ആരാണ്‌ യഥാർഥ​ത്തിൽ ഈ ലോകത്തെ ഭരിക്കു​ന്നത്‌?

ആസൂ​ത്രിത കുറ്റകൃ​ത്യ​ങ്ങ​ളു​ടെ സൂത്ര​ധാ​ര​ന്മാ​രെ​യൊ​ന്നും നിങ്ങൾ കണ്ടിരി​ക്കാ​നി​ട​യില്ല. അതിനർഥം അങ്ങനെ​യു​ള്ളവർ ജീവി​ച്ചി​രി​ക്കു​ന്നി​ല്ലെ​ന്നാ​ണോ? അധോ​ലോ​ക​നാ​യ​ക​ന്മാർ മറ്റാരും അറിയാ​തെ​യാണ്‌ കുറ്റകൃ​ത്യ​ങ്ങൾക്ക്‌ നേതൃ​ത്വം കൊടു​ക്കു​ന്നത്‌. ഇരുമ്പ​ഴി​ക്കു​ള്ളി​ലാ​ണെ​ങ്കിൽപ്പോ​ലും തങ്ങളുടെ യഥാർഥ​മു​ഖം മറച്ചു​വെച്ച്‌ പ്രവർത്തി​ക്കു​ന്ന​തിൽ കുപ്ര​സി​ദ്ധ​രാണ്‌ അവർ. എന്നാൽ മയക്കു​മ​രു​ന്നു പോരാ​ട്ടങ്ങൾ, വേശ്യാ​വൃ​ത്തി സംഘങ്ങൾ, മനുഷ്യ​ക്ക​ട​ത്തു​കൾ എന്നിങ്ങനെ പത്രമാ​സി​ക​ക​ളിൽ നിറഞ്ഞു​നിൽക്കുന്ന വാർത്ത​ക​ളെ​ക്കു​റിച്ച്‌ ഒന്നു ചിന്തി​ക്കുക. എന്താണ്‌ ഇവ സൂചി​പ്പി​ക്കു​ന്നത്‌? ഇത്തരം നേതാ​ക്ക​ന്മാ​രു​ടെ ഗൂഢ​പ്ര​വർത്ത​നങ്ങൾ സമൂഹത്തെ ദുഷി​പ്പി​ക്കു​ക​യും ഗുരു​ത​ര​മായ പ്രത്യാ​ഘാ​തങ്ങൾ ഉണ്ടാക്കു​ക​യും ചെയ്യുന്നു എന്നല്ലേ? അതെ, സമൂഹ​ത്തിൽ അവർ സൃഷ്ടി​ച്ചി​രി​ക്കുന്ന വടുക്കൾ ഇത്തരം കുറ്റവാ​ളി​കൾ ഉണ്ട്‌ എന്നതിന്‌ വ്യക്തമായ തെളി​വു​നൽകു​ന്നു.

സാത്താൻ ഒരു യഥാർഥ വ്യക്തി​യാ​ണെന്ന്‌ ദൈവ​വ​ച​ന​മായ ബൈബിൾ വെളി​പ്പെ​ടു​ത്തു​ന്നു. ശക്തനായ ഒരു അധോ​ലോ​ക​നാ​യ​ക​നെ​പ്പോ​ലെ​യാണ്‌ അവൻ. “വ്യാജ​മായ അടയാ​ള​ങ്ങ​ളോ​ടും” “അനീതി​യോ​ടും എല്ലാത്തരം വഞ്ചന​യോ​ടും​കൂ​ടെ” തന്റെ ലക്ഷ്യങ്ങൾ നടപ്പാ​ക്കാൻ അവൻ ശ്രമി​ക്കു​ന്നു. “സാത്താൻത​ന്നെ​യും വെളി​ച്ച​ദൂ​ത​നാ​യി വേഷം​ധ​രി​ക്കു​ന്നു” എന്നാണ്‌ ബൈബിൾ പറയു​ന്നത്‌. (2 തെസ്സ​ലോ​നി​ക്യർ 2:9, 10; 2 കൊരി​ന്ത്യർ 11:14) പിശാ​ചി​ന്റെ പ്രവർത്ത​നങ്ങൾ അവന്റെ അസ്‌തി​ത്വ​ത്തിന്‌ തെളി​വു​നൽകു​ന്നുണ്ട്‌. എന്നിട്ടും അദൃശ്യ​നായ അത്തര​മൊ​രു ദുഷ്ട ആത്മജീവി ഉണ്ടെന്ന്‌ വിശ്വ​സി​ക്കാൻ പലർക്കും ബുദ്ധി​മുട്ട്‌ തോന്നു​ന്നു. പിശാ​ചി​നെ​ക്കു​റിച്ച്‌ ബൈബിൾ പറയുന്ന കാര്യങ്ങൾ കൂടുതൽ വിശദ​മാ​യി ചർച്ച​ചെ​യ്യു​ന്ന​തി​നു​മുമ്പ്‌, അവൻ ഒരു വ്യക്തി​യാ​ണെന്ന്‌ വിശ്വ​സി​ക്കു​ന്ന​തിന്‌ തടസ്സമാ​യി നിൽക്കുന്ന വാദങ്ങ​ളും ചില അബദ്ധധാ​ര​ണ​ക​ളും നമുക്ക്‌ ഇപ്പോൾ നോക്കാം.

