‘ഞങ്ങളെ പ്രാർത്ഥി​പ്പാൻ പഠിപ്പി​ക്കേ​ണമേ’

‘കർത്താവേ, ഞങ്ങളെ പ്രാർത്ഥി​പ്പാൻ പഠിപ്പി​ക്കേ​ണമേ.’ യേശു​ക്രി​സ്‌തു​വി​ന്റെ ശിഷ്യ​ന്മാ​രി​ലൊ​രാ​ളാണ്‌ ആ അഭ്യർഥന നടത്തി​യത്‌. (ലൂക്കൊസ്‌ 11:1) പേരു വെളി​പ്പെ​ടു​ത്താത്ത ആ ശിഷ്യൻ, പ്രാർഥ​ന​യിൽ ആഴമായ വിലമ​തി​പ്പുള്ള ഒരുവ​നാ​യി​രു​ന്നു​വെ​ന്നതു വ്യക്തമാണ്‌. സമാന​മാ​യി, സത്യാ​രാ​ധകർ ഇന്ന്‌ അതിന്റെ പ്രാധാ​ന്യം തിരി​ച്ച​റി​യു​ന്നു. എന്താ​ണേ​ലും, അഖിലാ​ണ്ഡ​ത്തി​ലെ അത്യുന്നത വ്യക്തി​യു​മാ​യി സംഭാ​ഷ​ണ​ത്തി​ലേർപ്പെ​ടു​ന്ന​തി​നുള്ള മാധ്യ​മ​മാ​ണ​ല്ലോ പ്രാർഥന! ഒന്നോർത്തു നോക്കൂ! “പ്രാർത്ഥന കേൾക്കു​ന്നവ”ൻ നമ്മുടെ താത്‌പ​ര്യ​ങ്ങൾക്കും ഉത്‌ക​ണ്‌ഠ​കൾക്കും വ്യക്തി​പ​ര​മായ ശ്രദ്ധ നൽകുന്നു. (സങ്കീർത്തനം 65:2) അതിലും പ്രധാ​ന​മാ​യി, പ്രാർഥ​ന​യി​ലൂ​ടെ നാം ദൈവ​ത്തി​നു നന്ദിയും സ്‌തു​തി​യും കരേറ്റു​ന്നു.—ഫിലി​പ്പി​യർ 4:6.

എന്നിരു​ന്നാ​ലും, ‘ഞങ്ങളെ പ്രാർത്ഥി​പ്പാൻ പഠിപ്പി​ക്കേ​ണമേ’ എന്ന വാക്കുകൾ ഗൗരവ​ത​ര​മായ ചില ചോദ്യ​ങ്ങൾ ഉയർത്തു​ന്നു. ലോക​വ്യാ​പ​ക​മാ​യി വ്യത്യസ്‌ത മതങ്ങൾ ദൈവത്തെ സമീപി​ക്കു​ന്ന​തിന്‌ അനേകം രീതികൾ ഉപയോ​ഗി​ച്ചു വരുന്നു. എന്നാൽ പ്രാർഥി​ക്കു​ന്ന​തിൽ ശരിയായ രീതി​യും തെറ്റായ രീതി​യു​മു​ണ്ടോ? അതിന്‌ ഉത്തരമാ​യി നമുക്ക്‌ ആദ്യം, പ്രാർഥന ഉൾപ്പെ​ടുന്ന ജനപ്രീ​തി​യാർജിച്ച മതാചാ​ര​ങ്ങ​ളിൽ ചിലതു പരി​ശോ​ധി​ക്കാം. ലാറ്റിൻ അമേരി​ക്ക​യി​ലെ ആചാര​ങ്ങ​ളിൽ നാം ശ്രദ്ധ കേന്ദ്രീ​ക​രി​ക്കും.

