നിങ്ങൾ യഹോ​വ​യു​ടെ സ്ഥാപനത്തെ വിലമ​തി​ക്കു​ന്നു​വോ?

“യഹോവ ഇപ്രകാ​രം അരുളി​ച്ചെ​യ്യു​ന്നു: സ്വർഗ്ഗം എന്റെ സിംഹാ​സ​ന​വും ഭൂമി എന്റെ പാദപീ​ഠ​വും ആകുന്നു.”—യെശയ്യാ​വു 66:1.

1, 2. (എ) യഹോ​വ​യു​ടെ സ്ഥാപന​ത്തി​ന്റെ ഏതൊക്കെ ദൃശ്യ തെളി​വു​കൾ ചൂണ്ടി​ക്കാ​ണി​ക്കാൻ നിങ്ങൾക്കു കഴിയും? (ബി) യഹോവ വസിക്കു​ന്നത്‌ എവി​ടെ​യാണ്‌?

യഹോ​വ​യ്‌ക്ക്‌ ഒരു സ്ഥാപനം ഉണ്ടെന്നു നിങ്ങൾ വിശ്വ​സി​ക്കു​ന്നു​വോ? എങ്കിൽ, എന്തു​കൊ​ണ്ടാണ്‌ അങ്ങനെ വിശ്വ​സി​ക്കു​ന്നത്‌? നിങ്ങൾ ഇങ്ങനെ ഉത്തരം പറഞ്ഞേ​ക്കാം: ‘ഞങ്ങൾക്ക്‌ ഒരു രാജ്യ​ഹാ​ളുണ്ട്‌. മൂപ്പന്മാ​രു​ടെ ഒരു സംഘ​ത്തോ​ടു കൂടിയ സുസം​ഘ​ടി​ത​മായ ഒരു സഭയുണ്ട്‌. ഞങ്ങളെ പതിവാ​യി സന്ദർശി​ക്കുന്ന ഒരു നിയുക്ത സർക്കിട്ട്‌ മേൽവി​ചാ​ര​ക​നുണ്ട്‌. സംഘടിത സമ്മേള​ന​ങ്ങ​ളി​ലും കൺ​വെൻ​ഷ​നു​ക​ളി​ലും ഞങ്ങൾ സംബന്ധി​ക്കു​ന്നു. ഞങ്ങളുടെ രാജ്യത്ത്‌ വാച്ച്‌ ടവർ സൊ​സൈ​റ്റി​യു​ടെ ഒരു ബ്രാഞ്ച്‌ ഓഫീ​സുണ്ട്‌. തീർച്ച​യാ​യും, ഇതും മറ്റു പല കാര്യ​ങ്ങ​ളും യഹോ​വ​യ്‌ക്കു പ്രവർത്ത​ന​നി​ര​ത​മായ ഒരു സ്ഥാപന​മു​ണ്ടെ​ന്ന​തി​ന്റെ തെളി​വാണ്‌.’

² അത്തരം സംഗതി​കൾ ഒരു സ്ഥാപനം ഉണ്ട്‌ എന്നതിനു തെളിവു നൽകു​ന്ന​വ​യാണ്‌. എന്നാൽ ഭൂമി​യി​ലുള്ള കാര്യങ്ങൾ മാത്രമേ നാം കാണു​ക​യും തിരി​ച്ച​റി​യു​ക​യും ചെയ്യു​ന്നു​ള്ളു​വെ​ങ്കിൽ, യഹോ​വ​യു​ടെ സ്ഥാപന​ത്തെ​ക്കു​റിച്ച്‌ സമഗ്ര​മായ ഗ്രാഹ്യം നമുക്കു ഉണ്ടായി​രി​ക്കു​ക​യില്ല. ഭൂമി തന്റെ പാദപീ​ഠം മാത്ര​മാ​ണെന്ന്‌ യഹോവ യെശയ്യാ​വി​നോ​ടു പറഞ്ഞു. എന്നാൽ അവന്റെ സിംഹാ​സനം സ്വർഗ​മാണ്‌. (യെശയ്യാ​വു 66:1) ഏത്‌ ‘സ്വർഗ’ത്തെയാണ്‌ യഹോവ പരാമർശി​ച്ചത്‌? നമ്മുടെ അന്തരീ​ക്ഷ​ത്തെ​യാ​ണോ? ശൂന്യാ​കാ​ശ​ത്തെ​യാ​ണോ? മറ്റേ​തെ​ങ്കി​ലും ജീവമ​ണ്ഡ​ല​ത്തെ​യാ​ണോ? “വിശു​ദ്ധി​യും മഹത്വ​വു​മുള്ള” യഹോ​വ​യു​ടെ “വാസസ്ഥല”ത്തെക്കു​റിച്ച്‌ യെശയ്യാവ്‌ സംസാ​രി​ക്കു​ന്നു. സങ്കീർത്ത​ന​ക്കാ​രൻ ആ സ്വർഗത്തെ “അവൻ വസിക്കുന്ന സ്ഥാപിത സ്ഥല”മെന്നു വർണി​ക്കു​ന്നു. അതിനാൽ, യെശയ്യാ​വു 66:1-ലെ “സ്വർഗ്ഗം” പരാമർശി​ക്കു​ന്നത്‌ യഹോ​വ​യ്‌ക്കു പരമാ​ധി​കാ​ര​മുള്ള അല്ലെങ്കിൽ ആത്യന്തി​ക​മായ സ്ഥാനമുള്ള അദൃശ്യ ആത്മമണ്ഡ​ല​ത്തെ​യാണ്‌.—യെശയ്യാ​വു 63:15; സങ്കീർത്തനം 33:13, 14, NW.

3. നമുക്കു സംശയ​ങ്ങളെ എങ്ങനെ മറിക​ട​ക്കാൻ കഴിയും?