◼ “സ്‌നേ​ഹ​വാ​നായ ഒരു ദൈവം പിശാ​ചി​നെ സൃഷ്ടി​ക്കു​മോ?” ദൈവം നല്ലവനും പൂർണ​നും ആണെന്ന്‌ ബൈബിൾ പറയുന്നു. ആ സ്ഥിതിക്ക്‌, ദുഷ്ടനും ക്രൂര​നും ആയ ഒരു വ്യക്തിയെ ദൈവം സൃഷ്ടി​ച്ച​താ​യി​രി​ക്കാം എന്നു ചിന്തി​ക്കു​ന്നത്‌ തികച്ചും വിരോ​ധാ​ഭാ​സ​മാ​യി​രി​ക്കും. വാസ്‌ത​വ​ത്തിൽ പിശാ​ചി​നെ ദൈവം സൃഷ്ടി​ച്ച​താ​യി ബൈബിൾ പറയു​ന്നില്ല. പകരം, ദൈവ​ത്തെ​ക്കു​റിച്ച്‌: “അവൻ പാറ; അവന്റെ പ്രവൃത്തി അത്യു​ത്തമം. അവന്റെ വഴികൾ ഒക്കെയും ന്യായം; അവൻ വിശ്വ​സ്‌ത​ത​യുള്ള ദൈവം, വ്യാജ​മി​ല്ലാ​ത്തവൻ; നീതി​യും നേരു​മു​ള്ളവൻ തന്നേ” എന്നാണ്‌ ബൈബിൾ പറയു​ന്നത്‌.—ആവർത്ത​ന​പു​സ്‌തകം 32:4; സങ്കീർത്തനം 5:4.

അങ്ങനെ​യെ​ങ്കിൽ ദൈവ​ത്താൽ സൃഷ്ടി​ക്ക​പ്പെട്ട പൂർണ​ത​യുള്ള ഒരു വ്യക്തിക്ക്‌ തിന്മ പ്രവർത്തി​ക്കാൻ കഴിയു​മോ? തന്റെ സൃഷ്ടി​കളെ റോ​ബോ​ട്ടു​ക​ളെ​പ്പോ​ലെയല്ല ദൈവം സൃഷ്ടി​ച്ചത്‌; ഇച്ഛാസ്വാ​ത​ന്ത്ര്യം അഥവാ സ്വന്തമാ​യി തീരു​മാ​നങ്ങൾ എടുക്കാ​നുള്ള പ്രാപ്‌തി അവൻ അവർക്കു നൽകി​യി​രി​ക്കു​ന്നു. തന്നിമി​ത്തം ബുദ്ധി​ശ​ക്തി​യുള്ള, പൂർണ​നായ ഒരു സൃഷ്ടിക്ക്‌ നന്മ ചെയ്യണോ തിന്മ ചെയ്യണോ എന്നു തീരു​മാ​നി​ക്കാൻ കഴിയും. അവർക്ക്‌ നന്മ പ്രവർത്തി​ക്കാൻ മാത്രമേ കഴിയു​ക​യു​ള്ളൂ എങ്കിൽ അവരുടെ പ്രവൃ​ത്തി​കൾക്ക്‌ എന്തെങ്കി​ലും ധാർമി​ക​മൂ​ല്യം ഉണ്ടെന്ന്‌ പറയാ​നാ​കു​മോ?