പ്രതി​മ​ക​ളും “പാലക പുണ്യ​വാ​ളന്മാ”രും

ലാറ്റിൻ അമേരി​ക്കൻ രാജ്യങ്ങൾ പൊതു​വേ ആഴമായ മതബോ​ധ​മു​ള്ള​വ​യാണ്‌. ഉദാഹ​ര​ണ​ത്തിന്‌, മെക്‌സി​ക്കോ​യി​ലു​ട​നീ​ളം “പാലക പുണ്യ​വാ​ളന്മാ”രോടു പ്രാർഥി​ക്കുന്ന സമ്പ്രദാ​യം ഒരുവനു നിരീ​ക്ഷി​ക്കാൻ കഴിയും. വാസ്‌ത​വ​ത്തിൽ, മെക്‌സി​ക്കൻ പട്ടണങ്ങൾക്കു “പാലക പുണ്യ​വാ​ള​ന്മാർ” ഉണ്ടായി​രി​ക്കു​ന്നതു സാധാ​ര​ണ​മാണ്‌, അവർക്കു​വേണ്ടി നിശ്ചിത ദിവസ​ങ്ങ​ളിൽ ഉത്സവങ്ങൾ കൊണ്ടാ​ട​പ്പെ​ടു​ക​യും ചെയ്യുന്നു. മെക്‌സി​ക്കൻ കത്തോ​ലി​ക്കർ വൈവി​ധ്യ​മാർന്ന പ്രതി​മ​ക​ളോ​ടും പ്രാർഥി​ക്കു​ന്നു. എന്നിരു​ന്നാ​ലും, ഏതു “പുണ്യ​വാള”നോടു യാചി​ക്ക​ണ​മെ​ന്നത്‌ ആരാധകൻ നടത്താൻ ആഗ്രഹി​ക്കുന്ന അപേക്ഷ​യു​ടെ തരത്തെ ആശ്രയി​ച്ചി​രി​ക്കും. ഒരുവൻ വിവാഹ പങ്കാളി​യെ തേടു​ന്ന​പക്ഷം അയാൾ അന്തോ​ണീസ്‌ “പുണ്യ​വാള”ന്‌ മെഴു​കു​തി​രി കത്തി​ച്ചേ​ക്കാം. മോ​ട്ടോർ വണ്ടിയിൽ യാത്ര​പു​റ​പ്പെ​ടാ​നി​രി​ക്കുന്ന ഒരുവൻ യാത്ര​ക്കാ​രു​ടെ, പ്രത്യേ​കി​ച്ചും മോ​ട്ടോർ വണ്ടി ഓടി​ക്കു​ന്ന​വ​രു​ടെ, പാലക​നായ ക്രിസ്റ്റഫർ “പുണ്യ​വാള”ന്റെ സംരക്ഷണ കരങ്ങളിൽ സ്വയം അർപ്പി​ച്ചേ​ക്കാം.

എന്നാൽ, അത്തരം ആചാരങ്ങൾ ഉരുത്തി​രി​ഞ്ഞത്‌ എവി​ടെ​യാണ്‌? സ്‌പെ​യിൻകാർ മെക്‌സി​ക്കോ​യിൽ എത്തിയ​പ്പോൾ, പുറജാ​തി ദൈവ​ങ്ങൾക്കു സമർപ്പി​ക്ക​പ്പെ​ട്ടി​രുന്ന ഒരു ജനതതി​യെ​യാണ്‌ അവർ കണ്ടത്തി​യ​തെന്നു ചരിത്രം വെളി​പ്പെ​ടു​ത്തു​ന്നു. ലോസ്‌ ആസ്‌റ്റെ​ക്കാസ്‌ ഹോംബ്ര ഇ ട്രീബൂ (ആസ്‌റ്റെ​ക്കു​കാർ, മനുഷ്യ​നും ഗോ​ത്ര​വും) എന്ന തന്റെ ഗ്രന്ഥത്തിൽ വിക്ടൊർ വൊൾഫ്‌ഗാൻ വൊൻ ഹേഗെൻ ഇങ്ങനെ പറയുന്നു: “അവിടെ വ്യക്തി​പ​ര​മായ ദൈവങ്ങൾ ഉണ്ടായി​രു​ന്നു, ഓരോ ചെടി​ക്കും അതി​ന്റേ​തായ ദൈവ​മു​ണ്ടാ​യി​രു​ന്നു, ഓരോ നടപടി​ക്കും അതി​ന്റേ​തായ ദേവനോ ദേവി​യോ ഉണ്ടായി​രു​ന്നു, ആത്മഹത്യ​യ്‌ക്കു​പോ​ലും ദൈവ​മു​ണ്ടാ​യി​രു​ന്നു. ബിസി​ന​സു​കാ​രു​ടെ ദേവനാ​യി​രു​ന്നു യാക്കാ​ട്ടെ​കൂ​ട്ട്‌ളി. ആ ബഹു​ദൈവ ലോക​ത്തിൽ, സകല ദൈവ​ങ്ങൾക്കും വ്യക്തമാ​യി നിർവ​ചി​ക്ക​പ്പെട്ട ചായ്‌വു​ക​ളും ധർമങ്ങ​ളും ഉണ്ടായി​രു​ന്നു.”