³ അതു​കൊണ്ട്‌, നാം വാസ്‌ത​വ​ത്തിൽ യഹോ​വ​യു​ടെ സ്ഥാപനത്തെ മനസ്സി​ലാ​ക്കാ​നും വിലമ​തി​ക്കാ​നും ആഗ്രഹി​ക്കു​ന്നെ​ങ്കിൽ, സ്വർഗ​ത്തി​ലേക്കു നോ​ക്കേ​ണ്ട​തുണ്ട്‌. അക്കാര്യ​ത്തിൽ ചിലരെ സംബന്ധി​ച്ചി​ട​ത്തോ​ളം ഒരു പ്രശ്‌ന​മുണ്ട്‌. യഹോ​വ​യു​ടെ സ്വർഗീയ സ്ഥാപനം അദൃശ്യ​മാ​യി​രി​ക്കു​ന്ന​തി​നാൽ വാസ്‌ത​വ​ത്തിൽ അതു സ്ഥിതി ചെയ്യു​ന്നു​വെന്ന്‌ എങ്ങനെ അറിയാൻ കഴിയും? ചിലരാ​കട്ടെ ‘എങ്ങനെ ഉറപ്പു​ണ്ടാ​യി​രി​ക്കാൻ കഴിയും?’ എന്നു ചിന്തി​ച്ചു​കൊണ്ട്‌ സന്ദേഹ​ത്തി​ന്റെ നീർച്ചു​ഴി​യിൽ അകപ്പെ​ടുക പോലും ചെയ്യുന്നു. വിശ്വാ​സ​ത്തിന്‌ എങ്ങനെ സംശയത്തെ മറിക​ട​ക്കാൻ കഴിയും? ദൈവ​വ​ചനം ഉത്സാഹ​പൂർവം വ്യക്തി​പ​ര​മാ​യി പഠിക്കു​ന്ന​തും ക്രിസ്‌തീയ യോഗ​ങ്ങ​ളിൽ പതിവാ​യി ഹാജരാ​കു​ന്ന​തും പങ്കെടു​ക്കു​ന്ന​തും ഇക്കാര്യ​ത്തി​ലെ രണ്ടു മുഖ്യ സംഗതി​ക​ളാണ്‌. അപ്പോൾ നമുക്കു സത്യത്തി​ന്റെ വെളി​ച്ച​ത്തിൽ സംശയം ദൂരീ​ക​രി​ക്കാൻ സാധി​ക്കും. സംശയങ്ങൾ ഉണ്ടായി​രുന്ന മറ്റു ദൈവ​ദാ​സ​ന്മാ​രും ഉണ്ടായി​രു​ന്നി​ട്ടുണ്ട്‌. എലീശാ​യു​ടെ ദാസന്റെ കാര്യ​മെ​ടു​ക്കാം. സിറി​യ​യു​ടെ രാജാവ്‌ ഇസ്രാ​യേ​ലി​നെ ആക്രമി​ച്ച​താണ്‌ സന്ദർഭം.—യോഹ​ന്നാൻ 20:24-29; യാക്കോബ്‌ 1:5-8 ഇവ താരത​മ്യം ചെയ്യുക.

സ്വർഗീയ സൈന്യ​ങ്ങളെ കണ്ട ഒരുവൻ

4, 5. (എ) എലീശാ​യു​ടെ ദാസന്റെ പ്രശ്‌നം എന്തായി​രു​ന്നു? (ബി) എലീശാ​യു​ടെ പ്രാർഥ​ന​യോട്‌ യഹോവ എങ്ങനെ പ്രതി​ക​രി​ച്ചു?

⁴ എലീശാ​യെ പിടി​ക്കാ​നാ​യി ഒരു കനത്ത സൈന്യ​ത്തെ​തന്നെ സിറി​യ​യു​ടെ രാജാവ്‌ ദോഥാ​നി​ലേക്ക്‌ അയച്ചു. എലീശാ​യു​ടെ ദാസൻ രാവിലെ ഉണർന്ന്‌ പുറത്തി​റങ്ങി നോക്കി​യ​പ്പോൾ—ഒരുപക്ഷേ, മധ്യപൂർവ​ദേശ രീതി​യിൽ നിർമിച്ച അവരുടെ വീടിന്റെ പരന്ന മേൽത്ത​ട്ടിൽ ശുദ്ധവാ​യു ശ്വസി​ക്കാൻ കയറി​യ​താ​കാം അവൻ—ഞെട്ടി​പ്പോ​യി! കുതി​ര​ക​ളും യുദ്ധര​ഥ​ങ്ങ​ളും അടങ്ങിയ ഒരു മുഴു സിറിയൻ സൈന്യം​തന്നെ ദൈവ​ത്തി​ന്റെ പ്രവാ​ച​കനെ പിടി​ക്കാ​നാ​യി കാത്തു​നിൽക്കു​ന്നു. ആ ദാസൻ എലീശാ​യോട്‌ ഇങ്ങനെ നിലവി​ളി​ച്ചു പറഞ്ഞു: “അയ്യോ യജമാ​നനേ, നാം എന്തു ചെയ്യും”? ‘നമ്മോടു കൂടെ​യു​ള്ളവർ അവരോ​ടു കൂടെ​യു​ള്ള​വ​രെ​ക്കാൾ അധിക​മാ​കു​ന്നു’ എന്ന്‌ വ്യക്തമാ​യും ശാന്തസ്വ​ര​ത്തിൽ, ബോധ്യ​ത്തോ​ടെ എലീശാ പ്രതി​ക​രി​ച്ചു. ‘അവർ എവിടെ? എനിക്കു കാണാൻ കഴിയു​ന്നി​ല്ല​ല്ലോ!’ എന്ന്‌ ആ ദാസൻ അതിശ​യി​ച്ചി​ട്ടു​ണ്ടാ​കാം. ചില​പ്പോൾ അതായി​രി​ക്കാം നമ്മുടെ പ്രശ്‌ന​വും—സ്വർഗീയ സൈന്യ​ങ്ങളെ ഗ്രാഹ്യ​ക്ക​ണ്ണു​കൾകൊണ്ട്‌ കാണാൻ, ദർശി​ക്കാൻ നാം പരാജ​യ​പ്പെ​ടു​ന്നു​ണ്ടാ​കാം.—2 രാജാ​ക്ക​ന്മാർ 6:8-16; എഫെസ്യർ 1:18.

⁵ തന്റെ ദാസന്റെ കണ്ണു തുറപ്പി​ക്കാൻ എലീശാ പ്രാർഥി​ച്ചു. പിന്നെ എന്താണു സംഭവി​ച്ചത്‌? “യഹോവ ബാല്യ​ക്കാ​രന്റെ കണ്ണു തുറന്നു; എലീശാ​യു​ടെ ചുററും അഗ്നിമ​യ​മായ കുതി​ര​ക​ളും രഥങ്ങളും​കൊ​ണ്ടു മല നിറഞ്ഞി​രി​ക്കു​ന്നതു അവൻ കണ്ടു.” (2 രാജാ​ക്ക​ന്മാർ 6:17) അതേ, ദൈവ​ത്തി​ന്റെ പ്രവാ​ച​കനെ രക്ഷിക്കാ​നാ​യി നിൽക്കുന്ന സ്വർഗീയ സംഘങ്ങളെ, ദൂത​സൈ​ന്യ​ങ്ങളെ അവൻ കണ്ടു. ഇപ്പോൾ അവന്‌ എലീശാ​യു​ടെ ബോധ്യം മനസ്സി​ലാ​ക്കാൻ കഴിഞ്ഞു.

6. യഹോ​വ​യു​ടെ സ്വർഗീയ സ്ഥാപന​ത്തെ​ക്കു​റിച്ച്‌ നമുക്ക്‌ എങ്ങനെ ഉൾക്കാഴ്‌ച നേടാൻ കഴിയും?

