കൊടും​ദാ​രി​ദ്ര്യ​ത്തിൽ നിന്നു സമ്പദ്‌സ​മൃ​ദ്ധി​യി​ലേക്ക്‌

മാൻവെൽ ദെ ഴസൂഷ്‌ ആൽമെയ്‌ദ പറഞ്ഞ​പ്ര​കാ​രം

1916 ഒക്ടോ​ബ​റിൽ ആയിരു​ന്നു എന്റെ ജനനം. പതി​നേഴു മക്കളിൽ ഏറ്റവും ഇളയവ​നാ​യി​രു​ന്നു ഞാൻ. കൂടപ്പി​റ​പ്പു​ക​ളിൽ ഒമ്പതു പേർ രോഗ​വും വികല​പോ​ഷ​ണ​വും നിമിത്തം മരണമ​ട​ഞ്ഞ​തി​നാൽ ഞാൻ അവരെ കണ്ടി​ട്ടേ​യില്ല. ശേഷിച്ച ഞങ്ങൾ എട്ടു​പേ​രും മാതാ​പി​താ​ക്ക​ളോ​ടൊത്ത്‌ പോർച്ചു​ഗ​ലി​ലെ പോർട്ടോ​യ്‌ക്കു സമീപ​മുള്ള ഒരു കൊച്ചു ഗ്രാമ​ത്തി​ലാ​ണു താമസി​ച്ചി​രു​ന്നത്‌.

ഞങ്ങളുടെ കൊച്ചു വീട്‌ ചെറി​യൊ​രു സ്വീകരണ മുറി​യും കിടപ്പ​റ​യും മാത്ര​മു​ള്ള​താ​യി​രു​ന്നു. ഏകദേശം അര കിലോ​മീ​റ്റർ ദൂരെ​യുള്ള ഒരു കിണറ്റിൽ നിന്നു വേണമാ​യി​രു​ന്നു കുടി​വെള്ളം കൊണ്ടു​വ​രാൻ. പാചക​സൗ​ക​ര്യ​ങ്ങ​ളാ​കട്ടെ പഴഞ്ചൻ രീതി​യിൽ ഉള്ളതാ​യി​രു​ന്നു.

പണി​യെ​ടു​ക്കാ​റാ​യ​പ്പോൾ മുതൽ, എന്റെ ജ്യേഷ്‌ഠ​ന്മാർ ചോള​വ​യ​ലിൽ വേല ചെയ്യാൻ തുടങ്ങി. അവർ സമ്പാദി​ക്കുന്ന പണവും കുടും​ബ​ത്തി​ന്റെ ഭക്ഷ്യാ​വ​ശ്യ​ങ്ങൾ നിറ​വേ​റ്റാ​നാ​യി ഉപയോ​ഗി​ച്ചി​രു​ന്നു. അൽപ്പ​മെ​ങ്കി​ലും പഠിപ്പ്‌ ഉണ്ടായി​രു​ന്നത്‌ എനിക്കു മാത്ര​മാ​യി​രു​ന്നു, അതും അവരുടെ സഹായം കൊണ്ട്‌. ജീവിതം പ്രാരാ​ബ്‌ധങ്ങൾ നിറഞ്ഞ​താ​യി​രു​ന്നെ​ങ്കി​ലും ഞങ്ങൾക്ക്‌ കത്തോ​ലി​ക്കാ സഭയോ​ടു കറകളഞ്ഞ കൂറു​ണ്ടാ​യി​രു​ന്നു. ഇത്‌ ഏതെങ്കി​ലും വിധത്തിൽ ഞങ്ങൾക്കു സഹായ​ക​ര​മാ​കും എന്നാണു ഞങ്ങൾ കരുതി​യി​രു​ന്നത്‌.

മേയ്‌ മാസത്തിൽ സഭ ഒമ്പതു​നോ​യമ്പ്‌ ആചരി​ച്ചി​രു​ന്നു. തുടർച്ച​യാ​യി ഒമ്പതു ദിവസം ഞങ്ങൾ നേരം വെളു​ക്കു​ന്ന​തി​നു മുമ്പ്‌ എഴു​ന്നേറ്റ്‌ പള്ളിയിൽ പോയി പ്രാർഥി​ക്കു​മാ​യി​രു​ന്നു. അങ്ങനെ ചെയ്‌താൽ ദൈവാ​നു​ഗ്രഹം ലഭിക്കും എന്നാണു ഞങ്ങൾ വിശ്വ​സി​ച്ചി​രു​ന്നത്‌. പുരോ​ഹി​തൻ പരിശു​ദ്ധ​നും ദൈവ​ത്തി​ന്റെ പ്രതി​പു​രു​ഷ​നും ആണെന്നു ഞങ്ങൾ വിചാ​രി​ച്ചി​രു​ന്നു. പക്ഷേ, കാലം കടന്നു​പോ​യ​തോ​ടെ ഞങ്ങളുടെ വീക്ഷണ​ത്തി​നു മാറ്റം വന്നു.