തന്റെ സൃഷ്ടി​കൾക്ക്‌ തെറ്റു​ചെ​യ്യാൻ കഴിയു​മെ​ന്നി​രി​ക്കെ ദൈവം അവരെ അതിനു അനുവ​ദി​ക്കാ​തി​രി​ക്കു​ക​യും അതേസ​മയം അവൻ അവർക്കു ധാർമിക സ്വാത​ന്ത്ര്യം നൽകി​യി​ട്ടു​ണ്ടെന്ന്‌ പറയു​ക​യും ചെയ്യു​ന്നത്‌ യുക്തി​യാ​യി​രി​ക്കു​മോ? തനിക്ക്‌ ലഭിച്ച ഇച്ഛാസ്വാ​ത​ന്ത്ര്യം പിശാച്‌ ദുരു​പ​യോ​ഗം ചെയ്‌ത​തി​നെ​ക്കു​റിച്ച്‌ യേശു ഒരിക്കൽ ഇങ്ങനെ പറയു​ക​യു​ണ്ടാ​യി: “അവൻ സത്യത്തിൽ നിലനി​ന്നില്ല.” (യോഹ​ന്നാൻ 8:44) ഈ പ്രസ്‌താ​വന ഒരു കാര്യം വ്യക്തമാ​ക്കു​ന്നു: ഒരിക്കൽ ‘സത്യത്തിൽ നിലനി​ന്നി​രുന്ന’ പൂർണ​നായ ഒരു ആത്മവ്യ​ക്തി​യാണ്‌ പിന്നീട്‌ പിശാ​ചാ​യി​ത്തീർന്നത്‌.a യഹോ​വ​യാം​ദൈവം തന്റെ സൃഷ്ടി​കൾക്ക്‌ ശരിയും തെറ്റും തിര​ഞ്ഞെ​ടു​ക്കാ​നുള്ള സ്വാത​ന്ത്ര്യം നൽകി​യി​രി​ക്കു​ന്നു. കാരണം, അവൻ അവരെ സ്‌നേ​ഹി​ക്കു​ക​യും വിശ്വ​സി​ക്കു​ക​യും ചെയ്യുന്നു.—“പൂർണ​ത​യുള്ള സൃഷ്ടിക്ക്‌ പൂർണത നഷ്ടപ്പെ​ടു​മോ?” എന്ന 26-ാം പേജിലെ ചതുരം കാണുക.