⁶ എലീശാ​യു​ടെ ദാസ​ന്റേ​തി​നു സമാന​മായ ഒരു ഗ്രാഹ്യ പ്രശ്‌നം നമുക്കു ചില​പ്പോൾ ഉണ്ടാകാ​റു​ണ്ടോ? ചില ദേശങ്ങ​ളിൽ നമുക്കോ ക്രിസ്‌തീയ വേലയ്‌ക്കോ ഭീഷണി​യാ​യി നില​കൊ​ള്ളുന്ന സാഹച​ര്യ​ങ്ങ​ളു​ടെ ഭൗതിക വശം മാത്രമേ നാം കാണു​ന്നു​ള്ളോ? എങ്കിൽ നമുക്കു വെളിച്ചം പകർന്നേ​ക്കാ​വുന്ന ഒരു പ്രത്യേക ദർശനം നാം പ്രതീ​ക്ഷി​ക്കേ​ണ്ട​തു​ണ്ടോ? ഇല്ല. കാരണം, എലീശാ​യു​ടെ ദാസനി​ല്ലാ​തി​രുന്ന ചില സംഗതി​കൾ നമുക്കുണ്ട്‌—അനേക ദർശനങ്ങൾ അടങ്ങി​യി​രി​ക്കുന്ന ബൈബിൾ. അതിനു സ്വർഗീയ സ്ഥാപന​ത്തെ​ക്കു​റി​ച്ചുള്ള ഉൾക്കാഴ്‌ച നമുക്കു പ്രദാനം ചെയ്യാൻ കഴിയും. നമ്മുടെ ചിന്തയും ജീവി​ത​രീ​തി​യും നേരെ​യാ​ക്കു​ന്ന​തി​നുള്ള മാർഗ​നിർദേശക തത്ത്വങ്ങൾ അതു നൽകുന്നു. എന്നിരു​ന്നാ​ലും, നാം വിവേ​ക​ത്തി​നാ​യി അന്വേ​ഷി​ക്കാ​നും യഹോ​വ​യു​ടെ ക്രമീ​ക​ര​ണ​ത്തോ​ടു വിലമ​തിപ്പ്‌ നട്ടുവ​ളർത്താ​നും ശ്രമി​ക്കേ​ണ്ട​തുണ്ട്‌. വ്യക്തി​പ​ര​മായ പഠനം, പ്രാർഥന, ധ്യാനം എന്നീ കാര്യ​ങ്ങ​ളാൽ നമുക്ക്‌ അതു ചെയ്യാ​നാ​കും.—റോമർ 12:12, 13; ഫിലി​പ്പി​യർ 4:6; 2 തിമൊ​ഥെ​യൊസ്‌ 3:14-17.

ഗ്രഹി​ക്കു​ന്ന​തി​നാ​യി പഠിക്കൽ

7. (എ) വ്യക്തി​പ​ര​മായ ബൈബിൾ പഠനത്തി​ന്റെ കാര്യ​ത്തിൽ ചിലർക്ക്‌ എന്തു പ്രശ്‌നം ഉണ്ടായി​രി​ക്കാം? (ബി) വ്യക്തി​പ​ര​മായ പഠനം ശ്രമത്തി​നു തക്ക മൂല്യ​മു​ള്ള​താ​യി​രി​ക്കു​ന്നത്‌ എന്തു​കൊണ്ട്‌?

⁷ ഒരിക്ക​ലും സ്‌കൂ​ളിൽ പോയി​ട്ടി​ല്ലാ​ത്ത​വ​രെ​യോ പഠിക്കാൻ അവസരം ലഭിച്ചി​ട്ടി​ല്ലാ​ത്ത​വ​രെ​യോ പോലുള്ള അനേകരെ സംബന്ധി​ച്ചി​ട​ത്തോ​ള​വും വ്യക്തി​പ​ര​മായ പഠനം ആസ്വാ​ദ്യ​മായ ഒരു സംഗതി​യല്ല. എങ്കിലും, ഗ്രാഹ്യ​ക്ക​ണ്ണു​കൾകൊ​ണ്ടു നാം യഹോ​വ​യു​ടെ സ്ഥാപനത്തെ കാണാ​നും വിലമ​തി​ക്കാ​നും ആഗ്രഹി​ക്കു​ന്നു എങ്കിൽ, പഠിക്കാ​നുള്ള ആഗ്രഹം നാം നട്ടുവ​ളർത്തണം. പാകം ചെയ്യാതെ ഒരു സ്വാദിഷ്ട ഭോജനം നിങ്ങൾക്ക്‌ ആസ്വദി​ക്കാൻ കഴിയു​മോ? രുചി​ക​ര​മായ ഭക്ഷണം പാകം ചെയ്യു​ന്ന​തിൽ ധാരാളം ജോലി​കൾ ഉൾപ്പെ​ട്ടി​രി​ക്കു​ന്ന​താ​യി ഒരു പാചക​ക്കാ​രൻ നിങ്ങ​ളോ​ടു പറയും. എന്നാൽ, അതു തിന്നു​തീർക്കാൻ അര മണിക്കൂ​റോ അതിൽ താഴെ​യോ സമയം മതി. നേരേ​മ​റിച്ച്‌, വ്യക്തി​പ​ര​മായ പഠനത്തി​ന്റെ പ്രയോ​ജ​നങ്ങൾ ആയുഷ്‌കാ​ലം മുഴുവൻ നീണ്ടു​നിൽക്കു​ന്ന​വ​യാണ്‌. വരുത്താൻ കഴിയുന്ന പുരോ​ഗതി ദർശി​ക്കു​മ്പോൾ, വ്യക്തി​പ​ര​മായ പഠനത്തെ ക്രമേണ ആസ്വാ​ദ്യ​മായ ഒരു അനുഭവം ആക്കിത്തീർക്കാൻ നമുക്കു കഴിയും. നാം, നമുക്കും നമ്മുടെ പഠിപ്പി​ക്ക​ലി​നും നിരന്തര ശ്രദ്ധ കൊടു​ക്ക​ണ​മെ​ന്നും പരസ്യ വായന​യ്‌ക്കു നമ്മെത്തന്നെ അർപ്പി​ക്ക​ണ​മെ​ന്നും അപ്പോ​സ്‌ത​ല​നായ പൗലൊസ്‌ സമുചി​ത​മാ​യി പറഞ്ഞു. നിരന്തര ശ്രമം അനിവാ​ര്യ​മാണ്‌. എന്നാൽ പ്രയോ​ജ​നങ്ങൾ നിത്യ​മാ​യി​രി​ക്കാം.—1 തിമൊ​ഥെ​യൊസ്‌ 4:13-16.

8. എങ്ങനെ​യുള്ള മനോ​ഭാ​വ​മാണ്‌ സദൃശ​വാ​ക്യ​ങ്ങൾ ശുപാർശ ചെയ്യു​ന്നത്‌?

⁸ പുരാതന കാലത്തെ ജ്ഞാനി​യായ ഒരു മനുഷ്യൻ പറഞ്ഞു: “മകനേ [അല്ലെങ്കിൽ, മകളേ], ജ്ഞാനത്തി​ന്നു ചെവി​കൊ​ടു​ക്ക​യും ബോധ​ത്തി​ന്നു നിന്റെ ഹൃദയം ചായി​ക്ക​യും ചെയ്യേ​ണ്ട​തി​ന്നു എന്റെ വചനങ്ങളെ കൈ​ക്കൊ​ണ്ടു എന്റെ കല്‌പ​ന​കളെ നിന്റെ ഉള്ളിൽ സംഗ്ര​ഹി​ച്ചാൽ, നീ ബോധ​ത്തി​ന്നാ​യി വിളിച്ചു വിവേ​ക​ത്തി​ന്നാ​യി ശബ്ദം ഉയർത്തു​ന്നു എങ്കിൽ, അതിനെ വെള്ളി​യെ​പ്പോ​ലെ അന്വേ​ഷി​ച്ചു നിക്ഷേ​പ​ങ്ങ​ളെ​പ്പോ​ലെ തിരയു​ന്നു എങ്കിൽ, നീ യഹോ​വാ​ഭക്തി ഗ്രഹി​ക്ക​യും ദൈവ​പ​രി​ജ്ഞാ​നം കണ്ടെത്തു​ക​യും ചെയ്യും.”—സദൃശ​വാ​ക്യ​ങ്ങൾ 2:1-5.