മെച്ചപ്പെട്ട ഒന്നിനു വേണ്ടി​യുള്ള അന്വേ​ഷ​ണം

കടുത്ത സാമ്പത്തിക ബുദ്ധി​മു​ട്ടു നിമിത്തം പള്ളിക്കു വിഹിതം കൊടു​ക്കാൻ നിർവാ​ഹ​മി​ല്ലാ​തെ വന്നപ്പോൾ പുരോ​ഹി​തൻ ഞങ്ങളോട്‌ യാതൊ​രു കനിവും കാട്ടി​യില്ല. ഇതു ഞങ്ങളെ നിരു​ത്സാ​ഹ​പ്പെ​ടു​ത്തി. സഭയോ​ടുള്ള എന്റെ മനോ​ഭാ​വ​ത്തി​നു സമൂല മാറ്റം വന്നു. അതു​കൊണ്ട്‌, വയലിലെ പണിയും സഭയു​മാ​യുള്ള വാദ​പ്ര​തി​വാ​ദ​ങ്ങ​ളും അല്ലാതെ ജീവി​ത​ത്തിൽ മെച്ചപ്പെട്ട എന്തെങ്കി​ലും ഉണ്ടോ എന്നു കണ്ടെത്താൻ 18-ാം വയസ്സിൽ ഞാൻ വീടു​വി​ട്ടി​റങ്ങി. 1936-ൽ ഞാൻ പോർച്ചു​ഗ​ലി​ന്റെ തലസ്ഥാന നഗരി​യായ ലിസ്‌ബ​ണിൽ എത്തി.

അവിടെ വെച്ച്‌ ഞാൻ എഡ്‌മി​നി​യയെ കണ്ടുമു​ട്ടി. മതം എന്നെ ചതി​ച്ചെ​ന്നാണ്‌ എനിക്കു തോന്നി​യി​രു​ന്ന​തെ​ങ്കി​ലും ആചാര​പ്ര​കാ​രം കത്തോ​ലി​ക്കാ പള്ളിയിൽ വെച്ചു​തന്നെ ഞങ്ങൾ വിവാ​ഹി​ത​രാ​യി. 1939-ൽ രണ്ടാം ലോക മഹായു​ദ്ധം തുടങ്ങി. യുദ്ധസ​മ​യത്ത്‌ 18 ആയുധ​പ്പു​ര​ക​ളു​ടെ ചുമതല എനിക്കാ​യി​രു​ന്നു. ദിവസ​വും 125 ലോറി യുദ്ധസാ​മ​ഗ്രി​കൾ വരെ ഞങ്ങൾ കയറ്റി അയയ്‌ക്കു​മാ​യി​രു​ന്നു.

യുദ്ധഭീ​തി മാത്രമല്ല കത്തോ​ലി​ക്കാ​സഭ യുദ്ധത്തിൽ പൂർണ​മാ​യി ഉൾപ്പെട്ടു എന്ന സംഗതി​യും എന്നെ ആഴത്തിൽ ചിന്തി​പ്പി​ച്ചു. ‘മനുഷ്യ​വർഗത്തെ സംബന്ധിച്ച്‌ ദൈവം യഥാർഥ​ത്തിൽ കരുതു​ന്നു​ണ്ടോ? ദൈവത്തെ എങ്ങനെ ആരാധി​ക്കണം?’ എന്നൊക്കെ ഞാൻ ചിന്തി​ക്കു​മാ​യി​രു​ന്നു. വർഷങ്ങൾ കഴിഞ്ഞ്‌, 1954-ൽ, യഹോ​വ​യു​ടെ സാക്ഷി​ക​ളിൽ ഒരാളായ, പ്രായ​മേ​റിയ ഒരു മാന്യ വ്യക്തി, എന്റെ ചോദ്യ​ങ്ങൾ സംബന്ധിച്ച്‌ എന്നോടു സംസാ​രി​ച്ചു. ഈ സംഭാ​ഷണം എന്റെ ജീവി​തത്തെ ഒന്നാകെ മാറ്റി​മ​റി​ച്ചു.

ബൈബിൾ പ്രത്യാശ രോമാ​ഞ്ച​മ​ണി​യി​ക്കു​ന്നു

ആഗോള പ്രശ്‌ന​ങ്ങൾക്കുള്ള ഏക പരിഹാ​രം ദൈവ​രാ​ജ്യ​മാ​ണെ​ന്നും രാജ്യ​ഭ​ര​ണ​ത്തി​ലൂ​ടെ മാത്രമേ സമാധാ​ന​വും സുരക്ഷി​ത​ത്വ​വും സാധ്യ​മാ​വു​ക​യു​ള്ളൂ എന്നും ജോഷ്വ എന്നു പേരുള്ള ആ വ്യക്തി എനിക്കു വിശദീ​ക​രി​ച്ചു​തന്നു. (മത്തായി 6:9, 10; 24:14) അദ്ദേഹം പറഞ്ഞ​തൊ​ക്കെ എനിക്ക്‌ വളരെ ഇഷ്ടമായി. എങ്കിലും, മതവു​മാ​യി ബന്ധപ്പെട്ട മുൻകാല അനുഭ​വങ്ങൾ നിമിത്തം അദ്ദേഹം നൽകിയ വിശദീ​ക​ര​ണങ്ങൾ സ്വീക​രി​ക്കാൻ എനിക്കു മടിയാ​യി​രു​ന്നു. പണം ആവശ്യ​പ്പെ​ട​രു​തെ​ന്നും രാഷ്‌ട്രീ​യം പറയരു​തെ​ന്നും ഉള്ള വ്യവസ്ഥ​യിൽ അദ്ദേഹ​ത്തി​ന്റെ സഹായ​ത്തോ​ടെ ബൈബിൾ പഠിക്കാൻ ഞാൻ സമ്മതിച്ചു. അദ്ദേഹ​ത്തി​നും അതു സമ്മതമാ​യി​രു​ന്നു. ബൈബിൾ പഠിപ്പി​ക്കു​ന്നത്‌ സൗജന്യ​മാ​യി​രി​ക്കും എന്ന്‌ അദ്ദേഹം ഉറപ്പു നൽകി.—വെളി​പ്പാ​ടു 22:17.