◼ “പിശാച്‌ ദൈവ​ത്തി​ന്റെ സഹായി​യാണ്‌” ഇങ്ങനെ​യൊ​രു ആശയം ബൈബിൾ പുസ്‌ത​ക​മായ ഇയ്യോ​ബിൽ കാണുന്നു എന്നാണ്‌ ചിലരു​ടെ അവകാ​ശ​വാ​ദം. പിശാച്‌ “ഭൂമി​യി​ലാ​കെ ചുറ്റി​സ​ഞ്ച​രി​ച്ചി​ട്ടു” വരുന്നു എന്ന ഇയ്യോ​ബി​ന്റെ പുസ്‌ത​ക​ത്തി​ലെ പ്രസ്‌താ​വ​നയെ പുരാ​ത​ന​കാ​ലത്തെ പേർഷ്യൻ ചാരന്മാ​രു​ടെ പ്രവർത്ത​ന​ത്തോട്‌ ഒരു ബൈബിൾ കമന്ററി ബന്ധപ്പെ​ടു​ത്തു​ക​യു​ണ്ടാ​യി; രാജ്യ​ത്തു​ട​നീ​ളം സഞ്ചരിച്ച്‌ രാജാ​വി​നു​വേണ്ടി വിവരങ്ങൾ ശേഖരി​ക്കുക എന്നതാ​യി​രു​ന്നു ഇവരുടെ ദൗത്യം. (ഇയ്യോബ്‌ 1:7, പി.ഒ.സി. ബൈബിൾ) പക്ഷേ, പിശാച്‌ വാസ്‌ത​വ​ത്തിൽ ദൈവ​ത്തി​ന്റെ ചാരനാ​യി​രു​ന്നെ​ങ്കിൽ താൻ “ഭൂമി​യി​ലാ​കെ ചുറ്റി​സ​ഞ്ച​രി​ച്ചി​ട്ടു” വരുന്നു എന്ന്‌ ദൈവ​ത്തോട്‌ വിശദീ​ക​രി​ക്കേണ്ട ആവശ്യ​മു​ണ്ടാ​യി​രു​ന്നോ? ഇയ്യോ​ബി​ന്റെ പുസ്‌തകം, പിശാ​ചി​നെ ദൈവ​ത്തി​ന്റെ സഹായി​യാ​യി ചിത്രീ​ക​രി​ക്കു​ന്നി​ല്ലെന്നു മാത്രമല്ല അവനെ “എതിരാ​ളി” എന്നർഥം വരുന്ന സാത്താൻ എന്നു വിളി​ക്കു​ക​യും ചെയ്യുന്നു. അതായത്‌, ദൈവ​ത്തി​ന്റെ മുഖ്യ ശത്രു​വാണ്‌ പിശാച്‌ എന്ന്‌ ബൈബിൾ വ്യക്തമാ​ക്കു​ന്നു. (ഇയ്യോബ്‌ 1:6) അങ്ങനെ​യെ​ങ്കിൽ പിശാച്‌ ദൈവ​ത്തി​ന്റെ സഹായി​യാ​ണെന്ന ആശയം എവി​ടെ​നി​ന്നു വന്നു?

എ.ഡി. ഒന്നാം നൂറ്റാ​ണ്ടി​ന്റെ തുടക്ക​ത്തിൽ എഴുത​പ്പെട്ട യഹൂദ അപ്പോ​ക്രി​ഫാ പുസ്‌ത​ക​ങ്ങ​ളിൽ, പിശാ​ചി​നെ ദൈവ​ത്തോ​ടു വാദി​ക്കു​ന്ന​വ​നാ​യും അതേസ​മയം ദൈവ​ത്തി​ന്റെ ഇഷ്ടത്തിന്‌ വഴങ്ങു​ന്ന​വ​നാ​യും ആണ്‌ ചിത്രീ​ക​രി​ച്ചി​രി​ക്കു​ന്നത്‌. പ്രൊ​ട്ട​സ്റ്റന്റ്‌ പരിഷ്‌കർത്താ​വായ മാർട്ടിൻ ലൂഥർ, പിശാ​ചി​നെ ദൈവ​ത്തി​ന്റെ ഒരു പണിയാ​യു​ധ​മാ​യി, “തന്റെ തോട്ടം ഒരുക്കു​ന്ന​തി​നു​വേണ്ടി ദൈവം ഉപയോ​ഗി​ക്കുന്ന ഒരു കൈത്തൂ​മ്പ​യാ​യി” കണക്കാ​ക്കി​യി​രു​ന്നു എന്ന്‌ മെഫി​സ്റ്റോ​ഫെ​ലസ്‌ എന്ന തന്റെ പുസ്‌ത​ക​ത്തിൽ ചരി​ത്ര​കാ​ര​നായ ജെ.ബി. റസ്സൽ പരാമർശി​ക്കു​ന്നു. “കള നീക്കം​ചെ​യ്യു​ന്നത്‌ കൈത്തൂമ്പ”യാണെ​ങ്കി​ലും ദൈവ​മാണ്‌ അത്‌ ഉപയോ​ഗി​ക്കു​ന്നത്‌, അതു​കൊണ്ട്‌ അത്‌ ദൈവ​ത്തി​ന്റെ ഹിതമാണ്‌ നടപ്പാ​ക്കു​ന്നത്‌ എന്ന്‌ ലൂഥർ വിശ്വ​സി​ച്ചി​രു​ന്ന​താ​യി റസ്സൽ കൂട്ടി​ച്ചേർക്കു​ന്നു. ലൂഥറി​ന്റെ ഈ പഠിപ്പി​ക്കൽ (ഫ്രഞ്ച്‌ ദൈവ​ശാ​സ്‌ത്ര​ജ്ഞ​നാ​യി​രുന്ന ജോൺ കാൽവിൻ പിന്നീട്‌ ഇത്‌ സ്വീക​രി​ക്കു​ക​യു​ണ്ടാ​യി) വിശ്വാ​സി​ക​ളായ പലരു​ടെ​യും നീതി​ബോ​ധത്തെ മുറി​പ്പെ​ടു​ത്തി: ദൈവം തിന്മ അനുവ​ദി​ക്കുക മാത്രമല്ല അതിന്‌ കാരണ​ക്കാ​ര​നാ​കു​ക​യും ചെയ്യുന്നു! സ്‌നേ​ഹ​നി​ധി​യായ ഒരു ദൈവ​ത്തിന്‌ അത്‌ എങ്ങനെ കഴിയും? (യാക്കോബ്‌ 1:13) ഈ പഠിപ്പി​ക്ക​ലും 20-ാം നൂറ്റാ​ണ്ടിൽ അരങ്ങേ​റി​യി​രി​ക്കുന്ന മറ്റ്‌ ഭയാനക സംഭവ​ങ്ങ​ളും ദൈവ​വും പിശാ​ചും ഇല്ല എന്നു വിശ്വ​സി​ക്കാ​നാണ്‌ പലരെ​യും പ്രേരി​പ്പി​ച്ചി​രി​ക്കു​ന്നത്‌.