9. (എ) “ദൈവ​പ​രി​ജ്ഞാന”ത്തോടുള്ള താരത​മ്യ​ത്തിൽ സ്വർണ​ത്തി​ന്റെ മൂല്യം എത്രയുണ്ട്‌? (ബി) സൂക്ഷ്‌മ​പ​രി​ജ്ഞാ​നം നേടു​ന്ന​തിന്‌ ഏത്‌ ഉപകര​ണങ്ങൾ നമുക്ക്‌ ആവശ്യ​മാണ്‌?

⁹ ഉത്തരവാ​ദി​ത്വം എവി​ടെ​യാ​ണു കിടക്കു​ന്ന​തെന്നു നിങ്ങൾക്ക്‌ അറിയാ​മോ? ‘നീ, എങ്കിൽ’ എന്ന പദപ്ര​യോ​ഗം അതിൽ ആവർത്തി​ച്ചു വരുന്നുണ്ട്‌. ‘അതിനെ നിക്ഷേ​പ​ങ്ങ​ളെ​പ്പോ​ലെ തിരയു​ന്നു എങ്കിൽ’ എന്ന പ്രയോ​ഗം ശ്രദ്ധി​ക്കുക. ദക്ഷിണാ​ഫ്രി​ക്ക​യി​ലും ബൊളീ​വി​യ​യി​ലും മെക്‌സി​ക്കോ​യി​ലും മറ്റു രാജ്യ​ങ്ങ​ളി​ലു​മൊ​ക്കെ നൂറ്റാ​ണ്ടു​ക​ളാ​യി വെള്ളി​ക്കും സ്വർണ​ത്തി​നും വേണ്ടി ഖനനം നടത്തി​യി​ട്ടുള്ള ഖനി​വേ​ല​ക്കാ​രെ​ക്കു​റി​ച്ചു ചിന്തി​ച്ചു​നോ​ക്കുക. വില​യേ​റിയ ആ ലോഹങ്ങൾ കിട്ടാൻ വേണ്ടി പിക്കാ​സും കോരി​ക​യും ഉപയോ​ഗിച്ച്‌ പാറ കുഴി​ച്ചു​കൊണ്ട്‌ അവർ കഠിന​മാ​യി അധ്വാ​നി​ച്ചു. അവർ സ്വർണ​ത്തി​നു വളരെ​യ​ധി​കം മൂല്യം കൽപ്പി​ച്ചി​രു​ന്നു. അതു​കൊണ്ട്‌ അവർ യു.എസ്‌.എ.-യിലെ കാലി​ഫോർണി​യ​യി​ലുള്ള ഒരു ഖനിയിൽ 591 കിലോ​മീ​റ്റർ ദൂരത്തിൽ തുരങ്കങ്ങൾ കുഴിച്ചു, അവർ കുത്തനെ 1.5 കിലോ​മീ​റ്റർ താഴേക്കു പോലും കുഴി​ച്ചു​ചെന്നു—സ്വർണം കണ്ടെത്തു​ന്ന​തി​നു വേണ്ടി മാത്രം. എന്നാൽ, നിങ്ങൾക്കു സ്വർണം ഭക്ഷിക്കാ​നാ​കു​മോ? സ്വർണം കുടി​ക്കാ​നാ​കു​മോ? മരുഭൂ​മി​യിൽ വിശപ്പും ദാഹവും മൂലം മരിക്കു​ക​യാ​ണെ​ങ്കിൽ അതിനു നിങ്ങളെ സംരക്ഷി​ക്കാ​നാ​കു​മോ? ഇല്ല, അതിന്റെ മൂല്യം കൽപ്പി​ത​വും ഐച്ഛി​ക​വു​മാണ്‌. വ്യക്തി​കൾക്ക്‌ അനുസ​രിച്ച്‌ അതിനു മാറ്റം വരുന്നു. പ്രതി​ദി​നം അന്തർദേ​ശീയ കമ്പോ​ള​ത്തിൽ അതിന്റെ മൂല്യ​ത്തി​നു വ്യതി​ച​ലനം സംഭവി​ക്കു​ന്നു. എങ്കിലും, മനുഷ്യർ അതിനു വേണ്ടി മരിച്ചി​ട്ടുണ്ട്‌. ആ സ്ഥിതിക്ക്‌ ആത്മീയ സ്വർണ​മായ “ദൈവ​പ​രി​ജ്ഞാ​നം” നേടു​ന്നത്‌ എത്രയ​ധി​കം ശ്രമത്തി​നു​തക്ക മൂല്യ​മുള്ള ഒരു സംഗതി​യാണ്‌? ഒന്നു ചിന്തി​ച്ചു​നോ​ക്കൂ, അഖിലാ​ണ്ഡ​ത്തി​ന്റെ പരമാ​ധി​കാ​രി​യാം കർത്താ​വി​നെ​ക്കു​റി​ച്ചുള്ള, അവന്റെ സ്ഥാപന​ത്തെ​ക്കു​റി​ച്ചുള്ള, അവന്റെ ഉദ്ദേശ്യ​ങ്ങ​ളെ​ക്കു​റി​ച്ചുള്ള പരിജ്ഞാ​നം! ഇക്കാര്യ​ത്തിൽ നമുക്ക്‌ ആത്മീയ പിക്കാ​സും കോരി​ക​ക​ളും ഉപയോ​ഗി​ക്കാം. യഹോ​വ​യു​ടെ വചനത്തി​ലേക്കു കുഴി​ച്ചി​റ​ങ്ങി​ച്ചെ​ല്ലാ​നും അതിന്റെ അർഥം ഗ്രഹി​ക്കാ​നും നമ്മെ സഹായി​ക്കുന്ന ബൈബി​ള​ധി​ഷ്‌ഠിത പ്രസി​ദ്ധീ​ക​ര​ണ​ങ്ങ​ളാണ്‌ അവ.—ഇയ്യോബ്‌ 28:12-19.

ഉൾക്കാ​ഴ്‌ച​യ്‌ക്കാ​യി കുഴിക്കൽ

10. ദർശന​ത്തിൽ ദാനീ​യേൽ എന്താണ്‌ കണ്ടത്‌?