ആ ദൈവ​ങ്ങ​ളും കത്തോ​ലി​ക്കാ “പുണ്യ​വാ​ളന്മാ”രും തമ്മിൽ ശ്രദ്ധേ​യ​മായ സാദൃ​ശ്യ​മു​ണ്ടാ​യി​രു​ന്ന​തി​നാൽ സ്‌പാ​നിഷ്‌ വിജ​യേ​താ​ക്കൾ തദ്ദേശ​വാ​സി​കളെ “ക്രിസ്‌ത്യാ​നി​ക​ളാ​ക്കാൻ” മുതിർന്ന​പ്പോൾ അവർ തങ്ങളുടെ വിഗ്ര​ഹ​ങ്ങ​ളിൽനി​ന്നു സഭയുടെ “പുണ്യ​വാ​ളന്മാ”രിലേക്കു കൂറു​മാ​റുക മാത്ര​മാ​ണു ചെയ്‌തത്‌. മെക്‌സി​ക്കോ​യു​ടെ ചില ഭാഗങ്ങ​ളിൽ ആചരി​ച്ചു​വ​രുന്ന കത്തോ​ലി​ക്കാ മതത്തിന്റെ പുറജാ​തീയ ഉത്ഭവത്തെ ദ വാൾ സ്‌ട്രീറ്റ്‌ ജേർണ​ലി​ലെ ഒരു ലേഖനം അംഗീ​ക​രി​ക്കു​ക​യു​ണ്ടാ​യി. ഒരു പ്രദേ​ശത്തു ജനസമൂ​ഹം ആരാധി​ച്ചു​വ​രുന്ന 64 “പുണ്യ​വാ​ളന്മാ”രിൽ അധിക​വും “നിശ്ചിത മായൻ ദൈവങ്ങ”ളോടു സാദൃ​ശ്യ​മു​ള്ള​താ​ണെന്ന്‌ അത്‌ അഭി​പ്രാ​യ​പ്പെട്ടു.

“പുണ്യ​വാ​ള​നും അവനോ​ടു പ്രാർഥി​ക്കു​ന്ന​വ​രും തമ്മിൽ ആപ്‌ത സ്‌നേ​ഹ​ത്തി​ന്റെ ഒരു ബന്ധം സ്ഥാപി​ത​മാ​യി​രി​ക്കു​ന്നു, . . . ക്രിസ്‌തു​വി​നോ​ടും ദൈവ​ത്തോ​ടു​മുള്ള ബന്ധത്തെ ലഘൂക​രി​ക്കു​ന്ന​തി​നു​പ​കരം അതിനെ സമ്പുഷ്ട​മാ​ക്കു​ക​യും അഗാധ​മാ​ക്കു​ക​യും ചെയ്യുന്ന ഒരു ബന്ധം തന്നെ” എന്നു ന്യൂ കാത്തലിക്‌ എൻ​സൈ​ക്ലോ​പീ​ഡിയ വാദി​ക്കു​ന്നു. എന്നാൽ, വ്യക്തമാ​യും പുറജാ​തീ​യ​ത്വ​ത്തി​ന്റെ അവശി​ഷ്ട​മായ ഒരു ബന്ധത്തിനു ദൈവ​വു​മാ​യുള്ള ഒരുവന്റെ ബന്ധത്തെ അഗാധ​മാ​ക്കാൻ എങ്ങനെ സാധി​ക്കും? അത്തരം “പുണ്യ​വാ​ള​ന്മാർ”ക്ക്‌ അർപ്പി​ക്കുന്ന പ്രാർഥ​നകൾ വാസ്‌ത​വ​ത്തിൽ ദൈവത്തെ പ്രീതി​പ്പെ​ടു​ത്തു​മോ?

