നിങ്ങൾക്ക്‌ കൊടു​ക്കൽ മനോ​ഭാ​വ​മു​ണ്ടോ?

കൊടു​ക്കു​ന്ന​തിന്‌ ആളുകളെ പ്രചോ​ദി​പ്പി​ക്കുന്ന ഒന്നില​ധി​കം പ്രേര​ക​ശ​ക്തി​കൾ ഉള്ളതായി നിങ്ങൾ ശ്രദ്ധി​ച്ചി​ട്ടു​ണ്ടോ? ഒരു സമ്മാനം സ്‌നേ​ഹ​ത്തി​ന്റെ​യോ ഉദാര​ത​യു​ടെ​യോ വിലമ​തി​പ്പി​ന്റെ​യോ പ്രകട​ന​മാ​കാം. എങ്കിലും, പ്രീതി​നേ​ട​ണ​മെന്ന ആഗ്രഹ​വും ഒരു വ്യക്തിയെ സമ്മാനം കൊടു​ക്കാൻ പ്രേരി​പ്പി​ച്ചേ​ക്കാ​മെ​ന്നതു നിങ്ങൾ ശ്രദ്ധി​ച്ചി​ട്ടി​ല്ലേ? അതല്ല, കേവലം കടമ നിർവ​ഹി​ക്ക​ണ​മെന്ന തോന്ന​ലി​നാ​ലോ കൊടു​ക്കു​ന്ന​യാൾക്കു തിരിച്ച്‌ എന്തെങ്കി​ലും ആവശ്യ​മു​ള്ള​തി​നാ​ലോ സമ്മാനം നൽകു​ന്നു​വെ​ന്നും വരാം.

മനോ​ഹ​ര​മാ​യ റിബൺകൊ​ണ്ടു കെട്ടിയ ഒരു പൊതി​യി​ലാ​യി​രി​ക്കാം സമ്മാനം. എന്നാൽ പൂക്കളു​ടെ ഒരു ബൊ​ക്കെ​യോ ഒരു ഭക്ഷണവി​ഭ​വ​മോ ഒരു ദയാ​പ്ര​വൃ​ത്തി​യോ പോലും ഒരു നല്ല സമ്മാന​മാ​യി​രി​ക്കാ​മെ​ന്നതു സത്യമല്ലേ? വാസ്‌ത​വ​ത്തിൽ, ഒരുവൻ സ്വയം ലഭ്യമാ​ക്കി​ത്തീർക്കു​ന്ന​താണ്‌ ഒട്ടുമി​ക്ക​പ്പോ​ഴും ഏറ്റവു​മ​ധി​കം വിലമ​തി​ക്ക​പ്പെ​ടുന്ന സമ്മാനങ്ങൾ.

നിങ്ങൾ പ്രീതി​നേ​ടാൻ ആഗ്രഹി​ക്കുന്ന ഒരാളു​ണ്ടോ?

താൻ ആരുടെ പ്രീതി​നേ​ടാൻ ആഗ്രഹി​ക്കു​ന്നു​വോ അയാൾക്കു സമ്മാനം കൊടു​ക്കു​ന്നത്‌ ഒരാളെ സംബന്ധി​ച്ചി​ട​ത്തോ​ളം അസാധാ​ര​ണമല്ല. ചില നാടു​ക​ളിൽ, പ്രതി​ശ്രുത വധുവി​ന്റെ ഹൃദയം കവരാൻ ആഗ്രഹി​ക്കുന്ന ഒരു യുവാവ്‌ അവൾക്കു പുഷ്‌പങ്ങൾ നൽകി​യെ​ന്നു​വ​രാം. എങ്കിലും, ബുദ്ധി​മ​തി​യായ സ്‌ത്രീ സമ്മാന​ത്തി​നു​മ​പ്പു​റം കാണുന്നു. യുവാ​വി​ന്റെ സമ്മാന​ത്തി​നു പിന്നി​ലുള്ള ചേതോ​വി​കാ​രം അയാളെ ഒരു നല്ല ഭർത്താ​വു​കൂ​ടി ആക്കിത്തീർക്കുന്ന സ്‌നേ​ഹ​നിർഭ​ര​മായ ഒന്നാണോ എന്ന്‌ അവൾ പരിചി​ന്തി​ക്കും. ഒരു ദൈവിക മനോ​ഭാ​വം പ്രതി​ഫ​ലി​പ്പി​ക്കു​ന്ന​പക്ഷം, അത്തര​മൊ​രു സമ്മാന​ത്തി​നു ദാതാ​വി​നെ​യും സ്വീകർത്താ​വി​നെ​യും അത്യധി​കം സന്തോ​ഷ​ത്തി​ലേക്കു നയിക്കാൻ കഴിയും.