ജോഷ്വാ​യി​ലു​ള്ള എന്റെ വിശ്വാ​സം പെട്ടെ​ന്നു​തന്നെ വർധിച്ചു. അതു​കൊണ്ട്‌ ഞാൻ ചെറുപ്പം മുതലേ ആഗ്രഹിച്ച ഒരു സംഗതി അദ്ദേഹ​ത്തോ​ടു ചോദി​ച്ചു: “സ്വന്തമാ​യി ഒരു ബൈബിൾ ലഭിക്കു​മോ?” അതു ലഭിച്ച​ശേഷം, നമ്മുടെ സ്രഷ്ടാ​വി​ന്റെ വചനത്തിൽനിന്ന്‌ പിൻവ​രു​ന്നതു പോലുള്ള വാഗ്‌ദാ​നങ്ങൾ ആദ്യമാ​യി വായി​ച്ച​പ്പോൾ എനിക്ക്‌ എന്തു സന്തോഷം തോന്നി​യെ​ന്നോ: “ദൈവം താൻ അവരുടെ ദൈവ​മാ​യി അവരോ​ടു​കൂ​ടെ ഇരിക്കും. അവൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല; ഒന്നാമ​ത്തേതു കഴിഞ്ഞു​പോ​യി”!—വെളി​പ്പാ​ടു 21:3-5.

ദാരി​ദ്ര്യ​വും രോഗ​വും ഉന്മൂലനം ചെയ്യ​പ്പെ​ടു​ന്ന​തി​നെ കുറി​ച്ചുള്ള ബൈബിൾ വാഗ്‌ദാ​നങ്ങൾ എനിക്ക്‌ വിശേ​ഷാൽ ആശ്വാ​സ​പ്രദം ആയിരു​ന്നു. വിശ്വ​സ്‌ത​നായ ഏലീഹു ദൈവ​ത്തെ​ക്കു​റച്ച്‌ ഇങ്ങനെ പറഞ്ഞു: ‘അവൻ ആഹാരം ധാരാ​ള​മാ​യി കൊടു​ക്കു​ന്നു.’ (ഇയ്യോബ്‌ 36:31) ദൈവ​രാ​ജ്യ​ത്തി​ന്റെ നീതി​നി​ഷ്‌ഠ​മായ ഭരണത്തിൻ കീഴിൽ “എനിക്കു ദീനം എന്നു യാതൊ​രു നിവാ​സി​യും പറകയില്ല” എന്നു ബൈബിൾ പറയുന്നു. (യെശയ്യാ​വു 33:24) എത്ര സ്‌നേ​ഹ​നിർഭ​ര​മായ താത്‌പ​ര്യ​മാണ്‌ യഹോ​വ​യാം ദൈവ​ത്തി​നു മനുഷ്യ​വർഗ​ത്തോ​ടു​ള്ളത്‌! അവന്റെ വാഗ്‌ദാ​ന​ങ്ങ​ളി​ലുള്ള എന്റെ താത്‌പ​ര്യം എത്രമാ​ത്രം വർധി​ച്ചെ​ന്നോ!

യഹോ​വ​യു​ടെ സാക്ഷി​ക​ളു​ടെ ഒരു യോഗ​ത്തിൽ ഞാൻ ആദ്യമാ​യി സംബന്ധി​ച്ചത്‌ 1954 ഏപ്രിൽ 17-ന്‌ ആയിരു​ന്നു. അതൊരു പ്രത്യേക യോഗ​മാ​യി​രു​ന്നു—യേശു​വി​ന്റെ മരണത്തി​ന്റെ സ്‌മാ​ര​കാ​ച​രണം. അന്നു മുതൽ ഞാൻ യോഗങ്ങൾ മുടക്കി​യി​ട്ടില്ല. പെട്ടെ​ന്നു​തന്നെ, പഠിച്ചു​കൊ​ണ്ടി​രുന്ന നല്ല കാര്യ​ങ്ങളെ കുറിച്ചു ഞാൻ മറ്റുള്ള​വ​രോ​ടു പറയാൻ തുടങ്ങി. പോർച്ചു​ഗ​ലിൽ അക്കാലത്ത്‌, ഞങ്ങൾ എല്ലാ മാസവും സമീപ​ത്തുള്ള ഒരു ബീച്ചി​ലേക്ക്‌ ഉല്ലാസ​യാ​ത്ര പോയി​രു​ന്നു. അവി​ടെ​യാണ്‌ ഞങ്ങൾ സ്‌നാ​പനം നടത്തി​യി​രു​ന്ന​തും. ജോഷ്വ എന്നോട്‌ ആദ്യമാ​യി സംസാ​രിച്ച്‌ ഏഴു മാസം കഴിഞ്ഞ്‌ ഞാൻ യഹോ​വ​യാം ദൈവ​ത്തിന്‌ എന്നെത്തന്നെ സമർപ്പി​ക്കു​ക​യും കടലിൽ സ്‌നാ​പ​ന​മേൽക്കു​ക​യും ചെയ്‌തു.

