മരിച്ച​വ​രെ​ക്കു​റി​ച്ചുള്ള ഭയം വിപു​ല​വ്യാ​പ​ക​മാണ്‌

സായംസന്ധ്യ. സാധാ​ര​ണ​യി​ലും അൽപ്പം വൈകി നിങ്ങൾ വീട്ടി​ലേക്കു മടങ്ങു​ക​യാണ്‌. പ്രദേ​ശ​ത്തുള്ള ശ്‌മശാ​ന​ത്തി​ന​രി​കി​ലെ​ത്തു​മ്പോൾ നിങ്ങളു​ടെ ഹൃദയ​മി​ടി​പ്പു കുറച്ചു ദ്രുത​ഗ​തി​യി​ലാ​കു​ന്നു. രാത്രി​യു​ടെ നിശബ്ദ​ത​യിൽ ഒരു മൊട്ടു​സൂ​ചി വീണാൽപ്പോ​ലും നിങ്ങൾക്കു കേൾക്കാൻ കഴിയും. പൊടു​ന്ന​നവേ ആ നിശബ്ദ​തയെ ഭേദി​ച്ചു​കൊണ്ട്‌ സമീപ​ത്തെ​ങ്ങു​നി​ന്നോ തുളച്ചു​ക​യ​റുന്ന, ഭീതി​പ്പെ​ടു​ത്തുന്ന ഒരു ശബ്ദം നിങ്ങളു​ടെ കാതു​ക​ളിൽ വന്നലയ്‌ക്കു​ന്നു. വീട്ടി​ലൊന്ന്‌ എത്തിയാൽമ​തി​യെ​ന്ന​ചി​ന്ത​യിൽ നിങ്ങൾ നടപ്പിന്റെ വേഗത കൂട്ടുന്നു—ഒപ്പം നാഡീ​സ്‌പ​ന്ദ​ന​വും ദ്രുത​ഗ​തി​യി​ലാ​കു​ന്നു.

ഒരു ശ്‌മശാ​ന​ത്തി​ലോ അതിന്റെ സമീപ​ത്തോ​വെച്ച്‌ നിങ്ങൾക്കു സംഭ്രാ​ന്തി അനുഭ​വ​പ്പെ​ട്ടി​ട്ടു​ണ്ടോ? അങ്ങനെ​യെ​ങ്കിൽ, നിങ്ങൾ സാർവ​ലൗ​കി​ക​മായ ഒരു മത വിശ്വാ​സ​ത്താൽ—മരിച്ചു​പോ​യ​വ​രു​ടെ ആത്മാക്കൾക്ക്‌ ജീവി​ച്ചി​രി​ക്കു​ന്ന​വരെ സഹായി​ക്കാ​നോ ഉപദ്ര​വി​ക്കാ​നോ കഴിയും എന്ന വിശ്വാ​സ​ത്താൽ—സ്വാധീ​നി​ക്ക​പ്പെ​ടു​ക​യാ​കാം.