ഒരിക്കൽ, നാബാ​ലി​ന്റെ ഭാര്യ​യാ​യി​രുന്ന അബീഗ​യിൽ, ദൈവം ദാവീ​ദി​നെ ഇസ്രാ​യേ​ലി​ന്റെ ഭാവി രാജാ​വാ​യി തിര​ഞ്ഞെ​ടു​ത്തത്‌ അംഗീ​ക​രി​ച്ചു​കൊണ്ട്‌ അവനു​വേണ്ടി ഔദാ​ര്യ​പൂർവ​ക​മാ​യി സമ്മാനം ഒരുക്കി​യ​താ​യി ബൈബിൾ പറയുന്നു. അവളും പ്രീതി​തേടി. അവളുടെ ഭർത്താവ്‌ ദാവീ​ദി​നെ പുച്ഛി​ക്കു​ക​യും അവന്റെ ആളുക​ളു​ടെ​മേൽ ശകാര​വർഷം ചൊരി​യു​ക​യും ചെയ്‌തി​രു​ന്നു. 400 സായുധ സൈനി​ക​രു​ടെ നേതൃ​ത്വ​ത്തിൽ ദാവീദ്‌ നാബാ​ലി​നെ​യും കുടും​ബ​ത്തെ​യും വകവരു​ത്താൻ ഇറങ്ങി​ത്തി​രി​ച്ചു. പെട്ടെ​ന്നു​തന്നെ ദാവീ​ദി​ന്റെ ആളുകൾക്കു ഭക്ഷ്യവ​സ്‌തു​ക്ക​ള​ട​ങ്ങിയ ഒരു അകമഴിഞ്ഞ സമ്മാനം അയച്ചു​കൊണ്ട്‌ അബീഗ​യിൽ ഇടപെട്ടു. സമ്മാനം അയച്ച പിറകെ അവളും എത്തി​ച്ചേർന്നു. ഭർത്താ​വി​ന്റെ പ്രവൃ​ത്തി​ക്കു​വേണ്ടി താഴ്‌മ​യോ​ടെ ക്ഷമാപണം നടത്തി​ക്കൊണ്ട്‌ ദാവീ​ദു​മാ​യി ന്യായ​വാ​ദം ചെയ്‌ത​പ്പോൾ അവൾ വലിയ വിവേ​ച​ന​യ്‌ക്കു തെളിവു നൽകി.

അവളു​ടേ​തു സദു​ദ്ദേ​ശ്യ​മാ​യി​രു​ന്നു, പരിണ​ത​ഫ​ല​വും നല്ലതാ​യി​രു​ന്നു. ദാവീദ്‌ അവളുടെ സമ്മാനം സ്വീക​രി​ച്ച​ശേഷം അവളോ​ടു പറഞ്ഞു: “സമാധാ​ന​ത്തോ​ടെ വീട്ടി​ലേക്കു പോക; ഇതാ, ഞാൻ നിന്റെ വാക്കു കേട്ടു നിന്റെ മുഖം ആദരി​ച്ചി​രി​ക്കു​ന്നു.” പിന്നീട്‌, നാബാൽ മരിച്ച ശേഷം അബീഗ​യി​ലി​നോ​ടു ദാവീദ്‌ വിവാ​ഹാ​ഭ്യർഥന നടത്തി, അവൾ സസന്തോ​ഷം സമ്മതി​ക്കു​ക​യും ചെയ്‌തു.—1 ശമൂവേൽ 25:13-42.