1954-ൽ പോർച്ചു​ഗ​ലിൽ മൊത്തം നൂറോ​ളം സാക്ഷി​കളേ ഉണ്ടായി​രു​ന്നു​ള്ളൂ. അതു​കൊണ്ട്‌ പ്രസം​ഗ​വേ​ല​യിൽ നേതൃ​ത്വ​മെ​ടു​ക്കാൻ ധാരാളം സഹോ​ദ​ര​ന്മാ​രെ ആവശ്യ​മു​ണ്ടാ​യി​രു​ന്നു. ത്വരി​ത​ഗ​തി​യിൽ ആത്മീയ പുരോ​ഗതി നേടിയ എനിക്ക്‌ പെട്ടെ​ന്നു​തന്നെ സഭയിൽ ഉത്തരവാ​ദി​ത്വ സ്ഥാനങ്ങൾ ലഭിച്ചു. 1956-ൽ, ലിസ്‌ബ​ണിൽ രൂപം കൊണ്ട യഹോ​വ​യു​ടെ സാക്ഷി​ക​ളു​ടെ രണ്ടാമത്തെ സഭയിലെ സഭാദാ​സ​നാ​യി—അധ്യക്ഷ മേൽവി​ചാ​ര​കനെ അങ്ങനെ​യാണ്‌ വിളി​ച്ചി​രു​ന്നത്‌—ഞാൻ നിയമി​ത​നാ​യി. ഈ പട്ടണത്തി​ലും സമീപ പ്രദേ​ശ​ങ്ങ​ളി​ലു​മാ​യി ഇന്ന്‌ നൂറി​ല​ധി​കം സഭകളുണ്ട്‌.

അതിഥി​പ്രി​യം പ്രയോ​ജ​നങ്ങൾ കൈവ​രു​ത്തു​ന്നു

എഡ്‌മി​നി​യ​യും ഞാനും സാമ്പത്തിക പരാധീ​നത അനുഭ​വി​ച്ചി​രു​ന്നെ​ങ്കി​ലും, ക്രിസ്‌തീയ സഹോ​ദ​ര​ങ്ങൾക്ക്‌ എപ്പോ​ഴും ഞങ്ങളുടെ ഭവനത്തിൽ സ്വാഗ​ത​മു​ണ്ടാ​യി​രു​ന്നു. ഒരു പയനിയർ—യഹോ​വ​യു​ടെ സാക്ഷി​ക​ളായ മുഴു​സമയ സുവി​ശേ​ഷ​കരെ അങ്ങനെ​യാ​ണു വിളി​ക്കു​ന്നത്‌—ബ്രസീ​ലി​ലെ തന്റെ ഭവനത്തിൽനി​ന്നും ജർമനി​യി​ലെ “ജയോത്സവ രാജ്യ” അന്താരാ​ഷ്‌ട്ര കൺ​വെൻ​ഷ​നിൽ സംബന്ധി​ക്കാൻ പോകവെ പോർച്ചു​ഗ​ലിൽ തങ്ങി. യാത്രാ​ത​ടസ്സം മൂലം അദ്ദേഹം ഞങ്ങളുടെ ഭവനത്തിൽ ഒരു മാസ​ത്തോ​ളം താമസി​ച്ചു. ആത്മീയ അർഥത്തിൽ ഞങ്ങൾക്ക്‌ അദ്ദേഹ​ത്തിൽ നിന്ന്‌ ഒരു നിധി​തന്നെ ലഭിച്ചു!

ആ സമയത്ത്‌, ഞങ്ങളുടെ ഭവനം സന്ദർശി​ച്ച​വ​രിൽ ന്യൂ​യോർക്കി​ലെ ബ്രുക്ലി​നി​ലുള്ള യഹോ​വ​യു​ടെ സാക്ഷി​ക​ളു​ടെ കേന്ദ്ര ആസ്ഥാനത്തു നിന്നു​ള്ള​വ​രും പെടും. ഹ്യൂഗോ റീമെർ, അദ്ദേഹ​ത്തി​ന്റെ കൂടെ താമസി​ച്ചി​രുന്ന ചാൾസ്‌ എയ്‌ക്കർ തുടങ്ങി​യ​വ​രാണ്‌ അവരിൽ ചിലർ. അവർ ഞങ്ങളോ​ടൊത്ത്‌ ഭക്ഷണം കഴിക്കു​ക​യും പോർച്ചു​ഗീസ്‌ സഹോ​ദ​ര​ങ്ങൾക്കാ​യി പ്രസം​ഗങ്ങൾ നടത്തു​ക​യും ചെയ്‌തു. മുട്ട വിരിഞ്ഞ്‌ പുറത്തു വന്നിട്ട്‌ ഏറെനാൾ ആകാത്ത, ആഹാര​ത്തി​നാ​യി കൊതി​യോ​ടെ വായ്‌ തുറന്നി​രി​ക്കുന്ന, പക്ഷിക്കു​ഞ്ഞു​ങ്ങ​ളെ​പ്പോ​ലെ അവർ നൽകുന്ന പോഷ​ക​സ​മൃ​ദ്ധ​മായ ആത്മീയ വിഭവ​ങ്ങൾക്കാ​യി ഞങ്ങൾ കാത്തി​രു​ന്നു.