കൊന്ത​യു​ടെ ഉത്ഭവം

കൊന്ത​യു​ടെ ഉപയോ​ഗ​മാ​ണു ജനപ്രീ​തി​യാർജിച്ച മറ്റൊരു ആചാരം. “അമ്പതോ നൂറ്റമ്പ​തോ ജപമണി​ക​ളു​ള്ള​തും ഇടയ്‌ക്കു വലിയ ജപമണി​ക​ളി​ട്ടു പതുപ്പ​ത്താ​യി തിരി​ച്ചി​രി​ക്കു​ന്ന​തും മൂന്നു ജപമണി​കൾക്കു ശേഷം ക്രൂശി​ത​രൂ​പ​ത്തോട്‌ അറ്റങ്ങൾ ബന്ധിപ്പി​ച്ചി​രി​ക്കു​ന്ന​തു​മായ ഒരു മാല” ആയി ഡിക്‌സ്യോ​നാ​റി​യോ എൻസീ​ക്ലോ​പീ​ഡി​കോ ഹിസ്‌പോ​നോ-അമേരി​ക്കാ​നോ (ഹിസ്‌പാ​നിക്‌-അമേരി​ക്കൻ എൻ​സൈ​ക്ലോ​പീ​ഡിക്‌ ഡിക്‌ഷ്‌നറി) കൊന്തയെ വർണി​ക്കു​ന്നു.

കൊന്ത​യു​ടെ ഉപയോ​ഗം സംബന്ധിച്ച്‌, ഒരു കത്തോ​ലി​ക്കാ പ്രസി​ദ്ധീ​ക​രണം ഇങ്ങനെ പറയുന്നു: “വിശുദ്ധ കൊന്ത, നമ്മുടെ വീണ്ടെ​ടു​പ്പി​ന്റെ ദിവ്യ​സാ​രങ്ങൾ സംബന്ധിച്ച വാചി​ക​വും മാനസി​ക​വു​മായ ഒരു പ്രാർഥനാ രൂപമാണ്‌. അതു പതിനഞ്ചു തവണ പതുപ്പ​ത്താ​യി തിരി​ച്ചി​രി​ക്കു​ന്നു. ഓരോ പത്തിലും ഒരു കർതൃ​പ്രാർഥ​ന​യും പത്തു നന്മനിറഞ്ഞ മറിയ​വും ഒരു ഗ്ലോറി​യാ പാറ്റ്രി​യും ചൊല്ലു​ന്നത്‌ ഉൾപ്പെ​ട്ടി​രി​ക്കു​ന്നു. പതുപ്പ​ത്താ​യി തിരി​ച്ചി​രി​ക്കുന്ന ജപമണി​ക​ളിൽ ഓരോ​ന്നും ഉരുട്ടു​മ്പോൾ ഒരു ദിവ്യ​സാ​ര​ത്തെ​ക്കു​റി​ച്ചു ധ്യാനി​ക്കു​ന്നു.” ദിവ്യ​സാ​രങ്ങൾ എന്നതു കത്തോ​ലി​ക്കർ അറിഞ്ഞി​രി​ക്കേണ്ട സിദ്ധാ​ന്ത​ങ്ങ​ളോ ഉപദേ​ശ​ങ്ങ​ളോ ആണ്‌. ഇക്കാര്യ​ത്തിൽ, ക്രിസ്‌തു​യേ​ശു​വി​ന്റെ ജീവിതം, യാതന, മരണം എന്നീ സംഭവ​വു​മാ​യി ബന്ധപ്പെ​ട്ടി​രി​ക്കുന്ന സംഗതി​കൾ.