എന്നാൽ, ചില​പ്പോൾ ഒരു വ്യക്തി തേടുന്ന പ്രീതി​യിൽ പക്ഷപാ​ത​മോ നിയമ​ത്തി​ന്റെ വളച്ചൊ​ടി​ക്ക​ലോ ഉൾപ്പെ​ടു​ന്നു​വെന്നു വന്നേക്കാം. അത്തര​മൊ​രു സാഹച​ര്യ​ത്തിൽ നൽകുന്ന സമ്മാനം കൈക്കൂ​ലി​യാണ്‌. തനിക്കു പ്രയോ​ജനം ലഭിക്കു​മെ​ന്നാ​ണു നൽകു​ന്ന​യാൾ ചിന്തി​ക്കു​ന്നത്‌, എന്നാൽ അത്‌ അയാളു​ടെ മനസ്സമാ​ധാ​നം കെടു​ത്തി​ക്ക​ള​യും. മറ്റുള്ളവർ അതു കണ്ടുപി​ടി​ച്ചു കണക്കു ബോധി​പ്പി​ക്കാൻ അയാളെ ബാധ്യ​സ്ഥ​നാ​ക്കു​മെന്ന അപകട​വും എല്ലായ്‌പോ​ഴു​മുണ്ട്‌. ആഗ്രഹി​ക്കുന്ന പ്രീതി ലഭ്യമാ​യാ​ലും, ചോദ്യം ചെയ്യത്തക്ക ആന്തരങ്ങ​ളു​ള്ള​വ​നാ​യി താൻ അറിയ​പ്പെ​ടു​ന്നു​വെന്ന്‌ അതു തേടി​യവൻ കണ്ടെത്തി​യേ​ക്കാം. ദൈവിക ജ്ഞാനം പ്രതി​ഫ​ലി​പ്പി​ച്ചു​കൊ​ണ്ടു ബൈബിൾ അത്തരം സമ്മാന​ങ്ങൾക്കെ​തി​രെ മുന്നറി​യി​പ്പു നൽകുന്നു.—ആവർത്ത​ന​പു​സ്‌തകം 16:19; സഭാ​പ്ര​സം​ഗി 7:7.

സമ്മാനം മനസ്സൊ​രു​ക്ക​മുള്ള ഒരു ഹൃദയ​ത്തിൽനി​ന്നാ​ണോ വരുന്നത്‌?

നിങ്ങൾ സ്‌നേ​ഹി​ക്കു​ന്ന​യാൾക്കു നിങ്ങളു​ടെ ആഗ്രഹ​പ്ര​കാ​രം സമ്മാനം നൽകു​ന്നത്‌, അങ്ങനെ ചെയ്യണ​മെന്ന തോന്നൽ മറ്റുള്ളവർ നിങ്ങളിൽ ജനിപ്പി​ക്കു​ന്ന​തു​മൂ​ലം നിങ്ങൾ കൊടു​ക്കു​ന്ന​തി​നെ​ക്കാൾ ഏറെ സന്തുഷ്ടി കൈവ​രു​ത്തു​മെ​ന്ന​തിൽ യാതൊ​രു സംശയ​വു​മില്ല.

ഭൗതിക സഹായം ആവശ്യ​മുള്ള സഹക്രി​സ്‌ത്യാ​നി​കൾക്കു​വേണ്ടി ദുരി​താ​ശ്വാ​സ വിതരണ വസ്‌തു​ക്കൾ സംഭരി​ക്കു​ന്ന​തി​നോ​ടുള്ള ബന്ധത്തിൽ അപ്പോ​സ്‌ത​ല​നായ പൗലോസ്‌ ദൈവി​ക​മായ കൊടു​ക്ക​ലി​നു ചില മഹത്തായ തത്ത്വങ്ങൾ രൂപകൽപ്പന ചെയ്യു​ക​യു​ണ്ടാ​യി. “മനസ്സൊ​രു​ക്കം ഉണ്ടെങ്കിൽ പ്രാപ്‌തി​യി​ല്ലാ​ത്ത​തു​പോ​ലെയല്ല പ്രാപ്‌തി​യു​ള്ള​തു​പോ​ലെ കൊടു​ത്താൽ അവന്നു ദൈവ​പ്ര​സാ​ദം ലഭിക്കും” എന്ന്‌ അവൻ എഴുതി. “അവനവൻ ഹൃദയ​ത്തിൽ നിശ്ചയി​ച്ച​തു​പോ​ലെ കൊടു​ക്കട്ടെ. സങ്കട​ത്തോ​ടെ അരുതു; നിർബ​ന്ധ​ത്താ​ലു​മ​രു​തു; സന്തോ​ഷ​ത്തോ​ടെ കൊടു​ക്കു​ന്ന​വനെ ദൈവം സ്‌നേ​ഹി​ക്കു​ന്നു” എന്ന്‌ അവൻ കൂട്ടി​ച്ചേർത്തു. (2 കൊരി​ന്ത്യർ 8:12; 9:7) അങ്ങനെ, അധിക​വും നിങ്ങളെ ആശ്രയി​ച്ചി​രി​ക്കു​ന്നു. വാരി​ക്കോ​രി സമ്മാനം കൊടു​ത്തു കടത്തിൽ മുങ്ങു​ന്ന​തി​നു പകരം ത്രാണി​ക്കൊ​ത്ത​വ​ണ്ണ​മാ​ണോ നിങ്ങൾ അതു ചെയ്യു​ന്നത്‌? സാമൂ​ഹി​ക​മോ വാണി​ജ്യ​പ​ര​മോ ആയ സമ്മർദം നിമിത്തം ഒരു നിർബ​ന്ധിത മനോ​ഭാ​വ​ത്താൽ കൊടു​ക്കു​ന്ന​തി​നു​പ​കരം ഹൃദയ​ത്തിൽ നിശ്ചയി​ച്ച​തു​പോ​ലെ​യാ​ണോ നിങ്ങൾ കൊടു​ക്കു​ന്നത്‌? അത്തരം ദൈവിക തത്ത്വങ്ങൾ ബാധക​മാ​ക്കിയ ആദിമ ക്രിസ്‌ത്യാ​നി​ക​ളെ​ക്കു​റി​ച്ചു പൗലോസ്‌ ഇങ്ങനെ എഴുതി: “വിശു​ദ്ധരെ ശുശ്രൂ​ഷി​ക്കു​ന്ന​തി​നുള്ള ഭാഗ്യ​ത്തിൽ തങ്ങളെ​ക്കൂ​ടി ഭാഗഭാ​ക്കു​ക​ളാ​ക്ക​ണ​മെന്ന്‌ അവർ ഞങ്ങളോട്‌ തീവ്ര​മാ​യി അപേക്ഷി​ച്ചു.”—2 കൊരി​ന്ത്യർ 8:4, പി.ഒ.സി. ബൈബിൾ.