യഹോ​വ​യു​ടെ സാക്ഷി​ക​ളു​ടെ സഞ്ചാര മേൽവി​ചാ​ര​ക​ന്മാ​രും തങ്ങളുടെ സന്ദർശന സമയത്ത്‌ ഞങ്ങളുടെ ഭവനത്തിൽ താമസി​ച്ചി​രു​ന്നു. മൊ​റോ​ക്കോ ബ്രാഞ്ചി​ന്റെ മേൽവി​ചാ​ര​ക​നായ ആൽവരൂ ബേരെ​ക്കോ​ച്ചേ​യ​യു​ടെ 1957-ലെ സന്ദർശനം ഞങ്ങൾ ഇപ്പോ​ഴും ഓർക്കു​ന്നു. പോർച്ചു​ഗൽ സന്ദർശിച്ച്‌ അവിടു​ത്തെ സഹോ​ദ​ര​ങ്ങളെ പ്രോ​ത്സാ​ഹി​പ്പി​ക്കാൻ അദ്ദേഹ​ത്തെ​യാണ്‌ നിയമി​ച്ചി​രു​ന്നത്‌. ഞങ്ങളുടെ വീട്ടിലെ പുസ്‌തക അധ്യയ​ന​ത്തിൽ സംബന്ധിച്ച അദ്ദേഹത്തെ, പോർച്ചു​ഗ​ലിൽ നിന്നു പോകു​ന്ന​തു​വരെ ഞങ്ങളോ​ടൊത്ത്‌ താമസി​ക്കാൻ ഞങ്ങൾ നിർബ​ന്ധി​ച്ചു. ഒരു മാസം നീണ്ടു​നിന്ന അദ്ദേഹ​ത്തി​ന്റെ സന്ദർശ​ന​ത്താൽ ഞങ്ങൾ വളരെ​യ​ധി​കം അനു​ഗ്ര​ഹി​ക്ക​പ്പെട്ടു. ആത്മീയ​മാ​യി ഞങ്ങളും എഡ്‌മി​നി​യ​യു​ടെ നല്ല പാചകം നിമിത്തം ശാരീ​രി​ക​മാ​യി ആൽവരൂ​വും പുഷ്‌ടി പ്രാപി​ച്ചു.

ചെറു​പ്പ​ത്തിൽ ഞാൻ അനുഭ​വി​ച്ചതു പോലുള്ള കടുത്ത ദാരി​ദ്ര്യ​ത്തി​ന്റെ ഓർമകൾ ഒരു വ്യക്തി​യിൽ മായാതെ നിലനി​ന്നേ​ക്കാം. എങ്കിലും, നാം യഹോ​വ​യ്‌ക്കും അവന്റെ വിശ്വസ്‌ത ദാസർക്കും എത്രയ​ധി​കം കൊടു​ക്കു​ന്നു​വോ അത്രയ​ധി​കം യഹോ​വ​യാൽ അനു​ഗ്ര​ഹി​ക്ക​പ്പെ​ടും എന്നു ഞാൻ തിരി​ച്ച​റി​ഞ്ഞു. ഞങ്ങളാൽ കഴിയു​ന്ന​വർക്കെ​ല്ലാം ആതിഥ്യ​മ​രു​ളവെ, എനിക്ക്‌ അതു കൂടെ​ക്കൂ​ടെ ബോധ്യ​മാ​യി​ട്ടുണ്ട്‌.

1955-ൽ പോർട്ടോ​യിൽ വെച്ചു നടന്ന കൺ​വെൻ​ഷ​നിൽ, 1958-ൽ ന്യൂ​യോർക്കി​ലെ യാങ്കീ സ്റ്റേഡി​യ​ത്തിൽ നടക്കാൻ പോകുന്ന യഹോ​വ​യു​ടെ സാക്ഷി​ക​ളു​ടെ അന്താരാ​ഷ്‌ട്ര കൺ​വെൻ​ഷ​നെ​ക്കു​റി​ച്ചുള്ള അറിയിപ്പ്‌ നടത്ത​പ്പെട്ടു. പോർച്ചു​ഗീസ്‌ പ്രതി​നി​ധി​കളെ കൺ​വെൻ​ഷന്‌ അയയ്‌ക്കാ​നുള്ള പണം ശേഖരി​ക്കാൻ രാജ്യ​ത്തി​ലെ ഓരോ രാജ്യ​ഹാ​ളി​ലും ഓരോ സംഭാ​വ​ന​പ്പെട്ടി വെച്ചു—അക്കാലത്ത്‌ രാജ്യ​ഹാ​ളു​ക​ളു​ടെ എണ്ണം വളരെ കുറവാ​യി​രു​ന്നു. പ്രതി​നി​ധി​ക​ളാ​യി തിര​ഞ്ഞെ​ടു​ക്ക​പ്പെ​ട്ട​വ​രു​ടെ കൂടെ ഞാനും ഭാര്യ​യും ഉണ്ടായി​രു​ന്നു എന്ന്‌ അറിഞ്ഞ​പ്പോ​ഴത്തെ ഞങ്ങളുടെ സന്തോഷം നിങ്ങൾക്ക്‌ ഊഹി​ക്കാൻ കഴിയു​മോ? കൺ​വെൻ​ഷനു വേണ്ടി ഐക്യ​നാ​ടു​ക​ളിൽ പോയ​പ്പോൾ യഹോ​വ​യു​ടെ സാക്ഷി​ക​ളു​ടെ ബ്രുക്ലി​നി​ലുള്ള ലോക ആസ്ഥാനം സന്ദർശി​ക്കാൻ കഴിഞ്ഞത്‌ എത്ര സന്തോ​ഷ​ക​ര​മായ ഒരു അനുഭവം ആയിരു​ന്നു!