◼ “പിശാച്‌ ഒരു വ്യക്തിയല്ല, തിന്മയു​ടെ പ്രതീ​ക​മാണ്‌” പിശാച്‌ തിന്മയു​ടെ ഒരു പ്രതീകം മാത്ര​മാ​ണെ​ങ്കിൽ ബൈബി​ളി​ലെ ചില വിവര​ണങ്ങൾ മനസ്സി​ലാ​ക്കാൻ സാധി​ക്കു​ക​യില്ല. ഉദാഹ​ര​ണ​ത്തിന്‌, ഇയ്യോബ്‌ 2:3-6-ൽ വിവരി​ച്ചി​രി​ക്കുന്ന സംഭാ​ഷ​ണ​ത്തിൽ ദൈവം ആരോ​ടാ​യി​രി​ക്കും സംസാ​രി​ച്ചത്‌? ഇയ്യോ​ബിൽത്തന്നെ കുടി​കൊ​ള്ളുന്ന തിന്മ എന്ന അമൂർത്ത​മായ ദുർഗു​ണ​ത്തോ​ടാ​യി​രു​ന്നോ അതോ തന്നോ​ടു​ത​ന്നെ​യാ​യി​രു​ന്നോ? കൂടാതെ, ഇയ്യോ​ബി​ന്റെ നന്മയെ വാഴ്‌ത്തിയ ദൈവം അടുത്ത​നി​മി​ഷം അവനെ പരീക്ഷി​ക്കാൻ തിന്മയെ അനുവ​ദി​ക്കു​ക​യാ​യി​രു​ന്നു എന്നുവ​രി​ല്ലേ? ഇത്തരം ആരോ​പ​ണങ്ങൾ ദൈവ​ത്തെ​ക്കു​റിച്ച്‌ നടത്തു​ന്നെ​ങ്കിൽ “അവനിൽ നീതി​കേ​ടില്ല” എന്നു പറയു​ന്ന​തി​നു​പ​കരം അവനെ ഒരു നീചനാ​യി ചിത്രീ​ക​രി​ക്കു​ക​യാ​യി​രി​ക്കും. (സങ്കീർത്തനം 92:15) ഇയ്യോ​ബി​ന്റെ ദോഷ​ത്തി​നാ​യി ‘കൈ നീട്ടാൻ’ ദൈവം വിസമ്മ​തി​ക്കു​ക​യാ​യി​രു​ന്നു എന്നതാണ്‌ സത്യം. പിശാച്‌ യഥാർഥ​ത്തിൽ തിന്മയു​ടെ പ്രതീ​ക​മോ ദൈവ​ത്തി​ന്റെ വ്യക്തി​ത്വ​ത്തി​ന്റെ ഇരുണ്ട വശമോ അല്ല. മറിച്ച്‌ സ്വയം ദൈവ​ത്തി​ന്റെ ശത്രു​വാ​യി​ത്തീർന്ന ഒരു ആത്മവ്യ​ക്തി​യാണ്‌.