¹⁰ യഹോ​വ​യു​ടെ സ്വർഗീയ സ്ഥാപന​ത്തെ​ക്കു​റി​ച്ചുള്ള അറിവു ലഭിച്ചു​തു​ട​ങ്ങാൻ നമുക്ക്‌ ആത്മീയ​മാ​യി അൽപ്പം കുഴിക്കൽ നടത്താം. മർമ​പ്ര​ധാ​ന​മായ ഒരു ഉൾക്കാ​ഴ്‌ച​യ്‌ക്കാ​യി സിംഹാ​സ​ന​സ്ഥ​നായ, നാളു​ക​ളിൽ പുരാ​ത​ന​നെ​ക്കു​റി​ച്ചുള്ള ദാനീ​യേ​ലി​ന്റെ ദർശനം നമുക്കു പരി​ശോ​ധി​ക്കാം. ദാനീ​യേൽ ഇങ്ങനെ എഴുതു​ന്നു: “ഞാൻ നോക്കി​ക്കൊ​ണ്ടി​രി​ക്കെ അവർ ന്യായാ​സ​ന​ങ്ങളെ വെച്ചു. വയോ​ധി​ക​നായ ഒരുത്തൻ [“നാളുകൾ സംബന്ധി​ച്ചു പുരാ​തനൻ,” NW] ഇരുന്നു. അവന്റെ വസ്‌ത്രം ഹിമം​പോ​ലെ വെളു​ത്ത​തും അവന്റെ തലമുടി നിർമ്മ​ല​മായ ആട്ടു​രോ​മം​പോ​ലെ​യും അവന്റെ സിംഹാ​സനം അഗ്നിജ്വാ​ല​യും അവന്റെ രഥച​ക്രങ്ങൾ കത്തുന്ന തീയും ആയിരു​ന്നു. ഒരു അഗ്നിനദി അവന്റെ മുമ്പിൽനി​ന്നു പുറ​പ്പെട്ടു ഒഴുകി; ആയിര​മാ​യി​രം പേർ അവന്നു ശുശ്രൂ​ഷ​ചെ​യ്‌തു; പതിനാ​യി​രം പതിനാ​യി​രം പേർ അവന്റെ മുമ്പാകെ നിന്നു; ന്യായ​വി​സ്‌താ​രസഭ ഇരുന്നു; പുസ്‌ത​കങ്ങൾ തുറന്നു.” (ദാനീ​യേൽ 7:9, 10) യഹോ​വയെ ശുശ്രൂ​ഷി​ച്ചു​കൊ​ണ്ടി​രി​ക്കുന്ന ആ ആയിരങ്ങൾ ആരായി​രു​ന്നു? പുതി​യ​ലോക ഭാഷാ​ന്ത​ര​ത്തി​ന്റെ മാർജി​നി​ലെ ‘പിക്കാ​സും കോരി​ക​യും’ പോലുള്ള റഫറൻസു​കൾ നമ്മെ സങ്കീർത്തനം 68:17-ലേക്കും എബ്രായർ 1:14-ലേക്കും നയിക്കു​ന്നു. അതേ, ശുശ്രൂ​ഷി​ച്ചു കൊണ്ടി​രു​ന്നവർ സ്വർഗീയ ദൂതന്മാർ തന്നേ!

11. എലീശാ​യു​ടെ വാക്കുകൾ മനസ്സി​ലാ​ക്കാൻ ദാനീ​യേ​ലി​ന്റെ ദർശനം നമ്മെ എങ്ങനെ സഹായി​ക്കു​ന്നു?

¹¹ ദൈവം കൽപ്പി​ച്ചാ​ക്കി​യി​രി​ക്കുന്ന വിശ്വസ്‌ത ദൂതന്മാ​രെ​യെ​ല്ലാം താൻ കണ്ടു​വെന്നു ദാനീ​യേ​ലി​ന്റെ വിവരണം പറയു​ന്നില്ല. ഒരുപക്ഷേ ഇനിയും കോടി​കൾ കണ്ടേക്കാം. ‘നമ്മോടു കൂടെ​യു​ള്ളവർ അവരോ​ടു കൂടെ​യു​ള്ള​വ​രെ​ക്കാൾ അധിക​മാ​കു​ന്നു’ എന്ന്‌ എലീശാ​യ്‌ക്കു പറയാൻ കഴിഞ്ഞത്‌ എന്തു​കൊ​ണ്ടെന്ന്‌ നമുക്കു തീർച്ച​യാ​യും മനസ്സി​ലാ​ക്കാൻ കഴിയും. അവിശ്വസ്‌ത ദൂതന്മാ​രു​ടെ അതായത്‌ ഭൂതങ്ങ​ളു​ടെ പിന്തു​ണ​യു​ണ്ടാ​യി​രുന്ന സിറി​യ​യി​ലെ രാജാ​വി​ന്റെ സൈന്യ​ത്തെ​ക്കാൾ അധികം വരുന്ന​താ​യി​രു​ന്നു യഹോ​വ​യു​ടെ സ്വർഗീയ സൈന്യ​ങ്ങൾ!—സങ്കീർത്തനം 34:7; 91:11.

12. ദൂതന്മാ​രെ​ക്കു​റിച്ച്‌ കൂടുതൽ അറിയാൻ എങ്ങനെ കഴിയും?

¹² ഈ ദൂതന്മാ​രെ​ക്കു​റിച്ച്‌, യഹോ​വയെ സേവി​ക്കു​ന്ന​തിൽ അവർ വഹിക്കുന്ന പങ്കി​നെ​ക്കു​റിച്ച്‌ കൂടുതൽ അറിയാൻ ഒരുപക്ഷേ നിങ്ങൾ ആഗ്രഹി​ക്കു​ന്നു​ണ്ടാ​കാം. ദൂതൻ എന്നതി​നുള്ള ഗ്രീക്കു പദത്തിൽനിന്ന്‌ അവർ സന്ദേശ​വാ​ഹ​ക​രാ​ണെന്ന്‌ നമുക്ക​റി​യാം, കാരണം “സന്ദേശ​വാ​ഹകൻ” എന്ന അർഥവും അതിനുണ്ട്‌. എന്നിരു​ന്നാ​ലും, അവരുടെ ചുമത​ല​ക​ളിൽ അതിലും കൂടുതൽ കാര്യങ്ങൾ അടങ്ങി​യി​രി​ക്കു​ന്നു. അത്‌ എന്താ​ണെന്നു മനസ്സി​ലാ​ക്കാൻ നാം കുഴിച്ചു നോ​ക്കേ​ണ്ട​തുണ്ട്‌. തിരു​വെ​ഴു​ത്തു​കൾ സംബന്ധിച്ച ഉൾക്കാഴ്‌ച (ഇംഗ്ലീഷ്‌) എന്ന പുസ്‌തകം നിങ്ങൾക്കു​ണ്ടെ​ങ്കിൽ, അതിൽ “ദൂതന്മാർ” എന്ന ലേഖനം പഠിക്കാ​നാ​കും. അല്ലെങ്കിൽ, ദൂതന്മാ​രെ​ക്കു​റിച്ച്‌ വീക്ഷാ​ഗോ​പു​ര​ത്തിൽ വന്നിട്ടുള്ള മുൻല​ക്കങ്ങൾ പരി​ശോ​ധി​ക്കാ​വു​ന്ന​താണ്‌. ദൈവ​ത്തി​ന്റെ ഈ സ്വർഗീയ ദാസന്മാ​രെ​ക്കു​റിച്ച്‌ നിങ്ങൾ പഠിക്കുന്ന വിവരങ്ങൾ നിങ്ങളെ അമ്പരപ്പി​ക്കും. അവരുടെ പിന്തു​ണയെ നിങ്ങൾ വിലമ​തി​ക്കാ​നും ഇടയാ​യി​ത്തീ​രും. (വെളി​പ്പാ​ടു 14:6, 7) എന്നിരു​ന്നാ​ലും, ദൈവ​ത്തി​ന്റെ സ്വർഗീയ സ്ഥാപന​ത്തിൽ ചില ആത്മജീ​വി​കൾ പ്രത്യേക ഉദ്ദേശ്യ​ങ്ങൾക്കാ​യി സേവി​ക്കു​ന്നു.

