. അത്തരം സഹവാ​സ​ത്തി​ന്റെ പരിപു​ഷ്ടി​ദാ​യ​ക​മായ ഫലത്തെ സംബന്ധിച്ച്‌ അനാ​രോ​ഗ്യം അനുഭ​വി​ക്കു​ന്ന​വ​ളെ​ങ്കി​ലും അത്യു​ത്സാ​ഹ​ശീ​ല​യായ ഓയ്‌ യുക്കു് എന്ന വൃദ്ധസ​ഹോ​ദ​രി​യു​ടെ പിൻവ​രുന്ന അഭി​പ്രായ പ്രകട​ന​ത്തിൽ നിന്നും കാണാം: “സഹോ​ദ​ര​ന്മാർ എന്നെ കൂടി​വ​ര​വു​ക​ളിൽ മിക്ക​പ്പോ​ഴും ക്ഷണിക്കാ​റു​ണ്ടു്. ഒരു വലിയ കുടും​ബ​ത്തി​ന്റെ ഭാഗമാ​യി​രി​ക്കു​ന്ന​തു് എന്നെ അതീവ സന്തുഷ്ട​യാ​ക്കു​ന്നു!”

സ്‌പഷ്ട​മാ​യും ആ കൂടി​വ​ര​വു​ക​ളു​ടെ ഉദ്ദേശ്യം വെറും സാമൂ​ഹ്യ​സ​ഹ​വാ​സ​ത്തെ​ക്കാൾ കവിഞ്ഞ​താ​ണു്. അതു് അന്യോ​ന്യം കെട്ടു​പ​ണി​ചെ​യ്യു​ക​യും യഹോ​വ​യു​ടെ സഹാരാ​ധ​ക​രു​ടെ ഇടയി​ലുള്ള ബന്ധം അരക്കി​ട്ടു​റ​പ്പി​ക്കു​ക​യും ചെയ്യുക എന്നതാ​ണു്. അതു​കൊ​ണ്ടു് ഭക്ഷണപാ​നീ​യ​ങ്ങ​ളു​ടെ പുഷ്‌ഠി​യി​ലല്ല പിന്നെ​യോ പരിപു​ഷ്‌ഠി​ദാ​യ​ക​മായ ഒരു പ്രോ​ത്സാ​ഹനം പകരുന്ന അന്തരീക്ഷം നിലനിർത്തു​ന്ന​തി​ലാ​ണു് ഊന്നൽ നൽകേ​ണ്ട​തു്. അതു​പോ​ലെ, അത്തരം അവസര​ങ്ങ​ളി​ലെ പ്രവൃ​ത്തി​കൾക്കും സംഭാ​ഷ​ണ​ത്തി​നും ചിന്ത നൽകേ​ണ്ട​തു​ണ്ടു്. എല്ലാ നടപടി​ക​ളും ബൈബി​ളി​നെ കേന്ദ്രീ​ക​രി​ച്ചു​കൊ​ണ്ടു​ള്ള​തോ എല്ലാ സംഭാ​ഷ​ണ​വും ബൈബിൾ വിഷയ​ങ്ങ​ളോ ആയിരി​ക്കേണ്ട ആവശ്യം ഇല്ലെങ്കി​ലും അവ എപ്പോ​ഴും കെട്ടു​പണി ചെയ്യു​ന്ന​തും പ്രോ​ത്സാ​ഹ​ന​പ്ര​ദ​വും ആയി കാക്കു​ന്ന​തു് വിവേ​ക​പൂർവ്വ​ക​വും സ്‌നേ​ഹ​പൂർവ്വ​ക​വും ആയ ഒരു നടപടി ആയിരി​ക്കും. മത്സരക്ക​ളി​കൾ, വ്യർത്ഥ​മായ കുശു​കു​ശുപ്പ്‌, വിലയി​ടി​ക്കുന്ന അഭി​പ്രാ​യങ്ങൾ എന്നിവ നിശ്ചയ​മാ​യും ഒഴിവാ​ക്കണം.—എഫേസ്യർ 4:29, 31.

അതിഥി​പ്രി​യർക്കാ​യി സമൃദ്ധ​മായ പ്രതി​ഫലം കാത്തി​രി​ക്കു​ന്നു

എന്തെങ്കി​ലും പകരം ലഭിക്കു​ന്ന​തി​നുള്ള ആന്തര​ത്തോ​ടെ ഒരുവൻ അതിഥി​പ്രി​യം കാണി​ക്കാൻ തുനി​യ​രു​തെ​ങ്കി​ലും അതിഥി പ്രിയ​നായ വ്യക്തി​ക്കു് യാതൊ​രു പ്രതി​ഫ​ല​വും ലഭിക്കു​ക​യില്ല എന്നു് ഇതിനു് അർത്ഥം ഇല്ല. മറിച്ച്‌, തേടി​യ​ത​ല്ലെ​ങ്കി​ലും യഥാർത്ഥ അതിഥി​പ്രി​യം നിരവധി പ്രതി​ഫലം കൈവ​രു​ത്തു​ന്നു. അതു് പുതിയ സ്‌നേ​ഹി​തരെ ഉളവാ​ക്കാൻ ഒരുവനെ സഹായി​ക്കു​ന്നു. അതു് പഴയ ബന്ധങ്ങളെ ശക്തീക​രി​ക്കു​ന്നു. ഔദാ​ര്യ​ത്തി​ന്റെ​യും അതിഥി​പ്രി​യ​ത്തി​ന്റെ​യും ആത്മാവ്‌ നട്ടുവ​ളർത്താൻ അതു മറ്റുള്ള​വരെ പ്രചോ​ദി​പ്പി​ക്കു​ന്നു. (ലൂക്കൊസ്‌ 6:38; സദൃശ​വാ​ക്യ​ങ്ങൾ 11:25) എല്ലാറ്റി​ലു​മു​പ​രി​യാ​യി, അഖിലാ​ണ്ഡ​ത്തി​ലെ ഏറ്റവും അതിഥി​പ്രി​യ​നായ വ്യക്തി ആയ യഹോ​വ​യാം ദൈവം എന്ന നമ്മുടെ സ്‌നേ​ഹ​വാ​നായ സൃഷ്ടാവ്‌ യഥാർത്ഥ അതിഥി​പ്രി​യ​രാ​യ​വർക്കു് യാതൊ​രു കാര്യ​മായ മുട്ടും ഉണ്ടാകാ​തി​രി​ക്കാൻ കരുതു​ന്നു. കാരണം അവൻ ചെയ്യു​ന്ന​തു​പോ​ലെ അതിഥി​പ്രി​യ​ത്തി​ന്റെ ഗതി പിന്തു​ട​രു​ന്ന​വരെ അവൻ വിലമ​തി​ക്കു​ന്നു