ആരാണ്‌ യഥാർഥ​ത്തിൽ ഈ ലോകത്തെ ഭരിക്കു​ന്നത്‌?

പിശാച്‌ ഉണ്ട്‌ എന്നു വിശ്വ​സി​ക്കു​ന്നത്‌ ഒരു പഴഞ്ചൻ ആശയമാ​യി പലർക്കും തോന്നു​ന്നു. പക്ഷേ, പിശാ​ചി​നെ മാറ്റി​നി​റു​ത്തി​യാൽ ഇന്ന്‌ കൊടി​കു​ത്തി​വാ​ഴുന്ന ദുഷ്ടത​യ്‌ക്കും മറ്റും തൃപ്‌തി​ക​ര​മായ വിശദീ​ക​ര​ണ​മില്ല എന്നതാണ്‌ യാഥാർഥ്യം. പല ആളുക​ളും ദൈവ​ത്തിൽ വിശ്വ​സി​ക്കാ​തി​രി​ക്കു​ന്ന​തി​നും ധാർമി​ക​ത​യു​ടെ അതിർവ​ര​മ്പു​കൾക്ക്‌ വിലകൽപ്പി​ക്കാ​തി​രി​ക്കു​ന്ന​തി​നും കാരണം​തന്നെ പിശാച്‌ ഇല്ല എന്ന ചിന്താ​ഗ​തി​യാണ്‌.

19-ാം നൂറ്റാ​ണ്ടിൽ ജീവി​ച്ചി​രുന്ന ചാൾസ്‌ പിയ്‌ർ ബോദ്‌ലെർ എന്ന കവി ഇങ്ങനെ എഴുതി: “താൻ സ്ഥിതി​ചെ​യ്യു​ന്നി​ല്ലെന്നു നമ്മെ വിശ്വ​സി​പ്പി​ക്കുക എന്നതാണ്‌ പിശാ​ചി​ന്റെ ഏറ്റവും ഗൂഢമായ തന്ത്രം.” താൻ ആരാ​ണെന്ന്‌ മറച്ചു​വെ​ക്കു​ന്ന​തി​ലൂ​ടെ ദൈവ​ത്തി​ന്റെ അസ്‌തി​ത്വ​ത്തി​ലാണ്‌ പിശാച്‌ സംശയം ജനിപ്പി​ച്ചി​രി​ക്കു​ന്നത്‌. പിശാച്‌ എന്നൊ​രാൾ ഇല്ലെങ്കിൽ എല്ലാ തിന്മകൾക്കും കാരണ​ക്കാ​രൻ ദൈവ​മാ​ണെന്ന്‌ ആളുകൾ വിശ്വ​സി​ക്കും; അത്‌ ദൈവ​ത്തി​ലുള്ള വിശ്വാ​സം നഷ്ടമാ​കു​ന്ന​തിന്‌ കാരണ​മാ​കും. അതുത​ന്നെ​യല്ലേ പിശാ​ചി​ന്റെ ആഗ്രഹ​വും?

തന്റെ ഗൂഢോ​ദ്ദേ​ശ്യം നടപ്പാ​ക്കു​ന്ന​തി​നു​വേണ്ടി ഒരു അധോ​ലോ​ക​നാ​യ​ക​നെ​പ്പോ​ലെ പിശാച്‌ തന്റെ യഥാർഥ​മു​ഖം മറച്ചു​വെ​ക്കു​ന്നു. എന്താണ്‌ അവന്റെ ഉദ്ദേശ്യം? ബൈബിൾ പറയുന്നു: “ഈ ലോക​ത്തി​ന്റെ ദൈവം അവിശ്വാ​സി​ക​ളു​ടെ മനസ്സ്‌ അന്ധമാ​ക്കി​യി​രി​ക്കു​ന്നു; ദൈവ​ത്തി​ന്റെ പ്രതി​രൂ​പ​മായ ക്രിസ്‌തു​വി​ന്റെ മഹത്ത്വ​മാർന്ന സുവി​ശേ​ഷ​ത്തി​ന്റെ വെളിച്ചം അവരു​ടെ​മേൽ പ്രകാ​ശി​ക്കാ​തി​രി​ക്കേ​ണ്ട​തി​നു​തന്നെ.”—2 കൊരി​ന്ത്യർ 4:4.