നേരേ​മ​റിച്ച്‌, 1994 നവംബർ/ഡിസം​ബ​റി​ലെ റോയൽ ബാങ്ക്‌ ലെറ്റർ ക്രിസ്‌മസ്‌ വരെയുള്ള ആഴ്‌ച​യെ​പ്പറ്റി ഇങ്ങനെ പറഞ്ഞു: “ഉപഭോ​ക്താ​ക്കൾ സാധാ​ര​ണ​ഗ​തി​യിൽ വാങ്ങി​ക്കു​ക​യി​ല്ലാത്ത സാധനങ്ങൾ വാങ്ങാൻ അവരെ പ്രേരി​പ്പി​ക്കു​ന്ന​തി​നു ബിസി​നസ്‌ താത്‌പ​ര്യ​ക്കാർ ഉണർത്തി​വി​ടുന്ന കൃത്രിമ ആവേശ​ത്തി​മിർപ്പി​ന്റെ നാളു​ക​ളാ​യി വിശേ​ഷ​ദി​വ​സ​ക്കാ​ലം കാണ​പ്പെ​ട്ടേ​ക്കാം.” സാധനങ്ങൾ കടം വാങ്ങു​ന്ന​പക്ഷം, സമ്മാനങ്ങൾ കൊടു​ക്കു​ന്ന​തു​കൊണ്ട്‌ എത്രതന്നെ സംതൃ​പ്‌തി ഉളവാ​യാ​ലും പണമട​യ്‌ക്കേ​ണ്ടി​വ​രു​മ്പോൾ ആ സംതൃ​പ്‌തി പെട്ടെന്നു പൊയ്‌പോ​കു​ന്നു.

നിങ്ങളു​ടെ മുഖ്യ​താ​ത്‌പ​ര്യം—സന്ദർഭ​മോ? അതോ സ്‌നേ​ഹ​പ്ര​ക​ട​ന​മോ?

നിങ്ങൾ സമ്മാനങ്ങൾ നൽകു​ന്നതു കൂടു​ത​ലും അത്‌ ആവശ്യ​പ്പെ​ടുന്ന സന്ദർഭ​ങ്ങ​ളി​ലാ​ണെന്നു നിങ്ങൾ കണ്ടെത്തു​ന്നു​വോ? അങ്ങനെ​യെ​ങ്കിൽ സ്വമന​സ്സാൽ സമ്മാനം നൽകു​ന്ന​തി​ലൂ​ടെ ഉണ്ടാകുന്ന സന്തോ​ഷ​ത്തി​ന്റെ അഭാവം നിങ്ങൾക്ക്‌ അനുഭ​വ​പ്പെ​ട്ടെ​ന്നു​വ​രാം.