യെശയ്യാ​വു കണ്ടത്‌

13, 14. ദർശന​ത്തിൽ യെശയ്യാവ്‌ എന്താണു കണ്ടത്‌, അത്‌ അവനെ എങ്ങനെ ബാധിച്ചു?

¹³ ഇനി യെശയ്യാ​വി​ന്റെ ദർശന​ത്തി​ലേക്കു നമുക്ക്‌ അൽപ്പം കുഴി​ച്ചി​റ​ങ്ങി​ച്ചെ​ല്ലാം. 6-ാം അധ്യാ​യ​ത്തി​ന്റെ 1 മുതൽ 7 വരെയുള്ള വാക്യങ്ങൾ വായി​ക്കു​മ്പോൾ നിങ്ങൾക്കു മതിപ്പു തോ​ന്നേ​ണ്ട​താണ്‌. ‘[യഹോവ] സിംഹാ​സ​ന​ത്തിൽ ഇരിക്കുന്ന’തായും ‘സാറാ​ഫു​കൾ അവനു ചുറ്റും നിൽക്കു​ന്ന​താ​യും’ താൻ കണ്ടതായി യെശയ്യാവ്‌ പറയുന്നു. അവർ യഹോ​വ​യു​ടെ വിശു​ദ്ധി​യെ വാഴ്‌ത്തി​ക്കൊണ്ട്‌ അവന്റെ മഹത്ത്വ​ത്തെ​ക്കു​റി​ച്ചു വിളി​ച്ചു​പ​റ​യു​ക​യാ​യി​രു​ന്നു. ആ വിവര​ണ​ത്തി​ന്റെ വായന​തന്നെ നിങ്ങളെ ബാധി​ക്കേ​ണ്ട​താണ്‌. യെശയ്യാ​വി​ന്റെ പ്രതി​ക​രണം എന്തായി​രു​ന്നു? “അപ്പോൾ ഞാൻ: എനിക്കു അയ്യോ കഷ്ടം; ഞാൻ [ഷിയോ​ളിൽ] നശിച്ചു; ഞാൻ ശുദ്ധി​യി​ല്ലാത്ത അധരങ്ങൾ ഉള്ളോരു മനുഷ്യൻ; ശുദ്ധി​യി​ല്ലാത്ത അധരങ്ങൾ ഉള്ള ജനത്തിന്റെ നടുവിൽ വസിക്കു​ന്നു; എന്റെ കണ്ണു സൈന്യ​ങ്ങ​ളു​ടെ യഹോ​വ​യായ രാജാ​വി​നെ കണ്ടുവ​ല്ലോ എന്നു പറഞ്ഞു.” ആ ദർശനം അവനിൽ എത്രയ​ധി​കം മതിപ്പ്‌ ഉളവാ​ക്കി​യെ​ന്നോ! നിങ്ങളി​ലോ?

¹⁴ ഈ മഹത്തായ ദർശനം കണ്ടുനിൽക്കാൻ യെശയ്യാ​വിന്‌ എങ്ങനെ കഴിഞ്ഞു? അപ്പോൾ ഒരു സാറാഫ്‌ അവന്റെ രക്ഷയ്‌ക്കെത്തി ഇങ്ങനെ പറയു​ന്ന​താ​യി അവൻ വിശദീ​ക​രി​ക്കു​ന്നു: “നിന്റെ അകൃത്യം നീങ്ങി നിന്റെ പാപത്തി​ന്നു പരിഹാ​രം വന്നിരി​ക്കു​ന്നു.” (യെശയ്യാ​വു 6:7) യെശയ്യാ​വിന്‌ ദൈവ​ത്തി​ന്റെ കരുണ​യിൽ ആശ്രയി​ക്കാ​നും യഹോ​വ​യു​ടെ വാക്കു​കൾക്കു ശ്രദ്ധ കൊടു​ക്കാ​നും കഴിഞ്ഞു. ഇപ്പോൾ, ഈ ഉന്നത നിലയി​ലുള്ള ആത്മജീ​വി​ക​ളെ​ക്കു​റിച്ച്‌ കൂടുതൽ അറിയാൻ നിങ്ങൾക്ക്‌ ആഗ്രഹ​മി​ല്ലേ? എങ്കിൽ നിങ്ങൾ എന്തു ചെയ്യണം? കൂടുതൽ വിവര​ങ്ങൾക്കാ​യി കുഴി​ക്കുക. ഉപയോ​ഗി​ക്കാൻ കഴിയുന്ന ഒരു ഉപകരണം വാച്ച്‌ ടവർ പ്രസി​ദ്ധീ​കരണ സൂചിക (ഇംഗ്ലീഷ്‌) ആണ്‌. കൂടുതൽ വിശദാം​ശങ്ങൾ നൽകുന്ന അനേകം വിവര​ങ്ങ​ളു​ടെ ഉറവിടം കണ്ടെത്താൻ അതിലെ പരാമർശങ്ങൾ ഉപയോ​ഗി​ക്കുക.

യെഹെ​സ്‌കേൽ എന്താണു കണ്ടത്‌?

15. യെഹെ​സ്‌കേ​ലി​ന്റെ ദർശനം ആശ്രയ​യോ​ഗ്യ​മാ​ണെന്ന്‌ എന്തു സൂചി​പ്പി​ക്കു​ന്നു?

¹⁵ അടുത്ത​താ​യി മറ്റൊരു തരം ആത്മസൃ​ഷ്ടി​യെ​ക്കു​റി​ച്ചു നമുക്കു പരിചി​ന്തി​ക്കാം. ബാബി​ലോ​നിൽ ബന്ദിയാ​യി​രി​ക്കെ യെഹെ​സ്‌കേ​ലി​നു പ്രചോ​ദ​നാ​ത്മ​ക​മായ ഒരു ദർശനം കാണു​ന്ന​തി​നുള്ള പദവി ലഭിച്ചു. ബൈബി​ളിൽ യെഹെ​സ്‌കേൽ 1-ാം അധ്യായം തുറന്ന്‌ ആദ്യത്തെ മൂന്നു വാക്യങ്ങൾ പരി​ശോ​ധി​ക്കുക. ആ വിവരണം എങ്ങനെ​യാ​ണു തുടങ്ങു​ന്നത്‌? ‘ഒരിക്കൽ, ഒരിട​ത്തു​വെച്ച്‌ . . . ’ എന്നു പറഞ്ഞു​കൊ​ണ്ടാ​ണോ? അല്ല, ഏതോ പൗരാ​ണിക സാങ്കൽപ്പിക കഥയല്ല അത്‌. 1-ാം വാക്യം ഇങ്ങനെ പ്രസ്‌താ​വി​ക്കു​ന്നു: “മുപ്പതാം ആണ്ടു നാലാം മാസം അഞ്ചാം തിയ്യതി ഞാൻ കെബാർന​ദീ​തീ​രത്തു പ്രവാ​സി​ക​ളു​ടെ ഇടയിൽ ഇരിക്കു​മ്പോൾ സ്വർഗ്ഗം തുറന്നു ഞാൻ ദിവ്യ​ദർശ​ന​ങ്ങളെ കണ്ടു.” ഈ വാക്യ​ത്തിൽ നിങ്ങൾ എന്താണു കാണു​ന്നത്‌? അതു കൃത്യ​മായ തീയതി​യും കൃത്യ​മായ സ്ഥലവും നൽകുന്നു. ആ വിശദാം​ശങ്ങൾ വിരൽ ചൂണ്ടു​ന്നത്‌ യെഹോ​യാ​ഖീൻ രാജാ​വി​ന്റെ പ്രവാ​സ​ത്തി​ന്റെ അഞ്ചാം വർഷമായ പൊ.യു.മു. 613-ലേക്കാണ്‌.