ഇപ്പോൾ ഒരു സുപ്ര​ധാന ചോദ്യം അവശേ​ഷി​ക്കു​ന്നു: സകല ദുഷ്ടത​യ്‌ക്കും കഷ്ടപ്പാ​ടി​നും പിന്നി​ലുള്ള ഈ സൂത്ര​ധാ​രനെ ദൈവം എന്തു​ചെ​യ്യും? അടുത്ത ലേഖനം ഇത്‌ ചർച്ച​ചെ​യ്യു​ന്ന​താ​യി​രി​ക്കും. (w11-E 09/01)

[അടിക്കു​റിപ്പ്‌]

[25-ാം പേജിലെ ആകർഷക വാക്യം]

പിശാച്‌ ദൈവ​ത്തി​ന്റെ സഹായി​യോ അതോ എതിരാ​ളി​യോ?

[26-ാം പേജിലെ ചതുരം/ചിത്രം]

പൂർണതയുള്ള സൃഷ്ടിക്ക്‌ പൂർണത നഷ്ടപ്പെ​ടു​മോ?

ബുദ്ധി​ശ​ക്തി​യുള്ള തന്റെ സൃഷ്ടി​കളെ ദൈവം പൂർണ​രാ​യാണ്‌ സൃഷ്ടി​ച്ച​തെ​ങ്കി​ലും അവർക്ക്‌ എന്തും ചെയ്യാ​നുള്ള സ്വാത​ന്ത്ര്യം ഉണ്ടെന്ന്‌ അത്‌ അർഥമാ​ക്കി​യില്ല. സ്രഷ്ടാവ്‌ വെച്ചി​രുന്ന പ്രകൃ​തി​നി​യ​മ​ങ്ങളെ ആദാം അനുസ​രി​ക്കേ​ണ്ടി​യി​രു​ന്നു. ഉദാഹ​ര​ണ​ത്തിന്‌, കല്ലോ മണ്ണോ തടിയോ ഒക്കെ ഭക്ഷിക്കാൻ അവനു കഴിയു​മാ​യി​രു​ന്നില്ല; അപ്രകാ​രം ചെയ്‌താൽ അതിന്റെ ഭവിഷ്യ​ത്തു​കൾ അവൻ അനുഭ​വി​ക്കേ​ണ്ടി​വ​രു​മാ​യി​രു​ന്നു. ഗുരു​ത്വാ​കർഷണ നിയമം അവഗണി​ച്ചു​കൊണ്ട്‌ ഉയരത്തിൽനിന്ന്‌ ചാടു​ന്ന​പക്ഷം അവന്‌ ഗുരു​ത​ര​മാ​യി പരി​ക്കേൽക്കു​ക​യോ മരണം സംഭവി​ക്കു​ക​യോ ചെയ്യു​മാ​യി​രു​ന്നു.

സമാന​മാ​യി, മനുഷ്യ​രോ ദൂതന്മാ​രോ ആയി​ക്കൊ​ള്ളട്ടെ, പൂർണ​ത​യുള്ള ഒരു സൃഷ്ടി​ക്കും ദൂഷ്യ​ഫ​ല​ങ്ങ​ളൊ​ന്നും കൂടാതെ ദൈവം വെച്ചി​രി​ക്കുന്ന ധാർമിക അതിർവ​ര​മ്പു​കൾ ലംഘി​ക്കാ​നാ​കില്ല. അതിനാൽ ബുദ്ധി​ശ​ക്തി​യുള്ള ഒരു സൃഷ്ടി തന്റെ ഇച്ഛാസ്വാ​ത​ന്ത്ര്യം ദുരു​പ​യോ​ഗം ചെയ്യു​ക​യാ​ണെ​ങ്കിൽ അത്‌ അകൃത്യ​ത്തി​ലേ​ക്കും പാപത്തി​ലേ​ക്കും നയിക്കും.—ഉല്‌പത്തി 1:29; മത്തായി 4:4.