പ്രത്യേക നാളു​ക​ളിൽ സമ്മാനങ്ങൾ നൽകു​ന്ന​തിൽ സന്തുഷ്ട​ര​ല്ലാത്ത അനേക​രുണ്ട്‌. സമ്മാനങ്ങൾ പ്രതീ​ക്ഷി​ക്കുന്ന ദിവസം അടുക്കു​ന്തോ​റും തന്റെ കുട്ടി​ക​ളിൽ അത്യാ​ഗ്രഹം പ്രകട​മാ​യ​താ​യി എഴുത്തു​കാ​രി​കൂ​ടി​യായ ഒരമ്മ അംഗീ​ക​രി​ക്കു​ക​യു​ണ്ടാ​യി. സുന്ദര​മായ ഒരു സമ്മാനം കിട്ടി​യ​പ്പോൾ, പ്രതീ​ക്ഷിച്ച സമ്മാനം ലഭിക്കാ​ത്ത​തു​കൊ​ണ്ടു തന്റെത​ന്നെ​യും സന്തോ​ഷ​ത്തി​നു മങ്ങലേ​റ്റ​താ​യി അവർ സമ്മതി​ച്ചു​പ​റഞ്ഞു. ആഘോ​ഷ​ങ്ങൾക്കും സമ്മാനങ്ങൾ കൈമാ​റു​ന്ന​തി​നും പ്രാധാ​ന്യം കൽപ്പി​ക്കുന്ന വിശേ​ഷ​ദി​വ​സ​ങ്ങ​ളിൽ വിഷാ​ദ​വും മദ്യദു​രു​പ​യോ​ഗ​വും കൂടു​ത​ലാ​യി സംഭവി​ക്കാ​റു​ണ്ടെന്ന്‌ അസംഖ്യം റിപ്പോർട്ടു​കൾ പറയുന്നു.

വിശേ​ഷ​ദി​വ​സ​ങ്ങ​ളിൽ സമ്മാനം നൽകു​ന്നതു ചില​പ്പോ​ഴൊ​ക്കെ കുട്ടി​കളെ പ്രതി​കൂ​ല​മാ​യി ബാധി​ക്കു​ന്നു​വെന്നു നിരീ​ക്ഷി​ച്ച​ശേഷം ദ ന്യൂ​യോർക്ക്‌ ടൈംസ്‌-ൽ ഉദ്ധരി​ക്ക​പ്പെട്ട ഒരു മനശ്ശാ​സ്‌ത്ര പ്രൊ​ഫസർ ഇങ്ങനെ പ്രോ​ത്സാ​ഹി​പ്പി​ക്കു​ന്നു: “സമ്മർദം കുറയ്‌ക്കു​ന്ന​തി​നുള്ള ഒരു മാർഗ​മാ​യി മറ്റേ​തെ​ങ്കി​ലും ദിവസ​ങ്ങ​ളിൽ ചില സമ്മാനങ്ങൾ കൊടു​ക്കു​ന്ന​തി​നെ​പ്പറ്റി പരിചി​ന്തി​ക്കുക.” അതു നല്ല ഫലം ചെയ്യു​മെന്നു നിങ്ങൾക്കു തോന്നു​ന്നു​ണ്ടോ?

ക്രിസ്‌മ​സും ജന്മദി​ന​ങ്ങ​ളും ആഘോ​ഷി​ക്കു​ക​യി​ല്ലാത്ത ഒരു കുടും​ബ​ത്തി​ലെ 12 വയസ്സുള്ള റ്റാമീ ഇങ്ങനെ എഴുതി: “നിനയ്‌ക്കാത്ത നേരത്തു സമ്മാനം കിട്ടു​ന്ന​തി​ലാ​ണു കൂടുതൽ സന്തോഷം.” വർഷത്തിൽ ഒന്നോ രണ്ടോ തവണ സമ്മാനങ്ങൾ നൽകു​ന്ന​തി​നു പകരം മാതാ​പി​താ​ക്കൾ വർഷത്തി​ലു​ട​നീ​ളം തനിക്കും സഹോ​ദ​ര​നും സമ്മാനങ്ങൾ നൽകു​ന്ന​താ​യി അവൾ പറഞ്ഞു. എന്നാൽ അവളെ സംബന്ധി​ച്ചി​ട​ത്തോ​ളം ആ സമ്മാന​ങ്ങ​ളെ​ക്കാൾ പ്രാധാ​ന്യ​മുള്ള ഒന്നുണ്ട്‌. “സന്തുഷ്ട​മായ ഒരു കുടും​ബ​ജീ​വി​തം എനിക്കുണ്ട്‌,” അവൾ പറയുന്നു.