16. യെഹെ​സ്‌കേൽ എന്താണു കണ്ടത്‌?

¹⁶ യഹോ​വ​യു​ടെ കൈ യെഹെ​സ്‌കേ​ലി​ന്റെ​മേൽ വന്നു, അരികു​പ​ട്ട​ക​ളി​ലെ​ങ്ങും കണ്ണുക​ളുള്ള കൂറ്റൻ ചക്രങ്ങ​ളു​ണ്ടാ​യി​രുന്ന ഒരു വലിയ സ്വർഗീയ രഥത്തിൽ സിംഹാ​സ​ന​സ്ഥ​നാ​യി​രി​ക്കുന്ന യഹോ​വ​യു​ടെ ഭയജന​ക​മായ ദർശനം അവൻ കാണാൻ തുടങ്ങി. ഇവിടെ നമുക്കു ലഭിക്കുന്ന രസകര​മായ വിശദാം​ശം നാലു ജീവി​ക​ളു​ടേ​താണ്‌. അവയി​ലോ​രോ​ന്നും ഓരോ ചക്രത്തി​ന്റെ​യും അടുക്കൽ നിൽക്കു​ന്നു. “അവയുടെ രൂപമോ: അവെക്കു മനുഷ്യ​സാ​ദൃ​ശ്യം ഉണ്ടായി​രു​ന്നു. ഓരോ​ന്നി​ന്നു നന്നാലു മുഖവും നന്നാലു ചിറകും ഉണ്ടായി​രു​ന്നു. . . . അവയുടെ മുഖരൂ​പ​മോ; അവെക്കു മനുഷ്യ​മു​ഖം ഉണ്ടായി​രു​ന്നു; നാലി​ന്നും വലത്തു​ഭാ​ഗത്തു സിംഹ​മു​ഖ​വും ഇടത്തു​ഭാ​ഗത്തു കാളമു​ഖ​വും ഉണ്ടായി​രു​ന്നു; നാലി​ന്നും കഴുകു​മു​ഖ​വും ഉണ്ടായി​രു​ന്നു.”—യെഹെ​സ്‌കേൽ 1:5, 6, 10.

17. കെരൂ​ബു​ക​ളു​ടെ നാലു മുഖങ്ങൾ എന്തിനെ പ്രതി​നി​ധാ​നം ചെയ്യുന്നു?

¹⁷ ആ നാലു ജീവികൾ എന്തായി​രു​ന്നു? അവ കെരൂ​ബു​കൾ ആയിരു​ന്നു​വെന്ന്‌ യെഹെ​സ്‌കേൽതന്നെ നമ്മോടു പറയുന്നു. (യെഹെ​സ്‌കേൽ 10:1-3, 14) അവയ്‌ക്കു നാലു മുഖങ്ങൾ ഉണ്ടായി​രു​ന്നത്‌ എന്തു​കൊണ്ട്‌? പരമാ​ധി​കാ​രി​യാം കർത്താ​വായ യഹോ​വ​യു​ടെ നാലു പ്രമുഖ ഗുണങ്ങളെ പ്രതി​നി​ധാ​നം ചെയ്യു​ന്ന​തിന്‌. കഴുകന്റെ മുഖം ദീർഘ വീക്ഷണ​ത്തോ​ടെ​യുള്ള ജ്ഞാനത്തി​ന്റെ പ്രതീ​ക​മാ​യി​രു​ന്നു. (ഇയ്യോബ്‌ 39:27-29) കാളയു​ടെ മുഖം പ്രതി​നി​ധാ​നം ചെയ്‌തത്‌ എന്താണ്‌? കഴുത്തി​നും തോളു​കൾക്കും അപാര ശക്തിയുള്ള ഒരു പോർക്കാള ഒരു കുതി​ര​യെ​യും അതിന്റെ സവാരി​ക്കാ​ര​നെ​യും പൊക്കി​യെ​റി​ഞ്ഞ​താ​യി റിപ്പോർട്ടുണ്ട്‌. തീർച്ച​യാ​യും, യഹോ​വ​യു​ടെ അപരി​മേയ ശക്തിയു​ടെ പ്രതീ​ക​മാണ്‌ കാള. ധീരമായ നീതി​യു​ടെ ഒരു പ്രതീ​ക​മാ​യി സിംഹത്തെ ഉപയോ​ഗി​ച്ചി​രി​ക്കു​ന്നു. ഒടുവിൽ, മനുഷ്യ​മു​ഖം സമുചി​ത​മാ​യി ദൈവ​സ്‌നേ​ഹത്തെ പ്രതി​നി​ധാ​നം ചെയ്യുന്നു. കാരണം, ബുദ്ധി​പൂർവം ഈ ഗുണം പ്രകട​മാ​ക്കാൻ കഴിയുന്ന ഏക ഭൗമിക സൃഷ്ടി മനുഷ്യ​നാണ്‌.—മത്തായി 22:37, 39; 1 യോഹ​ന്നാൻ 4:8.

18. അപ്പോ​സ്‌ത​ല​നായ യോഹ​ന്നാൻ സ്വർഗീയ സ്ഥാപന​ത്തെ​ക്കു​റി​ച്ചുള്ള നമ്മുടെ ഗ്രാഹ്യം വർധി​പ്പി​ക്കു​ന്നത്‌ എങ്ങനെ?