പീഡനം സഹിച്ചു​നിൽക്കൽ

1962-ൽ യഹോ​വ​യു​ടെ സാക്ഷി​ക​ളു​ടെ പ്രസംഗ പ്രവർത്തനം പോർച്ചു​ഗ​ലിൽ നിരോ​ധി​ക്ക​പ്പെട്ടു. എറിക്‌ ബ്രിറ്റൻ, ഡോമ​നിക്‌ പിക്കോ​നി, എറിക്‌ ബെവ്‌റിജ്‌ എന്നിവ​രും അവരുടെ ഭാര്യ​മാ​രും ഉൾപ്പെ​ടെ​യുള്ള മിഷന​റി​മാ​രെ രാജ്യ​ത്തു​നി​ന്നും പുറത്താ​ക്കി. പിന്നീട്‌, രാജ്യ​ഹാ​ളു​ക​ളിൽ യോഗങ്ങൾ നടത്താ​നുള്ള അനുവാ​ദ​വും നിഷേ​ധി​ക്ക​പ്പെട്ടു. അതു​കൊണ്ട്‌, ഞങ്ങൾ സ്വകാര്യ ഭവനങ്ങ​ളിൽ രഹസ്യ​മാ​യി കൂടി​വന്നു. പോർച്ചു​ഗ​ലിൽ വലിയ കൺ​വെൻ​ഷ​നു​കൾ നടത്താ​നും കഴിയാ​താ​യി. അതു​കൊണ്ട്‌, ക്രിസ്‌തീയ സഹോ​ദ​ര​ങ്ങൾക്ക്‌ മറ്റു രാജ്യ​ങ്ങ​ളിൽ പോയി അത്തരം കൺ​വെൻ​ഷ​നു​ക​ളിൽ സംബന്ധി​ക്കാ​നുള്ള യാത്രാ​ക്ര​മീ​ക​ര​ണങ്ങൾ ചെയ്യേണ്ട ഉത്തരവാ​ദി​ത്വം എന്റെ മേൽ നിക്ഷി​പ്‌ത​മാ​യി.

വലി​യൊ​രു കൂട്ടം സാക്ഷി​കൾക്കു മറ്റു രാജ്യ​ങ്ങ​ളി​ലേ​ക്കുള്ള യാത്രാ​ക്ര​മീ​ക​രണം ചെയ്യു​ന്നത്‌ അത്ര എളുപ്പ​മാ​യി​രു​ന്നില്ല. എങ്കിലും, പോർച്ചു​ഗീസ്‌ സഹോ​ദ​രങ്ങൾ നേടിയ അതിശ​യ​ക​ര​മായ ആത്മീയ പ്രയോ​ജ​നങ്ങൾ നോക്കു​മ്പോൾ അതു ശ്രമത്തി​നു തക്ക മൂല്യ​മു​ള്ള​താ​യി​രു​ന്നു. സ്വിറ്റ്‌സർലൻഡ്‌, ഇംഗ്ലണ്ട്‌, ഇറ്റലി, ഫ്രാൻസ്‌ എന്നീ രാജ്യ​ങ്ങ​ളിൽ കൺ​വെൻ​ഷനു സന്നിഹി​ത​രാ​കു​ന്നത്‌ അവർക്ക്‌ എന്തൊരു പ്രോ​ത്സാ​ഹ​ജ​ന​ക​മായ അനുഭ​വ​മാ​യി​രു​ന്നു! സ്വന്ത രാജ്യ​ത്തേക്ക്‌ സാഹി​ത്യ​ങ്ങൾ കൊണ്ടു​വ​രാ​നും അത്തരം കൺ​വെൻ​ഷ​നു​കൾ അവർക്ക്‌ അവസര​മേകി. ആ വർഷങ്ങ​ളി​ലെ​ല്ലാം, പോർച്ചു​ഗ​ലിൽ ഒരു മതസം​ഘ​ട​ന​യെന്ന നിലയിൽ രജിസ്‌​ട്രേഷൻ നേടു​ന്ന​തി​നു ഞങ്ങൾ നിരവധി അഭ്യർഥ​നകൾ നടത്തി. പക്ഷേ, അവയെ​ല്ലാം തള്ളപ്പെട്ടു.

1962-ന്റെ തുടക്ക​ത്തിൽ മിഷന​റി​മാ​രെ പുറത്താ​ക്കിയ ശേഷം രഹസ്യ​പൊ​ലീസ്‌ ഞങ്ങളുടെ പ്രസം​ഗ​പ്ര​വർത്തനം നിറു​ത്താ​നുള്ള ശ്രമങ്ങൾക്ക്‌ ആക്കം കൂട്ടി. നൂറു​ക​ണ​ക്കി​നു സഹോ​ദ​ര​ങ്ങളെ അറസ്റ്റു ചെയ്‌തു കോട​തി​യിൽ ഹാജരാ​ക്കി. ഈ സംഭവങ്ങൾ സംബന്ധിച്ച അനവധി റിപ്പോർട്ടു​കൾ ഈ മാസി​ക​യി​ലും കൂട്ടു​മാ​സി​ക​യായ ഉണരുക!യിലും പ്രസി​ദ്ധീ​ക​രി​ച്ചി​ട്ടുണ്ട്‌.a

പ്രസം​ഗ​പ്ര​വർത്തനം നിമിത്തം ജയിലിൽ അടയ്‌ക്ക​പ്പെ​ട്ട​വ​രിൽ, എന്നിൽ നിന്ന്‌ ദൈവ​രാ​ജ്യ സുവാർത്ത സ്വീക​രിച്ച ഒരു പയനി​യ​റും ഉണ്ടായി​രു​ന്നു. അദ്ദേഹ​ത്തി​ന്റെ വസ്‌തു​വ​ക​ക​ളു​ടെ കൂട്ടത്തിൽ നിന്ന്‌ എന്റെ മേൽവി​ലാ​സം ലഭിച്ച​തി​നാൽ പൊലീസ്‌ എന്നെ വിളിച്ചു ചോദ്യം ചെയ്‌തു.