മരിച്ച​വർക്ക്‌ ജീവി​ച്ചി​രി​ക്കു​ന്ന​വ​രു​ടെ സഹായം ആവശ്യ​മാണ്‌ അല്ലെങ്കിൽ അവരെ പ്രീണി​പ്പി​ക്കാ​ത്ത​പക്ഷം അവർ ജീവി​ച്ചി​രി​ക്കു​ന്ന​വരെ ഉപദ്ര​വി​ക്കും എന്ന വിശ്വാ​സ​ത്തി​ന്റെ ഫലമായി അന്ധവി​ശ്വാ​സ​പ​ര​മായ അനേകം ആചാരങ്ങൾ വികാ​സം​പ്രാ​പി​ച്ചി​ട്ടുണ്ട്‌. ഉദാഹ​ര​ണ​ത്തിന്‌, ചില ലാററിൻ അമേരി​ക്കൻ രാജ്യ​ങ്ങ​ളി​ലെ കാര്യ​മെ​ടു​ക്കാം. ഒരു വ്യക്തി അപകടം​മൂ​ലം മരണമ​ട​യു​ന്നി​ടത്ത്‌ ഒരു കുരിശ്‌ സഹിതം ഒരു ചെറിയ പുര പണിതു​യർത്തുന്ന ആചാരം അവിടെ അനേകർക്കു​മുണ്ട്‌. മരിച്ചു​പോയ വ്യക്തി​യു​ടെ ദേഹി​യെ​യോ ആത്മാവി​നെ​യോ സഹായി​ക്കു​ന്ന​തിന്‌ അല്ലെങ്കിൽ അതിൽ താത്‌പ​ര്യ​മു​ണ്ടെന്നു കാണി​ക്കു​ന്ന​തിന്‌ ആളുകൾ അവിടെ മെഴു​തി​രി​കൾ കത്തിക്കു​ക​യും പൂക്കൾ അർപ്പി​ക്കു​ക​യും ചെയ്യുന്നു. ചില​പ്പോ​ഴെ​ല്ലാം പ്രാർഥ​ന​കൾക്ക്‌ “അത്ഭുത​ക​ര​മായ” ഉത്തരങ്ങൾ ലഭിച്ച​താ​യുള്ള റിപ്പോർട്ടു​കൾ വിതരണം ചെയ്യു​ക​യും തൻമൂലം ആനിമി​താ, അതായത്‌ മരിച്ച​യാ​ളു​ടെ ദേഹിക്ക്‌ അല്ലെങ്കിൽ ആത്മാവി​നു​വേണ്ടി പണിതു​യർത്തിയ പുര ആളുകൾ പതിവാ​യി സന്ദർശി​ക്കാൻ തുടങ്ങു​ക​യും ചെയ്യുന്നു. ചില കാര്യങ്ങൾ നിർവ​ഹി​ക്കു​ന്ന​തിന്‌ അല്ലെങ്കിൽ നേടു​ന്ന​തിന്‌—ഒരുപക്ഷേ ഒരു അത്ഭുത ശാന്തി നേടാൻ—മരിച്ച​യാൾ തങ്ങളെ സഹായി​ക്കു​മെ​ങ്കിൽ തങ്ങളുടെ കൃതജ്ഞത ഒരു പ്രത്യേക രീതി​യിൽ പ്രകടി​പ്പി​ക്കു​മെന്ന്‌ അവർ അവി​ടെ​വെച്ച്‌ മാൻഡാസ്‌ അഥവാ വാഗ്‌ദാ​നം ചെയ്യുന്നു. നേരെ​മ​റിച്ച്‌, സന്നിഹി​ത​രാ​യി​രി​ക്കു​ന്ന​വരെ ഭയപ്പെ​ടു​ത്തി​ക്കൊണ്ട്‌ ഒരു വ്യക്തി​യു​ടെ ദേഹി രാത്രി​യു​ടെ യാമങ്ങ​ളിൽ പ്രത്യ​ക്ഷ​പ്പെ​ടു​ന്ന​താ​യി റിപ്പോർട്ടു ചെയ്‌തു​വെ​ന്നും​വ​രാം. കഴിഞ്ഞ​കാല സംഭവങ്ങൾ കാരണം അത്തരം ദേഹികൾ ജീവി​ച്ചി​രി​ക്കു​ന്ന​വരെ ഉപദ്ര​വി​ക്കുന്ന പെനാൻഡോ ആണെന്നു പൊതു​വേ പറയ​പ്പെ​ടു​ന്നു.