ശക്തമായ കുടും​ബ​ങ്ങ​ളു​ടെ രഹസ്യം (ഇംഗ്ലീഷ്‌) എന്ന പുസ്‌തകം ഇങ്ങനെ തുറന്ന​ടി​ച്ചു പ്രസ്‌താ​വി​ക്കു​ന്നു: “നമ്മളി​ല​നേ​ക​രും നമ്മൾ സ്‌നേ​ഹി​ക്കു​ന്ന​വർക്ക്‌ അവരുടെ ജന്മദി​ന​ങ്ങ​ളി​ലോ വാർഷി​ക​ങ്ങ​ളി​ലോ വിശേ​ഷ​ദി​വ​സ​ങ്ങ​ളി​ലോ നൽകാ​നാ​യി സമ്മാനം തിരഞ്ഞു​കൊ​ണ്ടു വർഷത്തിൽ പലവട്ടം സമയവും പണവും ചെലവ​ഴി​ക്കു​ന്നു. എല്ലാറ്റി​ലും ഉത്തമ സമ്മാന​ത്തി​നു പണം മുടക്കില്ല. അതു പൊതി​യേ​ണ്ട​തു​മില്ല. നിങ്ങൾക്കു​ള്ള​തിൽ ഏറ്റവും ബഹുമൂ​ല്യ സമ്പാദ്യം നിങ്ങളു​ടെ ജീവനാ​ണെന്ന്‌ അനേക​രെ​പ്പോ​ലെ നിങ്ങളും കരുതു​ന്നു​വെ​ങ്കിൽ നിങ്ങൾക്കു വാഗ്‌ദാ​നം​ചെ​യ്യാൻ കഴിയുന്ന ഏറ്റവും വില​യേ​റിയ സമ്മാനം നിങ്ങളു​ടെ സമയത്തി​ന്റെ ഒരംശ​മാണ്‌. ആ വില​യേ​റിയ സമ്മാനം സമയത്തി​ന്റെ രൂപത്തിൽ നാം നമ്മുടെ പ്രിയ​പ്പെ​ട്ട​വർക്കു സമ്മാനി​ക്കു​ന്നു.”

നിങ്ങളു​ടെ കുടും​ബ​വൃ​ത്ത​ത്തി​നു പുറത്തും നിങ്ങൾക്കതു നൽകാ​വു​ന്ന​താണ്‌. മറ്റുള്ള​വർക്കുള്ള സ്‌പഷ്ട​മായ ഒരാവ​ശ്യം നികത്തുന്ന, മനസ്സോ​ടെ​യുള്ള ഒരു സമ്മാന​ത്തി​നു പ്രത്യേക സംതൃ​പ്‌തി കൈവ​രു​ത്താ​നാ​വും. പാവങ്ങ​ളോ​ടും മുടന്ത​രോ​ടും കുരു​ട​രോ​ടും അത്തരം സ്‌നേ​ഹ​നിർഭ​ര​മായ പരിഗണന കാണി​ക്കാൻ നമ്മെ പ്രോ​ത്സാ​ഹി​പ്പി​ച്ചു​കൊണ്ട്‌ യേശു​ക്രി​സ്‌തു ഇങ്ങനെ കൂട്ടി​ച്ചേർത്തു: “എന്നാൽ നീ ഭാഗ്യ​വാ​നാ​കും [“സന്തുഷ്ട​നാ​കും,” NW]; നിനക്കു പ്രത്യു​പ​കാ​രം ചെയ്‌വാൻ അവർക്കു വകയി​ല്ല​ല്ലോ.”—ലൂക്കൊസ്‌ 14:12-14.

റോക്ക്‌ലാൻഡ്‌ ജേർണൽ-ന്യൂസ്‌ (യു.എസ്‌.എ.) സമീപ​കാ​ലത്ത്‌ അത്തര​മൊ​രു കൊടു​ക്ക​ലി​ന്റെ ഉദാഹ​രണം റിപ്പോർട്ടു​ചെ​യ്യു​ക​യു​ണ്ടാ​യി. അന്ധയായ, പ്രായം​ചെന്ന ഒരു സ്‌ത്രീ​യു​ടെ വീടു തകർന്നു​വീ​ണ​പ്പോൾ സുഹൃ​ത്തു​ക്കൾ അവർക്ക്‌ ഒരു പുതിയ വീടു പണിതു​കൊ​ടു​ത്തു. അനേകം പ്രാ​ദേ​ശിക ബിസി​നസ്‌ സമിതി​കൾ സംഭാ​വ​നകൾ നൽകി, തദ്ദേശ ഗവണ്മെൻറ്‌ ഏജൻസി പണവും അനുവ​ദി​ച്ചു. “സർവ​പ്ര​ധാ​ന​മാ​യി, യഹോ​വ​യു​ടെ സാക്ഷി​ക​ളു​ടെ 150-ഓളം അംഗങ്ങൾ, അധിക​വും ഹവർസ്‌ട്രോ സഭയിൽ കൂടി​വ​രു​ന്നവർ, വീടു പണിയു​ന്ന​തി​നു സമയം സംഭാ​വ​ന​ചെ​യ്‌തു” എന്നു വാർത്താ​പ​ത്രം റിപ്പോർട്ടു ചെയ്‌തു.