¹⁸ ആ ചിത്രം പൂർത്തി​യാ​ക്കാൻ നമ്മെ സഹായി​ക്കുന്ന മറ്റു ദർശന​ങ്ങ​ളു​മുണ്ട്‌. ബൈബി​ളി​ലെ വെളി​പ്പാ​ടു പുസ്‌ത​ക​ത്തിൽ കൊടു​ത്തി​രി​ക്കുന്ന യോഹ​ന്നാ​ന്റെ ദർശനങ്ങൾ അവയിൽ പെടുന്നു. യെഹെ​സ്‌കേ​ലി​നെ​പ്പോ​ലെ, അവനും യഹോവ മഹത്ത്വ​മുള്ള സിംഹാ​സ​ന​ത്തിൽ, കെരൂ​ബു​ക​ളു​ടെ സാന്നി​ധ്യ​ത്തിൽ ഇരിക്കു​ന്ന​താ​യി കണ്ടു. ആ കെരൂ​ബു​കൾ എന്താണു ചെയ്‌തു​കൊ​ണ്ടി​രു​ന്നത്‌? യെശയ്യാ​വു 6-ാം അധ്യാ​യ​ത്തി​ലെ സാറാ​ഫു​ക​ളു​ടെ ഉദ്‌ഘോ​ഷം അവർ ആവർത്തി​ക്കു​ക​യാണ്‌: “ഇരിക്കു​ന്ന​വ​നും ഇരുന്ന​വ​നും വരുന്ന​വ​നു​മാ​യി സർവ്വശ​ക്തി​യുള്ള കർത്താ​വായ [യഹോവ] പരിശു​ദ്ധൻ, പരിശു​ദ്ധൻ, പരിശു​ദ്ധൻ.” (വെളി​പ്പാ​ടു 4:6-8) സിംഹാ​സ​ന​ത്തി​ന്റെ അടുക്കൽ യോഹ​ന്നാൻ ഒരു കുഞ്ഞാ​ടി​നെ​യും കാണുന്നു. അത്‌ ആരെയാ​യി​രി​ക്കും പ്രതി​നി​ധാ​നം ചെയ്യു​ന്നത്‌? ദൈവ​ത്തി​ന്റെ കുഞ്ഞാ​ടായ യേശു​ക്രി​സ്‌തു​വി​നെ​ത്തന്നെ.—വെളി​പ്പാ​ടു 5:13, 14.

19. ഈ അധ്യയ​ന​ത്തി​ലൂ​ടെ യഹോ​വ​യു​ടെ സ്ഥാപന​ത്തെ​ക്കു​റി​ച്ചു നിങ്ങൾ എന്തു മനസ്സി​ലാ​ക്കി?

¹⁹ അതു​കൊണ്ട്‌, ഈ ദർശനങ്ങൾ മുഖാ​ന്തരം നാം എന്താണു കണ്ടത്‌? സ്വർഗീയ സ്ഥാപന​ത്തി​ന്റെ പരകോ​ടി​യിൽ യഹോ​വ​യാം ദൈവം ഇരിക്കു​ന്നു, അവന്റെ കൂടെ വചനം അല്ലെങ്കിൽ ലോ​ഗോസ്‌ ആയ യേശു​ക്രി​സ്‌തു​വെന്ന കുഞ്ഞാ​ടും ഉണ്ട്‌. കൂടാതെ, സാറാ​ഫു​ക​ളും കെരൂ​ബു​ക​ളും ഉൾപ്പെട്ട സ്വർഗീയ ദൂതസം​ഘ​ത്തെ​യും നാം കണ്ടു. യഹോ​വ​യു​ടെ ഉദ്ദേശ്യ​ങ്ങൾക്കാ​യി സേവി​ക്കുന്ന ബൃഹത്തായ ഒരു ഏകീകൃത സ്ഥാപന​ത്തി​ന്റെ ഭാഗമാണ്‌ അവർ. ആ ഉദ്ദേശ്യ​ങ്ങ​ളി​ലൊന്ന്‌ ഈ അന്ത്യകാ​ലത്തു ലോക​വ്യാ​പ​ക​മാ​യി സുവാർത്ത ഘോഷി​ക്കുക എന്നതാണ്‌.—മർക്കൊസ്‌ 13:10; യോഹ​ന്നാൻ 1:1-3; വെളി​പ്പാ​ടു 14:6, 7.

20. അടുത്ത ലേഖന​ത്തിൽ ഏതു ചോദ്യ​ത്തെ​ക്കു​റിച്ച്‌ പരിചി​ന്തി​ക്കു​ന്ന​താ​യി​രി​ക്കും?

²⁰ അവസാ​ന​മാ​യി, പരമാ​ധി​കാ​രി​യാം കർത്താ​വി​ന്റെ ഇഷ്ടം എങ്ങനെ ചെയ്യാൻ കഴിയു​മെന്ന്‌ പഠിക്കു​ന്ന​തി​നാ​യി തങ്ങളുടെ രാജ്യ​ഹാ​ളു​ക​ളിൽ കൂടി​വ​രുന്ന യഹോ​വ​യു​ടെ സാക്ഷികൾ ഭൂമി​യി​ലുണ്ട്‌. സാത്താ​ന്റെ​യും സത്യത്തെ എതിർക്കു​ന്ന​വ​രു​ടെ​യും കൂടെ ഉള്ളതി​നെ​ക്കാൾ കൂടുതൽ പേർ നമ്മോടു കൂടെ ഉണ്ടെന്ന്‌ തീർച്ച​യാ​യും നമുക്ക്‌ ഇപ്പോൾ മനസ്സി​ലാ​ക്കാൻ കഴിയും. എന്നാൽ ഈ ചോദ്യം അവശേ​ഷി​ക്കു​ന്നു, രാജ്യ സുവാർത്ത പ്രസം​ഗി​ക്കു​ന്ന​തി​നോ​ടു ബന്ധപ്പെട്ട്‌ ഈ സ്വർഗീയ സ്ഥാപന​ത്തിന്‌ എന്താണു ചെയ്യാ​നു​ള്ളത്‌? അടുത്ത ലേഖനം അതും മറ്റു കാര്യ​ങ്ങ​ളും പരിചി​ന്തി​ക്കു​ന്ന​താ​യി​രി​ക്കും.

പുനര​വ​ലോ​ക​ന​ത്തി​നുള്ള ചോദ്യ​ങ്ങൾ

◻ യഹോ​വ​യു​ടെ സ്ഥാപനത്തെ വിലമ​തി​ക്കാൻ നാം എന്തു ഗ്രഹി​ക്കണം?

◻ എലീശാ​യു​ടെ ദാസനു​ണ്ടായ അനുഭവം എന്ത്‌, പ്രവാ​ചകൻ അവനെ എങ്ങനെ പ്രോ​ത്സാ​ഹി​പ്പി​ച്ചു?

◻ വ്യക്തി​പ​ര​മായ പഠനത്തെ നാം എങ്ങനെ വീക്ഷി​ക്കണം?

◻ ദാനീ​യേ​ലും യെശയ്യാ​വും യെഹെ​സ്‌കേ​ലും സ്വർഗീയ സ്ഥാപന​ത്തെ​ക്കു​റിച്ച്‌ വിശദാം​ശങ്ങൾ നൽകു​ന്നത്‌ എങ്ങനെ?

[13-ാം പേജിലെ ചിത്രം]

രുചികരമായി പാകം ചെയ്‌ത ആഹാര​ത്തെ​ക്കാൾ വളരെ മൂല്യ​വ​ത്താണ്‌ വ്യക്തി​പ​ര​മായ പഠനത്തി​ന്റെ പ്രയോ​ജ​ന​ങ്ങൾ

[15-ാം പേജിലെ ചിത്രം]

എലീശായുടെ പ്രാർഥ​ന​യ്‌ക്കുള്ള യഹോ​വ​യു​ടെ ഉത്തരം സ്വർഗീയ സൈന്യ​ങ്ങ​ളു​ടെ ഒരു ദർശന​മാ​യി​രു​ന്നു