“കൊന്ത ഉപയോ​ഗി​ച്ചുള്ള ആദിമ പ്രാർഥ​നാ​രീ​തി​കൾ ക്രിസ്‌ത്യാ​നി​ത്വ​ത്തിൽ ആരംഭി​ച്ചതു മധ്യ യുഗങ്ങ​ളി​ലാണ്‌. എന്നാൽ, 1400-കളിലും 1500-കളിലും മാത്ര​മാണ്‌ അതു വ്യാപ​ക​മാ​യത്‌” എന്ന്‌ ദ വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ പറയുന്നു. കൊന്ത​യു​ടെ ഉപയോ​ഗം കത്തോ​ലി​ക്കാ​മ​ത​ത്തിൽ മാത്ര​മേ​യു​ള്ളോ? അല്ല. ഡിക്‌സ്യോ​നാ​റി​യോ എൻസീ​ക്ലോ​പീ​ഡി​കോ ഹിസ്‌പോ​നോ-അമേരി​ക്കാ​നോ ഇങ്ങനെ പ്രസ്‌താ​വി​ക്കു​ന്നു: “സമാന​മായ ജപമണി​കൾ ഇസ്ലാമു​ക​ളു​ടെ​യും ലാമമ​ത​ക്കാ​രു​ടെ​യും ബുദ്ധമ​ത​ക്കാ​രു​ടെ​യും ആരാധ​ന​ക​ളിൽ ഉപയോ​ഗി​ച്ചു​വ​രു​ന്നു.” വാസ്‌ത​വ​ത്തിൽ, എൻ​സൈ​ക്ലോ​പീ​ഡിയ ഓഫ്‌ റിലിജൻ ആൻഡ്‌ റിലി​ജൻസ്‌ ഇങ്ങനെ പ്രസ്‌താ​വി​ക്കു​ന്നു: “മുഹമ്മ​ദീ​യർ ബുദ്ധമ​ത​ക്കാ​രിൽനി​ന്നും ക്രിസ്‌ത്യാ​നി​കൾ കുരി​ശു​യു​ദ്ധ​ക്കാ​ലത്തു മുഹമ്മ​ദീ​യ​രിൽനി​ന്നും കൊന്ത സ്വീക​രി​ച്ച​താ​യി പറയ​പ്പെ​ടു​ന്നു.”

നിരവധി പ്രാർഥ​നകൾ ആവർത്തിച്ച്‌ ഉരുവി​ടേ​ണ്ട​തു​ള്ള​പ്പോൾ ഓർമ​യ്‌ക്കുള്ള ഒരു സഹായ​മാ​യി മാത്രം കൊന്ത ഉപകരി​ക്കു​ന്നു​വെ​ന്നാ​ണു ചിലരു​ടെ വാദം. എന്നാൽ, അതിന്റെ ഉപയോ​ഗ​ത്തിൽ ദൈവം പ്രസാ​ദി​ക്കു​ന്നു​വോ?

അത്തരം ആചാര​ങ്ങ​ളു​ടെ ഔചി​ത്യ​മോ സാധു​ത​യോ സംബന്ധി​ച്ചു നാം ഊഹാ​പോ​ഹം നടത്തേ​ണ്ട​തി​ന്റെ​യോ തർക്കി​ക്കേ​ണ്ട​തി​ന്റെ​യോ ആവശ്യ​മില്ല. എങ്ങനെ പ്രാർഥി​ക്ക​ണ​മെന്നു പഠിപ്പി​ക്കാ​നുള്ള തന്റെ അനുഗാ​മി​ക​ളു​ടെ അപേക്ഷ​യ്‌ക്ക്‌ യേശു ആധികാ​രി​ക​മായ മറുപടി നൽകി. അവൻ പറഞ്ഞതു ചില വായന​ക്കാ​രെ പ്രബു​ദ്ധ​രാ​ക്കു​ക​യും ഒരുപക്ഷേ ആശ്ചര്യ​പ്പെ​ടു​ത്തു​ക​യും ചെയ്യും.

[3-ാം പേജിലെ ചിത്രം]

കത്തോലിക്കർ പൊതു​വേ കൊന്തകൾ ഉപയോ​ഗി​ക്കു​ന്നു. അവയുടെ ഉത്ഭവ​മെ​ന്താണ്‌?