മരിച്ച​വ​രു​ടെ “ആത്മാക്കളെ” പ്രീണി​പ്പി​ക്കു​ന്ന​തിന്‌ അനേകം ദേശങ്ങ​ളി​ലും ആളുകൾ അതീവ ശ്രമം ചെലു​ത്തി​യി​രി​ക്കു​ന്നു. വിഭവ​സ​മൃ​ദ്ധ​മായ സദ്യ ഒരുക്കു​ക​യും യാഗങ്ങൾ അർപ്പി​ക്കു​ക​യും സാന്ത്വന വാക്കുകൾ ഉരുവി​ടു​ക​യും ചെയ്യുന്നു. മരിച്ച വ്യക്തി​യു​ടെ ആത്മാവിൽനി​ന്നുള്ള പ്രതി​കാ​രത്തെ തടയു​ന്ന​തി​നാണ്‌ ഈ ഉദ്യമ​ങ്ങ​ളെ​ല്ലാം. ആത്മാവി​നെ പ്രീണി​പ്പി​ക്കു​ന്നത്‌ ജീവി​ച്ചി​രി​ക്കു​ന്ന​വ​രു​ടെ പ്രതി​ഫ​ല​ങ്ങ​ളി​ലും അനു​ഗ്ര​ഹ​ങ്ങ​ളി​ലും കലാശി​ക്കു​മെ​ന്നാണ്‌ കരുതി​പ്പോ​രു​ന്നത്‌.

“യാതൊ​രു സംഭവ​വും ‘പതിവാ​യോ സ്വാഭാ​വി​ക​മാ​യോ’ സംഭവി​ക്കു​ന്നി​ല്ലെന്ന്‌ അനേക​രും കരുതു​ന്നു” എന്ന്‌ ആഫ്രി​ക്ക​യിൽനി​ന്നുള്ള ഒരു റിപ്പോർട്ടു പറയുന്നു. “ഏതൊരു സംഭവ​വും—രോഗം, അത്യാ​ഹി​തം, വന്ധ്യത, സാമ്പത്തിക ബുദ്ധി​മു​ട്ടു​കൾ, അമിത മഴ അല്ലെങ്കിൽ വെയിൽ, അപകടം, കുടും​ബ​ച്‌ഛി​ദ്രം, മരണം അങ്ങനെ എന്തുമാ​യി​ക്കൊ​ള്ളട്ടെ, അമാനുഷ ശക്തിയുള്ള അദൃശ്യ ആത്മാക്ക​ളാണ്‌ ഇതി​നെ​ല്ലാം കാരണ​മെന്ന്‌ അവർ വിശ്വ​സി​ക്കു​ന്നു.” വേറൊ​രു റിപ്പോർട്ട്‌ ഇങ്ങനെ പറയുന്നു: “ആളുക​ളു​ടെ വിചാരം, തങ്ങളുടെ പൂർവി​ക​രു​ടെ ആത്മാക്കൾ സ്വർഗ​ത്തിൽ ഒരു സ്ഥാനം കൈവ​ശ​പ്പെ​ടു​ത്തി​യി​രി​ക്കു​ന്നു​വെ​ന്നും ഭൂമി​യിൽ അവശേ​ഷി​ച്ചി​രി​ക്കുന്ന അവരുടെ ബന്ധുക്ക​ളു​ടെ​മേൽ അവർ നിരന്തരം ശ്രദ്ധ​ചെ​ലു​ത്തു​ന്നു​വെ​ന്നു​മാണ്‌. പൂർവി​കർ അമാനുഷ ശക്തിയു​ള്ള​വ​രാ​ണെ​ന്നും ആ ശക്തി ഉപയോ​ഗിച്ച്‌ അവർക്ക്‌ ഭൂമി​യി​ലുള്ള ബന്ധുക്കളെ അനു​ഗ്ര​ഹിച്ച്‌ സംരക്ഷി​ക്കാ​നോ ശിക്ഷി​ക്കാ​നോ കഴിയും എന്നും ഇത്‌ മരിച്ച​വരെ ബന്ധുക്കൾ ആദരി​ക്കു​ന്ന​തി​നെ​യോ അവഗണി​ക്കു​ന്ന​തി​നെ​യോ ആശ്രയി​ച്ചി​രി​ക്കു​ന്നു എന്നും കരുതി​പ്പോ​രു​ന്നു.”

എന്നാൽ അത്തരം വിശ്വാ​സങ്ങൾ ദൈവ​വ​ച​ന​ത്തോ​ടു ചേർച്ച​യി​ലാ​ണോ? നിങ്ങളു​ടെ അഭി​പ്രാ​യ​മെ​ന്താണ്‌?

[4-ാം പേജിലെ ചിത്രം]

ചിലിയിലെ ഒരു “ആനിമി​താ”