പിന്നീട്‌ രണ്ടു പൊലീ​സു​കാർ എന്റെ വീട്ടിൽ വന്നു. അവർ എന്റെ ബൈബിൾ പഠന സഹായി​ക​ളും ബൈബി​ളി​ന്റെ 13 പ്രതി​ക​ളും കണ്ടു​കെട്ടി. ഞങ്ങളുടെ വീടും പരിസ​ര​വു​മെ​ല്ലാം പരി​ശോ​ധി​ക്കാൻ പല സമയങ്ങ​ളി​ലാ​യി ഏഴു പ്രാവ​ശ്യം മടങ്ങി​വ​ന്നു​കൊണ്ട്‌ അവർ ഞങ്ങളെ ശല്യം ചെയ്‌തു​കൊ​ണ്ടി​രു​ന്നു. ഓരോ പ്രാവ​ശ്യ​വും അവർ ഞങ്ങളെ ചോദ്യ​ങ്ങൾകൊണ്ട്‌ പൊറു​തി മുട്ടിച്ചു.

കോടതി കേസു​ക​ളിൽ സഹസാ​ക്ഷി​കൾക്കു വേണ്ടി മൊഴി നൽകാൻ അനേകം പ്രാവ​ശ്യം എന്നെ വിളി​പ്പി​ച്ചു. എനിക്ക്‌ വലിയ വിദ്യാ​ഭ്യാ​സ​മൊ​ന്നും ഇല്ലായി​രു​ന്നെ​ങ്കി​ലും ‘എതിരി​കൾക്കു ആർക്കും ചെറു​പ്പാ​നോ എതിർപ​റ​വാ​നോ കഴിയാത്ത ജ്ഞാനം’ യഹോവ എനിക്കു നൽകി. (ലൂക്കൊസ്‌ 21:15) ഒരവസ​ര​ത്തിൽ, എന്റെ മൊഴി കേട്ട്‌ അത്ഭുതം തോന്നിയ ജഡ്‌ജി, ഞാൻ എന്തു മാത്രം വിദ്യാ​ഭ്യാ​സം നേടി​യി​ട്ടു​ണ്ടെന്ന്‌ ചോദി​ച്ചു. നാലാം ക്ലാസ്സു​വ​രെയേ പഠിച്ചി​ട്ടു​ള്ളൂ എന്ന എന്റെ മറുപടി കേട്ട്‌ കോട​തി​മു​റി​യിൽ ഉണ്ടായി​രു​ന്ന​വ​രെ​ല്ലാം ചിരിച്ചു.

പീഡനം വർധിച്ചു, ഒപ്പം രാജ്യ​സ​ന്ദേ​ശ​ത്തോ​ടു പ്രതി​ക​രി​ക്കു​ന്ന​വ​രു​ടെ എണ്ണവും. അങ്ങനെ, 1962-ൽ 1,300-ൽ കുറവാ​യി​രുന്ന പോർച്ചു​ഗ​ലി​ലെ സാക്ഷി​ക​ളു​ടെ എണ്ണം 1974 ആയപ്പോ​ഴേ​ക്കും 13,000-ൽ അധിക​മാ​യി വർധിച്ചു! 1976 മേയിൽ സഞ്ചാര മേൽവി​ചാ​ര​ക​നാ​യി സേവി​ക്കാൻ എനിക്കു ക്ഷണം ലഭിച്ചു. യഹോ​വ​യു​ടെ സാക്ഷി​ക​ളു​ടെ സഭകൾ സന്ദർശി​ക്കു​ക​യും അവരെ ആത്മീയ​മാ​യി ശക്തി​പ്പെ​ടു​ത്തു​ക​യും ചെയ്യുക എന്നതാ​യി​രു​ന്നു ഈ വേലയിൽ ഉൾപ്പെ​ട്ടി​രു​ന്നത്‌.

ഏറ്റവും മഹത്തായ സമ്പത്ത്‌ ആസ്വദി​ക്കു​ന്നു

പോർച്ചു​ഗ​ലിൽ യഹോ​വ​യു​ടെ സാക്ഷി​ക​ളു​ടെ പ്രവർത്തനം നിയമ​പ​ര​മാ​ക്കിയ രജിസ്‌​ട്രേ​ഷ​നിൽ പങ്കെടു​ക്കാ​നുള്ള പദവി 1974 ഡിസം​ബ​റിൽ എനിക്കു ലഭിച്ചു. അടുത്ത വർഷം, ഞാനും ഭാര്യ​യും ഇഷ്‌റ്റൊ​റി​ലിൽ യഹോ​വ​യു​ടെ സാക്ഷി​ക​ളു​ടെ ബെഥേൽ കുടും​ബ​ത്തി​ലെ അംഗങ്ങൾ ആയിത്തീർന്നു. പോർച്ചു​ഗൽ ബ്രാഞ്ച്‌ കമ്മിറ്റി​യി​ലെ ഒരു അംഗമാ​യി സേവി​ക്കാ​നും ഞാൻ നിയമി​ത​നാ​യി.