ലേഖനം ഇങ്ങനെ തുടർന്നു: “കെട്ടിട നിർമാണ സ്ഥലത്ത്‌ കൂമ്പാ​ര​ക്ക​ണ​ക്കി​നു സാമ​ഗ്രി​കൾ ഉണ്ടായി​രു​ന്നു, അതിന​ടു​ത്താ​യി മേശകൾ നിറയെ ഭക്ഷണവും. രണ്ടു ദിവസ​ത്തി​നു​ള്ളിൽ ജോലി​ക്കാർ രണ്ടു കുടും​ബ​ങ്ങൾക്കു താമസി​ക്കാ​വുന്ന ഒരു മൂന്നു​നി​ല​ക്കെ​ട്ടി​ടം പണിതു​യർത്തി. . . . വേഗത്തിൽ കെട്ടിടം പണിയു​ന്ന​തി​നുള്ള സാമർഥ്യ​ത്തി​നു യഹോ​വ​യു​ടെ സാക്ഷികൾ പേരു​കേ​ട്ട​വ​രാണ്‌. . . . എങ്കിലും അത്തരം ത്വരി​ത​ഗതി സ്‌നേ​ഹ​പ്ര​വൃ​ത്തി​യിൽ പഴക്കം പ്രദാ​നം​ചെ​യ്യുക എന്ന അവരുടെ ഉദ്യമ​ത്തി​ന്റെ ശാശ്വ​ത​ത്വ​ത്തി​നു നേർ വിപരീ​ത​മാണ്‌. ശ്രീമതി ബ്ലാക്ലീക്കു തന്റെ പുതിയ കെട്ടിടം കാണാൻ കഴി​ഞ്ഞെ​ന്നു​വ​രില്ല. എന്നാൽ അവരുടെ കൈകൾക്ക്‌ അതു സ്‌പർശ്യ​വേ​ദ്യ​മാണ്‌. ഈ നിസ്വാർഥ പ്രവർത്ത​ന​ത്തി​ന്റെ പിന്നി​ലുള്ള ആഴമേ​റിയ വികാരം അവരുടെ ഹൃദയം അറിയു​ന്നുണ്ട്‌.”

വർഷത്തി​ലു​ട​നീ​ള​മുള്ള ഔദാ​ര്യ​മ​നോ​ഭാ​വം

യഥാർഥ​മാ​യും ഉദാര​മാ​യി കൊടു​ക്കുന്ന സ്വഭാ​വ​മു​ള്ളവർ പ്രത്യേക ദിവസ​ങ്ങൾക്കാ​യി കാത്തി​രി​ക്കു​ന്നില്ല. അവരുടെ ജീവിതം തങ്ങളെ മാത്രം ചുറ്റി​പ്പ​റ്റി​യു​ള്ളതല്ല. എന്തെങ്കി​ലും നല്ലതു ലഭിക്കു​മ്പോൾ മറ്റുള്ള​വ​രു​മാ​യി അതു പങ്കിടു​ന്ന​തിൽ അവർ ആനന്ദം കണ്ടെത്തു​ന്നു. അവർ ബലാത്‌കാ​ര​മാ​യി സമ്മാനം നൽകു​ന്ന​വ​രാ​ണെന്ന്‌ ഇതിനർഥ​മില്ല. തങ്ങളുടെ കുടും​ബത്തെ തഴഞ്ഞു​കൊണ്ട്‌ അവർ കൊടു​ക്കു​ന്നു​വെ​ന്നും അത്‌ അർഥമാ​ക്കു​ന്നില്ല. സ്വീകർത്താ​ക്കളെ എങ്ങനെ ബാധി​ക്കു​മെന്നു ചിന്തി​ക്കാ​തെ അവർ കൊടു​ക്കു​ന്നു​വെന്ന്‌ അത്‌ അർഥമാ​ക്കു​ന്നില്ല. എങ്കിലും, അവർ യേശു തന്റെ ശിഷ്യ​ന്മാ​രെ പഠിപ്പി​ച്ച​പോ​ലെ ‘കൊടു​ക്കു​ന്നതു ശീലമാ​ക്കുന്ന’വരാണ്‌.—ലൂക്കോസ്‌ 6:38, NW.

പ്രോ​ത്സാ​ഹ​ന​മാ​വ​ശ്യ​മുള്ള പ്രായം​ചെ​ന്നവർ, രോഗികൾ, മറ്റുള്ളവർ എന്നിങ്ങനെ സുഹൃ​ത്തു​ക്ക​ളു​ടെ​യും അയൽക്കാ​രു​ടെ​യും ആവശ്യം സംബന്ധിച്ച്‌ അവർ ബോധ​വാ​ന്മാ​രാണ്‌. കടയിൽ പോകു​ന്ന​തോ കുടും​ബ​ജോ​ലി​ക​ളിൽ സഹായി​ക്കു​ന്ന​തോ ആയിരു​ന്നേ​ക്കാം അവരുടെ “സമ്മാനം”. അത്‌ വിറകു കീറു​ന്ന​തോ മഞ്ഞു നീക്കു​ന്ന​തോ ആയിരു​ന്നേ​ക്കാം. ഒരുപക്ഷേ അത്‌ പാചകം ചെയ്‌ത ഒരു പാത്രം ഭക്ഷണമോ സന്ദർശ​ന​ത്തി​നും ഒന്നിച്ചി​രു​ന്നു വായി​ക്കു​ന്ന​തി​നും​വേണ്ടി മാറ്റി​വ​ച്ചി​രി​ക്കുന്ന ഒരു മണിക്കൂർ സമയമോ ആണെന്നു​വ​രാം. തിര​ക്കേ​റിയ ജീവി​ത​മാണ്‌ അവരു​ടേ​തെ​ങ്കി​ലും മറ്റുള്ള​വരെ സഹായി​ക്കാ​നാ​വാ​ത്ത​വി​ധം തിരക്കു​ള്ളതല്ല. വാസ്‌ത​വ​ത്തിൽ, “സ്വീക​രി​ക്കു​ന്ന​തി​ലു​ള്ള​തി​നെ​ക്കാൾ കൊടു​ക്കു​ന്ന​തിൽ കൂടുതൽ സന്തുഷ്ടി​യുണ്ട്‌” എന്ന്‌ അവർ അനുഭ​വ​ത്തിൽനി​ന്നു പഠിച്ചി​ട്ടുണ്ട്‌.—പ്രവൃ​ത്തി​കൾ 20:35.

എല്ലാറ്റി​ലും വലിയ ദാതാവ്‌ നമ്മുടെ സ്രഷ്ടാ​വായ യഹോ​വ​യാം ദൈവ​മാ​ണെ​ന്നതു തീർച്ച​യാണ്‌. അവൻ “എല്ലാവർക്കും ജീവനും ശ്വാസ​വും സകലവും കൊടു​ക്കു”ന്നു. (പ്രവൃ​ത്തി​കൾ 17:25) ദുഷ്ടത​യ്‌ക്കും രോഗ​ത്തി​നും മരണത്തി​നും അന്തംവ​രു​ത്തി ഈ ഭൂമിയെ ഒരു പറുദീ​സ​യാ​ക്കു​ന്നതു സംബന്ധി​ച്ചുള്ള അവന്റെ ഉദ്ദേശ്യ​ത്തെ​ക്കു​റിച്ച്‌ ബൈബി​ളിൽ അവൻ നമുക്ക്‌ ഉൾക്കാ​ഴ്‌ച​യും പ്രദാ​നം​ചെ​യ്യു​ന്നു. (സങ്കീർത്തനം 37:10, 11; വെളി​പ്പാ​ടു 21:4, 5) ഇതേപ്പറ്റി അറിയു​മ്പോൾ ഔദാ​ര്യ​മ​നോ​ഭാ​വ​മു​ള്ളവർ ആ സുവാർത്ത തങ്ങളിൽത്തന്നെ ഒതുക്കി​വ​യ്‌ക്കു​ക​യില്ല. അതു മറ്റുള്ള​വ​രു​മാ​യി പങ്കിടു​ക​യാണ്‌ അവരുടെ ഏറ്റവും വലിയ സന്തോ​ഷ​ങ്ങ​ളി​ലൊന്ന്‌. അവരു​ടേതു നിശ്ചയ​മാ​യും ദൈവി​ക​മായ ഒരു കൊടു​ക്കൽ മനോ​ഭാ​വ​മാണ്‌. നിങ്ങൾ നട്ടുവ​ളർത്തു​ന്നത്‌ ആ മനോ​ഭാ​വ​മാ​ണോ?

[7-ാം പേജിലെ ചിത്രങ്ങൾ]

എല്ലാറ്റിലും മൂല്യ​വ​ത്തായ ചില സമ്മാന​ങ്ങൾക്കു പണംമു​ട​ക്കി​ല്ല