പോർച്ചു​ഗ​ലി​ലും ഞങ്ങളുടെ ബ്രാഞ്ചി​ന്റെ മേൽനോ​ട്ട​ത്തി​ലുള്ള മറ്റു പ്രദേ​ശ​ങ്ങ​ളി​ലും പ്രസം​ഗ​പ്ര​വർത്തനം തഴച്ചു​വ​ള​രു​ന്നതു കാണു​ന്നത്‌ എത്രയോ സന്തോ​ഷ​ക​ര​മാണ്‌! ഇവയിൽ അംഗോള, അസോ​ഴ്‌സ്‌, കേപ്‌ വേർഡ്‌, മഡിറ, സാവോ ടോം & പ്രിൻസെപ്പ്‌ എന്നീ രാജ്യങ്ങൾ ഉൾപ്പെ​ടു​ന്നു. രാജ്യ​ദൂ​തിൽ ഗണ്യമായ താത്‌പ​ര്യം പ്രകട​മായ ഈ ദേശങ്ങ​ളി​ലേക്ക്‌ വർഷങ്ങ​ളി​ലു​ട​നീ​ളം പോർച്ചു​ഗ​ലിൽനിന്ന്‌ മിഷന​റി​മാ​രെ അയയ്‌ക്കു​ന്നതു കാണു​ന്നത്‌ സന്തോ​ഷ​കരം ആയിരു​ന്നി​ട്ടുണ്ട്‌. ഈ പ്രദേ​ശ​ങ്ങ​ളിൽ മൊത്തം 88,000-ലധികം രാജ്യ​ഘോ​ഷകർ ഉള്ളതിൽ ഞങ്ങൾക്കുള്ള സന്തോഷം ഒന്നാ​ലോ​ചി​ച്ചു നോക്കൂ! അതിൽ 47,000-ത്തിലധി​കം പേർ പോർച്ചു​ഗ​ലി​ലാണ്‌! ഈ രാജ്യ​ങ്ങ​ളിൽ 1998-ലെ സ്‌മാരക ഹാജർ 2,45,000 ആയിരു​ന്നു, 1954-ൽ ഞാൻ സാക്ഷി​യാ​യി​ത്തീർന്ന​പ്പോൾ അത്‌ 200-ൽ താഴെ​യാ​യി​രു​ന്നു.

“നിന്റെ പ്രാകാ​ര​ങ്ങ​ളിൽ കഴിക്കുന്ന ഒരു ദിവസം വേറെ ആയിരം ദിവസ​ത്തെ​ക്കാൾ ഉത്തമമ​ല്ലോ”എന്നു പറഞ്ഞ സങ്കീർത്ത​ന​ക്കാ​ര​നോട്‌ ഞാനും എഡ്‌മി​നി​യ​യും പൂർണ​ഹൃ​ദ​യ​ത്തോ​ടെ യോജി​ക്കു​ന്നു. (സങ്കീർത്തനം 84:10) എന്റെ ആദ്യകാല എളിയ പശ്ചാത്ത​ലത്തെ പിൽക്കാ​ലത്ത്‌ ഞാൻ ആസ്വദിച്ച ആത്മീയ ധനത്തോട്‌ തട്ടിച്ചു​നോ​ക്കു​മ്പോൾ പ്രവാ​ച​ക​നായ യെശയ്യാ​വി​നെ​പ്പോ​ലെ പറയാൻ ഞാൻ പ്രചോ​ദി​ത​നാ​യി​ത്തീ​രു​ന്നു: “യഹോവേ, നീ എന്റെ ദൈവ​മാ​കു​ന്നു; ഞാൻ നിന്നെ പുകഴ്‌ത്തും; ഞാൻ നിന്റെ നാമത്തെ സ്‌തു​തി​ക്കും; നീ അത്ഭുത​മാ​യി പണ്ടേയുള്ള ആലോ​ച​ന​കളെ വിശ്വ​സ്‌ത​ത​യോ​ടും സത്യ​ത്തോ​ടും കൂടെ അനുഷ്‌ഠി​ച്ചി​രി​ക്കു​ന്നു​വ​ല്ലോ. . . നീ എളിയ​വന്നു ഒരു ദുർഗ്ഗ​വും ദരി​ദ്രന്നു അവന്റെ കഷ്ടത്തിൽ ഒരു കോട്ട​യും. . . ആയിരി​ക്കു​ന്നു.”—യെശയ്യാ​വു 25:1, 4.

[അടിക്കു​റി​പ്പു​കൾ]

[24-ാം പേജിലെ ചിത്രം]

മുകളിൽ: 1958-ലെ ന്യൂ​യോർക്ക്‌ കൺ​വെൻ​ഷനു പ്രതി​നി​ധി​കളെ അയയ്‌ക്കാ​നുള്ള ക്രമീ​ക​ര​ണത്തെ കുറിച്ച്‌ ആൽമെയ്‌ദ സഹോ​ദരൻ ലിസ്‌ബ​ണിൽ വെച്ച്‌ അറിയി​ക്കു​ന്നു

മധ്യത്തിൽ: പാരീ​സിൽവെച്ചു നടത്തിയ “ഭൂമി​യിൽ സമാധാന” അന്താരാ​ഷ്‌ട്ര കൺ​വെൻ​ഷ​നിൽ സഭാദാ​സ​രു​ടെ ഒരു മാതൃകാ യോഗം നടത്തുന്നു

താഴെ: ഫ്രാൻസി​ലെ ഡിസ്‌ട്രി​ക്‌റ്റ്‌ കൺ​വെൻ​ഷനു പുറ​പ്പെ​ടാൻ സജ്ജമാ​കുന്ന വാടക​ബ​സു​കൾ

[25-ാം പേജിലെ ചിത്രം]

പോർച്ചുഗൽ ബ്രാഞ്ചിൽ പ്രഭാത ആരാധന നടത്തുന്നു

[25-ാം പേജിലെ ചിത്രം]

1988-ൽ സമർപ്പി​ക്ക​പ്പെട്ട പോർച്ചു​ഗൽ ബ്രാഞ്ച്‌

[26-ാം പേജിലെ ചിത്രം]

ബ്രുക്ലിൻ ബെഥേ​ലിൽ നിന്നു വന്ന ഹ്യൂഗോ റീമെർ സഹോ​ദ​രന്റെ പ്രസംഗം ഞങ്ങൾക്കു പ്രോ​ത്സാ​ഹ​ജ​ന​ക​മാ​യി​രു​ന്നു

[26-ാം പേജിലെ ചിത്രം]

എന്റെ ഭാര്യ​യോ​ടൊത്ത്‌